4. ப⁴யபே⁴ரவஸுத்தவண்ணனா

34. ஏவம் மே ஸுதந்தி ப⁴யபே⁴ரவஸுத்தம். கோ நிக்கே²போ? கேசி தாவ ஏவமாஹு ‘‘புச்சா²வஸிகோ நிக்கே²போ’’தி. து³விதா⁴ ஹி புச்சா² பாகடாபாகடபே⁴த³தோ. தத்த² யஸ்ஸா தே³ஸனாய நிமித்தபூ⁴தோ ஞாதும் இச்சி²தோ அத்தோ² கிம்-ஸத்³த³புப்³ப³கேன பகாஸீயதி, ஸா பாகடா புச்சா² யதா² ‘‘கிம்ஸூத⁴ வித்தம் புரிஸஸ்ஸ ஸேட்ட²’’ந்தி ஏவமாதி³ (ஸம். நி. 1.246; ஸு. நி. 183). யஸ்ஸா பன தே³ஸனாய நிமித்தபூ⁴தோ ஞாதும் இச்சி²தோ அத்தோ² கிம்-ஸத்³த³ரஹிதேன கேவலேனேவ ஸத்³த³பயோகே³ன பகாஸீயதி, ஸா அபாகடா புச்சா². ஞாதும் இச்சி²தோ ஹி அத்தோ² ‘‘பஞ்ஹா, புச்சா²’’தி வுச்சதி, தஸ்மாயேவ இத⁴ ‘‘யே மே போ⁴ கோ³தமா’’திஆதி³கா அபாகடாதி ‘‘புச்சா²வஸிகோ நிக்கே²போ’’தி. தயித³ம் அகாரணம், யஸ்மா ஸோ ப்³ராஹ்மணோ ‘‘யேமே போ⁴ கோ³தமா’’திஆதீ³னி வத³ந்தோ ந தத்த² கங்கீ² விசிகிச்சீ² ஸம்ஸயமாபன்னோ அவோச, அத² கோ² அத்தனா யதா²னிச்சி²தமத்த²ம் ப⁴க³வதி பஸாத³பா⁴வப³ஹுமானம் பவேதே³ந்தோ கதே²ஸி. தேனாஹ ‘‘ப⁴க³வதி பஸாத³ம் அலத்தா²’’திஆதி³ (ம. நி. அட்ட². 1.34). விஹாரேதி விஹாரகே நிவாஸே. அவிச்சி²ன்னேயேவாதி பவத்தமானேயேவ. பத³த்³வயஸ்ஸபி வஸந்தே ஏவாதி அத்தோ². ஏதம் புரோஹிதட்டா²னம் உண்ஹீஸாதி³ககுத⁴ப⁴ண்டே³ஹி ஸத்³தி⁴ம் லத்³த⁴ம், ததா² ச ‘‘அஸ்ஸ ரஞ்ஞா தி³ன்ன’’ந்தி வத³ந்தி. தேனாஹ ‘‘தம் தஸ்ஸ ரஞ்ஞா தி³ன்ன’’ந்தி. ப்³ரஹ்மந்தி வேத³ம். ஸோ பன மந்தப்³ரஹ்மகப்பவஸேன திவிதோ⁴. தத்த² மந்தா பதா⁴னம் மூலபா⁴வதோ, யே அட்ட²காதீ³ஹி பவுத்தா, இதரே தன்னிஸ்ஸயேன ஜாதா, தேன தேஸம்யேவ க³ஹணம் ‘‘மந்தே ஸஜ்ஜா²யதீ’’தி. தே ஹி கு³த்தபா⁴ஸிதப்³ப³தாய ‘‘மந்தா’’தி வுச்சந்தி. இத³மேவ ஹீதி அவதா⁴ரணேன ‘‘ப்³ரஹ்மதோ ஜாதா’’திஆதி³கம் நிருத்திம் படிக்கி²பதி.

யேன வா காரணேனாதி (ஸாரத்த². டீ. வேரஞ்ஜகண்ட³வண்ணனாயம் 2; ஸம். நி. டீ. 1.1.1; அ. நி. டீ. 2.2.16) ஹேதும்ஹி இத³ம் கரணவசனம். ஹேதுஅத்தோ² ஹி கிரியாகாரணம், ந கரணம் விய கிரியத்தோ², தஸ்மா நானப்பகாரகு³ணவிஸேஸாதி⁴க³மத்தா² இத⁴ உபஸங்கமனகிரியாதி ‘‘அன்னேன வஸதீ’’திஆதீ³ஸு விய ஹேதுஅத்த²மேவேதம் கரணவசனம் யுத்தம், ந கரணத்த²ம் தஸ்ஸ அயுஜ்ஜமானத்தாதி வுத்தம் ‘‘யேன வா காரணேனா’’திஆதி³. ப⁴க³வதோ ஸததப்பவத்தனிரதிஸயஸாது³விபுலாமதரஸஸத்³த⁴ம்மப²லதாய ஸாது³ப²லனிச்சப²லிதமஹாருக்கே²ன ப⁴க³வா உபமிதோ, ஸாது³ப²லூபபோ⁴கா³தி⁴ப்பாயக்³க³ஹணேனேவ ஹி மஹாருக்க²ஸ்ஸ ஸாது³ப²லதா க³ஹிதாதி.

உபஸங்கமீதி உபஸங்கந்தோ. ஸம்பத்துகாமதாய ஹி கிஞ்சி டா²னம் க³ச்ச²ந்தோ தம்தம்பதே³ஸாதிக்கமனேன உபஸங்கமி, உபஸங்கந்தோதி வா வத்தப்³ப³தம் லப⁴தி. தேனாஹ ‘‘க³தோதி வுத்தம் ஹோதீ’’தி, உபக³தோதி அத்தோ². உபஸங்கமித்வாதி புப்³ப³காலகிரியானித்³தே³ஸோதி ஆஹ ‘‘உபஸங்கமனபரியோஸானதீ³பன’’ந்தி. ததோதி யம் டா²னம் பத்தோ ‘‘உபஸங்கமீ’’தி வுத்தோ, ததோ உபக³தட்டா²னதோ. யதா² க²மனீயாதீ³னி புச்ச²ந்தோதி (ஸம். நி. டீ. 1.1.112) யதா² ப⁴க³வா ‘‘கச்சி தே ப்³ராஹ்மண க²மனீயம், கச்சி யாபனீய’’ந்திஆதி³னா க²மனீயாதீ³னி புச்ச²ந்தோ தேன ப்³ராஹ்மணேன ஸத்³தி⁴ம் ஸமப்பவத்தமோதோ³ அஹோஸி புப்³ப³பா⁴ஸிதாய, தத³னுகரணேன ஏவம் ஸோபி ப்³ராஹ்மணோ ப⁴க³வதா ஸத்³தி⁴ம் ஸமப்பவத்தமோதோ³ அஹோஸீதி யோஜனா. தம் பன ஸமப்பவத்தமோத³தம் உபமாய த³ஸ்ஸேதும் ‘‘ஸீதோத³கம் வியா’’திஆதி³ வுத்தம். தத்த² ஸம்மோதி³தந்தி ஸம்ஸந்தி³தம். ஏகீபா⁴வந்தி ஸம்மோத³னகிரியாய ஸமானதம் ஏகரூபதம். க²மனீயந்தி ‘‘இத³ம் சதுசக்கம் நவத்³வாரம் ஸரீரயந்தம் க²ணப⁴ங்கு³ரதாய ஸபா⁴வதோ து³ஸ்ஸஹம், கச்சி க²மிதும் ஸக்குணேய்ய’’ந்தி புச்ச²தி. யாபனீயந்தி பச்சயாயத்தவுத்திகம் சிரப்பப³ந்த⁴ஸங்கா²தாய யாபனாய கச்சி யாபேதும் ஸக்குணேய்யம். ஸீஸரோகா³தி³ஆபா³தா⁴பா⁴வேன கச்சி அப்பாபா³த⁴ம். து³க்க²ஜீவிகாபா⁴வேன கச்சி அப்பாதங்கம். தம்தம்கிச்சகரணே உட்டா²னஸுக²தாய கச்சி லஹுட்டா²னம். தத³னரூபப³லயோக³தோ கச்சி ப³லம். ஸுக²விஹாரஸப்³பா⁴வேன கச்சி பா²ஸுவிஹாரோ அத்தீ²தி தத்த² தத்த² கச்சி-ஸத்³த³ம் யோஜேத்வா அத்தோ² வேதி³தப்³போ³.

ப³லவப்பத்தா பீதி பீதியேவ. தருணபீதி பாமோஜ்ஜம். ஸம்மோத³னம் ஜனேதி கரோதீதி ஸம்மோத³னிகம், ததே³வ ஸம்மோத³னீயந்தி ஆஹ ‘‘ஸம்மோத³ஜனனதோ’’தி. ஸம்மோதி³தப்³ப³தோ ஸம்மோத³னீயந்தி இமம் பன அத்த²ம் த³ஸ்ஸேந்தோ ‘‘ஸம்மோதி³தும் யுத்தபா⁴வதோ’’தி ஆஹ. ஸரிதப்³ப³பா⁴வதோதி அனுஸ்ஸரிதப்³ப³பா⁴வதோ. ‘‘ஸரணீய’’ந்தி வத்தப்³பே³ தீ³க⁴ம் கத்வா ‘‘ஸாரணீய’’ந்தி வுத்தம். ஸுய்யமானஸுக²தோதி ஆபாத²மது⁴ரதம் ஆஹ, அனுஸ்ஸரியமானஸுக²தோதி விமத்³த³ரமணீயதம். ப்³யஞ்ஜனபரிஸுத்³த⁴தாயாதி ஸபா⁴வனிருத்திபா⁴வேன தஸ்ஸா கதா²ய வசனசாதுரியமாஹ, அத்த²பரிஸுத்³த⁴தாயாதி அத்த²ஸ்ஸ நிருபக்கிலேஸதம். அனேகேஹி பரியாயேஹீதி அனேகேஹி காரணேஹி.

அபி⁴தூ³ரஅச்சாஸன்னபடிக்கே²பேன நாதிதூ³ரனாச்சாஸன்னம் நாம க³ஹிதம், தம் பன அவகம்ஸதோ உபி⁴ன்னம் பஸாரிதஹத்த²ஸங்க⁴ட்டனேன த³ட்ட²ப்³ப³ம். கீ³வம் பஸாரேத்வாதி கீ³வம் பரிவத்தனவஸேன பஸாரேத்வா.

யேமேதி ஏத்த² ஸந்தி⁴வஸேன இகாரலோபோதி த³ஸ்ஸேந்தோ ‘‘யே இமே’’திஆதி³மாஹ. உச்சாகுலீனதாய ஜாதிவஸேன அபி⁴ஜாதா ஜாதிகுலபுத்தா. தேனாஹ ‘‘உச்சாகுலப்பஸுதா’’தி. ஆசாரஸம்பத்தியா அபி⁴ஜாதா ஆசாரகுலபுத்தா. தேனாஹ ‘‘ஆசாரஸம்பன்னா’’தி. யத்த² கத்த²சி அபாகடேபி குலே. தேன ப்³ராஹ்மணேன அதி⁴ப்பேதா பி⁴க்கூ²ஸு து³விதா⁴பி ஸம்விஜ்ஜந்தீதி ஆஹ ‘‘இத⁴ பன த்³வீஹிபி காரணேஹி குலபுத்தாயேவா’’தி.

ஸத்³தா⁴தி இத³ம் கரணத்தே² பச்சத்தவசனந்தி ஆஹ ‘‘ஸத்³தா⁴யா’’தி, ஸத்³தா⁴தி வா ஸத்³த³ஹித்வாதி அத்தோ². இமஸ்மிம் பக்கே² பாளியம் ய-காரலோபேன நித்³தே³ஸோதி த³ட்ட²ப்³ப³ம். அகா³ரதோதி அகா³ரவாஸதோ, உத்தரபத³லோபேன, நிஸ்ஸயூபசாரேன வா அயம் நித்³தே³ஸோதி. பி⁴க்க²னஸீலதாதி³லக்க²ணோ பி⁴க்கு²பா⁴வோ பப்³ப³ஜ்ஜாஸஹசரிதாய ஸத்³தி⁴ம் பி⁴க்கு²பா⁴வம் அன்வாசினந்தோதி ஆஹ ‘‘பப்³ப³ஜ்ஜம் பி⁴க்கு²பா⁴வஞ்சா’’தி. கம்மவாசாலக்க²ணே பன பி⁴க்கு²பா⁴வே அதி⁴ப்பேதே ஸமுச்சயத்தோ² ச-ஸத்³தோ³ த³ட்ட²ப்³போ³. அனகா³ரஸ்ஸ பா⁴வோதி ஏதேன பப்³ப³ஜ்ஜானிஸ்ஸிதோ ஸுவிஸுத்³தோ⁴ ஸீலாசாரகு³ணவிஸேஸோ க³ஹிதோ, கஸிகோ³ரக்கா²தி³கம்மபடிக்கே²போ இத⁴ அனுப்பாதா³தீ³ஹி வேதி³தப்³போ³. ஸேஸக்³க³ஹணே பன ஸரணக³மனாதி³வஸேன பப்³ப³ஜ்ஜாய, ஸரணக³மனாதி³வஸேன உபஸம்பதா³ய ச அனேகபே⁴த³த்தா ஆஹ ‘‘ஸப்³ப³தா²பீ’’தி, தேன தேன பகாரேனாதி அத்தோ². புரதோகா³மிதா படிபத்திக³மனேன, ந காயக³மனேனாதி ஆஹ ‘‘நாயகோ’’தி, ஸம்மாபடிபத்தியா நிப்³பா³னஸம்பாபகோதி அத்தோ². ஹிதகிரியாயாதி தி³ட்ட²த⁴ம்மிகாதி³ஹிதசரியாய. கா³ஹணம் அதி⁴ஸீலாதீ³ஸு அச்சந்தாய நியோஜனம், ந கத²னமத்தந்தி த³ஸ்ஸேந்தோ ‘‘கா³ஹேதா’’தி வத்வா ‘‘ஸிக்கா²பேதா’’தி ஆஹ. தி³ட்டா²னுக³திந்தி தி³ட்டி²யா அனுக³மனந்தி த³ஸ்ஸேந்தோ ‘‘த³ஸ்ஸனானுக³தி’’ந்தி வத்வா ஸிக்கா²த்தயஸங்க³ஹம் ப⁴க³வதோ ஸாஸனம் தேன தி³ட்ட²த்தா தி³ட்டி², தஸ்ஸ தஸ்ஸேவ க²மனவஸேன க²ந்தி, ருச்சனவஸேன ருசி, தம்தி³ட்டி²க²ந்திருசிகாவ ப⁴க³வதோ ஸாவகாதி ஆஹ ‘‘யம்தி³ட்டி²கோ’’திஆதி³.

ஏஸ கிர அலத்தா²தி ஸம்ப³ந்தோ⁴. தே³வபுத்தே வியாதிஆதி³ கஸ்ஸசி பாரிஜுஞ்ஞஸ்ஸ அபா⁴வதீ³பனதோ ‘‘ஸத்³தா⁴யா’’திஆதி³னா வுத்தஸ்ஸ பப்³ப³ஜிதபா⁴வஸ்ஸ பாகடீகரணம். ஸத்³தா⁴ய க⁴ரா நிக்க²ம்ம பப்³ப³ஜித்வாதி இத³ம் ஹட்ட²பஹட்டா²தி³பா⁴வஸ்ஸ காரணவசனம். கா⁴ஸச்சா²த³னபரமதாய ஸந்துட்டே²தி இத³ம் அனுஸ்ஸங்கிதாபரிஸங்கிததாய காரணவசனந்தி த³ட்ட²ப்³ப³ம்.

ஏவமேதந்திஆதி³னா ஆமேடி³தவசனம் ஸம்பஹம்ஸனவஸேன, பஸாத³வஸேன வா கதந்தி த³ட்ட²ப்³ப³ம். ததா² ஹி ஏவம்-ஸத்³தோ³ ஸம்படிச்ச²னத்தோ² அப்³ப⁴னுமோத³னத்தோ² ச வுத்தோ. மமந்தி உபயோக³த்தே² ஸாமிவசனம், நிபாதபத³ம் வா ஏதம் ‘‘ம’’ந்தி இமினா ஸமானத்த²ந்தி த³ட்ட²ப்³ப³ம். ஆதீ³னீதி ஆதி³-ஸத்³தே³ன நஜீவிகாபகதாதி³ம் ஸங்க³ண்ஹாதி ஈதி³ஸானம்யேவாதி ஸத்³தா⁴பப்³ப³ஜ்ஜாய விபா⁴விதஅனபி⁴ஜ்ஜா²லுஆதி³ஸபா⁴வானம்யேவ, ந இதரேஸம் அபி⁴ஜ்ஜா²லுஸபா⁴வானம். வுத்தஞ்ஹேதம் –

‘‘ஸங்கா⁴டிகண்ணே சேபி மே, பி⁴க்க²வே, பி⁴க்கு² க³ஹேத்வா பிட்டி²தோ பிட்டி²தோ அனுப³ந்தோ⁴ அஸ்ஸ பதே³ பத³ம் நிக்கி²பந்தோ, ஸோ ச ஹோதி அபி⁴ஜ்ஜா²லு காமேஸு திப்³ப³ஸாராகோ³ ப்³யாபன்னசித்தோ பது³ட்ட²மனஸங்கப்போ முட்ட²ஸ்ஸதி அஸம்பஜானோ அஸமாஹிதோ விப்³ப⁴ந்தசித்தோ பாகடிந்த்³ரியோ, அத² கோ² ஆரகாவ மம அஹஞ்ச தஸ்ஸா’’தி (இதிவு. 92).

அஜ்ஜோ²கா³ஹேத்வா அதி⁴ப்பேதத்த²ம் ஸம்ப⁴விதும் ஸாதே⁴தும் து³க்கா²னீதி து³ரபி⁴ஸம்ப⁴வானி. அட்ட²கதா²யம் பன தத்த² நிவாஸோயேவ து³க்கோ²தி த³ஸ்ஸேதும் ‘‘ஸம்ப⁴விதும் து³க்கா²னி து³ஸ்ஸஹானீ’’தி வுத்தம். அரஞ்ஞவனபத்தா²னீதி அரஞ்ஞலக்க²ணப்பத்தானி வனஸண்டா³னி. வனபத்த²-ஸத்³தோ³ ஹி ஸண்ட³பூ⁴தே ருக்க²ஸமூஹேபி வத்ததீதி அரஞ்ஞக்³க³ஹணம். கிஞ்சாபீதி அனுஜானனஸம்பா⁴வனத்தே² நிபாதோ. கிம் அனுஜானாதி? நிப்பரியாயதோ அரஞ்ஞாபா⁴வம் ‘‘கா³மதோ ப³ஹி அரஞ்ஞ’’ந்தி. தேனாஹ ‘‘நிப்பரியாயேனா’’திஆதி³. கிம் ஸம்பா⁴வேதி? ஆரஞ்ஞகங்க³னிப்பா²த³கத்தம். யஞ்ஹி ஆரஞ்ஞகங்க³னிப்பா²த³கம், தம் விஸேஸதோ ‘‘அரஞ்ஞ’’ந்தி வுத்தந்தி. தேனேவாஹ ‘‘யம் தம் பஞ்சத⁴னுஸதிக’’ந்திஆதி³. நிக்க²மித்வா ப³ஹிஇந்த³கீ²லாதி இந்த³கீ²லதோ ப³ஹி நிக்க²மித்வா, ததோ ப³ஹி பட்டா²யாதி அத்தோ². ப³ஹி இந்த³கீ²லாதி யத்த² த்³வே தீணி இந்த³கீ²லானி, தத்த² ப³ஹித்³தா⁴ இந்த³கீ²லதோ பட்டா²ய, யத்த² தம் நத்தி², தத்த² தத³ரஹட்டா²னதோ பட்டா²யாதி வத³ந்தி. யஸ்மா ப³ஹி இந்த³கீ²லதோ பட்டா²ய மனுஸ்ஸூபசாரே ப⁴யபே⁴ரவம் நத்தி², தஸ்மா இத⁴ நாதி⁴ப்பேதந்தி த³ட்ட²ப்³ப³ம்.

