4. சூளது³க்க²க்க²ந்த⁴ஸுத்தவண்ணனா

175. ஸக்கேஸூதி ஏத்த² யம் வத்தப்³ப³ம், தம் ஸதிபட்டா²னஸுத்தவண்ணனாயம் வுத்தனயேனேவ வேதி³தப்³ப³ந்தி தம் ஏகதே³ஸேன த³ஸ்ஸேந்தோ ‘‘ஸோ ஹீ’’தி ஆஹ. தத்த² யேன ராஜகுமாரா ஸக்யா நாம ஜாதா, யதோ தேஸம் நிவாஸட்டா²னதாய ஜனபதோ³ ததா² வுச்சதி, தம் வத்தப்³ப³ந்தி ஆஹ ‘‘ஸக்யானம் பன உப்பத்தி அம்ப³ட்ட²ஸுத்தே ஆக³தாவா’’தி. கபிலவத்தூ²தி வுத்தம் புரிமஸஞ்ஞாவஸேன.

நானப்பகாரகந்தி ‘‘லோப⁴த⁴ம்மா’’தி ப³ஹுவசனஸ்ஸ நிமித்தம் வத³தி. லோபோ⁴ ஹி தேன தேன அவத்தா²விஸேஸேன பவத்திஆகாரபே⁴தே³ன ‘‘ச²ந்தோ³ ராகோ³தண்ஹா ஆஸத்தி அபேக்கா²’’திஆதி³னா அனேகப்பபே⁴தோ³, லுப்³ப⁴னலக்க²ணேன பன ‘‘லோபோ⁴’’த்வேவ வுச்சதி. தேனாஹ ‘‘நானப்பகாரகம் லோப⁴ம்யேவா’’தி. ததா² ‘‘தோ³ஸோ படிகோ⁴ கோதோ⁴ உபனாஹோ விரோதோ⁴’’திஆதி³னா, ‘‘முய்ஹனம் அஸமபேக்க²னம் அபச்சவேக்க²ணா து³ம்மேஜ்ஜ²ம் பா³ல்ய’’ந்திஆதி³னா (த⁴. ஸ. 390) ச தோ³ஸமோஹானம் நானப்பகாரதம் ஸந்தா⁴யாஹ ‘‘இதரேஸுபி த்³வீஸு ஏஸேவ நயோ’’தி. பரியாதி³யித்வாதி பரிதோ ஸப்³ப³ஸோ ஆதா³ய. க³ஹேத்வாதி அயமேத்த² அத்தோ²தி ஆஹ ‘‘க³ஹணே ஆக³த’’ந்தி. பரியாதி³யதீதி பரிக்கீ²ணோதி. தீ³-ஸத்³த³ஞ்ஹி ஸத்³த³விதூ³ க²யத்த²ம் வத³ந்தி.

ஏகதா³தி ஆமேடி³தலோபேன நித்³தே³ஸோதி ஆஹ ‘‘ஏகேகஸ்மிம் காலே’’தி. லோப⁴தோ³ஸமோஹாதி பட²மமக்³கே³ன பஹீனாவஸேஸா லோப⁴தோ³ஸமோஹா. நிரவஸேஸா பஹீயந்தி, அஞ்ஞதா² து³தியமக்³கே³ன கிம் கதம் ஸியாதி அதி⁴ப்பாயோ. ஸமுதா³சாரப்பத்தம் பன தி³ஸ்வா ‘‘அப்பஹீனம் மே அத்தீ²’’திபி ஜானாதி. ஏவம் கத²ம் நிரவஸேஸப்பஹானஸஞ்ஞாதி ஆஹ ‘‘அப்பஹீனகம்…பே… ஸஞ்ஞீ ஹோதீ’’தி. ஏவம் பட²மமக்³கே³னேவ ஸமுச்சி²ன்னஸம்ஸயஸ்ஸ ‘‘கோ ஸு நாம மே த⁴ம்மோ அஜ்ஜ²த்தம் அப்பஹீனோதி ஏவம் ஸந்தே⁴ஹோ கத²ம் உப்பஜ்ஜதீ’’தி வத்வா ‘‘பண்ணத்தியா அகோவித³த்தா’’தி காரணமாஹ. வினயகுக்குச்சம் விய ஹி பண்ணத்தியம் அகுஸலதாய அரியானம்பி கத்த²சி விமதிமத்தம் உப்பஜ்ஜதி யதா² தம் ஸப்³ப³ஸோ அப்பஹீனஸம்மோஹானந்தி. அத்தனோ அவிஸயே அனபி⁴ஜானனம் பண்ணத்திகோஸல்லேன கிமேத்த² பயோஜனம், பச்சவேக்க²ணாமத்தேன அயமத்தோ² ஸிஜ்ஜ²தீதி த³ஸ்ஸேந்தோ ‘‘கிம் தஸ்ஸ பச்சவேக்க²ணா நத்தீ²’’தி ஆஹ. இதரோ ‘‘நத்தீ²’’தி ந ஸக்கா வத்துந்தி கத்வா ‘‘அத்தீ²’’தி வத்வா தத்த² லப்³ப⁴மானவிபா⁴க³ம் த³ஸ்ஸேந்தோ ‘‘ஸா பனா’’திஆதி³மாஹ. தத்த² ஸாதி பச்சவேக்க²ணா. ஸப்³பே³ஸந்தி ஸப்³பே³ஸம் அரியானம். யதா² பரிபுண்ணா ந ஹோதி, ந ஏவம் ஸப்³ப³ஸோ ந ஹோதீதி ஆஹ ‘‘இமாஸு பனா’’திஆதி³.

