1. சூளகோ³ஸிங்க³ஸுத்தவண்ணனா

325. ஞாதீனம் (அ. நி. டீ. 3.6.19) நிவாஸட்டா²னபூ⁴தோ கா³மோ ஞாதிகோ, ஸோ ஏவ நாதிகோ. ஸோ கிர கா³மோ யேஸம் ஸந்தகோ, தேஸம் புப்³ப³புரிஸேன அத்தனோ ஞாதீனம் ஸாதா⁴ரணபா⁴வேன நிவேஸிதோ, தேன ‘‘நாதிகோ’’தி பஞ்ஞாயித்த². அத² பச்சா² தத்த² த்³வீஹி தா³யாதே³ஹி த்³விதா⁴ விப⁴ஜித்வா பரிபு⁴த்தோ. தேனாஹ ‘‘த்³வின்னம் சூளபிதிமஹாபிதிபுத்தானம் த்³வே கா³மா’’தி. கி³ஞ்ஜகா வுச்சந்தி இட்ட²கா, கி³ஞ்ஜகாஹியேவ கதோ ஆவஸதோ² கி³ஞ்ஜகாவஸதோ². தஸ்மிம் கிர பதே³ஸே மத்திகா ஸக்க²ரமரும்ப³வாலிகாதீ³ஹி அஸம்மிஸ்ஸா அகடி²னா ஸண்ஹா ஸுகு²மா, தாய கதானி குலாலபா⁴ஜனானிபி ஸிலாமயானி விய த³ள்ஹானி, தஸ்மா தே உபாஸகா தாய மத்திகாய தீ³க⁴புது²லஇட்ட²கா காரேத்வா தாஹி ட²பேத்வா த்³வாரபா³ஹவாதபானகவாடதுலாயோ ஸேஸம் ஸப்³ப³ம் த³ப்³ப³ஸம்பா⁴ரேன வினா இட்ட²காஹி ஏவ பாஸாத³ம் காரேஸும். தேனாஹ ‘‘இட்ட²காஹேவா’’திஆதி³.

கோ³ஸிங்க³ஸாலவனதா³யந்தி கோ³ஸிங்க³ஸாலவனந்தி லத்³த⁴னாமம் ரக்கி²தம் அரஞ்ஞம். ஜேட்ட²கருக்க²ஸ்ஸாதி வனப்பதிபூ⁴தஸ்ஸ ஸாலருக்க²ஸ்ஸ. ஸாமக்³கி³ரஸந்தி ஸமக்³க³பா⁴வாதி³கு³ணம் விவேகஸுக²ம். உபரிபண்ணாஸகே உபக்கிலேஸஸுத்தே (ம. நி. 3.237-238) புது²ஜ்ஜனகாலோ கதி²தோ, இத⁴ சூளகோ³ஸிங்க³ஸுத்தே கீ²ணாஸவகாலோ கதி²தோ. கதகிச்சாபி ஹி தே மஹாதே²ரா அத்தனோ தி³ட்ட²த⁴ம்மஸுக²விஹாரம் பரேஸம் தி³ட்டா²னுக³திம் ஆபஜ்ஜனஞ்ச ஸம்பஸ்ஸந்தா பரமஞ்ச விவேகம் அனுப்³ரூஹந்தா ஸாமக்³கி³ரஸம் அனுப⁴வமானா தத்த² விஹரந்தி. ததா³தி தஸ்மிம் உபக்கிலேஸஸுத்ததே³ஸனாகாலே. தேதி அனுருத்³த⁴ப்பமுகா² குலபுத்தா. லத்³த⁴ஸ்ஸாதா³தி விபஸ்ஸனாய வீதி²படிபத்தியா அதி⁴க³தஸ்ஸாதா³. விபஸ்ஸனா ஹி புப்³பே³னாபரம் விஸேஸம் ஆவஹந்தீ பவத்தமானா ஸாதிஸயம் பீதிஸோமனஸ்ஸம் ஆவஹதி. தேனாஹ ப⁴க³வா –

