3. சூளமாலுக்யஸுத்தவண்ணனா

122. ஏவம் ட²பிதானீதி ‘‘ஸஸ்ஸதோ லோகோ’’திஆதி³னயப்பவத்தானி தி³ட்டி²க³தானி அனிய்யானிகதாய ந ப்³யாகாதப்³பா³னி ந கதே²தப்³பா³னி, ஏவம் ட²பனீயபக்கே² ட²பிதானி சேவ நிய்யானிகஸாஸனே ச²ட்³ட³னீயதாய படிக்கி²த்தானி ச, அபிசேத்த² அத்த²தோ படிக்கே²போ ஏவ ப்³யாகாதப்³ப³தோ. யதா² ஏகோ கம்மகிலேஸவஸேன இத்த²த்தம் ஆக³தோ, ததா² அபரோபி அபரோபீதி ஸத்தோ ததா²க³தோ வுச்சதீதி ஆஹ – ‘‘ததா²க³தோதி ஸத்தோ’’தி. தம் அப்³யாகரணம் மய்ஹம் ந ருச்சதீதி யதி³ ஸஸ்ஸதோ லோகோ, ஸஸ்ஸதோ லோகோதி, அஸஸ்ஸதோ லோகோ, அஸஸ்ஸதோ லோகோதி ஜானாமாதி ப்³யாகாதப்³ப³மேவ, யம் பன உப⁴யதா² அப்³யாகரணம், தம் மே சித்தம் ந ஆராதே⁴தி அஜானனஹேதுகத்தா அப்³யாகரணஸ்ஸ. தேனாஹ – ‘‘அஜானதோ கோ² பன அபஸ்ஸதோ ஏததே³வ உஜுகம், யதி³த³ம் ந ஜானாமி ந பஸ்ஸாமீ’’தி. ஸஸ்ஸதோதிஆதீ³ஸு ஸஸ்ஸதோதி ஸப்³ப³காலிகோ, நிச்சோ து⁴வோ அவிபரிணாமத⁴ம்மோதி அத்தோ². ஸோ ஹி தி³ட்டி²க³திகேஹி லோகீயந்தி ஏத்த² புஞ்ஞபாபதப்³பி³பாகா, ஸயம் வா தப்³பி³பாகாகராதி³பா⁴வேன அவியுத்தேஹி லோகீயதீதி லோகோதி அதி⁴ப்பேதோ. ஏதேன சத்தாரோபி ஸஸ்ஸதவாதா³ த³ஸ்ஸிதா ஹோந்தி. அஸஸ்ஸதோதி ந ஸஸ்ஸதோ, அனிச்சோ அத்³து⁴வோ பே⁴த³னத⁴ம்மோதி அத்தோ², அஸஸ்ஸதோதி ச ஸஸ்ஸதபா⁴வபடிக்கே²பேன உச்சே²தோ³ தீ³பிதோதி ஸத்தபி உச்சே²த³வாதா³ த³ஸ்ஸிதா ஹோந்தி. அந்தவாதி பரிவடுமோ பரிச்சி²ன்னபரிமாணோ, அஸப்³ப³க³தோதி அத்தோ². தேன ‘‘ஸரீரபரிமாணோ, அங்கு³ட்ட²பரிமாணோ, யவபரிமாணோ பரமாணுபரிமாணோ அத்தா’’தி (உதா³. அட்ட². 54; தீ³. நி. டீ. 1.76-77) ஏவமாதி³வாதா³ த³ஸ்ஸிதா ஹோந்தி.

