5. மாக³ண்டி³யஸுத்தவண்ணனா

207. த்³வே மாக³ண்டி³யாதி த்³வே மாக³ண்டி³யனாமகா. தே³வக³ப்³ப⁴ஸதி³ஸந்தி தே³வானம் வஸனஓவரகஸதி³ஸம். ஏதம் வுத்தந்தி ‘‘பா⁴ரத்³வாஜகோ³த்தஸ்ஸ ப்³ராஹ்மணஸ்ஸ அக்³யாகா³ரே திணஸந்தா²ரகே’’தி ஏதம் வுத்தம். ந கேவலம் தம் தி³வஸமேவாதி யம் தி³வஸம் மாக³ண்டி³யோ பரிப்³பா³ஜகோ திணஸந்தா²ரகம் பஞ்ஞத்தம், ந கேவலம் தம் தி³வஸமேவ ப⁴க³வா யேனஞ்ஞதரோ வனஸண்டோ³, தேனுபஸங்கமீதி யோஜனா. கா³மூபசாரேதி கா³மஸமீபே. ஸஞ்ஞாணம் கத்வாதி ஸஞ்ஞாணம் கத்வா விய. ந ஹி ப⁴க³வதோ தஸ்ஸ ஸஞ்ஞாணகரணே பயோஜனம் அத்தி².

ஸமணஸேய்யானுரூபந்தி ஸமணஸ்ஸ அனுச்ச²விகா ஸேய்யா. பாஸம்ஸத்தோ² ஹி அயம் ரூப-ஸத்³தோ³. தேனாஹ ‘‘இமம் திணஸந்தா²ரக’’ந்திஆதி³. அனாகிண்ணோதி விலுளிதோ அக⁴ட்டிதோ. ஹத்த²பாத³ஸீஸேஹி தத்த² தத்த² பஹடேன ந சலிதோ அபி⁴ன்னோ, அசலிதத்தா ஏவ அபி⁴ன்னம் அத்த²ரணம். பரிச்சி²ந்தி³த்வா பஞ்ஞத்தோ வியாதி அயம் சே²கேன சித்தகாரேன சிந்தேத்வா துலிகாய பரிச்சி²ன்னலேகா²ய பரிச்சி²ந்தி³த்வா லிகி²தா சித்தகதஸேய்யா விய. பூ⁴னம் வுச்சதி வட்³டி⁴தம், தம் ஹந்தீதி பூ⁴னஹுனோ. தேனாஹ ‘‘ஹதவட்³டி⁴னோ’’தி. தம் பனாயம் சக்கா²தீ³ஸு ஸம்வரவிதா⁴னம் வட்³டி⁴ஹனனம் மஞ்ஞதி. தேனாஹ ‘‘மரியாத³காரகஸ்ஸா’’தி. ப்³ரூஹேதப்³ப³ந்தி உளாரவிஸயூபஹாரேன வட்³டே⁴தப்³ப³ம் பீணேதப்³ப³ம். தம் பன அனனுபூ⁴தானுப⁴வனேன ஹோதீதி ஆஹ ‘‘அதி³ட்ட²ம் த³க்கி²தப்³ப³’’ந்தி. அனுபூ⁴தம் பன அபணீதம் ஹோதீதி வுத்தம் ‘‘தி³ட்ட²ம் ஸமதிக்கமிதப்³ப³’’ந்தி. ஸேஸவாரேஸுபி ஏஸேவ நயோ. பரமதி³ட்ட²த⁴ம்மனிப்³பா³னவாதீ³ கிரேஸ பரிப்³பா³ஜகோ, தஸ்மா ஏவம் ச²ஸு த்³வாரேஸு வட்³டி⁴ம் பஞ்ஞபேதி. யஸ்மா யம் ச²ன்னம்பி சக்கா²தீ³னம் யதா²ஸகம் விஸயக்³க³ஹணம் படிக்கி²பந்தோ லோகஸ்ஸ அவட்³டி⁴தம் வினாஸமேவ பஞ்ஞபேதி, தஸ்மா ஸோ ஸயம்பி வட்³டி⁴ஹதோ ஹதவட்³டி⁴தோ.

