10. வேக²னஸஸுத்தவண்ணனா

280. ஸஹ வத்து²காமேன கிலேஸகாமோ க³ரு க³ருகாதப்³போ³ ஏதஸ்ஸாதி காமக³ரு. தேஸ்வேவ காமேஸு நின்னபோணபப்³பா⁴ரஜ்ஜா²ஸயோதி காமாதி⁴முத்தோ. பப்³ப³ஜ்ஜாபட²மஜ்ஜா²னாதி³கம் நேக்க²ம்மம் க³ரு க³ருகாதப்³ப³ம் ஏதஸ்ஸாதி நேக்க²ம்மக³ரு. தத்த² நின்னபோணபப்³பா⁴ரஜ்ஜா²ஸயோ நேக்க²ம்மாதி⁴முத்தோ ஸ்வாயமத்தோ² யதா² ஏகச்சே க³ஹட்டே² லப்³ப⁴தி, ஏவம் ஏகச்சே அனகா³ரேபீதி ஆஹ ‘‘பப்³ப³ஜிதோபீ’’திஆதி³. அயம் பன வேக²னஸோ பரிப்³பா³ஜகோ. ஸோ ஹி வேக²னஸதாபஸபப்³ப³ஜ்ஜம் உபக³ந்த்வா வேக²னஸேன இமினா தி³ட்டி²மாதா³ய ஸமாதி³யித்வா டி²தத்தா ‘‘வேக²னஸோ’’தி வுச்சதி. யதா² லோகோ ஸயம் ஏகாத³ஸஹி அக்³கீ³ஹி ஆதி³த்தோபி ஸமானோ பச்சக்க²தோ அனுப⁴வியமானம் ஸாலாகிகம் அக்³கி³ஸந்தாபம் விய அனாதி³காலானுக³தஸம்மாகவசரஸந்தாபம் ஆதி³த்ததாய ந ஸல்லக்கே²தி, ஸம்மாஸம்பு³த்³தே⁴ன பன மஹாகருணாஸமுஸ்ஸாஹிதமானஸேன ‘‘ஸப்³ப³ம், பி⁴க்க²வே, ஆதி³த்த’’ந்தி ஆதி³த்தபரியாயே (ஸம். நி. 4.28; மஹாவ. 54) தே³ஸியமானே ஸல்லக்கே²தி, ஏவம் அயம்பி அனாதி³காலபரிபா⁴விதம் அத்தஅஜ்ஜா²ஸயே அவட்டி²தம் காமாதி⁴முத்தம் ஸரஸேன அனுபதா⁴ரேந்தோ ஸத்தா²ரா – ‘‘பஞ்ச கோ² இமே, கச்சான, காமகு³ணா’’திஆதி³னா காமகு³ணேஸு காமஸுகே² பா⁴ஸியமானே ‘‘காமாதி⁴முத்தம் வத பப்³ப³ஜிதஸ்ஸ சித்த’’ந்தி உபதா⁴ரேஸ்ஸதீதி ஆஹ – ‘‘இமாய கதா²ய கதி²யமானாய அத்தனோ காமாதி⁴முத்ததம் ஸல்லக்கே²ஸ்ஸதீ’’தி. காமக்³க³ஸுக²ந்தி காமேதப்³ப³வத்தூ²ஹி அக்³க³பூ⁴தம் ஸுக²ம். ஸப்³பே³ ஹி தேபூ⁴மகத⁴ம்மா காமனீயட்டே²ன காமா, தே படிச்ச உப்பஜ்ஜனஸுக²தோ நிப்³பா³னஸுக²மேவ அக்³க³பூ⁴தம் ஸுக²ம். யதா²ஹ – ‘‘யாவதா, பி⁴க்க²வே, த⁴ம்மா ஸங்க²தா வா அஸங்க²தா வா, விராகோ³ தேஸம் அக்³க³மக்கா²யதீ’’தி (இதிவு. 90; அ. நி. 4.34) – ‘‘நிப்³பா³னம் பரமம் ஸுக²’’ந்தி (ம. நி. 2.215, 217; த⁴. ப. 203) ச. தேன வுத்தம் ‘‘நிப்³பா³னம் அதி⁴ப்பேத’’ந்தி.

281. புப்³பே³னிவாஸஞாணலாபி⁴னோ புப்³ப³ந்தம் ஆரப்³ப⁴ வுச்சமானகதா² அனுச்ச²விகா தத³த்த²ஸ்ஸ பச்சக்க²பா⁴வதோ, தத³பா⁴வதோ வேக²னஸஸ்ஸ அனனுச்ச²விகாதி ஆஹ ‘‘யஸ்மா…பே… நத்தீ²’’தி. அனாக³தகதா²ய…பே… நத்தீ²தி ஏத்தா²பி ஏஸேவ நயோ. ஆரக்க²த்தா²யாதி தே³வதாஹி மந்தபதே³ஹி ஸஹ டி²தா தத்த² ஆரக்க²த்தா²ய. அவிஜ்ஜாயாதி இத³ம் லக்க²ணவசனம், தம்மூலகத்தா வா ஸப்³ப³கிலேஸத⁴ம்மானம் அவிஜ்ஜாவ க³ஹிதா. ஜானனம் பஹீனகிலேஸபச்சவேக்க²ணஞாணேன. ஸேஸம் ஸுவிஞ்ஞேய்யமேவ.

வேக²னஸஸுத்தவண்ணனாய லீனத்த²ப்பகாஸனா ஸமத்தா.

நிட்டி²தா ச பரிப்³பா³ஜகவக்³க³வண்ணனா.