1. க⁴டிகாரஸுத்தவண்ணனா

282. சரியந்தி போ³தி⁴சரியம், போ³தி⁴ஸம்பா⁴ரஸம்ப⁴ரணவஸேன பவத்திதம் போ³தி⁴ஸத்தபடிபத்திந்தி அத்தோ². ஸுகாரணந்தி போ³தி⁴பரிபாசனஸ்ஸ ஏகந்திகம் ஸுந்த³ரம் காரணம், கஸ்ஸபஸ்ஸ ப⁴க³வதோ பயிருபாஸனாதி³ம் ஸந்தா⁴ய வத³தி. தஞ்ஹி தேன ஸத்³தி⁴ம் மயா இத⁴ கதந்தி வத்தப்³ப³தம் லப⁴தி. மந்த³ஹஸிதந்தி ஈஸகம் ஹஸிதம். குஹம் குஹந்தி ஹாஸ-ஸத்³த³ஸ்ஸ அனுகரணமேதம். ஹட்ட²பஹட்டா²காரமத்தந்தி ஹட்ட²பஹட்ட²மத்தம். யதா² க³ஹிதஸங்கேதா ‘‘பஹட்டோ² ப⁴க³வா’’தி ஸஞ்ஜானந்தி, ஏவம் ஆகாரத³ஸ்ஸனமத்தம்.

இதா³னி இமினா பஸங்கே³ன தாஸம் ஸமுட்டா²னம் விபா⁴க³தோ த³ஸ்ஸேதும் ‘‘ஹஸிதஞ்ச நாமேத’’ந்திஆதி³ ஆரத்³த⁴ம். தத்த² அஜ்ஜு²பேக்க²னவஸேனபி ஹாஸோ ந ஸம்ப⁴வதி, பகே³வ தோ³மனஸ்ஸவஸேனாதி ஆஹ ‘‘தேரஸஹி ஸோமனஸ்ஸஸஹக³தசித்தேஹீ’’தி. நனு ச கேசி கோத⁴வஸேனபி ஹஸந்தீதி? ந, தேஸம்பி யம் தம் கோத⁴வத்து², தஸ்ஸ மயம் தா³னி யதா²காமகாரிதம் ஆபஜ்ஜிஸ்ஸாமாதி து³விஞ்ஞேய்யந்தரேன ஸோமனஸ்ஸசித்தேனேவ ஹாஸஸ்ஸ உப்பஜ்ஜனதோ. தேஸூதி பஞ்சஸு ஸோமனஸ்ஸஸஹக³தசித்தேஸு. ப³லவாரம்மணேதி உளாரஆரம்மணே யமகமஹாபாடிஹாரியஸதி³ஸே. து³ப்³ப³லாரம்மணேதி அனுளாரே ஆரம்மணே. இமஸ்மிம் பன டா²னே…பே… உப்பாதே³ஸீதி இத³ம் போராணட்ட²கதா²யம் ததா² ஆக³தத்தா வுத்தம். ந அஹேதுகஸோமனஸ்ஸஸஹக³தசித்தேன ப⁴க³வதோ ஸிதம் ஹோதீதி த³ஸ்ஸனத்த²ம்.

