6. ஸந்த³கஸுத்தவண்ணனா

223. தே³வேன வஸ்ஸேன கதோ ஸோப்³போ⁴ தே³வகதஸோப்³போ⁴. தேனாஹ ‘‘வஸ்ஸோ…பே… ரஹதோ³’’தி. கு³ஹாதி பம்ஸுகு³ஹா பாஸாணகு³ஹா மிஸ்ஸககு³ஹாதி திஸ்ஸோ கு³ஹா. தத்த² பம்ஸுகு³ஹா உத³கமுத்தட்டா²னே அஹோஸி நின்னட்டா²னம் பன உத³கேன அஜ்ஜோ²த்த²தம். உமங்க³ம் கத்வாதி ஹேட்டா² ஸுது³க்³க³ம் கத்வா. அனமதக்³கி³யம் பச்சவேக்கி²த்வாதி ‘‘ந கோ² ஸோ ஸத்தாவாஸோ ஸுலப⁴ரூபோ, யோ இமினா தீ³கே⁴ன அத்³து⁴னா அனாவுட்ட²புப்³போ³’’திஆதி³னா (ம. நி. 1.160) இத³ஞ்ச தளாகம் மயா வுத்த²புப்³ப³ம் ப⁴விஸ்ஸதி, தம்பி டா²னம் ஸோ ச அத்தபா⁴வோ அபஞ்ஞத்திகபா⁴வம் க³தோதி ஏவம் அனமதக்³கி³யம் பச்சவேக்கி²த்வா தாதி³ஸம் டா²னம் க³ந்தும் வட்டதி. இமினா நயேன ஸமுத்³த³பப்³ப³தத³ஸ்ஸனாதீ³ஸுபி பச்சவேக்க²ணாவிதி⁴ வேதி³தப்³போ³.

உச்சம் நத³மானாயாதி உச்சம் கத்வா ஸத்³த³ம் கரோந்தியா காமஸ்ஸாத³ப⁴வஸ்ஸாதா³தி³வத்து²ந்தி ‘‘அயஞ்ச அயஞ்ச காமோ இட்டோ² கந்தோ மனாபோ, அஸுகோ ப⁴வோ இட்டோ² கந்தோ மனாபோ, ஏவமயம் லோகோ பியேஹி பியதரோ’’தி ஏவம் காமஸ்ஸாத³ப⁴வஸ்ஸாத³லோகஸ்ஸாதா³தி³ஸங்கா²தம் வத்து²ம். து³க்³க³திதோ ஸம்ஸாரதோ ச நிய்யாதி ஏதேனாதி நிய்யானம், ஸக்³க³மக்³கோ³ மோக்க²மக்³கோ³ ச, தம் நிய்யானம் அரஹதி, நிய்யானே வா நியுத்தாதி நிய்யானிகா, நிய்யானம் வா ப²லம் ஏதிஸ்ஸா அத்தீ²தி நிய்யானிகா, வசீது³ச்சரிதாதி³ஸம்கிலேஸதோ நிய்யாதீதி வா நிய்யானீயா, ஈ-காரஸ்ஸ ரஸ்ஸத்தம் ய-காரஸ்ஸ ச க-காரம் கத்வா நிய்யானிகா, சேதனாய ஸத்³தி⁴ம் ஸம்ப²ப்பலாபா வேரமணி. தப்படிபக்க²தோ அனிய்யானிகா, தஸ்ஸா பா⁴வோ அனிய்யானிகத்தம், தஸ்மா அனிய்யானிகத்தா. திரச்சா²னபூ⁴தாதி திரோகரணபூ⁴தா. கே³ஹஸ்ஸிதகதா²தி காமபடிஸம்யுத்தகதா². கம்மட்டா²னபா⁴வேதி அனிச்சதாபடிஸம்யுத்தசதுஸச்சகம்மட்டா²னபா⁴வே. ஸஹ அத்தே²னாதி ஸாத்த²கம், ஹிதபடிஸம்யுத்தந்தி அத்தோ². விஸிகா²தி க⁴ரஸன்னிவேஸோ, விஸிகா²க³ஹணேன ச தன்னிவாஸினோ க³ஹிதா ‘‘கா³மோ ஆக³தோ’’திஆதீ³ஸு (ஸாரத்த². டீ. 1.ஆசரியபரம்பரகதா²வண்ணனா) விய. தேனேவாஹ ‘‘ஸூரா ஸமத்தா²’’தி ‘‘ஸத்³தா⁴ பஸன்னா’’தி ச. கும்ப⁴ட்டா²னப்பதே³ஸேன கும்ப⁴தா³ஸியோ வுத்தாதி ஆஹ ‘‘கும்ப⁴தா³ஸிகதா² வா’’தி.

