7. ஸப்பாணகவக்³கோ³

1. ஸஞ்சிச்சபாணஸிக்கா²பத³-அத்த²யோஜனா

382. ஸப்பாணகவக்³க³ஸ்ஸ பட²மே உஸும் அஸதி கி²பதி அனேனாதி இஸ்ஸாஸோதி கதே த⁴னுயேவ முக்²யதோ இஸ்ஸாஸோ நாம, த⁴னுக்³க³ஹா- சரியோ பன உபசாரேன. உஸும் அஸதி கி²பதீதி இஸ்ஸாஸோதி கதே த⁴னுக்³க³ஹாசரியோ இஸ்ஸாஸோ நாம, இத⁴ பன உபசாரத்தோ² வா கத்துத்தோ² வா க³ஹேதப்³போ³தி ஆஹ ‘‘த⁴னுக்³க³ஹாசரியோ ஹோதீ’’தி. பப்³ப³ஜிதகாலே இஸ்ஸாஸஸ்ஸ அயுத்தத்தா வுத்தம் ‘‘கி³ஹிகாலே’’தி. வோரோபிதாதி ஏத்த² வி அவ புப்³ப³ஸ்ஸ ருஹதா⁴துஸ்ஸ அதி⁴ப்பாயத்த²ம் த³ஸ்ஸேதும் வுத்தம் ‘‘வியோஜிதா’’தி.

யஸ்மா க³ச்ச²தீதி ஸம்ப³ந்தோ⁴. ஏதந்தி ‘‘ஜீவிதா வோரோபிதா’’திவசனம். கஸ்மா வோஹாரமத்தமேவ ஹோதி, நனு யதோ குதோசி யஸ்மிம் கிஸ்மிம்சி வியோஜிதே த்³வே வத்தூ²னி விய விஸும் திட்ட²ந்தி பாணதோ ஜீவிதே வியோஜிதே பாணஜீவிதாபீதி ஆஹ ‘‘ந ஹேத்தா²’’திஆதி³. ஹீதி ஸச்சம். ஏத்தா²தி ‘‘ஜீவிதா வோரோபிதா’’திவசனே த³ஸ்ஸேதுந்தி ஸம்ப³ந்தோ⁴. கிஞ்சி ஜீவிதம் நாமாதி யோஜனா. அயம் பனேத்த² அத்த²ஸம்ப³ந்தோ⁴ – ஸீஸாலங்காரே ஸீஸதோ வியோஜிதே ஸீஸம் அலங்காரதோ விஸும் திட்ட²தி யதா², ஏவம் ஜீவிதே பாணதோ வியோஜிதே ஜீவிதம் பாணதோ விஸும் ந திட்ட²தி நாமாதி. அஞ்ஞத³த்தூ²தி ஏகம்ஸேன. ‘‘பாண’’ந்தி ஸாமஞ்ஞதோ வுத்தோபி மனுஸ்ஸபாணஸ்ஸ பாராஜிகட்டா²னே க³ஹிதத்தா இத⁴ பாரிஸேஸஞாயேன திரச்சா²னபாணோவ க³ஹேதப்³போ³தி ஆஹ ‘‘திரச்சா²னக³தோயேவ பாணோ’’தி. தந்தி பாணம். மஹந்தே பன பாணேதி ஸம்ப³ந்தோ⁴.

385. ஸோதே⁴ந்தோ அபனேதீதி யோஜனா. மங்கு³லோதி மனுஸ்ஸரத்தபோ ஏகோ கிமிவிஸேஸோ. ஸோ ஹி ரத்தபிவனத்தா²ய மங்க³தி இதோ சிதோ ச இமம் சிமஞ்ச டா²னம் க³ச்ச²தீதி ‘‘மங்கு³லோ’’தி வுச்சதி. பத³க்க²ரானஞ்ஹி அவிபரிதத்த²ம், ஸோதூனஞ்ச ஸஜ்ஜா²யோபதே³ஸலப⁴னத்த²ம் கத்த²சி டா²னே வசனத்தோ² வுத்தோதி த³ட்ட²ப்³ப³ம். தஸ்ஸ பீ³ஜமேவ கு²த்³த³கட்டே²ன மங்கு³லபீ³ஜகம், தஸ்மிம். தந்தி மங்கு³லபீ³ஜகம். பி⁴ந்த³ந்தோ ஹுத்வாதி யோஜனாதி. பட²மம்.

