6. ஸுராபானவக்³கோ³

1. ஸுராபானஸிக்கா²பத³-அத்த²யோஜனா

326. ஸுராபானவக்³க³ஸ்ஸ பட²மே ப⁴த்³தா³ வதி ஏத்தா²தி ப⁴த்³த³வதிகாதி ச, ப⁴த்³தா³ வதி ப⁴த்³த³வதி, ஸா ஏத்த² அத்தீ²தி ப⁴த்³த³வதிகாதி ச அத்த²ம் த³ஸ்ஸேந்தோ ஆஹ ‘‘ஸோ’’திஆதி³. ஸோதி கா³மோ லபீ⁴தி ஸம்ப³ந்தோ⁴. பத²ம் க³ச்ச²ந்தீதி பதா²வினோதி கதே அத்³தி⁴காயேவாதி ஆஹ ‘‘அத்³தி⁴கா’’தி. அத்³த⁴ம் க³ச்ச²ந்தீதி அத்³தி⁴கா. ‘‘பதி²கா’’திபி பாடோ², அயமேவத்தோ². ‘‘தேஜஸா தேஜ’’ந்திபதா³னி ஸம்ப³ந்தா⁴பேக்கா²னி ச ஹோந்தி, பதா³னம் ஸமானத்தா ஸம்ப³ந்தோ⁴ ச ஸமானோதி மஞ்ஞிதும் ஸக்குணேய்யா ச ஹோந்தி, தஸ்மா தேஸம் ஸம்ப³ந்த⁴ஞ்ச தஸ்ஸ அஸமானதஞ்ச த³ஸ்ஸேதும் வுத்தம் ‘‘அத்தனோ தேஜஸா நாக³ஸ்ஸ தேஜ’’ந்தி. ‘‘ஆனுபா⁴வேனா’’திஇமினா பன தேஜஸத்³த³ஸ்ஸ அத்த²ம் த³ஸ்ஸேதி. கபோதஸ்ஸ பாதோ³ கபோதோ உபசாரேன, தஸ்ஸ ஏஸோ காபோதோ, வண்ணோ. காபோதோ விய வண்ணோ அஸ்ஸாதி காபோதிகாதி த³ஸ்ஸேந்தோ ஆஹ ‘‘கபோதபாத³ஸமவண்ணரத்தோபா⁴ஸா’’தி. பஸன்னஸத்³த³ஸ்ஸ பஸாத³ஸத்³தா⁴த³யோ நிவத்தேதும் ‘‘ஸுராமண்ட³ஸ்ஸேதம் அதி⁴வசன’’ந்தி வுத்தம். பஞ்சாபி⁴ஞ்ஞஸ்ஸ ஸதோதி பஞ்சாபி⁴ஞ்ஞஸ்ஸ ஸமானஸ்ஸ ஸாக³தஸ்ஸாதி யோஜனா.

328. ‘‘மது⁴கபுப்பா²தீ³னம் ரஸேன கதோ’’திஇமினா புப்பா²னம் ரஸேன கதோ ஆஸவோ புப்பா²ஸவோதி வசனத்த²ம் த³ஸ்ஸேதி. ஏஸ நயோ ‘‘ப²லாஸவோ’’திஆதீ³ஸுபி. ஸுராமேரயானம் விஸேஸம் த³ஸ்ஸேதும் வுத்தம் ‘‘ஸுரா நாமா’’திஆதி³. பிட்ட²கிண்ணபக்கி²த்தாதி பிட்டே²ன ச கிண்ணேன ச பக்கி²த்தா கதா வாருணீதி ஸம்ப³ந்தோ⁴. கிண்ணாதி ச ஸுராய பீ³ஜம். தஞ்ஹி கிரந்தி நானாஸம்பா⁴ரானி மிஸ்ஸீப⁴வந்தி ஏத்தா²தி கிண்ணாதி வுச்சதி. தஸ்ஸாயேவ மண்டே³தி யோஜனா. ஸுரனாமகேன ஏகேன வனசரகேன கதாதி ஸுரா. மத³ம் ஜனேதீதி மேரயம்.

