3. மஹாது³க்க²க்க²ந்த⁴ஸுத்தவண்ணனா

163. ததோ பரந்தி திண்ணம் ஜனானம் உபரி ஸங்கோ⁴ சதுவக்³க³கரணீயாதி³கம்மேஹி படிகம்மப்பத்தத்தா. கா³மம் க³தோதி வுச்சதி கா³மம் உத்³தி³ஸ்ஸ க³தத்தா, ஏவம் ஸாவத்தி²ம் பவிஸிதும் விஹாரதோ நிக்க²ந்தா ‘‘பவிஸிம்ஸூ’’தி வுத்தா. பரிஞ்ஞந்தி பஹானபரிஞ்ஞம். ஸா ஹி ஸமதிக்கமோ, ந இதரா. ரூபவேத³னாஸுபீதி ‘‘ரூபானம் பரிஞ்ஞம், வேத³னானம் பரிஞ்ஞ’’ந்தி ஏத்தா²பி. காமம் ஸப்³பே³ஸம் தித்தி²யானம் காமாதி³பரிஞ்ஞாபஞ்ஞாபனஹேதுபூ⁴தோ ஸமயோ நத்தி², யேஸம் பன அத்தி², தே உபாதா³ய ‘‘ஸகஸமயம் ஜானந்தா’’தி வுத்தம். ‘‘யதோ யதோ கோ² போ⁴ அயம் பி⁴க்கு² விவிச்சேவ காமேஹி…பே… பட²மம் ஜா²னம் உபஸம்பஜ்ஜ விஹரதி, ஏத்தாவதா கோ² போ⁴ காமானம் பரிஞ்ஞா ஹோதீ’’தி ஏவம் ஸரூபதோ பட²மஜ்ஜா²னம் விபா⁴வேதும் அஸக்கோந்தாபி கேவலம் அச்சந்தப்பஹானஸஞ்ஞாய காமானம் பரிஞ்ஞம் பஞ்ஞபேய்யும் பட²மஜ்ஜா²னம் வத³மானா. தம் கிஸ்ஸ ஹேது? தாதி³ஸஸ்ஸ ஆக³மாதி⁴க³மஸ்ஸாபா⁴வதோ. ரூபவேத³னாபரிஞ்ஞாஸுபி ஏஸேவ நயோ. வுச்சேதா²தி வுச்சேய்ய. து³தியபதே³பீதி ‘‘அனுஸாஸனியா வா அனுஸாஸனி’’ந்தி ஏவம் வுத்தவாக்யேபி. தே கிர பி⁴க்கூ².

165. ந சேவ ஸம்பாயிஸ்ஸந்தீதி ந சேவ ஸம்மதே³வ பகாரேஹி க³மேஸ்ஸந்தி ஞாபேஸ்ஸந்தி. தேனாஹ ‘‘ஸம்பாதே³த்வா கதே²தும் ந ஸக்கி²ஸ்ஸந்தீ’’தி. யஸ்மா அவிஸயே பஞ்ஹோ புச்சி²தோ ஹோதி, தஸ்மா ஆபஜ்ஜிஸ்ஸந்தீதி யோஜனா. ஸதே³வகேதி அரூபதே³வக்³க³ஹணம். தே ஹி லோகியதே³வேஹி தீ³கா⁴யுகதாதி³னா உக்கட்டா². ஸமாரகேதி காமாவசரதே³வக்³க³ஹணம். ஸப்³ரஹ்மகேதி ரூபாவசரப்³ரஹ்மக்³க³ஹணம். ஸஸ்ஸமணப்³ராஹ்மணியாதி ஏத்த² ஸமணக்³க³ஹணேன பப்³ப³ஜிதே, ப்³ராஹ்மணக்³க³ஹணேன ஜாதிப்³ராஹ்மணே, புன தே³வக்³க³ஹணேன ஸம்முதிதே³வே, மனுஸ்ஸக்³க³ஹணேன அவஸிட்ட²மனுஸ்ஸகாயம் பரியாதி³யதி. லோகபஜாக்³க³ஹணேன பன பயோஜனம் அட்ட²கதா²யம் த³ஸ்ஸிதமேவ. அஞ்ஞதா² ஆராத⁴னம் நாம நத்தீ²தி இமினா காமரூபவேத³னாஸு அஸ்ஸாதா³தீ³னம் யாதா²வதோ அவபோ³தோ⁴ ஏவ இதோ பா³ஹிரகானம் நத்தி², குதோ பவேத³னாதி த³ஸ்ஸேதி.