அபி⁴த⁴ம்மடீகாயம் (த⁴. ஸ. மூலடீ. 568) பன ‘‘அதீதம்ஸாதீ³ஸு அப்படிஹதம் ஞாணம் வத்வா ‘இமேஹி தீஹி த⁴ம்மேஹி ஸமன்னாக³தஸ்ஸ பு³த்³த⁴ஸ்ஸ ப⁴க³வதோ ஸப்³ப³ம் காயகம்மம் ஞாணபுப்³ப³ங்க³மம் ஞாணானுபரிவத்த’ந்திஆதி³வசனதோ (மஹானி. 69, 156; சூளனி. மாக⁴ராஜமாணவபுச்சா²னித்³தே³ஸ 85; படி. ம. 3.5; நேத்தி. 15; தீ³. நி. அட்ட². 3.305; விப⁴. மூலடீ. ஸுத்தந்தபா⁴ஜனீயவண்ணனா; தீ³. நி. டீ. 3.141, 305) ‘ப⁴க³வதோ இத³ம் சித்தம் உப்பஜ்ஜதீ’தி வுத்தவசனம் விசாரேதப்³ப³’’ந்தி வுத்தம். தத்த² இமினா ஹஸிதுப்பாத³சித்தேன பவத்தியமானம்பி ப⁴க³வதோ ஸிதகரணம் புப்³பே³னிவாஸ-அனாக³தம்ஸ-ஸப்³ப³ஞ்ஞுதஞ்ஞாணானம் அனுவத்தகத்தா ஞாணானுபரிவத்தியேவாதி, ஏவம் பன ஞாணானுபரிவத்திபா⁴வே ஸதி ந கோசி பாளிஅட்ட²கதா²னம் விரோதோ⁴. ததா² ஹி அபி⁴த⁴ம்மட்ட²கதா²யம் (த⁴. ஸ. அட்ட². 568) ‘‘தேஸம் ஞாணானம் சிண்ணபரியந்தே இத³ம் சித்தம் உப்பஜ்ஜதீ’’தி வுத்தம். அவஸ்ஸஞ்ச ஏதம் ஏவம் இச்சி²தப்³ப³ம், அஞ்ஞதா² ஆவஜ்ஜனஸ்ஸபி ப⁴க³வதோ பவத்தி ததா²ரூபே காலே ந ஸம்யுஜ்ஜேய்ய, தஸ்ஸபி ஹி விஞ்ஞத்திஸமுட்டா²பகபா⁴வஸ்ஸ இச்சி²தத்தா, ததா² ஹி வுத்தம் – ‘‘ஏவஞ்ச கத்வா மனோத்³வாராவஜ்ஜனஸ்ஸபி விஞ்ஞத்திஸமுட்டா²பகத்தம் உபபன்னம் ஹோதீ’’தி, ந ச விஞ்ஞத்திஸமுட்டா²பகத்தே தம்ஸமுட்டி²தாய விஞ்ஞத்தியா காயகம்மாதி³பா⁴வம் ஆபஜ்ஜனபா⁴வோ விப³ந்த⁴தீதி தமேவ ஸந்தா⁴ய வத³தி. தேனாஹ ‘‘ஏவம் அப்பமத்தகம்பீ’’தி. ஸதேரிதா விஜ்ஜுலதா நாம ஸதேரதாவிஜ்ஜுலதா. ஸா ஹி இதரவிஜ்ஜுலதா விய க²ணட்டி²திகா ஸீக⁴னிரோதா⁴ ச ந ஹோதி, அபிச கோ² த³ந்த⁴னிரோதா⁴, தஞ்ச ஸப்³ப³காலம் சதுதீ³பிகமஹாமேக⁴தோவ நிச்ச²ரதி தேனாஹ ‘‘சாதுத்³தீ³பிகமஹாமேக⁴முக²தோ’’தி. அயம் கிர தாஸம் ரஸ்மிவட்டீனம் த⁴ம்மதா, யதி³த³ம் திக்க²த்தும் ஸிரவரம் பத³க்கி²ணம் கத்வா தா³ட²க்³கே³ஸுயேவ அந்தரதா⁴னம்.

283. யதி³பி சத்தாரி அஸங்க்²யேய்யானி கப்பானம் ஸதஸஹஸ்ஸஞ்ச பஞ்ஞாபாரமிதா பரிபா⁴விதா, ததா²பி இதா³னி தம் பு³த்³த⁴ந்தரம் தஸ்ஸா படிபாதே³தப்³ப³த்தா வுத்தம் ‘‘அபரிபக்கஞாணத்தா’’தி. காமஞ்சஸ்ஸ ஞாணாய இதா³னிபி படிபாதே³தப்³ப³தா அத்தி², ஏவம் ஸந்தேபி நனு ஸம்மாஸம்பு³த்³தே⁴ஸு பஸாதே³ன ஸம்பா⁴வனாய ப⁴விதப்³ப³ம் ததா² சிரகாலம் பரிபா⁴விதத்தா, கத²ம் தத்த² ஹீளனாதி ஆஹ ‘‘ப்³ராஹ்மணகுலே’’திஆதி³. சிரகாலபரிசிதாபி ஹி கு³ணபா⁴வனா அப்பகேனபி அகல்யாணமித்தஸம்ஸக்³கே³ன விபரிவத்ததி அஞ்ஞத²த்தம் க³ச்ச²தி. தேன மஹாஸத்தோபி ஜாதிஸித்³தா⁴யம் லத்³தி⁴யம் ட²த்வா ஜாதிஸித்³தே⁴ன மானேன ஏவமாஹ – ‘‘கிம் பன தேன முண்ட³கேன ஸமணகேன தி³ட்டே²னா’’தி. ததா² ஹி வுத்தம் அட்ட²கதா²யம் –

