10. சூளஅஸ்ஸபுரஸுத்தவண்ணனா

435. புரிமஸதி³ஸமேவாதி ‘‘அஸ்ஸபுரவாஸீனம் பி⁴க்கு²ஸங்கே⁴ கா³ரவப³ஹுமானம் நிபச்சகாரஞ்ச தி³ஸ்வா பி⁴க்கூ² பிண்ட³பாதாபசாயனே நியோஜேந்தோ இத³ம் ஸுத்தம் அபா⁴ஸீ’’தி புரிமஸுத்தே மஹாஅஸ்ஸபுரே (ம. நி. அட்ட². 2.415) வுத்தஸதி³ஸமேவ. ஸமணானம் அனுச்ச²விகாதி ஸமணானம் ஸமணபா⁴வஸ்ஸ அனுச்ச²விகா பதிரூபா. ஸமணானம் அனுலோமப்படிபதா³தி ஸமணானம் ஸாமஞ்ஞஸங்கா²தஸ்ஸ அரியமக்³க³ஸ்ஸ அனுகூலப்படிபதா³.

436. ஏதே த⁴ம்மாதி ஏதே பாளியம் ஆக³தா அபி⁴ஜ்ஜா²ப்³யாபாதா³த³யோ பாபத⁴ம்மா. உப்பஜ்ஜமானாதி உப்பஜ்ஜமானா ஏவ, பகே³வ ஸந்தானே பா⁴விதா. மலினேதி மலவந்தே கிலிட்டே². மலக்³க³ஹிதேதி க³ஹிதமலே ஸஞ்ஜாதமலே. ஸமணமலாதி ஸமணானம் ஸமணபா⁴வஸ்ஸ மலா. து³ஸ்ஸந்தீதி விபஜ்ஜந்தி வினஸ்ஸந்தி. ஸமணதோ³ஸாதி ஸமணானம் ஸமணபா⁴வதூ³ஸனா. கஸடேதி அஸாரே. நிரோஜேதி நித்தேஜே. அயதோ ஸுக²தோ அபேதாதி அபாயா, நிரயாத³யோ, தம் ப²லம் அரஹந்தி, தம் பயோஜனம் வா ஏதேஸந்தி ஆபாயிகா. டா²னானி அபி⁴ஜ்ஜா²த³யோ. தேனாஹ ‘‘அபாயே’’திஆதி³. காரணபா⁴வேன து³க்³க³திபரியாபன்னாய வேத³னாய ஹிதானீதி து³க்³க³திவேத³னியானி. தேன வுத்தம் ‘‘து³க்³க³தியம் விபாகவேத³னாய பச்சயான’’ந்தி. திகி²ணம் அயந்தி வேகந்தகஸதி³ஸம் ஸாரஅயம். அயேனாதி அயோக⁴ம்ஸகேன. கோஞ்சஸகுணானம் கிர குச்சி²யம் நிவுத்த²ம் யம் கிஞ்சி க²ரம் திகி²ணஞ்ச ஹோதி. ததா² ஹி தேஸம் வச்சம் அட்டி²ம்பி பாஸாணம்பி விலீயாபேதி. தேன வுத்தம் ‘‘கோஞ்சஸகுணே கா²தா³பேந்தீ’’தி. தம் கிர அயசுண்ணம் அக்³கி³னாபி கிச்சே²ன த³ய்ஹதி, பே⁴ஸஜ்ஜப³லேன பன ஸுகே²ன த³ய்ஹேய்ய. தேன வுத்தம் ‘‘ஸுஸிக்கி²தா ச நம் அயகாரா ப³ஹுஹத்த²கம்மமூலம் லபி⁴த்வா கரோந்தீ’’திஆதி³. அதிதிகி²ணம் ஹோதி, அஞ்ஞதரம் அயோப³ந்த⁴னம் பே²க்³கு³த³ண்ட³ம் விய ஸுகே²னேவ சி²ந்த³ந்தி. ஸஸபி³ளாரசம்மேஹி ஸங்க⁴டிதட்டே²ன ஸங்கா⁴டீதி வுச்சதி ஆவுத⁴பரிச்ச²தோ³தி ஆஹ ‘‘ஸங்கா⁴டியாதி கோஸியா’’தி. பரியோனத்³த⁴ந்தி பரிதோ ஓனத்³த⁴ம் சா²தி³தம். ஸமந்ததோ வேடி²தந்தி ஸப்³ப³ஸோ பிஹிதம்.