‘‘யதோ யதோ ஸம்மஸதி, க²ந்தா⁴னம் உத³யப்³ப³யம்;

லப⁴தி பீதிபாமோஜ்ஜம், அமதம் தம் விஜானத’’ந்தி. (த⁴. ப. 374);

லத்³த⁴பதிட்டா² மக்³க³ப²லாதி⁴க³மனேன. ஸதி ஹி மக்³க³ப²லாதி⁴க³மே ஸாஸனே பதிட்டா² லத்³தா⁴ நாம ஹோதி, நோ அஞ்ஞதா².

காமம் ஸாரிபுத்தமோக்³க³ல்லானாபி மஹாஸாவகபரியாபன்னாவ, அக்³க³ஸாவகபா⁴வேன பன நேஸம் விஸேஸத³ஸ்ஸனத்த²ம் ‘‘த⁴ம்மஸேனாபதிமஹாமோக்³க³ல்லானத்தே²ரேஸு வா’’தி விஸும் க³ஹணம். ஸதிபி ஹி ஸாமஞ்ஞயோகே³ விஸேஸவந்தோ விஸும் க³ய்ஹந்தி யதா² ‘‘ப்³ராஹ்மணா ஆக³தா, வாஸிட்டோ²பி ஆக³தோ’’தி. தேஸு பன விஸும் க³ஹிதேஸுபி ‘‘அஸீதிமஹாஸாவகேஸூ’’தி அஸீதிக்³க³ஹணம் அப்பகம் ஊனமதி⁴கம் வா க³ணனுபக³ம் ந ஹோதீதி. அந்தமஸோதி இத³ம் த⁴ம்மப⁴ண்டா³கா³ரிகஸ்ஸ உபட்டா²கபா⁴வேன ஆஸன்னசாரிதாய வுத்தம். அனீகாதி ஹத்தா²னீகா, ஹத்தா²னீகதோ ஹத்தி²ஸமூஹதோதி அத்தோ². காளஸீஹோ யேபு⁴ய்யேன யூத²சரோதி கத்வா வுத்தம் ‘‘யூதா² நிஸ்ஸடோ காளஸீஹோ வியா’’தி. கேஸரீ பன ஏகசரோவ. வாதச்சி²ன்னோ வலாஹகோ வியாதி வாதச்சி²ன்னோ பப்³ப³தகூடப்பமாணோ வலாஹகச்சே²தோ³ விய. தேஸம் பக்³க³ண்ஹனதோதி யதா² நாம ஜிக⁴ச்சி²தஸ்ஸ போ⁴ஜனே, பிபாஸிதஸ்ஸ பானீயே, ஸீதேன பு²ட்ட²ஸ்ஸ உண்ஹே, உண்ஹேன பு²ட்ட²ஸ்ஸ ஸீதே, து³க்கி²தஸ்ஸ ஸுகே² அபி⁴ருசி உப்பஜ்ஜதி, ஏவமேவம் ப⁴க³வதோ கோஸம்ப³கே பி⁴க்கூ² அஞ்ஞமஞ்ஞம் விவாதா³பன்னே தி³ஸ்வா அபரே ஸமக்³கா³வாஸம் வஸந்தே ஆவஜ்ஜிதஸ்ஸ இமே தயோ குலபுத்தா ஆபாத²ம் ஆக³மிம்ஸு, அத² நே பக்³க³ண்ஹிதுகாமோ உபஸங்கமி, ஏவாயம் படிபத்திஅனுக்கமேன கோஸம்ப³கானம் பி⁴க்கூ²னம் வினயனுபாயோ ஹோதீதி. தேனாஹ ‘‘தேஸம் பக்³க³ண்ஹனதோ’’தி. ஏதேனேவ பச்சி²மஜனதம் அனுகம்பனதோதி இத³ம்பி காரணம் ஏகதே³ஸேன ஸம்வண்ணிதந்தி த³ட்ட²ப்³ப³ம். உக்கம்ஸித்வாதி யதா²பூ⁴தேஹி கு³ணேஹி ஸம்பஹம்ஸனேன விஸேஸேத்வா விஸிட்டே² கத்வா பஸம்ஸாவஸேன சேதம் ஆமேடி³தவசனம்.