கா³மந்தந்தி கா³மஸமீபம். அனுபசாரட்டா²னந்தி நிச்சகிச்சவஸேன நுபசரிதப்³ப³ட்டா²னம். தேனாஹ ‘‘யத்த² ந கஸீயதி ந வபீயதீ’’தி. பந்தானீதி இமினா ‘‘பரியந்தான’’ந்தி இமஸ்ஸ பரியாயஸ்ஸ இத⁴ பாளியம் க³ஹிதத்தா வுத்தம் ‘‘பரியந்தானந்தி இமமேகம் பரியாயம் ட²பேத்வா’’தி. தூ³ரானந்தி பன அயம் பரியாயோ ட²பேதப்³போ³ ஸியா தஸ்ஸாபி ‘‘பந்தானீ’’தி இமினாவ அத்த²தோ க³ஹிதத்தா, ததா² ஸதி ‘‘ந மனுஸ்ஸூபசாரான’’ந்தி ஏதி³ஸானம்பி ட²பேதப்³ப³தா ஆபஜ்ஜதி, தஸ்மா ஸத்³த³தோ ஏவ ட²பனம் த³ட்ட²ப்³ப³ம். பவிவேகந்தி பகாரதோ, பகாரேஹி வா விவேசனம், ரூபாதி³புது²த்தாரம்மணே பகாரதோ க³மனாதி³இரியாபத²ப்பகாரேஹி அத்தனோ காயஸ்ஸ விவேசனம் க³ச்ச²தோபி திட்ட²தோபி நிஸஜ்ஜதோபி ஏகஸ்ஸேவ பவத்ததி. தேனேவ ஹி விவேசேதப்³பா³னம் விவேசனாகாரஸ்ஸ ச பே⁴த³தோ ப³ஹுவித⁴த்தா தே ஏகத்தேன க³ஹேத்வா ‘‘பவிவேக’’ந்தி ஏகவசனேன வுத்தம். து³க்கரம் பவிவேகந்தி வா பவிவேகம் கத்தும் ந ஸுக²ந்தி அத்தோ². ஏகீபா⁴வேதி ஏகிகபா⁴வே. த்³வயம்த்³வயாராமோதி த்³வின்னம் த்³வின்னம் பா⁴வாபி⁴ரதோ. ஹரந்தி வியாதி ஸம்ஹரந்தி விய விகா⁴துப்பாத³னேன. தேனாஹ ‘‘க⁴ஸந்தி வியா’’தி, ப⁴யஸந்தாஸுப்பாத³னேன கா²தி³தும் ஆக³தா யக்க²ரக்க²ஸபிஸாசாத³யோ வியாதி அதி⁴ப்பாயோ. ஈதி³ஸஸ்ஸாதி அலத்³த⁴ஸமாதி⁴னோ. திணபண்ணமிகா³தி³ஸத்³தே³ஹீதி வாதேரிதானம் திணபண்ணாதீ³னம் மிக³பக்கி²ஆதீ³னஞ்ச பி⁴ம்ஸனகேஹி பே⁴ரவேஹி ஸத்³தே³ஹி விவிதே⁴ஹி ச அஞ்ஞேஹி கா²ணுஆதீ³ஹி யக்கா²தி³ஆகாரேஹி உபட்டி²தேஹி பி⁴ம்ஸனகேஹி. ஏவம் து³க்கரம் து³ரபி⁴ஸம்ப⁴வம் நாம கரோந்தோ அஹோ அச்ச²ரியா ஏதேதி விம்ஹிதோ.

காயகம்மந்தவாரகதா²வண்ணனா

35. ஸோளஸஸு டா²னேஸூதி ‘‘யே கோ² கேசீ’’திஆதி³னா பாளியம் வக்க²மானேஸு ஸோளஸஸு காரணேஸு. அபரிஸுத்³த⁴காயகம்மந்ததாத³யோ அரஞ்ஞே விஹரந்தானம் சித்துத்ராஸனிமித்ததாய விஸேஸதோ விக்கே²பாவஹா, பரிஸுத்³த⁴காயகம்மந்ததாத³யோ பன தத³பா⁴வதோ தேஸம் அவிக்கே²பாவஹா. தேனாஹ ‘‘அபரிஸுத்³த⁴காயகம்மந்தஸந்தோ³ஸஹேதூ’’திஆதி³. ஸோளஸஸூதி ச வோதா³னபக்க²ம்யேவ க³ஹேத்வா வுத்தம். ஸம்கிலேஸக்³க³ஹணம்பி யாவதே³வ வோதா³னத³ஸ்ஸனத்த²ந்தி. ஆரம்மணபரிக்³க³ஹரஹிதானந்தி அபரிஸுத்³த⁴காயகம்மந்தாதி³கஸ்ஸ அரஞ்ஞே தி³ட்ட²ஸ்ஸ தஸ்ஸ ஆரம்மணஸ்ஸ ‘‘யே கோ² கேசீ’’திஆதி³னா பாளியம் ஆக³தனயேன பரிக்³க³ண்ஹனஞாணரஹிதானம். ஆரம்மணபரிக்³க³ஹயுத்தானந்தி ஏத்த² வுத்தவிபரியாயேன அத்தோ² வேதி³தப்³போ³. அத்தனாதி ப⁴க³வந்தம் ஸந்தா⁴ய வத³தி, ஸயந்தி அத்தோ². தாதி³ஸோதி ஆரம்மணபரிக்³க³ஹயுத்தோ.

ஸம்பு³ஜ்ஜ²தி ஏதேனாதி ஸம்போ³தோ⁴, அரியமக்³கோ³தி ஆஹ ‘‘அரியமக்³க³ப்பத்திதோ’’தி. அக்³க³மக்³கா³தி⁴க³மாதீ⁴னோ பு³த்³தா⁴னம் ஸப்³ப³ஞ்ஞுதஞ்ஞாணாதி⁴க³மோதி ஆஹ ‘‘அனபி⁴ஸம்பு³த்³த⁴ஸ்ஸாதி அப்படிவித்³த⁴சதுஸச்சஸ்ஸா’’தி. அனவஸேஸதோ ஞேய்யம், பு³ஜ்ஜி²தும் அரஹதீதி போ³தி⁴, மஹாவீரியதாதி³னா தத்த² விஸேஸயோக³தோ ஸத்தோதி ஆஹ ‘‘பு³ஜ்ஜ²னகஸத்தஸ்ஸா’’தி. தேனாஹ ‘‘ஸம்மாஸம்போ³தி⁴’’ந்திஆதி³. நியதபா⁴வப்பத்திதோ பட்டா²ய மஹாஸத்தா யதா² மஹாபோ³தி⁴யானபடிபதா³ ஹானபா⁴கி³யா, டி²திபா⁴கி³யா வா ந ஹோதி, அத² கோ² விஸேஸபா⁴கி³யா நிப்³பே³த⁴பா⁴கி³யா ச ஹோதி, ததா² படிபஜ்ஜனதோ போ³தி⁴யம் நின்னகோ³ணபப்³பா⁴ரா ஏவாதி ஆஹ ‘‘போ³தி⁴யா வா ஸத்தஸ்ஸேவ லக்³க³ஸ்ஸேவா’’தி. தேனாஹ ‘‘தீ³பங்கரஸ்ஸ ஹீ’’திஆதி³. அட்ட²த⁴ம்மஸமோதா⁴னேனாதி –

‘‘மனுஸ்ஸத்தம் லிங்க³ஸம்பத்தி, ஹேது ஸத்தா²ரத³ஸ்ஸனம்;

பப்³ப³ஜ்ஜா கு³ணஸம்பத்தி, அதி⁴காரோ ச ச²ந்த³தா’’தி. (பு³. வம். 2.59) –

இமேஸம் அபி⁴னீஹாரஸ்ஸ அங்க³பூ⁴தானம் அட்ட²ன்னம் த⁴ம்மானம் ஸமோதா⁴னேன ஸமவதா⁴னேன.

பப்³ப³ஜ்ஜூபக³தாதி பப்³ப³ஜ்ஜம் உபக³தா. தேன பப்³ப³ஜ்ஜாமத்தேன ஸமணா, ந ஸமிதபாபதாயாதி த³ஸ்ஸேதி. ஜாதிமத்தேன இத⁴ ப்³ராஹ்மணாதி அதி⁴ப்பேதாதி ஆஹ ‘‘போ⁴வாதி³னோ வா’’தி. தே ஹி ‘‘போ⁴ போ⁴’’தி வத³னஸீலா, தேனாஹ ‘‘போ⁴வாதீ³ நாம ஸோ ஹோதி, ஸசே ஹோதி ஸகிஞ்சனோ’’தி (த⁴. ப. 396; ஸு. நி. 625). பாணாதிபாதாதி³னாதி ஆதி³-ஸத்³தே³ன அதி³ன்னாதா³னம் அப்³ரஹ்மசரியஞ்ச ஸங்க³ண்ஹாதி. அபரிஸுத்³தே⁴னாதி ச விஸேஸனம் காயகம்மந்தாபேக்கா²ய, ந பாணாதிபாதாதி³அபேக்கா²ய. ந ஹி பாணாதிபாதாதி³கோ தஸ்ஸ புப்³ப³பா⁴க³பயோகோ³ ச கோசி பரிஸுத்³தோ⁴ நாம அத்தி². பா⁴யனட்டே²ன ப⁴யம், பீ⁴ருதாவஹட்டே²ன பே⁴ரவம். ஸந்தோ³ஸஹேதூதி ஸதோ³ஸஹேது. ஸ-ஸத்³தோ³ ஹி இத⁴ ஸானுஸாரோ வுத்தோ. தேனாஹ ‘‘அத்தனோ தோ³ஸஸ்ஸ ஹேதூ’’தி. ஏகந்தேன சித்துத்ராஸலக்க²ணஸ்ஸ ப⁴யஸ்ஸ வஸேன ‘‘ஸாவஜ்ஜ’’ந்தி வுத்தம். சித்துத்ராஸோ ஹி ஏகந்தஸாவஜ்ஜோ பா⁴யனட்டே²ன ப⁴யஞ்சாதி. அக்கே²மந்தி இத³ம் உப⁴யவஸேன. சித்துத்ராஸோபி ஹி ஸரீரசித்தானம் அனத்தா²வஹதோ அக்கே²ம, ததா² ப⁴யானகாரம்மணம்பீதி. அட்ட²கதா²யம் பன அத்த²த்³வயம் யதா²ஸங்க்²யம் யோஜிதம். ஸயம் பரிகப்பிதப⁴யானகாரம்மணனிமித்தம் சித்துத்ராஸஸமுப்பாத³னவஸேன ஆனேந்தா ப⁴யபே⁴ரவம் அவ்ஹாயந்தி விய ஹோந்தீதி வுத்தம் ‘‘அவ்ஹாயந்தீதி பக்கோஸந்தீ’’தி. தேதி மாரிதமனுஸ்ஸானம் ஞாதிமித்தாத³யோ. க³ச்ச²ம் க³ஹனபூ⁴தம் மஹந்தம் கண்டகஸண்ட³ம், கு³ம்ப³ம் நாதிமஹந்தந்தி வத³ந்தி. க³ச்ச²ந்தி பன திணவனம் வேதி³தப்³ப³ம், ‘‘க³ச்சே² ருள்ஹதிணே’’தி வுத்தம், கு³ம்ப³ம் கண்டகலதாதி³ப⁴ரிதாவிருள்ஹம். ப³த்³தா⁴ வதி⁴தா வியாதி ப³த்³தா⁴ ஹுத்வா தாளியமானா விய.

‘‘ந கோ² பனாதி ஏத்த² கோ²தி அவதா⁴ரணத்தே² நிபாதோ, பனா’’தி விஸேஸத்தே². தேனேதம் த³ஸ்ஸேதி ‘‘அஞ்ஞே ஸமணப்³ராஹ்மணா விய அஹம் அபரிஸுத்³த⁴காயகம்மந்தோ ஹுத்வா அரஞ்ஞவனபத்தா²னி பந்தானி ஸேனாஸனானி ந கோ² பன படிஸேவாமி, பரிஸுத்³த⁴காயகம்மந்தோயேவ பன ஹுத்வா தானி படிஸேவாமீ’’தி. ஏவம் வா ஏத்த² அத்த²யோஜனா வேதி³தப்³பா³. ‘‘பரிஸுத்³த⁴காயகம்மந்தோஹமஸ்மீ’’தி ஹி தேன அவதா⁴ரணேன விபா⁴விதத்த²த³ஸ்ஸனம். தேஸமஹம் அஞ்ஞதரோதி தாய பரிஸுத்³த⁴காயகம்மதாய தேஸம் அரியானம் அஹம் அஞ்ஞதரோதி காயகம்மபாரிஸுத்³தி⁴யா மஹாஸத்தோ அத்தானம் அரியேஸு பக்கி²பதி. பரமஸல்லேக²பா⁴வப்பத்தா ஹி ததா³ போ³தி⁴ஸத்தஸ்ஸ காயகம்மபாரிஸுத்³தி⁴, ததா² வசீகம்மாதி³பாரிஸுத்³தி⁴, யதோ மாரோ ரந்த⁴க³வேஸீ ஹுத்வா ச²ப்³ப³ஸ்ஸானி நிரந்தரம் அனுப³ந்தோ⁴ அந்தரம் ந லப⁴தி. தேனாஹ –

‘‘ஸத்த வஸ்ஸானி ப⁴க³வந்தம், அனுப³ந்தி⁴ம் பதா³பத³ம்;

ஓதாரம் நாதி⁴க³ச்சி²ஸ்ஸம், ஸம்பு³த்³த⁴ஸ்ஸ ஸதீமதோ’’தி. (ஸு. நி. 448);

பி⁴ய்யோதி அதி⁴கம் ஸவிஸேஸம், உபரூபரி வா. பீ⁴ததஸிதா ப⁴யூபத்³த³வேன ச²ம்பி⁴தஸரீரா ஹட்ட²லோமா ஹோந்தி, அபீ⁴தாதஸிதா பன ப⁴யூபத்³த³வாபா⁴வதோ அஹட்ட²லோமா கே²மேன ஸோத்தி²னா திட்ட²ந்தீதி தேஸம் கே²மப்பத்தி ஸோத்தி²பா⁴வோ வா பன்னலோமதாய பாகடோ ஹோதீதி பாளியம் ‘‘பல்லோம’’ந்தி வுத்தம். தேனாஹ ‘‘பன்னலோமத’’ந்திஆதி³. ஏத்த² ச பி⁴ய்யோ பல்லோமமாபாதி³ம் அரஞ்ஞே விஹாராயாதி படிஞ்ஞானித்³தே³ஸோ. பரிஸுத்³த⁴காயகம்மந்தோஹமஸ்மீதி ஹேதுத³ஸ்ஸனம். ‘‘யே ஹி வோ அரியா’’தி ஸதி³ஸூதா³ஹரணத³ஸ்ஸனம். யே கோ² கேசி ஸமணா வா ப்³ராஹ்மணா வாதி விஸதி³ஸூதா³ஹரணத³ஸ்ஸனம். ஸேஸானி அன்வயப்³யதிரேகவிபா⁴வனானீதி த³ட்ட²ப்³ப³ந்தி அயமேத்த² யுத்திவிபா⁴வனா. இமினா நயேன ஸேஸவாரேஸுபி யுத்திவிபா⁴வனா வேதி³தப்³பா³.

காயகம்மந்தவாரகதா²வண்ணனா நிட்டி²தா.

வசீகம்மந்தவாராதி³கதா²வண்ணனா

36. அபரிஸுத்³தே⁴ன முஸாவாதா³தி³னாதி ஏத்த² யம் வத்தப்³ப³ம், தம் ஹேட்டா² வுத்தனயமேவ. ஆதி³-ஸத்³தே³ன பன ஸங்க³ஹிதம் தேஸஞ்ச முஸாவாதா³தீ³னம் பவத்திபே⁴த³ம் ப⁴யபே⁴ரவாவ்ஹானமுகே²ன த³ஸ்ஸேதும் ‘‘கத²’’ந்திஆதி³ வுத்தம். தத்த² யம் வத்தப்³ப³ம், தம் ஹேட்டா² வுத்தமேவ.

ப⁴ண்டே³ஸூதி ஸவிஞ்ஞாணகாவிஞ்ஞாணகேஸு ப⁴ண்டே³ஸு. உப்பாதே³த்வாதி அத்தனோ பரிணாமவஸேன அபி⁴ஜ்ஜா²ஸங்கா²தம் விஸமலோப⁴ம் உப்பாதே³த்வா. குஜ்ஜி²த்வாதி வினாஸசிந்தாவஸேன பரஸ்ஸ குஜ்ஜி²த்வா. ஏவஞ்ஹி நேஸம் ‘‘யேஸம் அபரஜ்ஜி²ம்ஹா, தே இதா³னி அனுப³ந்தி⁴த்வா’’திஆதி³னா பச்சா² ஆஸங்குப்பத்தி ஸியா. ‘‘ஏதே அம்ஹாகம் பரிக்³க³ஹவத்து²ம் க³ஹேதுகாமா மஞ்ஞே, வினாஸம் காதுகாமா மஞ்ஞே’’தி யதா² பரே பரதோ தேஸம் அபி⁴ஜ்ஜா²ப்³யாபாத³ப்பவத்திம் பரிக்³க³ண்ஹந்தி, தாதி³ஸம் மனோகம்மந்தம் ஸந்தா⁴ய ‘‘தே பரேஸ’’ந்திஆதி³ வுத்தந்தி த³ட்ட²ப்³ப³ம். காமம் அகுஸலகாயகம்மவசீகம்மபவத்திகாலேபி அபி⁴ஜ்ஜா²த³யோ பவத்தந்தியேவ, ததா³ பன தே சேதனாபக்கி²கா வா அப்³போ³ஹாரிகா வாதி மனோகம்மந்தவாரே ஏவ அபி⁴ஜ்ஜா²தி³வஸேன யோஜனா கதா. அத² வா த்³வாரந்தரே பவத்தானம்பி பாணாதிபாதாதீ³னம் வசீகம்மாதி³பா⁴வாபா⁴வோ விய த்³வாரந்தரே பவத்தானம்பி அபி⁴ஜ்ஜா²தீ³னம் காயகம்மாதி³பா⁴வாபா⁴வோ, மனோகம்மபா⁴வோ ஏவ பன ஸித்³தோ⁴தி கத்வா மனோகம்மந்தவாரே ஏவ அபி⁴ஜ்ஜா²த³யோ உத்³த⁴டா. ததா² ஹி வுத்தம் –

‘‘த்³வாரே சரந்தி கம்மானி, ந த்³வாரா த்³வாரசாரினோ;

தஸ்மா த்³வாரேஹி கம்மானி, அஞ்ஞமஞ்ஞம் வவத்தி²தா’’தி. (த⁴. ஸ. அட்ட². 1.காயகம்மத்³வார);

கிஞ்சாபி அட்ட²கதா²யம் ஸாஸனே பப்³ப³ஜிதவஸேன ஆஜீவவாரே ப⁴யபே⁴ரவாவ்ஹானம் யோஜிதம், ‘‘யே கோ² கேசி ஸமணா வா ப்³ராஹ்மணா வா’’தி பன வசனதோ பா³ஹிரகவஸேன க³ஹட்ட²வஸேன ச யோஜனா வேதி³தப்³பா³. க³ஹட்டா²னம்பி ஹி ஜாதித⁴ம்மகுலத⁴ம்மதே³ஸத⁴ம்மவிலோமனவஸேன அஞ்ஞதா²பி மிச்சா²ஜீவோ லப்³ப⁴தேவ, தாய ஏவ ச ஆஜீவவிபத்தியா அஞ்ஞதா² வா நேஸம் அரஞ்ஞவாஸோ ஸம்ப⁴வேய்யாதி.

37. ஏவம் ஆஜீவட்ட²மகஸீலவஸேன ப⁴யபே⁴ரவம் த³ஸ்ஸேத்வா ததோ பரம் நீவரணப்பஹானாதி³வஸேன தம் த³ஸ்ஸேதும் தே³ஸனா வட்³டி⁴தாதி தத³த்த²ம் விவரந்தோ ‘‘இதோ பர’’ந்திஆதி³மாஹ. தத்த² நீவரணவஸேன புன வுத்தாதி அயமதி⁴ப்பாயோ – ஏவம் ஸீலவிஸுத்³தி⁴மத்தம்பி அரஞ்ஞே விஹரதோ ப⁴யபே⁴ரவாபா⁴வம் ஆவஹதி, கிமங்க³ம் பன நீவரணானி பஹாய அப்பனாஸமாதி⁴ம், உபசாரஸமாதி⁴மேவ வா ஸம்பாத³யதோதி ஸமாதி⁴ஸம்பதா³ய ப⁴யபே⁴ரவாபா⁴வஹேதுகம் த³ஸ்ஸேதும் உபரி தே³ஸனா வட்³டி⁴தாதி அகுஸலமனோகம்மந்தபா⁴வேன க³ஹிதாபி அபி⁴ஜ்ஜா²ப்³யாபாதா³ நீவரணவஸேன புன வுத்தாதி அதி⁴ப்பாயோ. அபி⁴-புப்³போ³ ஜா²-ஸத்³தோ³ அபி⁴ஜ்ஜா²யனத்தோ²தி ஆஹ ‘‘பரப⁴ண்டா³தி³அபி⁴ஜ்ஜா²யனஸீலா’’தி. வத்து²காமேஸூதி ரூபாதீ³ஸு கிலேஸகாமஸ்ஸ வத்து²பூ⁴தேஸு காமேஸு. ப³ஹலகிலேஸராகா³தி தி²ரமூலது³ம்மோசனீயதாஹி அஜ்ஜோ²ஸானே பபூ⁴தகிலேஸகாமா. அபி⁴ஜ்ஜா² சேத்த² அப்பத்தவிஸயபத்த²னா, திப்³ப³ஸாராகோ³ ஸம்பத்திவிஸயாபி⁴னிவேஸோ. தே ஹி லோபா⁴பி⁴பூ⁴தா புக்³க³லா அத்தனி திப்³ப³ஸாபேக்க²தாய ஏவ லோபா⁴பி⁴பூ⁴ததாய அவவத்தி²தாரம்மணா அவினிச்சி²தவிஸயா அரஞ்ஞே தம் தம் விஸயம் அனுபதா⁴ரித்வா விஹரந்தி, ரஜ்ஜுஆதீ³னி யாதா²வதோ ந ஸல்லக்கே²ந்தி. தேனாஹ ‘‘தேஸ’’ந்திஆதி³. உபட்டா²தி ஸந்தசித்ததாய. ததா² ஹி வுத்தம் ‘‘ஆகுலசித்தா’’தி. ‘‘இதா³னிம்ஹ நட்டா²’’தி தஸந்தி விதஸந்தி, ஆக³ந்த்வா பா³தி⁴யமானா விய ஹோந்தி, ஏவம் தம் ப⁴யபே⁴ரவம் அத்தனி ஸமாரோபனட்டே²ன அவ்ஹாயந்தி பக்கோஸந்தீதி யோஜனம் ஸந்தா⁴யாஹ ‘‘ஸேஸம் தாதி³ஸமேவா’’தி. ‘‘அனபி⁴ஜ்ஜா²லுஹமஸ்மீ’’தி பாளிபதே³ சிரபரிசிதஅலோப⁴ஜ்ஜா²ஸயதாய கமலத³லே ஜலபி³ந்து³ விய அலக்³க³மானஸத்தா ஸப்³ப³த்த² அனபேக்கோ²ஹமஸ்மீதி அத்தோ².