2. ஸப்பாணகஸிக்கா²பத³ம்

387. து³தியே ஸஹ பாணேஹீதி ஸப்பாணகம் உத³கந்தி த³ஸ்ஸேந்தோ ஆஹ ‘‘யே பாணகா’’திஆதி³. ஹீதி ஸச்சம். பத்தபூரம்பி உத³கந்தி ஸம்ப³ந்தோ⁴. தாதி³ஸேனாதி ஸப்பாணகேன. தோ⁴வதோபி பாசித்தியந்தி யோஜனா. உத³கஸோண்டி³ந்தி ஸிலாமயம் உத³கஸோண்டி³ம். போக்க²ரணிந்தி ஸிலாமயம் போக்க²ரணிம். உட்டா²பயதோபி பாசித்தியந்தி ஸம்ப³ந்தோ⁴. ததோதி ஸோண்டி³போக்க²ரணீஹி. உத³கஸ்ஸாதி உத³கேன, பூரே க⁴டே ஆஸிஞ்சித்வாதி ஸம்ப³ந்தோ⁴. தத்தா²தி உத³கே. உத³கேதி உத³கஸண்டா²னகபதே³ஸே ஆஸிஞ்சிதஉத³கே. பதிஸ்ஸதீதி ஸோண்டி³போக்க²ரணீஹி க³ஹிதஉத³கம் பதிஸ்ஸதீதி. து³தியம்.

3. உக்கோடனஸிக்கா²பத³ம்

392. ததியே ‘‘உச்சாலேந்தீ’’திஇமினா உக்கோடேந்தீதி ஏத்த² உபுப்³ப³ஸ்ஸ குடதா⁴துஸ்ஸ உச்சாலனத்த²ம் த³ஸ்ஸேதி தா⁴தூன, மனேகத்த²த்தா. யம் யம் பதிட்டி²தம் யதா²பதிட்டி²தம், தஸ்ஸ பா⁴வோ யதா²பதிட்டி²தபா⁴வோ, தேன.

393. யோ த⁴ம்மோதி யோ ஸமத²த⁴ம்மோ. த⁴ம்மேனாதி ஏத்த² ஏனஸத்³தே³ன ‘‘யதா²த⁴ம்ம’’ந்தி ஏத்த² அம்இதிகாரியஸ்ஸ காரிம் த³ஸ்ஸேதி. இமினா ‘‘யதா²த⁴ம்ம’’ந்தி பத³ஸ்ஸ ‘‘நிஹதாதி⁴கரண’’ந்தி ஏத்த² நிஹதஸத்³தே³ன ஸம்ப³ந்தி⁴தப்³ப³பா⁴வம் த³ஸ்ஸேதி. ‘‘ஸத்தா²ரா’’திபத³ம் ‘‘வுத்தம்’’ இதிபதே³ கத்தா. நத்தி² ஹதம் ஹனனம் இமஸ்ஸாதி நிஹதந்தி வுத்தே அத்த²தோ வூபஸமனமேவாதி ஆஹ ‘‘வூபஸமித’’ந்தி.

395. யம் வா தம் வா கம்மம் த⁴ம்மகம்மம் நாம ந ஹோதி, அத² கோ² அதி⁴கரணவூபஸமகம்மமேவ த⁴ம்மகம்மம் நாமாதி த³ஸ்ஸேந்தோ ஆஹ ‘‘யேன கம்மேனா’’திஆதி³. அயம்பீதி அயம்பி பி⁴க்கு². ஸேஸபதா³னிபீதி ‘‘த⁴ம்மகம்மே வேமதிகோ’’திஆதீ³னி ஸேஸபதா³னிபி. ஏத்தா²தி இமஸ்மிம் ஸிக்கா²பதே³. வித்தா²ரோ பன வுத்தோதி ஸம்ப³ந்தோ⁴. தத்தே²வாதி பரிவாரே ஏவ. இதா⁴தி இமஸ்மிம் ஸிக்கா²பதே³, விப⁴ங்கே³ வாதி. ததியம்.

4. து³ட்டு²ல்லஸிக்கா²பத³ம்

399. சதுத்தே² அத்து²த்³தா⁴ரவஸேன த³ஸ்ஸிதானி து³ட்டு²ல்லஸத்³த³த்த²பா⁴வேன ஸதி³ஸத்தாதி அதி⁴ப்பாயோ. ‘‘து⁴ர’’ந்தி ஏத்த² லக்க²ணவந்தத்தா பு⁴ம்மத்தே² உபயோக³வசனந்தி ஆஹ ‘‘து⁴ரே’’தி. து⁴ரே நிக்கி²த்தமத்தே ஸதீதி யோஜனா.