தம் அரஞ்ஞம் ரக்க²தி வனஸாமினா ஆணத்தோ. ரக்கி²தகோ³பிதம் வனஸண்ட³ம், ந மஹாவனாதி³ விய அபரிக்³க³ஹிதம். ஸீலாதி³ப்பபே⁴தா³ய அத்தத்தா²ய படிபன்னா அத்தகாமா, ந அபரிச்சத்தஸினேஹாதி ஆஹ ‘‘அத்தனோ ஹிதம் காமயமானா’’தி. தேனாஹ ‘‘யோ ஹீ’’திஆதி³. பி⁴ந்தே³ய்யாதி வினாஸேய்ய.

து³ப்³ப³லமனுஸ்ஸாதி பஞ்ஞாய து³ப்³ப³லா அவித்³த³ஸுனோ மனுஸ்ஸா. தானீதி அபி⁴ஜாதிஆதீ³ஸு உப்பன்னபாடிஹாரியானி. சீவரக³ப்³பே⁴ன படிச்சா²தே³த்வாதி சீவரஸங்கா²தே ஓவரகே நிகூ³ஹித்வா விய. ந ஹி சீவரபாருபனமத்தேன பு³த்³தா⁴னுபா⁴வோ படிச்ச²ன்னோ ஹோதி. ‘‘மா ஸுத⁴ கோசிமம் பு³த்³தா⁴னுபா⁴வம் அஞ்ஞாஸீ’’தி பன ததா²ரூபேன இத்³தா⁴பி⁴ஸங்கா²ரேன தம் சா²தே³த்வா க³தோ ப⁴க³வா ததா² வுத்தோ. தேனாஹ ‘‘அஞ்ஞாதகவேஸேன அக³மாஸீ’’தி.

அபி⁴க்கமதா²தி பத³ம் அபி⁴முக²பா⁴வேன விதி⁴முகே²ன வத³தீதி ஆஹ ‘‘இதோ ஆக³ச்ச²தா²’’தி. பு³த்³தா⁴னம் காயோ நாம ஸுவிஸுத்³த⁴ஜாதிமணி விய ஸோப⁴னோ, கிஞ்சி மலம் அபனேதப்³ப³ம் நத்தி², கிமத்த²ம் ப⁴க³வா பாதே³ பக்கா²லேஸீதி ஆஹ ‘‘பு³த்³தா⁴ன’’ந்திஆதி³.

326. அனுருத்³தா⁴தி வா ஏகஸேஸனயேன வுத்தம் விரூபேகஸேஸஸ்ஸபி இச்சி²தப்³ப³த்தா, ஏவஞ்ச கத்வா ப³ஹுவசனனித்³தே³ஸோபி ஸமத்தி²தோ ஹோதி. இரியாபதோ² க²மதீதி ஸரீரஸ்ஸ லஹுட்டா²னதாய சதுப்³பி³தோ⁴பி இரியாபதோ² ஸுக²ப்பவத்திகோ. ஜீவிதம் யாபேதீதி யாபனாலக்க²ணம் ஜீவிதம் இமம் ஸரீரயந்தம் யாபேதி ஸுகே²ன பவத்தேதி. உளுங்கயாகு³ம் வா கடச்சு²பி⁴க்க²ம் வாதி இத³ம் மகரவுத்தியா மிஸ்ஸகப⁴த்தேன யாபனம் வத்தந்தி கத்வா வுத்தம். தேனாஹ ‘‘பி⁴க்கா²சாரவத்தம் புச்ச²தீ’’தி.