38. பகதிபா⁴வவிஜஹனேனாதி பரிஸுத்³த⁴பா⁴வஸங்கா²தஸ்ஸ ச பகதிபா⁴வஸ்ஸ விஜஹனேன. ஸாவஜ்ஜத⁴ம்மஸமுப்பத்தியா ஹி சித்தஸ்ஸ அனவஜ்ஜபா⁴வோ ஜஹிதோ ஹோதீதி. விபன்னசித்தாதி கிலேஸாஸுசிதூ³ஸிததாய குதி²தசித்தா. தேனாஹ ‘‘கிலேஸானுக³தம்…பே… பூதிகம் ஹோதீ’’தி. பது³ட்ட²மனஸங்கப்பாதி விஸஸம்ஸட்ட²முத்தம் விய தோ³ஸேன பதூ³ஸிதசித்தஸங்கப்பா. வுத்தனயேனேவாதி ‘‘தே அவவத்தி²தாரம்மணா ஹோந்தீ’’திஆதி³னா அபி⁴ஜ்ஜா²லுவாரே வுத்தனயேனேவ. யதா² ஹி லோப⁴வஸேன, ஏவம் தோ³ஸாதி³வஸேனபி அவவத்தி²தாரம்மணா ஹோந்தீதி. ஸப்³ப³த்தா²தி ஹேட்டா² உபரி சாதி ஸப்³ப³த்த² டா²னேஸு வண்ணேதப்³பா³.

39. ‘‘யா சித்தஸ்ஸ அகல்லதா அகம்மஞ்ஞதா’’தி வசனதோ தி²னம் சித்தஸ்ஸ கே³லஞ்ஞபா⁴வேன க³ஹணம் க³ச்ச²தீதி ஆஹ ‘‘சித்தகே³லஞ்ஞபூ⁴தேன தி²னேனா’’தி. ததா² ‘‘யா காயஸ்ஸ அகல்லதா அகம்மஞ்ஞதா’’தி (த⁴. ஸ. 1163) வசனதோ மித்³த⁴ம் விஸேஸதோ நாமகாயஸ்ஸ கே³லஞ்ஞபா⁴வேன க³ஹணம் க³ச்ச²தீதி ஆஹ ‘‘ஸேஸனாமகாயகே³லஞ்ஞபூ⁴தேன மித்³தே⁴னா’’தி. ஸேஸக்³க³ஹணஞ்சேத்த² சித்தனிவத்தனத்த²ம். இத³ஞ்ச மித்³த⁴ம் ரூபகாயஸ்ஸபி கே³லஞ்ஞாவஹந்தி த³ட்ட²ப்³ப³ம் நித்³தா³ய ஹேதுபா⁴வதோ. ததா² ஹி தம் ‘‘நித்³தா³ சபலாயிகா’’தி நித்³தி³ட்ட²ம். தேனாஹ ‘‘தே நித்³தா³ப³ஹுலா ஹோந்தீ’’தி.

40. உத்³த⁴ச்சபகதிகாதி உத்³த⁴ச்சஸீலா அனவட்டி²தஸபா⁴வா. அனவட்டா²னரஸஞ்ஹி உத்³த⁴ச்சம். தேனாஹ ‘‘விப்ப²ந்த³மானசித்தா’’திஆதி³. இதா⁴தி ‘‘அவூபஸந்தசித்தா’’தி இமஸ்மிம் பதே³. குக்குச்சம் க³ஹேதும் வட்டதி ஸம்வண்ணனாவஸேன பச்சா²னுதாபஸ்ஸபி சித்தஸ்ஸ அவூபஸமகரத்தா. உத்³த⁴ச்சம் பன ஸரூபேனேவ க³ஹிதந்தி அதி⁴ப்பாயோ.

41. ஏகமேவித³ம் பஞ்சமம் நீவரணம் யதி³த³ம் கங்கா² விசிகிச்சா²தி ச. யதி³ ஏவம் கஸ்மா த்³விதா⁴ கத்வா வுத்தந்தி ஆஹ ‘‘கிம் நு கோ²’’திஆதி³. கங்க²னதோதி ஸம்ஸயனதோ. விசிகிச்சா²தி வுச்சதி ‘‘த⁴ம்மஸபா⁴வம் விசினந்தோ ஏதாய கிச்ச²தி, விக³தா திகிச்சா² வா’’தி கத்வா.

42. ஏவம் நீவரணாபா⁴வகித்தனமுகே²ன ஸமாதி⁴ஸம்பதா³ய ப⁴யபே⁴ரவாபா⁴வம் த³ஸ்ஸேத்வா இதா³னி அத்துக்கம்ஸனாதி³அபா⁴வகித்தனமுகே²ன பஞ்ஞாஸம்பதா³ய ப⁴யபே⁴ரவாபா⁴வம் த³ஸ்ஸேதும் ‘‘யே கோ² கேசீ’’திஆதி³னா உபரி தே³ஸனா வட்³டி⁴தா, தத³த்த²ம் விவரிதும் ‘‘அத்துக்கம்ஸனகா’’திஆதி³ வுத்தம். உக்கம்ஸேந்தி மானவஸேன பக்³க³ண்ஹனேன. தேனாஹ ‘‘உச்சே டா²னே ட²பேந்தீ’’தி. தி²னமித்³த⁴உத்³த⁴ச்சகுக்குச்சவிசிகிச்சா²வாரேஸு க³ய்ஹமானம் அபி⁴ஜ்ஜா²லுவாரஸதி³ஸந்தி தத்த² தம் அனாமஸித்வா அத்துக்கம்ஸகவாரே கிஞ்சி விஸதி³ஸம் அத்தீ²தி தம் த³ஸ்ஸேதும் ‘‘தே கத²’’ந்திஆதி³ வுத்தம்.

43. ச²ம்ப⁴னம் ச²ம்போ⁴, காயஸ்ஸ ச²ம்பி⁴தத்தஹேதுபூ⁴தோ ப³லவசித்துத்ராஸோ. ஸோ ஏதேஸம் அத்தீ²தி ச²ம்பீ⁴. தேனாஹ ‘‘காயத²ம்ப⁴னா’’திஆதி³. பீ⁴ருகஜாதிகாதி பா⁴யனகஸீலா. ஏகமேவ சேதம் ஸாவஜ்ஜப⁴யம் காயே ச²ம்பி⁴தத்தஸ்ஸ, சித்தே ச காயே ச த²த்³த⁴பா⁴வஸ்ஸ உப்பாத³னவஸேன ‘‘ச²ம்போ⁴ பீ⁴ருதா’’தி ச வுச்சதீதி தம்ஸமங்கி³னோ ஸமணப்³ராஹ்மணா ‘‘ச²ம்பீ⁴ பீ⁴ருகஜாதிகா’’தி வுத்தா, இத⁴ ப⁴யபே⁴ரவம் ஸரூபேனேவ க³ஹிதம்.

44. லப்³ப⁴தி பாபுணீயதீதி லாப⁴ஸத்³த³ஸ்ஸ கம்மஸாத⁴னத்தமாஹ. ஸக்கச்சம் காதப்³போ³ தா³தப்³போ³தி ஸக்காரோ. தத³த்த²தீ³பகந்தி லாபா⁴தி³ம் பஹாய அரஞ்ஞே வஸதோ ப⁴யபே⁴ரவாவ்ஹாயனம் நத்தீ²தி தீ³பகம். ஸோ கிர லாப⁴க³ருதாயேவ பியோ கா³மோ ஏதஸ்ஸாதி ‘‘பியகா³மிகோ’’தி நாமம் லப⁴தி. கம்மமுத்தோதி ஜராஜிண்ணத்தா கம்மம் காதும் ந ஸக்கோதீதி ஸாமிகேஹி விஸ்ஸட்டோ².

45. அலஸபா⁴வேன ஸம்மாவாயாமஸ்ஸ அகரணதோ குச்சி²தம் ஸீத³ந்தீதி குஸீதா. வீரஸ்ஸ பா⁴வோ, கம்மம் வா வீரியம், விதி⁴னா வா ஈரேதப்³ப³ம் பவத்தேதப்³ப³ந்தி வீரியம், ஸம்மாவாயாமோ. தேன ஹீனா ஹீனவீரியா. காயவிஞ்ஞத்தியா ஸமுட்டா²னவஸேன பவத்தவீரியம் காயிகவீரியம், வத்தகரணசங்கமனாதீ³ஸு த³ட்ட²ப்³ப³ம். நிஸஜ்ஜ ஸயித்வா ச கம்மட்டா²னமனஸிகாரவஸேன பவத்தவீரியம் சேதஸிகவீரியம். தத்த² புரிமம் விஸேஸதோ கோஸஜ்ஜபடிபக்க²தாவஸேன, து³தியம் வீரியாரம்ப⁴தாவஸேன பாகடம் ஹோதீதி த³ஸ்ஸேந்தோ ‘‘குஸீதா’’திஆதி³மாஹ. தே ஹி ஹீனவீரியா அலஸதாயேவ ஆரம்மணவவத்தா²னமத்தம்பி காதும் ந ஸக்கோந்தி.

46. நட்ட²ஸ்ஸதீதி அலப்³ப⁴மானஸ்ஸதி, பச்சயவேகல்லேன விஜ்ஜமானாயபி ஸதியா ஸதிகிச்சம் காதும் அஸமத்த²தாய ஏவம் வுத்தம். ந ஸம்பஜானாதி அஸம்பஜானா. தம்யோக³னிவத்தியஞ்சாயம் அ-காரோ ‘‘அஹேதுகா த⁴ம்மா (த⁴. ஸ. 2.து³கமாதிகா), அபி⁴க்கு²கோ ஆவாஸோ’’திஆதீ³ஸு (சூளவ. 76) வியாதி ஆஹ ‘‘பஞ்ஞாரஹிதா’’தி. நனு ஸோளஸமோ பஞ்ஞாவாரோ, அயம் ஸதிவாரோ, தத்த² கஸ்மா ஸம்கிலேஸபக்கே² பஞ்ஞா க³ஹிதாதி சோத³னம் ஸந்தா⁴யாஹ ‘‘இமஸ்ஸ சா’’திஆதி³. ஸதிபா⁴ஜனீயமேவேதம், யதி³த³ம் சுத்³த³ஸமோ வாரோ, பஞ்ஞா பனேத்த² சுத்³த³ஸமே வாரே கேவலா ஸதி து³ப்³ப³லாதி ஸதிது³ப்³ப³ல்யதீ³பனத்த²ம் ‘‘அஸம்பஜானா’’தி படிக்கே²பமுகே²ன வுத்தா. இதா³னி வுத்தமேவத்த²ம் பாகடதரம் காதும் ‘‘து³விதா⁴ ஹீ’’திஆதி³ வுத்தம்.

47. அப்பனாஸமாதி⁴னா, உபசாரஸமாதி⁴னா வா சித்தம் ஆரம்மணே ஸமம், ஸம்மா வா ஆஹிதம் நாம ஹோதி, நாஞ்ஞதா²தி த³ஸ்ஸேந்தோ ‘‘அஸமாஹிதாதி உபசாரப்பனாஸமாதி⁴விரஹிதா’’தி ஆஹ. விப்³ப⁴ந்தசித்தாதி அனவட்டி²தசித்தா. புப்³பே³ நீவரணபா⁴வஸாமஞ்ஞேன உத்³த⁴ச்சம் க³ஹிதம் ‘‘உத்³த⁴தா அவூபஸந்தசித்தா’’தி, இத⁴ ஸமாதா⁴னாபா⁴வேன உத்³த⁴ச்சஹேதுகோ சித்தவிப்³ப⁴மோ வுத்தோ ‘‘அஸமாஹிதா விப்³ப⁴ந்தசித்தா’’தி, அயமேதேஸம் விஸேஸோ. புப்³பே³ வுத்தனயேனாதி புப்³பே³ ‘‘உத்³த⁴ச்சேன ஹி ஏகாரம்மணே சித்தம் விப்ப²ந்த³தி த⁴ஜயட்டி²யம் வாதேன படாகா வியா’’தி (ம. நி. அட்ட². 1.40) வுத்தனயேன. ஸப்³ப³ம் புப்³ப³ஸதி³ஸமேவாதி ப⁴யபே⁴ரவாவ்ஹாயனஸ்ஸ அபி⁴ஜ்ஜா²லுவாரே வுத்தஸதி³ஸதம் ஸந்தா⁴ய வத³தி.

48. து³ப்பஞ்ஞாதி ஏத்த² து³-ஸத்³தோ³ ‘‘து³ஸ்ஸீலோ’’திஆதீ³ஸு விய அபா⁴வத்தோ², ந ‘‘து³க்³க³தி, து³ப்படிபன்னோ’’திஆதீ³ஸு விய க³ரஹத்தோ²தி த³ஸ்ஸேதும் ‘‘நிப்பஞ்ஞானமேதம் அதி⁴வசன’’ந்தி வத்வா ‘‘பஞ்ஞா பன து³ட்டா² நாம நத்தீ²’’தி வுத்தம். தேதி து³ப்பஞ்ஞா. ஸப்³ப³த்தா²தி சதூஸுபி பாட²விகப்பேஸு. ஏலந்தி வா தோ³ஸோ வுச்சதி. தேனாஹ ‘‘யா ஸா வாசா நேலா கண்ணஸுகா²’’தி. ததா² ஹி ஸீலம் ‘‘நேலங்க³’’ந்தி வுத்தம். து³ப்பஞ்ஞா ச கதே²ந்தா ஸதோ³ஸமேவ கத²ம் கதே²ந்தி அபண்டி³தபா⁴வதோ. தேனேவாஹ ‘‘து³ப்³பா⁴ஸிதபா⁴ஸீ’’தி. தஸ்மா ஏலஸப்³பா⁴வதோ ஏலம் முக²ம் ஏதேஸந்தி ஏலமூகா³தி வுத்தாதி ஏவம்பி வா ஏத்த² அத்தோ² த³ட்ட²ப்³போ³. யாய பஞ்ஞாய வஸேன ‘‘பஞ்ஞாஸம்பன்னோ’’தி வுத்தம், தம் ப்³யதிரேகமுகே²ன த³ஸ்ஸேதும் ‘‘நோ ச கோ²’’திஆதி³ வுத்தம். நனு ச போ³தி⁴ஸத்தா ப³ஹுலவிபஸ்ஸனாபஞ்ஞாய ஸமன்னாக³தா ஹோந்தீதி? ஹோந்தி, ததா³ பன போ³தி⁴ஸத்தேன ந விபஸ்ஸனாரம்போ⁴ கதோ, நோ ச விபஸ்ஸனாபஞ்ஞா அதி⁴ப்பேதாதி வுத்தம் ‘‘நோ ச கோ² விபஸ்ஸனாபஞ்ஞாயா’’தி.

கேசி பனேத்த² ‘‘ஸத்³தா⁴விரஹிதா அபரிஸுத்³த⁴காயகம்மந்தாத³யோ விய ப⁴யபே⁴ரவாவ்ஹாயனஸ்ஸ விஸேஸகாரணம், நாபி ஸத்³தா⁴லுதா பல்லோமதாயாதி ஸத்³தா⁴வாரோ அனுத்³த⁴டோ’’தி வத³ந்தி, தம் அகாரணம். கம்மப²லே ஹி ஸத்³த³ஹந்தோ கம்மபடிஸரணதம்யேவ நிஸ்ஸாய ப⁴யபே⁴ரவம் திணாயபி அமஞ்ஞமானோ பல்லோமதமாபஜ்ஜேய்ய. யஸ்மா பன வீரியாத³யோ ஸத்³தா⁴ய வினா நப்பவத்தந்தீதி தேஸம் உபனிஸ்ஸயபூ⁴தா ஸஹஜாதா ச ஸா தக்³க³ஹணேனேவ க³ஹிதா ஹோதீதி விஸும் ந உத்³த⁴டா. ததா² ஹி ஸா ஜா²னஸ்ஸ புப்³ப³பா⁴க³படிபதா³யம்பி ந உத்³த⁴டா, கிம் வா ஏதாய ஸத்³தா⁴ய, அத்³தா⁴ ஸா இமஸ்மிம் ஆரம்மணபரிக்³க³ஹட்டா²னே ந க³ஹேதப்³பா³வ, ததோ த⁴ம்மஸ்ஸாமினா இத⁴ ந உத்³த⁴டா, ஏவம் அஞ்ஞேஸுபி ஏதி³ஸேஸு டா²னேஸு நிச்ச²யோ காதப்³போ³. யதா²னுலோமதே³ஸனா ஹி ஸுத்தந்தகதா²தி.

வசீகம்மந்தவாராதி³கதா²வண்ணனா நிட்டி²தா.

ஸோளஸட்டா²னாரம்மணபரிக்³க³ஹோ நிட்டி²தோ.

ப⁴யபே⁴ரவஸேனாஸனாதி³வண்ணனா

49. ஸோளஸாரம்மணானீதி ஸோளஸட்டா²னானி ஆரம்மணானி. ஏவரூபாஸு ரத்தீஸூதி சாதுத்³த³ஸீஆதி³கா உபரி வக்க²மானா ரத்தியோ ஸந்தா⁴ய வத³தி. ஏவரூபே ஸேனாஸனேதி ஏத்தா²பி ஏஸேவ நயோ. யாதி அனியமதோ உத்³தி³ட்டா²னம் புன ‘‘தா’’தி வசனம் நித்³தே³ஸோ விய ஹோதீதி வுத்தம் ‘‘யா தாதி உப⁴யமேதம் ரத்தீனம்யேவ உத்³தே³ஸனித்³தே³ஸவசன’’ந்தி. அபீ⁴தி லக்க²ணத்தே² ‘‘அஞ்ஞே ச அபி⁴ஞ்ஞாதா ப்³ராஹ்மணமஹாஸாலா’’திஆதீ³ஸு விய. கத²ம் பனேத்த² லக்க²ணத்த²தா வேதி³தப்³பா³? லக்கீ²யதி ஏதேனாதி லக்க²ணந்தி ஆஹ ‘‘சந்த³பாரிபூரியா’’திஆதி³. புண்ணமாஸியம் சந்த³பாரிபூரியா அமாவாஸியம் சந்த³பரிக்க²யேன. ஆதி³-ஸத்³தே³ன சந்த³ஸ்ஸ உபட்³ட⁴மண்ட³லதாராஹுக்³க³ஹதாதீ³னம் ஸங்க³ஹோ த³ட்ட²ப்³போ³. உபஸக்³க³மத்தமேவ அபி⁴-ஸத்³தோ³ லக்கி²தஸத்³தே³னேவ லக்க²ணத்த²ஸ்ஸ விஞ்ஞாயமானத்தாதி அதி⁴ப்பாயோ.

பட²மதி³வஸதோ பபு⁴தீதி பட²மபாடிபத³தி³வஸதோ பட்டா²ய. யஸ்மா சோத³கோ ப⁴க³வதோ காலே அனபி⁴லக்கி²தாபி அபரபா⁴கே³ அபி⁴லக்கி²தா ஜாதா, தஸ்மா தம் அபி⁴லக்க²ணீயதம் உபாதா³ய ‘‘ஸப்³ப³த³ஸ்ஸினா ப⁴க³வதா பஞ்சமீ கஸ்மா ந க³ஹிதா’’தி சோதே³தி, இதரோ ஸப்³ப³காலிகாஸு சாதுத்³த³ஸீஆதீ³ஸு க³ய்ஹமானாஸு அஸப்³ப³காலிகாய கத²ம் க³ஹணந்தி அதி⁴ப்பாயேன ‘‘அஸப்³ப³காலிகத்தா’’தி பரிஹரதி.

ததா²விதா⁴ஸூதி ‘‘அபி⁴ஞ்ஞாதா’’திஆதி³னா யதா² வுத்தா, ததா²விதா⁴ஸு. தே³வதாதி⁴ட்டி²தபா⁴வேன ஆராமாதீ³னம் லோகஸ்ஸ சேதியபா⁴வோதி ஆஹ ‘‘பூஜனீயட்டே²னா’’தி. மனுஸ்ஸா யேபு⁴ய்யேன கா³மாதீ³னம் த்³வாரேஸு ததா²ரூபே ருக்கே² சேதியட்டா²னியே கத்வா வோஹரந்தீதி ஆஹ ‘‘கா³மனிக³மாதி³த்³வாரேஸூ’’திஆதி³. த³ஸ்ஸனமத்தேனபி ஸவனமத்தேனபி ப⁴யுப்பாத³னேன பாகதிகஸத்தே பி⁴ம்ஸேந்தீதி பி⁴ம்ஸனகானி. தேனாஹ ‘‘ப⁴யஜனகானீ’’திஆதி³. பா⁴யதி ஏதஸ்மாதி ப⁴யம், அதிவிய ஸப்படிப⁴யம் பே⁴ரவம்.