166. சித்தாராத⁴னந்தி யாதா²வபவேத³னேன பரேஸம் சித்தஸ்ஸ பரிதோஸனம். ப³ந்த⁴னட்டே²ன கு³ணாதி காமராக³ஸம்யோஜனஸ்ஸ பச்சயபா⁴வேன வத்து²காமேஸுபி ப³ந்த⁴னட்டோ² வுத்தோ, கோட்டா²ஸட்டோ² வா கு³ணட்டோ² த³ட்ட²ப்³போ³. தரயந்தீதி தரமானா யந்தி க³ச்ச²ந்தி. அதீதாதி³பி⁴ன்னபட²மாதி³வயா ஏவ சித்ததா ராஸிபா⁴வேன வயோகு³ணாதி க³ஹிதாதி ஆஹ ‘‘ராஸட்டோ² கு³ணட்டோ²’’தி. சக்கு²விஞ்ஞேய்யாதி வா சக்கு²விஞ்ஞாணதம்த்³வாரிகவிஞ்ஞாணேஹி விஜானிதப்³பா³. ஸோதவிஞ்ஞேய்யாதிஆதீ³ஸுபி ஏஸேவ நயோ. இட்டா²ரம்மணபூ⁴தாதி ஸபா⁴வேனேவ இட்டா²ரம்மணஜாதிகா, இட்டா²ரம்மணபா⁴வம் வா பத்தா. கமனீயாதி காமேதப்³பா³. மனவட்³ட⁴னகாதி மனோஹரா. ஏதேன பரிகப்பனதோபி இட்ட²பா⁴வம் க³ண்ஹாதி. பியஜாதிகாதி பியாயிதப்³ப³ஸபா⁴வா. காமூபஸம்ஹிதாதி காமராகே³ன உபேச்ச ஸந்தா⁴னியா ஸம்ப³த்³தா⁴ (அ. நி. டீ. 3.6.63) காதப்³பா³தி ஆஹ ‘‘ஆரம்மணம் கத்வா’’தி.