அஞ்ஞமஞ்ஞம் ஸம்ஸந்த³தீதி ஸதிபி உப⁴யேஸம் கலாபானம் பரமத்த²தோ பே⁴தே³ பசுரஜனேஹி து³விஞ்ஞேய்யனானத்தம் கீ²ரோத³கஸம்மோதி³தம் அச்சந்தமேவ ஸம்ஸட்ட²ம் விய ஹுத்வா திட்ட²தி. தேனாஹ ‘‘விஸும் ந ஹோதி, ஏகத்தம் விய உபேதீ’’தி. பியபா⁴வதீ³பனானி சக்கூ²னி பியசக்கூ²னி. பியாயதி, பியாயிதப்³போ³தி வா பியோதி. ஸமக்³க³வாஸஸ்ஸ யம் ஏகந்தகாரணம், தம் புச்ச²ந்தோ ப⁴க³வா ‘‘யதா² கத²ம் பனா’’திஆதி³மாஹாதி ‘‘கத²ந்தி காரணபுச்சா²’’தி வுத்தம். யோ நேஸம் மேத்தாஸஹிதானம்யேவ கம்மாதீ³னம் அஞ்ஞமஞ்ஞஸ்மிம் பச்சுபட்டா²னாகாரோ, தம் ஸந்தா⁴ய ‘‘கத²’’ந்தி புச்சா². ததா² ஹி பரதோ ‘‘ஏவம் கோ² மயம், ப⁴ந்தே’’திஆதி³னா தே²ரேஹி விஸ்ஸஜ்ஜனம் கதி²தம்.

மித்தம் ஏதஸ்ஸ அத்தீ²தி மேத்தம், காயகம்மம். ஆவீதி பகாஸம். ரஹோதி அப்பகாஸம். யஞ்ஹி உத்³தி³ஸ்ஸ மேத்தம் காயகம்மம் பச்சுபட்ட²பேதி, தம் தஸ்ஸ ஸம்முகா² சே, பகாஸம் ஹோதி, பரம்முகா² சே, அப்பகாஸம். தேனாஹ ‘‘ஆவி சேவ ரஹோ சாதி ஸம்முகா² சேவ பரம்முகா² சா’’தி. இதரானீதி பரம்முகா² காயவசீகம்மானி. ‘‘தத்தா²’’திஆதி³னா ஸங்கே²பதோ வுத்தமத்த²ம் விவரிதும் ‘‘யம் ஹீ’’திஆதி³ வுத்தம். ஸம்மஜ்ஜனாதி³வஸேன படிஜக்³கி³தப்³ப³யுத்தம் டா²னம் வா. ததே²வாதி யதா² ஸம்முகா² கதே மேத்தாகாயகம்மே வுத்தம், ததே²வ. ‘‘கச்சி க²மனீய’’ந்தி ஏவமாதி³கா கதா² ஸம்மோத³னீயகதா². யதா² பரேஹி ஸத்³தி⁴ம் அத்தனோ சி²த்³த³ம் ந ஹோதி, ததா² படிஸந்தா²ரவஸேன பவத்தா கதா² படிஸந்தா²ரகதா². ‘‘அஹோ ததா³ தே²ரேன மய்ஹம் தி³ன்னோ ஓவாதோ³, தி³ன்னா அனுஸாஸனீ’’தி ஏவம் காலந்தரே ஸரிதப்³ப³யுத்தா, ச²ஸாரணீயபடிஸம்யுத்தா வா கதா² ஸாரணீயகதா². ஸுத்தபத³ம் நிக்கி²பித்வா தஸ்ஸ அத்த²னித்³தே³ஸவஸேன ஸீலாதி³த⁴ம்மபடிஸம்யுத்தா கதா² த⁴ம்மீகதா². ஸரேன ஸுத்தஸ்ஸ உச்சாரணம் ஸரப⁴ஞ்ஞம். பஞ்ஹஸ்ஸ ஞாதும் இச்சி²தஸ்ஸ அத்த²ஸ்ஸ புச்ச²னம் பஞ்ஹபுச்ச²னம். தஸ்ஸ யதா²புச்சி²தஸ்ஸஆதி³ஸனம் பஞ்ஹவிஸ்ஸஜ்ஜனம். ஏவம் ஸமன்னாஹரதோதி ஏவம் மனஸிகரோதோ, ஏவம் மேத்தம் உபஸம்ஹரதோதி அத்தோ².