ஆயாசனஉபஹாரகரணாரஹந்தி தம்தம்ப³லிகம்மபணிதி⁴கம்மகரணயோக்³க³ம். புப்ப²தூ⁴ப…பே… த⁴ரணிதலந்தி இத³ம் யதா²படிஸூதேன ஸுப்பாதி³னா உபஹாரகரணத³ஸ்ஸனம். கோட்டேந்தோதி பஹரந்தோ, ஸிங்க³ப்பஹாரகு²ரப்பஹாரேஹி ஸத்³த³ம் கரோந்தோதி அதி⁴ப்பாயோ. ஸப்³ப³சதுப்பதா³னம் இத⁴ மகோ³தி நாமம், ந ‘‘அச்ச²சம்மம் மிக³சம்மம் ஏளகசம்ம’’ந்திஆதீ³ஸு (மஹாவ. 259) விய, ரோஹிதோதிஆதி³ மிக³விஸேஸானந்தி அதி⁴ப்பாயோ. சாலேத்வாதி அக்³க³மத்³த³னேன சாலேத்வா. மோரக்³க³ஹணஞ்சேத்த² உபலக்க²ணந்தி த³ஸ்ஸேந்தோ ஆஹ ‘‘இத⁴ ஸப்³ப³பக்கி²க³ஹணம் அதி⁴ப்பேத’’ந்தி. ஏஸ நயோதி இத³ம் யதா² ‘‘மோரோ வா’’தி ஏத்த² வா-ஸத்³தோ³ அவுத்தவிகப்பனத்தோ², ஏவம் ‘‘மிகோ³ வா’’தி ஏத்தா²பீதி மிக³ஸத்³த³ஸ்ஸ விஸேஸத்த²வுத்திதம் ஸந்தா⁴யாஹ. இதோ பபூ⁴தீதி ‘‘யம்னூனாஹம் யா தா ரத்தியோ’’திஆதி³னா ப⁴யபே⁴ரவஸ்ஸ க³வேஸனசிந்தனதோ பபு⁴தி, ந க³வேஸனாரம்ப⁴தோ பபு⁴தி. ‘‘அப்பேவ நாமாஹம் ப⁴யபே⁴ரவம் பஸ்ஸேய்ய’’ந்தி ஏத்தா²பி ஹி ஆரம்மணமேவ ப⁴யபே⁴ரவம். ஸுகா²ரம்மணம் ரூபம் ஸுக²மிவ ‘‘ரூபம் ஸுக²ம் ஸுகா²னுபதிதம் ஸுகா²வக்கந்த’’ந்திஆதீ³ஸு (ஸம். நி. 3.60). கத²ம் ப⁴யக்³க³ஹணேன ச ரூபாரம்மணக்³க³ஹணந்தி ஆஹ ‘‘பரித்தஸ்ஸ சா’’திஆதி³. ‘‘ஆக³ச்ச²தீ’’தி வசனதோ க³வேஸனாரம்ப⁴தோ பபு⁴தி ‘‘ஏதம் ப⁴ய’’ந்தி ஆரம்மணம் அதி⁴ப்பேதந்தி கேசி ‘‘தம் ந பஸ்ஸேய்ய’’ந்தி சக்கு²னா த³ஸ்ஸனஸ்ஸ அதி⁴ப்பேதத்தா, தஸ்மா வுத்தனயேனேவ அத்தோ² க³ஹேதப்³போ³. ப⁴யம் ஆகங்க²மானோதி உபபரிக்க²னவஸேன அஹம் ப⁴யவத்து²ம் ஆகங்க²ந்தோ விஹராமி, தம் கிமத்தி²யம், ஏத்தகோபி ப⁴யஸமன்னாஹாரோ மய்ஹம் அயுத்தோதி அதி⁴ப்பாயோ.

யம் பகாரம் பூ⁴தோ யதா²பூ⁴தோ, ஸோ பனேத்த² பகாரோ இரியாபத²வஸேன யுத்தோ பாளியம் ததா² ஆக³தத்தாதி ஆஹ ‘‘யேன யேன இரியாபதே²ன பூ⁴தஸ்ஸா’’தி. ப⁴விதஸ்ஸாதி இத³ம் ‘‘பூ⁴தஸ்ஸா’’தி இமினா ஸமானத்த²ம் பத³ந்தி த³ட்ட²ப்³ப³ம். ‘‘ஸமங்கீ³பூ⁴தஸ்ஸா’’தி பத³ம் புரிமபத³லோபேன பூ⁴தஸ்ஸாதி வுத்தந்தி த³ஸ்ஸேந்தோ ‘‘ஸமங்கீ³பூ⁴தஸ்ஸ வா’’தி ஆஹ. ப⁴யபே⁴ரவாரம்மணேதி ப⁴யபே⁴ரவாபி⁴மதே ஆரம்மணே. நேவ மஹாஸத்தோ திட்ட²தீதிஆதி³ ‘‘ததா²பூ⁴தோ ச தம் படிவினேய்ய’’ந்தி யதா² சிந்திதம், ததா² படிபன்னபா⁴வத³ஸ்ஸனம். இரியாபத²படிபாடி நாம டா²னக³மனனிஸஜ்ஜானிபஜ்ஜாதி வத³ந்தி, உப்படிபாடி பன பட²மம் நிபஜ்ஜா, புன நிஸஜ்ஜா, புன டா²னம், பச்சா² க³மனந்தி ஏவம் வேதி³தப்³பா³. ஆஸன்னபடிபாடியாதி க³மனஸ்ஸ தாவ டா²னம் ஆஸன்னம், டா²னஸ்ஸ நிஸஜ்ஜா க³மனஞ்ச, நிஸஜ்ஜாய நிபஜ்ஜா டா²னஞ்ச, நிபஜ்ஜாய நிஸஜ்ஜா ஆஸன்னா. இத⁴ பன க³மனஸ்ஸ டா²னம், டா²னஸ்ஸ ச க³மனம், நிஸஜ்ஜாய ச நிபஜ்ஜா, நிபஜ்ஜாய ச நிஸஜ்ஜா ஆஸன்னபா⁴வேன க³ஹிதா, இதரே பரம்பராவஸேனாதி வேதி³தப்³பா³. பி⁴க்கு²ஸ்ஸ பன இரியாபதா² ஸம்பத்தபடிபாடியா விய அபராபருப்பத்திவஸேன வுச்சந்தி.

ப⁴யபே⁴ரவஸேனாஸனாதி³வண்ணனா நிட்டி²தா.

அஸம்மோஹவிஹாரவண்ணனா

50. அயஞ்ச மே ஸப்³ப³ஸோ ப⁴யபே⁴ரவாபா⁴வோ விஸேஸதோ அஸம்மோஹத⁴ம்மத்தாதி த³ஸ்ஸேதும் ‘‘ஸந்தி கோ² பனா’’திஆதி³னா உபரி தே³ஸனா வட்³டி⁴தாதி அயம் வா ஏத்த² அனுஸந்தி⁴. ஜா²யீனம் ஸம்மோஹட்டா²னேஸூதி இமினா அஜ்ஜா²யீனம் ஸம்மோஹட்டா²னேஸு வத்தப்³ப³மேவ நத்தீ²தி த³ஸ்ஸேதி. அத்தீ²தி இத³ம் நிபாதபத³ம் புது²வசனம்பி ஹோதி ‘‘அத்தி² இமஸ்மிம் காயே கேஸா’’திஆதீ³ஸு (தீ³. நி. 2.373-374; ம. நி. 1.110; 3.154; ஸம். நி. 4.127; கு². பா. 3.த்³வதிம்ஸாகார) வியாதி ‘‘ஸந்தீ’’தி பத³ஸ்ஸ அத்த²த³ஸ்ஸனவஸேன வுத்தம். கிம் க²ணத்தயஸமங்கி³தாய தே அத்தி², நோதி ஆஹ ‘‘ஸம்விஜ்ஜந்தி உபலப்³ப⁴ந்தீ’’தி, மஹதி லோகஸன்னிவாஸே ஏதி³ஸாபி ஸம்விஜ்ஜந்தி ஞாணேன க³ஹேதப்³ப³தாய உபலப்³ப⁴ந்தீதி. ஓதா³தகஸிணலாபீ⁴தி அப்பமாணஓதா³தகஸிணலாபீ⁴. ஏவம் ஹிஸ்ஸ ஸமந்ததோ ஆலோகோ விய உபட்டா²தி. பரிகம்மந்தி ஸமாபத்திபுப்³ப³பா⁴க³மாஹ. ஏத்தகம் ஸூரியே க³தே வுட்ட²ஹாமீதி,நோ ச கோ² அத்³தா⁴னபரிச்சே²தே³ குஸலோ ஹோதி, கேவலம் ‘‘தி³வா ஏவ வுட்ட²ஹாமீ’’தி மனஸிகாரம் உப்பாதே³ஸி. விஸத³ம் ஹோதி ஸப்³ப³ம் ஆரம்மணஜாதம், தி³ப்³ப³சக்கு²னா பஸ்ஸந்தஸ்ஸ விய விபூ⁴தம். அவிஸத³ந்தி ஏத்த² வுத்தவிபரியாயேன அத்தோ² வேதி³தப்³போ³. ஏவம்ஸஞ்ஞினோதி ரத்திம் ‘‘தி³வா’’தி, தி³வா ச ‘‘ரத்தீ’’தி ஏவம்ஸஞ்ஞினோ.

அந்தோஸேனாஸனே ரத்திம் நிஸின்னோ ஹோதீதி ரத்தி-ஸத்³தோ³ அஜ்ஜா²ஹரிதப்³போ³. பரித்தாஸனாதீ³ஹி, அஞ்ஞேஹி வா காரணேஹி. க³ம்பீ⁴ராய பூ⁴மிக³ப்³ப⁴ஸதி³ஸாய க⁴னவனபடிச்ச²ன்னாய ப³ஹலதரஜாலவனபடலபடிச்ச²ன்னாய. அந்தரஹிதஸூரியாலோகே காலேதி ஏதேனேவ தி³வாதி அவுத்தஸித்³தோ⁴. ஸம்மோஹவிஹாரோ நாம ப³ஹுவிதோ⁴தி ஆஹ ‘‘ஸம்மோஹவிஹாரானம் அஞ்ஞதர’’ந்தி.

பாகடோ போ³தி⁴ஸத்தஸ்ஸ ரத்திந்தி³வபரிச்சே²தோ³ அந்தமஸோ லவதுடிக²ணஸ்ஸபி உபாதா³ய ஸுவவத்தி²தத்தா, ததா² ரத்திதி³வஸகோட்டா²ஸபரிச்சே²தோ³ அத்தனா காதப்³ப³கிச்சவஸேன காலஞாணவஸேன ச.

காலத²ம்பே⁴ லத்³த⁴ப்³ப³சா²யாவஸேன த்³வங்கு³லகாலே. யாமக⁴ண்டிகம் பஹரதி ஸங்க⁴ஸ்ஸ தம்தம்வத்தகரணத்த²ம். முக்³க³ரந்தி க⁴ண்டிகப்பஹரணமுக்³க³ரம். யாமயந்தம் பததி அஞ்ஞேஹி பி⁴க்கூ²ஹி யோஜிதந்தி அதி⁴ப்பாயோ. யாவ அஞ்ஞே பி⁴க்கூ² போ⁴ஜனஸாலம் உபக³ச்ச²ந்தி, தாவ தி³வாவிஹாரட்டா²னம் க³ந்த்வா ஸமணத⁴ம்மம் கரோதி.

யம் கோ² தந்தி ஏத்த² யந்தி அனியமுத்³தே³ஸோ, கோ²தி அவதா⁴ரணே, யமேவ புக்³க³லந்தி அத்தோ². தந்தி வுச்சமானாகாரவசனம். மமேவாதி மம் ஏவ. அஸம்மோஹஸபா⁴வோதி ஸபா⁴வபூ⁴தஅஸம்மோஹோ. ‘‘உப்பன்னோ’’தி வுத்தத்தா ‘‘மனுஸ்ஸலோகே’’தி வுத்தம். பஞ்ஞாஸம்பத்தியாதி யாதா²வதோ ஹிதஸ்ஸ ஜானனஸமத்தே²ன அத்தனோ பஞ்ஞாகு³ணேன, ந கேவலம் அஜ்ஜா²ஸயேனேவ ஹிதேஸிதா, அத² கோ² பயோகே³னாதி த³ஸ்ஸேந்தோ ‘‘ஹிதூபதே³ஸகோ’’தி ஆஹ. அஜ்ஜா²ஸயேன பன ஹிதேஸிதா ‘‘லோகானுகம்பாயா’’தி இமினா த³ஸ்ஸிதா. உபகரணேஹி வினா ந கதா³சி போ⁴க³ஸுக²ம் உபகரணதா³னஞ்ச சாக³ஸம்பத்திஹேதுகந்தி ஆஹ ‘‘சாக³ஸம்பத்தியா…பே… தா³யகோ’’தி. மேத்தாஸம்பத்தியா ஹிதூபஸம்ஹாரேன ரக்கி²தா. கருணாஸம்பத்தியா து³க்கா²பனயனேன கோ³பாயிதா. நனு ச புப்³பே³பி வுத்தம் ‘‘ஹிதாய ஸுகா²யா’’தி, அத² கஸ்மா புன தம் க³ஹிதந்தி சோத³னம் ஸந்தா⁴யாஹ ‘‘இத⁴ தே³வமனுஸ்ஸக்³க³ஹணேனா’’திஆதி³. தேன புப்³பே³ அவிஸேஸதோ ஹிதாதீ³னி த³ஸ்ஸிதானி, இதா³னி விஸேஸதோ ஸஹ பயோஜனேன தானி த³ஸ்ஸிதானீதி தீ³பேதி. நிப்³பா³னதோ பரோ பரமோ அத்தோ² நாம நத்தீ²தி ஆஹ ‘‘பரமத்த²த்தாயா’’தி. ஹினோதி நிப்³பா³னம் க³ச்ச²தீதி ஹிதம், மக்³கோ³. உக்கம்ஸதோ ஸுக²த்த²ம் அரியப²லந்தி ஆஹ ‘‘ததோ உத்தரி ஸுகா²பா⁴வதோ’’தி.

அஸம்மோஹவிஹாரவண்ணனா நிட்டி²தா.

புப்³ப³பா⁴க³படிபதா³தி³வண்ணனா

51. அஸம்மோஹவிஹாரந்தி அஸம்மோஹவுத்திம், அஸம்மோஹஸம்போ³தி⁴ந்தி வா அத்தோ². தந்தி ஸமத²விபஸ்ஸனாபா⁴வனாஸங்கா²தம் படிபத³ம். புப்³ப³பா⁴க³தோ பபு⁴தீதி பா⁴வனாய புப்³ப³பா⁴க³வீரியாரம்பா⁴தி³தோ பட்டா²ய. கேசீதி உத்தரவிஹாரவாஸினோ.

போ³தி⁴மண்டே³தி (ஸாரத்த². டீ. 1.11.வேரஞ்ஜகண்ட³வண்ணனா; அ. நி. டீ. 3.8.11) போ³தி⁴ஸங்கா²தஸ்ஸ ஞாணஸ்ஸ மண்ட³பா⁴வப்பத்தே டா²னே. சதுரங்க³ந்தி ‘‘காமம் தசோ ச ந்ஹாரு ச, அட்டி² ச அவஸிஸ்ஸதூ’’திஆதி³னா (ம. நி. 2.184; ஸம். நி. 2.237; அ. நி. 2.5; 8.13; மஹானி. 17, 196) வுத்தசதுரங்க³ஸமன்னாக³தம். பக்³க³ஹிதந்தி ஆரம்ப⁴ம் ஸிதி²லம் அகத்வா த³ள்ஹபரக்கமஸங்கா²துஸ்ஸஹனபா⁴வேன க³ஹிதம். தேனாஹ ‘‘அஸிதி²லப்பவத்திதந்தி வுத்தம் ஹோதீ’’தி. அஸல்லீனந்தி அஸங்குசிதம் கோஸஜ்ஜவஸேன ஸங்கோசம் அனாபன்னம்.

உபட்டி²தாதி ஓகா³ஹனஸங்கா²தேன அபிலாபனபா⁴வேன ஆரம்மணம் உபக³ந்த்வா டி²தா. தேனாஹ ‘‘ஆரம்மணாபி⁴முகீ²பா⁴வேனா’’தி. ஸம்மோஸஸ்ஸ வித்³த⁴ம்ஸனவஸேன பவத்தியா ந ஸம்முட்டா²தி அஸம்முட்டா². கிஞ்சாபி சித்தமிவ சித்தபஸ்ஸத்³தி⁴வஸேன காயபஸ்ஸத்³தி⁴வஸேனேவ காயோ பஸ்ஸத்³தோ⁴ ஹோதி, ததா²பி யஸ்மா காயபஸ்ஸத்³தி⁴ உப்பஜ்ஜமானா சித்தபஸ்ஸத்³தி⁴யா ஸஹேவ உப்பஜ்ஜதி, ந வினா, தஸ்மா வுத்தம் ‘‘காயசித்தபஸ்ஸத்³தி⁴ஸம்ப⁴வேனா’’தி. ரூபகாயோபி பஸ்ஸத்³தோ⁴யேவ ஹோதி காயபஸ்ஸத்³தி⁴யா உப⁴யேஸம்பி காயானம் பஸ்ஸம்ப⁴னாவஹத்தா. ஸோ ச கோ² காயோ. விக³தத³ரதோ²தி விக³தகிலேஸத³ரதோ². நாமகாயே ஹி விக³தத³ரதே² ரூபகாயோபி வூபஸந்தத³ரத²பரிளாஹோ ஹோதி. ஸம்மா ஆஹிதந்தி நானாரம்மணேஸு விதா⁴வனஸங்கா²தவிக்கே²பம் விச்சி²ந்தி³த்வா ஏகஸ்மிம்யேவ ஆரம்மணே அவிக்கி²த்தபா⁴வாபாதா³னேன ஸம்மதே³வ ஆஹிதம். தேனாஹ ‘‘ஸுட்டு² ட²பித’’ந்திஆதி³. சித்தஸ்ஸ அனேகக்³க³பா⁴வோ விக்கே²பவஸேன சஞ்சலதா, ஸா ஸதி ஏகக்³க³தாய ந ஹோதீதி ஆஹ ‘‘ஏகக்³க³ம் அசலம் நிப்ப²ந்த³ன’’ந்தி. ஏத்தாவதாதி ‘‘ஆரத்³த⁴ம் கோ² பனா’’திஆதி³னா வீரியஸதிபஸ்ஸத்³தி⁴ஸமாதீ⁴னம் கிச்சஸித்³தி⁴த³ஸ்ஸனேன. நனு ச ஸத்³தா⁴பஞ்ஞானம்பி கிச்சஸித்³தி⁴ ஜா²னஸ்ஸ புப்³ப³படிபதா³ய இச்சி²தப்³பா³தி? ஸச்சம் இச்சி²தப்³பா³, ஸா பன நானந்தரியபா⁴வேன அவுத்தஸித்³தா⁴தி ந க³ஹிதா. அஸதி ஹி ஸத்³தா⁴ய வீரியாரம்பா⁴தீ³னம் அஸம்ப⁴வோயேவ, பஞ்ஞாபரிக்³க³ஹே ச நேஸம் அஸதி பஞ்ஞாயாரம்பா⁴தி³பா⁴வோ ந ஸியா. ததா² அஸல்லீனாஸம்மோஸதாத³யோ வீரியாதீ³னந்தி அஸல்லீனதாதி³க்³க³ஹணேனேவேத்த² பஞ்ஞாகிச்சஸித்³தி⁴ க³ஹிதாதி த³ட்ட²ப்³ப³ம். ஜா²னபா⁴வனாயம் வா ஸமாதி⁴கிச்சம் அதி⁴கம் இச்சி²தப்³ப³ந்தி த³ஸ்ஸேதும் ஸமாதி⁴பரியோஸானாவ ஜா²னஸ்ஸ புப்³ப³படிபதா³ கதி²தாதி த³ட்ட²ப்³ப³ம்.

வுத்தம், தஸ்மா இத⁴ ந வத்தப்³ப³ம். விஸுத்³தி⁴மக்³கோ³ ஹி இமிஸ்ஸா ஸம்வண்ணனாய ஏகதே³ஸபூ⁴தோதி வுத்தோவாயமத்தோ²தி. விஹரதீதி ஆக³தம் பருத்³தே³ஸிகத்தா விஹாரஸ்ஸ. இத⁴ விஹாஸிந்தி ஆக³தம் அத்து²த்³தே³ஸிகத்தா. இத³ம் கிர ஸப்³ப³பு³த்³தா⁴னம் அவிஜஹிதந்தி ஆஹ ‘‘ஆனாபானஸ்ஸதிகம்மட்டா²ன’’ந்தி. ரூபவிராக³பா⁴வனாவஸேன (ஸாரத்த². டீ. 1.12.நேரஞ்ஜகண்ட³வண்ணனா) பவத்தோ சதுப்³பி³தோ⁴பி அரூபஜ்ஜா²னவிஸேஸோ சதுத்த²ஜ்ஜா²னஸங்க³ஹோ ஏவாதி ஆஹ ‘‘சத்தாரி ஜா²னானீ’’தி. யுத்தம் தாவ சித்தேகக்³க³தா ப⁴வோக்கமனத்த²தா விய விபஸ்ஸனாபாத³கதாபி சதுன்னம் ஜா²னானம் ஸாதா⁴ரணாதி தேஸம் வஸேன ‘‘சத்தாரி ஜா²னானீ’’தி வசனம், அபி⁴ஞ்ஞாபாத³கதா பன நிரோத⁴பாத³கதா ச சதுத்த²ஸ்ஸேவ ஜா²னஸ்ஸ ஆவேணிகா, ஸா கத²ம் சதுன்னம் ஜா²னானம் ஸாதா⁴ரணா வுத்தாதி? பரம்பராதி⁴ட்டா²னபா⁴வதோ. பத³ட்டா²னபத³ட்டா²னம்பி ஹி பத³ட்டா²னந்தேவ வுச்சதி, காரணகாரணம்பி காரணந்தி யதா² ‘‘திணேஹி ஸத்தம் ஸித்³த⁴’’ந்தி, ஏவஞ்ச கத்வா பயோஜனனித்³தே³ஸே அட்ட²ஸமாபத்திக்³க³ஹணம் ஸமத்தி²தம் ஹோதி. சித்தேகக்³க³தத்தா²னீதி சித்தஸமாதா⁴னத்தா²னி, தி³ட்ட²த⁴ம்மஸுக²விஹாரத்தா²னீதி அத்தோ². சித்தேகக்³க³தாஸீஸேன ஹி தி³ட்ட²த⁴ம்மஸுக²விஹாரோ வுத்தோ, ஸுக்க²விபஸ்ஸககீ²ணாஸவவஸேன சேதம் வுத்தம். தேனாஹ ‘‘ஏகக்³க³சித்தா ஸுக²ம் தி³வஸம் விஹரிஸ்ஸாமா’’தி. ப⁴வோக்கமனத்தா²னீதி ப⁴வேஸு நிப்³ப³த்திஅத்தா²னி.