167. ஸஞ்ஞம் ட²பேத்வாதி ‘‘இமஸ்மிம் அங்கு³லிகாதி³பப்³பே³ க³ஹிதே ஸதம் ஹோதி, இமஸ்மிம் ஸஹஸ்ஸ’’ந்திஆதி³னா ஸஞ்ஞாணம் கத்வா க³ணனா. அச்சி²த்³த³க³ணனாதி ‘‘ஏகம் த்³வே’’திஆதி³னா நவந்தவிதி⁴னா நிரந்தரக³ணனா. பிண்ட³க³ணனாதி ஸங்கலனபடுப்பாத³னாதி³னா பிண்டி³த்வா க³ணனா. தேனாஹ ‘‘கே²த்தம் ஓலோகேத்வா’’திஆதி³. கஸனம் கஸீதி கஸிக்³க³ஹணேன ஸப்³போ³ கஸிபடிப³த்³தோ⁴ ஜீவிகூபாயோ க³ஹிதோதி ஆஹ ‘‘கஸீதி கஸிகம்ம’’ந்தி. ஜங்க⁴வணிஜ்ஜாதி ஜங்க⁴ஸத்த²வஸேன வணிஜ்ஜம் ஆஹ, த²லவணிஜ்ஜாதி ஸகடஸத்த²வஸேன. ஆதி³-ஸத்³தே³ன நாவாபணாதி³வஸேன வோஹாரம். வணிப்பதோ²தி வணிஜமக்³கோ³, தா³னக்³க³ஹணவஸேன ஸம்வோஹாரோதி அத்தோ². உஸூனம் அஸனகம்மம் இஸ்ஸத்தம், த⁴னுஸிப்பேன ஜீவிகா, இத⁴ பன இஸ்ஸத்தம் வியாதி இஸ்ஸத்தம், ஸப்³ப³ஆவுத⁴ஜீவிகாதி ஆஹ ‘‘ஆவுத⁴ம் க³ஹேத்வா உபட்டா²னகம்ம’’ந்தி. போரோஹிச்சாமச்சகம்மாதி³ ராஜகம்மம்.ஆதி³-ஸத்³தே³ன ரத²ஸிப்பக²த்தவிஜ்ஜாஸிப்பாதி³-வுத்தாவஸேஸம் மஹாஸிப்பம் கு²த்³த³கஸிப்பஞ்ச ஸங்க³ண்ஹாதி. ஸீதஸ்ஸ புரக்க²தோதி ஸீதஸ்ஸ புரதோ கதோ. யோ ஹி ஸீதகாலே ஜீவிகாஹேது ஸீதலபதே³ஸம் பக்க²ந்த³தி, ஸோ வாளமிகா³தீ³ஹி விய ஸீதேன பரிபாதியமானோ தேன புரதோ கதோ விய ஹோதி. தேனாஹ ‘‘ஸீதேன பா³தி⁴யமானோ’’தி. உண்ஹஸ்ஸ புரக்க²தோதி ஏத்தா²பி ஏஸேவ நயோ. ஸரித்வாதி ஸம்ஸப்பித்வா. க⁴ட்டியமானோதி ஹிம்ஸியமானோ பா³தி⁴யமானோ. ஆபா³த⁴னம் ஆபா³தோ⁴, பீளாதி அத்தோ². காமஹேதுந்தி வா பா⁴வனபும்ஸகனித்³தே³ஸோ யதா² ‘‘விஸமம் சந்தி³மஸூரியா பரிவத்தந்தீ’’தி (அ. நி. 4.70). ததா² ஸேஸபத³த்³வயேபி. தேனேவாஹ ‘‘காமானமேவ ஹேதூ’’தி. காமானம் ஹேதூதி ஏத்த² புரிமபதா³வதா⁴ரணமயுத்தம் தத³ஞ்ஞபச்சயபடிக்கே²பாபத்திதோ, ததா² உத்தரபதா³வதா⁴ரணம் காமானம் கதா³சி அஹேதுபா⁴வஸ்ஸபி ஸம்ப⁴வதோ, தஸ்மா ‘‘உப்பஜ்ஜதியேவா’’தி வுத்தம்.

உட்ட²ஹதோதி இமினா உட்டா²னவீரியம் வுத்தந்தி ஆஹ ‘‘ஆஜீவஸமுட்டா²பகவீரியேனா’’தி. தம் வீரியந்தி ஆஜீவிகஸமுட்டா²பகவீரியம். புப்³பே³னாபரம் க⁴டேந்தஸ்ஸாதி ஆரம்ப⁴தோ பட்டா²ய நிரந்தரம் பவத்தேந்தஸ்ஸ. சித்தே உப்பன்னப³லவஸோகேன ஸோசதீதி சித்தஸந்தாபேன அந்தோ நிஜ்ஜா²யதி. காயே உப்பன்னது³க்கே²னாதி தஸ்ஸேவ ஸோகஸ்ஸ வஸேன காயே உப்பன்னது³க்கே²ன. ஸோகுத்³தே³ஸேன தம் தம் விப்பலபேந்தோ வா பரிதே³வதி. உரம் தாளேத்வாதி வக்க²ப்பதே³ஸம் பஹரித்வா. ‘‘மோக⁴’’ந்திஆதி³ பரிதே³வனாகாரத³ஸ்ஸனஞ்சேவ ஸம்மோஹாபஜ்ஜனாகாரத³ஸ்ஸனஞ்ச. மேதி வத்வா புன நோதி புது²வசனம் அத்தனோ உப⁴யதா²பி வோஹரிதப்³ப³தோ, ப்³யாமூள்ஹவசனம் வா ஸோகவஸேன.