‘‘தஸ்மா அகல்யாணஜனம், ஆஸீவிஸமிவோரக³ம்,

ஆரகா பரிவஜ்ஜேய்ய, பூ⁴திகாமோ விசக்க²ணோ’’தி. (தீ³. நி. அட்ட². 1.170-172);

ந்ஹானசுண்ணேன ஸுத்தேன கதா ஸோத்தி, குருவிந்த³கு³ளிகா, ஸா ஏவ ஸினாயந்தி காயம் விஸோதே⁴ந்தி ஏதாயாதி ஸினானம். தேனாஹ – ‘‘ஸோத்தி ஸினானந்தி ஸினானத்தா²ய கதஸோத்தி’’ந்தி.

284. அரியபரிஹாரேனாதி அரியானம் பரிஹாரேன, அனாகா³மீனம் ந்ஹானகாலே அத்தனோ காயஸ்ஸ பரிஹாரனியாமேனாதி அத்தோ². அத்தனோ ஞாணஸம்பத்தியா விப⁴வஸம்பத்தியா பஸன்னகாரம் காதும் ஸக்கி²ஸ்ஸதி. ஏதத³த்த²ந்தி ‘‘அஹிதனிவாரணம், ஹிதே நியோஜனம் ப்³யஸனே பரிவஜ்ஜன’’ந்தி யதி³த³ம், ஏதத³த்த²ம் மித்தா நாம ஹோந்தி. கேசி ‘‘யாவேத்த² அஹுபீ’’தி பட²ந்தி, தேஸம் யாவ ஏத்த² கேஸக்³க³க³ஹணம் தாவ அயம் நிப³ந்தோ⁴ அஹுபீதி அத்தோ².

285. ஸதிபடிலாப⁴த்தா²யாதி போ³தி⁴யா மஹாபி⁴னீஹாரம் கத்வா போ³தி⁴ஸம்பா⁴ரபடிபதா³ய பூரணபா⁴வே ஸதியா படிலாப⁴த்தா²ய. இதா³னி தஸ்ஸ ஸதுப்பாத³னீயகதா²ய பவத்திதாகாரம் ஸங்கே²பேனேவ த³ஸ்ஸேதும் ‘‘தஸ்ஸ ஹீ’’திஆதி³ வுத்தம். தத்த² ந லாமகட்டா²னம் ஓதிண்ணஸத்தோதி இமினா மஹாஸத்தஸ்ஸ பணீதாதி⁴முத்ததம் த³ஸ்ஸேத்வா ஏவம் பணீதாதி⁴முத்திகஸ்ஸ பமாத³கிரியா ந யுத்தாதி த³ஸ்ஸேந்தோ ‘‘தாதி³ஸஸ்ஸ நாம பமாத³விஹாரோ ந யுத்தோ’’தி ஆஹ. ததா³ போ³தி⁴ஸத்தஸ்ஸ நேக்க²ம்மஜ்ஜா²ஸயோ தேலப்பதீ³போ விய விஸேஸதோ நிப்³ப³த்தி, தம் தி³ஸ்வா ப⁴க³வா தத³னுரூபம் த⁴ம்மகத²ம் கரோந்தோ ‘‘தாதி³ஸஸ்ஸ…பே… கதே²ஸீ’’தி. பரஸமுத்³த³வாஸீ தே²ரா அஞ்ஞதா² வத³ந்தி. அட்ட²கதா²யம் பன நாயம் பு³த்³தா⁴னம் பா⁴ரோ, யதி³த³ம் பூரிதபாரமீனம் போ³தி⁴ஸத்தானம் ததா² த⁴ம்மதே³ஸனா தேஸம் மஹாபி⁴னீஹாரஸமனந்தரம்பி போ³தி⁴ஸம்பா⁴ரஸ்ஸ ஸயம்பு⁴ஞாணேனேவ படிவிதி³தத்தா. தஸ்மா போ³தி⁴ஸத்தபா⁴வபவேத³னமேவ தஸ்ஸ ப⁴க³வா அகாஸீதி த³ஸ்ஸேதும் ‘‘ஸதிபடிலாப⁴த்தா²யா’’திஆதி³ வுத்தம். ஸதிபடிலாப⁴த்தா²யாதி ஸம்மாபடிபத்தியா உஜ்ஜலனே பாகடகரஸதிபடிலாபா⁴ய.