யஸ்மா (ஸாரத்த². டீ. 1.12.நேரஞ்ஜகண்ட³வண்ணனா) போ³தி⁴ஸத்தேன போ³தி⁴மண்டூ³பஸங்கமனதோ புப்³பே³பி சரிமப⁴வே சதுத்த²ஜ்ஜா²னம் நிப்³ப³த்திதபுப்³ப³ம், ததா³ பன தம் நிப்³ப³த்திதமத்தமேவ அஹோஸி, ந விபஸ்ஸனாதி³பாத³கம், தஸ்மா ‘‘போ³தி⁴ருக்க²மூலே நிப்³ப³த்தித’’ந்தி ததோ விஸேஸேத்வா வுத்தம். விபஸ்ஸனாபாத³கந்தி விபஸ்ஸனாரம்பே⁴ விபஸ்ஸனாய பாத³கம். அபி⁴ஞ்ஞாபாத³கந்தி ஏத்தா²பி ஏஸேவ நயோ. பு³த்³தா⁴னஞ்ஹி பட²மாரம்பே⁴ ஏவ பாத³கஜ்ஜா²னேன பயோஜனம் அஹோஸி, ந ததோ பரம் உபரிமக்³கா³தி⁴க³மப²லஸமாபத்திஅபி⁴ஞ்ஞாவளஞ்ஜனாதி³அத்த²ம். அபி⁴ஸம்போ³தி⁴ஸமதி⁴க³மதோ பட்டா²ய ஹி ஸப்³ப³ம் ஞாணஸமாதி⁴கிச்சம் ஆகங்க²மத்தபடிப³த்³த⁴மேவாதி. ஸப்³ப³கிச்சஸாத⁴கந்தி அனுபுப்³ப³விஹாராதி³ஸப்³ப³கிச்சஸாத⁴கம். ஸப்³ப³லோகியலோகுத்தரகு³ணதா³யகந்தி ஏத்த² விபஸ்ஸனாபி⁴ஞ்ஞாபாத³கத்தா ஏவ சதுத்த²ஸ்ஸ ஜா²னஸ்ஸ ப⁴க³வதோ ஸப்³ப³லோகியலோகுத்தரகு³ணதா³யகதா வேதி³தப்³பா³. ஸப்³ப³ஞ்ஞுதஞ்ஞாணபத³ட்டா²னஞ்ஹி மக்³க³ஞாணம், மக்³க³ஞாணபத³ட்டா²னஞ்ச ஸப்³ப³ஞ்ஞுதஞ்ஞாணம் அபி⁴ஸம்போ³தி⁴, தத³தி⁴க³மஸமகாலமேவ ப⁴க³வதோ ஸப்³பே³ பு³த்³த⁴கு³ணா ஹத்த²க³தா அஹேஸும், சதுத்த²ஜ்ஜா²னஸன்னிஸ்ஸயோ ச மக்³கா³தி⁴க³மோதி.

புப்³ப³பா⁴க³படிபதா³தி³வண்ணனா நிட்டி²தா.

புப்³பே³னிவாஸகதா²வண்ணனா

52. த்³வின்னம் விஜ்ஜானந்தி புப்³பே³னிவாஸஞாணதி³ப்³ப³சக்கு²ஞாணஸங்கா²தானம் த்³வின்னம் விஜ்ஜானம். அனுபத³வண்ணனாதி தாஸம் விஜ்ஜானம் நித்³தே³ஸபாளியா அனுபத³வண்ணனா. பா⁴வனானயோதி உப்பாத³னவிதி⁴. ‘‘ஸோ’’தி பச்சத்தவசனஸ்ஸ அஹம்-ஸத்³தே³ன ஸம்ப³ந்த⁴னே காரணம் த³ஸ்ஸேதும் ‘‘அபி⁴னின்னாமேஸி’’ந்திஆதி³ வுத்தம். பாளியம் வா ‘‘அபி⁴னின்னாமேஸி’’ந்தி உத்தமபுரிஸஸ்ஸ யோகோ³தி அஹம்-ஸத்³தே³ன ஆனேத்வா வுச்சமானே தத³த்தோ² பாகடோ ஹோதீதி ‘‘ஸோ அஹ’’ந்தி வுத்தம். அபி⁴னீஹரிந்தி சித்தம் ஜா²னாரம்மணதோ அபனேத்வா புப்³பே³னிவாஸாபி⁴முக²ம் பேஸேஸிம், புப்³பே³னிவாஸனின்னம் புப்³பே³னிவாஸபோணம் புப்³பே³னிவாஸபப்³பா⁴ரம் அகாஸிந்தி அத்தோ².

புப்³பே³அதீதஜாதீஸு நிவுத்த²க்க²ந்தா⁴ புப்³பே³னிவாஸோ. நிவுத்தா²தி ச அஜ்ஜா²வுத்தா² அனுபூ⁴தா அத்தனோ ஸந்தானே உப்பஜ்ஜித்வா நிருத்³தா⁴, கோ³சரனிவாஸேன நிவுத்த²த⁴ம்மா வா அத்தனோ விஞ்ஞாணேனவிஞ்ஞாதா, பரவிஞ்ஞாணவிஞ்ஞாதாபி வா சி²ன்னவடுமகானுஸ்ஸரணாதீ³ஸு, தம் புப்³பே³னிவாஸம் யாய ஸதியா அனுஸ்ஸரதி, தாய ஸம்பயுத்தம் ஞாணம் புப்³பே³னிவாஸானுஸ்ஸதிஞ்ஞாணம். படினிவத்தந்தஸ்ஸாதி புப்³பே³னிவாஸம் அனுஸ்ஸரணவஸேன யாவதி³ச்ச²கம் க³ந்த்வா பச்சாக³ச்ச²ந்தஸ்ஸ. தஸ்மாதி வுத்தஸ்ஸேவத்த²ஸ்ஸ காரணபா⁴வேன பச்சாமஸனம், படினிவத்தந்தஸ்ஸ பச்சவேக்க²ணபா⁴வதோதி வுத்தம் ஹோதி. இதூ⁴பபத்தியாதி இத⁴ சரிமப⁴வே உபபத்தியா. அனந்தரந்தி அதீதானந்தரமாஹ. அமுத்ராதி அமுகஸ்மிம் ப⁴வேதி அத்தோ². உத³பாதி³ந்தி உப்பஜ்ஜிம். தாஹி தே³வதாஹீதி துஸிதாதே³வதாஹி. ஏககோ³த்தோதி துஸிதகோ³த்தேன ஏககோ³த்தோ. மஹாபோ³தி⁴ஸத்தானம் ஸந்தானஸ்ஸ பரியோஸானாவத்தா²ய தே³வலோகூபபத்திஜனகம் நாம அகுஸலேன கம்முனா அனுபத்³து³தமேவ ஹோதீதி அதி⁴ப்பாயேன ‘‘து³க்க²ம் பன ஸங்கா²ரது³க்க²மேவா’’தி வுத்தம். மஹாபுஞ்ஞானம்பி பன தே³வபுத்தானம் புப்³ப³னிமித்துப்பத்திகாலாதீ³ஸு அனிட்டா²ரம்மணஸமாயோகோ³ ஹோதியேவாதி ‘‘கதா³சி து³க்க²து³க்க²ஸ்ஸபி ஸம்ப⁴வோ நத்தீ²’’தி ந ஸக்கா வத்தும். ஸத்தபஞ்ஞாஸ…பே… பரியந்தோதி இத³ம் மனுஸ்ஸானம் வஸ்ஸக³ணனாவஸேன வுத்தம். தத்த² தே³வானம் வஸ்ஸக³ணனாய பன சதுஸஹஸ்ஸமேவ.

அதீதப⁴வே (ஸாரத்த². டீ. 1.12.புப்³பே³னிவாஸகதா²யம்) க²ந்தா⁴ தப்படிப³த்³த⁴னாமகோ³த்தானி ச ஸப்³ப³ம் புப்³பே³னிவாஸந்தேவ ஸங்க³ஹிதந்தி ஆஹ ‘‘கிம் விதி³தம் கரோதி? புப்³பே³னிவாஸ’’ந்தி. மோஹோ படிச்சா²த³கட்டே²ன‘‘தமோ’’தி வுச்சதி ‘‘தமோ வியா’’தி கத்வா. ஓபா⁴ஸகரணட்டே²னாதி காதப்³ப³தோ கரணம், ஓபா⁴ஸோவ கரணம், அத்தனோ பச்சயேன ஓபா⁴ஸபா⁴வேன நிப்³ப³த்தேதப்³ப³ட்டே²னாதி அத்தோ². ஸேஸம் பஸம்ஸாவசனந்தி படிபக்க²வித⁴மனபவத்திவிஸேஸானம் போ³த⁴னதோ வுத்தம். அவிஜ்ஜா விஹதாதி ஏதேன விஜ்ஜனட்டே²ன விஜ்ஜாதி அயம்பி அத்தோ² தீ³பிதோதி த³ட்ட²ப்³ப³ம். யஸ்மா விஜ்ஜா உப்பன்னாதி ஏதேன விஜ்ஜாபடிபக்கா² அவிஜ்ஜா, படிபக்க²தா சஸ்ஸா பஹாதப்³ப³பா⁴வேன விஜ்ஜாய ச பஹாயகபா⁴வேனாதி த³ஸ்ஸேதி. ஏஸ நயோ இதரஸ்மிம்பி பத³த்³வயேதி இமினா தமோ விஹதோ வினட்டோ². கஸ்மா? யஸ்மா ஆலோகோ உப்பன்னோதி இமமத்த²ம் அதிதி³ஸதி. பேஸிதத்தஸ்ஸாதி யதா²தி⁴ப்பேதத்த²ஸித்³தி⁴ம் பதி விஸ்ஸட்ட²சித்தஸ்ஸ. யதா² அப்பமத்தஸ்ஸாதி அஞ்ஞஸ்ஸபி கஸ்ஸசி மாதி³ஸஸ்ஸாதி அதி⁴ப்பாயோ.

புப்³பே³னிவாஸகதா²வண்ணனா நிட்டி²தா.

தி³ப்³ப³சக்கு²ஞாணகதா²வண்ணனா

53. இதா⁴தி ப⁴யபே⁴ரவஸுத்தே வுத்தம். இத⁴ அயம் விஸேஸோதி யோஜனா. வுத்தஸதி³ஸமேவ ‘‘மேதி மயா’’திஆதி³னா. பரிகம்மகிச்சந்தி ‘‘அபி⁴ஞ்ஞாபாத³கசதுத்த²ஜ்ஜா²னதோ வுட்டா²ய ஸப்³ப³பச்சி²மா நிஸஜ்ஜா ஆவஜ்ஜிதப்³பா³’’திஆதி³னா, கஸிணாரம்மணம் அபி⁴ஞ்ஞாபாத³கஜ்ஜா²னம் ஸப்³பா³காரேன அபி⁴னீஹாரக்க²மம் கத்வா’’திஆதி³னா ச வுத்தேன பரிகம்மேன கிச்சம் பயோஜனம் நத்தி². ந தேன இத⁴ அத்தோ²தி தேன பா⁴வனானயேன இத⁴ பாளியா அத்த²வண்ணனாயம் அத்தோ² நத்தி² ததா²பா⁴வனாய இத⁴ அனதி⁴ப்பேதத்தாதி அதி⁴ப்பாயோ.

தி³ப்³ப³சக்கு²ஞாணகதா²வண்ணனா நிட்டி²தா.

ஆஸவக்க²யஞாணகதா²வண்ணனா

54. விபஸ்ஸனாபாத³கந்தி (ஸாரத்த². டீ. 1.14.ஆஸவக்க²யஞாணகதா²யம்; தீ³. நி. டீ. 1.248; அ. நி. டீ. 2.3.59) விபஸ்ஸனாய பத³ட்டா²னபூ⁴தம். விபஸ்ஸனா ச திவிதா⁴ விபஸ்ஸனகபுக்³க³லபே⁴தே³ன. மஹாபோ³தி⁴ஸத்தானஞ்ஹி பச்சேகபோ³தி⁴ஸத்தானஞ்ச விபஸ்ஸனா சிந்தாமயஞாணஸம்வத்³தி⁴தத்தா ஸயம்பு⁴ஞாணபூ⁴தா, இதரேஸம் ஸுதமயஞாணஸம்வத்³தி⁴தத்தா பரோபதே³ஸஸம்பூ⁴தா, ஸா ‘‘ட²பேத்வா நேவஸஞ்ஞானாஸஞ்ஞாயதனம் அவஸேஸரூபாரூபஜ்ஜா²னானம் அஞ்ஞதரதோ வுட்டா²யா’’திஆதி³னா அனேகதா⁴ அரூபமுக²வஸேன சதுதா⁴துவவத்தா²னே வுத்தானம் தேஸம் தேஸம் தா⁴துபரிக்³க³ஹமுகா²னம் அஞ்ஞதரமுக²வஸேன அனேகதா⁴வ விஸுத்³தி⁴மக்³கே³ (விஸுத்³தி⁴. 1.306) நானானயதோ விபா⁴விதா. மஹாபோ³தி⁴ஸத்தானம் பன சதுவீஸதிகோடிஸதஸஹஸ்ஸமுகே²ன பபே⁴த³க³மனதோ நானானயம் ஸப்³ப³ஞ்ஞுதஞ்ஞாணஸன்னிஸ்ஸயஸ்ஸ அரியமக்³க³ஞாணஸ்ஸ அதி⁴ட்டா²னபூ⁴தம் புப்³ப³பா⁴க³ஞாணக³ப்³ப⁴ம் க³ண்ஹாபேந்தம் பரிபாகம் க³ச்ச²ந்தம் பரமக³ம்பீ⁴ரஸண்ஹஸுகு²மதரம் அனஞ்ஞஸாதா⁴ரணம் விபஸ்ஸனாஞாணம் ஹோதி, யம் அட்ட²கதா²ஸு மஹாவஜிரஞாணந்தி வுச்சதி. யஸ்ஸ ச பவத்திவிபா⁴கே³ன சதுவீஸதிகோடிஸதஸஹஸ்ஸப்பபே⁴த³ஸ்ஸ பாத³கபா⁴வேன ஸமாபஜ்ஜியமானா சதுவீஸதிகோடிஸதஸஹஸ்ஸஸங்கா² தே³வஸிகம் ஸத்து² வளஞ்ஜனகஸமாபத்தியோ வுச்சந்தி, ஸ்வாயம் பு³த்³தா⁴னம் விபஸ்ஸனாசாரோ பரமத்த²மஞ்ஜூஸாய விஸுத்³தி⁴மக்³க³ஸம்வண்ணனாய (விஸுத்³தி⁴. மஹாடீ. 1.144) உத்³தே³ஸதோ த³ஸ்ஸிதோ, அத்தி²கேஹி ததோ க³ஹேதப்³போ³தி.

ஆஸவானம் கே²பனதோ ஸமுச்சி²ந்த³னதோ ஆஸவக்க²யோ, அரியமக்³கோ³, உக்கட்ட²னித்³தே³ஸவஸேன அரஹத்தமக்³க³க்³க³ஹணம். ஆஸவானம் க²யே ஞாணம் ஆஸவக்க²யஞாணந்தி த³ஸ்ஸேந்தோ ‘‘தத்ர சேதம் ஞாண’’ந்தி வத்வா க²யேதி ச ஆதா⁴ரே பு⁴ம்மம், ந விஸயேதி த³ஸ்ஸேந்தோ ‘‘தப்பரியா பன்னத்தா’’தி ஆஹ. இத³ம் து³க்க²ந்தி து³க்க²ஸ்ஸ அரியஸச்சஸ்ஸ ததா³ பச்சக்க²தோ க³ஹிதபா⁴வத³ஸ்ஸனம். ஏத்தகம் து³க்க²ந்தி து³க்க²ஸ்ஸ அரியஸச்சஸ்ஸ ததா³ பச்சக்க²தோ க³ஹிதபா⁴வத³ஸ்ஸனம். ஏத்தகம் து³க்க²ந்தி தஸ்ஸ பரிச்சி²ஜ்ஜ க³ஹிதபா⁴வத³ஸ்ஸனம். ந இதோ பி⁴ய்யோதி அனவஸேஸேத்வா க³ஹிதபா⁴வத³ஸ்ஸனம். தேனாஹ ‘‘ஸப்³ப³ம்பி து³க்க²ஸச்ச’’ந்திஆதி³. ஸரஸலக்க²ணபடிவேதே⁴னாதி ஸபா⁴வஸங்கா²தஸ்ஸ லக்க²ணஸ்ஸ அஸம்மோஹதோ படிவிஜ்ஜ²னேன. அஸம்மோஹபடிவேதோ⁴தி ச யதா² தஸ்மிம் ஞாணே பவத்தே பச்சா² து³க்க²ஸ்ஸ ஸரூபாதி³பரிச்சே²தே³ ஸம்மோஹோ ந ஹோதி, ததா² பவத்தி. தேனாஹ ‘‘யதா²பூ⁴தம் அப்³ப⁴ஞ்ஞாஸி’’ந்தி. யம் டா²னம் பத்வாதி யம் நிப்³பா³னம் மக்³க³ஸ்ஸ ஆரம்மணபச்சயட்டே²ன காரணபூ⁴தம் ஆக³ம்ம. தது³ப⁴யவதோ ஹி புக்³க³லஸ்ஸ பத்தி தது³ப⁴யஸ்ஸ பத்தீதி வுத்தம். பத்வாதி வா பாபுணனஹேது. அப்பவத்திந்தி அப்பவத்தினிமித்தம். தே வா நப்பவத்தந்தி ஏத்தா²தி அப்பவத்தி, நிப்³பா³னம். தஸ்ஸாதி து³க்க²னிரோத⁴ஸ்ஸ. ஸம்பாபகந்தி ஸச்சி²கிரியாவஸேன ஸம்மதே³வ பாபகம்.

கிலேஸவஸேனாதி ஆஸவஸங்கா²தகிலேஸவஸேன. யஸ்மா ஆஸவானம் து³க்க²ஸச்சபரியாயோ தப்பரியாபன்னத்தா, ஸேஸஸச்சானஞ்ச தம்ஸமுத³யாதி³பரியாயோ அத்தி², தஸ்மா வுத்தம். ‘‘பரியாயதோ’’தி. த³ஸ்ஸேந்தோ ஸச்சானீதி யோஜனா. ஆஸவானம்யேவ சேத்த² க³ஹணம் ‘‘ஆஸவானம் க²யஞாணாயா’’தி ஆரத்³த⁴த்தா. ததா² ஹி ஆஸவவிமுத்தி ஸீஸேனேவ ஸப்³ப³ஸம்கிலேஸவிமுத்தி வுத்தா. ‘‘இத³ம் து³க்க²ந்தி யதா²பூ⁴தம் அப்³ப⁴ஞ்ஞாஸி’’ந்திஆதி³னா மிஸ்ஸகமக்³கோ³ இத⁴ கதி²தோதி ‘‘ஸஹ விபஸ்ஸனாய கோடிப்பத்தம் மக்³க³ம் கதே²தீ’’தி வுத்தம். ஏத்த² ச ஸச்சபடிவேத⁴ஸ்ஸ ததா³ அதீதகாலிகத்தா ‘‘யதா²பூ⁴தம் அப்³ப⁴ஞ்ஞாஸி’’ந்தி வத்வாபி அபி⁴ஸமயகாலே தஸ்ஸ பச்சுப்பன்னதம் உபாதா³ய ‘‘ஏவம் ஜானதோ ஏவம் பஸ்ஸதோ’’தி வத்தமானகாலேன நித்³தே³ஸோ கதோ. ஸோ ச காமம் மக்³க³க்க²ணதோ பரம் யாவஜ்ஜதனா அதீதகாலிகோ ஏவ, ஸப்³ப³பட²மம் பனஸ்ஸ அதீதகாலிகத்தம் ப²லக்க²ணேன வேதி³தப்³ப³ந்தி ஆஹ ‘‘விமுச்சித்தா²தி இமினா ப²லக்க²ணம் த³ஸ்ஸேதீ’’தி. ஜானதோ பஸ்ஸதோதி வா ஹேதுனித்³தே³ஸோயம். ஜானனஹேது த³ஸ்ஸனஹேது காமாஸவா சித்தம் விமுச்சித்தா²தி யோஜனா. ப⁴வாஸவக்³க³ஹணேனேவ சேத்த² ப⁴வராக³ஸ்ஸ விய ப⁴வதி³ட்டி²யாபி ஸமவரோதோ⁴தி தி³ட்டா²ஸவஸ்ஸபி ஸங்க³ஹோ த³ட்ட²ப்³போ³.