ஸம்கிலேஸதோ ஆரகத்தா அரியோ நிய்யானிகத⁴ம்மபா⁴வதோ ஞாயோ த⁴ம்மோ. வஜ்ஜலேஸஸ்ஸபி அபா⁴வதோ குஸலோ. தேனாஹ ‘‘பரிஸுத்³தே⁴ காரணத⁴ம்மே அனவஜ்ஜே’’தி. உக்³க³தஸ்ஸாதி உச்சகுலீனதாதி³னா உளாரஸ்ஸ. முகே² ஆரக்க²ம் ட²பேத்வாதி முகே²ன ஸம்யதோ ஹுத்வா. அம்ப³ஜம்பூ³ஆதீ³னி க³ஹேத்வா விய அபூரயமானோதி அம்ப³ஜம்பூ³ஆதீ³னி அஞ்ஞமஞ்ஞவிஸதி³ஸானி விய பூரணகதா²னயேன யம் கிஞ்சி அகதே²த்வா. தேனாஹ ‘‘மயா கதி²தனியாமேனா’’தி.

208. ப²லஸமாபத்தியா வுட்டி²தோதி தி³வாவிஹாரதோ வுட்டி²தோதி அத்தோ². தி³வாவிஹாரோபி ஹி ‘‘படிஸல்லான’’ந்தி வுச்சதி ‘‘ரஹோக³தஸ்ஸ படிஸல்லீனஸ்ஸ ஏவம் சேதஸோ பரிவிதக்கோ உத³பாதீ³’’திஆதீ³ஸு (பாரா. 18). ப⁴க³வா ஹி ப²லஸமாபத்திதோ வுட்டா²னுத்தரகாலம் தேஸம் கதா²ஸல்லாபம் ஸுத்வா தி³வாவிஹாரதோ வுட்டா²ய தத்த² க³தோ. ஸம்வேகோ³ நாம ஸஹோத்தப்பஞாணம், தம் நிப்³பி³ந்த³னவஸேனபி ஹோதி, ஸம்வேக³னிஸ்ஸிதம் ஸந்தா⁴யாஹ ‘‘பீதிஸம்வேகே³ன ஸம்விக்³கோ³’’தி. ஸோ பன யஸ்மா புரிமாவத்தா²ய சலனம் ஹோதி சித்தஸ்ஸ, தஸ்மா ஆஹ ‘‘சலிதோ கம்பிதோ’’தி. திகி²ணஸோதேன புரிஸேனாதி ப⁴க³வந்தம் ஸந்தா⁴யாஹ.

209. த⁴ம்மதே³ஸனம் ஆரபி⁴ யதா² வினேய்யத³மனகுஸலோ வஸனட்டா²னட்டே²னாதி இத³ம் ஆரமிதப்³ப³பா⁴வஸ்ஸ பா⁴வலக்க²ணவசனம். ஆரமதி ஏத்தா²தி ஆராமோ, ரூபம் ஆராமோ ஏதஸ்ஸாதி ரூபாராமம், ததோ ஏவ தன்னின்னபா⁴வேன ரூபே ரதந்தி ரூபரதம், தேன ஸம்மோ து³ப்பத்தியா ரூபேன ஸம்முதி³தந்தி ரூபஸம்முதி³தம், ததே³தம் தத³பி⁴ஹதஜவனகிச்சம் தத்த² ஆரோபேத்வா வுத்தம். த³ந்தந்திஆதீ³ஸுபி ஏஸேவ நயோ. த³ந்தம் த³மிதம். நிப்³பி³ஸேவனந்தி விக³தவிஸுகாயிகம். கு³த்தந்தி ஸதியா கு³த்தம். ரக்கி²தந்தி தஸ்ஸேவ வேவசனம். ஸம்வுதந்தி அபனீதம் பவேஸனிவாரணேன. தேனாஹ ‘‘பிஹித’’ந்தி.

210. உப்பஜ்ஜனபரிளாஹந்தி உப்பஜ்ஜனகிலேஸபரிளாஹம். கிம் வசனம் வத்தப்³ப³ம் அஸ்ஸாதி ரூபாரம்மணம் அனுப⁴வித்வா ஸமுத³யாதி³பஹானம் பரிக்³க³ண்ஹித்வா பரினிப்³பி³ந்தி³த்வா விரஜ்ஜித்வா யோ விமுத்தோ, தத்த² கிம் வுத்³தி⁴ஹதபரியாயோ அவஸ்ஸம் லப⁴தி ந லப⁴தீதி புச்ச²தி. பரிப்³பா³ஜகோ தாதி³ஸே ஸாரப³த்³த⁴விமுத்திகே வுத்³தி⁴ஹதோதி ந வதே³ய்யாதி ஆஹ ‘‘ந கிஞ்சி, போ⁴, கோ³தமா’’தி.