437. ரஜோதி ஆக³ந்துகரஜோ. ஜல்லந்தி ஸரீரே உட்டா²னகலோணாதி³மலம். ரஜோஜல்லஞ்ச வதஸமாதா³னவஸேன அனபனீதம் ஏதஸ்ஸ அத்தீ²தி ரஜோஜல்லிகோ, தஸ்ஸ. தேனாஹ ‘‘ரஜோஜல்லதா⁴ரினோ’’தி. உத³கம் ஓரோஹந்தஸ்ஸாதிஆதீ³னமத்தோ² மஹாஸீஹனாத³ஸுத்தவண்ணனாயம் வுத்தோயேவ. ஸப்³ப³மேதந்திஆதீ³ஸு ஸப்³ப³ஸோபி வதஸமாதா³னவஸேனாதி அதி⁴ப்பாயோ. யஸ்மா ஸப்³ப³மேதம் பா³ஹிரஸமயவஸேனேவ கதி²தம், தஸ்மா ஸங்கா⁴டிகஸ்ஸாதி பிலோதிகக²ண்டே³ஹி ஸங்க⁴டிதத்தா ‘‘ஸங்கா⁴டீ’’தி லத்³த⁴னாமவத்த²தா⁴ரினோதி அத்தோ². ததா² ஹி பாளியம் ‘‘ஸங்கா⁴டிகஸ்ஸ’’இச்சேவ வுத்தம், ந ‘‘பி⁴க்கு²னோ’’தி. தேனாஹ ‘‘இமஸ்மிம் ஹீ’’திஆதி³. கஸ்மா பனேத்த² ப⁴க³வதா ஸங்கா⁴டிகத்தாதீ³னியேவ வதஸமாதா³னானி படிக்கி²த்தானீதி? நயத³ஸ்ஸனமேதம் அஞ்ஞேஸம்பி பஞ்சாதபமூக³வதாதீ³னம் தப்படிக்கே²பேனேவ பஸித்³தி⁴தோ. அபரே பன ப⁴ணந்தி – ‘‘நாஹம், பி⁴க்க²வே, ஸங்கா⁴டிகஸ்ஸ ஸங்கா⁴டிதா⁴ரணமத்தேன ஸாமஞ்ஞம் வதா³மீ’’தி வுத்தே தத்த² நிஸின்னோ கோசி தித்த²ந்தரலத்³தி⁴கோ அசேலகத்தம் நு கோ² கத²ந்தி சிந்தேஸி, அபரே ரஜோஜல்லகத்தம் நு கோ² கத²ந்தி, ஏவம் தம் தம் சிந்தேந்தானம் அஜ்ஜா²ஸயவஸேன ப⁴க³வா இமானேவ வதஸமாதா³னானி இத⁴ படிக்கி²பீதி. ஸங்கா⁴டிகந்தி நிவாஸனபாருபனவஸேன ஸங்கா⁴டிவந்தம். தேனாஹ ‘‘ஸங்கா⁴டிகம் வத்த²’’ந்திஆதி³. அத்தனோ ருசியா மித்தாத³யோ ஸங்கா⁴டிகம் கரேய்யும், பச்சா² விஞ்ஞுதம் பத்தகாலே ஸங்கா⁴டிகத்தே ஸமாத³பேய்யும்.

438. அத்தானம் விஸுஜ்ஜ²ந்தம் பஸ்ஸதி அபி⁴ஜ்ஜா²தீ³னம் ஸமுதா³சாராபா⁴வதோ. மக்³கே³ன அஸமுச்சி²ன்னத்தா விஸுத்³தோ⁴தி பன ந வத்தப்³போ³. பாமோஜ்ஜந்தி தருணபீதிமாஹ. தஸ்ஸ ஹி அத்தனோ ஸம்மாபடிபத்தியா கிலேஸானம் விக்க²ம்பி⁴தத்தா சித்தஸ்ஸ விஸுத்³த⁴தம் பஸ்ஸந்தஸ்ஸ பாமோஜ்ஜம் ஜாயதி, தம் துட்டா²காரம். தேனாஹ ‘‘துட்டா²காரோ’’தி. பீதீதி பஸ்ஸத்³தி⁴ஆவஹா ப³லவபீதி. நாமகாயோ பஸ்ஸம்ப⁴தீதி இமினா உப⁴யம்பி பஸ்ஸத்³தி⁴ம் வத³தி. வேதி³யதீதி அனுப⁴வதி விந்த³தி. இதா³னி தேன நீவரணேஹி சித்தஸ்ஸ விஸோத⁴னத்தம் லத்³த⁴ந்தி ஆஹ ‘‘அப்பனாப்பத்தம் விய ஹோதீ’’தி. அஞ்ஞத்த² உட்டி²தா அஞ்ஞம் டா²னம் உபக³தாதி ஏத்தகேன உபமாபா⁴வேன உச்சனீசதாஸாமஞ்ஞேன ஹேட்டா² அஸத்³த⁴ம்மானம் படிபக்க²வஸேன தே³ஸனாய பரியோஸாபிதத்தா வுத்தம் ‘‘யதா²னுஸந்தி⁴னா’’தி. மஹாஸீஹனாத³ஸுத்தே மக்³கோ³ போக்க²ரணியா உபமிதோ ‘‘ஸேய்யதா²பி, ஸாரிபுத்த, போக்க²ரணீ’’திஆதி³ம் (ம. நி. 1.154) ஆரபி⁴த்வா உபமாஸம்ஸந்த³னே ‘‘ததா²யம் புக்³க³லோ படிபன்னோ, ததா² ச இரியதி, தஞ்ச மக்³க³ம் ஸமாருள்ஹோ, யதா² ஆஸவானம் க²யா’’தி (ம. நி. 1.154) வுத்தத்தா. யதா² ஹி புரத்தி²மாதி³தி³ஸாஹி ஆக³தா புரிஸா தம் போக்க²ரணிம் ஆக³ம்ம விஸுத்³த⁴ரூபகாயா விக³தபரிளாஹா ச ஹோந்தி, ஏவம் க²த்தியாதி³குலதோ ஆக³தா ததா²க³தப்பவேதி³தம் த⁴ம்மவினயம் ஸாஸனம் ஆக³ம்ம விஸுத்³த⁴னாமகாயா விக³தகிலேஸபரிளாஹா ச ஹோந்தி. தஸ்மா ஸப்³ப³கிலேஸானம் ஸமிதத்தா பரமத்த²ஸமணோ ஹோதீதி. ஸேஸம் ஸுவிஞ்ஞேய்யமேவ.

சூளஅஸ்ஸபுரஸுத்தவண்ணனாய லீனத்த²ப்பகாஸனா ஸமத்தா.

நிட்டி²தா ச மஹாயமகவக்³க³வண்ணனா.