176. அஜ்ஜ²த்தந்தி நியகஜ்ஜ²த்தம் அதி⁴ப்பேதந்தி ஆஹ ‘‘தவ ஸந்தானே’’தி. அப்பஹீனோதி அனவஸேஸதோ அப்பஹீனோ. து³விதே⁴தி வத்து²காமகிலேஸகாமே. கிலேஸகாமோபி ஹி யத³க்³கே³ன அஸ்ஸாதீ³யதி, தத³க்³கே³ன பரிபு⁴ஞ்ஜீயதி.

177. அஸ்ஸாதீ³யதீதி அஸ்ஸாதோ³, ஸுக²ம். அப்போ அப்பமத்தகோ அஸ்ஸாதோ³ ஏதேஸூதி அப்பஸ்ஸாதா³. தேனாஹ ‘‘பரித்தஸுகா²’’தி. பரியேஸனது³க்கா²தி³ஹேதுகம் தி³ட்ட²த⁴ம்மிகம் தத்த² து³ச்சரிதசரணேன ஸம்பராயிகஞ்ச து³க்க²மேத்த² காமேஸு ப³ஹுகந்தி ப³ஹுது³க்கா². ப³ஹுபாயாஸாதி ப³ஹுபரிக்கிலேஸா. தே பன பரிக்கிலேஸா வக்க²மானனயேன ப³ஹூயேவேத்த² தி³ட்ட²த⁴ம்மிகாபீதி ஆஹ ‘‘தி³ட்ட²த⁴ம்மிக…பே… ப³ஹூ’’தி. தே ச பரிக்கிலேஸா யஸ்மா தம்ஸமங்கி³னோ ஹிதபடிபத்தியா அந்தராயகரா இத⁴ சேவ பரலோகே ச ஆதீ³னவகாரணஞ்ச பவத்தந்தி, தஸ்மா வுத்தம் ‘‘தி³ட்ட²த⁴ம்மிக…பே… ப³ஹூ’’தி. ஏவம் சேபீதி ஏவம் ‘‘அப்பஸ்ஸாதா³ காமா’’திஆதி³னா ஆகாரேன. நயேனாதி த⁴ம்மேன. காரணேனாதி யுத்தியா. ஸுட்டு² தி³ட்ட²ம் ஹோதீதி ஸம்ப³ந்தோ⁴. விபஸ்ஸனாபஞ்ஞாயாதி அரியமக்³க³பஞ்ஞாய. ஸா சத்தாரிபி ஸச்சானி விஸேஸதோ பஸ்ஸதீதி விபஸ்ஸனாதி அதி⁴ப்பேதா. தேனாஹ ‘‘ஹேட்டா²மக்³க³த்³வயஞாணேனாதி அத்தோ²’’தி. பீதிஸுக²ந்தி பீதிஸுக²வந்தம் ஜா²னத்³வயம். த்³வே மக்³கே³தி ஹேட்டா²மக்³கே³. ஆவட்டனஸீலோ ஆபு⁴ஜனஸீலோ ந ஹோதீதி அனாவட்டீ நேவ ஹோதி ஸப்³ப³ஸோ அப்பஹீனகாமராக³ச²ந்தோ³. தேனாஹ ‘‘கஸ்மா’’திஆதி³. ஓரோத⁴னாடகா பஜஹனபஞ்ஞாதி ஆதீ³னவானுபஸ்ஸனாஞாணமாஹ.

