6. ஆகங்கே²ய்யஸுத்தவண்ணனா

64. ஸம்பன்னந்தி பரிபுண்ணம், ஸமந்ததோ பன்னம் பத்தந்தி ஸம்பன்னம். தேனாஹ ‘‘இத³ம் பரிபுண்ணஸம்பன்னம் நாமா’’தி. நந்தி ‘‘ஸுவா’’தி வுத்தம் ஸுவக³ணம். ஸம்பன்னோதி ஸம்மதே³வ பன்னோ க³தோ உபக³தோ. தேனாஹ ‘‘ஸமன்னாக³தோ’’தி. ஸம்பன்னந்தி ஸம்பத்தியுத்தம். ஸா பனேத்த² ரஸஸம்பத்தி அதி⁴ப்பேதா ஸாமஞ்ஞஜோதனாய விஸேஸே அவட்டா²னதோ. தேனாஹ ‘‘ஸேய்யதா²பி கு²த்³த³மது⁴ம் அனேளக’’ந்தி, நித்³தோ³ஸந்தி அத்தோ². தேன வுத்தம் ‘‘இத³ம் மது⁴ரஸம்பன்னம் நாமா’’தி. ஸீலஸ்ஸ அனவஸேஸஸமாதா³னேன அக²ண்டா³தி³பா⁴வாபத்தியா ச பரிபுண்ணஸீலா. ஸமாதா³னதோ பட்டா²ய அச்சி²ந்த³னதோ ஸீலஸமங்கி³னோ. ஸமாதா³னதோ ஹி அச்சந்தவிரோதி⁴த⁴ம்மானுப்பத்தியா ஸீலஸமங்கி³தா வேதி³தப்³பா³, சேதனாதீ³னம் பன ஸீலனலக்க²ணானம் த⁴ம்மானம் பவத்திக்க²ணே வத்தப்³ப³மேவ நத்தி². விஸுத்³தி⁴மக்³கே³ (விஸுத்³தி⁴. 1.9) வுத்தா, தஸ்மா தத்த² வுத்தனயேனேவ வித்தா²ரகதா² வேதி³தப்³பா³தி அதி⁴ப்பாயோ.

கே²த்தபாரிபூரீதி நிஸ்ஸிதபாரிபூரியா நிஸ்ஸயபாரிபூரிமாஹ நிஸ்ஸிதகம்மவிபத்திஸம்பத்திவிஸயத்தா யதா² ‘‘மஞ்சா உக்குட்டி²ம் கரோந்தீ’’தி. ததா² ஹி கே²த்தேன க²ண்ட³பூதிஆதி³தோ³ஸோ வுத்தோ. கே²த்தம் க²ண்ட³ம் ஹோதீதி அபரிபூரம் ஹோதி ஸஸ்ஸபாரிபூரியா அபா⁴வதோ. தேனேவாஹ ‘‘ஸஸ்ஸம் ந உட்டே²தீ’’தி. பாத³மத்தஸ்ஸபி அனேகம்ப³ணப²லனதோ மஹப்ப²லம் ஹோதி. கிஸலயபலாலாதி³ப³ஹுதாய மஹானிஸம்ஸம். ஏவமேவந்தி யதா² கி²த்தம் பீ³ஜம் க²ண்டா³தி³சதுதோ³ஸவஸேன அபரிபுண்ணம் ஹோதி, தத³பா⁴வேன ச பரிபுண்ணம், ஏவம் ஸீலம் க²ண்டா³தி³சதுதோ³ஸவஸேன அபரிபுண்ணம் ஹோதி, தத³பா⁴வேன ச பரிபுண்ணந்தி, சதுதோ³ஸதத³பா⁴வஸாமஞ்ஞமேவ நித³ஸ்ஸனனித³ஸ்ஸிதப்³ப³விபத்திஸம்பத்தீஸு த³ஸ்ஸேதி. மஹப்ப²லம் ஹோதி விபாகப²லேன. மஹானிஸம்ஸந்தி விபுலானிஸம்ஸம். ஸ்வாயம் ஆனிஸம்ஸோ இத⁴ பாளியம் நானப்பகாரேன வித்தா²ரீயதி.

ஏத்தாவதா கிராதி (அ. நி. டீ. 2.2.37; அ. நி. டீ. 3.10.71-74) கிர-ஸத்³தோ³ அருசிஸூசனத்தோ². தேனேத்த² ஆசரியவாத³ஸ்ஸ அத்தனோ அருச்சனபா⁴வம் தீ³பேதி. ஸம்பன்னஸீலாதி அனாமட்ட²விஸேஸம் ஸாமஞ்ஞதோ ஸீலஸங்கே²பேன க³ஹிதம். தஞ்ச சதுப்³பி³த⁴ந்தி ஆசரியத்தே²ரோ ‘‘சதுபாரிஸுத்³தி⁴ஸீலம் உத்³தி³ஸித்வா’’தி ஆஹ. தத்தா²தி சதுபாரிஸுத்³தி⁴ஸீலே. ஜேட்ட²கஸீலந்தி (ஸம். நி. டீ. 3.5.412) பதா⁴னஸீலம். உப⁴யத்தா²தி உத்³தே³ஸனித்³தே³ஸே. இத⁴ நித்³தே³ஸே விய உத்³தே³ஸேபி பாதிமோக்க²ஸம்வரோ ப⁴க³வதா வுத்தோ ‘‘ஸம்பன்னஸீலா’’தி வுத்தத்தாதி அதி⁴ப்பாயோ. ஸீலக்³க³ஹணஞ்ஹி பாளியம் பாதிமோக்க²ஸம்வரவஸேன ஆக³தம். தேனாஹ ‘‘பாதிமோக்க²ஸம்வரோயேவா’’திஆதி³. தத்த² அவதா⁴ரணேன இதரேஸம் திண்ணம் ஏகதே³ஸேன பாதிமோக்க²ந்தோக³த⁴பா⁴வம் தீ³பேதி. ததா² ஹி அனோலோகியோலோகனே ஆஜீவஹேது ச²ஸிக்கா²பத³வீதிக்கமே கி³லானபச்சயஸ்ஸ அபச்சவேக்கி²தபரிபோ⁴கே³ ச ஆபத்தி விஹிதாதி. தீணீதி இந்த்³ரியஸம்வரஸீலாதீ³னி. ஸீலந்தி வுத்தட்டா²னம் நாம அத்தீ²தி ஸீலபரியாயேன தேஸம் கத்த²சி ஸுத்தே க³ஹிதட்டா²னம் நாம கிம் அத்தி² யதா² பாதிமோக்க²ஸம்வரோதி ஆசரியஸ்ஸ ஸம்முக²த்தா அபடிக்கி²பந்தோவ உபசாரேன புச்ச²ந்தோ விய வத³தி. தேனாஹ ‘‘அனனுஜானந்தோ’’தி. ச²த்³வாரரக்கா²மத்தகமேவாதி தஸ்ஸ ஸல்லஹுகபா⁴வமாஹ சித்தாதி⁴ட்டா²னமத்தேன படிபாகதிகபா⁴வாபத்திதோ. இதரத்³வயேபி ஏஸேவ நயோ. பச்சயுப்பத்திமத்தகந்தி ப²லேன ஹேதும் த³ஸ்ஸேதி. உப்பாத³னஹேதுகா ஹி பச்சயானம் உப்பத்தி. இத³மத்த²ந்தி இத³ம் பயோஜனம் இமஸ்ஸ பச்சயஸ்ஸ பரிபு⁴ஞ்ஜனேதி அதி⁴ப்பாயோ. நிப்பரியாயேனாதி இமினா இந்த்³ரியஸம்வராதீ³னி தீணி பதா⁴னஸ்ஸ ஸீலஸ்ஸ பரிவாரவஸேன பவத்தியா பரியாயஸீலானி நாமாதி த³ஸ்ஸேதி.

இதா³னி பாதிமோக்க²ஸம்வரஸ்ஸேவ பதா⁴னபா⁴வம் ப்³யதிரேகதோ அன்வயதோ ச உபமாய விபா⁴வேதும் ‘‘யஸ்ஸா’’திஆதி³மாஹ. தத்த² ஸோதி பாதிமோக்க²ஸம்வரோ. ஸேஸானீதி இந்த்³ரியஸம்வராதீ³னி. தஸ்ஸேவாதி ‘‘ஸம்பன்னஸீலா’’தி ஏத்த² யம் ஸீலம் வுத்தம், தஸ்ஸேவ. ஸம்பன்னபாதிமோக்கா²தி ஏத்த² பாதிமோக்க²க்³க³ஹணேன வேவசனம் வத்வா தம் வித்தா²ரேத்வா…பே… ஆதி³மாஹ. யதா² அஞ்ஞதா²பி ‘‘இத⁴ பி⁴க்கு² ஸீலவா ஹோதீ’’தி (மஹானி. 199) புக்³க³லாதி⁴ட்டா²னாய தே³ஸனாய உத்³தி³ட்ட²ம் ஸீலம் ‘‘பாதிமோக்க²ஸம்வரஸம்வுதோ விஹரதீ’’தி (விப⁴. 508; மஹானி. 199) நித்³தி³ட்ட²ம்.