211. தேதி தயா, அயமேவ வா பாடோ². வஸ்ஸம் வாஸோ வஸ்ஸம் உத்தரபத³லோபேன, வஸ்ஸிதும் அரஹதீதி வஸ்ஸிகோ, வஸ்ஸகாலே நிவாஸானுச்ச²விகோதி அத்தோ².

நாதிஉச்சோ ஹோதி நாதினீசோதி கி³ம்ஹிகோ விய உச்சோ, ஹேமந்திகோ விய நீசோ ந ஹோதி, அத² கோ² தது³ப⁴யவேமஜ்ஜ²லக்க²ணதாய நாதிஉச்சோ ஹோதி நாதினீசோ. நாதிதனூனீதி ஹேமந்திகஸ்ஸ விய ந கு²த்³த³கானி. நாதிப³ஹூனீதி கி³ம்ஹிகஸ்ஸ விய ந அதிப³ஹூனி. மிஸ்ஸகானேவாதி ஹேமந்திககி³ம்ஹிகேஸு வுத்தலக்க²ணவோமிஸ்ஸகானி. உண்ஹபவேஸனத்தா²யாதி நியூஹேஸு புரேப⁴த்தம் பச்சா²ப⁴த்தஞ்ச பதிதஸூரியோபா⁴ஸவஸேன உண்ஹஸ்ஸ அப்³ப⁴ந்தரபவேஸனத்தா²ய. பி⁴த்தினியூஹானி நீஹரீயந்தீதி த³க்கி²ணபஸ்ஸே பி⁴த்தீஸு நியூஹானி நீஹரித்வா கரீயந்தி. விபுலஜாலானீதி புது²லசி²த்³தா³னி. உத³கயந்தானீதி உத³கவாஹகயந்தானி.

நீலுப்பலக³ச்ச²கே கத்வாதி விகஸிதேஹி நீலுப்பலேஹி க³ச்ச²கே நளினிகே கத்வா. க³ந்த⁴கலலந்தி க³ந்த⁴மிஸ்ஸககத்³த³மம். யமகபி⁴த்தீதி யுக³ளபி⁴த்தி, தஸ்ஸா அந்தரே நாளி, யதோ உத³கம் அபி⁴ருஹதி. லோஹனாளிந்தி லோஹமயயந்தனாளிம். ஜாலந்தி தம்ப³லோஹமயம் ஜாலம். ஹேட்டா² யந்தம் பரிவத்தேந்தீதி ஹேட்டா²பா⁴கே³ உத³கயந்தம் க³மேந்தி. உத³கபு²ஸிதே தேமேந்தே விவண்ணதா மாஹோஸீதி நீலபடம் நிவாஸேதி. தி³வாகாலேதி தி³வஸவேலாய. அஜ்ஜ²த்தம் வூபஸந்தசித்தோ விஹராமீதி ஏதேன அத்தனோ ப²லஸமாபத்திவிஹாரோ ப⁴க³வதா த³ஸ்ஸிதோதி ஆஹ – ‘‘தாய ரதியா ரமமானோதி இத³ம் சதுத்த²ஜ்ஜா²னிகப²லஸமாபத்திரதிம் ஸந்தா⁴ய வுத்த’’ந்தி.

212. மஹாச நேஸம் பபஞ்சோதி நேஸம் ராஜூனம் மஹாபபஞ்சோ ராஜித்³தி⁴வஸேன ஸப்³ப³தா³ ஸம்பத்திவிஸயோ ச, அனுப⁴விதும் ந லப⁴ந்தீதி அதி⁴ப்பாயோ. மந்தே க³வேஸந்தா விசரந்தி, ந போ⁴க³ஸுக²ம். க³ணனா நாம அச்சி²ன்னக³ணனா, ந விக³ணக³ணனா ந பணக³ணனா. ஆவட்டோதி யதா²தி⁴க³தே தி³ப்³பே³ காமே பஹாய காமஹேது ஆவட்டோ நிவத்தோ பரிவத்திதோ ப⁴வேய்ய. ஏவம் மானுஸகா காமாதி யதா² கோசி குஸக்³கே³ன உத³கம் க³ஹேத்வா மஹாஸமுத்³தே³ உத³கம் மினேய்ய. தத்த² மஹாஸமுத்³தே³ உத³கமேவ மஹந்தம் விபுலம் பணீதஞ்ச, ஏவம் தி³ப்³பா³னம் காமானம் ஸமீபே உபனிதா⁴ய மானுஸகா காமா அப்பமத்தகா ஓரமத்தகா நிஹீனா, தி³ப்³பா³வ காமா மஹந்தா விபுலா உளாரா பணீதா. ஸமதி⁴க³ய்ஹாதி ஸம்மா அதி⁴க³மனவஸேன நிக்³க³ய்ஹ தி³ப்³ப³ம்பி ஸுக²ம் ஹீனம் கத்வா திட்ட²தி.