228. வோஹாரோ விய தேஸம் ததா² வோஹாரமத்தம் க³ஹேத்வா வுத்தம் ‘‘ப்³ரஹ்மசரியவாஸே’’தி. அகதாதி ஸமேன, விஸமேன வா கேனசி ஹேதுனா ந கதா ந விஹிதா. கதவிதோ⁴ கரணவிதி⁴ நத்தி² ஏதேஸந்தி அகடவிதா⁴. பத³த்³வயேனபி லோகே கேனசி ஹேதுபச்சயேன நேஸம் அனிப்³ப³த்ததம் த³ஸ்ஸேதி. இத்³தி⁴யாபி ந நிம்மிதாதி கஸ்ஸசி இத்³தி⁴மதோ சேதோவஸிப்பத்தஸ்ஸ தே³வஸ்ஸ, இஸ்ஸராதி³னோ வா இத்³தி⁴யாபி ந நிம்மிதா. அனிம்மாதாதி கஸ்ஸசி அனிம்மாபிதா. ரூபாதி³ஜனகபா⁴வந்தி ரூபஸத்³தா³தீ³னம் பச்சயபா⁴வம், ரூபாத³யோபி பத²வியாதீ³ஹி அப்படிப³த்³த⁴வுத்திகாதி தஸ்ஸ அதி⁴ப்பாயோ. யதா² பப்³ப³தகூடம் கேனசி அனிப்³ப³த்திதம் கஸ்ஸசி ச அனிப்³ப³த்தனகம், ஏவமேதேபீதி ஆஹ ‘‘பப்³ப³தகூடா விய டி²தாதி கூடட்டா²’’தி. யமித³ம் பீ³ஜதோ அங்குராதி³ ஜாயதீதி வுச்சதி, தம் விஜ்ஜமானமேவ ததோ நிக்க²மதி நாவிஜ்ஜமானம், அஞ்ஞதா² அஞ்ஞதோபி அஞ்ஞஸ்ஸ உபலத்³தி⁴ ஸியாதி அதி⁴ப்பாயோ. ஏவம் டி²தாதி ஏவம் நிப்³பி³காரா டி²தா. உப⁴யேனபீதி அத்த²த்³வயேனபீதி வத³ந்தி. ‘‘கூடட்டா² ஏஸிகட்டா²யிட்டி²தா’’தி பத³த்³வயேனபி. தேஸம் ஸத்தன்னம் காயானம். டி²தத்தாதி நிப்³பி³காராபா⁴வேன டி²தத்தா. ந சலந்தீதி விகாரம் நாபஜ்ஜந்தி. விகாராபா⁴வதோ ஹி தேஸம் ஸத்தன்னம் காயானம் ஏஸிகட்டா²யிட்டி²ததா. அனிஞ்ஜனஞ்ச அத்த²தோ பகதியா அவட்டா²னமேவாதி த³ஸ்ஸேதும் ‘‘ந விபரிணாமேந்தீ’’தி வுத்தம். ததா² அவிபரிணாமத⁴ம்மத்தா ஏவ தே அஞ்ஞமஞ்ஞம் ந ப்³யாபா³தே⁴ந்தி. ஸதி ஹி விகாரம் ஆபாதே³தப்³ப³தாய ப்³யாபா³த⁴கதாபி ஸியா, ததா² அனுக்³க³ஹேதப்³ப³தாய அனுக்³கா³ஹகதாதி தத³பா⁴வம் த³ஸ்ஸேதும் பாளியம் ‘‘நால’’ந்திஆதி³ வுத்தம்.