329. லோணஸோவீரகந்தி ஏவம்னாமகம் பானம். ஸுத்தந்திபி ஏவமேவ. தஸ்மிந்தி ஸூபஸம்பாகே. தேலம் பன பசந்தீதி ஸம்ப³ந்தோ⁴. நத்தி² திகி²ணம் மஜ்ஜம் ஏத்தா²தி அதிகி²ணமஜ்ஜம், அதிகி²ணமஜ்ஜே தஸ்மிம்யேவ தேலேதி அத்தோ². யம் பனாதி தேலம் பன. திகி²ணம் மஜ்ஜம் இமஸ்ஸ தேலஸ்ஸாதி திகி²ணமஜ்ஜம். யத்தா²தி தேலே. அரிட்டோ²தி ஏவம்னாமகம் பே⁴ஸஜ்ஜம். தந்தி அரிட்ட²ம், ‘‘ஸந்தா⁴யா’’திபதே³ அவுத்தகம்மம். ஏதந்தி ‘‘அமஜ்ஜம் அரிட்ட²’’ந்திவசனம், ‘‘வுத்த’’ந்திபதே³ வுத்தகம்மந்தி. பட²மம்.

2. அங்கு³லிபதோத³கஸிக்கா²பத³ம்

330. து³தியே அங்கு³லீஹி பதுஜ்ஜனம் அங்கு³லிபதோதோ³, ஸோயேவ அங்கு³லிபதோத³கோதி த³ஸ்ஸேந்தோ ஆஹ ‘‘அங்கு³லீஹீ’’திஆதி³. உத்தந்தோதி அவதபந்தோ. அவதபந்தோதி ச அத்த²தோ கிலமந்தோயேவாதி ஆஹ ‘‘கிலமந்தோ’’தி. கிலமந்தோ ஹுத்வாதி யோஜனா. அஸ்ஸாஸக³ஹணேன பஸ்ஸாஸோபி க³ஹேதப்³போ³தி ஆஹ ‘‘அஸ்ஸாஸபஸ்ஸாஸஸஞ்சாரோ’’தி. தம்பீதி பி⁴க்கு²னிம்பீதி. து³தியம்.

3. ஹஸத⁴ம்மஸிக்கா²பத³ம்

335. ததியே பகாரேன கரீயதி ட²பீயதீதி பகதம் பஞ்ஞத்தந்தி த³ஸ்ஸேந்தோ ஆஹ ‘‘யம் ப⁴க³வதா’’திஆதி³. யந்தி ஸிக்கா²பத³ம்.

336. ஹஸஸங்கா²தோ த⁴ம்மோ ஸபா⁴வோ ஹஸத⁴ம்மோதி வுத்தே அத்த²தோ கீளிகாயேவாதி ஆஹ ‘‘கீளிகா வுச்சதீ’’தி.

337. கோ³ப்ப²கானந்தி சரணக³ண்டி²கானம். தே ஹி பாதே³ பாத³ம் ட²பனகாலே அஞ்ஞமஞ்ஞூபரி ட²பனதோ கோ³பீயந்தீதி கோ³ப்பா², தே ஏவ கோ³ப்ப²காதி வுச்சந்தி. பாத³ஸ்ஸ ஹி உபரி பாத³ம் ட²பனகாலே ஏகஸ்ஸ உபரி ஏகோ ந ட²பேதப்³போ³. தேனாஹ ப⁴க³வா ‘‘பாதே³ பாத³ம் அச்சாதா⁴யா’’தி (தீ³. நி. 2.196; ம. நி. 1.423; அ. நி. 3.16). ஓட்ட²ஜோ து³தியோ. ஓரோஹந்தஸ்ஸ பி⁴க்கு²னோதி ஸம்ப³ந்தோ⁴.

