8. கண்டு³படிச்சா²தி³ஸிக்கா²பத³ம்

537. அட்ட²மே ‘‘கத்தா²’’திஆதீ³னி வுத்தனயானேவ.

539. ‘‘யஸ்ஸா’’தி பத³ஸ்ஸ விஸயம் த³ஸ்ஸேதும் வுத்தம் ‘‘பி⁴க்கு²னோ’’தி. ‘‘நாபி⁴யா ஹேட்டா²’’தி இமினா நாபி⁴யா அதோ⁴ அதோ⁴னாபீ⁴தி வசனத்த²ம் த³ஸ்ஸேதி, ‘‘ஜாணுமண்ட³லானம் உபரீ’’தி இமினா ஜாணுமண்ட³லானம் உப்³ப⁴ உப்³ப⁴ஜாணுமண்ட³லந்தி. உப்³ப⁴ஸத்³தோ³ ஹி உபரிபரியாயோ ஸத்தம்யந்தனிபாதோ. கண்டு³க²ஜ்ஜுஸத்³தா³னம் வேவசனத்தா வுத்தம் ‘‘கண்டூ³தி க²ஜ்ஜூ’’தி. கண்ட³தி பே⁴த³னம் கரோதீதி கண்டு³. க²ஜ்ஜதி ப்³யத⁴னம் கரோதீதி க²ஜ்ஜு. கேஸுசி போத்த²கேஸு ‘‘கச்சூ²’’தி பாடோ² அத்தி², ஸோ அயுத்தோ.

லோஹிதம் துண்ட³ம் ஏதிஸ்ஸாதி லோஹிததுண்டி³கா. பிளயதி விபா³த⁴யதீதி பிளகா. ஆ பு⁴ஸோ அஸுசிம் ஸவதி பக்³க⁴ராபேதீதி அஸ்ஸாவோதி வசனத்த²ம் த³ஸ்ஸேந்தோ ஆஹ ‘‘அஸுசிபக்³க⁴ரண’’ந்தி. அரிஸஞ்ச ப⁴க³ந்த³ரா ச மது⁴மேஹோ ச. ஆதி³ஸத்³தே³ன து³ன்னாமகாத³யோ ஸங்க³ண்ஹாதி. தத்த² அரி விய ஈஸதி அபி⁴ப⁴வதீதி அரிஸம். ப⁴க³ம் வுச்சதி வச்சமக்³க³ம், தம் த³ரதி பா²லேதீதி ப⁴க³ந்த³ரா, கூ³த²ஸமீபே ஜாதோ வணவிஸேஸோ. மது⁴ விய முத்தாதி³ம் மிஹதி ஸேசதீதி மது⁴மேஹோ, ஸோ ஆபா³தோ⁴ முத்தமேஹோ ஸுக்கமேஹோ ரத்தமேஹோதி அனேகவிதோ⁴. து²ல்லஸத்³தோ³ மஹந்தபரியாயோதி ஆஹ ‘‘மஹா’’தி. அட்ட²மம்.