பத²வீ ஏவ காயேகதே³ஸத்தா பத²வீகாயோ. ஹந்தும் வா கா⁴தேதும் வா ஸமத்தோ² நாம நத்தி² ஜீவஸத்தமானம் காயானம் நிச்சதாய நிப்³பி³காரபா⁴வதோ, ஏதேனேவ நேஸமஹந்தப்³ப³தா அகா⁴தேதப்³ப³தா அத்த²தோ வுத்தாயேவாதி த³ட்ட²ப்³பா³. ததா² ஹி வுத்தம் ‘‘ஸத்தன்னம்த்வேவ காயான’’ந்திஆதி³. ஸோதும் வா ஸாவேதும் வா ஸமத்தோ² நாம நத்தீ²தி பச்சேகம் நேஸம் ஸவனேஸு அஸமத்த²த்தா ததே³கதே³ஸாதீ³ஸுபி அஸமத்த²தம் தீ³பேதி. யதி³ கோசி ஹந்தா நத்தி², கத²ம் ஸத்த²ப்பஹாரோதி ஆஹ ‘‘யதா² முக்³க³ராஸிஆதீ³ஸூ’’திஆதி³. கேவலம் ஸஞ்ஞாமத்தமேவ ஹோதி, ஹனனகா⁴தனாதி³ பன பரமத்த²தோ நத்தே²வ காயானம் அவிகோபனீயபா⁴வதோதி அதி⁴ப்பாயோ. கேவலம் தக்கமத்தேன நிரத்த²கம் தி³ட்டி²ம் தீ³பேதீதி ஏதேன யஸ்மா தக்கிகா நிரங்குஸதாய பரிகப்பனஸ்ஸ யம் கிஞ்சி அத்தனா பரிகப்பிதம் ஸாரதோ மஞ்ஞமானா ததே²வ அபி⁴னிவிஸ்ஸ தக்கதி³ட்டி²க்³கா³ஹம் க³ண்ஹந்தி, தஸ்மா ந தேஸம் தி³ட்டி²வத்து²ஸ்மிம் விஞ்ஞூஹி விசாரணா கத்தப்³பா³தி த³ஸ்ஸேதி. கேசீதி ஸாரஸமாஸாசரியா. பஞ்சிந்த்³ரியவஸேனாதி பஞ்சரூபிந்த்³ரியவஸேன. கம்மந்தி லத்³தி⁴ கம்மபா⁴வேன ஸுபாகடத்தா. அவங்ககதா²தாரணாதி³கா த்³வாஸட்டி² படிபதா³. ஏகஸ்மிம் கப்பேதி ஏகஸ்மிம் மஹாகப்பே.

புரிஸபூ⁴மியோதி பதா⁴னபுக்³க³லேன நித்³தே³ஸோ, இத்தீ²னம்பேதா பூ⁴மியோ இச்ச²ந்தேவ. பி⁴க்கு² ச பன்னகோதிஆதி³ தேஸம் பாளியேவ. தத்த² பன்னகோதி பி⁴க்கா²ய விசரணகோதி வத³ந்தி, தேஸம் வா படிபத்திம் படிபன்னகோ. ஜினோதி ஜிண்ணோ, ஜராவஸேன நிஹீனதா⁴துகோதி வத³ந்தி, அத்தனோ வா படிபத்தியா படிபக்க²ம் ஜினித்வா டி²தோ. ஸோ கிர ததா²பூ⁴தோ கஸ்ஸசிபி த⁴ம்மம் ந கதே²தி, தேனாஹ ‘‘ந கிஞ்சி ஆஹா’’தி. அலாபி⁴ந்தி ‘‘ஸோ ந கும்பி⁴முகா² படிக்³க³ண்ஹதீ’’திஆதி³னா (தீ³. நி. 1.394) நயேன வுத்தஅலாப⁴ஹேதுஸமாயோகே³ன அலாபி⁴ம். ததோ ஏவ ஜிக⁴ச்சா²து³ப்³ப³லபரேததாய ஸயனபராயணம் ஸமணம் பன்னபூ⁴மீதி வத³தி.

