2. மஹாராஹுலோவாத³ஸுத்தவண்ணனா

113. இரியாபதா²னுப³ந்த⁴னேனாதி இரியாபத²க³மனானுப³ந்த⁴னேன, ந படிபத்திக³மனானுப³ந்த⁴னேன. அஞ்ஞமேவ ஹி பு³த்³தா⁴னம் படிபத்திக³மனம் அஞ்ஞம் ஸாவகானம். விலாஸிதக³மனேனாதி – ‘‘தூ³ரே பாத³ம் ந உத்³த⁴ரதி, ந அச்சாஸன்னே பாத³ம் நிக்கி²பதி, நாதிஸீக⁴ம் க³ச்ச²தி நாதிஸணிக’’ந்திஆதி³னா (ஸம். நி. அட்ட². 3.4.243; உதா³. அட்ட². 76; ஸாரத்த². டீ. மஹாவக்³க³ 3.285) வுத்தேன ஸபா⁴வஸீலேன பு³த்³தா⁴னம் சாதுரியக³மனேன. ததே³வ ஹி ஸந்தா⁴ய ‘‘பதே³ பத³ம் நிக்கி²பந்தோ’’தி வுத்தம். பதா³னுபதி³கோதி ராஹுலத்தே²ரஸ்ஸபி லக்க²ணபாரிபூரியா தாதி³ஸமேவ க³மனந்தி யத்தகம் பதே³ஸம் அந்தரம் அத³த்வா ப⁴க³வதோ பிட்டி²தோ க³ந்தும் ஆரத்³தோ⁴, ஸப்³ப³த்த² தமேவ க³மனபதா³னுபத³ம் க³ச்ச²தீதி பதா³னுபதி³கோ.

வண்ணனாபூ⁴மி சாயம் தத்த² ப⁴க³வந்தம் தே²ரஞ்ச அனேகரூபாஹி உபமாஹி வண்ணேந்தோ ‘‘தத்த² ப⁴க³வா’’திஆதி³மாஹ. நிக்க²ந்தக³ஜபோதகோ விய விரோசித்தா²தி பத³ம் ஆனேத்வா யோஜனா. ஏவம் தம் கேஸரஸீஹோ வியாதிஆதீ³ஸுபி ஆனேத்வா யோஜேதப்³ப³ம். தாரகராஜா நாம சந்தோ³. த்³வின்னம் சந்த³மண்ட³லானந்திஆதி³ பரிகப்பவசனம், பு³த்³தா⁴வேணிகஸந்தகம் விய பு³த்³தா⁴னம் ஆகப்பஸோபா⁴ அஹோஸி, அஹோ ஸிரீஸம்பத்தீதி யோஜனா.

ஆதி³யமானாதி க³ண்ஹந்தி. ‘‘பச்சா² ஜானிஸ்ஸாமா’’தி ந அஜ்ஜுபேக்கி²தப்³போ³. இத³ம் ந கத்தப்³ப³ந்தி வுத்தேதி இத³ம் பாணஅதிபாதனம் ந கத்தப்³ப³ந்தி வுத்தே இத³ம் த³ண்டே³ன வா லேட்³டு³னா வா விஹேட²னம் ந கத்தப்³ப³ம், இத³ம் பாணினா த³ண்ட³கதா³னஞ்ச அந்தமஸோ குஜ்ஜி²த்வா ஓலோகனமத்தம்பி ந கத்தப்³ப³மேவாதி நயஸதேனபி நயஸஹஸ்ஸேனபி படிவிஜ்ஜ²தி, ததா² இத⁴ தாவ ஸம்மஜ்ஜனம் கத்தப்³ப³ந்தி வுத்தேபி தத்த² பரிப⁴ண்ட³கரணம் விஹாரங்க³ணஸம்மஜ்ஜனம் கசவரச²ட்³ட³னம் வாலிகாஸமகிரணந்தி ஏவமாதி³னா நயஸதேன நயஸஹஸ்ஸேன படிவிஜ்ஜ²தி. தேனாஹ – ‘‘இத³ம் கத்தப்³ப³ந்தி வுத்தேபி ஏஸேவ நயோ’’தி. பரிபா⁴ஸந்தி தஜ்ஜனம். லபா⁴மீதி பச்சாஸீஸதி.

ஸப்³ப³மேதந்தி ஸப்³ப³ம் ஏதம் மயி லப்³ப⁴மானம் ஸிக்கா²காமதம். அபி⁴ஞ்ஞாயாதி ஜானித்வா. ஸஹாயோதி ரட்ட²பாலத்தே²ரம் ஸந்தா⁴யாஹ. ஸோ ஹி ப⁴க³வதா ஸத்³தா⁴பப்³ப³ஜிதபா⁴வே ஏதத³க்³கே³ ட²பிதோ. த⁴ம்மாரக்கோ²தி ஸத்து² ஸத்³த⁴ம்மரதனானுபாலகோ த⁴ம்மப⁴ண்டா³கா³ரிகோ. பேத்தியோதி சூளபிதா. ஸப்³ப³ம் மே ஜினஸாஸனந்தி ஸப்³ப³ம்பி பு³த்³த⁴ஸாஸனம் மய்ஹமேவ.

