5. அனுமானஸுத்தவண்ணனா

181. வுத்தானுஸாரேனாதி ‘‘குரூஸு, ஸக்கேஸூ’’தி ச ஏத்த² வுத்தனயானுஸாரேன, ‘‘ப⁴க்³கா³ நாம ஜானபதி³னோ ராஜகுமாரா’’திஆதி³னா நயேன வசனத்தோ² வேதி³தப்³போ³தி அத்தோ². வத்து²பரிக்³க³ஹதி³வஸேதி நக³ரமாபனத்த²ம் வத்து²விஜ்ஜாசரியேன நக³ரட்டா²னஸ்ஸ பரிக்³க³ண்ஹனதி³வஸே. அதா²தி பச்சா². நக³ரே நிம்மிதேதி தத்த² அனந்தராயேன நக³ரே மாபிதே. தமேவ ஸுஸுமாரகி³ரணம் ஸுப⁴னிமித்தம் கத்வா ‘‘ஸுஸுமாரகி³ரி’’த்வேவஸ்ஸ நாமம் அகம்ஸு. ஸுஸுமாரஸண்டா²னத்தா ஸுஸுமாரோ நாம ஏகோ கி³ரி, ஸோ தஸ்ஸ நக³ரஸ்ஸ ஸமீபே, தஸ்மா தம் ஸுஸுமாரகி³ரி ஏதஸ்ஸ அத்தீ²தி ‘‘ஸுஸுமாரகி³ரீ’’தி வுச்சதீதி கேசி. பே⁴ஸகளாதி வுச்சதி க⁴ம்மண்ட³க³ச்ச²ம், கேசி ‘‘ஸேதருக்க²’’ந்தி வத³ந்தி, தேஸம் ப³ஹுலதாய பன தம் வனம் பே⁴ஸகளாவனந்தேவ பஞ்ஞாயித்த². பே⁴ஸோ நாம ஏகோ யக்கோ² அயுத்தகாரீ, தஸ்ஸ ததோ க³ளிதட்டா²னதாய தம் வனம் பே⁴ஸக³ளாவனம் நாம ஜாதந்தி கேசி. அப⁴யதி³ன்னட்டா²னே ஜாதம் விரூள்ஹம், ஸம்வத்³த⁴ந்தி அத்தோ².

இச்சா²பேதீதி யம் கிஞ்சி அத்தனி க³ரஹிதப்³ப³ம் வத்தும் ஸப்³ரஹ்மசாரீனம் இச்ச²ம் உப்பாதே³தி, தத³த்தா²ய தேஸம் அத்தானம் விஸ்ஸஜ்ஜேதீதி அத்தோ². பட²மம் தி³ன்னோ ஹிதூபதே³ஸோ ஓவாதோ³, அபராபரம் தி³ன்னோ அனுஸாஸனீ. பச்சுப்பன்னாதீதவிஸயோ வா ஓவாதோ³, அனாக³தவிஸயோ அனுஸாஸனீ. ஓதிண்ணவத்து²கோ ஓவாதோ³, இதரோ அனுஸாஸனீ. ஸோ சாதி ஏவம் பவாரேதா ஸோ பி⁴க்கு². து³க்க²ம் வசோ ஏதஸ்மிம் விப்படிகூலக்³கா³ஹே விபச்சனீகஸாதே அனாத³ரே புக்³க³லேதி து³ப்³ப³சோ. தேனாஹ ‘‘து³க்கே²ன வத்தப்³போ³’’தி. உபரி ஆக³தேஹீதி ‘‘பாபிச்சோ² ஹோதீ’’திஆதி³னா (ம. நி. 1.181) ஆக³தேஹி ஸோளஸஹி பாபத⁴ம்மேஹி. பகாரேஹி ஆவஹம் பத³க்கி²ணம், ததோ பத³க்கி²ணதோ க³ஹணஸீலோ பத³க்கி²ணக்³கா³ஹீ, ந பத³க்கி²ணக்³கா³ஹீ அப்பத³க்கி²ணக்³கா³ஹீ. வாமதோதி அபஸப்³யதோ, வுத்தவிபரியாயதோதி அதி⁴ப்பாயோ.

அஸந்தஸம்பா⁴வனபத்த²னானந்தி அஸந்தேஹி அவிஜ்ஜமானேஹி கு³ணேஹி ஸம்பா⁴வனஸ்ஸ பத்த²னாபூ⁴தானம். படி-ஸத்³தோ³ பச்சத்திகபரியாயோ, ப²ரணம் வாயமனம் இத⁴ ததா²வட்டா²னந்தி ஆஹ ‘‘படிப்ப²ரதீதி படிவிருத்³தோ⁴ பச்சனீகோ ஹுத்வா திட்ட²தீ’’தி. அபஸாதே³தீதி கி²பேதி தஜ்ஜேதி. ததா²பூ⁴தோ ச பரம் க⁴ட்டேந்தோ நாம ஹோதீதி ஆஹ ‘‘க⁴ட்டேதீ’’தி. படிஆரோபேதீதி யாதி³ஸேன வுத்தோ, தஸ்ஸ படிபா⁴க³பூ⁴தம் தோ³ஸம் சோத³கஸ்ஸ உபரி ஆரோபேதி.