ஆஜீவவுத்திஸதானீதி ஸத்தானம் ஆஜீவபூ⁴தானி ஜீவிகாவுத்திஸதானி. பஸுக்³க³ஹணேன ஏளகஜாதி க³ஹிதா, மிக³க்³க³ஹணேன ருருக³வயாதி³ஸப்³ப³மிக³ஜாதி. ப³ஹூ தே³வாதி சாதுமஹாராஜிகாதி³ப்³ரஹ்மகாயிகாதி³வஸேன நேஸம் அந்தரபே⁴த³வஸேன ப³ஹூ தே³வா. தத்த² சாதுமஹாராஜிகானம் ஏகச்சோ அந்தரபே⁴தோ³ ‘‘மஹாஸமயஸுத்தேன’’ (தீ³. நி. 2.331 ஆத³யோ) தீ³பேதப்³போ³. மானுஸாபி அனந்தாதி தீ³பதே³ஸகுலவம்ஸாஜீவாதி³விபா⁴க³வஸேன மானுஸாபி அனந்தபே⁴தா³. பிஸாசா ஏவ பேஸாசா, தே அபரபேதாத³யோ மஹந்தா வேதி³தப்³பா³.

ச²த்³த³ந்தத³ஹமந்தா³கினியோ குளீரமுசலிந்த³நாமேன வத³தி. க³ண்டி²காதி பப்³ப³க³ண்டி²கா. பண்டி³தோபி…பே… உத்³த⁴ம் ந க³ச்ச²தி, கஸ்மா? ஸத்தானம் ஸம்ஸரணகாலஸ்ஸ நியதபா⁴வதோ.

அபரிபக்கம் ஸம்ஸரணனிமித்தம் ஸீலாதி³னா பரிபாசேதி நாம ஸீக⁴ம்யேவ விஸுத்³தி⁴ப்பத்தியா. பரிபக்கம் பு²ஸ்ஸ பு²ஸ்ஸ பத்வா பத்வா பரிபக்கபா⁴வாபாத³னேன ப்³யந்திம் கரோதி நாம. ஸுத்தகு³ளேதி ஸுத்தவட்டியம். நிப்³பே³டி²யமானமேவ பலேதீதி உபமாய ஸத்தானம் ஸம்ஸாரோ அனுக்கமேன கீ²யதேவ, ந தஸ்ஸ வத்³தீ⁴தி த³ஸ்ஸேதி பரிச்சி²ன்னரூபத்தா.

229. நியதிவாதே³ பக்கி²பந்தோதி ஸப்³ப³ஞ்ஞுதம் படிஜானித்வாபி பதே³ஸஞ்ஞுதாய அஸம்பாயமானோ தத்த² அத்தனோ அஞ்ஞாணகிரியம் பரிஹரிதும் அஸக்கோந்தோ ச ‘‘ஏவமேஸா நியதீ’’தி நியதிவாதே³ பக்கி²பந்தோ.

230. த⁴ம்மகதா²ய அபஸ்ஸயபூ⁴தோ அனுஸ்ஸவோ ஏதஸ்ஸ அத்தீ²தி அனுஸ்ஸவீ, தேனேவஸ்ஸ அபஸ்ஸயவாத³ம் த³ஸ்ஸேதும் ‘‘அனுஸ்ஸவனிஸ்ஸிதோ’’தி ஆஹ. ஸவனம் ஸச்சதோதி யம் கிஞ்சி அனுஸ்ஸவம், தம் ஸவனம் ஸச்சந்தி க³ஹேத்வா டி²தோ. பிடகஸம்பதா³யாதி க³ந்த²ஸம்பாத³னேன, தாதி³ஸம் க³ந்த²ம் பகு³ணம் வாசுக்³க³தம் கத்வா தம் நிஸ்ஸாய த⁴ம்மம் கதே²தி. தேனாஹ ‘‘வக்³க³பண்ணாஸகாயா’’திஆதி³.

