9. ஸம்மாதி³ட்டி²ஸுத்தவண்ணனா

89. கதே²துகம்யதாபுச்சா² ஏவாதி அவதா⁴ரணேன இதரா சதஸ்ஸோ புச்சா² நிவத்தேதி இதராஸம் அஸம்ப⁴வதோ, தத்த² யதா²புச்சி²தஸ்ஸ அத்த²ஸ்ஸ விஸ்ஸஜ்ஜனதோ ச ‘‘அயம் ஸம்மாதி³ட்டீ²’’தி யாதா²வதோ அஜானந்தாபி புது²ஜ்ஜனா பா³ஹிரகதாபஸாத³யோ அத்தனோ ஸமானஸீலே டி²தம் ஸம்மாதி³ட்டீ²தி வத³ந்தி. அனுஸ்ஸவாதி³வஸேனாபீதி அனுஸ்ஸவாகாரபரிவிதக்கதி³ட்டி²னிஜ்ஜா²னக்க²ந்திவஸேனபி. யதா²ஸமங்கி³தாகாரஸ்ஸ அத்த²ஸ்ஸ ஏவமேதந்தி நிஜ்ஜா²னக்க²மாபனதோ ஏகந்ததோ யாதா²வக்³கா³ஹோ ஹோதீதி ஆஹ ‘‘அத்தபச்சக்கே²னபீ’’தி, யாதா²வதோ லக்க²ணஸ்ஸ படிவித்³த⁴த்தா அத்தனோ பச்சக்க²பா⁴வேனாதி அத்தோ². ப³ஹுன்னம் வசனம் உபாதா³யாதி இமினா ஸாஸனே லோகே ச நிருள்ஹதாய அயம் ஆமேடி³தபயோகோ³தி ஸாஸனஸ்ஸ நிருள்ஹதாய ச ஸம்பஸாத³ம் உபாதா³யபி தது³ப⁴யிகோ ஆமேடி³தபயோகோ³ த³ட்ட²ப்³போ³. அத்த²ந்தி வசனத்த²ம். லக்க²ணந்தி ஸபா⁴வம். உபாதா³யாதி க³ஹேத்வா. ஸோப⁴னாயாதி ஸுந்த³ராய. பஸத்தா²யாதி பஸம்ஸாய. தேஸு புரிமேன த⁴ம்மானம் யதா²ஸபா⁴வாவபோ³த⁴ஸங்கா²தம் ஸம்மாதி³ட்டி²ஸபா⁴வம் த³ஸ்ஸேதி. தேன ஹி ஸா ஸப்³ப³த⁴ம்மே அபி⁴ப⁴வித்வா ஸோப⁴தி. து³தியேன ஸம்பயுத்தத⁴ம்மேஸு பரிணாயிகபா⁴வம். தேன ஹி ஸா ஸம்பயுத்தத⁴ம்மே ஞாணமயே விய தம்ஸமங்கி³னஞ்ச புக்³க³லம் ஞாணபிண்ட³ம் விய கரோதி, தஸ்ஸ ‘‘பண்டி³தோ நிபுணோ சே²கோ விஞ்ஞூ விபா⁴வீ’’திஆதி³னா தி³ஸாஸு பஸம்ஸா பத்த²ரதி.

கம்மஸ்ஸகதாஞாணந்தி கம்மம் ஸகோ ஏதஸ்ஸாதி கம்மஸ்ஸகோ, தஸ்ஸ பா⁴வோ கம்மஸ்ஸகதா, தத்த² ஞாணம் ‘‘இத³ம் கம்மம் ஸத்தானம் ஸகம், இத³ம் நோ ஸக’’ந்தி ஏவம் ஜானனஞாணம். ஸச்சானுலோமிகஞாணந்தி அரியஸச்சானம் படிவேத⁴ஸ்ஸ அனுலோமதோ ஸச்சானுலோமிகம் ஞாணம், விபஸ்ஸனாஞாணம். நோ ஸச்சானுலோமிகாயாதி பா³ஹிரகோ ஸச்சானுலோமிகாய ஸம்மாதி³ட்டி²யா நோ ஸம்மாதி³ட்டி² ஸப்³பே³ன ஸப்³ப³ம் தஸ்ஸ அபா⁴வதோ. தத்த² காரணமாஹ ‘‘அத்ததி³ட்டி²பராமாஸகத்தா’’தி. கம்மஸ்ஸ கதாதி³ட்டி² பன பா³ஹிரகஸ்ஸ அத்ததி³ட்டி²ம் அனுருஜ்ஜ²ந்தீ பவத்ததி ‘‘அத்தி² தி³ன்ன’’ந்திஆதி³னயப்பவத்திதோ. ஸாஸனிகோ த்³வீஹிபீதி ஸாஸனிகோ புது²ஜ்ஜனோ கம்மஸ்ஸகதாஞாணாதீ³ஹி த்³வீஹிபி ஸம்மாதி³ட்டி². ஓக்கந்தஸம்மத்தனியாமத்தா ‘‘ஸேக்கோ² நியதாயா’’தி வுத்தம். அஸேக்கா²ய ஸம்மாதி³ட்டி²யா ஸம்மாதி³ட்டீ²தி ஆனேத்வா ஸம்ப³ந்தி⁴தப்³ப³ம். தீஸுபி புக்³க³லேஸு ஸேக்கோ² இத⁴ ஸம்மாதி³ட்டீ²தி அதி⁴ப்பேதோதி த³ஸ்ஸேந்தோ ‘‘நியதாய நிய்யானிகாயா’’திஆதி³மாஹ.

இதா³னி யதா²வுத்தமத்த²ம் பாளியா விபா⁴வேதும் ‘‘தேனேவாஹா’’திஆதி³ வுத்தம். அந்தத்³வயந்தி ‘‘ஸஸ்ஸதம், உச்சே²த³ம், காமஸுக²ம், அத்தகிலமத²’’ந்தி ஏதம் அந்தத்³வயம். லீனுத்³த⁴ச்சபதிட்டா²னாயூஹனந்தத்³வயஸ்ஸ அனுபக³மனம் அத்த²ஸித்³த⁴மேவ. உஜுபா⁴வேனாதி உஜுஸபா⁴வேன மக்³கே³ன, மஜ்ஜி²மாய படிபத்தியாதி அத்தோ². த⁴ம்மே பஸாத³க்³க³ஹணேன ஸத்த²ரி ஸங்கே⁴ ச பஸாதோ³பி க³ஹிதோயேவ ஹோதீதி ‘‘த⁴ம்மே’’இச்சேவ வுத்தோ தத³வினாபா⁴வதோ. யஸ்மா ஏஸ நியதாய ஸம்மாதி³ட்டி²யா ஸமன்னாக³தோ ஸம்மாதி³ட்டீ²தி அதி⁴ப்பேதோ, தஞ்ச வட்டதோ நிய்யானம் விவட்டாதி⁴க³மேன ஹோதீதி ஆஹ ‘‘ஆக³தோ இமம் ஸத்³த⁴ம்ம’’ந்தி. நிப்³பா³னஞ்ஹி ஸந்தோ ஸதா³ விஜ்ஜமானோ த⁴ம்மோதி கத்வா ஸத்³த⁴ம்மோதி இமம் ப²லேஹி அஸாதா⁴ரணேன பரியாயேன வத்தப்³ப³தம் லப⁴தி. தயித³மஸ்ஸ ஆக³மம் ஸச்சி²கிரியாபி⁴ஸமயோ, ஸோ ச பஹானாபி⁴ஸமயாதீ³ஹி ஸஹேவ இத⁴ இஜ்ஜ²தீதி த³ஸ்ஸேந்தோ ‘‘ஸப்³ப³தி³ட்டி²க³ஹனானீ’’திஆதி³மாஹ. தத்த² ஸப்³ப³தி³ட்டி²க³ஹனானி வினிப்³பே³டே²ந்தோ ஸப்³ப³கிலேஸே பஜஹந்தோதி பத³த்³வயேன பன பஹானாபி⁴ஸமயமாஹ, ஜாதிஸம்ஸாரா நிக்க²மந்தோதி இமினா பரிஞ்ஞாபி⁴ஸமயம். ஸமதிக்கமத்தோ² ஹி பரிஞ்ஞத்தோ². படிபத்திம் பரினிட்ட²பேந்தோதி இமினா பா⁴வனாபி⁴ஸமயந்தி த³ட்ட²ப்³ப³ம்.

