10. கண்ணகத்த²லஸுத்தவண்ணனா

375. அனந்தரஸுத்தே வுத்தகரணீயேனேவாதி ‘‘பாஸாதே³ வா நாடகேஸு வா சித்தஸ்ஸாத³ம் அலப⁴மானோ தத்த² தத்த² விசரிதும் ஆரத்³தோ⁴’’தி வுத்தகரணீயேன. அப்பது³ட்ட²பதோ³ஸீனஞ்ஹி ஏவம் ஹோதீதி.

376. புச்சி²தோதி ‘‘அஞ்ஞம் தூ³தம் நாலத்து²’’ந்தி புச்சி²தோ. ஸோதி ராஜா. தாஸம் வந்த³னா ஸசே உத்தரகாலம், அத்தனோ ஆக³மனகாரணம் கதே²ஸ்ஸதி.

378. ஏகாவஜ்ஜனேனாதி ஏகவீதி²ஜவனேன. தேன ஏகசித்தம் தாவ திட்ட²து, ஏகசித்தவீதி²யாபி ஸப்³ப³ம் ஜானிதும் ந ஸக்காதி த³ஸ்ஸேதி. ‘‘இத³ம் நாம அதீதம் ஜானிஸ்ஸாமீ’’தி அனியமேத்வா ஆவஜ்ஜதோ யம் கிஞ்சி அதீதம் ஜானாதி, நியமிதே பன நியமிதமேவாதி ஆஹ – ‘‘ஏகேன ஹி…பே… ஏகதே³ஸமேவ ஜானாதீ’’தி. தேன சித்தேனாதி ‘‘அதீதம் ஸப்³ப³ம் ஜானிஸ்ஸாமீ’’தி ஏவம் பவத்தசித்தேன. இதரேஸூதி அனாக³தபச்சுப்பன்னேஸு. காரணஜாதிகந்தி யுத்திஸபா⁴வம், யுத்தியா யுத்தந்தி அத்தோ². ஸம்பராயகு³ணந்தி ஸம்பராயே கதகம்மஸ்ஸ விஸேஸம்.

379. லோகுத்தரமிஸ்ஸகானி கதி²தானி போ³தி⁴ராஜகுமாரஸுத்தே விய லோகியா சேவ லோகுத்தரா ச. யதா²லாப⁴வஸேன சேத்த² பதா⁴னியங்கா³னம் லோகுத்தரக்³க³ஹணம் வேதி³தப்³ப³ம். பச்சேகம் ஏவ நேஸஞ்ச பதா⁴னியங்க³தா த³ட்ட²ப்³பா³ யதா² ‘‘அட்ட²விமோக்கா² ஸந்தி³ஸ்ஸந்தி லோகுத்தரமிஸ்ஸகா’’தி. லோகுத்தரானேவாதி சேத்த² யம் வத்தப்³ப³ம், தம் பரதோ ஆவி ப⁴விஸ்ஸதி. பதா⁴னனானத்தந்தி பத³ஹனனானத்தம், பா⁴வனானுயோக³விஸேஸந்தி அத்தோ². ஸங்கா²ரே பரிமத்³தி³த்வா படிபக்க²த⁴ம்மே ஏகதே³ஸதோ பஜஹித்வா டி²தஸ்ஸ பா⁴வனானுயோகோ³ ஸப்³பே³ன ஸப்³ப³ம் அபரிமத்³தி³தஸங்கா²ரஸ்ஸ அப்பஹீனபடிபக்க²ஸ்ஸ பா⁴வனானுயோக³தோ ஸுகு²மோ விஸதோ³வ ஹோதி, ஸச்சாபி⁴ஸமயேன ஸந்தானஸ்ஸ ஆஹிதவிஸேஸத்தாதி ஆஹ – ‘‘அஞ்ஞாதி³ஸமேவ ஹி புது²ஜ்ஜனஸ்ஸ பதா⁴னம், அஞ்ஞாதி³ஸம் ஸோதாபன்னஸ்ஸா’’திஆதி³. அயஞ்ச விஸேஸோ ந கேவலம் அனரியஅரியபுக்³க³லதோ ஏவ, அத² கோ² அரியேஸுபி ஸேக்கா²தி³விஸேஸதோபி லப்³ப⁴தி அபி⁴ஸங்கா²ரவிஸேஸதோ அபி⁴னீஹாரதோ ச இஜ்ஜ²னதோதி த³ஸ்ஸேந்தோ ‘‘அஞ்ஞாதி³ஸம் ஸகதா³கா³மினோ’’திஆதி³மாஹ. ந பாபுணாதீதி யஸ்மா புது²ஜ்ஜனோ ஸப்³ப³தா²வ பதா⁴னம் பத³ஹந்தோ ஸோதாபத்திமக்³க³ம் அதி⁴க³ச்ச²தி, ஸோதாபன்னோ ச ஸகதா³கா³மிமக்³க³ந்தி ஹேட்டி²மம் உபரிமதோ ஓளாரிகம், உபரிமஞ்ச இதரதோ ஸுகு²மம் தேன பஹாதும் அஸக்குணேய்யஸ்ஸ பஜஹனதோ, இதி அதி⁴க³ந்தப்³ப³விஸேஸேன ச அதி⁴க³மபடிபதா³ய ஸண்ஹஸுகு²மதா திக்க²விஸத³தா ச விஞ்ஞாயதீதி ஆஹ – ‘‘புது²ஜ்ஜனஸ்ஸ பதா⁴னம் ஸோதாபன்னஸ்ஸ பதா⁴னம் ந பாபுணாதீ’’திஆதி³.