168. இத⁴ காமக்³க³ஹணேன விஸேஸதோ வத்து²காமா க³ஹிதாதி காமாதி³க்³க³ஹணம் கதம், நானந்தரியதாய பன கிலேஸகாமோபி க³ஹிதோ ஏவ. அஸிசம்மந்தி ஏத்த² சம்மக்³க³ஹணேன ந கேவலம் சம்மமயஸ்ஸ, சம்மபரிஸிப்³பி³தஸ்ஸேவ வா க³ஹணம், அத² கோ² ஸப்³ப³ஸ்ஸபி ஆவுத⁴பா³த⁴கஸ்ஸ க³ஹணந்தி த³ஸ்ஸேந்தோ ‘‘கே²டகப²லகாதீ³னீ’’தி ஆஹ. ஆதி³-ஸத்³தே³ன ஸராதி³ஸங்க³ஹோ. த⁴னுகலாபம் ஸன்னய்ஹித்வாதி த⁴னுஞ்சேவ கு²ரப்பதூணிஞ்ச ஸன்னய்ஹித்வா, த⁴னுத³ண்ட³ஸ்ஸ ஜியாய ததா²பா⁴வகரணாதி³பி (அ. நி. டீ. 3.5.76) த⁴னுனோ ஸன்னய்ஹனந்தி. த்³வின்னம் ஸேனானம் ப்³யூஹஸம்விதா⁴னேன வா உப⁴தோப்³யூள்ஹம். விஜ்ஜோதலந்தேஸூதி நிஸிதபீதப²லதாய விஜ்ஜோதனவஸேன பரிவத்தமானேஸு.

பாகாரஸமீபாதிஸங்கா²ரதாய பாகாரபாதா³ உபகாரியோ, யா ‘‘உத்³தா³பா’’தி வுச்சந்தி. ஸதத³ந்தேனாதி அனேகஸதத³ந்தகேன, யஸ்ஸ திகி²ணத³ந்தானி அனேகஸதானி மூலானி ஹோந்தி. அதிபா⁴ரதாய த³ஸவீஸமத்தாபி ஜனா உக்கி²பிதும் ந ஸக்கோந்தி, யந்தவஸேன பன உக்கி²பித்வா ப³ந்தி⁴த்வா ட²பேந்தி. தேனாஹ ‘‘அட்ட²த³ந்தாகாரேனா’’திஆதி³. ஓமத்³த³ந்தீதி ஓட்ட²பேந்தி.

169. ஸந்தி⁴ம்பி சி²ந்த³ந்தி சோரிகாய ஜீவிதுகாமா. நில்லோபந்தி நிஸ்ஸேஸவிலோபம், ஏகம் பரித்தம் கா³மம் பரிவாரேத்வா தத்த² கிஞ்சிபி க³ய்ஹூபக³ம் அஸேஸேத்வா கரமரக்³க³ஹணம். தேனாஹ ‘‘மஹாவிலோப’’ந்தி. பந்த²து³ஹனகம்மம் அடவிமக்³கே³ ட²த்வா அத்³தி⁴கானம் விலும்பனம். பஹாரஸாத⁴னத்த²ம் (அ. நி. டீ. 2.2.1) த³ண்ட³ப்பஹாரஸ்ஸ ஸுக²ஸித்³தி⁴அத்த²ம். கஞ்ஜிதோ நிப்³ப³த்தம் கஞ்ஜியம், ஆரனாலம். யம் ‘‘பி³லங்க³’’ந்திபி வுச்சதி, தம் யத்த² ஸிஞ்சதி, ஸா கஞ்ஜியஉக்க²லிகா. பி³லங்க³தா²லிகஸதி³ஸகரணம் பி³லங்க³தா²லியம். ஸீஸகபாலம் உப்பாடேத்வாதி அயோகு³ளபவேஸனப்பமாணம் சி²த்³த³ம் கத்வா. ஸங்க²முண்ட³கம்மகாரணந்தி ஸங்க²ம் விய முண்ட³கம்மகாரணம்.