காலபரிச்சே²த³வசனந்தி பரிச்சி²ஜ்ஜதீதி பரிச்சே²தோ³, காலோ ஏவ பரிச்சே²தோ³ காலபரிச்சே²தோ³, யோ ஸோ அகுஸலபஜானனாதி³னா பரிச்சி²ன்னோ மக்³க³வுட்டா²னகாலோ மக்³க³க்க²ணோ, தஸ்ஸ வசனந்தி அத்தோ². தேனாஹ ‘‘யஸ்மிம் காலே’’தி. அகுஸலஞ்சாதி ச-ஸத்³தோ³ ஸமுச்சயத்தோ². தேன வக்க²மானம் அகுஸலமூலாதி³ம் ஸமுச்சினோதி. த³ஸாகுஸலகம்மபத²ந்தி குதோயம் விஸேஸோ, யாவதா அனித்³தா⁴ரிதவிஸேஸம் அகுஸலம் க³ஹிதந்தி? ந ஸாமஞ்ஞஜோதனாய விஸேஸே அவட்டா²னதோ. கிம் வா இமாய யுத்திசிந்தாய, யஸ்மா பட²மவாரேன உத்³தே³ஸவஸேன தே³ஸிதஸ்ஸ அத்த²ஸ்ஸ வித்தா²ரதே³ஸனா து³தியவாரோ. தேனேவாஹ ‘‘கதமம் பனாவுஸோ’’திஆதி³. யஸ்மா லோகுத்தரா ஸம்மாதி³ட்டி² இத⁴ அதி⁴ப்பேதா, தஸ்மா நிரோதா⁴ரம்மணாய பஜானனாய மக்³க³பஞ்ஞாய கிச்சவஸேன ஸம்மோஹதோ ‘‘இத³ம் து³க்க²’’ந்தி த³ஸஅகுஸலகம்மபத²ம் படிவிஜ்ஜ²ந்தோ ‘‘அகுஸலம் பஜானாதீ’’தி வுச்சதீதி அத்தோ². தஸ்ஸாதி அகுஸலகம்மபத²ஸங்கா²தஸ்ஸ து³க்க²ஸ்ஸ. தேனேவ பகாரேனாதி ‘‘நிரோதா⁴ரம்மணாய பஜானனாய கிச்சவஸேனா’’தி வுத்தப்பகாரேன.

குஸலந்தி ஏத்தா²யம் வசனத்தோ² – குச்சி²தே பாபத⁴ம்மே ஸலயதி சலயதி கம்பேதீதி குஸலம், குச்சி²தேன வா ஆகாரேன ஸயந்தீதி குஸா, பாபகா த⁴ம்மா. தே குஸே லுனாதி சி²ந்த³தீதி குஸலம். குச்சி²தானம் வா ஸானதோ தனுகரணதோ ஞாணம் குஸம் நாம, தேன லாதப்³ப³ம் க³ஹேதப்³ப³ம் பவத்தேதப்³ப³ந்தி குஸலம். யதா² வா குஸோ உப⁴யபா⁴க³க³தம் ஹத்த²பதே³ஸம் லுனாதி, ஏவமித³ம் உப்பன்னானுப்பன்னவஸேன உப⁴யபா⁴க³க³தம் ஸம்கிலேஸபக்க²ம் லுனாதி சி²ந்த³தி, தஸ்மா குஸோ விய லுனாதீதி குஸலம். குச்சி²தானம் வா ஸாவஜ்ஜத⁴ம்மானம் ஸலனதோ ஸம்வரணதோ குஸலம். குஸலத⁴ம்மவஸேன ஹி அகுஸலா மனச்ச²ட்டே²ஸு த்³வாரேஸு அப்பவத்தியா ஸம்வுதா ஹோந்தி. குச்சி²தே வா பாபத⁴ம்மே ஸலயதி க³மேதி அபனேதீதி குஸலம். குச்சி²தானம் வா பாணாதிபாதாதீ³னம் ஸானதோ நிஸானதோ தேஜனதோ குஸா, தோ³ஸலோபா⁴த³யோ. ஸாதீ³னவவஸேன சேதனாய திக்க²பா⁴வப்பத்தியா பாணாதிபாதாதீ³னம் மஹாஸாவஜ்ஜதா. தே குஸே லுனாதி சி²ந்த³தீதி குஸலம். குச்சி²தானம் வா ஸானதோ அந்தகரணதோ வினாஸனதோ குஸானி, புஞ்ஞகிரியவஸேன பவத்தானி ஸத்³தா⁴தீ³னி இந்த்³ரியானி. தேஹி லாதப்³ப³ம் பவத்தேதப்³ப³ந்தி குஸலம். ‘‘கு’’இதி வா பூ⁴மி வுச்சதி, அதி⁴ட்டா²னபா⁴வேன தம்ஸதி³ஸஸ்ஸ அத்தனோ நிஸ்ஸயபூ⁴தஸ்ஸ ரூபாரூபபப³ந்த⁴ஸ்ஸ ஸம்பதி ஆயதிஞ்ச அனுத³ஹேன வினாஸனதோ கும் ஸஸந்தீதி குஸா, ராகா³த³யோ. தே விய அத்தனோ நிஸ்ஸயஸ்ஸ லவனதோ சி²ந்த³னதோ குஸலம். பயோக³ஸம்பாதி³தா ஹி குஸலத⁴ம்மா அச்சந்தமேவ ரூபாரூபத⁴ம்மே அப்பவத்திகரணேன ஸமுச்சி²ந்த³ந்தி. குஸலஸ்ஸ மூலந்தி குஸலமூலம், ஸுப்பதிட்டி²தபா⁴வஸாத⁴னேன குஸலஸ்ஸ பதிட்டா² நிதா³னந்தி அத்தோ². அகுஸலமூலந்தி ஏத்தா²பி ஏஸேவ நயோ.

அகுஸலந்தி பன ந குஸலம் அகுஸலம், குஸலத⁴ம்மானம் படிபக்க²வஸேன அகுஸலந்தி பத³ஸ்ஸ அத்தோ² வேதி³தப்³போ³. ஏவஞ்ஹி ஆரோக்³யானவஜ்ஜஸுக²விபாககோஸல்லஸம்பூ⁴தட்டே²ன குஸலம் வுச்சதீதி. யதா² யம் த⁴ம்மஜாதம் ந அரோக³ம் ந அவஜ்ஜம் ந ஸுக²விபாகம் ந ச கோஸல்லஸம்பூ⁴தம், தம் அகுஸலந்தி அயமத்தோ² த³ஸ்ஸிதோ ஹோதி. ஏவம் யம் ந குச்சி²தானம் ஸலனஸபா⁴வம், ந குஸேன, குஸேஹி வா பவத்தேதப்³ப³ம், ந ச குஸோ விய லவனகம், தம் அகுஸலம் நாமாதி அயம்பி அத்தோ² த³ஸ்ஸிதோதி வேதி³தப்³போ³. வத்து²பஜானனாதி து³க்கா²தி³வத்து²னோ பஜானனா படிவேதோ⁴. ததா² பு³ஜ்ஜ²னகபுக்³க³லானம் அஜ்ஜா²ஸயவஸேன தே³ஸனா பவத்தாதி ஆஹ ‘‘அகுஸலாதி³பஜானனேனாபீ’’தி. தேனேவ ச ஸம்கி²த்தேன தே³ஸனா பவத்தா. பா⁴வனாமனஸிகாரோ பன ‘‘ஸப்³ப³ம் பி⁴க்க²வே அபி⁴ஞ்ஞேய்ய’’ந்தி (ஸம். நி. 4.46; படி. ம. 1.3) வசனதோ அனவஸேஸதோ ரூபாரூபத⁴ம்மானம் பரிக்³க³ஹவஸேனேவ பவத்ததி. தேனாஹ ‘‘தே³ஸனாயேவா’’திஆதி³. தத்த² மனஸிகாரபடிவேதோ⁴தி புப்³ப³பா⁴கே³ பவத்தவிபஸ்ஸனாமனஸிகாரோ அரியமக்³க³படிவேதோ⁴ ச. கஸ்ஸசி அகோபனதோ வித்தா²ரவஸேனேவ வுத்தம் விபஸ்ஸனம் அனுயுஞ்ஜந்தா மக்³க³ம் படிவிஜ்ஜ²ந்தாபி வித்தா²ரனயேனேவ படிவிஜ்ஜ²ந்தீதி அத்தோ² விஸுத்³தி⁴க்கமஸ்ஸ அபா⁴வதோ.

பி⁴க்கூ²தி மஹாவிஹாரே த⁴ம்மஸங்கீ³திவஸேன பஞ்சனிகாயமண்ட³லே நிஸின்னபி⁴க்கூ². தே²ரோதி தத்த² ஸங்க⁴த்தே²ரோதி வத³ந்தி. வத்த²ஸுத்தவண்ணனாயம் வுத்தனயேன பன மஹாஸங்க⁴ரக்கி²தத்தே²ரஸ்ஸ அந்தேவாஸிகபி⁴க்கூ² ஸந்தா⁴ய ‘‘ஆஹம்ஸூ’’தி வுத்தம். தே²ரோதி பன மஹாஸங்க⁴ரக்கி²தத்தே²ரோ. ஸோ ஹி இமஸ்மிம் மஜ்ஜி²மனிகாயே தம் தம் வினிச்ச²யம் கதே²ஸி. ராஸிதோதி பிண்ட³தோ, ஏகஜ்ஜ²ந்தி அத்தோ².

