11. ஸச்சவிப⁴ங்க³ஸுத்தவண்ணனா

371. ஆசிக்க²னாதி – ‘‘இத³ம் து³க்க²ம் அரியஸச்சம், அயம் து³க்க²னிரோத⁴கா³மினீ படிபதா³ அரியஸச்ச’’ந்தி ஆதி³தோ கத²னம். தே³ஸனாதி தஸ்ஸேவ அத்த²ஸ்ஸ அதிஸஜ்ஜனம் பபோ³த⁴னம். பஞ்ஞாபனாதி பகாரேஹி ஞாபனா, ஸா பன யஸ்மா இத்த²மித³ந்தி வேனேய்யானம் பச்சக்க²தோ த³ஸ்ஸனா, தேஸம் வா ஸந்தானே பதிட்டா²பனா ஹோதி, தஸ்மா ஆஹ – ‘‘து³க்க²ஸச்சாதீ³னம் ட²பனா’’தி. பட்ட²பனாதி பதிட்டா²பனா. யஸ்மா பட்ட²பியமானஸபா⁴வா தே³ஸனா பா⁴ஜனம் உபக³ச்ச²ந்தீ விய ஹோதி, தஸ்மா வுத்தம் – ‘‘பஞ்ஞாபனா’’தி, ஜானாபனாதி அத்தோ². விவடகரணாதி தே³ஸியமானஸ்ஸ அத்த²ஸ்ஸ விவடபா⁴வகரணம். விபா⁴க³கிரியாதி யதா²வுத்தஸ்ஸ அத்த²விபா⁴க³ஸ்ஸ வித்தா²ரகரணம். பாகடபா⁴வகரணந்தி அக³ம்பீ⁴ரபா⁴வாபாத³னம். அபரோ நயோ – சதுஸச்சஸஞ்ஞிதஸ்ஸ அத்த²ஸ்ஸ பச்சேகம் ஸரூபதோ த³ஸ்ஸனவஸேன இத³ந்தி ஆதி³தோ ஸிக்கா²பனம் கத²னம் ஆசிக்க²னா, ஏவம் பரஸந்தானே பபோ³த⁴னவஸேன பவத்தாபனா தே³ஸனா, ஏவம் வினேய்யானம் சித்தபரிதோஸஜனனேன தேஸம் பு³த்³தி⁴பரிபாசனம் ‘‘பஞ்ஞாபனா’’தி வுச்சதி. ஏவம் பஞ்ஞாபேந்தீ ச ஸா தே³ஸியமானம் அத்த²ம் வேனேய்யஸந்தானே பகாரதோ ட²பேதி பதிட்ட²பேதீதி ‘‘பட்ட²பனா’’தி வுச்சதி. பகாரதோ ட²பேந்தீ பன ஸம்கி²த்தஸ்ஸ வித்தா²ரதோ படிவுத்தஸ்ஸ புனாபி⁴தா⁴னதோ ‘‘விவரணா’’தி, தஸ்ஸேவத்த²ஸ்ஸ விபா⁴க³கரணதோ ‘‘விப⁴ஜனா’’தி, வுத்தஸ்ஸ வித்தா²ரேனாபி⁴தா⁴னதோ விப⁴த்தஸ்ஸ ஹேதுதா³ஹரணத³ஸ்ஸனதோ, ‘‘உத்தானீகம்ம’’ந்தி வுச்சதி. தேனாஹ – ‘‘பாகடபா⁴வகரண’’ந்தி, ஹேதூபமாவஸேனத்த²ஸ்ஸ பாகடபா⁴வகரணதோதி அத்தோ².