ஏகதோ காதும் ந ஸக்கா, தஸ்மா நானா. ஹிதட்டே²னாதி அத்தனோ விய அஞ்ஞமஞ்ஞஸ்ஸ ஹிதபா⁴வேன. நிரந்தரட்டே²னாதி அந்தராபா⁴வேன பே⁴தா³பா⁴வேன. அவிக்³க³ஹட்டே²னாதி அவிரோத⁴பா⁴வேன. ஸமக்³க³ட்டே²னாதி ஸஹிதபா⁴வேன. பரிப⁴ண்ட³ம் கத்வாதி ப³ஹலதனுமத்திகாலேபேஹி லிம்பேத்வா. சீவரம் வா தோ⁴வந்தீதி அத்தனோ சீவரம் வா தோ⁴வந்தி. பரிப⁴ண்ட³ம் வாதி அத்தனோ பண்ணஸாலாய பரிப⁴ண்ட³ம் வா கரோந்தி.

327. படிவிருத்³தா⁴ ஏவாதி ஏத்தா²பி ‘‘யேபு⁴ய்யேனா’’தி பத³ம் ஆனேத்வா ஸம்ப³ந்தி⁴தப்³ப³ம். தேஸம் அப்பமாத³லக்க²ணந்தி தேஸம் அப்பமஜ்ஜனஸபா⁴வம். கச்சி பன வோ அனுருத்³தா⁴ ஸமக்³கா³தி ஏத்தா²பி வோதி நிபாதமத்தம், பச்சத்தவசனம் வா, கச்சி தும்ஹேதி ஏவமத்தோ² வேதி³தப்³போ³. ஸமுக்³க³பாதிந்தி ஸமுக்³க³புடஸதி³ஸம் பாதிம்.

பண்ணஸாலாயம் அந்தோ ப³ஹி ச ஸம்மஜ்ஜனேன ஸோதி⁴தங்க³ணதா வத்தபடிபத்தி. படிவிஸமத்தமேவாதி அத்தனோ யாபனபடிவிஸமத்தமேவ. ஓஸாபேத்வாதி பக்கி²பித்வா. பமாணமேவாதி அத்தனோ யாபனபமாணமேவ. வுத்தனயேன ஜஹித்வாதி பாளியம் வுத்தனயேன ஜஹித்வா.

ஹத்தே²ன ஹத்த²ம் ஸம்ஸிப்³ப³ந்தாதி அத்தனோ ஹத்தே²ன இதரஸ்ஸ ஹத்த²ம் த³ள்ஹக்³க³ஹணவஸேன ப³ந்த⁴ந்தா. விலங்கே⁴தி தே³ஸந்தரம் பாபேதி ஏதேனாதி விலங்க⁴கோ, ஹத்தோ². ஹத்தோ² ஏவ விலங்க⁴கோ ஹத்த²விலங்க⁴கோ, தேன ஹத்த²விலங்க⁴கேன.