ஏவம் து⁴ரம் நிக்கி²பித்வாதி ‘‘அஞ்ஞஸ்ஸ நாரோசேஸ்ஸாமீ’’தி ஏவம் து⁴ரம் நிக்கி²பித்வா. அஞ்ஞஸ்ஸாதி வத்து², புக்³க³லதோ அஞ்ஞஸ்ஸ து³தியஸ்ஸ. ஸோபீதி து³தியோபி. அஞ்ஞஸ்ஸாதி ததியஸ்ஸ. யாவ கோடி ந சி²ஜ்ஜதி, தாவ ஆபஜ்ஜதியேவாதி யோஜனா. தஸ்ஸேவாதி ஆபத்திம் ஆபன்னபுக்³க³லஸ்ஸ. வத்து²புக்³க³லோயேவாதி ஆபத்திம் ஆபன்னபுக்³க³லோயேவ. அயந்தி பட²மபி⁴க்கு². அஞ்ஞஸ்ஸாதி து³தியஸ்ஸ. ஸோதி து³தியோ ஆரோசேதீதி ஸம்ப³ந்தோ⁴. யேனாதி பட²மபி⁴க்கு²னா. அஸ்ஸாதி து³தியஸ்ஸ. தஸ்ஸேவாதி பட²மபி⁴க்கு²ஸ்ஸேவ. வத்து²புக்³க³லம் உபனிதா⁴ய ‘‘ததியேன புக்³க³லேன து³தியஸ்ஸா’’தி வுத்தம்.

400. பஞ்சாபத்திக்க²ந்தே⁴தி து²ல்லச்சயாதி³கே பஞ்ச ஆபத்திக்க²ந்தே⁴. அஜ்ஜா²சாரோ நாமாதி அதி⁴ப⁴வித்வா வீதிக்கமித்வா ஆசரிதப்³ப³த்தா அஜ்ஜா²சாரோ நாமாதி. சதுத்த²ம்.

5. ஊனவீஸதிவஸ்ஸஸிக்கா²பத³ம்

402. பஞ்சமே அங்கு³லியோதி கரஸாகா²யோ. தா ஹி அங்க³ந்தி ஹத்த²தோ பஞ்சதா⁴ பி⁴ஜ்ஜித்வா உக்³க³ச்ச²ந்தீதி அங்கு³லியோதி வுச்சந்தி. லிக²ந்தஸ்ஸ உபாலிஸ்ஸாதி ஸம்ப³ந்தோ⁴. தேனாதி ப³ஹுசிந்தேதப்³ப³காரணேன. அஸ்ஸாதி உபாலிஸ்ஸ. உரோதி ஹத³யம். தஞ்ஹி உஸதி சித்ததாபோ த³ஹதி ஏத்தா²தி உரோதி வுச்சதி. ரூபஸுத்தந்தி ஹேரஞ்ஞிகானம் ரூபஸுத்தம், யதா² ஹத்தா²சரியானம் ஹத்தி²ஸுத்தந்தி. அக்கீ²னீதி சக்கூ²னி. தானி ஹி அக்க²ந்தி விஸயேஸு ப்³யாபீப⁴வந்தி, ரூபம் வா பஸ்ஸதி இமேஹீதி அக்கீ²னீதி வுச்சந்தி. மகஸேன ஸூசிமுகா²னம் க³ஹிதத்தா ட³ம்ஸேன பிங்க³லமக்கி²காயோவ க³ஹேதப்³பா³தி ஆஹ ‘‘ட³ம்ஸாதி பிங்க³லமக்கி²காயோ’’தி. பிங்க³லமக்கி²காயோ ஹி ட³ம்ஸனட்டே²ன கா²த³னட்டே²ன ட³ம்ஸாதி வுச்சந்தி. து³க்கரோ க²மோ ஏதாஸந்தி து³க்கா²தி த³ஸ்ஸேந்தோ ஆஹ ‘‘து³க்க²மான’’ந்தி. வேத³னானந்தி ஸம்ப³ந்தோ⁴. அஸாதஸ்ஸ காரணம் த³ஸ்ஸேதும் வுத்தம் ‘‘அமது⁴ரான’’ந்தி. இமினா அமது⁴ரத்தா ந ஸாதி³தப்³பா³தி அஸாதாதி அத்த²ம் த³ஸ்ஸேதி. பாணஸத்³த³ஜீவிதஸத்³தா³னம் பரியாயபா⁴வம் த³ஸ்ஸேதும் வுத்தம் ‘‘ஜீவிதஹரான’’ந்தி. பாணம் ஹரந்தி அபனேந்தீதி பாணஹரா, தாஸம் வேத³னானந்தி ஸம்ப³ந்தோ⁴.