232. மந்த³பஞ்ஞோதி பரித்தபஞ்ஞோ. மோமூஹோதி ஸம்முய்ஹகோ. ‘‘ஏவந்திபி மே நோ’’திஆதி³னா விவிதோ⁴ நானப்பகாரோ கே²போ வாசாய பரவாதா³னம் கீ²பனம் வாசாவிக்கே²போ, தம் வாசாவிக்கே²பம், ந மரதி ந பச்சி²ஜ்ஜதி யதா²வுத்தோ வாத³விக்கே²போ ஏதாயாதி அமரா, தத்த² பவத்தா தி³ட்டி² அமராவிக்கே²போ, தம் அமராவிக்கே²பம். அபரியந்தவிக்கே²பந்தி ‘‘ஏவம்பி மே நோ’’திஆதி³னா புச்சி²தஸ்ஸ அபரியோஸாபனவஸேன விக்கே²பம். இதோ சிதோ ச ஸந்தா⁴வதி ஏகஸ்மிம் ஸபா⁴வே அனவட்டா²னதோ. கா³ஹம் ந உபக³ச்ச²தீதி மிச்சா²கா³ஹதாய உத்தரவிதா⁴னாய புரிமபக்க²ம் ட²பேத்வா கா³ஹம் ந உபக³ச்ச²தி. அமராஸதி³ஸாய அமராய விக்கே²போதி அமராவிக்கே²போ.

இத³ம் குஸலந்தி ஏத்த² இதி-ஸத்³தோ³ பகாரத்தோ², இமினா பகாரேனாதி அத்தோ². அமராவிக்கே²பிகோ யதா² குஸலே, ஏவம் அஞ்ஞஸ்மிம் யம் கிஞ்சி கேனசி புச்சி²தம் அத்த²ம் அத்தனோ அருச்சனதாய ‘‘ஏவந்திபி மே நோ’’திஆதி³னா தத்த² தத்த² விக்கே²பஞ்ஞேவ ஆபஜ்ஜதி, தஸ்மா ‘‘ஏவந்திபி மே நோ’’திஆதி³ தத்த² தத்த² புச்சி²தாகாரபடிஸேத⁴னவஸேன விக்கி²பனாகாரத³ஸ்ஸனம். நனு சேத்த² விக்கே²பவாதி³னோ விக்கே²பபக்க²ஸ்ஸ அனனுஜானனம் விக்கே²பபக்கே² அவட்டா²னம் யுத்தந்தி? ந, தத்தா²பி தஸ்ஸ ஸம்மூள்ஹஸ்ஸ படிக்கே²பவஸேனேவ விக்கே²பவாத³ஸ்ஸ பவத்தனதோ. தேன வுத்தம் ‘‘நோ’’தி. ததா² ஹி ஸஞ்சயோ பே³லட்ட²புத்தோ ரஞ்ஞா அஜாதஸத்துனா ஸந்தி³ட்டி²கம் ஸாமஞ்ஞப²லம் புட்டோ² பரலோகத்திகாதீ³னம் படிஸேத⁴னமுகே²ன விக்கே²பம் ப்³யாகாஸி.