பாதிமோக்க²ஸம்வரஸம்வுதாதி யோ நம் பாதி ரக்க²தி, தம் மோக்கே²தி மோசேதி ஆபாயிகாதீ³ஹி து³க்கே²ஹீதி ‘‘பாதிமோக்க²’’ந்தி லத்³த⁴னாமேன ஸிக்கா²பத³ஸீலேன பிஹிதகாயவசீத்³வாரா. தே பன யஸ்மா ஏவம்பூ⁴தா தேன ஸமன்னாக³தா நாம ஹோந்தி, தஸ்மா வுத்தம் ‘‘பாதிமோக்க²ஸம்வரேன ஸமன்னாக³தா’’தி.

அபரோ நயோ (உதா³. அட்ட². 31; இதிவு. அட்ட². 97) – கிலேஸானம் ப³லவபா⁴வதோ, பாபகிரியாய ஸுகரபா⁴வதோ, புஞ்ஞகிரியாய ச து³க்கரபா⁴வதோ ப³ஹுக்க²த்தும் அபாயேஸு பதனஸீலோதி பாதீ, புது²ஜ்ஜனோ. அனிச்சதாய வா ப⁴வாதீ³ஸு கம்மவேக³க்கி²த்தோ க⁴டீயந்தம் விய அனவட்டா²னேன பரிப்³ப⁴மனதோ க³மனஸீலோதி பாதீ, மரணவஸேன வா தம்ஹி தம்ஹி ஸத்தனிகாயே அத்தபா⁴வஸ்ஸ பாதனஸீலோதி பாதீ, ஸத்தஸந்தானோ, சித்தமேவ வா, தம் பாதிம் ஸம்ஸாரது³க்க²தோ மோக்கே²தீதி பாதிமோக்க²ம். சித்தஸ்ஸ ஹி விமோக்கே²ன ஸத்தோ விமுத்தோதி வுச்சதி. வுத்தஞ்ஹி ‘‘சித்தவோதா³னா விஸுஜ்ஜ²ந்தீ’’தி, ‘‘அனுபாதா³ய ஆஸவேஹி சித்தம் விமுத்த’’ந்தி (மஹாவ. 28) ச.

அத² வா அவிஜ்ஜாதி³னா ஹேதுனா ஸம்ஸாரே பததி க³ச்ச²தி பவத்ததீதி பாதீ. ‘‘அவிஜ்ஜானீவரணானம் ஸத்தானம் தண்ஹாஸம்யோஜனானம் ஸந்தா⁴வதம் ஸம்ஸரத’’ந்தி (ஸம். நி. 2.125) ஹி வுத்தம். தஸ்ஸ பாதினோ ஸத்தஸ்ஸ தண்ஹாதி³ஸம்கிலேஸத்தயதோ மோக்கோ² ஏதேனாதி பாதிமோக்கோ². ‘‘கண்டே²காலோ’’திஆதீ³னம் விய ஸமாஸஸித்³தி⁴ வேதி³தப்³பா³.

அத² வா பாதேதி வினிபாதேதி து³க்கே²தி பாதி, சித்தம். வுத்தஞ்ஹி ‘‘சித்தேன நீயதி லோகோ, சித்தேன பரிகஸ்ஸதீ’’தி (ஸம். நி. 1.62). தஸ்ஸ பாதினோ மோக்கோ² ஏதேனாதி பாதிமோக்கோ². பததி வா ஏதேன அபாயது³க்கே² ஸம்ஸாரது³க்கே² சாதி பாதீ, தண்ஹாதி³ஸம்கிலேஸோ. வுத்தஞ்ஹி ‘‘தண்ஹா ஜனேதி புரிஸம் (ஸம். நி. 1.57), தண்ஹாது³தியோ புரிஸோ’’தி (இதிவு. 15, 105; அ. நி. 4.9) ச ஆதி³. ததோ பாதிதோ மோக்கோ²தி பாதிமோக்கோ².

அத² வா பததி ஏத்தா²தி பாதீ, ச² அஜ்ஜ²த்திகபா³ஹிரானி ஆயதனானி. வுத்தஞ்ஹி ‘‘ச²ஸு லோகோ ஸமுப்பன்னோ, ச²ஸு குப்³ப³தி ஸந்த²வ’’ந்தி (ஸம். நி. 1.70; ஸு. நி. 171). ததோ அஜ்ஜ²த்திகபா³ஹிராயதனஸங்கா²ததோ பாதிதோ மோக்கோ²தி பாதிமோக்கோ². அத² வா பாதோ வினிபாதோ அஸ்ஸ அத்தீ²தி பாதீ, ஸம்ஸாரோ. ததோ மோக்கோ²தி பாதிமோக்கோ². அத² வா ஸப்³ப³லோகாதி⁴பதிபா⁴வதோ த⁴ம்மிஸ்ஸரோ ப⁴க³வா ‘‘பதீ’’தி வுச்சதி, முச்சதி ஏதேனாதி மோக்கோ², பதினோ மோக்கோ² தேன பஞ்ஞத்தத்தாதி பாதிமோக்கோ². பாதிமோக்கோ² ஏவ பாதிமோக்கோ². ஸப்³ப³கு³ணானம் வா மூலபா⁴வதோ உத்தமட்டே²ன பதி ச ஸோ யதா²வுத்தத்தே²ன மோக்கோ² சாதி பாதிமோக்கோ². பாதிமோக்கோ² ஏவ பாதிமோக்கோ². ததா² ஹி வுத்தம் ‘‘பாதிமோக்க²ந்திஆதி³மேதம் முக²மேதம் பமுக²மேத’’ந்தி (மஹாவ. 135) வித்தா²ரோ.

அத² வா ப-இதி பகாரே, அதீதி அச்சந்தத்தே² நிபாதோ, தஸ்மா பகாரேஹி அச்சந்தம் மோக்கே²தீதி பாதிமோக்கோ². இத³ஞ்ஹி ஸீலம் ஸயம் தத³ங்க³வஸேன, ஸமாதி⁴ஸஹிதம் பஞ்ஞாஸஹிதஞ்ச விக்க²ம்ப⁴னவஸேன, ஸமுச்சே²த³வஸேன ச அச்சந்தம் மோக்கே²தி மோசேதீதி பாதிமோக்கோ². பதி பதி மோக்கோ²தி வா பாதிமோக்கோ², தம்ஹா தம்ஹா வீதிக்கமதோ³ஸதோ பச்சேகம் மோக்கோ²தி அத்தோ². பாதிமோக்கோ² ஏவ பாதிமோக்கோ². மோக்கோ² வா நிப்³பா³னம், தஸ்ஸ மோக்க²ஸ்ஸ பதிபி³ம்ப³பூ⁴தோதி பாதிமோக்கோ². ஸீலஸம்வரோ ஹி நிப்³பே³த⁴பா⁴கி³யோ ஸூரியஸ்ஸ அருணுக்³க³மனம் விய நிப்³பா³னஸ்ஸ உத³யபூ⁴தோ தப்படிபா⁴கோ³ விய ஹோதி யதா²ரஹம் கிலேஸனிப்³பா³பனதோதி பாதிமோக்கோ². பாதிமோக்கோ²யேவ பாதிமோக்கோ². அத² வா மோக்க²ம் பதி வத்ததி மோக்கா²பி⁴முக²ந்தி வா பாதிமோக்க²ம். பாதிமோக்க²மேவ பாதிமோக்க²ந்தி ஏவமேத்த² பாதிமோக்க²ஸத்³த³ஸ்ஸ அத்தோ² வேதி³தப்³போ³.