286. ஞாணஞ்ஹி கிலேஸத⁴ம்மவிதா³லனபதா³லனேஹி ஸிங்க³ம் வியாதி ஸிங்க³ம். தஞ்ஹி படிபத்தியா உபத்த²ம்பி⁴தம் உஸ்ஸிதம் நாம ஹோதி, தத³பா⁴வே பதிதம் நாம. கேசி பன வீரியம் ஸிங்க³ந்தி வத³ந்தி. தஸ்மிம் ஸம்மப்பதா⁴னவஸேன பவத்தே பா³ஹிரபப்³ப³ஜ்ஜம் உபக³தாபி மஹாஸத்தா விஸுத்³தா⁴ஸயா அப்பிச்ச²தாதி³கு³ணஸமங்கி³னோ யதா²ரஹம் க³ந்த²து⁴ரம் வாஸது⁴ரஞ்ச பரிப்³ரூஹயந்தா விஹரந்தி, பகே³வ பு³த்³த⁴ஸாஸனே அப்பிச்ச²தாதீ³ஹீதி ஆஹ ‘‘சதுபாரிஸுத்³தி⁴ஸீலே பனா’’திஆதி³. விபஸ்ஸனம் ப்³ரூஹேந்தா ஸிகா²ப்பத்தவிபஸ்ஸனா ஹோந்தீதி வுத்தம் – ‘‘யாவ அனுலோமஞாணம் ஆஹச்ச திட்ட²ந்தீ’’தி, அனுலோமஞாணதோ ஓரமேவ விபஸ்ஸனம் ட²பேந்தீதி அத்தோ². மக்³க³ப²லத்த²ம் வாயாமம் ந கரோந்தி பஞ்ஞாபாரமிதாய ஸப்³ப³ஞ்ஞுதஞ்ஞாணக³ப்³ப⁴ஸ்ஸ அபரிபுண்ணத்தா அபரிபக்கத்தா ச.

287. தே²ரேஹீதி வுத்³த⁴தரேஹி. நிவாஸே ஸதீதி யஸ்மிம் டா²னே பப்³ப³ஜிதோ, தத்தே²வ நிவாஸே. வப்பகாலதோதி ஸஸ்ஸானம் வப்பகாலதோ. புப்³பே³ விய ததோ பரம் திகி²ணேன ஸூரியஸந்தாபேன பயோஜனம் நத்தீ²தி வுத்தம் – ‘‘வப்பகாலே விதானம் விய உபரி வத்த²கிலஞ்ஜம் ப³ந்தி⁴த்வா’’தி. புடகேதி கலாபே.

288. பச்சயஸாமக்³கி³ஹேதுகத்தா த⁴ம்மப்பத்தியா பதே³ஸதோ பரிஞ்ஞாவத்து²காபி அரியா உபட்டி²தே சித்தவிகா⁴தபச்சயே யதே³தம் நாதிஸாவஜ்ஜம், ததே³வம் க³ண்ஹந்தீதி அயமேத்த² த⁴ம்மதாதி ஆஹ – ‘‘அலாப⁴ம் ஆரப்³ப⁴ சித்தஞ்ஞத²த்த’’ந்திஆதி³. ஸோதி கிகீ காஸிராஜா. ப்³ராஹ்மணப⁴த்தோதி ப்³ராஹ்மணேஸு ப⁴த்தோ. தே³வேதி ப்³ராஹ்மணே ஸந்தா⁴யாஹ. பூ⁴மிதே³வாதி தேஸம் ஸமஞ்ஞா, ததா³ ப்³ராஹ்மணக³ருகோ லோகோ. ததா³ ஹி கஸ்ஸபோபி ப⁴க³வா ப்³ராஹ்மணகுலே நிப்³ப³த்தி. தீ⁴து அவண்ணம் வத்வாதி, ‘‘மஹாராஜ, தவ தீ⁴தா ப்³ராஹ்மணஸமயம் பஹாய முண்ட³பாஸண்டி³கஸமயம் க³ண்ஹீ’’திஆதி³னா ராஜபுத்தியா அகு³ணம் வத்வா. வரம் க³ண்ஹிம்ஸு ஞாதகா. ரஜ்ஜம் நிய்யாதேஸி ‘‘மா மே வசனம் முஸா அஹோஸி, அட்ட²மே தி³வஸே நிக்³க³ண்ஹிஸ்ஸாமீ’’தி.