அகுஸலகம்மபத²வண்ணனா

அகோஸல்லப்பவத்தியாதி கோஸல்லபடிபக்க²தோ அகோஸல்லம் வுச்சதி அஞ்ஞாணம், ததோ பவத்தனதோ, அகோஸல்லஸம்பூ⁴தத்தாதி அத்தோ². ஞாணபடிபக்கோ² அஞ்ஞாணம் மித்தபடிபக்கோ² அமித்தோ விய குஸலபடிபக்கோ² அகுஸலம் குஸலேன பஹாதப்³ப³த்தா, ந பன குஸலானம் பஹாயதத்தா. குஸலமேவ ஹி பயோக³ஸம்பாதி³தம் அகுஸலம் பஜஹதி. ஸஹ அவஜ்ஜேஹி லோபா⁴தீ³ஹி வத்ததீதி ஸாவஜ்ஜம். து³க்கோ² அனிட்டோ² சதுக்க²ந்த⁴-ஸங்கா²தோ விபாகோ ஏதஸ்ஸாதி து³க்க²விபாகம். தத்த² ஸாவஜ்ஜவசனேன அகுஸலானம் பவத்திது³க்க²தம் த³ஸ்ஸேதி, து³க்க²விபாகவசனேன விபாகது³க்க²தம். புரிமஞ்ஹி பவத்திஸம்ப⁴வவஸேன அகுஸலஸ்ஸ லக்க²ணவசனம், பச்சி²மம் தாலந்தரே விபாகுப்பாத³னஸமத்த²தாவஸேன. ததா² புரிமேன அகுஸலஸ்ஸ அவிஸுத்³த⁴ஸபா⁴வதம் த³ஸ்ஸேதி, பச்சி²மேன அவிஸுத்³த⁴விபாகதம். புரிமேன அகுஸலம் குஸலஸபா⁴வதோ நிவத்தேதி, பச்சி²மேன அப்³யாகதஸபா⁴வதோ ஸவிபாகத்ததீ³பகத்தா பச்சி²மஸ்ஸ. புரிமேன வா அவஜ்ஜவந்ததாத³ஸ்ஸனதோ கிச்சட்டே²ன ரஸேன அனத்த²ஜனனரஸதம் த³ஸ்ஸேதி, பச்சி²மேன ஸம்பத்திஅத்தே²ன அனிட்ட²விபாகரஸதம். புரிமேன ச உபட்டா²னாகாரட்டே²ன பச்சுபட்டா²னேன ஸம்கிலேஸபச்சுபட்டா²னதம், பச்சி²மேன ப²லட்டே²ன து³க்க²விபாகபச்சுபட்டா²னதம். புரிமேன ச அயோனிஸோமனஸிகாரம் அகுஸலஸ்ஸ பத³ட்டா²னம் பகாஸேதி. ததோ ஹி தம் ஸாவஜ்ஜம் ஜாதம், பச்சி²மேன அகுஸலஸ்ஸ அஞ்ஞேஸம் பத³ட்டா²னபா⁴வம் விபா⁴வேதி. தஞ்ஹி து³க்க²விபாகஸ்ஸ காரணந்தி. ஸம்கிலிட்ட²ந்தி ஸம்கிலேஸேஹி ஸமன்னாக³தம், த³ஸஹி கிலேஸவத்தூ²ஹி விபா³தி⁴தம், உபதாபிதம் வா தேஹி விதூ³ஸிதம் மலீனகதஞ்சாதி அத்தோ². இத³ஞ்சஸ்ஸ து³க்க²விபாகதஞ்சாதி அத்தே² இத³ஞ்ச து³க்க²விபாகதம் அபச்சக்க²தாய அஸத்³த³ஹந்தானம் பச்சக்க²தோ ஆதீ³னவத³ஸ்ஸனேன ஸம்வேஜனத்த²ம் வுத்தம். ஸாதா⁴ரணா ஸப்³ப³ஸ்ஸபி அகுஸலஸ்ஸ.

ஸரஸேனேவ (த⁴. ஸ. மூலடீ. 1) பதனஸபா⁴வஸ்ஸ அந்தரா ஏவ அதீவ பாதனம் அதிபாதோ, ஸணிகம் பதிதும் அத³த்வா ஸீக⁴ம் பாதனந்தி அத்தோ². அதிக்கம்மவா ஸத்தா²தீ³ஹி அபி⁴ப⁴வித்வா பாதனம் அதிபாதோ. பயோக³வத்து²மஹந்ததாதீ³ஹி மஹாஸாவஜ்ஜதா தேஹி பச்சயேஹி உப்பஜ்ஜமானாய சேதனாய ப³லவபா⁴வதோ. ஏகஸ்ஸ ஹி பயோக³ஸ்ஸ ஸஹஸா நிப்பா²த³னவஸேன ஸகிச்சஸாதி⁴காய ப³ஹுக்க²த்தும் பவத்தஜவனேஹி லத்³தா⁴ஸேவனாய ச ஸன்னிட்டா²பகசேதனாய வஸேன பயோக³ஸ்ஸ மஹந்தபா⁴வோ. ஸதிபி கதா³சி கு²த்³த³கே சேவ மஹந்தே ச பாணே பயோக³ஸ்ஸ ஸமபா⁴வே மஹந்தம் ஹனந்தஸ்ஸ சேதனா திப்³பா³காரா உப்பஜ்ஜதீதி வத்து²ஸ்ஸ மஹந்தபா⁴வோ. இதி உப⁴யம்பேதம் சேதனாய ப³லவபா⁴வேனேவ ஹோதீதி. யதா²வுத்தபச்சயபரியாயேபி தம்தம்பச்சயேஹி சேதனாய ப³லவதாய ஏவ மஹாஸாவஜ்ஜபா⁴வோ வேதி³தப்³போ³. பயோக³வத்து²ஆதி³பச்சயானஞ்ஹி அமஹத்தேபி ஹந்தப்³ப³ஸ்ஸ கு³ணவந்ததாய மஹாஸாவஜ்ஜதா, தப்³பி³பரியாயேன அப்பஸாவஜ்ஜதா ச வத்து²ஸ்ஸ மஹத்தாமஹத்தேஸு விய த³ட்ட²ப்³பா³. கிலேஸானம் உபக்கமானம் த்³வின்னஞ்ச முது³தாய திப்³ப³தாய ச அப்பஸாவஜ்ஜதா மஹாஸாவஜ்ஜதாபி யோஜேதப்³பா³. பாணோ பாணஸஞ்ஞிதா வத⁴கசித்தஞ்ச புப்³ப³பா⁴கி³யாபி ஹோந்தி, உபக்கமோ வத⁴கசேதனாஸமுட்டா²பிதோ. பஞ்ச ஸம்பா⁴ரா ஹி பாணாதிபாதசேதனாதி ஸா பஞ்சஸம்பா⁴ரவினிமுத்தா த³ட்ட²ப்³பா³. அயஞ்ச விசாரோ அதி³ன்னாதா³னாதீ³ஸுபி யதா²ரஹம் வத்தப்³போ³. விஜ்ஜ²னபஹரணாதி³வஸேன ஸஹத்தே²னனிப்³ப³த்தோ ஸாஹத்தி²கோ, ஆணாபனவஸேன பவத்தோ ஆணத்திகோ, உஸுஸத்தியந்தபாஸாணாதி³னிஸ்ஸஜ்ஜனவஸேன பவத்தோ நிஸ்ஸக்³கி³யோ, அது³ஹலஸஜ்ஜனாதி³வஸேன பவத்தோ தா²வரோ, ஆத²ப்³ப³ணிகாதீ³னம் விய மந்தபரிஜப்பனவஸேன பவத்தோ விஜ்ஜாமயோ, கம்மவிபாகஜித்³தி⁴மயோ இத்³தி⁴மயோ தா³டா²கோடனாதீ³னி விய.

யதி³ ‘‘மம இத³’’ந்தி பரேன பரிக்³க³ஹிதம் அதி³ன்னம், உத்தானஸேய்யகதா³ரகஸந்தகே கத²ம் தஸ்ஸ பரிக்³க³ஹஸஞ்ஞாய ஏவ அபா⁴வதோதி ஆஹ ‘‘யத்த² பரோ’’திஆதி³. பரோ நாம விஞ்ஞூ வா அவிஞ்ஞூ வா அத்தி² தஸ்ஸ வத்து²ஸ்ஸ ஸாமிகோ. அவிஞ்ஞூபி ஹி விஞ்ஞுகாலே யதா²காமம் கரோந்தோ அத³ண்டா³ரஹோதி. மந்தபரிஜப்பனேன பரஸந்தகஹரணம் விஜ்ஜாமயோ, வினா மந்தேன பரஸந்தகஸ்ஸ காயவசீபயோகே³ஹி பரிகட்³ட⁴னம் தாதி³ஸேனித்³தி⁴வஸேன இத்³தி⁴மயோ பயோகோ³தி அதி³ன்னாதா³னே ச² பயோகா³ஸாஹத்தி²காத³யோ வுத்தா. யதா²னுரூபந்தி ஏத்த² ஸாஹத்தி²கோ தாவ பஞ்சன்னம்பி அவஹாரானம் வஸேன பவத்ததி, ததா² ஆணத்தியோ நிஸ்ஸக்³கி³யோ ச. தா²வரோ தே²ய்யாவஹாரபஸய்ஹாவஹாரபடிச்ச²ன்னாவஹாரவஸேன. ததா² ஸேஸாபீதி த³ட்ட²ப்³ப³ம்.