ஆசாரகோ³சரஸம்பன்னாதி காயிகவாசஸிகஅவீதிக்கமஸங்கா²தேன ஆசாரேன சேவ நவேஸியகோ³சரதாதி³ஸங்கா²தேன கோ³சரேன ச ஸம்பன்னா, ஸம்பன்னஆசாரகோ³சராதி அத்தோ². அப்பமத்தேஸூதி அதிபரித்தகேஸு அனாபத்திக³மனீயேஸு, து³க்கடது³ப்³பா⁴ஸிதமத்தேஸூதி அபரே. வஜ்ஜேஸூதி கா³ரய்ஹேஸு. தே பன ஏகந்ததோ அகுஸலஸபா⁴வா ஹோந்தீதி ஆஹ ‘‘அகுஸலத⁴ம்மேஸூ’’தி. ப⁴யத³ஸ்ஸினோதி ப⁴யதோ த³ஸ்ஸனஸீலா, பரமாணுமத்தம்பி வஜ்ஜம் ஸினேருப்பமாணம் விய கத்வா பா⁴யனஸீலா. ஸம்மா ஆதி³யித்வாதி ஸம்மதே³வ ஸக்கச்சம் ஸப்³ப³ஸோ ச ஆதி³யித்வா. ஸிக்கா²பதே³ஸூதி நித்³தா⁴ரணே பு⁴ம்மந்தி ஸமுதா³யதோ அவயவனித்³தா⁴ரணம் த³ஸ்ஸேந்தோ ‘‘ஸிக்கா²பதே³ஸு தம் தம் ஸிக்கா²பத³ம் ஸமாதி³யித்வா ஸிக்க²தா²’’தி அத்த²மாஹ. ஸிக்கா²பத³மேவ ஹி ஸமாதா³தப்³ப³ம் ஸிக்கி²தப்³ப³ஞ்சாதி அதி⁴ப்பாயோ. யம் கிஞ்சி ஸிக்கா²கோட்டா²ஸேஸூதி ஸிக்கா²கோட்டா²ஸேஸு மூலபஞ்ஞத்திஅனுபஞ்ஞதிஸப்³ப³த்த²பஞ்ஞத்திபதே³ஸபஞ்ஞத்திஆதி³பே⁴த³ம் யம் கிஞ்சி ஸிக்கி²தப்³ப³ம் படிபஜ்ஜிதப்³ப³ம் பூரேதப்³ப³ம் ஸீலம். தம் பன த்³வாரவஸேன து³வித⁴மேவாதி ஆஹ ‘‘காயிகம் வாசஸிகஞ்சா’’தி. இமஸ்மிம் அத்த²விகப்பே ஸிக்கா²பதே³ஸூதி ஆதா⁴ரே பு⁴ம்மம் ஸிக்கா²பா⁴கே³ஸு கஸ்ஸசி விஸும் அக்³க³ஹணதோ. தேனாஹ ‘‘தம் ஸப்³ப³’’ந்தி.

65. கஸ்மா ஆரத்³த⁴ந்தி (அ. நி. டீ. 3.10.71-74) தே³ஸனாய காரணபுச்சா². ஸீலானிஸம்ஸத³ஸ்ஸனத்த²ந்தி பயோஜனனித்³தே³ஸோ. கோ அத்தோ² க்வ அத்தோ² க்வ நிபாதிதாதி? நயித³மேவம் த³ட்ட²ப்³ப³ம். ஸீலானிஸம்ஸத³ஸ்ஸனத்த²ந்தி ஹி ஏத்த² ப்³யதிரேகதோ யம் ஸீலானிஸம்ஸஸ்ஸ அத³ஸ்ஸனம், தம் இமிஸ்ஸா தே³ஸனாய காரணந்தி கஸ்மா ஆரத்³த⁴ந்தி வினேய்யானம் ஸீலானிஸம்ஸஸ்ஸ அத³ஸ்ஸனதோதி அத்த²தோ ஆபன்னோ ஏவ ஹோதீதி. தேனாஹ ‘‘ஸசேபீ’’திஆதி³. ஸீலானிஸம்ஸத³ஸ்ஸனத்த²ந்தி பன இமஸ்ஸ அத்த²ம் விவரிதும் ‘‘தேஸ’’ந்திஆதி³ வுத்தம். ஆனிஸம்ஸோதி உத³யோ. ‘‘ஸீலவா ஸீலஸம்பன்னோ காயஸ்ஸ பே⁴தா³ பரம் மரணா ஸுக³திம் ஸக்³க³லோகம் உபபஜ்ஜதீ’’திஆதீ³ஸு (தீ³. நி. 2.150; 3.316; அ. நி. 5.213; மஹாவ. 285) பன விபாகப²லம்பி ‘‘ஆனிஸம்ஸோ’’தி வுத்தம். கோ விஸேஸோதி கோ ப²லவிஸேஸோ. கா வட்³டீ⁴தி கோ அப்³பு⁴த³யோ. விஜ்ஜமானோபி கு³ணோ யாதா²வதோ விபா⁴விதோ ஏவ அபி⁴ருசிம் உப்பாதே³தி, ந அவிபா⁴விதோ, தஸ்மா ஏகந்ததோ ஆனிஸம்ஸகித்தனம் இச்சி²தப்³ப³மேவாதி த³ஸ்ஸேதும் விஸகண்டகவாணிஜோ உதா³ஹடோ.

தத்த² கு³ளோ நாம உச்சு²ரஸம் பசித்வா சுண்ணாதீ³ஹி மிஸ்ஸித்வா ஸம்பிண்ட³னே பிண்டீ³பூ⁴தம். பா²ணிதம் அபிண்டி³தம் த்³ரவீபூ⁴தம். க²ண்ட³ம் பி⁴ஜ்ஜனக்க²மம். ஸக்க²ரா நாம ப²லிகஸதி³ஸா. ஸக்க²ராதீ³னிதி ஆதி³-ஸத்³தே³ன மச்ச²ண்டி³கானம் ஸங்க³ஹோ. தஸ்மிம் காலே கு³ளாதீ³ஸு விஸகண்டகவோஹாரோ அபச்சந்ததே³ஸே பசுரோதி ‘‘பச்சந்தகா³மம் க³ந்த்வா’’தி வுத்தம். தா³ரகே ச பலாபேஸும் ‘‘விஸகண்டகம் மா க³ண்ஹந்தூ’’தி.

பியோதி பியாயிதப்³போ³. பியஸ்ஸ நாம த³ஸ்ஸனம் ஏகந்ததோ அபி⁴னந்தி³தப்³ப³ம் ஹோதீதி ஆஹ ‘‘வியசக்கூ²ஹி ஸம்பஸ்ஸிதப்³போ³’’தி. பீதிஸமுட்டா²னபஸன்னஸோம்மரூபபரிக்³க³ஹஞ்ஹி சக்கு² ‘‘பியசக்கூ²’’தி வுச்சதி. தேஸந்தி ஸப்³ரஹ்மசாரீனம். மனவட்³ட⁴னகோதி பீதிமனஸ்ஸ பரிப்³ரூஹனதோ உபரூபரி பீதிசித்தஸ்ஸ உப்பாத³கோ. க³ருட்டா²னியோதி க³ருகரணஸ்ஸ டா²னபூ⁴தோ. ஜானம் ஜானாதீதி ஞாணேன ஜானிதப்³ப³ம் ஜானாதி. யதா² வா அஞ்ஞே அஜானந்தாபி ஜானந்தா விய பவத்தந்தி, ந ஏவமயம், அயம் பன ஜானந்தோ ஏவ ஜானாதி. பஸ்ஸம் பஸ்ஸதீதி த³ஸ்ஸனபூ⁴தேன பஞ்ஞாசக்கு²னா பஸ்ஸிதப்³ப³ம் பஸ்ஸதி, பஸ்ஸந்தோ ஏவ வா பஸ்ஸதி. ஏவம் ஸம்பா⁴வனீயோதி ஏவம் விஞ்ஞுதாய பண்டி³தபா⁴வேன ஸம்பா⁴வேதப்³போ³.

