5. போ³தி⁴ராஜகுமாரஸுத்தவண்ணனா

324. ஓலோகனகபது³மந்தி லீலாஅரவிந்த³ம். தஸ்மாதி கோகனத³ஸண்டா²னத்தா கோகனதோ³தி ஸங்க²ம் லபி⁴.

325. யாவ பச்சி²ம…பே… ப²லகம் வுத்தம் தஸ்ஸ ஸப்³ப³பச்சா² ஸந்த²தத்தா. உபரிமப²லக³தஞ்ஹி ஸோபானமத்த²கம். ஓலோகனத்த²ம்யேவாதி ந கேவலம் ப⁴க³வதோ ஆக³மனஞ்ஞேவ ஓலோகனத்த²ம், அத² கோ² அத்தனோ பத்த²னாய ஸந்த²ராபிதாய சேலபடிகாய அக்கமனஸ்ஸபி.

ஸகுணபோதகேதி காத³ம்ப³டிட்டிப⁴புத்தகே. அஞ்ஞோவ ப⁴வேய்யாதி தஸ்மிம் அத்தபா⁴வே மாதுகா³மதோ அஞ்ஞோ இதா³னி ப⁴ரியாபூ⁴தோ மாதுகா³மோ ப⁴வேய்ய. புத்தம் லபே⁴ய்யாதி அத்தனோ கம்மவஸேன புத்தம், நோ தஸ்ஸ. உபோ⁴ஹீதி இமேஹி ஏவ உபோ⁴ஹி. இமேஹி காரணேஹீதி தஸ்ஸ ராஜகுமாரஸ்ஸ பு³த்³த⁴ம் படிச்ச மிச்சா²க³ஹணம், தித்தி²யானம் உஜ்ஜா²யனம், அனாக³தே மனுஸ்ஸானம் பி⁴க்கூ²னம் உத்³தி³ஸ்ஸ விப்படிஸாரோதி இமேஹி தீஹி காரணேஹி. பஞ்ஞத்தந்தி ஸந்த²தம் சேலபடிகம். மங்க³லம் இச்ச²ந்தீதி மங்க³லிகா.

326. ததியம் காரணந்தி இமினா பி⁴க்கூ²ஸு விப்படிஸாரானுப்பாத³னமாஹ. யம் கிஞ்சி பரிபு⁴ஞ்ஜன-ஸுக²ம் காமஸுக²ல்லிகானுயோகோ³தி அதி⁴ப்பாயேன காமஸுக²ல்லிகானுயோக³ஸஞ்ஞீ ஹுத்வா…பே… மஞ்ஞமானோ ஏவமாஹ.

327. அத² நம் ப⁴க³வா ததோ மிச்சா²பி⁴னிவேஸதோ விவேசேதுகாமோ ‘‘ஸோ கோ² அஹ’’ந்திஆதி³னா அத்தனோ து³க்கரசரியம் த³ஸ்ஸேதும் ஆரபி⁴. மஹாஸச்சகே(ம. நி. 1.364 ஆத³யோ) வுத்தனயேனேவ வேதி³தப்³ப³ம் ‘‘ஸோ கோ² அஹ’’ந்திஆதி³பாட²ஸ்ஸ தத்த² ஆக³தனியாமேனேவ ஆக³தத்தா. பாஸராஸிஸுத்தே (ம. நி. 1.272 ஆத³யோ) வுத்தனயேனாதி ஏத்தா²பி ஏஸேவ நயோ.

343. அங்குஸம் க³ண்ஹந்தி ஏதேன தஸ்ஸ க³ஹணே சே²கோ ஹோதீதி அங்குஸக³ஹணஸிப்பம். மேக⁴உதுந்தி மேக⁴ம் படிச்ச உப்பன்னஸீதஉதும். பப்³ப³தஉதுந்தி பப்³ப³தம் படிச்ச உண்ஹஉதும். உப⁴யவஸேன ச தஸ்ஸ ததா² ஸீதுண்ஹஉதுதோ ஏனோ ஆக³தோதி த-காரஸ்ஸ த³-காரம் கத்வா உதே³னோதி நாமம் அகாஸி.

தாபஸோ ஓகா³ள்ஹஞாணவஸேன ரஞ்ஞோ மதபா⁴வம் ஞத்வா. ஆதி³தோ பட்டா²யாதி கோஸம்பி³னக³ரே பரந்தபரஞ்ஞோ அக்³க³மஹேஸிபா⁴வதோ பட்டா²ய. புப்³பே³தி ஸீலவந்தகாலே. ஹத்தி²க³ந்த²ந்தி ஹத்தீ²னம் அத்தனோ வஸே வத்தாபனஸத்த²ம். தேனேவஸ்ஸ தம் ஸிக்கா²பேதி, கிச்சஞ்ச இஜ்ஜ²தி.