338. பி²யாரித்தாதீ³ஹீதி ஆதி³ஸத்³தே³ன லங்காராத³யோ ஸங்க³ண்ஹாதி. கேசி வத³ந்தீதி ஸம்ப³ந்தோ⁴. பதனுப்பதனவாரேஸூதி பதனவார உப்பதனவாரேஸு. தத்தா²தி தஸ்ஸம் கி²த்தகத²லாயம். ஹீதி ஸச்சம், யஸ்மா வா. ட²பேத்வா கீளந்தஸ்ஸாதி ஸம்ப³ந்தோ⁴. லிகி²தும் வட்டதி கீளாதி⁴ப்பாயஸ்ஸ விரஹிதத்தாதி அதி⁴ப்பாயோ. கீளாதி⁴ப்பாயேன அத்த²ஜோதகம் அக்க²ரம் லிக²ந்தஸ்ஸாபி ஆபத்தியேவாதி வத³ந்தி. ஏத்தா²தி இமஸ்மிம் ஸிக்கா²பதே³தி. ததியம்.

4. அனாத³ரியஸிக்கா²பத³ம்

342. சதுத்தே² த⁴ம்மோ நாம தந்தியேவாதி ஆஹ ‘‘தந்தீ’’தி. பவேணீதி தஸ்ஸேவ வேவசனம். ‘‘தம் வா ந ஸிக்கி²துகாமோ’’தி ஏத்த² தம்ஸத்³த³ஸ்ஸ அத்த²மாவிகாதும் வுத்தம் ‘‘யேன பஞ்ஞத்தேனா’’தி. வினயே அபஞ்ஞத்தம் ஸந்தா⁴ய வுத்தம் ‘‘அபஞ்ஞத்தேனா’’தி ஆஹ ‘‘ஸுத்தே வா அபி⁴த⁴ம்மே வா ஆக³தேனா’’தி.

344. பவேணியாதி உபாலிஆதி³காய ஆசரியபரம்பரஸங்கா²தாய தந்தியா. குருந்தி³யம் வுத்தந்தி ஸம்ப³ந்தோ⁴. மஹாபச்சரியம் வுத்தந்தி ஸம்ப³ந்தோ⁴. தம் ஸப்³ப³ந்தி குருந்தி³வாத³மஹாபச்சரிவாத³ஸங்கா²தம் ஸப்³ப³ம் தம் வசனம். பவேணியா ஆக³தேதி பவேணியா ஆக³தஸங்கா²தே மஹாஅட்ட²கதா²வாதே³தி. சதுத்த²ம்.

345. பஞ்சமே மனுஸ்ஸவிக்³க³ஹேதி மனுஸ்ஸவிக்³க³ஹபாராஜிகேதி. பஞ்சமம்.

6. ஜோதிஸிக்கா²பத³ம்

350. ச²ட்டே² ஜனபத³ஸ்ஸ நாமத்தா ப³ஹுவசனவஸேன ‘‘ப⁴க்³கே³ஸூ’’தி பாளியம் வுத்தம். ஸுஸுமாரஸண்டா²னோ பப்³ப³தஸங்கா²தோ கி³ரி ஏத்தா²தி ஸுஸுமாரகி³ரி, ஏதஸ்ஸ வா மாபிதகாலே ஸுஸுமாரோ கி³ரதி ஸத்³த³ம் நிக்³கி³ரதி ஏத்தா²தி ஸுஸுமாரகி³ரீதி அத்த²மனபேக்கி²த்வா வுத்தம் ‘‘நக³ரஸ்ஸ நாம’’ந்தி. தம் பனாதி வனம் பன. ‘‘மிகா³ன’’ந்திஆதி³னா மிகா³னம் அப⁴யோ தீ³யதி ஏத்தா²தி மிக³தா³யோதி அத்த²ம் த³ஸ்ஸேதி.

352. ‘‘ஜோதிகே’’திபத³ஸ்ஸ ஜோதிஸ்ஸ அக்³கி³ஸ்ஸ கரணம் ஜோதிகந்தி த³ஸ்ஸேதும் வுத்தம் ‘‘ஜோதிகரணே’’தி.

354. ‘‘ஸமாத³ஹிதுகாமதாயா’’திபத³ம் ‘‘அரணிஸண்டா²பனதோ’’திபதே³ ஹேது. ஜாலாதி ஸிகா². ஸா ஹி ஜலதி தி³ப்³ப³தீதி ஜாலாதி வுச்சதி.