ஸீலேஸ்வேவஸ்ஸ பரிபூரகாரீதி ஸீலேஸு பரிபூரகாரீ ஏவ ப⁴வேய்யாதி ஏவம் உத்தரபதா³வதா⁴ரணம் த³ட்ட²ப்³ப³ம். ஏவஞ்ஹி இமினா பதே³ன உபரிஸிக்கா²த்³வயம் அனிவத்திதமேவ ஹோதி. யதா² பன ஸீலேஸு பரிபூரகாரீ நாம ஹோதி, தம் ப²லேன த³ஸ்ஸேதும் ‘‘அஜ்ஜ²த்த’’ந்திஆதி³ வுத்தம். விபஸ்ஸனாதி⁴ட்டா²னஸமாதி⁴ஸம்வத்தனிகதாய ஹி இத⁴ ஸீலஸ்ஸ பாரிபூரீ, ந கேவலம் அக²ண்டா³தி³பா⁴வமத்தம். தேனாஹ ‘‘யானி கோ² பன தானி அக²ண்டா³னி…பே… ஸமாதி⁴ஸம்வத்தனிகானீ’’தி. ஏவஞ்ச கத்வா உபரி ஸிக்கா²த்³வயம் ஸீலஸ்ஸ ஸம்பா⁴ரபா⁴வேன க³ஹிதந்தி ஸீலஸ்ஸேவேத்த² பதா⁴னக்³க³ஹணம் ஸித்³த⁴ம் ஹோதி. ததா² ஹி சித்தேகக்³க³தாஸங்கா²ரபரிக்³க³ஹானம் ஸீலஸ்ஸானுரக்க²ணபா⁴வம் வக்க²தி. யம் பன வக்க²தி ‘‘ஸிக்க²த்தயதே³ஸனா ஜாதா’’தி (ம. நி. அட்ட². 1.65), தம் இதராஸம்பி ஸிக்கா²னம் இத⁴ க³ஹிததாமத்தம் ஸந்தா⁴ய வுத்தம், ந பதா⁴னபா⁴வேன க³ஹிததம். யதி³ ஏவம் கத²ம் ஸீலஸ்ஸ அப்பமத்தகதாவசனம். வுத்தஞ்ஹேதம் ‘‘அப்பமத்தகம் கோ² பனேதம், பி⁴க்க²வே, ஓரமத்தக’’ந்தி (தீ³. நி. 1.7). தம் புது²ஜ்ஜனகோ³சரம் ஸந்தா⁴ய வுத்தம். ததா² ஹி தத்த² ந நிப்பதே³ஸதோ ஸீலம் விப⁴த்தம், ஏவம் கத்வா தத்த² ஸீலமத்தகந்தி மத்தக்³க³ஹணம் ஸமத்தி²தந்தி த³ட்ட²ப்³ப³ம். அனூனேனாதி அக²ண்டா³தி³பா⁴வேன, கஸ்ஸசி வா அஹாபனேன உபபன்னேன. ஆகாரேனாதி கரணேன ஸம்பாத³னேன. சித்தஸமதே²தி சித்தஸமாதா⁴னே. யுத்தோதி அவியுத்தோ பஸுதோ. யோ ஸப்³பே³ன ஸப்³ப³ம் ஜா²னபா⁴வனம் அனனுயுத்தோ, ஸோ தம் ப³ஹி நீஹரதி நாம. யோ ஆரபி⁴த்வா அந்தரா ஸங்கோசம் ஆபஜ்ஜதி, ஸோ தம் வினாஸேதி நாம. யோ பன ஈதி³ஸோ அஹுத்வா ஜா²னம் உபஸம்பஜ்ஜ விஹரதி, ஸோ அனிராகதஜ்ஜா²னோதி த³ஸ்ஸேந்தோ ‘‘ப³ஹி அனீஹடஜ்ஜா²னோ’’திஆதி³மாஹ.

அனிச்சஸ்ஸ தேபூ⁴மகத⁴ம்மஸ்ஸ, அனிச்சந்தி வா அனுபஸ்ஸனா அனிச்சானுபஸ்ஸனா. ததா² து³க்கா²னுபஸ்ஸனா அனத்தானுபஸ்ஸனா ச. தஸ்ஸேவ நிப்³பி³ந்த³னாகாரேன பவத்தா அனுபஸ்ஸனா நிப்³பி³தா³னுபஸ்ஸனா. விரஜ்ஜனாகாரேன பவத்தா அனுபஸ்ஸனா விராகா³னுபஸ்ஸனா. நிரோத⁴ஸ்ஸ அனுபஸ்ஸனா நிரோதா⁴னுபஸ்ஸனா. படினிஸ்ஸஜ்ஜனவஸேன பவத்தா அனுபஸ்ஸனா படினிஸ்ஸக்³கா³னுபஸ்ஸனா. ஸுஞ்ஞாகா³ரக³தோ பி⁴க்கு² தத்த² லத்³த⁴காயவிவேகதாய ஸமத²விபஸ்ஸனாவஸேன சித்தவிவேகம் பரிப்³ரூஹேந்தோ யதா²னுஸிட்ட²ம் படிபத்தியா லோகம் ஸாஸனஞ்ச அத்தனோ விஸேஸாதி⁴க³மட்டா²னபூ⁴தம் ஸுஞ்ஞாகா³ரஞ்ச உபஸோப⁴யமானோ கு³ணவிஸேஸாதி⁴ட்டா²னபா⁴வாபாத³னேன விஞ்ஞூனம் அத்த²தோ தம் ப்³ரூஹேந்தோ நாம ஹோதீதி வுத்தம் ‘‘ப்³ரூஹேதா ஸுஞ்ஞாகா³ரான’’ந்தி. தேனாஹ ‘‘ஏத்த² சா’’திஆதி³. அயமேவ ஸுஞ்ஞாகா³ரானுப்³ரூஹனவிஞ்ஞுப்பஸத்தா²னம் பா⁴ஜனம், ந ஸேனாஸனபதிட்டா²பனந்தி த³ஸ்ஸேந்தோ ஆஹ ‘‘ஏகபூ⁴மகாதி³…பே… த³ட்ட²ப்³போ³’’தி. ஸுஞ்ஞாகா³ரக்³க³ஹணேன சேத்த² அரஞ்ஞருக்க²மூலாதி³ ஸப்³ப³ம் பதா⁴னானுயோக³க்க²மம் ஸேனாஸனம் க³ஹிதந்தி த³ட்ட²ப்³ப³ம்.

தண்ஹாவிசரிததே³ஸனாதி ‘‘அஜ்ஜ²த்திகஸ்ஸ உபாதா³யா’’தி (விப⁴. 937) ஆதி³னயப்பவத்தம் தண்ஹாவிசரிதஸுத்தம். தண்ஹாபத³ட்டா²னத்தாதி தண்ஹாஸன்னிஸ்ஸயத்தா. ந ஹி தண்ஹாவிரஹிதா மானதி³ட்டி²பவத்தி அத்தி². மானதி³ட்டி²யோ ஓஸரித்வாதி த³ஸ்ஸேதப்³ப³தாய மானதி³ட்டி²யோ ஓகா³ஹேத்வாதி அத்தோ². க³ஹணத்த²மேவ ஹி தே³ஸேதப்³ப³த⁴ம்மஸ்ஸ தே³ஸனாய ஓஸரணம். தண்ஹாமானதி³ட்டி²யோ பபஞ்சத்தயம் ஸத்தஸந்தானஸ்ஸ ஸம்ஸாரே பபஞ்சனதோ அனுப்பப³ந்த⁴னவஸேன வித்தா²ரணதோ. ஸீலபத³ட்டா²னத்தாதி ஸீலாதி⁴ட்டா²னத்தா.

அதி⁴சித்தஸிக்கா² வுத்தாதி ஆனேத்வா ஸம்ப³ந்தோ⁴. விபஸ்ஸனாவஸேன ஸுஞ்ஞாகா³ரவட்³ட⁴னேதி யோஜனா. த்³வேபி ஸிக்கா²தி அதி⁴சித்தாதி⁴பஞ்ஞாஸிக்கா². ஸங்க³ஹேத்வாதி அதி⁴ஸீலஸிக்கா²ய ஸத்³தி⁴ம் ஸங்க³ஹேத்வா வுத்தா. யதி³ ஏவமயம் ஸிக்க²த்தயதே³ஸனா ஜாதாதி ஸிக்க²த்தயானிஸம்ஸப்பகாஸனீ ஸியாதி அனுயோக³ம் ஸந்தா⁴யாஹ ‘‘ஏத்த² சா’’திஆதி³. தத்த² யம் வத்தப்³ப³ம், தம் ஹேட்டா² வுத்தமேவ. இந்த்³ரியஸம்வரோ விய பாதிமோக்க²ஸம்வரஸ்ஸ சதுபாரிஸுத்³தி⁴ஸீலஸ்ஸ ஆரக்க²பூ⁴தா சித்தேகக்³க³தா விபஸ்ஸனா ச இத⁴ க³ஹிதாதி தது³ப⁴யம் அப்பதா⁴னம், ஸீலமேவ பன பதா⁴னபா⁴வேன க³ஹிதந்தி வேதி³தப்³ப³ம். தேனாஹ ‘‘ஸீலானுரக்கி²கா ஏவா’’திஆதி³.