404. விஜாயனகாலதோ பட்டா²ய பரிபுண்ணவீஸதிவஸ்ஸோ ந க³ஹேதப்³போ³, க³ப்³ப⁴க³ஹணகாலதோ பன பட்டா²யாதி த³ஸ்ஸேந்தோ ஆஹ ‘‘படிஸந்தி⁴க்³க³ஹணதோ பட்டா²யா’’தி. க³ப்³பே⁴ ஸயிதகாலேன ஸத்³தி⁴ம் வீஸதிமம் வஸ்ஸம் பரிபுண்ணமஸ்ஸாதி க³ப்³ப⁴வீஸோ புக்³க³லோ. ஹீதி ஸச்சம். யதா²ஹாதி யேனாகாரேன ஸங்க்²யம் க³ச்ச²தி, தேனாகாரேன ப⁴க³வா ஆஹாதி யோஜனா. அத² வா யதா² கிம் வசனம் ப⁴க³வா ஆஹாதி யோஜனா.

க³ப்³ப⁴வீஸோ ஹுத்வா உபஸம்பன்னோதி ஸம்ப³ந்தோ⁴. அம்ஹீதி அஸ்மி. நுஸத்³தோ³ பரிவிதக்கத்தே² நிபாதோ. யந்தி யாதி³ஸம் பட²மம் சித்தந்தி ஸம்ப³ந்தோ⁴. இமினா படிஸந்தி⁴சித்தம் த³ஸ்ஸேதி. ‘‘பட²மம் விஞ்ஞாண’’ந்தி தஸ்ஸேவ வேவசனம். தந்தி பட²மம் சித்தம் பட²மம் விஞ்ஞாணம். அஸ்ஸாதி ஸத்தஸ்ஸ. ஸாவ ஜாதீதி ஸா ஏவ படிஸந்தி⁴, க³ப்³போ⁴ நாம ஹோதீதி ஸம்ப³ந்தோ⁴.

தத்தா²தி பாளியம், வினிச்ச²யோ ஏவம் வேதி³தப்³போ³தி யோஜனா. யோதி புக்³க³லோ. மஹாபவாரணாயாதி அஸ்ஸயுஜபுண்ணமியம். ஸா ஹி பூஜிதபவாரணத்தா மஹாபவாரணாதி வுச்சதி. ததோதி பவாரணாய ஜாதகாலதோ. தந்தி மஹாபவாரணம். பாடிபதே³ சாதி ஏத்த² சஸத்³தோ³ அனியமவிகப்பத்தோ², பவாரணதி³வஸபாடிபத³தி³வஸேஸு அஞ்ஞதரஸ்மிம் தி³வஸே உபஸம்பாதே³தப்³போ³தி அத்தோ². ஹாயனவட்³ட⁴னந்தி குச்சி²ம்ஹி வஸிதமாஸேஸு அதி⁴கேஸு ஹாயனஞ்ச ஊனேஸு வட்³டு⁴னஞ்ச வேதி³தப்³ப³ம்.