தம் அக²ண்ட³ம் கத்வாதி தம் தீஸுபி தி³வஸேஸு த⁴ம்மஸ்ஸவனம் பவத்தனவஸேன அக²ண்டி³கம் கத்வா. ஏதந்தி ‘‘பஞ்சாஹிகம் கோ² பனா’’திஆதி³வசனம். பஞ்சமே பஞ்சமே அஹனி ப⁴வதீதி பஞ்சாஹிகம். ப⁴க³வதா புச்சி²தேன அனுருத்³த⁴த்தே²ரேன. பமாத³ட்டா²னேஸுயேவாதி அஞ்ஞேஸம் பமாத³ட்டா²னேஸுயேவ. ‘‘பமாத³ட்டா²னேஸுயேவா’’தி வுத்தமேவத்த²ம் பாகடதரம் காதும் ‘‘அஞ்ஞேஸஞ்ஹீ’’திஆதி³ வுத்தம். பபஞ்சகரணட்டா²னானீதி கதா²பபஞ்சஸ்ஸ கரணட்டா²னானி விஸ்ஸட்ட²கதா²பவத்தனேன கம்மட்டா²னே பமஜ்ஜனட்டா²னானி. தத்தா²பி ‘‘மயம், ப⁴ந்தே, கம்மட்டா²னவிருத்³த⁴ம் ந படிபஜ்ஜாமா’’தி ஸிகா²ப்பத்தம் அத்தனோ அப்பமாத³லக்க²ணம் தே²ரோ த³ஸ்ஸேதி. ஏத்தகம் டா²னம் முஞ்சித்வாதி பன இத³ம் ததா³ விஹாரஸமாபத்தீனம் வளஞ்ஜாபா⁴வேன வுத்தம்.

328. ஜா²னஸ்ஸ அதி⁴ப்பேதத்தா ‘‘அலமரியஞாணத³ஸ்ஸனவிஸேஸோ’’இச்சேவ வுத்தம். அத்தனோ ஸம்மாபடிபன்னதாய ஸத்து² சித்தாராத⁴னத்த²ம் தஸ்ஸ ச விஸேஸாதி⁴க³மஸ்ஸ ஸத்து² பச்சக்க²பா⁴வதோ தே²ரோ ‘‘கிஞ்ஹி நோ ஸியா, ப⁴ந்தே’’தி ஆஹ. யாவதே³வாதி யத்தகம் காலம் ஏகம் தி³வஸபா⁴க³ம் வா ஸகலரத்திம் வா யாவ ஸத்த வா தி³வஸே.

329. ஸமதிக்கமாயாதி ஸம்மதே³வ அதிக்கமனாய. ஸதி ஹி உபரி விஸேஸாதி⁴க³மே ஹேட்டி²மஜ்ஜா²னம் ஸமதிக்கந்தம் நாம ஹோதி படிப்பஸ்ஸத்³தி⁴ ச. தேனாஹ ‘‘படிப்பஸ்ஸத்³தி⁴யா’’தி. ஞாணத³ஸ்ஸனவிஸேஸோதி காரணூபசாரேன வுத்தோதி வேதி³தப்³போ³. வேத³யிதஸுக²தோதி வேத³னாஸஹிதஜ்ஜா²னஸுக²தோ வா ப²லஸுக²தோ வா. அவேத³யிதஸுக²ந்தி நிப்³பா³னஸுக²ம் விய வேத³னாரஹிதம் ஸுக²ம். அவேத³யிதஸுக²ந்தி ச நித³ஸ்ஸனமத்தமேதம், தம் பன அப²ஸ்ஸம் அஸஞ்ஞம் அசேதனந்தி ஸப்³ப³சித்தசேதஸிகரஹிதமேவ. ததோ ச ஸதிபி ரூபத⁴ம்மப்பவத்தியம் தஸ்ஸ அசேதனத்தா ஸப்³ப³ஸோ ஸங்கா²ரது³க்க²விரஹிததாய ஸந்ததரா பணீததரா ச நிரோத⁴ஸமாபத்தீதி வுச்சதே. தேனாஹ ‘‘அவேத³யிதஸுக²ம் ஸந்ததரம் பணீததரம் ஹோதீ’’தி. தேன வுத்தம் ‘‘இமம்ஹா சா’’திஆதி³.