ப³லவதரஸுக²ந்தி ஸமுப்பன்னப்³யாதி⁴து³க்க²தோ ப³லவதரம், தம் அபி⁴ப⁴விதும் ஸமத்த²ம் ஜா²னஸுக²ம் உப்பஜ்ஜதி. ப³லவமமத்தம் ஹோதி, தேன த³ள்ஹஅத்தஸினேஹேன விலுத்தஹத³யோ குஸலத⁴ம்மே ச²ட்³டே³ந்தோ ஸோ ததா²ரூபேஸு…பே… போஸேதா ஹோதி. ப³லவமமத்தம் வா ஸினேஹோ ந ஹோதி ‘‘ஸுத்³தோ⁴ ஸங்கா²ரபுஞ்ஜோ’’தி யாதா²வத³ஸ்ஸனேன அஹம்காரமமம்காராபா⁴வதோ. து³ப்³பி⁴க்க²ப⁴யே கு²தா³பி⁴ப⁴வம் ஸந்தா⁴யாஹ ‘‘ஸசேபிஸ்ஸ அந்தானி ப³ஹி நிக்க²மந்தீ’’தி. ப்³யாதி⁴ப⁴யம் ஸந்தா⁴யாஹ ‘‘உஸ்ஸுஸ்ஸதி விஸுஸ்ஸனீ’’தி. ஆதி³-ஸத்³தே³ன க³ஹிதம் சோரப⁴யம் ஸந்தா⁴யாஹ ‘‘க²ண்டா³க²ண்டி³கோ வா’’தி. உப⁴யஸ்ஸாதி ஸமத²விபஸ்ஸனாத்³வயஸ்ஸ. ஏத்த² ச ‘‘அஜ்ஜ²த்தம் சேதோ…பே… ஸுஞ்ஞாகா³ரான’’ந்தி இமேஹி விஸேஸனிப்³பே³த⁴பா⁴கி³யபா⁴வாபாத³னேன ஸீலம் ரக்கி²தும் ஸமத்தா² ஏவ சித்தேகக்³க³தாவிபஸ்ஸனா க³ஹிதா. யஸ்மா பரதோ ஜா²னவிமோக்க²ப²லாபி⁴ஞ்ஞாணஅதி⁴ட்டா²னபா⁴வோ ஸீலஸ்ஸ உத்³த⁴டோ, தஸ்மா தஸ்ஸ பி⁴ய்யோபி ஸம்பா⁴ரபூ⁴தா ஏவ சித்தேகக்³க³தா விபஸ்ஸனா தத்த² தத்த² க³ஹிதாதி வேதி³தப்³பா³.

ஸீலாதீ³தி ஆதி³-ஸத்³தே³ன யதா²வுத்தசித்தேகக்³க³தாவிபஸ்ஸனா ஸங்க³ண்ஹாதி, ஸீலஸ்ஸ வா மூலகாரணபூ⁴தம் ஸப்³ப³ம் கம்மஸ்ஸகதஞாணஞ்ச ஸங்க³ண்ஹாதி கம்மபத²ஸம்மாதி³ட்டி²ம் வா. ஸீலஞ்ஹி தத³ஞ்ஞம்பி புஞ்ஞகிரியாவத்து² தேனேவ பரிஸோதி⁴தம் மஹப்ப²லம் ஹோதி மஹானிஸம்ஸந்தி. லாபீ⁴ அஸ்ஸந்தி லாபா⁴ ஸாய ஸம்வரணஸீலபரிபூரணம் பாளியம் ஆக³தம் கிமீதி³ஸம் ப⁴க³வா அனுஜானாதீதி? ந ப⁴க³வா ஸபா⁴வேன ஈதி³ஸம் அனுஜானாதி, மஹாகாருணிகதாய பன புக்³க³லஜ்ஜா²ஸயேன ஏவம் வுத்தந்தி த³ஸ்ஸேந்தோ ‘‘ந சேத்தா²’’திஆதி³மாஹ. தத்த² கா⁴ஸேஸனம் சி²ன்னகதோ² ந வாசம் பயுத்தம் ப⁴ணேதி சி²ன்னகதோ² மூகோ³ விய ஹுத்வா ஓபா⁴ஸபரிகதா²னிமித்தவிஞ்ஞத்திபயுத்தம் கா⁴ஸேஸனம் வாசம் ந ப⁴ணே ந கதே²ய்யாதி அத்தோ². புக்³க³லஜ்ஜா²ஸயவஸேனாதி ஸங்கே²பதோ வுத்தமத்த²ம் விவரந்தோ ‘‘யேஸஞ்ஹீ’’திஆதி³மாஹ. ரஸோ ஸபா⁴வபூ⁴தோ ஆனிஸம்ஸோ ரஸானிஸம்ஸோ.

பச்சயதா³னகாராதி சீவராதி³பச்சயவஸேன தா³னகாரா. ‘‘தே³வானம் வா’’தி வுத்தவசனம் பாகடீகாதுமாஹ ‘‘தே³வாபீ’’திஆதி³. ‘‘பஞ்சிமே க³ஹபதயோ ஆனிஸம்ஸா’’திஆதீ³ஸு (தீ³. நி. 2.150) அனிஸம்ஸஸத்³தோ³ ப²லபரியாயோபி ஹோதீதி ஆஹ ‘‘உப⁴யமேதம் அத்த²தோ ஏக’’ந்தி.

ஸஸ்ஸுஸஸுரா ச தப்பக்கி²கா ச ஸஸ்ஸுஸஸுரபக்கி²கா. தே ஞாதியோனிஸம்ப³ந்தே⁴ன ஆவாஹவிவாஹஸம்ப³ந்த⁴வஸேன ஸம்ப³ந்தா⁴ ஞாதீ. ஸாலோஹிதாதி யோனிஸம்ப³ந்த⁴வஸேன. ஏகலோஹிதஸம்ப³த்³தா⁴தி ஏகேன ஸமானேன லோஹிதஸம்ப³ந்தே⁴ன ஸம்ப³த்³தா⁴. பேச்சபா⁴வம் க³தாதி பேதூபபத்திவஸேன நிப்³ப³த்திம் உபக³தா. தே பன யஸ்மா இத⁴ கதகாலகிரியா காலேன கதஜீவிதுபச்சே²தா³ ஹோந்தி, தஸ்மா வுத்தம் ‘‘காலகதா’’தி. பஸன்னசித்தோதி பஸன்னசித்தகோ. காலகதோ பிதா வா மாதா வா பேதயோனிம் உபபன்னோதி அதி⁴காரதோ விஞ்ஞாயதீதி வுத்தம் ‘‘மஹானிஸம்ஸமேவ ஹோதீ’’தி, தஸ்ஸ ததா² ஸீலஸம்பன்னத்தாதி அதி⁴ப்பாயோ. அரியபா⁴வே பன ஸதி வத்தப்³ப³மேவ நத்தி². தேனாஹ ‘‘அனேகானி கப்பஸதஸஹஸ்ஸானீ’’திஆதி³. ப³ஹுகாரந்தி ப³ஹுபகாரம். உபஸங்கமனந்தி அபி⁴வாத³னாதி³வஸேன உபக³மனம். பயிருபாஸனந்தி உபட்டா²னந்தி.

66. அஜ்ஜோ²த்த²ரிதாதி மத்³தி³தா. உக்கண்டா²தி ரிஞ்சனா அனபி⁴ரதி அனனுயோகோ³. ஸீலவா பி⁴க்கு² அத்தனோ ஸீலக²ண்ட³ப⁴யேன ஸமாஹிதோ விபஸ்ஸகோ ச பச்சயகா⁴தேன அரதியா ரதியா ச ஸஹிதா அபி⁴ப⁴விதாவ ஹோதீதி ஆஹ ‘‘ஸீலாதி³கு³ணயுத்தேனேவா’’திஆதி³.

சித்துத்ராஸோ பா⁴யதீதி ப⁴யம். ஆரம்மணம் பா⁴யதி ஏதஸ்மாதி ப⁴யம். புரிமவாரஸதி³ஸத்தா வுத்தனயமேவாதி அதிதி³ஸித்வாபி புன தம் த³ஸ்ஸேதும் ‘‘ஸீலாதி³கு³ணயுத்தோ ஹீ’’திஆதி³ வுத்தம். தே²ரஸ்ஸ ஹேட்டா² நிஸின்னத்தா தே³வதாய தா³ரகா ஸகபா⁴வேன ஸண்டா²தும் ஸுகே²ன வத்திதும் அஸக்கோந்தா அஸமத்தா².