344. பத³ஹனபா⁴வோதி பா⁴வனானுயோகோ³. பதா⁴னே வா நியுத்தோ பதா⁴னியோ, பதா⁴னியஸ்ஸ பி⁴க்கு²னோ, தஸ்ஸேவ பதா⁴னியபா⁴வஸ்ஸ அங்கா³னி காரணானி பதா⁴னியங்கா³னி. ஸத்³தா⁴ ஏதஸ்ஸ அத்தீ²தி ஸத்³தோ⁴. கிஞ்சாபி பச்சேகபோ³தி⁴ஸத்தானம்பி அபி⁴னீஹாரதோ பட்டா²ய ஆக³தா ஆக³மனஸத்³தா⁴ ஏவ, மஹாபோ³தி⁴ஸத்தானம் பன ஸத்³தா⁴ க³ருதராதி ஸா ஏவ க³ஹிதா. அசலபா⁴வேன ஓகப்பனம் ‘‘ஸம்மாஸம்பு³த்³தோ⁴ ப⁴க³வா, ஸ்வாக்²யாதோ த⁴ம்மோ, ஸுப்படிபன்னோ ஸங்கோ⁴’’தி கேனசி அகம்பியபா⁴வேன ரதனத்தயகு³ணே ஓகா³ஹித்வா கப்பனம். பஸாது³ப்பத்தி ரதனத்தயே பஸீத³னமேவ. போ³தி⁴ந்தி சதுமக்³க³ஞாணந்தி வுத்தம் தம்னிமித்தத்தா ஸப்³ப³ஞ்ஞுதஞ்ஞாணஸ்ஸ, போ³தீ⁴தி வா ஸம்மாஸம்போ³தி⁴. ஸப்³ப³ஞ்ஞுதஞ்ஞாணபத³ட்டா²னஞ்ஹி மக்³க³ஞாணம், மக்³க³ஞாணபத³ட்டா²னஞ்ச ஸப்³ப³ஞ்ஞுதஞ்ஞாணம் ‘‘ஸம்மாஸம்போ³தீ⁴’’தி வுச்சதி. நிச்சி²தஸுபு³த்³த⁴தாய த⁴ம்மஸ்ஸ ஸுத⁴ம்மதா ஸங்க⁴ஸ்ஸ ஸுப்படிபத்தி வினிச்சி²தா ஏவ ஹோதீதி ஆஹ ‘‘தே³ஸனாஸீஸமேவ சேத’’ந்திஆதி³. தஸ்ஸ பதா⁴னம் வீரியம் இஜ்ஜ²தி ரதனத்தயஸத்³தா⁴ய ‘‘இமாய படிபதா³ய ஜராமரணதோ முச்சிஸ்ஸாமீ’’தி பதா⁴னானுயோகே³ அவம்முக²ஸம்ப⁴வதோ.

அப்பாபா³தோ⁴திஆதி³ ஹேட்டா² வுத்தமேவ. அகு³ணம் பகாஸேதா ஆயதிம் ஸம்வரம் ஆபஜ்ஜிதா ஸம்மாபடிபத்தியா விஸோத⁴னத்த²ம். உத³யஞ்ச அத்த²ஞ்ச க³ந்துந்தி ‘‘அவிஜ்ஜாஸமுத³யா’’திஆதி³னா பஞ்சன்னம் உபாதா³னக்க²ந்தா⁴னம் உத³யஞ்ச வயஞ்ச ஜானிதும். தேனாஹ ‘‘ஏதேனா’’திஆதி³. பரிஸுத்³தா⁴ய உபக்கிலேஸவினிமுத்தாய. நிப்³பி³ஜ்ஜி²துந்தி தத³ங்க³வஸேன பஜஹிதும் ஸமுச்சே²த³ப்பஹானஸ்ஸ பச்சயோ ப⁴விதும். யம் து³க்க²ம் கீ²யதீதி கிலேஸேஸு அப்பஹீனேஸு தேன தது³பனிஸ்ஸயகம்மம் படிச்ச யம் து³க்க²ம் உப்பஜ்ஜேய்ய, தம் ஸந்தா⁴ய வுத்தம்.

345. ஸேஸதி³வஸேதி ஸத்ததி³வஸதோ பட்டா²ய யாவ த்³வே ரத்திந்தி³வா.

346. குச்சி²ஸன்னிஸ்ஸிதோ க³ப்³போ⁴ நிஸ்ஸயவோஹாரேன ‘‘குச்சீ²’’தி வுச்சதி, ஸோ ஏதிஸ்ஸா அத்தீ²தி குச்சி²மதீ. தேனாஹ ‘‘ஆபன்னஸத்தா’’தி. ஆரக்கோ² பனஸ்ஸ பச்சுபட்டி²தோ ஹோதீதி மாதரா க³ஹிதஸரணம் க³ப்³ப⁴வுட்டி²தஸ்ஸ தஸ்ஸ ஸரணக³மனம் பவேத³யிதஸ்ஸ குஸலம் ஸரணம் நாம, மாது கதரக்கோ² புத்தஸ்ஸபி பச்சுபட்டி²தோதி. மஹல்லககாலேதி வசனத்த²ம் ஜானனகாலே. ஸாரேந்தீதி யதா²தி³ட்ட²ம் யதா²ப³லம் ரதனத்தயகு³ணபதிட்டா²பனவஸேன அஸ்ஸ ஸாரேந்தி. ஸல்லக்கே²த்வாதி வுத்தமத்த²ம் உபதா⁴ரேத்வா. ஸரணம் க³ஹிதம் நாம ஹோதி ரதனத்தயஸ்ஸ ஸரணபா⁴வஸல்லக்க²ணபுப்³ப³கதன்னின்னசித்தபா⁴வதோவ. ஸேஸம் ஸுவிஞ்ஞேய்யமேவ.

போ³தி⁴ராஜகுமாரஸுத்தவண்ணனாய லீனத்த²ப்பகாஸனா ஸமத்தா.