மேது²னஸமாசாரேஸூதி ஸதா³ராஸந்தோஸ-பரதா³ரக³மனவஸேன து³விதே⁴ஸு மேது²னஸமாசாரேஸு. அயமேவஹி பே⁴தோ³ இதா⁴தி⁴ப்பேதோ. கோ³த்தரக்கி²தா ஸகோ³த்தேஹி ரக்கி²தா. த⁴ம்மரக்கி²தா ஸஹத⁴ம்மிகேஹி ரக்கி²தா. ஸாரக்கா² ஸஸாமிகா. யஸ்ஸா க³மனே ரஞ்ஞா த³ண்டோ³ ட²பிதோ, ஸா ஸபரித³ண்டா³. ப⁴ரியபா⁴வத்த²ம் த⁴னேன கீதா த⁴னக்கீதா. ச²ந்தே³ன வஸந்தீ ச²ந்த³வாஸினீ. போ⁴க³த்த²ம் வஸந்தீ போ⁴க³வாஸினீ. படத்த²ம் வஸந்தீ படவாஸினீ. உத³கபத்தம் ஆமஸித்வா க³ஹிதா ஓத³பத்தகினீ. சும்ப³டகம் அபனேத்வா க³ஹிதா ஓப⁴டசும்ப³டா. கரமரானீதா த⁴ஜாஹதா. தங்க²ணிகா முஹுத்திகா. அபி⁴ப⁴வித்வா வீதிக்கமே மிச்சா²சாரோ மஹாஸாவஜ்ஜோ, ந ததா² த்³வின்னம் ஸமானச²ந்த³தாய. அபி⁴ப⁴வித்வா வீதிக்கமனே ஸதிபி மக்³கே³னமக்³க³படிபத்திஅதி⁴வாஸனே புரிமுப்பன்னஸேவனாபி⁴ஸந்தி⁴பயோகா³பா⁴வதோ மிச்சா²சாரோ ந ஹோதி அபி⁴பு⁴ய்யமானஸ்ஸாதி வத³ந்தி. ஸேவனாசித்தே ஸதி பயோகா³பா⁴வோ அப்பமாணம் யேபு⁴ய்யேன இத்தி²யா ஸேவனாபயோக³ஸ்ஸ அபா⁴வதோ. ததா² ஸதி புரேதரம் ஸேவனாசித்தஸ்ஸ உபட்டா²னேபி தஸ்ஸா மிச்சா²சாரோ ந ஸியா, ததா² புரிஸஸ்ஸபி ஸேவனாபயோகா³பா⁴வேதி, தஸ்மா அத்தனோ ருசியா பவத்திதஸ்ஸ வஸேன தயோ, ப³லக்காரேன பவத்திதஸ்ஸ வஸேன தயோதி ஸப்³பே³பி அக்³க³ஹிதக்³க³ஹணேன சத்தாரோ ஸம்பா⁴ராதி வுத்தந்தி வேதி³தப்³ப³ம்.

அத்த²ப⁴ஞ்ஜகோதி கம்மபத²வஸேன வுத்தம். கம்மபத²கதா² ஹேஸாதி. அஸ்ஸாதி விஸம்வாத³கஸ்ஸ. முஸா வத³தி ஏதேனாதி சேதனா முஸாவாதோ³, இமஸ்மிம் பக்கே² அததா²காரேன வத்து²னோ விஞ்ஞாபனபயோகோ³ முஸா, தம்ஸமுட்டா²பிகா சேதனாமுஸாவாதோ³தி வுத்தத்தா ததோ அஞ்ஞதா² வத்தும் ‘‘அபரோ நயோ’’திஆதி³ வுத்தம். அத்தனோ ஸந்தகம் அதா³துகாமதாயாதிஆதி³ முஸாவாத³ஸாமஞ்ஞேன வுத்தம். ஹஸாதி⁴ப்பாயேனபி விஸம்வாத³னபுரக்கா²ரஸ்ஸ முஸாவாதோ³. பரஸ்ஸாதி விஸம்வாத³னவஸேன விஞ்ஞாபேதப்³ப³ஸ்ஸ. ஸோதி முஸாவாத³பயோகோ³.

ஸுஞ்ஞபா⁴வந்தி பீதிவிரஹிததாய ரித்தபா⁴வம். ப²ருஸஸத்³த³தாய நேவ கண்ணஸுகா². அத்த²விபன்னதாய ந ஹத³யஸுகா². ஸம்கிலிட்ட²சித்தஸ்ஸாதி தோ³ஸேன, லோபே⁴ன வா தூ³ஸிதசித்தஸ்ஸ.

ஏகந்தப²ருஸா சேதனாதி ஏதேன து³ட்ட²சித்ததம்யேவ விபா⁴வேதி, து³ட்ட²சித்ததா சஸ்ஸ அமரணாதி⁴ப்பாயவஸேன த³ட்ட²ப்³பா³. ஸதி ஹி மரணாதி⁴ப்பாயே அத்த²ஸித்³தி⁴, தத³பா⁴வே பாணாதிபாதப்³யாபாதா³ ஸியுந்தி. யம் படிச்ச ப²ருஸவாசா பயுஜ்ஜதி, தஸ்ஸ ஸம்முகா²வ ஸீஸம் ஏதி. பரம்முகா²பி ஸீஸம் ஏதி ஏவாதி அபரே. தத்தா²யம் அதி⁴ப்பாயோ யுத்தோ ஸியா – ஸம்முகா² பயோகே³ அகா³ரவாதீ³னம் ப³லவபா⁴வதோ ஸியா சேதனா ப³லவதீ, பரஸ்ஸ ச தத³த்த²விஞ்ஞாபனம், ந ததா² அஸம்முகா²தி. யதா² ச அக்கோஸிதே மதே ஆளஹனே கதா க²மாபனா உபவாத³ந்தராயம் நிவத்தேதி, ஏவம் பரம்முகா² பயுத்தா ப²ருஸவாசா ஹோதியேவாதி ஸக்கா விஞ்ஞாதும். தஸ்ஸாதி ஏகந்தப²ருஸசேதனாய ஏவ ப²ருஸவாசாபா⁴வஸ்ஸ ஆவிபா⁴வத்த²ம். மம்மச்சே²த³கோ ஸவனப²ருஸதாயாதி அதி⁴ப்பாயோ. சித்தஸண்ஹாதாய ப²ருஸவாசா ந ஹோதி கம்மபதா²’ப்பத்தத்தா, கம்மபா⁴வம் பன ந ஸக்கா வாரேதும். ஏவம் அன்வயவஸேன சேதனாப²ருஸதாய ப²ருஸவாசம் ஸாதே⁴த்வா இதா³னி தமேவ ப்³யதிரேகவஸேன ஸாதே⁴தும் ‘‘வசனஸண்ஹதாயா’’திஆதி³ வுத்தம். ஏஸாதி ப²ருஸவாசா. கம்மபத²பா⁴வம் அப்பத்தா அப்பஸாவஜ்ஜா, இதரா மஹாஸாவஜ்ஜா. ததா² கிலேஸானம் முது³திப்³ப³தாபே⁴தே³ஹி ஸப்³ப³ம் புரிமஸதி³ஸம்.

ஆஸேவனம் ப³ஹுலீகரணம். யம் உத்³தி³ஸ்ஸ பவத்திதோ, தேன அக்³க³ஹிதே அப்பஸாவஜ்ஜோ, க³ஹிதே மஹாஸாவஜ்ஜோ கம்மபத²ப்பத்திதோ. யோ கோசி பன ஸம்ப²ப்பலாபோ த்³வீஹி ஸம்பா⁴ரேஹி ஸிஜ்ஜ²தி. கிலேஸானம் முது³திப்³ப³தாவஸேனபி அப்பஸாவஜ்ஜமஹாஸாவஜ்ஜதா வேதி³தப்³பா³.

அத்தனோ பரிணாமனம் சித்தேனேவாதி வேதி³தப்³ப³ம். ஹிதஸுக²ம் ப்³யாபாத³யதீதி யோ தம் உப்பாதே³தி, தஸ்ஸ ஹிதஸுக²ம் வினாஸேதி. அஹோ வதாதி இமினா அச்சந்தவினாஸசிந்தனம் தீ³பேதி. ஏவம் ஹிஸ்ஸ தா³ருணபவத்தியா கம்மபத²ப்பத்தி. யதா²பு⁴ச்சக³ஹணாபா⁴வேனாதி யாதா²வக்³கா³ஹஸ்ஸ அபா⁴வேன அனிச்சாதி³ஸபா⁴வஸ்ஸ நிச்சாதி³தோ க³ஹணேன. மிச்சா² பஸ்ஸதீதி விதத²ம் பஸ்ஸதி. ஸம்ப²ப்பலாபோ வியாதி இமினா ஆஸேவனஸ்ஸ மந்த³தாய அப்பஸாவஜ்ஜதம், மஹந்ததாய மஹாஸாவஜ்ஜதம் த³ஸ்ஸேதி. க³ஹிதாகாரவிபரீததாதி மிச்சா²தி³ட்டி²யா க³ஹிதாகாரஸ்ஸ விபரீதபா⁴வோ. வத்து²னோதி தஸ்ஸா அயதா²பூ⁴தஸபா⁴வமாஹ. ததா²பா⁴வேனாதி க³ஹிதாகாரேனேவ தஸ்ஸ தி³ட்டி²க³திகஸ்ஸ, தஸ்ஸ வா வத்து²னோ உபட்டா²னம் ஏவமேதம், ந இதோ அஞ்ஞதா²தி.