அதி⁴கம் சேதோதி அபி⁴சேதோ, உபசாரஜ்ஜா²னசித்தம். தஸ்ஸ பன அதி⁴கதா பாகதிககாமாவசரசித்தேஹி ஸுந்த³ரதாய ஸபடிபக்க²தோ விஸுத்³தி⁴யா சாதி ஆஹ ‘‘அபி⁴க்கந்தம் விஸுத்³தி⁴சித்த’’ந்தி. அதி⁴சித்தந்தி ஸமாதி⁴மாஹ, ஸோ ச உபசாரஸமாதி⁴ த³ட்ட²ப்³போ³. விவேகஜம் பீதிஸுக²ம், ஸமாதி⁴ஜம் பீதிஸுக²ம், அபீதிஜம் ஜா²னஸுக²ம், ஸதிபாரிஸுத்³தி⁴ஜம் ஜா²னஸுக²ந்தி சதுப்³பி³த⁴ம்பி ஜா²னஸுக²ம் படிபக்க²தோ நிக்க²ந்ததம் உபாதா³ய ‘‘நேக்க²ம்மஸுக²’’ந்தி வுச்சதீதி ஆஹ ‘‘நேக்க²ம்மஸுக²ம் விந்த³ந்தீ’’தி. இச்சி²திச்சி²தக்க²ணே ஸமாபஜ்ஜிதும் ஸமத்தோ²தி இமினா தேஸு ஜா²னேஸு ஸமாபஜ்ஜனவஸீபா⁴வமாஹ, ‘‘நிகாமலாபீ⁴’’தி பன வசனதோ ஆவஜ்ஜனாதி⁴ட்டா²னபச்சவேக்க²ணவஸியோபி வுத்தா ஏவாதி வேதி³தப்³பா³. ஸுகே²னேவ பச்சனீகத⁴ம்மே விக்க²ம்பே⁴த்வாதி ஏதேன தேஸம் ஜா²னஸுக²கி²ப்பாபி⁴ஞ்ஞதஞ்ச த³ஸ்ஸேதி. விபுலானந்தி வேபுல்லம் பாபிதானம். ஜா²னானம் விபுலதா நாம ஸுபா⁴விதபா⁴வேன சிரதரப்பத்தி, ஸா ச பரிச்சே²தா³னுரூபாவ இச்சி²தப்³ப்³பா³தி ‘‘விபுலான’’ந்தி வத்வா ‘‘யதா²பரிச்சே²தே³யேவ வுட்டா²தும் ஸமத்தோ²தி வுத்தம்ஹோதீ’’தி ஆஹ. பரிச்சே²த³காலஞ்ஹி அப்பத்வாவ வுட்ட²ஹந்தோ அகஸிரலாபீ⁴ ந ஹோதி யாவதி³ச்ச²கம் பவத்தேதும் அஸமத்த²த்தா. இதா³னி தேயேவ யதா²வுத்தே ஸமாபஜ்ஜனாதி³வஸீபா⁴வே ப்³யதிரேகவஸேன விபா⁴வேதும் ‘‘ஏகச்சோ ஹீ’’திஆதி³ வுத்தம். தத்த² லாபீ⁴யேவ ஹோதீதி இத³ம் படிலத்³த⁴மத்தஸ்ஸ ஜா²னஸ்ஸ வஸேன வுத்தம். ததா²தி இச்சி²திச்சி²தக்க²ணே. பாரிப³ந்தி⁴கேதி வஸீபா⁴வஸ்ஸ பச்சனீகத⁴ம்மே. ஜா²னாதி⁴க³மஸ்ஸ பன பச்சனீகத⁴ம்மா பகே³வ விக்க²ம்பி⁴தா, அஞ்ஞதா² ஜா²னாதி⁴க³மோ ஏவ ந ஸியா. கிச்சே²ன விக்க²ம்பே⁴தீதி கிச்சே²ன விஸோதே⁴தி. காமாதீ³னவபச்சவேக்க²ணாதீ³ஹி காமச்ச²ந்தா³தீ³னம் விய அஞ்ஞேஸம்பி ஸமாதி⁴பாரிப³ந்தி⁴கானம் தூ³ரஸமுஸ்ஸாரணம் இத⁴ விக்க²ம்ப⁴னம் விஸோத⁴னஞ்சாதி வேதி³தப்³ப³ம். நாளிகாயந்தந்தி காலமானனாளிகாயந்தம் ஆஹ.

விஸேஸேன ரூபாவசரசதுத்த²ஜ்ஜா²னம் ஸப்³ப³ஸோ வஸீபா⁴வாபாதி³தம் அபி⁴ஞ்ஞாபாத³கந்தி அதி⁴ப்பாயேனாஹ ‘‘அபி⁴ஞ்ஞாபாத³கே ஜா²னே வுத்தே’’தி. அரூபஜ்ஜா²னம்பி பன அதி⁴ட்டா²னதாய பாத³கமேவ சுத்³த³ஸதா⁴ சித்தபரித³மனேன வினா தத³பா⁴வதோ. ‘‘ஏவமபி⁴ஞ்ஞாபாத³கே ரூபாவசரஜ்ஜா²னே வுத்தே ரூபாவசரதாய கிஞ்சாபி அபி⁴ஞ்ஞானம் லோகியவாரோ ஆக³தோ’’தி அயஞ்ஹேத்த² அதி⁴ப்பாயோ. நந்தி அபி⁴ஞ்ஞாவாரம். சத்தாரி…பே… அரியமக்³கா³ ஸீலானம் ஆனிஸம்ஸோ ஸம்பன்னஸீலஸ்ஸேவ லாப⁴தோ. பரியாதி³யித்வாதி க³ஹேத்வா.

அங்க³ஸந்ததாயாதி நீவரணாதீ³னம் பச்சனீகத⁴ம்மானம் ஸுதூ³ரதரபா⁴வேன ஜா²னங்கா³னம் வூபஸந்ததாய, நிப்³பு³தஸப்³ப³த³ரத²பரிளாஹதாயாதி அத்தோ², யதோ தேஸம் ஜா²னானம் பணீததராதி³பா⁴வோ. ஆரம்மணஸந்ததாயாதி ரூபபடிகா⁴தி³விக³மனேன ஸண்ஹஸுகு²மாதி³பா⁴வப்பத்தஸந்தபா⁴வேன. யத³க்³கே³ன ஹி நேஸம் பா⁴வனாபி⁴ஸமயஸப்³பா⁴விதஸண்ஹஸுகு²மாகாரானி ஆரம்மணானி ஸந்தானி, தத³க்³கே³ன ஜா²னங்கா³னம் ஸந்ததா வேதி³தப்³பா³. ஆரம்மணஸந்ததாய ஸந்ததா லோகுத்தரத⁴ம்மாரம்மணாஹி பச்சவேக்க²ணாஹி தீ³பேதப்³பா³. விமுத்தா விஸேஸேன முத்தா. யே ஹி ஜா²னத⁴ம்மா ததா²பவத்தபுப்³ப³பா⁴க³பா⁴வனாஹி தப்³பி³ஸேஸதாய ஸாதிஸயம் படிபக்க²த⁴ம்மேஹி விமுத்திவஸேன பவத்தந்தி, ததோ ஏவ ததா²விமுத்ததாய பிது அங்கே விஸ்ஸட்ட²அங்க³பச்சங்கோ³ விய குமாரோ நிராஸங்கபா⁴வேன ஆரம்மணே அதி⁴முத்தா ச பவத்தந்தி, தே விமோக்கா²தி வுச்சந்தி. தேனாஹ ‘‘விமோக்கா²தி பச்சனீகத⁴ம்மேஹி விமுத்தத்தா ஆரம்மணே ச அதி⁴முத்தத்தா’’தி. யதி³பி ஆரம்மணஸமதிக்கமவஸேன பத்தப்³பா³னி ஆருப்பானி, ந அங்கா³திக்கமவஸேன, ததா²பி யஸ்மா ஆரம்மணே அவிரத்தஸ்ஸ ஜா²னஸமதிக்கமோ ந ஹோதி, ஸமதிக்கந்தேஸு ச ஜா²னேஸு ஆரம்மணம் ஸமதிக்கந்தமேவ ஹோதி, தஸ்மா ஆரம்மணஸமதிக்கமம் அவத்வா ‘‘ரூபாவசரஜ்ஜா²னே அதிக்கமித்வா’’தி இச்சேவ வுத்தம். அதிக்கம்ம ரூபேதி பாளியம் ‘‘ஸம்பாதே³தப்³பா³, பஸ்ஸிதப்³பா³’’தி வா கிஞ்சி பத³ம் இச்சி²தப்³ப³ம், அஸுதபரிகப்பனேன பன பயோஜனம் நத்தீ²தி ‘‘ஸந்தாதி பத³ஸம்ப³ந்தோ⁴’’தி வுத்தம். ஏவஞ்ச கத்வா தேன விராக³பா⁴வேன தேஸம் ஸந்ததாதி அயம்பி அத்தோ² விபா⁴விதோ ஹோதி. ரூபஜ்ஜா²னாதீ³னம் விய நத்தி² ஏதேஸம் ஆரம்மணபூ⁴தம் வா ப²லபூ⁴தம் வா ரூபந்தி அரூபா. அரூபா ஏவ ஆருப்பா. தேனாஹ ‘‘ஆரம்மணதோ ச விபாகதோ ச ரூபவிரஹிதா’’தி. நாமகாயேனாதி ஸஹஜாதனாமஸமூஹேன.