அகூடகரணந்தி அவஞ்சனகிரியம். அனவச்சி²ந்த³னந்தி அதியானம். அவிஞ்ச²னம் ந ஆகட்³ட⁴னம், நியுத்ததம் வினிவேடே²த்வா ஸமந்தா விபரிவத்தித்வா ஸமதா⁴ராய ச²ட்³ட³னம் வா. தஸ்ஸ காரணம் தம்காரணம், தம் காரணந்தி வா தம் கிரியம் தம் அதி⁴காரம். த³ந்தேஹி க³ந்தப்³ப³பூ⁴மிந்தி த³ந்தேஹி பத்தப்³ப³ட்டா²னம், பத்தப்³ப³வத்து²ம் வா. சத்தாரோபி அஸ்ஸத்³தா⁴ நாம உபரிமஉபரிமஸத்³தா⁴ய அபா⁴வதோ. யேன ஹி யம் அப்பத்தம், தஸ்ஸ தம் நத்தி². அரியஸாவகஸ்ஸ…பே… நத்தி² பட²மமக்³கே³னேவ மாயாஸாடே²ய்யானம் பஹாதப்³ப³த்தா. தேனேவாதி ஸம்மதே³வ விருத்³த⁴பக்கா²னம் ஸத்³தா⁴தீ³னம் இதா⁴தி⁴ப்பேதத்தா. யதி³ ஏவம் கத²ம் மிஸ்ஸககதா²தி ஆஹ ‘‘அஸ்ஸக²ளுங்கஸுத்தந்தே பனா’’திஆதி³. சத்தாரோவ ஹோந்தி புது²ஜ்ஜனாதி³வஸேன.

ஓபம்மஸம்ஸந்த³னே அத³ந்தஹத்தி²ஆத³யோ வியாதிஆதி³னா கண்ஹபக்கே², யதா² பன த³ந்தஹத்தி²ஆத³யோதிஆதி³னா ஸுக்கபக்கே² ச ஸாதா⁴ரணதோ ஏகஜ்ஜ²ம் கத்வா வுத்தம், அஸாதா⁴ரணதோ பி⁴ந்தி³த்வா த³ஸ்ஸேதும் ‘‘இத³ம் வுத்தம் ஹோதீ’’திஆதி³ வுத்தம்.

380. ஸம்மப்பதா⁴னா நிப்³பி³ஸிட்ட²வீரியா. தேனாஹ – ‘‘ந கிஞ்சி நானாகரணம் வதா³மி, யதி³த³ம் விமுத்தியா விமுத்தி’’ந்தி. ந ஹி ஸுக்க²விபஸ்ஸகதேவிஜ்ஜச²ளபி⁴ஞ்ஞானம் விமுத்தியா நானாகரணம் அத்தி². தேன வுத்தம் ‘‘யம் ஏகஸ்ஸா’’திஆதி³. கிம் த்வம் ந ஜானாஸீதி ஸம்ப³ந்தோ⁴. ஆக³ச்ச²ந்தீதி உப்பஜ்ஜனவஸேன ஆக³ச்ச²ந்தி. நாக³ச்ச²ந்தீதி ஏத்தா²பி ஏஸேவ நயோ. இத³ம் புச்ச²ந்தோதி இத³ம் புச்சா²மீதி த³ஸ்ஸேந்தோ. அப்பஹீனசேதஸிகது³க்கா² அனதி⁴க³தஅனாகா³மிதா. தேனாஹ ‘‘உபபத்திவஸேன ஆக³ந்தாரோ’’தி. ஸமுச்சி²ன்னது³க்கா²தி ஸமுக்³கா⁴டிதசேதஸிகது³க்கா².

381. தம்ஹா டா²னாதி ததோ யதா²தி⁴க³தஇஸ்ஸரியட்டா²னதோ. புன தம்ஹா டா²னாதி ததோ து³க்³க³தா. ஸம்பன்னகாமகு³ணந்தி உளாரகாமகு³ணஸமன்னாக³தம்.

தத்தா²தி காமதே³வலோகே. டா²னபா⁴வதோதி அரஹத்தஞ்சே அதி⁴க³தம், தாவதே³வ பரினிப்³பா³னதோ. உபரிதே³வே சாதி உபரூபரி பூ⁴மிவாஸே தே³வே ச, சக்கு²விஞ்ஞாணத³ஸ்ஸனேனபி த³ஸ்ஸனாய நப்பஹோந்தீதி யோஜனா.

382. வுத்தனயேனேவாதி தே³வபுச்சா²ய வுத்தேனேவ நயேன. ஸா கிர கதா²தி ‘‘நத்தி² ஸோ ஸமணோ வா ப்³ராஹ்மணோ வா, யோ ஸகிதே³வ ஸப்³ப³ம் நேய்ய’’ந்தி கதா². தேதி விடடூப⁴ஸஞ்ஜயா. இமஸ்மிம்யேவ டா²னேதி இமஸ்மிம் மிக³தா³யேயேவ. ஸேஸம் ஸுவிஞ்ஞேய்யமேவ.

கண்ணகத்த²லஸுத்தவண்ணனாய லீனத்த²ப்பகாஸனா ஸமத்தா.

நிட்டி²தா ச ராஜவக்³க³வண்ணனா.