த⁴ம்மதோதி ஸபா⁴வதோ. கோட்டா²ஸதோதி ப²ஸ்ஸபஞ்சமகாதீ³ஸு சித்தங்க³கோட்டா²ஸேஸு யம் கோட்டா²ஸா ஹோந்தி, ததோதி அத்தோ². சேதனாத⁴ம்மாதி சேதனாஸபா⁴வா.

படிபாடியா ஸத்தாதி ஏத்த² நனு சேதனா அபி⁴த⁴ம்மே கம்மபதே²ஸு ந வுத்தாதி படிபாடியா ஸத்தன்னம் கம்மபத²பா⁴வோ ந யுத்தோதி? ந, அவசனஸ்ஸ அஞ்ஞஹேதுகத்தா. ந ஹி தத்த² சேதனாய அகம்மபத²த்தா கம்மபத²ராஸிம்ஹி அவசனம், கதா³சி பன கம்மபதோ² ஹோதி, ந ஸப்³ப³தா³தி கம்மபத²பா⁴வஸ்ஸ அனியதத்தா அவசனம். யதா³ பன கம்மபதோ² ஹோதி, ததா³ கம்மபத²ராஸிஸங்க³ஹோ ந நிவாரிதோ. ஏத்தா²ஹ – யதி³ சேதனாய ஸப்³ப³தா³ கம்மபத²பா⁴வாபா⁴வதோ அனியதோ கம்மபத²பா⁴வோதி கம்மபத²ராஸிம்ஹி அவசனம், நனு அபி⁴ஜ்ஜா²தீ³னம் கம்மபத²பா⁴வம் அப்பத்தானம் அத்தி²தாய அனியதோ கம்மபத²பா⁴வோதி தேஸம்பி கம்மபத²ராஸிம்ஹி அவசனம் ஆபஜ்ஜதீதி? நாபஜ்ஜதி கம்மபத²தாதம்ஸபா⁴க³தாஹி தேஸம் தத்த² வுத்தத்தா. யதி³ ஏவம் சேதனாபி தத்த² வத்தப்³பா³ ஸியா? ஸச்சமேதம், ஸா பன பாணாதிபாதாதி³காதி பாகடோ, தஸ்ஸா கம்மபத²பா⁴வோதி ந வுத்தா ஸியா. சேதனாய ஹி – ‘‘சேதனாஹம், பி⁴க்க²வே, கம்மம் வதா³மி (அ. நி. 6.63; கதா². 539), திவிதா⁴, பி⁴க்க²வே, காயஸஞ்சேதனா அகுஸலம் காயகம்ம’’ந்திஆதி³வசனதோ (கதா². 539) கம்மபா⁴வோ பாகடோ, கம்மம்யேவ ச ஸுக³திது³க்³க³தீனம் தத்த² உப்பஜ்ஜனகஸுக²து³க்கா²னஞ்ச பத²பா⁴வேன பவத்தம் கம்மபதோ²தி வுச்சதீதி பாகடோ தஸ்ஸா கம்மபத²பா⁴வோ, அபி⁴ஜ்ஜா²தீ³னம் பன சேதனாஸமீஹனபா⁴வேன ஸுசரிதது³ச்சரிதபா⁴வோ சேதனாஜனிதபிட்டி²வட்டகபா⁴வேன ஸுக³திது³க்³க³திதது³ப்பஜ்ஜனகஸுக²து³க்கா²னம் பத²பா⁴வோ சாதி ந ததா² பாகடோ கம்மபத²பா⁴வோதி தேயேவ தேன ஸபா⁴வேன த³ஸ்ஸேதும் அபி⁴த⁴ம்மே சேதனா கம்மபத²ராஸிபா⁴வேன ந வுத்தா, அததா²ஜாதியகத்தா வா சேதனா தேஹி ஸத்³தி⁴ம் ந வுத்தாதி த³ட்ட²ப்³ப³ம். மூலம் பத்வாதி மூலதே³ஸனம் பத்வா, மூலஸபா⁴வேஸு த⁴ம்மேஸு வுச்சமானேஸூதி அத்தோ².

அதி³ன்னாதா³னம் ஸத்தாரம்மணந்தி இத³ம் ‘‘பஞ்ச ஸிக்கா²பதா³ பரித்தாரம்மணா ஏவ வா’’தி இமாய பஞ்ஹபுச்ச²கபாளியா விருஜ்ஜ²தி. யஞ்ஹி பாணாதிபாதாதி³து³ஸ்ஸீல்யஸ்ஸ ஆரம்மணம், ததே³வ தம் வேரமணியா ஆரம்மணம். வீதிக்கமிதப்³ப³வத்து²தோ ஏவ ஹி விரதீதி. ஸத்தாரம்மணந்தி வா ஸத்தஸங்கா²தம் ஸங்கா²ராரம்மணமேவ உபாதா³ய வுத்தந்தி நாயம் விரோதோ⁴. ததா² ஹி வுத்தம் ஸம்மோஹவினோத³னியம் (விப⁴. அட்ட². 714) ‘‘யானி ஸிக்கா²பதா³னி ஏத்த² ஸத்தாரம்மணானீதி வுத்தானி, தானி யஸ்மா ஸத்தோதி ஸங்க்²யம் க³தம் ஸங்கா²ரமேவ ஆரம்மணம் கரோந்தீ’’தி. விஸபா⁴க³வத்து²னோ ‘‘இத்தீ², புரிஸோ’’தி க³ஹேதப்³ப³தோ ஸத்தாரம்மணோதி ஏகே. ‘‘ஏகோ தி³ட்டோ², த்³வே ஸுதா’’திஆதி³னா ஸம்ப²ப்பலபனே தி³ட்ட²ஸுதமுதவிஞ்ஞாதவஸேன. ததா² அபி⁴ஜ்ஜா²தி ஏத்த² ததா²-ஸத்³தோ³ ‘‘தி³ட்ட²ஸுதமுதவிஞ்ஞாதவஸேனா’’தி இத³ம்பி உபஸம்ஹரதி, ந ஸத்தஸங்கா²ராரம்மணதம் ஏவ த³ஸ்ஸனாதி³வஸேன அபி⁴ஜ்ஜா²யனதோ. ‘‘நத்தி² ஸத்தா ஓபபாதிகா’’தி பவத்தமானாபி மிச்சா²தி³ட்டி² தேபூ⁴மகத⁴ம்மவிஸயாவாதி அதி⁴ப்பாயேனஸ்ஸா ஸங்கா²ராரம்மணதா வுத்தா. கத²ம் பன மிச்சா²தி³ட்டி²யா ஸப்³பே³ தேபூ⁴மகத⁴ம்மா ஆரம்மணம் ஹோந்தீதி? ஸாதா⁴ரணதோ. ‘‘நத்தி² ஸுகதது³க்கடானம் கம்மானம் ப²லம் விபாகோ’’தி ஹி பவத்தமானாய அத்த²தோ ரூபாருபாவசரத⁴ம்மாபி க³ஹிதா ஏவ ஹோந்தீதி.

ஸுக²ப³ஹுலதாய ராஜானோ ஹஸமானாபி ‘‘சோரம் கா⁴தேதா²’’தி வத³ந்தி, ஹாஸோ பன தேஸம் அஞ்ஞவிஸயோதி ஆஹ ‘‘ஸன்னிட்டா²பக…பே… ஹோதீ’’தி.

கேஸஞ்சீதி ஸஹஜாதானம் அதி³ன்னாதா³னாதீ³னம். ஸம்பயுத்தபபா⁴வகட்டே²னாதி ஸம்பயுத்தோ ஹுத்வா உப்பாத³கட்டே²ன. கேஸஞ்சீதி அஸஹஜாதானம். உபனிஸ்ஸயபச்சயட்டே²னாதி ஏதேன மூலட்டே²ன லோப⁴ஸ்ஸ உபகாரதம் நிவத்தேதி. ஸுப்பதிட்டி²தபா⁴வஸாத⁴னட்டோ² ஹி மூலட்டோ², ஸோ ச ஹேதுபச்சயதாஅவினாபா⁴வீ, தேன சேத்த² மூலமிவ மூலந்தி க³ஹேதப்³ப³ம், நிப்பரியாயதோ பன புப்³பே³ ‘‘கேஸஞ்சீ’’தி வுத்தானம் ஸஹஜாதானம் மூலபா⁴வோ வேதி³தப்³போ³. ரத்தோ கோ²திஆதி³னா ஸுத்தபதே³னபி பாணாதிபாதாதீ³னம் அகுஸலானம் லோப⁴ஸ்ஸ மூலகாரணதம் விபா⁴வேதி, ந மூலட்டே²னுபகாரத்த²ம் அவிஸேஸதோ தேஸம் ஹேதுபச்சயத்தாபா⁴வதோ.