ச²ந்த³ராக³ம் ஞத்வாதி ச²ந்த³ராக³ம் மம சித்தே உப்பன்னம் ஞத்வா. அஞ்ஞதரஸ்மிம் ருக்க²மூலேதி விஹாரபரியந்தே அஞ்ஞதரஸ்மிம் ருக்க²மூலட்டா²னே அனுச்ச²விகே.

ததா³தி அக்³க³ஸாவகேஹி பஸாதா³பனகாலே. அஞ்ஞகம்மட்டா²னானி சங்கமனஇரியாபதே²பி பிட்டி²பஸாரணகாலேபி ஸமிஜ்ஜ²ந்தி, ந ஏவமித³ந்தி ஆஹ – ‘‘இத³மஸ்ஸ ஏதிஸ்ஸா நிஸஜ்ஜாய கம்மட்டா²னம் அனுச்ச²விக’’ந்தி. ஆனாபானஸ்ஸதிந்தி ஆனாபானஸ்ஸதிகம்மட்டா²னம்.

ஸமஸீஸீ ஹோதீதி ஸசே ஸமஸீஸீ ஹுத்வா ந பரினிப்³பா³யதி. பச்சேகபோ³தி⁴ம் ஸச்சி²கரோதி நோ சே பச்சேகபோ³தி⁴ம் ஸச்சி²கரோதி. கி²ப்பாபி⁴ஞ்ஞோதி கி²ப்பம் லஹும்யேவ பத்தப்³ப³ச²ளபி⁴ஞ்ஞோ.

பரிபுண்ணாதி ஸோளஸஸு ஆகாரேஸு கஸ்ஸசிபி அதாபனேன ஸப்³ப³ஸோ புண்ணா. ஸுபா⁴விதாதி ஸமத²பா⁴வனாய விபஸ்ஸனாபா⁴வனாய ச அனுபுப்³ப³ஸம்பாத³னேன ஸுபா⁴விதா. க³ணனாவிதா⁴னானுபுப்³பி³யா ஆஸேவிதத்தா அனுபுப்³ப³ம் பரிசிதா.

ஓமானம் வாதி அவஜானனம் உஞ்ஞாதந்தி ஏவம்வித⁴ம் மானம் வா. அதிமானம் வாதி ‘‘கிம் இமேஹி, மமேவ ஆனுபா⁴வேன ஜீவிஸ்ஸாமீ’’தி ஏவம் அதிமானம் வா குதோ ஜனேஸ்ஸதீதி.

114. விஸங்க²ரித்வாதி விஸம்யுத்தே கத்வா, யதா² ஸங்கா³காரேன க³ஹணம் ந க³ச்ச²தி, ஏவம் வினிபு⁴ஞ்ஜித்வாதி அத்தோ². மஹாபூ⁴தானி தாவ வித்தா²ரேது, ஸம்மஸனூபக³த்தா, அஸம்மஸனூபக³ம் ஆகாஸதா⁴தும் அத² கஸ்மா வித்தா²ரேஸீதி ஆஹ ‘‘உபாதா³ரூபத³ஸ்ஸனத்த²’’ந்தி. ஆபோதா⁴து ஸுகு²மரூபம். இதராஸு ஓளாரிகஸுகு²மதாபி லப்³ப⁴தீதி ஆஹ ‘‘உபாதா³ரூபத³ஸ்ஸனத்த²’’ந்தி. ஹேட்டா² சத்தாரி மஹாபூ⁴தானேவ கதி²தானி, ந உபாதா³ரூபந்தி தஸ்ஸ பனேத்த² லக்க²ணஹாரனயேன ஆகாஸத³ஸ்ஸனேன த³ஸ்ஸிததா வேதி³தப்³பா³. தேனாஹ ‘‘இமினா முகே²ன தம் த³ஸ்ஸேது’’ந்தி. ந கேவலம் உபாதா³ரூபக்³க³ஹணத³ஸ்ஸனத்த²மேவ ஆகாஸதா⁴து வித்தா²ரிதா, அத² கோ² பரிக்³க³ஹஸுக²தாயபீதி த³ஸ்ஸேந்தோ ‘‘அபிசா’’திஆதி³மாஹ. தத்த² பரிச்சி²ந்தி³தப்³ப³ஸ்ஸ ரூபஸ்ஸ நிரவஸேஸபரியாதா³னத்த²ம் ‘‘அஜ்ஜ²த்திகேனா’’தி விஸேஸனமாஹ. ஆகாஸேனாதி ஆகாஸதா⁴துயா க³ஹிதாய. பரிச்சி²ன்னரூபந்தி தாய பரிச்சி²ந்தி³தகலாபக³தம்பி பாகடம் ஹோதி விபூ⁴தம் ஹுத்வா உபட்டா²தி.