ராஹுமுக²கம்மகாரணந்தி ராஹுமுக²க³த-ஸூரியஸதி³ஸ-கம்மகாரணம். ஜோதிமாலிகந்தி ஜோதிமாலவந்தம் கம்மகாரணம். ஹத்த²பஜ்ஜோதிகந்தி ஹத்த²பஜ்ஜோதனகம்மகாரணம். ஏரகவத்தகம்மகாரணந்தி ஏரகவத்தஸதி³ஸே ஸரீரதோ ப³த்³தே⁴ உப்பாடனகம்மகாரணம். சீரகவாஸிககம்மகாரணந்தி ஸரீரதோ உப்பாடிதப³த்³த⁴சீரகாஹி நிவாஸாபனகம்மகாரணம். தம் கரோந்தா யதா² கீ³வதோ பட்டா²ய ப³த்³தே⁴ கந்தித்வா கடியமேவ ட²பேந்தி, ஏவம் கோ³ப்ப²கதோ பட்டா²ய கந்தித்வா கடியமேவ ட²பேந்தி. அட்ட²கதா²யம் பன ‘‘கடிதோ பட்டா²ய கந்தித்வா கோ³ப்ப²கேஸு ட²பேந்தீ’’தி வுத்தம். ஏணேய்யககம்மகாரணந்தி ஏணீமிக³ஸதி³ஸகம்மகாரணம். அயவலயானி த³த்வாதி அயவலயானி படிமுஞ்சித்வா. அயஸூலானி கோட்டேந்தீதி கப்பரஜண்ணுககோடீஸு அயஸூலானி பவேஸேந்தி. ந்தி தம் ததா²கதகம்மகாரணம் ஸத்தம்.

ப³ளிஸமம்ஸிகந்தி ப³ளிஸேஹி மம்ஸுப்பாடனகம்மகாரணம். கஹாபணிகந்தி கஹாபணமத்தஸோ சி²ந்த³னகம்மகாரணம். கோட்டேந்தீதி சி²ந்த³ந்தி. கா²ராபதச்சி²கந்தி தச்சே²த்வா கா²ராவஸிஞ்சனகம்மகாரணம். பலிக⁴பரிவத்திகந்தி பலிக⁴ஸ்ஸ விய பரிவத்தனகம்மகாரணம். ஏகாப³த்³த⁴ம் கரோந்தி அயஸூலஸ்ஸ கோட்டனேன. பலாலபீட²கந்தி பலாலபீட²ஸ்ஸ விய ஸரீரஸ்ஸ ஸம்வேல்லனகம்மகாரணம். காரணிகாதி கா⁴தனகாரகா. பலாலவட்டிம் விய கத்வாதி யதா² பலாலபீட²ம் கரோந்தா பலாலவட்டிம் கத்வா ஸம்வேல்லனவஸேன நம் (அ. நி. டீ. 2.2.1) வேடே²ந்தி, ஏவம் கரோந்தீதி அத்தோ². சா²தகேஹீதி பு³பு⁴க்கி²தேஹி கோலேய்யகஸுனகே²ஹி. ப³லவந்தோ ஹி தே ஜவயோக்³கா³ ஸூரா ச ஹோந்தி. கம்மவஸேன ஸம்பரேதி ஏத்தா²தி ஸம்பராயோ, பரலோகோ. தத்த² ப⁴வோதி ஸம்பராயிகோ.

170. ச²ந்த³ராகோ³ வினீயதி சேவ பஹீயதி ச ஏத்தா²தி நிப்³பா³னம் ச²ந்த³ராக³வினயோ ச²ந்த³ராக³ப்பஹானஞ்சாதி. தேனாஹ ‘‘நிப்³பா³னஞ்ஹீ’’தி. தத்த² ஆக³ம்மாதி இத³ம் யோ ச²ந்த³ராக³ம் வினேதி பஜஹதி, தஸ்ஸ ஆரம்மணம் ஸந்தா⁴ய வுத்தம். தீஹி பரிஞ்ஞாஹீதி இமினா ஞாததீரணபரிஞ்ஞாஹி பரிஜானிஸ்ஸந்தீதி நேதம் டா²னம் விஜ்ஜதி. கோ பன வாதோ³ பஹானபரிஞ்ஞாயாதி த³ஸ்ஸேதி? தத²பா⁴வாயாதி பரிஜானனகபா⁴வாய.