படிசரதீதி (அ. நி. டீ. 2.3.68) படிச்சா²த³னவஸேன சரதி பவத்ததி, படிச்சா²த³னத்தோ² ஏவ வா சரதி-ஸத்³தோ³ அனேகத்த²த்தா தா⁴தூனந்தி ஆஹ ‘‘படிச்சா²தே³தீ’’தி. அஞ்ஞேனஞ்ஞந்தி படிச்சா²த³னாகாரத³ஸ்ஸனந்தி ஆஹ ‘‘அஞ்ஞேன காரணேனா’’திஆதி³. தத்த² அஞ்ஞம் காரணம் வசனம் வாதி யம் சோத³கேன சுதி³தகஸ்ஸ தோ³ஸவிபா⁴வனம் காரணம், வசனம் வா வுத்தம், ததோ அஞ்ஞேனேவ காரணேன, வசனேன வா படிச்சா²தே³தி. காரணேனாதி சோத³னாய அமூலிகபா⁴வதீ³பனியா யுத்தியா. வசனேனாதி தத³த்த²போ³த⁴னேன. கோ ஆபன்னோதிஆதி³னா சோத³னம் அவிஸ்ஸஜ்ஜேத்வா விக்கே²பாபஜ்ஜனம் அஞ்ஞேனஞ்ஞம் படிசரணந்தி த³ஸ்ஸேதி, ப³ஹித்³தா⁴ கதா²அபனாமனம் விஸ்ஸஜ்ஜேத்வாதி அயமேவ தேஸம் விஸேஸோ. தேனாஹ ‘‘இத்த²ன்னாம’’ந்திஆதி³.

அபதீ³யந்தி தோ³ஸா ஏதேன ரக்கீ²யந்தி, லூயந்தி, சி²ஜ்ஜந்தீதி வா அபதா³னம், (அ. நி. டீ. 2.3.2) ஸத்தானம் ஸம்மா, மிச்சா² வா பவத்தபயோகோ³. தேனாஹ ‘‘அத்தனோ சரியாயா’’தி.

183. அனுமினிதப்³ப³ந்தி அனு அனு மினிதப்³போ³ ஜானிதப்³போ³. அத்தானம் அனுமினிதப்³ப³ந்தி ச இத³ம் பச்சத்தே உபயோக³வசனம். தேனாஹ ‘‘அனுமினிதப்³போ³ துலேதப்³போ³ தீரேதப்³போ³’’தி. அத்தானம் அனுமினிதப்³ப³ந்தி வா அத்தனி அனுமானஞாணம் பவத்தேதப்³ப³ம். தத்ராயம் நயோ – அப்பியபா⁴வாவஹா மயி பவத்தா பாபிச்ச²தா பாபிச்சா²பா⁴வதோ பரஸ்மிம் பவத்தபாபிச்ச²தா விய. ஏஸ நயோ ஸேஸத⁴ம்மேஸுபி. அபரோ நயோ – ஸப்³ரஹ்மசாரீனம் பியபா⁴வம் இச்ச²ந்தேன பாபிச்ச²தா பஹாதப்³பா³ ஸீலவிஸுத்³தி⁴ஹேதுபா⁴வதோ அத்துக்கம்ஸனாதி³ப்பஹானம் விய. ஸேஸத⁴ம்மேஸுபி ஏஸேவ நயோ.

184. பச்சவேக்கி²தப்³போ³தி ‘‘ந பாபிச்சோ² ப⁴விஸ்ஸாமி, ந பாபிகானம் இச்சா²னம் வஸம் க³தோ’’திஆதி³னா பதி பதி தி³வஸஸ்ஸ திக்க²த்தும் வா ஞாணசக்கு²னா அவேக்கி²தப்³ப³ம், ஞாணம் பவத்தேதப்³ப³ந்தி அத்தோ². பாபிச்ச²தாதீ³னம் பஹானம் பதி அவேக்கி²தப்³ப³ம், அயஞ்ச அத்தோ² தப்³ப³-ஸத்³த³ஸ்ஸ பா⁴வத்த²தாவஸேன வேதி³தப்³போ³, கம்மத்த²தாவஸேன பன அட்ட²கதா²யம் ‘‘அத்தான’’ந்தி பச்சத்தே உபயோக³வசனம் கத்வா வுத்தம். ஸிக்க²ந்தேனாதி திஸ்ஸோபி ஸிக்கா² ஸிக்க²ந்தேன. தேனாஹ ‘‘குஸலேஸு த⁴ம்மேஸூ’’தி.

திலகந்தி காளதிலஸேததிலாதி³திலகம். ஸப்³ப³ப்பஹானந்தி ஸப்³ப³ப்பகாரப்பஹானம். ப²லே ஆக³தேதி ப²லே உப்பன்னே. நிப்³பா³னே ஆக³தேதி நிப்³பா³னஸ்ஸ அதி⁴க³தத்தா. பி⁴க்கு²பாதிமோக்க²ந்தி ‘‘ஸோ ஸமணோ, ஸ பி⁴க்கூ²’’தி ஏவம் வுத்தபி⁴க்கூ²னம் பாதிமோக்க²ம், ந உபஸம்பன்னானம் ஏவ ந பப்³ப³ஜிதானம் ஏவாதி த³ட்ட²ப்³ப³ம். யஸ்மா சித³ம் பி⁴க்கு²பாதிமோக்க²ம், தஸ்மா வுத்தம் ‘‘இத³ம் தி³வஸஸ்ஸ திக்க²த்து’’ந்திஆதி³. அபச்சவேக்கி²தும் ந வட்டதி அத்தவிஸுத்³தி⁴யா ஏகந்தஹேதுபா⁴வதோ.

அனுமானஸுத்தவண்ணனாய லீனத்த²ப்பகாஸனா ஸமத்தா.