179. அஸ்ஸாதோ³பி கதி²தோ, ‘‘அப்பஸ்ஸாதா³’’தி ஹி இமினா யாவதகோ காமேஸு அஸ்ஸாதோ³, தம் ஸப்³ப³ம் அனவஸேஸதோ பரிக்³க³ஹேத்வா சஸ்ஸ பரித்தபா⁴வோ த³ஸ்ஸிதோதி ஆதீ³னவோபி கதி²தோ ஸங்கே²பேனேவ ஸேஸஸ்ஸஆதீ³னவஸ்ஸ த³ஸ்ஸிதத்தா. தம் கதே²துந்தி தம் நிஸ்ஸரணம் ‘‘ஏகந்தஸுக²படிஸம்வேதீ³’’தி இமினா கதே²தும். இமேஹி அந்தேஹீதி ‘‘பஞ்சிமே, மஹானாம, காமகு³ணா’’திஆதி³னா காமகு³ணத³ஸ்ஸனமுகே²ன காமஸுக²ல்லிகானுயோக³ம் ‘‘உப்³ப⁴ட்ட²கா ஹோந்தி ஆஸனபடிக்கி²த்தா’’திஆதி³னா அத்தகிலமதா²னுயோக³ஞ்ச த³ஸ்ஸேத்வா இமேஹி த்³வீஹி அந்தேஹி முத்தம் மம ஸாஸனந்தி, ப²லஸமாபத்திபரியோஸானத்தா ஸாஸனஸம்பத்தியா ‘‘உபரிப²லஸமாபத்திஸீஸேன ஸகலஸாஸனம் த³ஸ்ஸேது’’ந்தி ஆஹ. கி³ஜ்ஜ²ஸதி³ஸோ கூடோதி மஜ்ஜே²பத³லோபீஸமாஸோ யதா² ‘‘ஸாகபத்தி²வோ’’தி (பாணினி. 2.1.60). து³தியே பனேத்த² கி³ஜ்ஜ²வந்ததாய கி³ஜ்ஜா² கூடே ஏதஸ்ஸாதி கி³ஜ்ஜ²கூடோ. உத்³த⁴ம்யேவ திட்ட²னகா நிஸஜ்ஜாய வுட்டி²தகாலதோ பட்டா²ய ஏகட்டா²னேனேவ திட்ட²னகா. தேனாஹ ‘‘அனிஸின்னா’’தி. நிக³ண்ட²ஸ்ஸாதி நாடபுத்தஸ்ஸ. நத்தி² ஏதஸ்ஸ பரிஸேஸந்தி அபரிஸேஸம். ஏவம் ஸங்கா²ப⁴வசனமத்தமஸ்ஸாதி ஆஹ ‘‘அபரிஸேஸஸங்கா²த’’ந்தி. நிச்சட்டே²ன ஸதத-ஸத்³தே³ன அபி⁴ண்ஹப்பவத்தி ஜோதிதா ஸியாதி ‘‘ஸமித’’ந்தி வுத்தம். தேன நிரந்தரப்பவத்திம் த³ஸ்ஸேதீதி ஏவம் வா ஏத்த² அத்தோ² த³ட்ட²ப்³போ³.

180. யம் கரோதி, தம் ஜானாதீதி து³க்க²ஸ்ஸ நிஜ்ஜரணகே²பனம் நாம விஞ்ஞூனம் கிச்சம், விஞ்ஞுனா ச புரிஸேன கதாகதம் ஜானிதப்³ப³ம், தஸ்மா தும்ஹேஹி புராணானம் கம்மானம் ப்³யந்திபா⁴வம் கரோந்தேஹி பட²மம் தாவ ஏத்தகானி புராணானி கம்மானீதி ஜானிதப்³பா³னி, ததோ ‘‘ஏத்தகம் காலம் கதேன தபஸா ஏத்தகானி தானி ப்³யந்திகதானி, இதா³னி ஏத்தகானி காதப்³பா³னீ’’திஆதி³னா அயம் விதி⁴ புரிஸேன விய அத்தனா காதப்³ப³கிச்சம் பரிச்சி²ந்தி³தப்³ப³ந்தி த³ஸ்ஸேதி. தேனாஹ ‘‘தும்ஹேஹிபி ததா² ஞாதப்³ப³ம் ஸியா’’தி. ஸுத்³த⁴ந்தந்தி ஸுத்³த⁴கோட்டா²ஸம், ஆயதிம் அனவஸ்ஸவஸித்³த⁴ம் கம்மக்க²யம், ததோ வா து³க்க²க்க²யந்தி அத்தோ². ஸுத்³த⁴ந்தம் பத்தோ அத்தீ²தி புச்ச²தீதி இமினா அகுஸலானம் பஹானம், குஸலானம் பா⁴வனா ச ஸப்³பே³ன ஸப்³ப³ம் நிக³ண்ட²ஸமயே நத்தி² ஸப்³ப³ஸோ விஸுத்³தி⁴பா⁴வனாய அபா⁴வதோ, தஸ்மா குதோ து³க்க²க்க²யஸ்ஸ ஸம்ப⁴வோதி த³ஸ்ஸேதி.