330. ஸாமக்³கி³ரஸானிஸம்ஸமேவ நேஸம் ப⁴க³வா கதே²ஸி அஜ்ஜா²ஸயானுகூலத்தா தஸ்ஸ. அனுஸாவேத்வாதி அனுபக³மனவஸேன ஸம்மதே³வ ஆரோசேத்வா. ‘‘அனுஸம்ஸாவேத்வா’’தி வா பாடோ², ஸோ ஏவத்தோ². ததோ படினிவத்தித்வாதி ஏதரஹி ப⁴க³வதோ ஏகவிஹாரே அஜ்ஜா²ஸயோதி ஸத்து² மனம் க³ண்ஹந்தா ‘‘இதே⁴வ திட்ட²தா²’’தி விஸ்ஸஜ்ஜிதட்டா²னதோ நிவத்தித்வா. பப்³ப³ஜ்ஜாதீ³னீதி ஆதி³-ஸத்³தே³ன உபஸம்பதா³-விஸுத்³தி⁴-து⁴தகம்மட்டா²னானுயோக³-ஜா²னவிமோக்க²-ஸமாபத்தி-ஞாணத³ஸ்ஸன-மக்³க³பா⁴வனா-ப²லஸச்சி²கிரியாதி³கே ஸங்க³ண்ஹாதி. அதி⁴க³ந்த்வாபீதி பி-ஸத்³தே³ன யதா²தி⁴க³தானம்பி. அத்தனோ கு³ணகதா²ய அட்டியமானாதி ப⁴க³வந்தம் நிஸ்ஸாய அதி⁴க³ந்த்வாபி த⁴ம்மாதி⁴கரணம் ஸத்து²விஹேஸாபா⁴வதீ³பனே ப⁴க³வதோ பாகடகு³ணானம் கதா²ய அட்டியமானாபீதி யோஜனா. தே³வதாதி தம்தம்ஸமாபத்திலாபி⁴னியோ தே³வதா. முக²ம் மே ஸஜ்ஜந்தி முக²ம் மே கத²னே ஸமத்த²ம், கத²னே யோக்³யந்தி அத்தோ².

331. ஏவம் ஆக³தோதி ஏவம் ஆடானாடியஸுத்தே ஆக³தோ. பலிவேடே²ந்தேதி சோதே³ந்தே. மச்ச²ராயந்தீதி அத்தனோ கு³ணானம் ப⁴க³வதோபி ஆரோசனம் அஸஹமானா மச்ச²ராயந்தீதி ஸோ சிந்தேதீதி கத்வா வுத்தம்.

01. தேஸம் லாபா⁴தி தேஸம் வஜ்ஜிராஜூனம் வஜ்ஜிரட்ட²வாஸீனஞ்ச மனுஸ்ஸத்தம், பதிரூபதே³ஸவாஸாதி³கோ, ப⁴க³வதோ திண்ணஞ்ச குலபுத்தானம் த³ஸ்ஸனவந்த³னதா³னத⁴ம்மஸ்ஸவனாத³யோ லாபா⁴. ஸுலத்³தா⁴ லாபா⁴தி யோஜனா. பஸன்னசித்தம் அனுஸ்ஸரேய்யாதி தம் குலஞ்ஹேதம் ஸீலாதி³கு³ணே சித்தம் பஸாதே³த்வா அனுஸ்ஸரேய்ய. வுத்தம் தேஸம் ‘‘அனுஸ்ஸரணம்பாஹம், பி⁴க்க²வே, தேஸம் பி⁴க்கூ²னம் ப³ஹூபகாரம் வதா³மீ’’தி (இதிவு. 104; ஸம். நி. 5.184).

சூளகோ³ஸிங்க³ஸுத்தவண்ணனாய லீனத்த²ப்பகாஸனா ஸமத்தா.