கீ²ணாஜாதீதிஆதீ³ஹி பதே³ஹி. தஸ்ஸாதி பச்சவேக்க²ணஞாணஸ்ஸ. பூ⁴மீந்தி பவத்திட்டா²னம். ந தாவஸ்ஸ அதீதா ஜாதி கீ²ணா மக்³க³பா⁴வனாயாதி அதி⁴ப்பாயோ. தத்த² காரணமாஹ ‘‘புப்³பே³வ கீ²ணத்தா’’தி. ந அனாக³தா அஸ்ஸஜாதி கீ²ணாதி யோஜனா. ந அனாக³தாதி ச அனாக³தத்தஸாமஞ்ஞம் க³ஹேத்வா லேஸேன சோதே³தி. தேனாஹ ‘‘அனாக³தே வாயாமாபா⁴வதோ’’தி, அனாக³தவிஸேஸோ பனேத்த² அதி⁴ப்பேதோ, தஸ்ஸ ச கே²பனே வாயாமோபி லப்³ப⁴தேவ. தேனாஹ ‘‘யா பன மக்³க³ஸ்ஸா’’திஆதி³. ஏகசதுபஞ்சவோகாரப⁴வேஸூதி ப⁴வத்தயக்³க³ஹணம் வுத்தனயேன அனவஸேஸதோ ஜாதியா கீ²ணபா⁴வத³ஸ்ஸனத்த²ம். தந்தி யதா²வுத்தம் ஜாதிம். ஸோதி ப⁴க³வா.

ப்³ரஹ்மசரியவாஸோ நாம இத⁴ மக்³க³ப்³ரஹ்மசரியஸ்ஸ நிப்³ப³த்தனமேவாதி ஆஹ ‘‘நிட்டி²த’’ந்தி. ஸம்மாதி³ட்டி²யா சதூஸு ஸச்சேஸு பரிஞ்ஞாதி³கிச்சஸாத⁴னவஸேன பவத்தமானாய ஸம்மா ஸங்கப்பாதீ³னம்பி து³க்க²ஸச்சே பரிஞ்ஞாபி⁴ஸமயானுகு³ணா பவத்தி, இதரஸச்சேஸு ச நேஸம் பஹானாபி⁴ஸமயாதி³வஸேன பவத்தி பாகடா ஏவ. தேன வுத்தம் ‘‘சதூஹி மக்³கே³ஹி பரிஞ்ஞாபஹானஸச்சி²கிரியாபா⁴வனாவஸேனா’’தி. இத்த²த்தாயாதி இமே பகாரா இத்த²ம், தப்³பா⁴வோ இத்த²த்தம், தத³த்த²ந்தி வுத்தம் ஹோதி. தே பன பகாரா அரியமக்³க³ப்³யாபாரபூ⁴தா பரிஞ்ஞாத³யோ இதா⁴தி⁴ப்பேதாதி ஆஹ ‘‘ஏவம்ஸோளஸகிச்சபா⁴வாயா’’தி. தே ஹி மக்³க³ம் பச்சவேக்க²தோ மக்³கா³னுபா⁴வேன பாகடா ஹுத்வா உபட்ட²ஹந்தி, பரிஞ்ஞாதீ³ஸு ச பஹானமேவ பதா⁴னம் தத³த்த²த்தா இதரேஸந்தி ஆஹ ‘‘கிலேஸக்க²யாயவா’’தி. பஹீனகிலேஸபச்சவேக்க²ணவஸேன வா ஏதம் வுத்தம். இத்த²த்தாயாதி நிஸ்ஸக்கே ஸம்பதா³னவசனந்தி ஆஹ ‘‘இத்த²பா⁴வதோ’’தி. அபரம் அனாக³தம். இமே பன சரிமத்தபா⁴வஸங்கா²தா பஞ்சக்க²ந்தா⁴. பரிஞ்ஞாதா திட்ட²ந்தீதி ஏதேன தேஸம் அப்பதிட்ட²தம் த³ஸ்ஸேதி. அபரிஞ்ஞாமூலகா ஹி பதிட்டா². யதா²ஹ ‘‘கப³ளீகாரே சே, பி⁴க்க²வே, ஆஹாரே அத்தி² ராகோ³ அத்தி² நந்தீ³ அத்தி² தண்ஹா, பதிட்டி²தம் தத்த² விஞ்ஞாணம் விரூள்ஹ’’ந்திஆதி³ (ஸம். நி. 2.64; மஹானி. 7; கதா². 296). தேனேவாஹ ‘‘சி²ன்னமூலகா ருக்கா² வியா’’திஆதி³.

பச்சவேக்க²ணஞாணபரிக்³க³ஹிதம், ந பட²மது³தியஞாணத்³வயாதி⁴க³மம் விய கேவலந்தி அதி⁴ப்பாயோ. த³ஸ்ஸேந்தோ நிக³மனவஸேனாதி அதி⁴ப்பாயோ. ஸரூபதோ ஹி தம் புப்³பே³ த³ஸ்ஸிதமேவாதி. புப்³பே³னிவாஸஞாணேன அதீதாரம்மணஸபா⁴க³தாய தப்³பா⁴வீபா⁴வதோ ச அதீதம்ஸஞாணம் ஸங்க³ஹேத்வாதி யோஜனா. தத்த² அதீதம்ஸஞாணந்தி அதீதக²ந்தா⁴யதனதா⁴துஸங்கா²தே அதீதகோட்டா²ஸே அப்படிஹதம் ஞாணம். தி³ப்³ப³சக்கு²னாதி ஸபரிப⁴ண்டே³ன தி³ப்³ப³சக்கு²ஞாணேன. பச்சுப்பன்னம்ஸோ ச அனாக³தம்ஸோ ச பச்சுப்பன்னானாக³தம்ஸம், தத்த² ஞாணம் பச்சுப்பன்னானாக³தம்ஸஞாணம். ஸகலலோகியலோகுத்தரகு³ணந்தி ஏதேன ஸப்³ப³ம் லோகம் உத்தரித்வா அபி⁴பு⁴ய்ய டி²தத்தா ஸப்³ப³ஞ்ஞுதஞ்ஞாணஸ்ஸ விய ஸேஸாஸாதா⁴ரணஞாணஸ்ஸ ப³லஞாணஆவேணிகபு³த்³த⁴த⁴ம்மாதீ³னம்பி அனஞ்ஞஸாதா⁴ரணானம் பு³த்³த⁴கு³ணானம் ஸங்க³ஹோ வேதி³தப்³போ³. தேனாஹ ‘‘ஸப்³பே³பி ஸப்³ப³ஞ்ஞுகு³ணே ஸங்க³ஹேத்வா’’தி.

ஆஸவக்க²யஞாணகதா²வண்ணனா நிட்டி²தா.

அரஞ்ஞவாஸகாரணவண்ணனா

55. ஸியா கோ² பன தே ப்³ராஹ்மணாதி ஏத்த² ஸியாதி ‘‘அப்பேவா’’தி இமினா ஸமானத்தோ² நிபாதோ, தஸ்மா ‘ப்³ராஹ்மண, அப்பேவ கோ² பன தே ஏவமஸ்ஸா’தி அத்தோ². யம் பன அட்ட²கதா²யம் ‘‘கதா³சீ’’தி வுத்தம், தம்பி இமமேவத்த²ம் ஸந்தா⁴ய வுத்தம் அகாரணம் ப்³ராஹ்மணேன பரிகப்பிதமத்த²ம் படிபக்கி²பித்வா அத்தனோ அதி⁴ப்பேதம் காரணம் த³ஸ்ஸேந்தோ. அத்தோ²வ ப²லம் தத³தீ⁴னவுத்திதாய வஸோ ஏதஸ்ஸாதி அத்த²வஸோ, ஹேதூதி ஏவம் வா ஏத்த² அத்தோ² த³ட்ட²ப்³போ³. அத்தனோ ச தி³ட்ட²த⁴ம்மஸுக²விஹாரந்தி ஏதேன ஸத்தா² அத்தனோ விவேகாபி⁴ரதிம் பகாஸேதீதி த³ஸ்ஸேந்தோ ‘‘தி³ட்ட²த⁴ம்மோ நாமா’’திஆதி³மாஹ. தத்த² இரியாபத²விஹாரானந்தி இரியாபத²பவத்தீனம். தப்பவத்தியோ ஹி ஏகஸ்மிம் இரியாபதே² உப்பன்னது³க்க²ம் அஞ்ஞேன இரியாபதே²ன விச்சி²ந்தி³த்வா ஹரணதோ விஹாராதி வுச்சந்தி. பச்சி²மஞ்ச ஜனதம் அனுகம்பமானோதி ஏதேன யோ ஆதி³தோ ப்³ராஹ்மணேன ‘‘ப⁴வம் தேஸம் கோ³தமோ புப்³ப³ங்க³மோ…பே… தி³ட்டா²னுக³திம் ஆபஜ்ஜதீ’’தி வுத்தோ, யோ ச ததா² ‘‘ஏவமேதம் ப்³ராஹ்மணா’’திஆதி³னா அத்தனா ஸம்படிச்சி²தோ, தமேவ அத்த²ம் நிக³மனவஸேன த³ஸ்ஸேந்தோ யதா²னுஸந்தி⁴னாவ ஸத்தா² தே³ஸனம் நிட்டா²பேஸி.

அரஞ்ஞவாஸகாரணவண்ணனா நிட்டி²தா.

தே³ஸனானுமோத³னாவண்ணனா

56. ஏவம் நிட்டா²பிதாய தே³ஸனாய ப்³ராஹ்மணோ தத்த² ப⁴க³வதி பஸாத³ம் பவேதே³ந்தோ ‘‘அபி⁴க்கந்த’’ந்திஆதி³மாஹ. அபி⁴க்கந்தாதி (ஸாரத்த². டீ. 1.15.தே³ஸனானுமோத³னகதா²; தீ³. நி. டீ. 1.250; ஸம். நி. டீ. 1.1.1; அ. நி. டீ. 2.2.16) அதிக்கந்தா, விக³தாதி அத்தோ²தி ஆஹ ‘‘க²யே தி³ஸ்ஸதீ’’தி. தேனேவ ஹி ‘‘நிக்க²ந்தோ பட²மோ யாமோ’’தி வுத்தம். அபி⁴க்கந்ததரோதி அதிவிய கந்ததரோ மனோரமோ. தாதி³ஸோ ச ஸுந்த³ரோ ப⁴த்³த³கோ நாம ஹோதீதி ஆஹ ‘‘ஸுந்த³ரே தி³ஸ்ஸதீ’’தி.

கோதி தே³வனாக³யக்க²க³ந்த⁴ப்³பா³தீ³ஸு கோ கதமோ. மேதி மம. பாதா³னீதி பாதே³. இத்³தி⁴யாதி இமாய ஏவரூபாய தே³வித்³தி⁴யா. யஸஸாதி இமினா ஏதி³ஸேன பரிவாரேன பரிஜனேன. ஜலந்தி விஜ்ஜோதமானோ. அபி⁴க்கந்தேனாதி அதிவிய கந்தேன கமனீயேன அபி⁴ரூபேன. வண்ணேனாதி ச²விவண்ணேன ஸரீரவண்ணனிபா⁴ய. ஸப்³பா³ ஓபா⁴ஸயம் தி³ஸாதி த³ஸபி தி³ஸா ஓபா⁴ஸேந்தோ பபா⁴ஸேந்தோ, சந்தோ³ விய ஸூரியோ விய ச ஏகோபா⁴ஸம் ஏகாலோகம் கரோந்தோதி கா³தா²ய அத்தோ². அபி⁴ரூபேதி உளாரரூபே ஸம்பன்னரூபே.

‘‘சோரோ சோரோ, ஸப்போ ஸப்போ’’திஆதீ³ஸு ப⁴யே ஆமேடி³தம். ‘‘விஜ்ஜ² விஜ்ஜ², பஹர பஹரா’’திஆதீ³ஸு கோதே⁴, ‘‘ஸாது⁴ ஸாதூ⁴திஆதீ³ஸு (ம. நி. 1.327; ஸம். நி. 2.127; 3.35; 5.1085) பஸம்ஸாயம், ‘‘க³ச்ச² க³ச்ச², லுனாஹி லுனாஹீ’’திஆதீ³ஸு துரிதே, ‘‘ஆக³ச்ச² ஆக³ச்சா²’’திஆதீ³ஸு கோதூஹலே, ‘‘பு³த்³தோ⁴ பு³த்³தோ⁴தி சிந்தேந்தோ’’திஆதீ³ஸு (பு³. வம். 2.44) அச்ச²ரே, ‘‘அபி⁴க்கமதா²யஸ்மந்தோ, அபி⁴க்கமதா²யஸ்மந்தோ’’திஆதீ³ஸு (தீ³. நி. 3.20; அ. நி. 9.11) ஹாஸே, ‘‘கஹம் ஏகபுத்தக, கஹம் ஏகபுத்தகா’’திஆதீ³ஸு (ம. நி. 2.353; ஸம். நி. 2.63) ஸோகே, ‘‘அஹோ ஸுக²ம் அஹோ ஸுக²’’ந்திஆதீ³ஸு (உதா³. 20; தீ³. நி. 3.305; சூளவ. 332) பஸாதே³. ச-ஸத்³தோ³ அவுத்தஸமுச்சயத்தோ². தேன க³ரஹாஅஸம்மானாதீ³னம் ஸங்க³ஹோ த³ட்ட²ப்³போ³. தத்த² ‘‘பாபோ பாபோ’’திஆதீ³ஸு க³ரஹாயம். ‘‘அபி⁴ரூபக அபி⁴ரூபகா’’திஆதீ³ஸு அஸம்மானே த³ட்ட²ப்³ப³ம்.

நயித³ம் ஆமேடி³தவஸேன த்³விக்க²த்தும் வுத்தம், அத² கோ² அத்த²த்³வயவஸேனாதி த³ஸ்ஸேந்தோ ‘‘அத² வா’’திஆதி³மாஹ. அபி⁴க்கந்தந்தி வசனம் அபேக்கி²த்வா நபும்ஸகலிங்க³வஸேன வுத்தம், தம் பன ப⁴க³வதோ வசனம் த⁴ம்மஸ்ஸ தே³ஸனாதி கத்வா ததா² வுத்தம். அத்த²மத்தத³ஸ்ஸனம் வா ஏதம், தஸ்மா அத்த²வஸேன லிங்க³விப⁴த்திவிபரிணாமோ வேதி³தப்³போ³. து³தியபதே³பி ஏஸேவ நயோ. தோ³ஸனாஸனதோதி ராகா³தி³கிலேஸதோ³ஸவித⁴மனதோ, கு³ணாதி⁴க³மனதோதி ஸீலாதி³கு³ணானம் ஸம்பாபனதோ. யே கு³ணே தே³ஸனா அதி⁴க³மேதி, தேஸு பதா⁴னபூ⁴தா த³ஸ்ஸேதப்³பா³தி தே பதா⁴னபூ⁴தே தாவ த³ஸ்ஸேதும் ‘‘ஸத்³தா⁴ஜனனதோ பஞ்ஞாஜனனதோ’’தி வுத்தம். ஸத்³தா⁴பமுகா² ஹி லோகியா கு³ணா, பஞ்ஞாபமுகா² லோகுத்தரா. ஸீலாதி³அத்த²ஸம்பத்தியா ஸாத்த²தோ, ஸபா⁴வனிருத்திஸம்பத்தியா ஸப்³யஞ்ஜனதோ. ஸுவிஞ்ஞேய்யஸத்³த³பயோக³தாய உத்தானபத³தோ, ஸண்ஹஸுகு²மபா⁴வேன து³ப்³பி³ஞ்ஞேய்யத்த²தாய க³ம்பீ⁴ரத்த²தோ. ஸினித்³த⁴முது³மது⁴ரஸத்³த³பயோக³தாய கண்ணஸுக²தோ, விபுலவிஸுத்³த⁴பேமனீயத்த²தாய ஹத³யங்க³மதோ. மானாதிமானவித⁴மனேன அனத்துக்கம்ஸனதோ, த²ம்ப⁴ஸாரம்ப⁴மத்³த³னேன அபரவம்ப⁴னதோ. ஹிதாதி⁴ப்பாயபவத்தியா பரேஸம் ராக³பரிளாஹாதி³வூபஸமனேன ச கருணாஸீதலதோ, கிலேஸந்த⁴காரவித⁴மனேன பஞ்ஞாவதா³ததோ. கரவீகருதமஞ்ஜுதாய ஆபாத²ரமணீயதோ, புப்³பா³பராவிருத்³த⁴ஸுவிஸுத்³த⁴த்த²தாய விமத்³த³க்க²மதோ. ஆபாத²ரமணீயதாய ஏவ ஸுய்யமானஸுக²தோ, விமத்³த³க்க²மதாய ஹிதஜ்ஜா²ஸயப்பவத்திததாய ச வீமம்ஸியமானஹிததோ. ஏவமாதீ³ஹீதி ஆதி³ஸத்³தே³ன ஸம்ஸாரசக்கனிவத்தனதோ, ஸத்³த⁴ம்மசக்கப்பவத்தனதோ, மிச்சா²வாத³வித⁴மனதோ, ஸம்மாவாத³பதிட்டா²பனதோ, அகுஸலமூலஸமுத்³த⁴ரணதோ, குஸலமூலஸம்ரோபனதோ, அபாயத்³வாரபிதா⁴னதோ, ஸக்³க³மக்³க³த்³வாரவிவரணதோ, பரியுட்டா²னவூபஸமனதோ, அனுஸயஸமுக்³கா⁴தனதோதி ஏவமாதீ³னம் ஸங்க³ஹோ த³ட்ட²ப்³போ³.

அதோ⁴முக²ட்ட²பிதந்தி கேனசி அதோ⁴முக²ம் ட²பிதம். ஹேட்டா²முக²ஜாதந்தி ஸபா⁴வேனேவ ஹேட்டா²முக²ஜாதம். உக்³கா⁴டேய்யாதி விவடம் கரேய்ய. ஹத்தே² க³ஹேத்வாதி ‘‘புரத்தா²பி⁴முகோ², உத்தராபி⁴முகோ² வா க³ச்சா²’’திஆதீ³னி அவத்வா ஹத்தே² க³ஹேத்வா ‘‘நிஸ்ஸந்தே³ஹம் ஏஸ மக்³கோ³, ஏவம் க³ச்சா²’’தி வதே³ய்ய. காளபக்க²சாதுத்³த³ஸீதி காளபக்கே² சாதுத்³த³ஸீ.

நிகுஜ்ஜிதம் ஆதே⁴ய்யஸ்ஸ அனாதா⁴ரபூ⁴தம் பா⁴ஜனம் ஆதா⁴ரபா⁴வாபாத³னவஸேன உக்குஜ்ஜேய்ய. ஹேட்டா²முக²ஜாததாய ஸத்³த⁴ம்மவிமுக²ம், அதோ⁴முக²ட்ட²பிததாய அஸத்³த⁴ம்மே பதிதந்தி ஏவம் பத³த்³வயம் யதா²ரஹம் யோஜேதப்³ப³ம், ந யதா²ஸங்க்²யம். காமம் காமச்ச²ந்தா³த³யோபி படிச்சா²த³கா, மிச்சா²தி³ட்டி² பன ஸவிஸேஸம் படிச்சா²தி³காதி ஆஹ ‘‘மிச்சா²தி³ட்டி²க³ஹனபடிச்ச²ன்ன’’ந்தி. தேனாஹ ப⁴க³வா ‘‘மிச்சா²தி³ட்டி²பரமாஹம், பி⁴க்க²வே, வஜ்ஜம் வதா³மீ’’தி (அ. நி. 1.310). ஸப்³போ³ அபாயகா³மிமக்³கோ³ கும்மக்³கோ³ ‘‘குச்சி²தோ மக்³கோ³’’தி கத்வா. ஸம்மாதி³ட்டி²ஆதீ³னம் உஜுபடிபக்க²தாய மிச்சா²தி³ட்டி²ஆத³யோ அட்ட² மிச்ச²த்தத⁴ம்மா மிச்சா²மக்³கோ³. தேனேவ ஹி தது³ப⁴யபடிபக்க²தம் ஸந்தா⁴ய ‘‘ஸக்³க³மோக்க²மக்³க³ம் ஆசிக்க²ந்தேனா’’தி வுத்தம். ஸப்பிஆதி³ஸன்னிஸ்ஸயோ பதீ³போ ந ததா² உஜ்ஜலோ, யதா² தேலஸன்னிஸ்ஸயோதி தேலபஜ்ஜோதக்³க³ஹணம். ஏதேஹி பரியாயேஹீதி ஏதேஹி நிகுஜ்ஜிதுக்குஜ்ஜனபடிச்ச²ன்னவிவரணாதி³உபமோபமிதப்³ப³பகாரேஹி, ஏதேஹி வா யதா²வுத்தேஹி ஸோளஸாரம்மணபரிக்³க³ஹஅஸம்மோஹவிஹாரதி³ப்³ப³விஹாரவிபா⁴வனபரியாயேஹி விஜ்ஜாத்தயவிபா⁴வனாபதே³ஸேன அத்தனோ ஸப்³ப³ஞ்ஞுகு³ணவிபா⁴வனபரியாயேஹி ச. தேனாஹ ‘‘அனேகபரியாயேன த⁴ம்மோ பகாஸிதோ’’தி.

தே³ஸனானுமோத³னாவண்ணனா நிட்டி²தா.