பதிலாதம் உக்கி²பதீதி ஏத்த² ‘‘பதிதாலாத’’ந்தி வத்தப்³பே³ தகாரலோபம் கத்வா ஸந்தி⁴வஸேன பதிலாதந்தி வுத்தந்தி ஆஹ ‘‘அலாதம் பதிதம் உக்கி²பதீ’’தி. அலாதந்தி உம்முக்கம். தஞ்ஹி ஆதி³த்தம் ஹுத்வா அதிஉண்ஹத்தா ந லாதப்³ப³ம் ந க³ண்ஹிதப்³ப³ந்தி அலாதந்தி வுச்சதி. அவிஜ்ஜா²தந்தி ஜா²யனதோ ட³ய்ஹனதோ அவிக³தம் அலாதந்தி ஸம்ப³ந்தோ⁴. ஜா²யனம் ட³ய்ஹனம் ஜா²தம், விக³தம் ஜா²தம் இமஸ்ஸாலாதஸ்ஸாதி விஜ்ஜா²தம்.

356. பதீ³பாதீ³னீதி பதீ³பஜோதிகாதீ³னி. தத்தா²தி தாஸு து³ட்ட²வாளமிக³அமனுஸ்ஸஸங்கா²தாஸு ஆபதா³ஸு நிமித்தபூ⁴தாஸு. நிமித்தத்தே² சேதம் பு⁴ம்மவசனந்தி. ச²ட்ட²ம்.

7. நஹானஸிக்கா²பத³ம்

366. ஸத்தமே பாரம் க³ச்ச²ந்தோ ந கேவலம் ஸஉத³காய நதி³யா ஏவ ந்ஹாயிதும் வட்டதி, ஸுக்கா²ய நதி³யாபி வட்டதீதி த³ஸ்ஸேந்தோ ஆஹ ‘‘ஸுக்கா²யா’’திஆதி³. உக்கிரித்வாதி வியூஹித்வா. ஆவாடாயேவ கு²த்³த³கட்டே²ன ஆவாடகா, தேஸூதி. ஸத்தமம்.

8. து³ப்³ப³ண்ணகரணஸிக்கா²பத³ம்

368. அட்ட²மே அலபீ⁴தி லபோ⁴தி வசனத்தே² அபச்சயம் கத்வா ணபச்சயஸ்ஸ ஸ்வத்த²பா⁴வம் த³ஸ்ஸேதும் வுத்தம் ‘‘லபோ⁴யேவ லாபோ⁴’’தி. அபச்சயமகத்வா பகதியா ணபச்சயோபி யுத்தோயேவாதி த³ட்ட²ப்³ப³ம். ஸத்³த³ந்தரோபி அத்த²ந்தராபா⁴வா ஸமாஸோ ஹோதீதி ஆஹ ‘‘நவசீவரலாபே⁴னாதி வத்தப்³பே³’’தி. அனுனாஸிகலோபந்தி ‘‘நவ’’ந்தி ஏத்த² நிக்³க³ஹீதஸ்ஸ வினாஸம். நிக்³க³ஹீதஞ்ஹி நாஸம் அனுக³தத்தா ‘‘அனுனாஸிக’’ந்தி வுச்சதி, தஸ்ஸ அத³ஸ்ஸன, மகத்வாதி அத்தோ². மஜ்ஜே² டி²தபத³த்³வயேதி ‘‘நவ’’ந்தி ச ‘‘சீவரலாபே⁴னா’’தி ச த்³வின்னம் பதா³னமந்தரே ‘‘டி²தே பனா’’தி ச ‘‘பி⁴க்கு²னா’’தி ச பத³த்³வயே. நித்³தா⁴ரணே சேதம் பு⁴ம்மவசனம். நிபாதோதி நிபாதமத்தம். அலபீ⁴தி லபோ⁴தி வசனத்த²ஸ்ஸ அபி⁴தே⁴ய்யத்த²ம் த³ஸ்ஸேதும் ‘‘பி⁴க்கு²னா’’தி வுத்தந்தி ஆஹ ‘‘பி⁴க்கு²னா’’திஆதி³. பத³பா⁴ஜனே பன வுத்தந்தி ஸம்ப³ந்தோ⁴. யந்தி யம் சீவரம். ‘‘சீவர’’ந்தி ஏத்த² சீவரஸரூபம் த³ஸ்ஸேந்தோ ஆஹ ‘‘யம் நிவாஸேதும் வா’’திஆதி³. சம்மகாரனீலந்தி சம்மகாரானம் திப²லே பக்கி²த்தஸ்ஸ அயகூ³த²ஸ்ஸ நீலம். மஹாபச்சரியம் வுத்தந்தி ஸம்ப³ந்தோ⁴. து³ப்³ப³ண்ணோ கரீயதி அனேனாதி து³ப்³ப³ண்ணகரணம், கப்பபி³ந்து³ந்தி ஆஹ ‘‘கப்பபி³ந்து³ம் ஸந்தா⁴யா’’தி. ஆதி³யந்தேன பி⁴க்கு²னா ஆதா³தப்³ப³ந்தி ஸம்ப³ந்தோ⁴. கோணேஸூதி அந்தேஸு. வாஸத்³தோ³ அனியமவிகப்பத்தோ². அக்கி²மண்ட³லமத்தம் வாதி அக்கி²மண்ட³லஸ்ஸ பமாணம் வா கப்பபி³ந்தூ³தி ஸம்ப³ந்தோ⁴. பட்டே வாதி அனுவாதபட்டே வா. க³ண்டி²யம் வாதி க³ண்டி²கபட்டே வா. பாளிகப்போதி த்³வே வா திஸ்ஸோ வா ததோ அதி⁴கா வா பி³ந்து³ஆவலீ கத்வா கதோ கப்போ. கண்ணிககப்போதி கண்ணிகம் விய பி³ந்து³கோ³ச்ச²கம் கத்வா கதோ கப்போ. ஆதி³ஸத்³தே³ன அக்³கி⁴யகப்பாத³யோ ஸங்க³ண்ஹாதி. ஸப்³ப³த்தா²தி ஸப்³பா³ஸு அட்ட²கதா²ஸு. ஏகோபி பி³ந்து³ வட்டோயேவ வட்டதீதி ஆஹ ‘‘ஏகம் வட்டபி³ந்து³’’ந்தி.