அகுஸலகம்மபத²வண்ணனா நிட்டி²தா.

குஸலகம்மபத²வண்ணனா

வேரந்தி பாணாதிபாதாதி³பாபத⁴ம்மம். ஸோ ஹி வேரஹேதுதாய ‘‘வேர’’ந்தி வுச்சதி, தம் மணதி ‘‘மயி இத⁴ டி²தாய கத²மாக³ச்ச²ஸீ’’தி தஜ்ஜேந்தீ விய நிவாரேதீதி வேரமணீ. தேனாஹ ‘‘பஜஹதீ’’தி. ‘‘விரமணீ’’தி வத்தப்³பே³ நிருத்தினயேன ஏவ-காரம் கத்வா ஏவம் வுத்தம். விப⁴ங்கே³ (விப⁴. 703, 704) ஏவ நித்³தி³ஸனவஸேன ஏவம் வுத்தா. அஸமாதி³ன்னஸீலஸ்ஸ ஸம்பத்ததோ யதா²உபட்டி²தவீதிக்கமிதப்³ப³வத்து²தோ விரதி ஸம்பத்தவிரதி, ஸமாதா³னவஸேன உப்பன்னா விரதி ஸமாதா³னவிரதி, ஸமாதா³னவஸேன உப்பன்னா விரதி ஸமாதா³னவிரதி, கிலேஸானம் ஸமுச்சி²ந்த³னவஸேன பவத்தாவிரதி ஸமுச்சே²த³விரதி.

ஜீவமானஸஸஸ்ஸ மம்ஸருதி⁴ரஸம்மிஸ்ஸதாய அல்லஸஸமம்ஸம். முஞ்சி ஸப்³ப³த்த² ஸமகருணதாய. ஸச்சம் வத்வா ‘‘ஏதேன ஸச்சவஜ்ஜேன மய்ஹம் மாது ரோகோ³ ஸம்மதூ’’தி அதி⁴ட்டா²ஸி.

மஹாஸப்போதி அஜக³ரோ. முஞ்சித்வா அக³மாஸி ஸீலதேஜேன.

கோஸல்லம் வுச்சதி ஞாணம், கோஸல்லேன, கோஸல்லதோ வா பவத்தியா உபக³மனதோ. குச்சி²தஸயனதோதி குச்சி²தேனாகாரேன ஸயனதோ அனுஸயனதோ, பவத்தனதோ வா. ‘‘வேரமணிகுஸலா’’தி வத்தப்³பா³பி புச்சா²னுரூபம் விஸ்ஸஜ்ஜனந்தி ‘‘குஸலா’’தி ந வுத்தா, ‘‘குஸல’’ந்த்வேவ வுத்தா.

காமஞ்சேத்த² பாளியம் விரதியோவ ஆக³தா, ஸிக்கா²பத³விப⁴ங்கே³ (விப⁴. 704) பன சேதனாபி ஆஹரித்வா தீ³பிதாதி தது³ப⁴யம்பி க³ண்ஹந்தோ ‘‘சேதனாபி வட்டந்தி விரதியோபீ’’தி ஆஹ.

அனபி⁴ஜ்ஜா² ஹி மூலம் பத்வா கம்மபத²கோட்டா²ஸம் பத்வா அனபி⁴ஜ்ஜா²தி வுத்தத⁴ம்மோ மூலதோ அலோபோ⁴ குஸலமூலம் ஹோதீதி ஏவமத்தோ² த³ட்ட²ப்³போ³. ஸேஸபத³த்³வயேபி ஏஸேவ நயோ.

து³ஸ்ஸீல்யாரம்மணா ததா³ரம்மணா ஜீவிதிந்த்³ரியாதி³ஆரம்மணா கத²ம் து³ஸ்ஸீல்யானி பஜஹந்தீதி தம் த³ஸ்ஸேதும் ‘‘யதா² பனா’’திஆதி³ வுத்தம்.

அனபி⁴ஜ்ஜா² …பே… விரமந்தஸ்ஸாதி அபி⁴ஜ்ஜ²ம் பஜஹந்தஸ்ஸாதி அத்தோ². ந ஹி மனோது³ச்சரிததோ விரதி அத்தி² அனபி⁴ஜ்ஜா²தீ³ஹேவ தப்பஹானஸித்³தி⁴தோ. தேஸு அலோபோ⁴திஆதீ³ஸு யம் வத்தப்³ப³ம், தம் அகுஸலமூலேஸு வுத்தனயேனேவ வேதி³தப்³ப³ம்.

அப்பனாவாரந்தி நிக³மனவாரம். ஏகேன நயேனாதி வேத³னாதி³வஸேன அரூபமுகே²னேவ அனேகவிதே⁴ஸு விபஸ்ஸனாகம்மட்டா²னேஸு ஏகேன கம்மட்டா²னனயேன. ‘‘ட²பேத்வா அபி⁴ஜ்ஜ²ம் நவ அகுஸலகம்மபதா²’’தி வத்தப்³ப³ம். த³ஸாதி வா இத³ம் ‘‘குஸலகம்மபதா²’’தி இமினா ஸம்ப³ந்தி⁴தப்³ப³ம் ‘‘அகுஸலகம்மபதா² ச த³ஸ குஸலகம்மபதா² சா’’தி. ‘‘ட²பேத்வா அபி⁴ஜ்ஜ²’’ந்தி ஹி இமினாவ அகுஸலகம்மபதா²னம் நவபா⁴வோ வுத்தோ ஹோதி. அத² வா த³ஸாதி இத³ம் உப⁴யதா²பி ஸம்ப³ந்தி⁴தப்³ப³ம். அபி⁴ஜ்ஜா² ஹி பஹாதப்³பா³பி ஸதி பரிஞ்ஞேய்யதம் நாதிவத்ததீதி. ததா² ஹி வுத்தம் ‘‘ரூபதண்ஹா பியரூபம் ஸாதரூப’’ந்திஆதி³, தஸ்மா ஸா தாய பரிஞ்ஞேய்யதாய து³க்க²ஸச்சேபி ஸங்க³ஹம் லப⁴தேவ, பஹாதப்³ப³ம் பன உபாதா³ய ‘‘ட²பேத்வா அபி⁴ஜ்ஜ²’’ந்தி வுத்தம். தேனேவாஹ ‘‘பரியாயேன பன ஸப்³பே³பி கம்மபதா² து³க்க²ஸச்ச’’ந்தி. அபி⁴ஜ்ஜா²லோபா⁴னம் பவத்திஆகாரஸித்³த⁴பே⁴த³ம் உபாதா³ய ‘‘இமே த்³வே த⁴ம்மா’’தி வுத்தம். ஸுத்தந்தனயேன தண்ஹா ‘‘ஸமுத³யஸச்ச’’ந்தி வுத்தாதி ஆஹ ‘‘நிப்பரியாயேன ஸமுத³யஸச்ச’’ந்தி. அப்பவத்தீதி அப்பவத்தினிமித்தமாஹ யதா² ‘‘ராக³க்க²யோ தோ³ஸக்க²யோ’’தி (ஸம். நி. 4.314). ஸப்பச்சயதாய ஸங்க²தஸபா⁴வே து³க்க²ஸச்சே க³ஹிதே அப்பச்சயதாய அஸங்க²தம் நிரோத⁴ஸச்சம் படிபக்க²தோ ஆவத்ததி, ஏகந்தஸாவஜ்ஜே ஆசயகா³மிலக்க²ணே ஸமுத³யஸச்சே க³ஹிதே ஸாவஜ்ஜா விக³மனம் அபசயகா³மிலக்க²ணம் மக்³க³ஸச்சம்படிபக்க²தோ ஆவத்ததீதி த்³வே ஆவத்தஹாரவஸேன வேதி³தப்³பா³னீதி வுத்தம். தேனேவாஹ நேத்தியம் (நேத்தி. 4.நித்³தே³ஸவார) –

‘‘ஏகம்ஹி பத³ட்டா²னே, பரியேஸதி ஸேஸகம் பத³ட்டா²னம்;

ஆவத்ததி படிபக்கே², ஆவத்தோ நாம ஸோ ஹாரோ’’தி.