ஏத்தா²ஹ – ‘‘நனு சாயம் ஸப்³போ³பி அமராவிக்கே²பிகோ குஸலாத³யோ த⁴ம்மே பரலோகத்திகாதீ³னி ச யதா²பூ⁴தம் அனவபு³ஜ்ஜ²மானோ தத்த² தத்த² பஞ்ஹம் புட்டோ² ஸமானோ புச்சா²ய விக்கே²பமத்தம் ஆபஜ்ஜதி, தஸ்ஸ கத²ம் தி³ட்டி²க³தபா⁴வோ. ந ஹி அவத்துகாமஸ்ஸ விய புச்சி²தமத்த²ம் அஜானந்தஸ்ஸ விக்கே²பகரணமத்தேன தஸ்ஸ தி³ட்டி²க³திகதா யுத்தா’’தி? வுச்சதே – ந ஹேவ கோ² புச்சா²ய விக்கே²பகரணமத்தேன தஸ்ஸ தி³ட்டி²க³திகதா, அத² கோ² மிச்சா²பி⁴னிவேஸவஸேன. ஸஸ்ஸதாபி⁴னிவேஸேன மிச்சா²பி⁴னிவிட்டோ²யேவ ஹி புக்³க³லோ மந்த³பு³த்³தி⁴தாய குஸலாதி³த⁴ம்மே பரலோகத்திகாதீ³னி ச யாதா²வதோ அப்படிபஜ்ஜமானோ அத்தனா அவிஞ்ஞாதஸ்ஸ அத்த²ஸ்ஸ பரம் விஞ்ஞாபேதும் அஸக்குணேய்யதாய முஸாவாத³ப⁴யேன ச விக்கே²பம் ஆபஜ்ஜதீதி. அத² வா புஞ்ஞபாபானம் தப்³பி³பாகானஞ்ச அனவபோ³தே⁴ன அஸத்³த³ஹனேன ச தப்³பி³ஸயாய புச்சா²ய விக்கே²பகரணம்யேவ ஸுந்த³ரந்தி க²ந்திம் ருசிம் உப்பாதே³த்வா அபி⁴னிவிஸந்தஸ்ஸ உப்பன்னா விஸும்யேவ ஸா ஏகா தி³ட்டி² ஸத்தப⁴ங்க³தி³ட்டி² வியாதி த³ட்ட²ப்³பா³, இந்த்³ரியப³த்³த⁴தோ ச ததியட்டா²னபா⁴வே த³ஸ்ஸிதோ.

234. ஸன்னிதி⁴காரகம் காமேதி ஏத்த² அனிந்த்³ரியப³த்³தா⁴னி அதி⁴ப்பேதானீதி திலதண்டு³லாதி³க்³க³ஹணம், தஸ்ஸ லோகஸ்ஸ அப்பஸாத³பரிஹாரத்த²ம் கதா³சி தண்டு³லனாளிஆதி³ஸங்க³ஹணகரணம் ஸந்தா⁴ய வுத்தம் ‘‘திலதண்டு³லாத³யோ பஞ்ஞாயந்தீ’’தி.

236. ஆஜீவகா மதா நாமாதி இமே ஆஜீவகா ஸப்³ப³ஸோ ஸம்மாபடிபத்திரஹிதா மிச்சா² ஏவ ச படிபஜ்ஜமானா அதி⁴ஸீலஸங்கா²தஸ்ஸ ஸீலஜீவிதஸ்ஸ அபா⁴வேன மதா நாம. புத்தமதாதி மதபுத்தா. ஸமணே கோ³தமே ப்³ரஹ்மசரியவாஸோ அத்தீ²தி ஸமணம் ஏவ கோ³தமம் பரிஸுத்³தோ⁴ ஸுபரிபுண்ணோ தக்கரஸ்ஸ ஸம்மா து³க்க²க்க²யாவஹோ ப்³ரஹ்மசரியவாஸோ அத்தி². ஏதேனேத்த² த⁴ம்மஸுத⁴ம்மதாதி³தீ³பனேன பு³த்³த⁴ஸுபு³த்³த⁴தஞ்ச தீ³பேதி, அஞ்ஞத்த² நத்தீ²தி இமினா பா³ஹிரகேஸு தஸ்ஸ அபா⁴வம். ஸேஸம் ஸுவிஞ்ஞேய்யமேவ.

ஸந்த³கஸுத்தவண்ணனாய லீனத்த²ப்பகாஸனா ஸமத்தா.