8. கோ³பகமோக்³க³ல்லானஸுத்தவண்ணனா

79. கம்மம்யேவ கம்மந்தோ, ஸோ ஏத்த² அத்தீ²தி கம்மகரணட்டா²னம் ‘‘கம்மந்தோ’’தி வுத்தம். தேனாஹ ‘‘கம்மந்தட்டா²ன’’ந்தி. தேஹி த⁴ம்மேஹீதி பு³த்³த⁴கு³ணேஹி. தே பன ஸப்³ப³ஞ்ஞுதஞ்ஞாணப்பமுகா²தி கத்வா ஆஹ ‘‘ஸப்³ப³ஞ்ஞுதஞ்ஞாணத⁴ம்மேஹீ’’தி. ஸப்³பே³ன ஸப்³ப³ந்தி ஸப்³ப³ப்பகாரேன அனவஸேஸம், ஏத்தகோ கு³ணானம் பகாரபே⁴தோ³, தேஸு கிஞ்சிபி பகாரம் அனவஸேஸேத்வா. ஸப்³ப³கோட்டா²ஸேஹி ஸப்³ப³ந்தி யத்தகா கு³ணபா⁴கா³, தேஹி ஸப்³பே³ஹி அனவஸேஸம் நிஸ்ஸேஸமேவ கத்வா. யோபி அஹோஸீதி யோபி கோஸம்பி³வாஸீனம் பி⁴க்கூ²னம் வஸேன கோஸம்பி³யம் கலஹோ அஹோஸி. ஸோபி தத்தே²வ உப்பன்னட்டா²னேயேவ உப்பன்னமத்தோ வூபஸமிதோ. பரினிப்³பு³தகாலே பனஸ்ஸாதி அஸ்ஸ ஸம்மாஸம்பு³த்³த⁴ஸ்ஸ பரினிப்³பு³தகாலே பன. பி⁴ய்யோஸோமத்தாய பி⁴க்கூ² ஸமக்³கா³ ஜாதா, கத²ஞ்ச ஸம்வேகோ³ ஜாதோதி த³ஸ்ஸேதும் ‘‘அட்ட²ஸட்டீ²’’திஆதி³ வுத்தம். ஸாதிஸயம் அபி⁴ண்ஹஞ்ச உபஸமப்பத்தியா அதிவிய உபஸந்துபஸந்தா. அனுஸம்யாயமானோதி அனு அனு ஸம்மதே³வ ஜானந்தோ விசாரேந்தோ வோஸாஸமானோ. ‘‘அனுஸஞ்ஞாயமானோ’’தி வா பாடோ². தத்த² ய-காரஸ்ஸ ஞ-காரம் கத்வா நித்³தே³ஸோதி ஆஹ ‘‘அனுவிசரமானோ’’தி.

80. ஹேட்டி²மபுச்ச²மேவாதி கோ³பகமோக்³க³ல்லானேன புச்சி²தபுச்ச²மேவ. ஸோ ஹி ‘‘தேஹி த⁴ம்மேஹீ’’திஆதி³னா, ‘‘அத்தி² கோசி தும்ஹாகம் ஸாஸனஸ்ஸ ஸாரபூ⁴தோ பி⁴க்கூ²’’தி புச்சி². அயஞ்ச தமேவ ‘‘படிஸரணோ’’தி பரியாயேன புச்சி². அப்படிஸரணேதி யம் தும்ஹே பி⁴க்கு²ம் படிபோ³தே⁴ய்யாத², தாதி³ஸஸ்ஸ அபா⁴வேன அப்படிஸரணே. ததா²க³தேன பவேதி³தோ த⁴ம்மோ படிஸரணம் ஏதேஸந்தி த⁴ம்மபடிஸரணா. தேனாஹ ‘‘த⁴ம்மோ அவஸ்ஸயோ’’தி.