213. ஆரோக்³யஹேதுகம் ஸுக²ம் அஸ்ஸ அத்தீ²தி ஸுகீ², தம் பனஸ்ஸ ரோக³விக³மதோவாதி ஆஹ ‘‘பட²மம் து³க்கி²தோ பச்சா² ஸுகி²தோ’’தி. ஸேரீ நாம அத்தாதீ⁴னவுத்தீதி ஆஹ ‘‘ஸேரீ ஏககோ ப⁴வேய்யா’’தி. அத்தனோ வஸோ ஸயம்வஸோ, ஸோ ஏதஸ்ஸ அத்தீ²தி ஸயம்வஸீ. அங்கா³ரகபல்லம் விய காமவத்து²பரிளாஹஹேதுதோ. தச்சே²த்வாதி க⁴ட்டேத்வா, கண்டூ³யித்வாதி அத்தோ².

214. யேன காயோ மது⁴ரகஜாதோ ஹோதி, தம் கிர குட்ட²ம் ச²விம் வினாஸேதி, சம்மம் சி²த்³த³ஜாதம் விய ஹோதி. தேனேவாஹ ‘‘உபஹதகாயப்பஸாதோ³’’தி. பச்சலத்தா²தி படிலபி⁴. அவிஜ்ஜாபி⁴பூ⁴ததாய விரோதி⁴பச்சயஸமாயோகே³ன பஞ்ஞிந்த்³ரியஸ்ஸ உபஹதத்தா. ஆயதிம் து³க்க²ப²லதாய ஏதரஹி ச கிலேஸது³க்க²ப³ஹுலதாய காமானம் து³க்க²ஸம்ப²ஸ்ஸதா, தது³ப⁴யஸம்யுத்தேஸு தேஸு ச தம் அஸல்லக்கி²த்வா ஏகந்தஸுகா²பி⁴னிவேஸோ விபரீதஸஞ்ஞாய, ந கேவலாய ஸுக²வேத³னாய ஸுகா²தி பவத்தஸஞ்ஞீ.

215. தானீதி குட்ட²ஸரீரே வணமுகா²னி. அஸுசீனீதி அஸுபா⁴னி. து³க்³க³ந்தா⁴னீதி விஸ்ஸக³ந்தா⁴னி. பூதீனீதி குணபபூ⁴தானி. இதா³னீதி ஏதரஹி. நகே²ஹி விப்பதச்ச²னஅக்³கி³பரிதாபனேஹி அதினிப்பீளனகாலே பாணகா…பே… பக்³க⁴ரந்தி, தேன வேத³னா தனுகா ஹோதி. ஏவந்தி வுத்தனயேன வேத³னாய தனுகபா⁴வதோ.