போராணகத்தே²ரா பன உபஸம்பாதே³ந்தீதி ஸம்ப³ந்தோ⁴. ஏகூனவீஸதிவஸ்ஸந்தி அனந்தரே வுத்தம் ஏகூனவீஸதிவஸ்ஸம். நிக்க²மனீயோதி ஸாவணமாஸோ. ஸோ ஹி அந்தோவீதி²தோ பா³ஹிரவீதி²ம் நிக்க²மதி ஸூரியோ அஸ்மிந்தி ‘‘நிக்க²மனீயோ’’தி வுச்சதி. பாடிபத³தி³வஸேதி பச்சி²மிகாய வஸ்ஸூபக³மனதி³வஸே. தம் உபஸம்பாத³னம். கஸ்மாதி புச்சா². ஏத்த² ட²த்வா பரிஹாரோ வுச்சதே மயாதி யோஜனா. வீஸதியா வஸ்ஸேஸூதி உபஸம்பன்னபுக்³க³லஸ்ஸ வீஸதியா வஸ்ஸேஸு. திம்ஸரத்திதி³வஸ்ஸ ஏகமாஸத்தா ‘‘சத்தாரோ மாஸா பரிஹாயந்தீ’’தி வுத்தம். உக்கட்³ட⁴ந்தீதி ஏகஸ்ஸ அதி⁴கமாஸஸ்ஸ நாஸனத்தா²ய வஸ்ஸம் உபரி கட்³ட⁴ந்தி. ததோதி ச²மாஸதோ அபனேத்வாதி ஸம்ப³ந்தோ⁴. ஏத்தா²தி ‘‘ஏகூனவீஸதிவஸ்ஸ’’ந்திஆதி³வசனே. பன-ஸத்³தோ³ ஹிஸத்³த³த்தோ², ஸச்சந்தி அத்தோ². யோதி புக்³க³லோ. தஸ்மாதி யஸ்மா க³ப்³ப⁴மாஸானம்பி க³ணனூபக³த்தா க³ஹேத்வா உபஸம்பாதே³ந்தி, தஸ்மா ச² மாஸே வஸித்வாதி ஸம்ப³ந்தோ⁴. அட்ட² மாஸே வஸித்வா ஜாதோபி ந ஜீவதீதி ஸுத்தந்தஅட்ட²கதா²ஸு (தீ³. நி. அட்ட². 2.24-25; ம. நி. அட்ட². 3.205) வுத்தம்.

406. த³ஸவஸ்ஸச்சயேனாதி உபஸம்பத³தோ த³ஸவஸ்ஸாதிக்கமேன. உபஸம்பாதே³தீதி உபஜ்ஜா²யோ வா கம்மவாசாசரியோ வா ஹுத்வா உபஸம்பாதே³தி. தந்தி உபஜ்ஜா²சரியபூ⁴தம் அனுபஸம்பன்னபுக்³க³லம். கம்மவாசாசரியோ ஹுத்வா உபஸம்பாதே³ந்தோ தம் முஞ்சித்வா ஸசே அஞ்ஞோபி கம்மவாசாசரியோ அத்தி², ஸூபஸம்பன்னோ. ஸோவ ஸசே கம்மவாசம் ஸாவேதி, நுபஸம்பன்னோ. ஞத்வா பன புன அனுபஸம்பாதே³ந்தே ஸக்³க³ந்தராயோபி மக்³க³ந்தராயோபி ஹோதியேவாதி த³ட்ட²ப்³ப³ந்தி. பஞ்சமம்.

6. தே²ய்யஸத்த²ஸிக்கா²பத³ம்

407. ச²ட்டே² ‘‘படியாலோக’’ந்தி ஏத்த² ஆலோகஸத்³தே³ன ஸூரியோ வுத்தோ உபசாரேன. ஸூரியோ ஹி புரத்தி²மதி³ஸதோ உக்³க³ந்த்வா பச்சி²மதி³ஸம் க³தோ, தஸ்மா ஸூரியஸங்கா²தஸ்ஸ ஆலோகஸ்ஸ படிமுக²ம் ‘‘படியாலோக’’ந்தி வுத்தே பச்சி²மதி³ஸாயேவ க³ஹேதப்³பா³தி ஆஹ ‘‘பச்சி²மம் தி³ஸந்தி அத்தோ²’’தி. கம்மிகாதி கம்மே யுத்தா பயுத்தா.

409. ராஜானந்தி ஏத்த² ரஞ்ஞோ ஸந்தகம் ‘‘ராஜா’’தி வுச்சதி உபசாரேன, அத² வா ரஞ்ஞோ ஏஸோ ‘‘ராஜா’’தி கத்வா ரஞ்ஞோ ஸந்தகம் ‘‘ராஜா’’தி வுச்சதி. தே²ய்யந்தி தே²னேத்வா ‘‘ஸக்கச்ச’’ந்திஆதீ³ஸு (பாசி. 606) விய நிக்³க³ஹீதாக³மோ ஹோதி. ராஜானம், ரஞ்ஞோ ஸந்தகம் வா தே²ய்யம் தே²னேத்வா க³ச்ச²ந்தீதி அத்தோ². இதி இமமத்த²ம் த³ஸ்ஸேந்தோ ஆஹ ‘‘ராஜானம் வா தே²னேத்வா’’திஆதி³.