81. ஆக³ச்ச²தீதி வாசுக்³க³தபா⁴வேன ஆக³ச்ச²தி. வத்து²வீதிக்கமஸங்கா²தே க³ருக³ருதரலஹுலஹுதராதி³பே⁴தே³ அஜ்ஜா²சாரே ஆபத்திஸமஞ்ஞாதி ஆஹ – ‘‘ஆபத்தி…பே… ஆணாதிக்கமனமேவா’’தி. யதா²த⁴ம்மந்தி த⁴ம்மானுரூபம். யதா²ஸிட்ட²ந்தி யதா²னுஸிட்ட²ம். த⁴ம்மோ நோதி ஏத்த² நோ-ஸத்³தோ³ அவதா⁴ரணே ‘‘ந நோ ஸமம் அத்தி² ததா²க³தேனா’’திஆதீ³ஸு (கு². பா. 6.3; ஸு. நி. 226) விய. தேனேவாஹ ‘‘த⁴ம்மோவ காரேதீ’’தி.

83. ‘‘யதா² தம் தும்ஹாதி³ஸேஹி ரக்க²கேஹி கோ³பகேஹீ’’தி ஏவம் பஸன்னவேஸேன அத்தானம் உக்கம்ஸாபேதுகாமோ. அரியூபவாத³பாபம் க²மாபனே ஸதி அந்தராயாய ந ஹோதீதி ஆஹ – ‘‘இச்சேதம் குஸல’’ந்தி. கோ³னங்க³லமக்கடோதி கோ³னங்கு³ட்ட²மக்கடோ.

84. அயம் உக்கம்ஸாபேதும் இச்சி²தம் யதா²ரத்³த⁴மத்த²ம் விஸம்வாதே³தி அவண்ணிதம்பி வண்ணிதம் கத்வா கதே²ந்தோ; இமஸ்ஸ வசனஸ்ஸ படிக்கே²பேன இமினா தா³தப்³ப³பிண்ட³பாதஸ்ஸ அந்தராயோ மா ஹோதூதி ஏவம் பிண்ட³பாதம் ரக்கி²தும் ந கோ² பன ஸக்காதி யோஜனா. இத³ந்தி ‘‘ந கோ², ப்³ராஹ்மண, ஸோ ப⁴க³வா’’திஆதி³தே³ஸனம். அப்³ப⁴ந்தரம் கரித்வாதி நிப்³பா³னந்தோக³த⁴ம் கத்வா, அந்தரம் வா தஸ்ஸ நிஜ்ஜா²னஸ்ஸ காரணம் கத்வா. காமராக³வஸேன ஹி தம் நிஜ்ஜா²னம் ஹோதீதி. இதா⁴தி இமஸ்மிம் ஸுத்தபதே³ஸே. ஸப்³ப³ஸங்கா³ஹிகஜ்ஜா²னந்தி லோகியலோகுத்தரஸ்ஸ அந்தராயோ மா ஹோதூதி ஏவம் கத்வாபி ரூபாவசரஸ்ஸ மக்³க³ஜா²னஸ்ஸ ப²லஜா²னஸ்ஸாதி ஸப்³ப³ஸ்ஸபி ஸங்க³ண்ஹனவஸேன தே³ஸிதத்தா ஸப்³ப³ஸங்கா³ஹகஜ்ஜா²னம் நாம கதி²தம்.

யம் நோ மயந்தி ஏத்த² நோதி நிபாதமத்தம். தம் நோதி ஏத்த² பன நோதி அம்ஹாகந்தி அத்தோ². உஸூயதி ராஜகிச்சபஸுததாதீ⁴னதாய ஏகத்தா²பி⁴னிவேஸபா⁴வதோ. மந்த³பஞ்ஞதாய வஸ்ஸகாரக³தஇஸ்ஸாபி⁴பூ⁴தசித்ததாய பரிபுண்ணம் கத்வா வுத்தம்பி அத்த²ம் அனுபதா⁴ரேந்தோ ஆஹ – ‘‘ஏகதே³ஸமேவ கதே²ஸீ’’தி. ஸேஸம் ஸுவிஞ்ஞேய்யமேவ.

கோ³பகமோக்³க³ல்லானஸுத்தவண்ணனாய லீனத்த²ப்பகாஸனா ஸமத்தா.