171. அபரித்தேனாதி அஹீனேன. விபுலேனாதி மஹதா. யதி³ வண்ணஸம்பத்தித³ஸ்ஸனத்த²ம், வண்ணத³ஸகம் கஸ்மா ந க³ஹிதந்தி ஆஹ ‘‘மாதுகா³மஸ்ஸ ஹீ’’திஆதி³. போ⁴ஜனஸம்பதா³தீ³னம் அலாபே⁴பீதி த³ஸ்ஸனத்த²ம் ‘‘து³க்³க³தகுலே நிப்³ப³த்தஸ்ஸபீ’’தி வுத்தம். தோ²கம் தோ²கம் வண்ணாயதனம் பஸீத³தி மம்ஸஸ்ஸ பரிப்³ரூஹனதோ த²னமம்ஸானி வட்³ட⁴ந்தி ஜாயந்தி. வண்ணேதி ஹத³யங்க³தபா⁴வம் பகாஸேந்தோ விய ஹோதீதி வண்ணோ. ஸோ ஏவ ஸாமக்³கோ³பபோ⁴கா³தி³னா நிபா⁴தீதி நிபா⁴. தேனாஹ ‘‘வண்ணனிபா⁴தி வண்ணோயேவா’’தி.

போ⁴க்³க³ந்தி அதிவிய வங்கதாய போ⁴க்³க³ம். தாதி³ஸம் பன ஸரீரம் ப⁴க்³க³ம் விய ஹோதீதி ஆஹ ‘‘ப⁴க்³க³’’ந்தி. தேனாஹ ‘‘இமினாபிஸ்ஸ வங்கபா⁴வமேவ தீ³பேதீ’’தி. த³ந்தானம் சி²ன்னபி⁴ன்னதாய ஏகச்சானம் பதனேன ச க²ண்டி³தத³ந்தம். கேஸானம் ஸேதவண்ணதாய பலிதந்தி ஆஹ ‘‘பண்ட³ரகேஸ’’ந்தி. கேஸானம் மத்தஸோ ஸியனே க²ல்லாடவோஹாரோதி ப³ஹுஸோ ஸியனம் ஸந்தா⁴யாஹ ‘‘மஹாக²ல்லாடஸீஸ’’ந்தி. வஸ்ஸஸதிககாலே உப்பஜ்ஜனதிலகானி ஸந்தா⁴யாஹ ‘‘திலகாஹதக³த்த’’ந்தி. தானி பன கானிசி ஸேதானி ஹோந்தி கானிசி காளானீதி ஆஹ ‘‘ஸேதகாளதிலகேஹீ’’தி. ப்³யாதி⁴கந்தி ஸஞ்சாதப்³யாதி⁴ம். பா³ள்ஹகி³லானந்தி மாரணந்தி ககே³லஞ்ஞேன கி³லானம்.

173. தஸ்மிம் ஸமயேதி தஸ்மிம் ஜா²னம் உபஸம்பஜ்ஜ விஹரணஸமயே. ந சேதேதீதி ந அபி⁴ஸந்த³ஹதி. ப்³யாபா³த⁴னட்டே²ன ப்³யாபா³தோ⁴, ப்³யாபா³தோ⁴வ ப்³யாப³ஜ்ஜ²ம், நத்தி² ஏத்த² ப்³யாப³ஜ்ஜ²ந்தி அப்³யாப³ஜ்ஜ²ம், து³க்க²ரஹிதம். தேனாஹ ‘‘நித்³து³க்க²மேவா’’தி.

174. அனிச்சாதி³ஆகாரோதி அனிச்சாகாரோ து³க்கா²காரோ விபரிணாமாகாரோ சலாதி³ஆகாரோ ச.

மஹாது³க்க²க்க²ந்த⁴ஸுத்தவண்ணனாய லீனத்த²ப்பகாஸனா ஸமத்தா.