411. சதூஸு விஸங்கேதேஸு த்³வீஹி அனாபத்தி, த்³வீஹி ஆபத்தியேவாதி. ச²ட்ட²ம்.

7. ஸம்விதா⁴னஸிக்கா²பத³ம்

412. ஸத்தமே ‘‘பதூ⁴பேந்தோ’’தி ஏத்த² பபுப்³ப³ தூ⁴பதா⁴து பரிபா⁴ஸனத்தே² வத்ததீதி ஆஹ ‘‘பரிபா⁴ஸந்தோ’’தி. த்வம் ஸமணோபி மாதுகா³மேன ஸத்³தி⁴ம் க³ச்ச²ஸி, துய்ஹேவேஸோ தோ³ஸோ, நேதஸ்ஸ புரிஸஸ்ஸாதி அத்தானம்யேவ பரிபா⁴ஸந்தோதி அத்தோ². ‘‘நிக்கா²மேஸீ’’திஇமினா ‘‘நிப்பாதேஸீ’’திஏத்த² நிபுப்³ப³ பததா⁴து க³த்யத்தோ²தி த³ஸ்ஸேதீதி. ஸத்தமம்.

8. அரிட்ட²ஸிக்கா²பத³ம்

417. அட்ட²மே க³ந்தே⁴தி கி³ஜ்ஜே². தே ஹி கி³த⁴ந்தி குணபம் அபி⁴கங்க²ந்தீதி ‘‘க³ந்தா⁴’’தி வுச்சந்தி. க³த்³தே⁴திபி பாடோ², ஸோபி யுஜ்ஜதி யதா² ‘‘யுக³னந்தோ⁴, யுக³னத்³தோ⁴’’தி ச ‘‘படிப³ந்தோ⁴ படிப³த்³தோ⁴’’தி ச. பா³த⁴யிம்ஸூதி ஹனிம்ஸு. அஸ்ஸாதி அரிட்ட²ஸ்ஸ.

தத்³தி⁴தேன வுத்தஸ்ஸ அத்த²ஸ்ஸ த³ஸ்ஸேதுமாஹ ‘‘தே’’திஆதி³. தேதி அந்தராயிகா. தத்தா²தி பஞ்சவிதே⁴ஸு அந்தராயிகேஸு. ‘‘ததா²’’திபதே³ன ‘‘கம்மந்தராயிகம் நாமா’’தி பத³ம் அதிதி³ஸதி. தம் பனாதி பி⁴க்கு²னிதூ³ஸககம்மம் பன. மோக்க²ஸ்ஸேவாதி மக்³க³னிப்³பா³னஸ்ஸேவ. மக்³கோ³ ஹி கிலேஸேஹி முச்சதீதி அத்தே²ன மோக்கோ² நாம. ஜா²னம்பேத்த² ஸங்க³ஹிதம் நீவரணேஹி விமுச்சனத்தா. நிப்³பா³னம் விமுச்சீதி அத்தே²ன மோக்கோ² நாம. ப²லம்பேத்த² ஸங்க³ஹிதம் விமுச்சிதத்தா. நியதமிச்சா²தி³ட்டி²த⁴ம்மாதி நியதபா⁴வம் பத்தா, நியதவஸேன வா பவத்தா மிச்சா²தி³ட்டி²ஸங்கா²தா த⁴ம்மா. தே பன நத்தி²கஅஹேதுக அகிரியவஸேன திவிதா⁴. பண்ட³காதி³க³ஹணஸ்ஸ நித³ஸ்ஸனமத்தத்தா ‘படிஸந்தி⁴த⁴ம்மா’’திபதே³ன அஹேதுகத்³விஹேதுகபடிஸந்தி⁴த⁴ம்மா க³ஹேதப்³பா³ ஸப்³பே³ஸம்பி விபாகந்தராயிகபா⁴வதோ. தேபி மோக்க²ஸ்ஸேவ அந்தராயம் கரோந்தி, ந ஸக்³க³ஸ்ஸ. தே பனாதி அரியூபவாதா³ பன. தாவதே³வ உபவாத³ந்தராயிகா நாமாதி யோஜனா. தாபீதி ஸஞ்சிச்ச ஆபன்னா ஆபத்தியோபி. பாராஜிகாபத்திம் ஸந்தா⁴ய வுத்தம் ‘‘பி⁴க்கு²பா⁴வம் வா படிஜானாதீ’’தி. ஸங்கா⁴தி³ஸேஸாபத்திம் ஸந்தா⁴ய வுத்தம் ‘‘ந வுட்டா²தி வா’’தி. லஹுகாபத்திம் ஸந்தா⁴ய வுத்தம் ‘‘ந தே³ஸேதி வா’’தி.