ததா²க³தோ பரம் மரணாதி ததா²க³தோ ஜீவோ அத்தா மரணதோ இமஸ்ஸ காயஸ்ஸ பே⁴த³தோ பரம் உத்³த⁴ம் ஹோதி அத்தி² ஸம்விஜ்ஜதீதி அத்தோ². ஏதேன ஸஸ்ஸதபா⁴வமுகே²ன ஸோளஸ ஸஞ்ஞீவாதா³, அட்ட² அஸஞ்ஞீவாதா³, அட்ட² ச நேவஸஞ்ஞீனாஸஞ்ஞீவாதா³ த³ஸ்ஸிதா ஹோந்தி. ந ஹோதீதி நத்தி² ந உபலப்³ப⁴தி. ஏதேன உச்சே²த³வாதோ³ த³ஸ்ஸிதோ ஹோதி. அபிச ஹோதி ச ந ச ஹோதீதி அத்தி² நத்தி² சாதி. ஏதேன ஏகச்சஸஸ்ஸதவாதோ³ த³ஸ்ஸிதோ. நேவ ஹோதி ந ந ஹோதீதி பன இமினா அமராவிக்கே²பவாதோ³ த³ஸ்ஸிதோதி வேதி³தப்³ப³ம். ப⁴க³வதா பன அனிய்யானிகத்தா அனத்த²ஸம்ஹிதானி இமானி த³ஸ்ஸனானீதி தானி ந ப்³யாகதானி, தம் அப்³யாகரணம் ஸந்தா⁴யாஹ அயம் தே²ரோ ‘‘தம் மே ந ருச்சதீ’’தி. ஸிக்க²ம் படிக்கி²பித்வா யதா²ஸமாதி³ன்னஸிக்க²ம் பஹாய.

125. த்வம் நேவ யாசகோதி அஹம் ப⁴ந்தே ப⁴க³வதி ப்³ரஹ்மசரியம் சரிஸ்ஸாமீதிஆதி³னா. ந யாசிதகோதி த்வம் மாலுக்யபுத்த மயி ப்³ரஹ்மசரியம் சராதிஆதி³னா.

126. பரஸேனாய டி²தேன புரிஸேன. ப³ஹலலேபனேனாதி ப³ஹலவிலேபனேன. மஹாஸுபியாதி³ ஸப்³போ³ முது³ஹித³கோ வேணுவிஸேஸோ ஸண்ஹோ. மருவாதி மகசி. கீ²ரபண்ணினோதி கீ²ரபண்ணியா, யஸ்ஸா சி²ந்த³னமத்தே பண்ணே கீ²ரம் பக்³க⁴ரதி. க³ச்ச²ந்தி க³ச்ச²தோ ஜாதம் ஸயம்ஜாதகு³ம்ப³தோ க³ஹிதந்தி அதி⁴ப்பாயோ. ஸிதி²லஹனு நாம த³த்தா கண்ணோ பதங்கோ³. ஏதாய தி³ட்டி²யா ஸதி ந ஹோதீதி ‘‘ஸஸ்ஸதோ லோகோ’’தி ஏதாய தி³ட்டி²யா ஸதி மக்³க³ப்³ரஹ்மசரியவாஸோ ந ஹோதி, தம் பஹாய ஏவ பத்தப்³ப³தோ.

127. அத்தே²வ ஜாதீதிஆதி³னா ஏதா தி³ட்டி²யோ பச்சேகம்பி ஸம்ஸாரபரிப்³ரூஹனா கடஸிவட்³ட⁴னா நிப்³பா³னவிப³ந்த⁴னாதி த³ஸ்ஸேதி.

128. தஸ்மாதிஹாதி இத³ம் அட்டா²னே உத்³த⁴டம், டா²னேயேவ பன ‘‘வுத்தபடிபக்க²னயேன வேதி³தப்³ப³’’ந்தி இமஸ்ஸ பரதோ கத்வா ஸம்வண்ணேதப்³ப³ம். அத்தனோ ப²லேன அரணீயதோ அனுக³ந்தப்³ப³தோ காரணம்பி ‘‘அத்தோ²’’தி வுச்சதீதி ஆஹ ‘‘காரணனிஸ்ஸித’’ந்தி. தேனாஹ ‘‘ப்³ரஹ்மசரியஸ்ஸ ஆதி³மத்தம்பீ’’தி. புப்³ப³பத³ட்டா²னந்தி பட²மாரம்போ⁴. ஸேஸம் ஸுவிஞ்ஞேய்யமேவ.

சூளமாலுக்யஸுத்தவண்ணனாய லீனத்த²ப்பகாஸனா ஸமத்தா.