67. ஸம்யோஜேந்தீதி ப³ந்த⁴ந்தி. கேஹீதி ஆஹ ‘‘க²ந்த⁴க³தீ’’திஆதி³. அஸமுச்சி²ன்னராகா³தி³கஸ்ஸ ஹி க²ந்தா⁴தீ³னம் ஆயதிம் க²ந்தா⁴தீ³ஹி ஸம்ப³ந்தோ⁴, ஸமுச்சி²ன்னராகா³தி³கஸ்ஸ பன தம் நத்தி² கதானம்பி கம்மானம் அஸமத்த²பா⁴வாபத்திதோதி. ராகா³தீ³னம் அன்வயதோ ச ஸம்யோஜனட்டோ² ஸித்³தோ⁴தி ஆஹ ‘‘க²ந்த⁴க³தி…பே… வுச்சந்தீ’’தி. பரிக்க²யேனாதி ஸமுச்சே²தே³ன ஸப்³ப³ஸோ ஆயதிம் அனுப்பஜ்ஜனேன. படிபக்க²த⁴ம்மானம் அனவஸேஸதோ ஸவனதோ பீளனதோ ஸோதோ, அரியமக்³கோ³தி ஆஹ ‘‘ஸோதோதி ச மக்³க³ஸ்ஸேதம் அதி⁴வசன’’ந்தி. தம் ஸோதம் ஆதி³தோ பன்னோ அதி⁴க³ச்சீ²தி ஸோதாபன்னோ, அட்ட²மகோ. தேனாஹ ‘‘தம்ஸமங்கீ³புக்³க³லஸ்ஸா’’தி, பட²மமக்³க³க்க²ணே புக்³க³லஸ்ஸாதி அதி⁴ப்பாயோ. இத⁴ பன பன்ன-ஸத்³தோ³ ‘‘ப²லஸச்சி²கிரியாய படிபன்னோ’’திஆதீ³ஸு (அ. நி. 8.59) விய வத்தமானகாலிகோதி ஆஹ ‘‘மக்³கே³ன ப²லஸ்ஸ நாமம் தி³ன்ன’’ந்தி. அபீ⁴தகாலிகத்தே பன ஸரஸதோவ நாமலாபோ⁴ ஸியா. விரூபம் ஸது³க்க²ம் ஸஉபாயாஸம் நிபாதேதீதி வினிபாதோ, அபாயது³க்கே² கி²பனகோ. த⁴ம்மோதி ஸபா⁴வோ. தேனாஹ ‘‘அத்தான’’ந்திஆதி³. கஸ்மாதி அவினிபாதத⁴ம்மதாய காரணம் புச்ச²தி. அபாயம் க³மேந்தீதி அபாயக³மனீயா. ஸம்பு³ஜ்ஜ²தீதி ஸம்போ³தி⁴, அரியமக்³கோ³. ஸோ பன பட²மமக்³க³ஸ்ஸ அதி⁴க³தத்தா அவஸிட்டோ² ஏவ அதி⁴க³ந்த⁴ப்³ப³பா⁴வேன இச்சி²தப்³போ³தி ஆஹ ‘‘உபரிமக்³க³த்தய’’ந்தி.

வண்ணப⁴ணனத்த²ம் வுத்தானி,ந பஹாதப்³பா³னீதி அதி⁴ப்பாயோ. ஓளாரிகானம் ராகா³தீ³னம் ஸமுச்சி²ந்த³னவஸேன பவத்தமானோ து³தியமக்³கோ³ அவஸிட்டா²னம் தேஸம் தனுபா⁴வாபத்தியா உப்பன்னோ நாம ஹோதீதி வுத்தம் ‘‘ராக³தோ³ஸமோஹானம் தனுத்தா’’தி. அதி⁴ச்சுப்பத்தியாதி கதா³சி கரஹசி உப்பஜ்ஜனேன. பரியுட்டா²னமந்த³தாயாதி ஸமுதா³சாரமுது³தாய. அபி⁴ண்ஹம் ந உப்பஜ்ஜந்தி தஜ்ஜஸ்ஸ அயோனிஸோமனஸிகாரஸ்ஸ அனிப³த்³த⁴பா⁴வதோ. மந்த³மந்தா³ உப்பஜ்ஜந்தி விபல்லாஸானம் தப்பச்சயானஞ்ச மோஹமானாதீ³னம் முது³தரபா⁴வதோ. ப³ஹலாவ உப்பஜ்ஜந்தி வத்து²படிஸேவனதோதி அதி⁴ப்பாயோ. தேனாஹ ‘‘ததா² ஹீ’’திஆதி³.

ஸகிம் ஆக³மனத⁴ம்மோதி படிஸந்தி⁴வஸேன ஸகிம்யேவ ஆக³மனஸபா⁴வோ. ஏகவாரம்யேவ…பே… ஆக³ந்த்வாதி இமினா பஞ்சஸு ஸகதா³கா³மீஸு சத்தாரோ வஜ்ஜேத்வா ஏகோயேவ க³ஹிதோதி த³ஸ்ஸேந்தோ ‘‘யோபி ஹீ’’திஆதி³மாஹ. தத்த² ய்வாயம் பஞ்சமகோ ஸகதா³கா³மீ ‘‘இத⁴ மக்³க³ம் பா⁴வேத்வா தே³வலோகே நிப்³ப³த்தோ, தத்த² யாவதாயுகம் ட²த்வா புன இதூ⁴பபஜ்ஜித்வா பரினிப்³பா³யதீ’’தி வுத்தோ, தஸ்ஸ ஏகபீ³ஜினா ஸத்³தி⁴ம் கிம் நானாகரணந்தி? ஏகபீ³ஜிஸ்ஸ ஏகா படிஸந்தி⁴, ஸகதா³கா³மிஸ்ஸ த்³வே படிஸந்தி⁴யோதி இத³ம் தேஸம் நானாகரணம். யஸ்ஸ ஹி ஸோதாபன்னஸ்ஸ ஏகம்யேவ க²ந்த⁴பீ³ஜம், ந ஏகம் அத்தபா⁴வக்³க³ஹணம், ஸோ ஏகபீ³ஜீதி.

ஹேட்டா²தி ‘‘அமஹக்³க³தபூ⁴மிய’’ந்தி ஹேட்டா² ஸம்ப³ந்த⁴னேன. ஹேட்டா²பா⁴க³ஸ்ஸ ஹிதாதி ஹேட்டா²பா⁴கி³யா, தேஸம். தானீதி ஓரப்³பா⁴கி³யஸம்யோஜனானி. காமாவசரே நிப்³ப³த்ததியேவ அஜ்ஜ²த்தம் ஸம்யோஜனத்தா. ததா² ஹேஸ தூ³ரதோபி ஆவத்தித⁴ம்மோ ஏவாதி த³ஸ்ஸேதும் கி³லப³ளிஸமச்சா²த³யோ உபமாபா⁴வேன வுத்தா. ஓபபாதிகோதி இமினா க³ப்³ப⁴வாஸது³க்கா²பா⁴வமாஹ. தத்த² பரினிப்³பா³யீதி இமினா ஸேஸது³க்கா²பா⁴வம். தத்த² பரினிப்³பா³னதா சஸ்ஸ காமலோகே க²ந்த⁴பீ³ஜஸ்ஸ அபுனாரோஹவஸேனேவாதி த³ஸ்ஸேதும் ‘‘அனாவத்தித⁴ம்மோ’’தி வுத்தம்.

