9. த⁴ம்மசேதியஸுத்தவண்ணனா

364. மேத³வண்ணா உளுபவண்ணா ச தத்த² தத்த² பாஸாணா உஸ்ஸன்னா அஹேஸுந்தி மேதா³ளுபந்தி கா³மஸ்ஸ ஸமஞ்ஞா ஜாதா. உளுபவண்ணாதி சந்த³ஸமானவண்ணதாய மேத³பாஸாணா வுத்தாதி கேசி. அட்ட²கதா²யம் பன ‘‘மேத³வண்ணா பாஸாணா கிரேத்த² உஸ்ஸன்னா அஹேஸு’’ந்தி இத³ம் வுத்தம். அஸ்ஸாதி ஸேனாபதிஸ்ஸ. கதா²ஸமுட்டா²பனத்த²ந்தி மல்லிகாய ஸோகவினோத³னத⁴ம்மகதா²ஸமுட்டா²பனத்த²ம்.

ரஞ்ஞாதி பஸேனதீ³கோஸலரஞ்ஞா. மஹச்சாதி மஹதியா. பத³விபல்லாஸேன சேதம் வுத்தம். பஸாத³மரஹந்தீதி பாஸாதி³கானி. தேனாஹ ‘‘ஸஹ ரஞ்ஜனகானீ’’தி. யானி பன பாஸாதி³கானி, தானி பஸ்ஸிதும் யுத்தானி. பாஸாதி³கானீதி வா ஸத்³த³ஹனஸஹிதானி. தேனாஹ ‘‘பஸாத³ஜனகானீ’’தி. ‘‘அப்பாபா³த⁴’’ந்தி ஆதீ³ஸு விய அப்பஸத்³தோ³ அபா⁴வத்தோ²தி ஆஹ ‘‘நிஸ்ஸத்³தா³னீ’’தி. அனியமத்த²வாசீ ய-ஸத்³தோ³ அனியமாகாரவாசகோபி ஹோதீதி ‘‘யத்தா²’’தி பத³ஸ்ஸ ‘‘யாதி³ஸேஸூ’’திஆதி³மாஹ. ததா² ஹி அங்கு³லிமாலஸுத்தே (ம. நி. அட்ட². 2.347 ஆத³யோ) ‘‘யஸ்ஸ கோ²’’தி பத³ஸ்ஸ ‘‘யாதி³ஸஸ்ஸ கோ²’’தி அத்தோ² வுத்தோ.

366. படிச்ச²த³ந்தி படிச்சா²த³கம். ராஜககுத⁴ப⁴ண்டா³னீதி ராஜப⁴ண்ட³பூ⁴தானி. ரஹாயதீதி ரஹோ கரோதி, மம் அஜ்ஜே²ஸதீதி அத்தோ².

367. யதா²ஸபா⁴வதோ ஞேய்யம் தா⁴ரேதி அவதா⁴ரேதீதி த⁴ம்மோ, ஞாணந்தி ஆஹ ‘‘பச்சக்க²ஞாணஸங்கா²தஸ்ஸ த⁴ம்மஸ்ஸா’’தி. அனுனயோதி அனுக³ச்ச²னகோ. தி³ட்டே²ன ஹி அதி³ட்ட²ஸ்ஸ அனுமானம். தேனாஹ ‘‘அனுமானம் அனுபு³த்³தீ⁴’’தி. ஆபாணகோடிகந்தி யாவ பாணகோடி, தாவ ஜீவிதபரியோஸானம். ஏதந்தி த⁴ம்மன்வயஸங்கா²தம் அனுமானம். ஏவந்தி ‘‘இத⁴ பனாஹ’’ந்தி வுத்தப்பகாரேன.

369. சக்கு²ம் அப³ந்த⁴ந்தே வியாதி அபாஸாதி³கதாய பஸ்ஸந்தானம் சக்கு²ம் அத்தனி அப³ந்த⁴ந்தே விய. குலஸந்தானானுப³ந்தோ⁴ ரோகோ³ குலரோகோ³. உளாரந்தி ஸானுபா⁴வம். யோ ஹி ஆனுபா⁴வஸம்பன்னோ, தம் ‘‘மஹேஸக்க²’’ந்தி வத³ந்தி. அரஹத்தம் க³ண்ஹந்தோதி உக்கட்ட²னித்³தே³ஸோயம், ஹேட்டி²மப²லானி க³ண்ஹந்தோபி.

373. ஜீவிகா ஜீவிதவுத்தி.

374. த⁴ம்மம் சேதேதி ஸம்வேதே³தி ஏதேஹீதி த⁴ம்மசேதியானி, த⁴ம்மஸ்ஸ பூஜாவசனானி. நனு சேதானி பு³த்³த⁴ஸங்க⁴கு³ணதீ³பனானிபி ஸந்தி? கத²ம் ‘‘த⁴ம்மசேதியானீதி த⁴ம்மஸ்ஸ சித்தீகாரவசனானீ’’தி வுத்தந்தி ஆஹ ‘‘தீஸு ஹீ’’திஆதி³. தத்த² யஸ்மா பு³த்³த⁴ரதனமூலகானி ஸேஸரதனானி தஸ்ஸ வஸேன லத்³த⁴ப்³ப³தோ. கோஸலரஞ்ஞா சேத்த² பு³த்³த⁴கா³ரவேன த⁴ம்மஸங்க⁴கா³ரவம் பவேதி³தம், தஸ்மா ‘‘ப⁴க³வதி சித்தீகாரே கதே த⁴ம்மோபி கதோவ ஹோதீ’’தி வுத்தம். யஸ்மா ச ரதனத்தயபஸாத³புப்³பி³கா ஸாஸனே ஸம்மாபடிபத்தி, தஸ்மா வுத்தம் – ‘‘ஆதி³ப்³ரஹ்மசரியகானீதி மக்³க³ப்³ரஹ்மசரியஸ்ஸ ஆதி³பூ⁴தானீ’’தி. ஸேஸம் ஸுவிஞ்ஞேய்யமேவ.

த⁴ம்மசேதியஸுத்தவண்ணனாய லீனத்த²ப்பகாஸனா ஸமத்தா.