ஏவம் அஜானனபா⁴வே ஸதீதி ‘‘அஹுவம்ஹேவ மய’’ந்திஆதி³னா வுத்தப்பகாரஸ்ஸ அஜானனே ஸதி, தஸ்மிம் தும்ஹேஹி அஞ்ஞாயமானேதி அத்தோ². லுத்³தா³தி கோ⁴ரா. தே பன யஸ்மா காயவாசாஹி நிஹீனமேவ கரோந்தி, தஸ்மா வுத்தம் ‘‘லுத்³தா³சாரா’’தி. லோஹிதபாணித்வேவ வுச்சதி தஜ்ஜாகிரியாசரணதோ. மாக³விககேவட்டசோரகா⁴தகாத³யோ மாக³விகாத³யோ. கக்க²ளகம்மாதி ப²ருஸகம்மா. தே நிக³ண்டே²ஸு பப்³ப³ஜந்தீதி புப்³பே³ மஹாது³க்க²ஸம்வத்தனியகம்மஸ்ஸ கதத்தா ஹி தும்ஹே ஏதரஹி ஈதி³ஸம் மஹாது³க்க²ம் பச்சனுப⁴வதா²தி த³ஸ்ஸேதி.

வாதே³தி தி³ட்டி²யம், ஸமயேதி அத்தோ². ஸுகே²ன ஸுக²ந்தி ஏத்த² ஸுகே²னாதி படிபத்திஸுகே²ன, ஸுகா²ய படிபத்தியாதி அத்தோ². ஸுக²ந்தி விமோக்க²ஸுக²ம், இத⁴ லோகே ஸுக²ம் அதி⁴க³ச்ச²ந்தா கஸிவணிஜ்ஜாதி³து³க்க²படிபத்தியாவ அதி⁴க³ச்ச²ந்தி, ஏவம் மோக்க²ஸுக²ம்பீதி அதி⁴ப்பாயோ. ஸரீராவயவஸம்பத்தியாபி பி³ம்பி³னோ ஸாரோதி பி³ம்பி³ஸாரோ. தே நிக³ண்டா²…பே… ஸந்தா⁴ய வத³ந்தி, ந பன ப⁴க³வதோ அச்சந்தஸந்தபணீதம் நிப்³பா³னஸுக²படிவேத³னம் ஜானந்தி. ஸஹஸாதி ரவா. அப்படிஸங்கா²தி ந படிஸங்கா²ய அவிசாரேத்வா. தேனாஹ ‘‘ஸாஹஸம் கத்வா’’திஆதி³.

அஞ்ஞாஹி வேத³னாஹி அவோமிஸ்ஸம் ஏகந்தம் ஸுக²ம் ஏகந்தஸுக²ம், தஸ்ஸ படிஸம்வேதீ³. தேனாஹ ‘‘நிரந்தரஸுக²படிஸம்வேதீ³’’தி. கதா²பதிட்டா²பனத்த²ந்தி ‘‘ஏகந்தஸுக²படிஸம்வேதீ³’’தி ஏவம் ஆரத்³த⁴கதா²ய பதிட்டா²பனத்த²ம். ராஜவாரேதி ராஜானம் உத்³தி³ஸ்ஸ ஆக³ததே³ஸனாவாரே. ஸுக²ம் புச்சி²தும் ஹோதீதி ‘‘யதி³ ஸத்த ரத்திந்தி³வானி நப்பஹோதி, கிம் ச² ரத்திந்தி³வானி பஹோதீ’’திஆதி³னா புச்ச²னஸுக²ம் ஹோதி. ‘‘அஹம் கோ²’’திஆதி³னா பவத்தோ ஸுத்³த⁴வாரோ ஸுத்³த⁴னிஸ்ஸந்த³ஸ்ஸ ப²லஸமாபத்திஸுக²ஸ்ஸ வஸேன ஆக³தத்தா. அனச்ச²ரியம் ஹோதி, ஸத்த ரத்திந்தி³வானி பஹோந்தஸ்ஸ ஏகஸ்மிம் ரத்திந்தி³வே கிம் வத்தப்³ப³ந்தி. உத்தானத்த²மேவ வுத்தனயத்தா ஸுவிஞ்ஞேய்யத்தா.

சூளது³க்க²க்க²ந்த⁴ஸுத்தவண்ணனாய லீனத்த²ப்பகாஸனா ஸமத்தா.