9. கோ³லியானிஸுத்தவண்ணனா

173. பத³ஸமாசாரோதி தம்தம்பச்சயபே⁴த³த³ஸ்ஸனாய விக³தத்தா பகாரேஹி த³லித்³த³ஸமாசாரோ ஸிதி²லஸமாசாரோதி அத்தோ². யஸ்மா பன தாதி³ஸோ ஸமாசாரோ தி²ரோ த³ள்ஹோ நாம ந ஹோதி, தஸ்மா வுத்தம் ‘‘து³ப்³ப³லஸமாசாரோ’’தி. ‘‘ஸாக²ஸமாசாரோ’’தி வா பாடோ², தத்த² தத்த² லக்³க³னட்டே²ன ஸாகா²ஸதி³ஸஸீலோதி அத்தோ². தேனாஹ ‘‘ஓளாரிகாசாரோ’’தி. பச்சயேஸு ஸாபேக்கோ²தி பச்சயேஸு ஸாபேக்க²தாய ஏவ ஹிஸ்ஸ ஓளாரிகாசாரதா வேதி³தப்³பா³. க³ருனா கிஸ்மிஞ்சி வுத்தே கா³ரவவஸேன பதிஸ்ஸவனம் பதிஸ்ஸோ, பதிஸ்ஸவசனபூ⁴தம் தம்ஸபா⁴க³ஞ்ச யம் கிஞ்சி கா³ரவந்தி அத்தோ². ஸஹ பதிஸ்ஸேனாதி ஸப்பதிஸ்ஸேன, ஸப்பதிஸ்ஸவேன ஓவாத³ஸம்படிச்ச²னேன. பதிஸ்ஸீயதீதி வா பதிஸ்ஸோ, க³ருகாதப்³போ³, தேன ஸஹ பதிஸ்ஸேனாதி ஸப்³ப³ம் புப்³பே³ விய. தேனாஹ ‘‘ஸஜேட்ட²கேனா’’தி. ஸேரிவிஹாரோ நாம அத்தப்பதா⁴னவாஸோ. தேனாஹ ‘‘நிரங்குஸவிஹாரேனா’’தி.

அனுபக²ஜ்ஜாதி அனுபகட்³டி⁴த்வா. க³ருட்டா²னியானம் அந்தரம் அனாபுச்சா² அனுபவிஸித்வாதி இமமத்த²ம் த³ஸ்ஸேதும் ‘‘தத்த² யோ’’திஆதி³ வுத்தம்.

ஆபி⁴ஸமாசாரிகந்தி அபி⁴ஸமாசாரே ப⁴வம். கிம் பன தந்தி ஆஹ ‘‘வத்தபடிபத்திமத்தம்பீ’’தி. நாதிகாலஸ்ஸேவ ஸங்க⁴ஸ்ஸ புரதோ பவிஸிதப்³ப³ம், ந பச்சா² படிக்கமிதப்³ப³ந்தி அதி⁴ப்பாயேன அதிகாலே ச கா³மப்பவேஸோ அதிதி³வா படிக்கமனஞ்ச நிவாரிதம், தம் த³ஸ்ஸேதும் ‘‘ந அதிபாதோ’’திஆதி³ வுத்தம். உத்³த⁴ச்சபகதிகோதி விப்³ப⁴ந்தசித்தோ. அவசாபல்யேனாதி த³ள்ஹவாதாபஹதபல்லவஸதி³ஸேன லோலபா⁴வேன.

பஞ்ஞவதாதி இமினா பி⁴க்கு²ஸாருப்பேஸு இதிகத்தப்³பே³ஸு உபாயபஞ்ஞா அதி⁴ப்பேதா, ந ஸுதமயபஞ்ஞா. அபி⁴த⁴ம்மே அபி⁴வினயே யோகோ³தி இமினா பா⁴வனாபஞ்ஞாஉத்தரிமனுஸ்ஸத⁴ம்மே யோகோ³ பகாஸிதோ. யோகோ³தி ச பரிசயோ உக்³க³ண்ஹவஸேன.

ஆருப்பாதி இமினா சதஸ்ஸோபி அரூபஸமாபத்தியோ க³ஹிதா, தா பன சதூஹி ரூபஸமாபத்தீஹி வினா ந ஸம்பஜ்ஜந்தீதி ஆஹ – ‘‘ஆருப்பாதி ஏத்தாவதா அட்ட²பி ஸமாபத்தியோ வுத்தா ஹோந்தீ’’தி. கஸிணேதி த³ஸவிதே⁴ கஸிணே. ஏகம் பரிகம்மகம்மட்டா²னந்தி யம் கிஞ்சி ஏகபா⁴வனா பரிகம்மதீ³பனம் க²ந்த⁴கம்மட்டா²னம். தேனாஹ ‘‘பகு³ணம் கத்வா’’தி. கஸிணபரிகம்மம் பன தக்³க³ஹணேனேவ க³ஹிதம் ஹோதி, லோகியா உத்தரிமனுஸ்ஸத⁴ம்மா ஹேட்டா² க³ஹிதாதி ஆஹ ‘‘உத்தரிமனுஸ்ஸத⁴ம்மேதி இமினா ஸப்³பே³பி லோகுத்தரத⁴ம்மே த³ஸ்ஸேதீ’’தி. நேய்யபுக்³க³லஸ்ஸ வஸேனாதி ஜானித்வா வித்தா²ரேத்வா ஞாதப்³ப³புக்³க³லஸ்ஸ வஸேனாதி.

கோ³லியானிஸுத்தவண்ணனாய லீனத்த²ப்பகாஸனா ஸமத்தா.