தத்ராதி பஞ்சவிதே⁴ஸு அந்தராயிகேஸு. அயம் பி⁴க்கூ²தி அரிட்டோ² க³ந்த⁴பா³தி⁴புப்³போ³ பி⁴க்கு². ஸேஸந்தராயிகேதி ஆணாவீதிக்கமந்தராயிகதோ ஸேஸே சதுப்³பி³தே⁴ அந்தராயிகே. இமே ஆகா³ரிகாதி அகா³ரே வஸனஸீலா இமே மனுஸ்ஸா. பி⁴க்கூ²பி பஸ்ஸந்தி பு²ஸந்தி பரிபு⁴ஞ்ஜந்தீதி ஸம்ப³ந்தோ⁴. கஸ்மா ந வட்டந்தி, வட்டந்தியேவாதி அதி⁴ப்பாயோ. ரஸேன ரஸம் ஸம்ஸந்தி³த்வாதி உபாதி³ண்ணகரஸேன அனுபாதி³ண்ணகரஸம், அனுபாதி³ண்ணகரஸேன வா உபாதி³ண்ணகரஸம் ஸமானேத்வா. யோனிஸோ பச்சவேக்க²ணஸ்ஸ அபா⁴வதோ ஸம்விஜ்ஜதி ச²ந்த³ராகோ³ ஏத்தா²தி ஸச்ச²ந்த³ராகோ³, ஸோயேவ பரிபோ⁴கோ³ ஸச்ச²ந்த³ராக³பரிபோ⁴கோ³, தம். ஏகம் கத்வாதி ஸமானம் கத்வா. க⁴டேந்தோ விய பாபகம் தி³ட்டி²க³தம் உப்பாதே³த்வாதி யோஜனா. கிம்ஸத்³தோ³ க³ரஹத்தோ², கஸ்மா ப⁴க³வதா பட²மபாராஜிகம் பஞ்ஞத்தம், ந பஞ்ஞாபேதப்³ப³ந்தி அத்தோ². மஹாஸமுத்³த³ம் ப³ந்த⁴ந்தோ யதா² அகத்தப்³ப³ம் கரோதி, ததா² பட²மபாராஜிகம் பஞ்ஞபேந்தோ ப⁴க³வா அபஞ்ஞத்தம் பஞ்ஞபேதீதி அதி⁴ப்பாயோ. ஏத்தா²தி பட²மபாராஜிகே. ஆஸந்தி ப⁴ப்³பா³ஸம். ஆணாசக்கேதி ஆணாஸங்கா²தே சக்கே.

அட்டி²யேவ அட்டி²கம் குச்சி²தத்தே²ன, குச்சி²தத்தே² ஹி கோ. அட்டி²கமேவ க²லோ நீசட்டே²ன லாமகட்டே²னாதி அட்டி²கங்க²லோ நிக்³க³ஹீதாக³மம் கத்வா. தேன உபமா ஸதி³ஸாதி அட்டி²கங்க²லூபமா. ‘‘அட்டீ²’’தி ச ‘‘கங்க²ல’’ந்தி ச பத³ம் க³ஹேத்வா வண்ணேந்தி ஆசரியா (ஸாரத்த². டீ. பாசித்திய 3.417; வி. வி. டீ. பாசித்திய 2.417; ம. நி. அட்ட². 2.42; ம. நி. டீ. 3.42). அங்கா³ரகாஸூபமாதி அங்கா³ரராஸிஸதி³ஸா, அங்கா³ரேஹி வா பரிபுண்ணா ஆவாடஸதி³ஸா. அஸிஸூனூபமாதி ஏத்த² அஸீதி க²க்³கோ³. ஸோ ஹி அஸதே கி²பதே அனேனாதி ‘‘அஸீ’’தி வுச்சதி. ஸூனாதி அதி⁴கோட்டனம். தஞ்ஹி ஸுனதி ஸஞ்சுண்ணபா⁴வம் க³ச்ச²தி ஏத்தா²தி ‘‘ஸூனா’’தி வுச்சதி. அஸினா ஸூனாதி அஸிஸூனா, தாய உபமா ஸதி³ஸாதி அஸிஸூனூபமா. ஸத்திஸூலூபமாதி ஸத்தியா ச ஸூலேன ச ஸதி³ஸா. ஏத்தா²தி இமிஸ்ஸம் அட்ட²கதா²யம். மஜ்ஜி²மட்ட²கதா²யம் அலக³த்³தூ³பமஸுத்தே (ம. நி. அட்ட². 1.234 ஆத³யோ) க³ஹேதப்³போ³. ஏவம்ஸத்³த³கோ²ஸத்³தா³னமந்தரே வியஸத்³த³ஸ்ஸ ப்³யாதே³ஸபா⁴வம் த³ஸ்ஸேதும் வுத்தம் ‘‘ஏவம் விய கோ²’’தி. அட்ட²மம்.