68. கேவலாதி லோகியாபி⁴ஞ்ஞாஹி அஸம்மிஸ்ஸா. லோகியபஞ்சாபி⁴ஞ்ஞாயோபி ஸீலானம் ஆனிஸம்ஸோ தத³வினாபா⁴வதோ. தாபி த³ஸ்ஸேதும் ஆகங்கே²ய்ய சே…பே… ஏவமாதி³மாஹாதி யோஜனா. ஆஸவானம் அனவஸேஸப்பஹானதோ அரஹத்தமக்³கோ³யேவ விஸேஸதோ ‘‘ஆஸவக்க²யோ’’தி வத்தப்³ப³தம் அரஹதீதி வுத்தம் ‘‘ஆஸவக்க²யே கதி²தே’’தி, அஞ்ஞதா² ஸப்³பா³பி ச²ளபி⁴ஞ்ஞா ஆஸவக்க²யோ ஏவாதி. இமேஸம் கு³ணானந்தி லோகியாபி⁴ஞ்ஞானம். யதா² புரிஸஸ்ஸ முண்டி³தம் ஸீஸம் ஸிகா²விரஹிதத்தா ந ஸோப⁴தி, ஏவம் தே³ஸனாய ஸீஸபூ⁴தாபி அக்³க³மக்³க³கதா² லோகியாபி⁴ஞ்ஞாரஹிதா ந ஸோப⁴தீதி ஆஹ ‘‘அயம் கதா² முண்டா³பி⁴ஞ்ஞாகதா² நாம ப⁴வேய்யா’’தி. இத்³தி⁴விகுப்³ப³னாதி இத்³தி⁴ ச விகுப்³ப³னா ச. விகுப்³ப³னக்³க³ஹணேன சேத்த² விகுப்³ப³னித்³தி⁴மாஹ, இத்³தி⁴க்³க³ஹணேன தத³ஞ்ஞம் ஸப்³ப³ஞ்ச அபி⁴ஞ்ஞாகிச்சம். யுத்தட்டா²னேயேவாதி லோகியாபி⁴ஞ்ஞானம் நிப்³ப³த்தனஸ்ஸ விய தே³ஸனாய யுத்தட்டா²னேயேவ. ஏதேன ந கேவலம் தே³ஸனக்கமேனேவாயம் தே³ஸனா, அத² கோ² படிபத்திக்கமேனபீதி த³ஸ்ஸேதி. விஸுத்³தி⁴மக்³கே³ (விஸுத்³தி⁴. 2.369) வுத்தா, தஸ்மா தத்த² வுத்தனயேனேவ வேதி³தப்³பா³தி அதி⁴ப்பாயோ.

69. ஆஸவானம் க²யாதி ஹேட்டி²மமக்³கே³ன கே²பிதாவஸிட்டா²னம் ஆஸவானம் அரஹத்தமக்³கே³ன ஸமுச்சி²ந்த³னதோ. யஸ்மா அரஹத்தமக்³கோ³ ந கேவலம் ஆஸவேயேவ கே²பேதி, அத² கோ² அவஸிட்டே² ஸப்³ப³கிலேஸேபி, தஸ்மா ஆஹ ‘‘ஸப்³ப³கிலேஸானம் க²யா’’தி. லக்க²ணமத்தஞ்ஹேத்த² ஆஸவக்³க³ஹணம், ஆஸவானம் ஆரம்மணபா⁴வஸ்ஸபி அனுபக³மனதோ அனாஸவம். யஸ்மா பன தத்த² ஆஸவானம் லேஸோபி நத்தி², தஸ்மா வுத்தம் ‘‘ஆஸவவிரஹித’’ந்தி. ஸமாதி⁴ வுத்தோ சேதோஸீஸேன யதா² ‘‘சித்தம் பஞ்ஞஞ்ச பா⁴வய’’ந்தி (ஸம். நி. 1.23, 192; பேடகோ. 22; மி. ப. 2.1.9) அதி⁴ப்பாயோ. ராக³தோ விமுத்தத்தா அவிஜ்ஜாய விமுத்தத்தாதி இத³ம் உஜுவிபச்சனீகபடிப்பஸ்ஸத்³தி⁴த³ஸ்ஸனம் த³ட்ட²ப்³ப³ம், ந தத³ஞ்ஞேஸம் பாபத⁴ம்மானம் அப்படிப்பஸ்ஸத்³த⁴த்தா. இதா³னி தமேவ ஸமாதி⁴பஞ்ஞானம் ராகா³விஜ்ஜாபடிபக்க²தம் ஆக³மேன த³ஸ்ஸேதும் ‘‘வுத்தம் சேத’’ந்திஆதி³ வுத்தம். ஸமத²ப²லந்தி ஸமத²ஸ்ஸ ப²லம் லோகியஸமத²பா⁴வனாய ஹி விபஸ்ஸனாக³தாய ஆஹிதப²லஸ்ஸ லோகுத்தரஸமத²ஸ்ஸ ஸரிக்க²கப²லோ சேதோவிமுத்தி. விபஸ்ஸனாப²லந்தி ஏத்தா²பி ஏஸேவ நயோ. அத்தனோயேவாதி ஸுதமயஞாணாதி³னா விய பரபச்சயதம் நயக்³கா³ஹஞ்ச முஞ்சித்வா பரதோகோ⁴ஸானுக³தபா⁴வனாதி⁴க³மபூ⁴ததாய அத்தனோயேவ பஞ்ஞாய பச்சக்க²ம் கத்வா ஸயம்பு⁴ஞாணபூ⁴தாயாதி அதி⁴ப்பாயோ. தேனாஹ ‘‘அபரப்பச்சயேன ஞத்வா’’தி.

ஸப்³ப³ம்பி தந்தி ஸப்³ப³ம்பி ஸத்தரஸவித⁴ம் தம் யதா²வுத்தம் ஸீலானிஸம்ஸம். யதா² ஆனிஸம்ஸவந்தே ஸம்மதே³வ ஸம்பாதி³தே ததா³னிஸம்ஸா த³ஸ்ஸிதா ஏவ ஹோந்தி ததா³யத்தபா⁴வதோ, ஏவம் ஆனிஸம்ஸபதா⁴னயோக்³யபா⁴வேன த³ஸ்ஸிதே ததா³னிஸம்ஸா த³ஸ்ஸிதா ஏவ ஹோந்தீதி ஆஹ ‘‘ஸம்பிண்டே³த்வா த³ஸ்ஸேந்தோ’’தி. வுத்தஸ்ஸேவ அத்த²ஸ்ஸ புனவசனம் நிக³மனந்தி வுத்தம் ‘‘நிக³மனம் ஆஹா’’தி. புப்³பே³தி தே³ஸனாரம்பே⁴. ஏவம் வுத்தந்தி ‘‘ஸம்பன்னஸீலா’’தி ஏவமாதி³னா ஆகாரேன வுத்தம். இத³ம் ஸப்³ப³ம்பீதி இத³ம் ‘‘ஸம்பன்னஸீலா’’திஆதி³கம் ஸப்³ப³ம்பி வசனம். ஏதம் படிச்சாதி ஏதம் ஸம்பன்னஸீலஸ்ஸ பி⁴க்கு²னோ யதா²வுத்தஸத்தரஸவிதா⁴னிஸம்ஸபா⁴கி³தம் ஸந்தா⁴ய வுத்தம். இத³மேவ ஹி ‘‘இதி யம் தம் வுத்தம், இத³மேதம் படிச்ச வுத்த’’ந்தி வசனம் ஸந்தா⁴ய ‘‘ஸப்³ப³ம்பி தம் ஸீலானிஸம்ஸம் ஸம்பிண்டே³த்வா த³ஸ்ஸேந்தோ’’தி வுத்தம். ஏத்த²ஆதி³தோ ச²ஹி ஆனிஸம்ஸேஹி பரித்தபூ⁴மிகா ஸம்பத்தி க³ஹிதா, தத³ந்தரம் பஞ்சஹி லோகியாபி⁴ஞ்ஞாஹி ச மஹக்³க³தபூ⁴மிகா, இதரேஹி லோகுத்தரபூ⁴மிகாதி ஏவம் சதுபூ⁴மிகஸம்பதா³னிஸம்ஸஸீலம் நாமேதம் மஹந்தம் மஹானுபா⁴வம், தஸ்மா தம்ஸம்பாத³னே ஸக்கச்சகாரிதா அப்பமத்தேன ப⁴விதப்³ப³ம்.

ஆகங்கே²ய்யஸுத்தவண்ணனாய லீனத்த²ப்பகாஸனா ஸமத்தா.