பஸன்னகாரவண்ணனா

பஸன்னகாரந்தி பஸன்னேஹி காதப்³ப³ம் ஸக்காரம். ஸரணந்தி படிஸரணம். தேனாஹ ‘‘பராயண’’ந்தி. பராயணபா⁴வோ ச அனத்த²னிஸேத⁴னேன அத்த²ஸம்படிபாத³னேன ச ஹோதீதி ஆஹ ‘‘அக⁴ஸ்ஸ தாதா ஹிதஸ்ஸ ச விதா⁴தா’’தி. அக⁴ஸ்ஸாதி து³க்க²தோதி வத³ந்தி, பாபதோதி பன யுத்தம். நிஸ்ஸக்கே சேதம் ஸாமிவசனம். ஏத்த² ச நாயம் க³மி-ஸத்³தோ³ நீ-ஸத்³தா³த³யோ விய த்³விகம்மகோ, தஸ்மா யதா² ‘‘அஜம் கா³மம் நேதீ’’தி வுச்சதி, ஏவம் ‘‘கோ³தமம் ஸரணம் க³ச்சா²மீ’’தி வத்தும் ந ஸக்கா, ‘‘ஸரணந்தி க³ச்சா²மீ’’தி பன வத்தப்³ப³ம். இதி-ஸத்³தோ³ சேத்த² லுத்தனித்³தி³ட்டோ², தஸ்ஸ சாயமத்தோ² – க³மனஞ்ச தத³தி⁴ப்பாயேன ப⁴ஜனம், ததா² ஜானனம் வாதி த³ஸ்ஸேந்தோ ‘‘இதி இமினா அதி⁴ப்பாயேனா’’திஆதி³மாஹ. தத்த² ப⁴ஜாமீதிஆதீ³ஸு புரிமஸ்ஸ புரிமஸ்ஸ பச்சி²மம் பச்சி²மம் அத்த²வசனம். ப⁴ஜனம் வா ஸரணாதி⁴ப்பாயேன உபஸங்கமனம், ஸேவனம் ஸந்திகாவசரதா, பயிருபாஸனம் வத்தபடிவத்தகரணேன உபட்டா²னந்தி ஏவம் ஸப்³ப³தா²பி அனஞ்ஞஸரணதம்யேவ தீ³பேதி. ‘‘க³ச்சா²மீ’’தி பத³ஸ்ஸ கத²ம் ‘‘பு³ஜ்ஜா²மீ’’தி அயமத்தோ² லப்³ப⁴தீதி ஆஹ ‘‘யேஸஞ்ஹீ’’திஆதி³.

அதி⁴க³தமக்³கே³,ஸச்சி²கதனிரோதே⁴தி பத³த்³வயேனபி ப²லட்டா² ஏவ த³ஸ்ஸிதா, ந மக்³க³ட்டா²தி தே த³ஸ்ஸேந்தோ ‘‘யதா²னுஸிட்ட²ம் படிபஜ்ஜமானே சா’’தி ஆஹ. நனு ச கல்யாணபுது²ஜ்ஜனோபி யதா²னுஸிட்ட²ம் படிபஜ்ஜதீதி வுச்சதீதி? கிஞ்சாபி வுச்சதி, நிப்பரியாயேன பன மக்³க³ட்டா² ஏவ ததா² வத்தப்³பா³, ந இதரே நியாமோக்கமனாபா⁴வதோ. ததா² ஹி தே ஏவ ‘‘அபாயேஸு அபதமானே தா⁴ரேதீ’’தி வுத்தா. ஸம்மத்தனியாமோக்கமனேன ஹி அபாயவினிமுத்திஸம்ப⁴வோ. அக்கா²யதீதி ஏத்த² இதி-ஸத்³தோ³ ஆதி³அத்தோ², பகாரத்தோ² வா. தேன ‘‘யாவதா, பி⁴க்க²வே, த⁴ம்மா ஸங்க²தா வா அஸங்க²தா வா, விராகோ³ தேஸம் அக்³க³மக்கா²யதீ’’தி ஸுத்தபத³ம் (அ. நி. 4.34; இதிவு. 90) ஸங்க³ண்ஹாதி, வித்தா²ரோதி வா இமினா. ஏத்த² ச அரியமக்³கோ³ நிய்யானிகதாய, நிப்³பா³னம் தஸ்ஸ தத³த்த²ஸித்³தி⁴ஹேதுதாயாதி உப⁴யமேவேத்த² நிப்பரியாயேன த⁴ம்மோதி வுத்தோ. நிப்³பா³னஞ்ஹி ஆரம்மணபச்சயபூ⁴தம் லபி⁴த்வா அரியமக்³க³ஸ்ஸ தத³த்த²ஸித்³தி⁴, அரியப²லானம் ‘‘யஸ்மா தாய ஸத்³தா⁴ய அவூபஸந்தாயா’’திஆதி³வசனதோ மக்³கே³ன ஸமுச்சி²ன்னானம் கிலேஸானம் படிப்பஸ்ஸத்³தி⁴பஹானகிச்சதாய நிய்யானானுகு³ணதாய நிய்யானபரியோஸானதாய ச. பரியத்தித⁴ம்மஸ்ஸ பன நிய்யானத⁴ம்மஸமதி⁴க³மஹேதுதாயாதி இமினா பரியாயேன த⁴ம்மபா⁴வோ லப்³ப⁴தி ஏவ, ஸ்வாயமத்தோ² பாடா²ருள்ஹோ ஏவாதி த³ஸ்ஸேந்தோ ‘‘ந கேவல’’ந்திஆதி³மாஹ.

காமராகோ³ ப⁴வராகோ³தி ஏவமாதி³பே⁴தோ³ ஸப்³போ³பி ராகோ³ விரஜ்ஜதி பஹீயதி ஏதேனாதி ராக³விராகோ³தி மக்³கோ³ கதி²தோ. ஏஜாஸங்கா²தாய தண்ஹாய அந்தோனிஜ்ஜா²னலக்க²ணஸ்ஸ ஸோகஸ்ஸ ச தது³ப்பத்தியம் ஸப்³ப³ஸோ பரிக்கீ²ணத்தா அனேஜமஸோகந்தி ப²லம் கதி²தம். அப்படிகூலந்தி அவிரோத⁴தீ³பனதோ கேனசி அவிருத்³த⁴ம், இட்ட²ம் பணீதந்தி வா அத்தோ². பகு³ணரூபேன பவத்திதத்தா, பகட்ட²கு³ணவிபா⁴வனதோ வா பகு³ணம். யதா²ஹ ‘‘விஹிம்ஸஸஞ்ஞீ பகு³ணம் ந பா⁴ஸிம், த⁴ம்மம் பணீதம் மனுஜேஸு ப்³ரஹ்மே’’தி. ஸப்³ப³த⁴ம்மக்க²ந்தா⁴ கதி²தாதி யோஜனா.

தி³ட்டி²ஸீலஸங்கா⁴தேனாதி ‘‘யாயம் தி³ட்டி² அரியா நிய்யானிகா நிய்யாதி தக்கரஸ்ஸ ஸம்மா து³க்க²க்க²யாய, ததா²ரூபாய தி³ட்டி²யா தி³ட்டி²ஸாமஞ்ஞக³தோ விஹரதீ’’தி (தீ³. நி. 3.324, 356; ம. நி. 1.492; 3.54) ஏவம் வுத்தாய தி³ட்டி²யா, ‘‘யானி தானி ஸீலானி அக²ண்டா³னி அச்சி²த்³தா³னி அஸப³லானி அகம்மாஸானி பு⁴ஜிஸ்ஸானி விஞ்ஞுப்பஸத்தா²னி அபராமட்டா²னி ஸமாதி⁴ஸம்வத்தனிகானி, ததா²ரூபேஹி ஸீலேஹி ஸீலஸாமஞ்ஞக³தோ விஹரதீ’’தி (தீ³. நி. 3.324; ம. நி. 1.492; 3.54; அ. நி. 6.12; பரி. 274) ஏவம் வுத்தானம் ஸீலானஞ்ச ஸம்ஹதபா⁴வேன, தி³ட்டி²ஸீலஸாமஞ்ஞேனாதி அத்தோ². ஸம்ஹதோதி க⁴டிதோ. அரியபுக்³க³லா ஹி யத்த² கத்த²சி தூ³ரே டி²தாபி அத்தனோ கு³ணஸாமக்³கி³யா ஸம்ஹதா ஏவ. அட்ட² ச புக்³க³ல த⁴ம்மத³ஸா தேதி தே புரிஸயுக³வஸேன சத்தாரோபி புக்³க³லவஸேன அட்டே²வ அரியத⁴ம்மஸ்ஸ பச்சக்க²த³ஸ்ஸாவிதாய த⁴ம்மத³ஸா. தீணி வத்தூ²னி ஸரணந்தி க³மனேன திக்க²த்தும் க³மனேன ச தீணி ஸரணக³மனானி. படிவேதே³ஸீதி அத்தனோ ஹத³யக³தம் வாசாய பவேதே³ஸி.

பஸன்னகாரவண்ணனா நிட்டி²தா.

ஸரணக³மனகதா²வண்ணனா

ஸரணக³மனஸ்ஸ விஸயபபே⁴த³ப²லஸம்கிலேஸபே⁴தா³னம் விய கத்து ச விபா⁴வனா தத்த² கோஸல்லாய ஹோதீதி ‘‘ஸரணக³மனேஸு கோஸல்லத்த²ம் ஸரணம்…பே… வேதி³தப்³போ³’’தி வுத்தம் தேன வினா ஸரணக³மனஸ்ஸேவ அஸம்ப⁴வதோ. கஸ்மா பனேத்த² வோதா³னம் ந க³ஹிதம், நனு வோதா³னவிபா⁴வனாபி தத்த² கோஸல்லாவஹாதி? ஸச்சமேதம், தம் பன ஸம்கிலேஸக்³க³ஹணேனேவ அத்த²தோ தீ³பிதம் ஹோதீதி ந க³ஹிதம். யானி ஹி தேஸம் ஸம்கிலேஸகாரணானி அஞ்ஞாணாதீ³னி, தேஸம் ஸப்³பே³ன ஸப்³ப³ம் அனுப்பன்னானம் அனுப்பாத³னேன, உப்பன்னானஞ்ச பஹானேன வோதா³னம் ஹோதீதி. ஹிம்ஸத்த²ஸ்ஸ ஸர-ஸத்³த³ஸ்ஸ வஸேனேதம் பத³ம் த³ட்ட²ப்³ப³ந்தி ‘‘ஹிம்ஸதீதி ஸரண’’ந்தி வத்வா தம் பன ஹிம்ஸனம் கேஸம், கத²ம், கஸ்ஸ வாதி சோத³னம் ஸோதே⁴ந்தோ ‘‘ஸரணக³தான’’ந்திஆதி³மாஹ. தத்த² ப⁴யந்தி வட்டப⁴யம். ஸந்தாஸந்தி சித்துத்ராஸம். தேனேவ சேதஸிகது³க்க²ஸ்ஸ க³ஹிதத்தா து³க்க²ந்தி இத⁴ காயிகம் து³க்க²ம். து³க்³க³திபரிகிலேஸந்தி து³க்³க³திபரியாபன்னம் ஸப்³ப³ம் து³க்க²ம். தயித³ம் ஸப்³ப³ம் பரதோ ப²லகதா²யம் ஆவி ப⁴விஸ்ஸதி. ஏதந்தி ‘‘ஸரண’’ந்தி பத³ம்.

ஏவம் அவிஸேஸதோ ஸரணஸத்³த³ஸ்ஸ அத்த²ம் த³ஸ்ஸேத்வா இதா³னி விஸேஸதோ த³ஸ்ஸேதும் ‘‘அத² வா’’திஆதி³ வுத்தம். ஹிதே பவத்தமானேனாதி ‘‘ஸம்பன்னஸீலா, பி⁴க்க²வே, விஹரதா²’’திஆதி³னா (ம. நி. 1.64, 69) அத்தே² நியோஜனேன. அஹிதா ச நிவத்தனேனாதி ‘‘பாணாதிபாதஸ்ஸ கோ² பாபகோ விபாகோ பாபகம் அபி⁴ஸம்பராய’’ந்திஆதி³னா ஆதீ³னவத³ஸ்ஸனாதி³முகே²ன அனத்த²தோ வினிவத்தனேன. ப⁴யம் ஹிம்ஸதீதி ஹிதாஹிதேஸு அப்பவத்திபவத்திஹேதுகம் ப்³யஸனம் அப்பவத்திகரணேன வினாஸேதி. ப⁴வகந்தாரா உத்தாரணேன மக்³க³ஸங்கா²தோ த⁴ம்மோ, இதரோ அஸ்ஸாஸதா³னேன ஸத்தானம் ப⁴யம் ஹிம்ஸதீதி யோஜனா. காரானந்தி தா³னவஸேன பூஜாவஸேன ச உபனீதானம் ஸக்காரானம். விபுலப²லபடிலாப⁴கரணேன ஸத்தானம் ப⁴யம் ஹிம்ஸதி அனுத்தரத³க்கி²ணேய்யபா⁴வதோதி அதி⁴ப்பாயோ. இமினாபி பரியாயேனாதி இமினாபி விப⁴ஜித்வா வுத்தேன காரணேன.

‘‘ஸம்மாஸம்பு³த்³தோ⁴ ப⁴க³வா, ஸ்வாக்கா²தோ த⁴ம்மோ, ஸுப்படிபன்னோ ஸங்கோ⁴’’தி ஏவம் பவத்தோ தத்த² ரதனத்தயே பஸாதோ³ தப்பஸாதோ³, ததே³வ ரதனத்தயம் க³ரு ஏதஸ்ஸாதி தக்³க³ரு, தஸ்ஸ பா⁴வோ தக்³க³ருதா, தப்பஸாதோ³ ச தக்³க³ருதா ச தப்பஸாத³தக்³க³ருதா, தாஹி. விது⁴ததி³ட்டி²விசிகிச்சா²ஸம்மோஹஅஸ்ஸத்³தி⁴யாதி³தாய விஹதகிலேஸோ. ‘‘ததே³வ ரதனத்தயம் பராயணம் க³தி தாணம் லேண’’ந்தி ஏவம் ஆகாரேன பவத்தியா தப்பராயணதாகாரபவத்தோ சித்துப்பாதோ³ ஸரணக³மனம் ‘‘ஸரணந்தி க³ச்ச²தி ஏதேனா’’தி. தம்ஸமங்கீ³தி தேன யதா²வுத்தசித்துப்பாதே³ன ஸமன்னாக³தோ. ஏவம் உபேதீதி ஏவம் ப⁴ஜதி ஸேவதி பயிருபாஸதி, ஏவம் வா ஜானாதி பு³ஜ்ஜ²தீதி ஏவமத்தோ² வேதி³தப்³போ³. ஏத்த² ச பஸாத³க்³க³ஹணேன லோகியஸரணக³மனமாஹ. தஞ்ஹி பஸாத³ப்பதா⁴னம், ந ஞாணப்பதா⁴னம். க³ருதாக³ஹணேன லோகுத்தரம். அரியா ஹி ரதனத்தயம் கு³ணாபி⁴ஞ்ஞாதாய பாஸாணச்ச²த்தம் விய க³ரும் கத்வா பஸ்ஸந்தி, தஸ்மா தப்பஸாதே³ன விக்க²ம்ப⁴னவஸேன விஹதகிலேஸோ தக்³க³ருதாய ஸமுச்சே²த³வஸேனாதி யோஜேதப்³ப³ம். தப்பராயணதா பனேத்த² தக்³க³திகதாதி தாய சதுப்³பி³த⁴ம்பி வக்க²மானம் ஸரணக³மனம் க³ஹிதந்தி த³ட்ட²ப்³ப³ம். அவிஸேஸேன வா பஸாத³க³ருதா ஜோதிதாதி பஸாத³க்³க³ஹணேன அவேச்சப்பஸாத³ஸ்ஸ இதரஸ்ஸ ச க³ஹணம், ததா² க³ருதாக³ஹணேனாதி உப⁴யேனபி உப⁴யம் ஸரணக³மனம் யோஜேதப்³ப³ம்.

மக்³க³க்க²ணே இஜ்ஜ²தீதி யோஜனா. நிப்³பா³னாரம்மணம் ஹுத்வாதி ஏதேன அத்த²தோ சதுஸச்சாதி⁴க³மோயேவ லோகுத்தரம் ஸரணக³மனந்தி த³ஸ்ஸேதி. தத்த² ஹி நிப்³பா³னத⁴ம்மோ ஸச்சி²கிரியாபி⁴ஸமயவஸேன, மக்³க³த⁴ம்மோ பா⁴வனாபி⁴ஸமயவஸேன படிவிஜ்ஜி²யமானோயேவ ஸரணக³மனத்தம் ஸாதே⁴தி, பு³த்³த⁴கு³ணா பன ஸாவககோ³சரபூ⁴தா பரிஞ்ஞாபி⁴ஸமயவஸேன, ததா² அரியஸங்க⁴கு³ணா. தேனாஹ ‘‘கிச்சதோ ஸகலேபி ரதனத்தயே இஜ்ஜ²தீ’’தி, இஜ்ஜ²ந்தஞ்ச ஸஹேவ இஜ்ஜ²தி, ந லோகியம் விய படிபாடியா அஸம்மோஹபடிவேதே⁴ன படிவித்³த⁴த்தாதி அதி⁴ப்பாயோ. யே பன வத³ந்தி ‘‘ந ஸரணக³மனம் நிப்³பா³னாரம்மணம் ஹுத்வா பவத்ததி, மக்³க³ஸ்ஸ அதி⁴க³தத்தா பன அதி⁴க³தமேவ ஹோதி ஏகச்சானம் தேவிஜ்ஜாதீ³னம் லோகியவிஜ்ஜாத³யோ வியா’’தி, தேஸம் லோகியமேவ ஸரணக³மனம் ஸியா, ந லோகுத்தரம், தஞ்ச அயுத்தம் து³வித⁴ஸ்ஸபி இச்சி²தப்³ப³த்தா. தந்தி லோகியஸரணக³மனம். ஸத்³தா⁴படிலாபோ⁴ ‘‘ஸம்மாஸம்பு³த்³தோ⁴ ப⁴க³வா’’திஆதி³னா. ஸத்³தா⁴மூலிகாதி யதா²வுத்தஸத்³தா⁴புப்³ப³ங்க³மா ஸம்மாதி³ட்டி² பு³த்³த⁴ஸுபு³த்³த⁴தம் த⁴ம்மஸுத⁴ம்மதம் ஸங்க⁴ஸுப்படிபதிஞ்ச லோகியாவபோ³த⁴வஸேனேவ ஸம்மா ஞாயேன த³ஸ்ஸனதோ. ‘‘ஸத்³தா⁴மூலிகா ஸம்மாதி³ட்டீ²’’தி ஏதேன ஸத்³தூ⁴பனிஸ்ஸயா யதா²வுத்தலக்க²ணா பஞ்ஞா லோகியஸரணக³மனந்தி த³ஸ்ஸேதி. தேனாஹ ‘‘தி³ட்டி²ஜுகம்மந்தி வுச்சதீ’’தி ‘‘தி³ட்டி² ஏவ அத்தனோ பச்சயேஹி உஜும் கரீயதீ’’தி கத்வா. தி³ட்டி² வா உஜும் கரீயதி ஏதேனாதி தி³ட்டி²ஜுகம்மம், ததா² பவத்தோ சித்துப்பாதோ³. ஏவஞ்ச கத்வா ‘‘தப்பராயணதாகாரபவத்தோ சித்துப்பாதோ³’’தி இத³ஞ்ச வசனம் ஸமத்தி²தம் ஹோதி. ஸத்³தா⁴புப்³ப³ங்க³மஸம்மாதி³ட்டி²க்³க³ஹணம் பன சித்துப்பாத³ஸ்ஸ தப்பதா⁴னதாயாதி த³ட்ட²ப்³ப³ம். ‘‘ஸத்³தா⁴படிலாபோ⁴’’தி இமினா மாதாதீ³ஹி உஸ்ஸாஹிததா³ரகாதீ³னம் விய ஞாணவிப்பயுத்தஸரணக³மனம் த³ஸ்ஸேதி, ‘‘ஸம்மாதி³ட்டீ²’’தி இமினா ஞாணஸம்பயுத்தஸரணக³மனம்.

தயித³ம் லோகியம் ஸரணக³மனம். அத்தா ஸன்னிய்யாதீயதி அப்பீயதி பரிச்சஜீயதி ஏதேனாதி அத்தஸன்னிய்யாதனம், யதா²வுத்தம் தி³ட்டி²ஜுகம்மம். தம் ரதனத்தயம் பராயணம் படிஸரணம் ஏதஸ்ஸாதி தப்பராயணோ, புக்³க³லோ, சித்துப்பாதோ³ வா, தஸ்ஸ பா⁴வோ தப்பராயணதா, யதா²வுத்ததி³ட்டி²ஜுகம்மமேவ. ஸரணந்தி அதி⁴ப்பாயேன ஸிஸ்ஸபா⁴வம் அந்தேவாஸிகபா⁴வம் உபக³ச்ச²தி ஏதேனாதி ஸிஸ்ஸபா⁴வூபக³மனம். ஸரணக³மனாதி⁴ப்பாயேனேவ பணிபததி ஏதேனாதி பணிபாதோ. ஸப்³ப³த்த² யதா²வுத்ததி³ட்டி²ஜுகம்மவஸேனேவ அத்தோ² வேதி³தப்³போ³. அத்தபரிச்சஜனந்தி ஸம்ஸாரது³க்க²னித்த²ரணத்த²ம் அத்தனோ அத்தபா⁴வஸ்ஸ பரிச்சஜனம். ஏஸ நயோ ஸேஸேஸுபி. பு³த்³தா⁴தீ³னம்யேவாதி அவதா⁴ரணம் இதரேஸுபி ஸரணக³மனவிஸேஸேஸு யதா²ரஹம் வத்தப்³ப³ம். ஏவஞ்ஹி தத³ஞ்ஞனிவத்தனம் கதம் ஹோதி.