பாவனஅஸ்மனயனவஸேன ஸம்மா பாவீகதத்தா பரிஸுத்³த⁴தண்டு³லானி. பாளியம் தண்டு³லபடிப⁴ஸ்தானீதி தண்டு³லக²ண்டா³னி. முக்³க³படிப⁴ஸ்தகளாயபடிப⁴ஸ்தேஸுபி ஏஸேவ நயோ.

289. கோ நு கோ²தி பு⁴ம்மத்தே² பச்சத்தவசனந்தி ஆஹ – ‘‘குஹிம் நு கோ²’’தி பாரிபூரிம் யோஜீயந்தி ப்³யஞ்ஜனபோ⁴ஜனானி ஏத்தா²தி பரியோகோ³, ததோ பரியோகா³. தேனாஹ ‘‘ஸூபபா⁴ஜனதோ’’தி. ஸஞ்ஞம் த³த்வாதி வுத்தம் ஸப்³ப³ம் ஆசிக்கி²த்வா தும்ஹாகம் அத்தா²ய ஸம்பாதே³த்வா நிக்கி²த்தோ உபட்டா²கோதி ப⁴க³வதோ ஆரோசேதா²தி ஸஞ்ஞம் த³த்வா. அதிவிஸ்ஸத்தோ²தி அதிவிய விஸ்ஸத்தோ². பஞ்சவண்ணாதி கு²த்³தி³காதி³வஸேன பஞ்சப்பகாரா.

290. கிந்தி நிஸ்ஸக்கே பச்சத்தவசனம், கஸ்மாதி அத்தோ²? த⁴ம்மிகோதி இமினா ஆக³மனஸுத்³தி⁴ம் த³ஸ்ஸேதி. பி⁴க்கூ²னம் பத்தே ப⁴த்தஸதி³ஸோதி இமினா உபாஸகேன ஸத்து² பரிச்சத்தபா⁴வம் தத்த² ஸத்து²னோ ச அபரிஸங்கதம் த³ஸ்ஸேதி. ஸிக்கா²பத³வேலா நாம நத்தீ²தி த⁴ம்மஸ்ஸாமிபா⁴வதோ ஸிக்கா²பத³மரியாதா³ நாம நத்தி² பண்ணத்திவஜ்ஜே, பகதிவஜ்ஜே பன ஸேதுகா⁴தோ ஏவ.

291. ச²த³னட்டா²னே யதா³காஸம், ததே³வ தஸ்ஸ கே³ஹஸ்ஸ ச²த³னந்தி ஆகாஸச்ச²த³னம். பகதியா உதுப²ரணமேவாதி சா²தி³தே யாதி³ஸம் உது, ச²த³னே உத்திணபா⁴வேபி தம்ஹி கே³ஹே தாதி³ஸமேவ உதுப²ரணம் அஹோஸி. தேஸம்யேவாதி தேஸம் க⁴டிகாரஸ்ஸ மாதாபிதூனம் ஏவ.

292. ‘‘சதஸ்ஸோ முட்டி²யோ ஏகோ குடு³வோ, சத்தாரோ குடு³வா ஏகோ பத்தோ², சத்தாரோ பத்தா² ஏகோ ஆள்ஹகோ, சத்தாரோ ஆள்ஹகா ஏகம் தோ³ணம், சத்தாரி தோ³ணானி ஏகா மானிகா, சதஸ்ஸோ மானிகா ஏகா கா²ரீ, வீஸதி கா²ரிகா ஏகோ வாஹோதி ததே³வ ஏகஸகட’’ந்தி ஸுத்தனிபாதட்ட²கதா²தீ³ஸு (ஸு. நி. அட்ட². 2.662) வுத்தம், இத⁴ பன ‘‘த்³வே ஸகடானி ஏகோ வாஹோ’’தி வுத்தம். தேலபா²ணிதாதி³ந்தி ஆதி³-ஸத்³தே³ன ஸப்பிஆதி³ம் மரிசாதி³கடுகப⁴ண்ட³ஞ்ச ஸங்க³ண்ஹாதி. நாஹம் ரஞ்ஞா தி³ட்ட²புப்³போ³, குதோ பரிப்ப²ஸ்ஸோதி அதி⁴ப்பாயோ. நச்சித்வாதி நச்சம் த³த்வா.

க⁴டிகாரஸுத்தவண்ணனாய லீனத்த²ப்பகாஸனா ஸமத்தா.