7. க³ணகமோக்³க³ல்லானஸுத்தவண்ணனா

74. யதா² ஹேட்டி²மஸோபானப²லகம் ஓரோஹந்தஸ்ஸ பச்சி²மம் நாம ஹோதி, ஏவம் ஆரோஹந்தஸ்ஸ பட²மம் நாம ஹோதீதி வுத்தம் – ‘‘யாவ பச்சி²மஸோபானகளேவராதி யாவ பட²மஸோபானப²லகா’’தி. வத்து²ம் ஸோதே⁴த்வாதி வத்து²விஜ்ஜாசரியேன வுத்தவிதி⁴னா பாஸாத³வத்து²னோ ஸோத⁴னவிதி⁴ம் கத்வா. ஏத்தா²தி பாஸாத³கரணே. ஸத்ததா⁴ பி⁴ன்னஸ்ஸ வாலக்³க³ஸ்ஸ அம்ஸுகோடிவேத⁴கோ வாலவேதி⁴ நாம. டா²னஸம்பாத³னந்தி வேஸாக²மண்ட³லாதீ³னம் ஸம்பாத³னம். முட்டி²கரணாதீ³ஹீதி உஸுமுட்டி²கரணஜியாகா³ஹஜியாவிஜ்ஜா²தீ³ஹி. ஏவம் க³ணாபேமாதி ஏகம் நாம ஏகமேவ, த்³வே து³கா சத்தாரி, தீணி திகானி நவ, சத்தாரி சதுக்கானி ஸோளஸாதிஆதி³னா ஏவம் க³ணனம் ஸிக்கா²பேம.

75. கேராடிகா ஹோந்தீதி ஸமயஸ்ஸ அனுபக்கிலிட்ட²கரணமாயாஸாடே²ய்யேன ஸமன்னாக³தா ஹோந்தி. தம் த³மனம் ஜீவிதஹேதுபி நாதிக்கமதி, அயமஸ்ஸ ஜாதிதோ³ஸாபா⁴வோ.

76. ஸதிஸம்பஜஞ்ஞாஹி ஸமங்கி³பா⁴வத்தா²யாதி ஸததவிஹாரிபா⁴வஸாத⁴னேஹி ஸதிஸம்பஜஞ்ஞேஹி ஸமன்னாக³மத்தா²ய. நனு ச கீ²ணாஸவா ஸதிவேபுல்லப்பத்தா பஞ்ஞாவேபுல்லப்பத்தா ச, கத²ம் தஸ்ஸ ஸதிஸம்பஜஞ்ஞம் பயோக³ஸாத⁴னீயம் பவத்தந்தி ஆஹ ‘‘த்³வே ஹீ’’திஆதி³. ஸததவிஹாரீதி ஸததம் ஸமாபத்திவிஹாரிப³ஹுலா, தஸ்மா தே இச்சி²திச்சி²தக்க²ணே ப²லஸமாபத்திம் ஸமாபஜ்ஜந்தி. வுத்தவிபரியாயேன நோஸததவிஹாரினோ த³ட்ட²ப்³பா³. தேனாஹ ‘‘தத்தா²’’திஆதி³. அப்பேதும் ந ஸக்கோதி அனாசிண்ணபா⁴வதோ.

தம் விதக்கேந்தோதி ‘‘ஸாமணேரஸ்ஸ ஸேனாஸனம் நத்தி², அரஞ்ஞஞ்ச ஸீஹாதீ³ஹி ஸபரிஸ்ஸயம், கிம் நு கோ² தஸ்ஸ ப⁴விஸ்ஸதீ’’தி தம் விதக்கேந்தோ. ஏவரூபோதி ஏதி³ஸோ யதா²வுத்தஸாமணேரஸதி³ஸோ கீ²ணாஸவோ. இமே த⁴ம்மேதி இமஸ்மிம் ஸுத்தே ஆக³தே ஸீலாதி³த⁴ம்மே. ஆவஜ்ஜித்வாவாதி அத்தனோ பரிஸுத்³த⁴ஸீலதாதி³ஆவஜ்ஜனஹேது ஏவ ஸமாபஜ்ஜிதும் ஸக்கி²ஸ்ஸதி.

78. ‘‘யேமே, போ⁴ கோ³தமா’’தி வசனஸ்ஸ ஸம்ப³ந்த⁴ம் த³ஸ்ஸேதும், ‘‘ததா²க³தே கிரா’’திஆதி³ வுத்தம். ஏவந்தி ‘‘யேமே, போ⁴ கோ³தமா’’திஆதி³ஆகாரேஹி வத்துமாரத்³தோ⁴.

அஜ்ஜத⁴ம்மேஸூதி அபுராதனத⁴ம்மேஸு. தக்கனமத்தானி ஹி தேஹி கப்பேத்வா ஸயம்படிபா⁴னம் விரசிதானி. புராதனதாய பரிபுண்ணதாய ஏகந்தனிய்யானிகதாய ச பரமோ உத்தமோ. தேனாஹ – ‘‘தேஸு…பே… உத்தமோதி அத்தோ²’’தி. ஸேஸம் ஸுவிஞ்ஞேய்யமேவ.

க³ணகமோக்³க³ல்லானஸுத்தவண்ணனாய லீனத்த²ப்பகாஸனா ஸமத்தா.