ஏவம் அத்தஸன்னியாதனாதீ³னி ஏகேன பகாரேன த³ஸ்ஸேத்வா இதா³னி அபரேஹிபி பகாரேஹி த³ஸ்ஸேதும் ‘‘அபிசா’’திஆதி³ ஆரத்³த⁴ம். தேன பரியாயந்தரேஹிபி அத்தஸன்னிய்யாதனாதி³ கதமேவ ஹோதி அத்த²ஸ்ஸ அபி⁴ன்னத்தாதி த³ஸ்ஸேதி. ஆளவகாதீ³னந்தி ஆதி³-ஸத்³தே³ன ஸாதாகி³ரிஹேமவதாதீ³னம் ஸங்க³ஹோ த³ட்ட²ப்³போ³. நனு சேதே ஆளவகாத³யோ மக்³கே³னேவ ஆக³தஸரணக³மனா, கத²ம் தேஸம் தப்பராயணதாஸரணக³மனம் வுத்தந்தி? மக்³கே³னாக³தஸரணக³மனேஹிபி ‘‘ஸோ அஹம் விசரிஸ்ஸாமி கா³மா கா³ம’’ந்திஆதி³னா (ஸம். நி. 1.246) தேஹி தப்பராயணதாகாரஸ்ஸ பவேதி³தத்தா ததா² வுத்தம்.

ஞாதி…பே… வஸேனாதி ஏத்த² ஞாதிவஸேன ப⁴யவஸேன ஆசரியவஸேன த³க்கி²ணேய்யவஸேனாதி பச்சேகம் ‘‘வஸேனா’’தி பத³ம் யோஜேதப்³ப³ம். தத்த² ஞாதிவஸேனாதி ஞாதிபா⁴வவஸேன. ஏவம் ஸேஸேஸுபி. த³க்கி²ணேய்யபணிபாதேனாதி த³க்கி²ணேய்யதாஹேதுகேன பணிபாதேன. இதரேஹீதி ஞாதிபா⁴வாதி³வஸப்பவத்தேஹி தீஹி பணிபாதேஹி. இதரேஹீதிஆதி³னா ஸங்கே²பதோ வுத்தமத்த²ம் வித்தா²ரதோ த³ஸ்ஸேதும் ‘‘தஸ்மா’’திஆதி³ வுத்தம். வந்த³தீதி பணிபாதஸ்ஸ லக்க²ணவசனம். ஏவரூபந்தி தி³ட்ட²த⁴ம்மிகம் ஸந்தா⁴ய வத³தி. ஸம்பராயிகஞ்ஹி நிய்யானிகம் வா அனுஸாஸனம் பச்சாஸீஸந்தோ த³க்கி²ணேய்யபணிபாதமேவ கரோதீதி அதி⁴ப்பாயோ. ஸரணக³மனப்பபே⁴தோ³தி ஸரணக³மனவிபா⁴கோ³.

அரியமக்³கோ³யேவ லோகுத்தரஸரணக³மனந்தி ஆஹ ‘‘சத்தாரி ஸாமஞ்ஞப²லானி விபாகப²ல’’ந்தி. ஸப்³ப³து³க்க²க்க²யோதி ஸகலஸ்ஸ வட்டது³க்க²ஸ்ஸ அனுப்பாத³னிரோதோ⁴. ஏதந்தி ‘‘சத்தாரி அரியஸச்சானி, ஸம்மப்பஞ்ஞாய பஸ்ஸதீ’’தி (த⁴. ப. 190) ஏவம் வுத்தம் அரியஸச்சத³ஸ்ஸனம்.

நிச்சதோ அனுபக³மனாதி³வஸேனாதி நிச்சந்தி அக்³க³ஹணாதி³வஸேன. அட்டா²னந்தி ஹேதுபடிக்கே²போ. அனவகாஸோதி பச்சயபடிக்கே²போ. உப⁴யேனபி காரணமேவ படிக்கி²பதி. யந்தி யேன காரணேன. தி³ட்டி²ஸம்பன்னோதி மக்³க³தி³ட்டி²யா ஸம்பன்னோ ஸோதாபன்னோ. கஞ்சி ஸங்கா²ரந்தி சதுபூ⁴மகேஸு ஸங்க²தஸங்கா²ரேஸு ஏகஸங்கா²ரம்பி. நிச்சதோ உபக³ச்சே²ய்யாதி ‘‘நிச்சோ’’தி க³ண்ஹேய்ய. ஸுக²தோ உபக³ச்சே²ய்யாதி ‘‘ஏகந்தஸுகீ² அத்தா ஹோதி அரோகோ³ பரம் மரணா’’தி (தீ³. நி. 1.76) ஏவம் அத்ததி³ட்டி²வஸேன ஸுக²தோ கா³ஹம் ஸந்தா⁴யேதம் வுத்தம். தி³ட்டி²விப்பயுத்தசித்தேன பன அரியஸாவகோ பரிளாஹவூபஸமனத்த²ம் மத்தஹத்தி²பரித்தாஸிதோ விய சோக்க²ப்³ராஹ்மணோ உக்காரபூ⁴மிம் கஞ்சி ஸங்கா²ரம் ஸுக²தோ உபக³ச்ச²தி. அத்தவாரே கஸிணாதி³பஞ்ஞத்திஸங்க³ஹணத்த²ம் ‘‘ஸங்கா²ர’’ந்தி அவத்வா ‘‘கஞ்சி த⁴ம்ம’’ந்தி வுத்தம். இமேஸுபி வாரேஸு சதுபூ⁴மகவஸேனேவ பரிச்சே²தோ³ வேதி³தப்³போ³ தேபூ⁴மகவஸேனேவ வா. யம் யஞ்ஹி புது²ஜ்ஜனோ கா³ஹவஸேன க³ண்ஹாதி, ததோ ததோ அரியஸாவகோ கா³ஹம் வினிவேடே²தி. மாதரந்திஆதீ³ஸு ஜனிகா மாதா, ஜனகோ பிதா, மனுஸ்ஸபூ⁴தோ கீ²ணாஸவோ அரஹாதி அதி⁴ப்பேதோ. கிம் பன அரியஸாவகோ அஞ்ஞம் ஜீவிதா வோரோபேய்யாதி? ஏதம்பி அட்டா²னம், புது²ஜ்ஜனபா⁴வஸ்ஸ பன மஹாஸாவஜ்ஜபா⁴வத³ஸ்ஸனத்த²ம் அரியஸாவகஸ்ஸ ப²லதீ³பனத்த²ஞ்சேவம் வுத்தம். து³ட்ட²சித்தோ வத⁴கசித்தேன பது³ட்ட²சித்தோ. லோஹிதம் உப்பாதே³ய்யாதி ஜீவமானகஸரீரே கு²த்³த³கமக்கி²காய பிவனமத்தம்பி லோஹிதம் உப்பாதே³ய்ய. ஸங்க⁴ம் பி⁴ந்தே³ய்யாதி ஸமானஸம்வாஸகம் ஸமானஸீமாயம் டி²தம் ஸங்க⁴ம் ‘கம்மேன உத்³தே³ஸேன வோஹரந்தோ அனுஸ்ஸாவனேன ஸலாகக்³கா³ஹேனா’’தி (பரி. 458) ஏவம் வுத்தேஹி பஞ்சஹி காரணேஹி பி⁴ந்தே³ய்ய. அஞ்ஞம் ஸத்தா²ரந்தி அஞ்ஞம் தித்த²கரம் ‘‘அயம் மே ஸத்தா²’’தி ஏவம் க³ண்ஹேய்யாதி நேதம் டா²னம் விஜ்ஜதீதி அத்தோ².

ந தே க³மிஸ்ஸந்தி அபாயபூ⁴மிந்தி தே பு³த்³த⁴ம் ஸரணம் க³தா தன்னிமித்தம் அபாயபூ⁴மிம் ந க³மிஸ்ஸந்தி, தே³வகாயம் பன பரிபூரேஸ்ஸந்தீதி அத்தோ².

த³ஸஹி டா²னேஹீதி த³ஸஹி காரணேஹி. அதி⁴க்³க³ண்ஹந்தீதி அதி⁴ப⁴வந்தி. வேலாமஸுத்தாதி³வஸேனாபீதி ஏத்த² ‘‘சதுராஸீதிஸஹஸ்ஸஸங்கா²னம் ஸுவண்ணபாதிரூபியபாதிகம்ஸபாதீனம் யதா²க்கமம் ரூபியஸுவண்ணஹிரஞ்ஞபூரானம் கரீஸஸ்ஸ சதுத்த²பா⁴வப்பமாணானம் ஸப்³பா³லங்காரபடிமண்டி³தானம் சதுராஸீதியா ஹத்தி²ஸஹஸ்ஸானம் சதுராஸீதியா அஸ்ஸஸஹஸ்ஸானம் சதுராஸீதியா ரத²ஸஹஸ்ஸானம் சதுராஸீதியா தே⁴னுஸஹஸ்ஸானம் சதுராஸீதியா கஞ்ஞாஸஹஸ்ஸானம் சதுராஸீதியா பல்லங்கஸஹஸ்ஸானம் சதுராஸீதியா வத்த²கோடிஸஹஸ்ஸானம் அபரிமாணஸ்ஸ ச க²ஜ்ஜபோ⁴ஜ்ஜாதி³பே⁴த³ஸ்ஸ ஆஹாரஸ்ஸ பரிச்சஜனவஸேன ஸத்தமாஸாதி⁴கானி ஸத்த ஸம்வச்ச²ரானி நிரந்தரம் பவத்தவேலாமமஹாதா³னதோ ஏகஸ்ஸ ஸோதாபன்னஸ்ஸ தி³ன்னதா³னம் மஹப்ப²லதரம், ததோ ஸதம் ஸோதாபன்னானம் தி³ன்னதா³னதோ ஏகஸ்ஸ ஸகதா³கா³மிஸ்ஸ, ததோ ஏகஸ்ஸ அனாகா³மிஸ்ஸ, ததோ ஏகஸ்ஸ அரஹதோ, ததோ ஏகஸ்ஸ பச்சேகபு³த்³த⁴ஸ்ஸ, ததோ ஸம்மாஸம்பு³த்³த⁴ஸ்ஸ, ததோ பு³த்³த⁴ப்பமுக²ஸ்ஸ ஸங்க⁴ஸ்ஸ தி³ன்னதா³னம் மஹப்ப²லதரம், ததோ சாதுத்³தி³ஸம் ஸங்க⁴ம் உத்³தி³ஸ்ஸ விஹாரகரணம், ததோ ஸரணக³மனம் மஹப்ப²லதர’’ந்தி இமமத்த²ம் தீ³பேந்தஸ்ஸ வேலாமஸுத்தஸ்ஸ (அ. நி. 9.20) வஸேன. வுத்தஞ்ஹேதம் ‘‘யம் க³ஹபதி, வேலாமோ ப்³ராஹ்மணோ தா³னம் அதா³ஸி மஹாதா³னம், யோ ஏகம் தி³ட்டி²ஸம்பன்னம் போ⁴ஜேய்ய, இத³ம் ததோ மஹப்ப²லதர’’ந்திஆதி³ (அ. நி. 9.20). வேலாமஸுத்தாதீ³தி ஆதி³-ஸத்³தே³ன அக்³க³ப்பஸாத³ஸுத்தாதீ³னம் (அ. நி. 4.34; இதிவு. 90) ஸங்க³ஹோ த³ட்ட²ப்³போ³.

அஞ்ஞாணம் வத்து²த்தயஸ்ஸ கு³ணானம் அஜானனம் தத்த² ஸம்மோஹோ, ‘‘பு³த்³தோ⁴ நு கோ², ந நு கோ² பு³த்³தோ⁴’’திஆதி³னா விசிகிச்சா² ஸம்ஸயோ,மிச்சா²ஞாணம் தஸ்ஸ கு³ணானம் அகு³ணபா⁴வபரிகப்பனேன விபரீதக்³கா³ஹோ. ஆதி³-ஸத்³தே³ன அனாத³ராகா³ரவாதீ³னம் ஸங்க³ஹோ. ந மஹாஜுதிகந்தி ந உஜ்ஜலம், அபரிஸுத்³த⁴ம் அபரியோதா³தந்தி அத்தோ². ந மஹாவிப்பா²ரந்தி அனுளாரம். ஸாவஜ்ஜோதி தி³ட்டி²தண்ஹாதி³வஸேன ஸதோ³ஸோ. லோகியம் ஸரணக³மனம் ஸிக்கா²ஸமாதா³னம் விய அக்³க³ஹிதகாலபரிச்சே²த³ம் ஜீவிதபரியந்தமேவ ஹோதி, தஸ்மா தஸ்ஸ க²ந்த⁴பே⁴தே³ன பே⁴தோ³தி ஆஹ ‘‘அனவஜ்ஜோ காலகிரியாயா’’தி. ஸோதி அனவஜ்ஜோ ஸரணக³மனபே⁴தோ³. ஸதிபி அனவஜ்ஜத்தே இட்ட²ப²லோபி ந ஹோதீதி ஆஹ ‘‘அப²லோ’’தி.

ஸரணக³மனகதா²வண்ணனா நிட்டி²தா.

உபாஸகவிதி⁴கதா²வண்ணனா

கோ உபாஸகோதி ஸரூபபுச்சா², தஸ்மா கிம்லக்க²ணோ உபாஸகோதி வுத்தம் ஹோதி. கஸ்மாதி ஹேதுபுச்சா². தேன கேன பவத்தினிமித்தேன உபாஸகஸத்³தோ³ தஸ்மிம் புக்³க³லே நிருள்ஹோதி த³ஸ்ஸேதி. கிமஸ்ஸ ஸீலந்தி கீதி³ஸம் அஸ்ஸ உபாஸகஸ்ஸ ஸீலம், கித்தகேன ஸீலேனாயம் ஸீலஸம்பன்னோ நாம ஹோதீதி அத்தோ². கோ ஆஜீவோதி கோ அஸ்ஸ ஸம்மாஆஜீவோ, ஸோ பன மிச்சா²ஜீவஸ்ஸ பரிவஜ்ஜனேன ஹோதீதி ஸோபி விப⁴ஜீயதீதி. கா விபத்தீதி கா அஸ்ஸ ஸீலஸ்ஸ, ஆஜீவஸ்ஸ வா விபத்தி. அனந்தரஸ்ஸ ஹி விதி⁴ வா படிஸேதோ⁴ வா. கா ஸம்பத்தீதி ஏத்தா²பி ஏஸேவ நயோ.

யோ கோசீதி க²த்தியாதீ³ஸு யோ கோசி. தேன ஸரணக³மனமேவேத்த² காரணம், ந ஜாதிஆதி³விஸேஸோதி த³ஸ்ஸேதி. உபாஸனதோதி தேனேவ ஸரணக³மனேன தத்த² ச ஸக்கச்சகாரிதாய ஆத³ரகா³ரவப³ஹுமானாதி³யோகே³ன பயிருபாஸனதோ. வேரமணியோதி வேரம் வுச்சதி பாணாதிபாதாதி³து³ஸ்ஸீல்யம், தஸ்ஸ மணனதோ ஹனனதோ வினாஸனதோ வேரமணியோ, பஞ்ச விரதியோ விரதிப்பதா⁴னத்தா தஸ்ஸ ஸீலஸ்ஸ. தேனேவாஹ தத்த² தத்த² ‘‘படிவிரதோ ஹோதீ’’தி.

மிச்சா²வணிஜ்ஜாதி ந ஸம்மாவணிஜ்ஜா அயுத்தவணிஜ்ஜா அஸாருப்பவணிஜ்ஜா. பஹாயாதி அகரணேனேவ பஜஹித்வா. த⁴ம்மேனாதி த⁴ம்மதோ அனபேதேன. தேன அஞ்ஞம்பி அத⁴ம்மிகம் ஜீவிகம் படிக்கி²பதி. ஸமேனாதி அவிஸமேன. தேன காயவிஸமாதி³து³ச்சரிதம் வஜ்ஜேத்வா காயஸமாதி³னா ஸுசரிதேன ஜீவனம் த³ஸ்ஸேதி. ஸத்த²வணிஜ்ஜாதி ஆவுத⁴ப⁴ண்ட³ம் கத்வா வா காரேத்வா வா யதா²கதம் வா படிலபி⁴த்வா தஸ்ஸ விக்கயோ. ஸத்த²வணிஜ்ஜாதி மனுஸ்ஸவிக்கயோ. மம்ஸவணிஜ்ஜாதி ஸூனகாராத³யோ விய மிக³ஸூகராதி³கே போஸேத்வா மம்ஸம் ஸம்பாதே³த்வா விக்கயோ. மஜ்ஜவணிஜ்ஜாதி யம் கிஞ்சி மஜ்ஜம் யோஜேத்வா தஸ்ஸ விக்கயோ. விஸவணிஜ்ஜாதி விஸம் யோஜேத்வா, விஸம் க³ஹேத்வா வா தஸ்ஸ விக்கயோ. தத்த² ஸத்த²வணிஜ்ஜா பரோபரோத⁴னிமித்ததாய அகரணீயா வுத்தா, ஸத்தவணிஜ்ஜா அபு⁴ஜிஸ்ஸபா⁴வகரணதோ, மம்ஸவிஸவணிஜ்ஜா வத⁴ஹேதுதோ, மஜ்ஜவணிஜ்ஜா பமாத³ட்டா²னதோ.

தஸ்ஸேவாதி பஞ்சவேரமணிலக்க²ணஸ்ஸ ஸீலஸ்ஸ சேவ பஞ்சமிச்சா²வணிஜ்ஜாலக்க²ணஸ்ஸ ஆஜீவஸ்ஸ ச. விபத்தீதி பே⁴தோ³ பகோபோ ச. யாயாதி யாய படிபத்தியா. சண்டா³லோதி உபாஸகசண்டா³லோ. மலந்தி உபாஸகமலம். பதிகிட்டோ²தி உபாஸகனிஹீனோ. பு³த்³தா⁴தீ³ஸு கம்மகம்மப²லேஸு ச ஸத்³தா⁴விபரியாயோ அஸ்ஸத்³தி⁴யம் மிச்சா²தி⁴மோக்கோ². யதா²வுத்தேன அஸ்ஸத்³தி⁴யேன ஸமன்னாக³தோ அஸ்ஸத்³தோ⁴. யதா²வுத்த ஸீலவிபத்தி ஆஜீவவிபத்திவஸேன து³ஸ்ஸீலோ. ‘‘இமினா தி³ட்டா²தி³னா இத³ம் நாம மங்க³லம் ப⁴விஸ்ஸதீ’’தி ஏவம் பா³லஜனபரிகப்பிதகோதூஹலஸங்கா²தேன தி³ட்ட²ஸுதமுதமங்க³லேன ஸமன்னாக³தோ கோதூஹலமங்க³லிகோ. மங்க³லம் பச்சேதீதி தி³ட்ட²மங்க³லாதி³பே⁴த³ம் மங்க³லமேவ பத்தியாயதி. நோ கம்மந்தி கம்மஸ்ஸகதம் நோ பத்தியாயதி. இதோ ப³ஹித்³தா⁴தி இதோ ஸப்³ப³ஞ்ஞுபு³த்³த⁴ஸாஸனதோ ப³ஹித்³தா⁴ பா³ஹிரகஸமயே. த³க்கி²ணேய்யம் பரியேஸதீதி து³ப்படிபன்னம் த³க்கி²ணாரஹஸஞ்ஞீ க³வேஸதி. புப்³ப³காரம் கரோதீதி தா³னமானனாதி³கம் குஸலகிரியம் பட²மம் கரோதி. ஏத்த² ச த³க்கி²ணேய்யபரியேஸனபுப்³ப³காரே ஏகம் கத்வா பஞ்ச த⁴ம்மா வேதி³தப்³பா³.

விபத்தியம் வுத்தவிபரியாயேன ஸம்பத்தி ஞாதப்³பா³. அயம் பன விஸேஸோ – சதுன்னம்பி பரிஸானம் ரதிஜனனட்டே²ன உபாஸகோவ ரதனம் உபாஸகரதனம். கு³ணஸோபா⁴கித்திஸத்³த³ஸுக³ந்த⁴தாஹி உபாஸகோவ பது³மம் உபாஸகபது³மம். ததா² உபாஸகபுண்ட³ரீகோ.

ஆதி³ம்ஹீதி ஆதி³அத்தே². கோடியந்தி பரியந்தகோடியம். விஹாரக்³கே³னாதி ஓவரககோட்டா²ஸேன, ‘‘இமஸ்மிம் க³ப்³பே⁴ வஸந்தானம் இத³ம் நாம பனஸப²லம் பாபுணாதீ’’திஆதி³னா தம்தம்வஸனட்டா²னகோட்டா²ஸேனாதி அத்தோ². அஜ்ஜதந்தி அஜ்ஜஇச்சேவ அத்தோ².

பாணேஹி உபேதந்தி இமினா தஸ்ஸ ஸரணக³மனஸ்ஸ ஆபாணகோடிகதம் த³ஸ்ஸேந்தோ ‘‘யாவ மே ஜீவிதம் பவத்ததீ’’திஆதி³னா வத்வா புன ஜீவிதேன தம் வத்து²த்தயம் படிபூஜேந்தோ ‘‘ஸரணக³மனம் ரக்கா²மீ’’தி உப்பன்னம் தஸ்ஸ ப்³ராஹ்மணஸ்ஸ அதி⁴ப்பாயம் விபா⁴வேந்தோ ‘‘அஹஞ்ஹீ’’திஆதி³மாஹ. பாணேஹி உபேதந்தி ஹி யாவ மே பாணா த⁴ரந்தி, தாவ ஸரணம் உபேதம், உபேந்தோ ச ந வாசாமத்தேன, ந ஏகவாரம் சித்துப்பாத³னமத்தேன, அத² கோ² பாணே பரிச்சஜித்வாபி யாவஜீவம் உபேதந்தி ஏவமேத்த² அத்தோ² வேதி³தப்³போ³தி.

உபாஸகவிதி⁴கதா²வண்ணனா நிட்டி²தா.

ப⁴யபே⁴ரவஸுத்தவண்ணனாய லீனத்த²ப்பகாஸனா ஸமத்தா.