371. அக்³க³ளாதீ³னீதி ஆதி³ஸத்³தே³ன அனுவாதபரிப⁴ண்டே³ ஸங்க³ண்ஹாதீதி. அட்ட²மம்.

9. விகப்பனஸிக்கா²பத³ம்

374. நவமே தஸ்ஸாதி ஏத்த² தஸத்³த³ஸ்ஸ விஸயோ சீவரஸாமிகோயேவாதி ஆஹ ‘‘சீவரஸாமிகஸ்ஸா’’தி. து³தியஸ்ஸ தஸத்³த³ஸ்ஸ விஸயோ வினயத⁴ரோயேவாதி ஆஹ ‘‘யேனா’’திஆதி³. ‘‘அவிஸ்ஸாஸந்தோ’’திபத³ஸ்ஸ கிரியாவிஸேஸனபா⁴வம் த³ஸ்ஸேதும் வுத்தம் ‘‘அவிஸ்ஸாஸேனா’’தி. தேனாதி வினயத⁴ரேனாதி. நவமம்.

10. சீவராபனிதா⁴னஸிக்கா²பத³ம்

377. த³ஸமே ‘‘அபனேத்வா’’திஇமினா அபஇத்யூபஸக்³க³ஸ்ஸ அத்த²ம் த³ஸ்ஸேதி. நிதே⁴ந்தீதி நிகூ³ஹித்வா ட²பேந்தி. ஹஸாதி⁴ப்பாயோதி ஹஸம், ஹஸனத்தா²ய வா அதி⁴ப்பாயோ. பரிக்கா²ரஸ்ஸ ஸரூபம் த³ஸ்ஸேதும் வுத்தம் ‘‘பத்தத்த²விகாதி³’’ந்தி. பத்தஸ்ஸ பாளியமாக³தத்தா பத்தஸ்ஸ த²விகாதி அத்தோ²யேவ க³ஹேதப்³போ³, ந பத்தோ ச த²விகா சாதி. ‘‘ஸமணேன நாமா’’திபத³ம் ‘‘ப⁴விது’’ந்திபதே³ பா⁴வகத்தாதி. த³ஸமம்.

ஸுராபானவக்³கோ³ ச²ட்டோ².