9. உக்கி²த்தஸம்போ⁴க³ஸிக்கா²பத³ம்

424. நவமே அனுத⁴ம்மஸ்ஸ ஸரூபம் த³ஸ்ஸேதும் வுத்தம் ‘‘அனுலோமவத்தம் தி³ஸ்வா கதா ஓஸாரணா’’தி. இமினா அனுலோமவத்தம் தி³ஸ்வா கதோ ஓஸாரணஸங்கா²தோ த⁴ம்மோ அனுத⁴ம்மோதி த³ஸ்ஸேதி. ஓஸாரணாதி பவேஸனா. தேனேவாதி உக்கி²த்தகஸ்ஸ அகடானுத⁴ம்மத்தா ஏவ. அஸ்ஸாதி ‘‘அகடானுத⁴ம்மேனா’’தி பத³ஸ்ஸ.

த³த³தோ வா க³ண்ஹதோ வாதி வாஸத்³தோ³ அனியமவிகப்பத்தோ²தி. நவமம்.

10. கண்டகஸிக்கா²பத³ம்

428. த³ஸமே அரிட்ட²ஸ்ஸ உப்பன்னம் விய ஏதஸ்ஸாபி உப்பன்னந்தி யோஜனா. உம்மஜ்ஜந்தஸ்ஸாதி மனஸிகரோந்தஸ்ஸ. ஸம்வாஸஸ்ஸ நாஸனா ஸம்வாஸனாஸனா. லிங்க³ஸ்ஸ நாஸனா லிங்க³னாஸனா. த³ண்ட³கம்மேன நாஸனா த³ண்ட³கம்மனாஸனா. தத்தா²தி திவிதா⁴ஸு நாஸனாஸு. தூ³ஸகோ…பே… நாஸேதா²தி ஏத்த² அயம் நாஸனா லிங்க³னாஸனா நாமாதி யோஜனா. அயந்தி த³ண்ட³கம்மனாஸனா. இதா⁴தி இமஸ்மிம் ஸிக்கா²பதே³, ‘‘நாஸேதூ’’தி பதே³ வா. தத்தா²தி புரிமவசனாபேக்க²ம், ‘‘ஏவஞ்ச பன பி⁴க்க²வே’’தி ஆதி³வசனேதி அத்தோ². பிரேதி ஆமந்தனபத³ம் பரஸத்³தே³ன ஸமானத்த²ந்தி ஆஹ ‘‘பரா’’தி. ‘‘அம்ஹாகம் அனஜ்ஜ²த்திகபூ⁴த’’இதி வா ‘‘அம்ஹாகம் பச்சனீகபூ⁴த’’ இதி வா அத்தோ² த³ட்ட²ப்³போ³. ‘‘அமாமக’’இதிபதே³ன ‘‘பர’’இதிபத³ஸ்ஸ அதி⁴ப்பாயத்த²ம் த³ஸ்ஸேதி. அம்ஹே நமமாயக, அம்ஹேஹி வா நமமாயிதப்³ப³ இதி அத்தோ². ‘‘அம்ஹாமக’’இதிபி ஹகாரயுத்தோ பாடோ². அம்ஹேஹி ஆமகஇதி அத்தோ². யத்தா²தி யஸ்மிம் டா²னே. தேதி உபயோக³த்தே² ஸாமிவசனம், தந்தி அத்தோ². தவ ரூபஸத்³தே³ வாதி ஸம்ப³ந்தோ⁴. ந பஸ்ஸாமாதி ந பஸ்ஸாம, ந ஸுணாம.

429. தேனாதி ஸாமணேரேன. ‘‘காராபேய்யா’’தி பதே³ காரிதகம்மந்தி. த³ஸமம்.

ஸப்பாணகவக்³கோ³ ஸத்தமோ.