8. நளகபானஸுத்தவண்ணனா

166. யத்த² போ³தி⁴ஸத்தபமுகோ² வானரோ நளகேன பானீயம் பிவி, ஸா போக்க²ரணீ, தஸ்ஸாமந்தோ பூ⁴மிப்பதே³ஸோ, தத்த² நிவிட்ட²கா³மோ ச ‘‘நளகபான’’ந்தேவ பஞ்ஞாயித்த², இத⁴ பன கா³மோ அதி⁴ப்பேதோதி ஆஹ ‘‘நளகபானேதி ஏவம்னாமகே கா³மே’’தி. இதா³னி தமத்த²ம் ஆக³மனதோ பட்டா²ய த³ஸ்ஸேதும் ‘‘புப்³பே³ கிரா’’தி ஆரத்³த⁴ம். பஞ்ஞவாதி இதிகத்தப்³ப³தாய பஞ்ஞாய பஞ்ஞவா.

தூ²லதீ³க⁴ப³ஹுலபா⁴வேன மஹதீஹி தா³டி²காஹி ஸமன்னாக³தத்தா மஹாதா³டி²கோ. ‘‘உத³கரக்க²ஸோ அஹ’’ந்தி வத்வா வானரானம் கஞ்சி அமுஞ்சித்வா ‘‘ஸப்³பே³ தும்ஹே மம ஹத்த²க³தா’’தி த³ஸ்ஸேந்தோ ‘‘தும்ஹே பன ஸப்³பே³ கா²தி³ஸ்ஸாமீ’’தி ஆஹ. த⁴மி…பே… பிவிம்ஸூதி போ³தி⁴ஸத்தேன க³ஹிதனளோ அனவஸேஸோ அப்³ப⁴ந்தரே ஸப்³ப³ஸந்தீ⁴னம் நிப்³பா³தே⁴ன ஏகச்சி²த்³தோ³ அஹோஸி. நேவ மம் த்வம் வதி⁴ஸ்ஸஸீதி உத³கரக்க²ஸ த்வம் வதி⁴துகாமோபி மம புரிஸதா²மேன ந வதி⁴ஸ்ஸஸி.

ஏவம் பன வத்வா மஹாஸத்தோ ‘‘அயம் பாபோ ஏத்த² பானீயம் பிவந்தே அஞ்ஞேபி ஸத்தே மா பா³த⁴யித்தா²’’தி கருணாயமானோ ‘‘ஏத்த² ஜாயந்தா நளா ஸப்³பே³ அபப்³ப³ப³ந்தா⁴ ஏகச்சி²த்³தா³வ ஹோந்தூ’’தி அதி⁴ட்டா²ய க³தோ. தேனாஹ ‘‘ததோ பட்டா²யா’’திஆதி³.

167. அனுருத்³த⁴ப்பமுகா² பி⁴க்கூ² ப⁴க³வதா ‘‘கச்சி தும்ஹே அனுருத்³தா⁴’’தி புச்சி²தாதி தே²ரோ ‘‘தக்³க⁴ மயம், ப⁴ந்தே’’தி ஆஹ.

ஸசே பப்³ப³ஜதி, ஜீவிதம் லபி⁴ஸ்ஸதி, நோ அஞ்ஞதா²தி ரஞ்ஞா பப்³ப³ஜ்ஜாய அபி⁴னீதாதி ராஜாபி⁴னீதா. சோராபி⁴னீதாதி ஏத்தா²பி ஏஸேவ நயோ. சோரானம் மூலம் சி²ந்த³ந்தோ ‘‘கண்டகஸோத⁴னம் கரிஸ்ஸாமீ’’தி. ஆஜீவிகாயாதி ஆஜீவேன ஜீவிதவுத்தியா. இமேஸு பன அனுருத்³த⁴த்தே²ராதீ³ஸு.

விவேகந்தி புப்³ப³காலிககிரியப்பதா⁴னம் ‘‘அப்³யாபஜ்ஜம் உபேத’’ந்திஆதீ³ஸு வியாதி ஆஹ – ‘‘விவிச்சா’’தி, விவிச்சித்வா விவித்தோ ஹுத்வா வினா ஹுத்வாதி அத்தோ². பப்³ப³ஜிதகிச்சந்தி பப்³ப³ஜிதஸ்ஸ ஸாருப்பகிச்சம். ஸமணகிச்சந்தி ஸமணபா⁴வகரணகிச்சம். யத³க்³கே³ன ஹி பப்³ப³ஜிதகிச்சம் காதும் ந ஸக்கோதி தத³க்³கே³ன ஸமணபா⁴வகரம்பி கிச்சம் காதும் ந ஸக்கோதி. தேனாஹ ‘‘ஸோ யேவா’’திஆதி³.

168. அப்படிஸந்தி⁴கே தாவ ப்³யாகரோந்தோ பவத்தீஸு டா²னம் அதீதோதி கத்வா உபபத்தீஸு ப்³யாகரோதி நாம தத்த² படிஸந்தி⁴யா அபா⁴வகித்தனதோ. மஹந்ததுட்டி²னோதி விபுலபமோதா³.

169. இமஸ்ஸாதி ‘‘அஸ்ஸா’’தி பத³ஸ்ஸ அத்த²வசனம். இமஸ்ஸ டி²தஸ்ஸ ஆயஸ்மதோ ஸாமம் தி³ட்டோ² வா ஹோதி அனுஸ்ஸவஸுதோ வாதி யோஜனா. ஸமாதி⁴பக்கி²கா த⁴ம்மா த⁴ம்மாதி அதி⁴ப்பேதா, ஸமாதி⁴ பன ஏவம்விஹாரீதி ஏத்த² விஹாரஸத்³தே³ன க³ஹிதோ. ஏவம்விமுத்தாதி ஏத்த² பன விமுத்திஸத்³தே³ன ப²லவிமுத்தி க³ஹிதா. சரதோபீதி ஸமத²விபஸ்ஸனாசாரேன சரதோபி விஹரந்தஸ்ஸபி. உபாஸகஉபாஸிகாடா²னேஸு லப்³ப⁴மானம்பி அரஹத்தம் அப்பகபா⁴வதோ பாளியம் அனுத்³த⁴டந்தி த³ட்ட²ப்³ப³ம். ஸேஸம் ஸுவிஞ்ஞேய்யமேவ.

நளகபானஸுத்தவண்ணனாய லீனத்த²ப்பகாஸனா ஸமத்தா.