ஸப்³பா³காரேனாதி காமராக³ரூபராகா³தி³ஸப்³ப³ப்பகாரேஹி, ஸப்³ப³தோ வா அபாயக³மனீயாதி³ஆகாரதோ, தத்த² கிஞ்சிபி அனவஸேஸேத்வா வா. ஸப்³பா³காரேனேவாதி ஸப்³பா³காரதோ. நீஹரித்வாதி அபனேத்வா, ஸமுச்சி²ந்தி³த்வாஇச்சேவ அத்தோ². கஞ்சி த⁴ம்மம் அனவகாரீகரித்வாதி ரூபவேத³னாதீ³ஸு கஞ்சி ஏகத⁴ம்மம்பி அவினிப்³போ⁴க³ம் கத்வா, ஏகேகதோ அக்³க³ஹேத்வா ஸமூஹதோவ க³ஹேத்வாதி அத்தோ². அஸ்மீதி அஹமஸ்மீதி மானக்³கா³ஹவஸேன. ஸோ பன யஸ்மா பஞ்சக்க²ந்தே⁴ நிரவஸேஸதோ க³ண்ஹாதி, தஸ்மா வுத்தம் ‘‘ஸமூஹக்³க³ஹணாகாரேனா’’தி. யஸ்மா சேத்த² அக்³க³மக்³க³சித்தம் வுச்சதி, தஸ்மா ஆஹ ‘‘தி³ட்டி²ஸதி³ஸம் மானானுஸய’’ந்தி. ‘‘யம் ரூபம் தம் அஹ’’ந்திஆதி³னா யதா² தி³ட்டி² ரூபாதி³ம் ‘‘அஹமஸ்மீ’’தி க³ண்ஹந்தீ பவத்ததி, ஏவம் மானோபி ‘‘ஸேய்யோஹமஸ்மீ’’திஆதி³னாதி ஆஹ ‘‘மானானுஸயோ அஸ்மீதி பவத்தத்தா தி³ட்டி²ஸதி³ஸோ’’தி. பரிச்சே²த³கரோதி ஓஸானபரிச்சே²த³கரோ இதோ பரம் து³க்க²ஸ்ஸாபா⁴வகரணதோ. கம்மபத²தே³ஸனாயாதி கம்மபத²முகே²ன பவத்தசதுஸச்சதே³ஸனாய. மனஸிகாரப்படிவேத⁴வஸேனாதி விபஸ்ஸனாமனஸிகாரமக்³க³ப்படிவேத⁴வஸேன.

குஸலகம்மபத²வாரவண்ணனா நிட்டி²தா.

ஆஹாரவாரவண்ணனா

90. ஆஹரதீதி (ஸம். நி. டீ. 2.2.11) ஆனேதி, உப்பாதே³தி உபத்த²ம்பே⁴தி சாதி அத்தோ². நிப்³ப³த்தாதி பஸுதா. ததோ பட்டா²ய ஹி லோகே ஜாதவோஹாரோ. படிஸந்தி⁴க்³க³ஹணதோ பன பட்டா²ய யாவ மாதுகுச்சி²தோ நிக்க²மனம், தாவ ஸம்ப⁴வேஸினோ. ஏஸ தாவ க³ப்³ப⁴ஸேய்யகேஸு பூ⁴தஸம்ப⁴வேஸிவிபா⁴கோ³, இதரேஸு பன பட²மசித்தாதி³வஸேன வுத்தோ. ஸம்ப⁴வ-ஸத்³தோ³ சேத்த² க³ப்³ப⁴ஸேய்யகானம் வஸேன பஸூதிபரியாயோ, இதரேஸம் வஸேன உப்பத்திபரியாயோ. பட²மசித்தபட²மஇரியாபத²க்க²ணேஸு ஹி தே ஸம்ப⁴வம் உப்பத்திம் ஏஸந்தி உபக³ச்ச²ந்தி நாம, ந தாவ பூ⁴தா உப்பத்தியா ந ஸுப்பதிட்டி²தத்தா. பூ⁴தாயேவ ஸப்³ப³ஸோ ப⁴வேஸனாய ஸமுச்சி²ன்னத்தா. ந புன ப⁴விஸ்ஸந்தீதி அவதா⁴ரணேன நிவத்திதமத்த²ம் த³ஸ்ஸேதி, ‘‘யோ ச காலக⁴ஸோ பூ⁴தோ’’திஆதீ³ஸு (ஜா. 1.2.190) பூ⁴த-ஸத்³த³ஸ்ஸ கீ²ணாஸவவாசிதா த³ட்ட²ப்³பா³. வா-ஸத்³தோ³ சேத்த² ஸம்பிண்ட³னத்தோ² ‘‘அக்³கி³னா வா உத³கேன வா’’திஆதீ³ஸு (உதா³. 76) விய.

யதா²ஸகம் பச்சயபா⁴வேன அத்தபா⁴வஸ்ஸ பட்ட²பனமேவேத்த²ஆஹாரேஹி காதப்³ப³அனுக்³க³ஹோதி அதி⁴ப்பாயேனாஹ ‘‘வசனபே⁴தோ³…பே… ஏகோயேவா’’தி. ஸத்தஸ்ஸ உப்பன்னத⁴ம்மானந்தி ஸத்தஸ்ஸஸந்தானே உப்பன்னத⁴ம்மானம். யதா² ‘‘வஸ்ஸஸதம் திட்ட²தீ’’தி வுத்தே அனுப்பப³ந்த⁴வஸேன பவத்ததீதி வுத்தம் ஹோதி, ஏவம் டி²தியாதி அனுப்பப³ந்த⁴வஸேன பவத்தியாதி அத்தோ², ஸா பன அவிச்சே²தோ³தி ஆஹ ‘‘அவிச்சே²தா³யா’’தி. அனுப்பப³ந்த⁴த⁴ம்முப்பத்தியா ஸத்தஸந்தானோ அனுக்³க³ஹிதோ நாம ஹோதீதி ஆஹ ‘‘அனுப்பன்னானம் உப்பாதா³யா’’தி. ஏதானீதி டி²திஅனுக்³க³ஹபதா³னி. உப⁴யத்த² த³ட்ட²ப்³பா³னி, ந யதா²ஸங்க்²யம்.

வத்து²க³தா ஓஜா வத்து² விய தேன ஸத்³தி⁴ம் ஆஹரிதப்³ப³தம் க³ச்ச²தீதி வுத்தம் ‘‘அஜ்ஜோ²ஹரிதப்³ப³தோ ஆஹாரோ’’தி. நிப்³ப³த்திதஓஜம் பன ஸந்தா⁴ய ‘‘கப³ளீகாராஹாரோ ஓஜட்ட²மகரூபானி ஆஹரதீ’’தி வக்க²தி. ஓளாரிகதா அப்போஜதாய, ந வத்து²னோ தூ²லதாய, கதி²னதாய வா, தஸ்மா யஸ்மிம் வத்து²ஸ்மிம் பரித்தா ஓஜா ஹோதி, தம் ஓளாரிகம். ஸப்பாத³யோ து³க்கு²ப்பாத³கதாய ஓளாரிகாவேதி³தப்³பா³. விஸாணாதீ³னம் திவஸ்ஸச²ட்³டி³தானம் பூதிபூ⁴த்ததா முது³கதாதி வத³ந்தி, தரச்ச²கே²ளதேமிகதாய பன ததா²பூ⁴தானம் தேஸம் முது³கதா. த⁴ம்மஸபா⁴வோ ஹேஸ. ஸஸானம் ஆஹாரோ ஸுகு²மோ தருணதிணஸஸ்ஸகா²த³னதோ. ஸகுணானம் ஆஹாரோ ஸுகு²மோ திணபீ³ஜாதி³கா²த³னதோ. பச்சந்தவாஸீனம் ஸுகு²மோ, தேஸஞ்ஹி ஸாகபண்ணஸுக்க²குரபது³மபத்தம்பி ஆஹாரோதி. தேஸம் பரனிம்மிதவஸவத்தீனம். ஸுகு²மோத்வேவாதி ந கிஞ்சி உபாதா³ய, அத² கோ² ஸுகு²மோ இச்சேவ நிட்ட²ம் பத்தோ ததோ பரம் ஸுகு²மஸ்ஸ அபா⁴வதோ.

வத்து²வஸேன பனேத்த² ஆஹாரஸ்ஸ ஓளாரிகஸுகு²மதா வுத்தா, ஸா சஸ்ஸ அப்போஜமஹோஜதாஹி வேதி³தப்³பா³தி த³ஸ்ஸேதும் ‘‘ஏத்த² சா’’திஆதி³ வுத்தம். பரிஸ்ஸமந்தி கு²தா³வஸேன உப்பன்னம் ஸரீரகே²த³ம். வினோதே³தீதி வத்து² தஸ்ஸ வினோத³னமத்தம் கரோதி. ந பன ஸக்கோதி பாலேதுந்தி ஸரீரம் யாபேதும் நப்பஹோதி நிஸ்ஸாரத்தா. ந ஸக்கோதி பரிஸ்ஸமம் வினோதே³தும் ஆமாஸயஸ்ஸ அபூரணதோ.

ச²ப்³பி³தோ⁴பீதி இமினா கஸ்ஸசிபி ப²ஸ்ஸஸ்ஸ அனவஸேஸிதப்³ப³தமாஹ. ஆஹாரஸ்ஸதே³ஸனாக்கமேனேவேத்த² ப²ஸ்ஸாதீ³னம் து³தியாதி³தா, ந அஞ்ஞேன காரணேனாதி ஆஹ ‘‘தே³ஸனானயோ ஏவா’’திஆதி³. மனஸோ ஸஞ்சேதனா, ந ஸத்தஸ்ஸாதி த³ஸ்ஸனத்த²ம் மனோக³ஹணம் யதா² ‘‘சித்தஸ்ஸ டி²தி (த⁴. ஸ. 11), சேதோவிமுத்தி சா’’தி (ம. நி. 1.69) ஆஹ ‘‘மனோஸஞ்சேதனாதி சேதனா ஏவா’’தி. சித்தந்தி யம் கிஞ்சி சித்தம், ந விபாகவிஞ்ஞாணமேவ.