ஆரோக்³யபா⁴வே த⁴னலாபா⁴தி³லாபு⁴ப்பத்திதோ, அஸதி ச ஆரோக்³யே லாப⁴ஸ்ஸ நிரத்த²கபா⁴வதோ, தி³ட்ட²த⁴ம்மிகாதி³ஸப்³ப³ஸம்பத்தீனம் லாப⁴ஸ்ஸ நிமித்தபா⁴வதோ ச ஆரோக்³யபரமா லாபா⁴. நிப்³பா³னே ஸுகு²ப்பத்திதோ, அஸதி ச நிப்³பா³னாதி⁴க³மே தாதி³ஸஸ்ஸ ஸுக²ஸ்ஸ அனுபலப்³ப⁴னதோ, ஸப்³ப³ஸங்க²தவிவித்தத்தா ச ஸப்³ப³ஸோ ச ஸம்ஸாரது³க்கா²பா⁴வதோ, அதி⁴க³தே ச தஸ்மிம் ஸகலவட்டது³க்கா²பா⁴வதோ ச நிப்³பா³னம் பரமம் ஸுக²ம். புப்³ப³பா⁴க³மக்³கா³னந்தி காயானுபஸ்ஸனாதி³பே⁴த³பி⁴ன்னானம் அரியமக்³க³ஸ்ஸ புப்³ப³பா⁴கி³யானம் மக்³கா³னம். தேஸஞ்ச அமதகா³மிதா நாம தன்னின்னதாவஸேனேவ ஸச்சி²கிரியாவஸேனாதி ஆஹ ‘‘புப்³ப³பா⁴க³க³மனேனேவ அமதகா³மின’’ந்தி. அட்ட²ங்கி³கோ அரியமக்³கோ³ கே²மோ ஸப்³ப³பரிஸ்ஸயஸமுக்³கா⁴தனேன அனுபத்³து³தத்தா, தம்ஸமங்கீ³னம் ஸப்³ப³ஸோ அனுபத்³து³தத்தா தம்ஸமங்கீ³னம் ஸப்³ப³ஸோ அனுபத்³த³வஹேதுதோ ச. லத்³தி⁴வஸேன க³ஹிதாதி ஸஸ்ஸதவாதா³தீ³ஹி கேவலம் தேஸம் லத்³தி⁴வஸேன ததா² க³ஹிதா. கே²மஅமதகா³மினந்தி இமினா ஹி ‘‘கே²மம்அமதகா³மின’’ந்தி விப⁴த்திஅலோபேன நித்³தே³ஸோ, அத்தோ² பன விப⁴த்திலோபேன த³ட்ட²ப்³போ³தி த³ஸ்ஸேதி.

216. அனோமஜ்ஜதீதி அனு அனு ஓமஜ்ஜதி. அபராபரம் ஹத்த²ம் ஹேட்டா² ஓதாரேந்தோ மஜ்ஜதி.

217. சே²கந்தி க⁴னபா⁴வேன வீதம். க⁴னமட்ட²பா⁴வேன ஸுந்த³ரம் ஹோதீதி ஆஹ ‘‘ஸம்பன்ன’’ந்தி. ஸாதூ⁴ஹி பரமப்பிச்ச²ஸந்துட்டே²ஹி லாதோ க³ஹிதோதி ஸாஹுளி. ஸங்காரசோளகம் நிச்சகாளகம்.

218. தத்த² தத்த² ருஜனட்டே²ன விபா³த⁴னட்டே²ன ரோகோ³வ பூ⁴தோ. விபஸ்ஸனாஞாணேனபி ஸிகா²ப்பத்தேன ஆரோக்³யம் ஏகதே³ஸேன பஸ்ஸதி, நிப்³பா³னஞ்ச வட்டபடிபக்க²தோதி ஆஹ ‘‘விபஸ்ஸனாஞாணஞ்சேவா’’தி.

219. அந்தராதி பட²முப்பத்தி ஜராமரணானம் வேமஜ்ஜே². உபஹதோதி பித்தஸேம்ஹாதி³தோ³ஸேஹி தூ³ஸிதபா⁴வேன கதி²தோ. பித்தாதி³தோ³ஸே பன பே⁴ஸஜ்ஜஸேவனாய நிவத்தேந்தோ உபஹதம் படிபாகதிகம் கரோந்தோ சக்கூ²னி உப்பாதே³தி நாம. வினட்டா²னீதி அனுப்பத்தித⁴ம்மதம் ஆபன்னானி.

220. புப்³பே³ வுத்தே ஸாஹுளியசீரே. வட்டே அனுக³தசித்தேனாதி அனமதக்³கே³ ஸம்ஸாரவட்டே அனாதீ³னவத³ஸ்ஸிதாய அனுகா³மிசித்தேன.

221. த⁴ம்மஸ்ஸாதி நிப்³பா³னஸ்ஸ. அனுத⁴ம்மந்தி அனுரூபம் நிய்யானத⁴ம்மம். தேனாஹ ‘‘அனுச்ச²விகம் படிபத³’’ந்தி. பஞ்சக்க²ந்தே⁴தி பஞ்சுபாதா³னக்க²ந்தே⁴ த³ஸ்ஸேதி. ‘‘தீ³க⁴ரத்தம் வத, போ⁴’’திஆதி³னா பாளியம் விவட்டம் த³ஸ்ஸிதம். தேனாஹ ‘‘உபாதா³னனிரோதா⁴தி விவட்டம் த³ஸ்ஸேந்தோ’’தி. ஸேஸம் ஸுவிஞ்ஞேய்யமேவ.

மாக³ண்டி³யஸுத்தவண்ணனாய லீனத்த²ப்பகாஸனா ஸமத்தா.