அனுக்³கா³ஹகாதி அனுக்³க³ண்ஹனகாமா. ஸ்வாயமனுக்³க³ஹோ ஸங்க³ஹவத்து²வஸேன பாகடோ ஹோதீதி ஆஹ ‘‘ஆமிஸஸங்க³ஹேனா’’திஆதி³. ஜனேதா ஜனேத்தீதி ஆஹ ‘‘ஜனிகா மாதா’’தி. வுத்³தி⁴ம் பரிஸம் ஆபாதே³தீதி ஆபாதே³தா. தேனாஹ ‘‘போஸேதா’’தி. இதா³னி த்³வின்னம் மஹாதே²ரானம் யதா²க்கமம் ஸப்³ரஹ்மசாரீனம் ப⁴க³வதா வுத்தேஹி ஜனிகபோஸிகமாதுட்டா²னியேஹி ஸங்கா³ஹகதம் வித்தா²ரதோ த³ஸ்ஸேதும், ‘‘ஜனிகமாதா ஹீ’’திஆதி³ வுத்தம். பரதோகோ⁴ஸேன வினாபி உபரிமக்³கா³தி⁴க³மோ ஹோதீதி ‘‘பச்சத்தபுரிஸகாரேனா’’தி வுத்தம். பட²மமக்³கோ³ ஏவ ஹி ஸாவகானம் ஏகந்ததோ கோ⁴ஸாபேக்கோ²தி. பத்தேஸுபீதி பி-ஸத்³தே³ன பகே³வ அப்பத்தேஸூதி த³ஸ்ஸேதி. ப⁴வஸ்ஸ அப்பமத்தகதா நாம இத்தரகாலதாயாதி ஆஹ ‘‘அச்ச²ராஸங்கா⁴தமத்தம்பீ’’தி. ஜனேதாதி ஜனகோ, தே²ரோ பன அரியாய ஜனயிதா. ஆபாதே³தாதி வட்³டே⁴தா பரிப்³ரூஹேதா. புரிமஸ்மிம் ஸச்சத்³வயே ஸம்மஸனக்³க³ஹணம் லோகியத்தா தஸ்ஸ, இதரஸ்மிம் தஸ்ஸ அக்³க³ஹணம் லோகுத்தரத்தா.

காமேஹி நிக்க²ந்தோ ஸங்கப்போ நேக்க²ம்மஸங்கப்போ. ஸ்வாயமஸ்ஸ ததோ நிக்க²மனத்தோ² தேஸம் படிபக்க²பா⁴வதோ தேஹி விஸம்ஸக்³க³தோ விரஜ்ஜனதோ ஸமுச்சி²ந்த³னதோ ஸப்³ப³ஸோ விவித்தபா⁴வதோ ச ஹோதீதி த³ஸ்ஸேதும், ‘‘காமபச்சனீகட்டே²னா’’திஆதி³ வுத்தம். தத்த² காமபத³கா⁴தந்தி யதா² காமோ பத³ம் பதிட்ட²ம் ந லப⁴தி, ஏவம் ஹனனம், காமஸமுச்சே²த³ந்தி அத்தோ². காமேஹி ஸப்³ப³ஸோ விவித்தத்தா காமவிவித்தோ, அரியமக்³கோ³, தஸ்ஸ அந்தோ, அரியப²லம், தஸ்மிம் காமவிவித்தந்தே. ஏஸேவ நயோதி இமினா ‘‘ப்³யாபாத³பச்சனீகட்டே²னா’’திஆதி³யோஜனம் அதிதி³ஸதி. ஸப்³பே³ சேதே நேக்க²ம்மஸங்கப்பாத³யோ நானாசித்தேஸு லப்³ப⁴ந்தீதி யோஜனா. யதி³ ஏகசித்தே லப்³ப⁴ந்தி, கத²ம் திவித⁴மிச்சா²ஸங்கப்பானம் ஸமுக்³கா⁴தோதி ஆஹ ‘‘தத்ர ஹீ’’திஆதி³. ந நானா லப்³ப⁴தீதி இமினா திவித⁴கிச்சகாரிதம் ஸம்மாஸங்கப்பஸ்ஸ த³ஸ்ஸேதி. கிச்சவஸேன ஹி தஸ்ஸ நாமஸ்ஸ லாபோ⁴. ஸம்மாவாசாதீ³னம்பி மக்³க³க்க²ணே ஏகசித்தே லப்³ப⁴மானானம்பி சதுகிச்சகாரிதாய சதுப்³பி³த⁴னாமாதி³தா வேதி³தப்³பா³. ஸேஸம் ஸுவிஞ்ஞேய்யமேவ.

ஸச்சவிப⁴ங்க³ஸுத்தவண்ணனாய லீனத்த²ப்பகாஸனா ஸமத்தா.