இதா³னி வுத்தமேவத்த²ம் ஸுக²க்³க³ஹணத்த²ம் கா³தா²ய த³ஸ்ஸேதி. தஸ்ஸாதி உபாதா³யரூபஸ்ஸ. ஏவம் ஆவிபா⁴வத்த²ந்தி ஏவம் பரிச்சி²ன்னதாய ஆகாஸஸ்ஸ வஸேன விபூ⁴தபா⁴வத்த²ம். தந்தி ஆகாஸதா⁴தும்.

118. ஆகாஸபா⁴வம் க³தந்தி சதூஹி மஹாபூ⁴தேஹி அஸம்பு²ட்டா²னம் தேஸம் பரிச்சே²த³கபா⁴வேன ஆகாஸந்தி க³ஹேதப்³ப³தம் க³தம், ஆகாஸமேவ வா ஆகாஸக³தம் யதா² ‘‘தி³ட்டி²க³தம் (த⁴. ஸ. 381; மஹானி. 12), அத்த²ங்க³த’’ந்தி (அ. நி. அட்ட². 1.1.130) ச. ஆதி³ன்னந்தி இமந்தி தண்ஹாதி³ட்டீ²ஹி ஆதி³ன்னம். தேனாஹ ‘‘க³ஹிதம் பராமட்ட²’’ந்தி. அஞ்ஞத்த² கம்மஜம் ‘‘உபாதி³ன்ன’’ந்தி வுச்சதி, ந ததா² இதா⁴தி ஆஹ ‘‘ஸரீரட்ட²கந்தி அத்தோ²’’தி. பத²வீதா⁴துஆதீ³ஸு வுத்தனயேனேவாதி மஹாஹத்தி²பதோ³பமே (ம. நி. 1.300 ஆத³யோ) வுத்தனயத³ஸ்ஸனம் ஸந்தா⁴ய வத³தி.

119. தாதி³பா⁴வோ நாம நிட்டி²தகிச்சஸ்ஸ ஹோதி, அயஞ்ச விபஸ்ஸனம் அனுயுஞ்ஜதி, அத² கிமத்த²ம் தாதி³பா⁴வதா வுத்தாதி? பத²வீஸமதாதி³லக்க²ணாசிக்க²ணாஹி விபஸ்ஸனாய ஸுக²ப்பவத்திஅத்த²ம். தேனாஹ ‘‘இட்டா²னிட்டே²ஸூ’’திஆதி³. க³ஹேத்வாதி குஸலப்பவத்தியா ஓகாஸதா³னவஸேன பரிக்³க³ஹேத்வா. ந பதிட்டி²தோதி ந நிஸ்ஸிதோ ந லக்³கோ³.

120. ப்³ரஹ்மவிஹாரபா⁴வனா அஸுப⁴பா⁴வனா ஆனாபானஸ்ஸதிபா⁴வனா ச உபசாரம் வா அப்பனம் வா பாபேந்தோ விபஸ்ஸனாய பாத³கபா⁴வாய அனிச்சாதி³ஸஞ்ஞாய விபஸ்ஸனாபா⁴வேன உஸ்ஸக்கித்வா மக்³க³படிபாடியா அரஹத்தாதி⁴க³மாய ஹோதீதி ‘‘மேத்தாதி³பா⁴வனாய பன ஹோதீ’’தி வுத்தம். யத்த² கத்த²சி ஸத்தேஸு ஸங்கா²ரேஸு ச படிஹஞ்ஞனகிலேஸோதி ஆகா⁴தபா⁴வமேவ வத³தி ஞாயபா⁴வதோ அஞ்ஞேஸம்பி. அஸ்மிமானோதி ரூபாதி³கே பச்சேகம் ஏகஜ்ஜ²ம் க³ஹேத்வா ‘‘அயமஹமஸ்மீ’’தி ஏவம் பவத்தமானோ.

121. இத³ம் கம்மட்டா²னந்தி ஏத்த² க³ணனாதி³வஸேன ஆஸேவியமானா அஸ்ஸாஸபஸ்ஸாஸா யோக³கம்மஸ்ஸ பதிட்டா²னதாய கம்மட்டா²னம். தத்த² பன ததா²பவத்தோ மனஸிகாரோ பா⁴வனா. ஏத்த² ச தஸ்ஸேவ தே²ரஸ்ஸ ப⁴க³வதா ப³ஹூனம் கம்மட்டா²னானம் தே³ஸிதத்தா சரிதம் அனாதி³யித்வா கம்மட்டா²னானி ஸப்³பே³ஸம் புக்³க³லானம் ஸப்பாயானீதி அயமத்தோ² ஸித்³தோ⁴, அதிஸப்பாயவஸேன பன கம்மட்டா²னேஸு விபா⁴க³கதா² கதி²தாதி வேதி³தப்³பா³.

மஹாராஹுலோவாத³ஸுத்தவண்ணனாய லீனத்த²ப்பகாஸனா ஸமத்தா.