புப்³பே³ ‘‘ஆஹாரந்தி பச்சய’’ந்தி வுத்தத்தா ‘‘யதி³ பச்சயட்டோ² ஆஹாரட்டோ²’’திஆதி³னா சோதே³தி. அத² கஸ்மா இமேயேவ சத்தாரோ வுத்தாதி அத² கஸ்மா சத்தாரோவ வுத்தா, இமே ஏவ ச வுத்தாதி யோஜனா. விஸேஸபச்சயத்தாதி ஏதேன யதா² அஞ்ஞே பச்சயத⁴ம்மா அத்தனோ பச்சயுப்பன்னஸ்ஸ பச்சயாவ ஹோந்தி, இமே பன ததா² ச ஹோந்தி அஞ்ஞதா² சாதி ஸமானேபி பச்சயத்தே அதிரேகபச்சயா ஹோந்தி, தஸ்மா ஆஹாராதி வுத்தாதி இமமத்த²ம் த³ஸ்ஸேதி. இதா³னி தம் அதிரேகபச்சயதம் த³ஸ்ஸேதும் ‘‘விஸேஸபச்சயோ ஹீ’’திஆதி³ ஆரத்³த⁴ம். விஸேஸபச்சயோ ரூபகாயஸ்ஸ கப³ளீகாரோ ஆஹாரோ உபத்த²ம்ப⁴கபா⁴வதோ. தேனாஹ அட்ட²கதா²யம் (விஸுத்³தி⁴. 2.708; பட்டா². அட்ட². பச்சயுத்³தே³ஸவண்ணனா) ‘‘ரூபாரூபானம் உபத்த²ம்ப⁴கத்தேன உபகாரகா சத்தாரோ ஆஹாரா ஆஹாரபச்சயோ’’தி. உபத்த²ம்ப⁴கத்தஞ்ஹி ஸதிபி ஜனகத்தே அரூபீனம் ஆஹாரானம் ஆஹாரஜரூபஸமுட்டா²பகரூபாஹாரஸ்ஸ ச ஹோதி, அஸதி பன உபத்த²ம்ப⁴கத்தே ஆஹாரானம் ஜனகத்தம் நத்தீ²தி உபத்த²ம்ப⁴கத்தம் பதா⁴னம். ஜனயமானோபி ஹி ஆஹாரோ அவிச்சே²த³வஸேன உபத்த²ம்ப⁴யமானோ ஏவ ஜனேதீதி உபத்தம்ப⁴கபா⁴வோ ஏவ ஆஹாரபா⁴வோ. வேத³னாய ப²ஸ்ஸோ விஸேஸபச்சயோ. ‘‘ப²ஸ்ஸபச்சயா வேத³னா’’தி ஹி வுத்தம். ‘‘ஸங்கா²ரபச்சயா விஞ்ஞாண’’ந்தி (உதா³. 1; ம. நி. 3.126) வசனதோ விஞ்ஞாணஸ்ஸமனோஸஞ்சேதனா. ‘‘சேதனா திவித⁴ம் ப⁴வம் ஜனேதீ’’தி ஹி வுத்தம். ‘‘விஞ்ஞாணபச்சயா நாமரூப’’ந்தி பன வசனதோ நாமரூபஸ்ஸ விஞ்ஞாணம் விஸேஸபச்சயா. ந ஹி ஓக்கந்திவிஞ்ஞாணாபா⁴வே நாமரூபஸ்ஸ அத்தஸம்ப⁴வோ. யதா²ஹ ‘‘விஞ்ஞாணஞ்ச ஹி, ஆனந்த³, மாதுகுச்சி²ஸ்மிம் ந ஓக்கமிஸ்ஸத², அபி நு கோ² நாமரூபம் மாதுகுச்சி²ஸ்மிம் ஸமுச்சிஸ்ஸதா²’’திஆதி³ (தீ³. நி. 2.115). வுத்தமேவத்த²ம் ஸுத்தேன ஸாதே⁴தும் ‘‘யதா²ஹா’’திஆதி³ வுத்தம்.

ஏவம் யதி³பி பச்சயட்டோ² ஆஹாரட்டோ², விஸேஸபச்சயதாய பன இமே ஏவ ஆஹாராதி வுத்தாதி தம் நேஸம் விஸேஸபச்சயதம் அவிபா⁴க³தோ த³ஸ்ஸேத்வா இதா³னி விபா⁴க³தோ த³ஸ்ஸேதும் ‘‘கோ பனேத்தா²’’திஆதி³ ஆரத்³த⁴ம். முகே² ட²பிதமத்தோயேவ அஸங்கா²தி³தோ, தத்தகேனபி அப்³ப⁴ந்தரஸ்ஸ ஆஹாரஸ்ஸ பச்சயோ ஹோதி ஏவ. தேனாஹ ‘‘அட்ட² ரூபானி ஸமுட்டா²பேதீ’’தி. ஸுக²வேத³னாய ஹிதோ ஸுக²வேத³னியோ. ஸப்³ப³தா²பீதி சக்கு²ஸம்ப²ஸ்ஸாதி³வஸேன. யத்தகா ப²ஸ்ஸஸ்ஸ பகாரபே⁴தா³, தேஸம் வஸேன ஸப்³ப³ப்பகாரோபி ப²ஸ்ஸாஹாரோ. யதா²ரஹம் திஸ்ஸோ வேத³னா ஆஹரதி, அனாஹாரகோ நத்தி².

ஸப்³ப³தா²பீதி இதா⁴பி ப²ஸ்ஸாஹாரே வுத்தனயானுஸாரேன அத்தோ² வேதி³தப்³போ³. திஸந்ததிவஸேனாதி காயத³ஸகம் பா⁴வத³ஸகம் வத்து²த³ஸகந்தி திவித⁴ஸந்ததிவஸேன. ஸஹஜாதாதி³பச்சயனயேனாதி ஸஹஜாதாதி³பச்சயவிதி⁴னா. படிஸந்தி⁴விஞ்ஞாணஞ்ஹி அத்தனா ஸஹஜாதனாமஸ்ஸ ஸஹஜாதஅஞ்ஞமஞ்ஞனிஸ்ஸயவிபாகிந்த்³ரியஸம்பயுத்தஅத்தி²அவிக³தபச்சயேஹி பச்சயோ ஹோந்தோயேவ ஆஹாரபச்சயதாய தம் ஆஹாரேதீ வுத்தம், ஸஹஜாதரூபேஸு பன வத்து²னோ ஸம்பயுத்தபச்சயம் ட²பேத்வா விப்பயுத்தபச்சயேன, ஸேஸரூபஸ்ஸ அஞ்ஞமஞ்ஞபச்சயஞ்ச ட²பேத்வா வுத்தனயேனேவயோஜனா காதப்³பா³. தானீதி நபும்ஸகனித்³தே³ஸோ அனபும்ஸகானம்பி நபும்ஸகேஹி ஸஹ வசனதோ.

ஸாஸவா குஸலாகுஸலசேதனாவ வுத்தா. விஸேஸபச்சயபா⁴வத³ஸ்ஸனம் ஹேதந்தி. தேனாஹ ‘‘அவிஸேஸேன பனா’’திஆதி³. படிஸந்தி⁴விஞ்ஞாணமேவ வுத்தந்தி ஏத்தா²பி ஏஸேவ நயோ. யதா² தஸ்ஸ தஸ்ஸ ப²லஸ்ஸ விஸேஸதோ பச்சயதாய ஏதேஸம் ஆஹாரட்டோ², ஏவம் அவிஸேஸதோபீதி த³ஸ்ஸந்தேன ‘‘அவிஸேஸேன பனா’’திஆதி³ வுத்தம். தத்த² தம்ஸம்பயுத்ததம்ஸமுட்டா²னத⁴ம்மானந்தி தேஹி ப²ஸ்ஸாதீ³ஹி ஸம்பயுத்தத⁴ம்மானஞ்சேவ தம்ஸமுட்டா²னரூபத⁴ம்மானஞ்ச. தத்த² ஸம்பயுத்தக்³க³ஹணம் யதா²ரஹதோ த³ட்ட²ப்³ப³ம், ஸமுட்டா²னக்³க³ஹணம் பன அவிஸேஸதோ.

உபத்த²ம்பே⁴ந்தோ ஆஹாரகிச்சம் ஸாதே⁴தீதி உபத்த²ம்பே⁴ந்தோயேவ ரூபம் ஸமுட்டா²பேதி, ஓஜட்ட²மகரூபஸமுட்டா²பனேனேவ பனஸ்ஸ உபத்த²ம்ப⁴னகிச்சஸித்³தி⁴. பு²ஸந்தோயேவாதி பு²ஸனகிச்சம் கரோந்தோ ஏவ. ஆயூஹமானாவாதி சேதயமானா ஏவ அபி⁴ஸந்த³ஹந்தீ ஏவ. விஜானந்தமேவாதி உபபத்திபரிகப்பனவஸேன விஜானந்தமேவ ஆஹாரகிச்சம் ஸாதே⁴தீதி யோஜனா. ஸேஸபத³த்³வயேபி ஏஸேவ நயோ. ஆஹாரகிச்சஸாத⁴னஞ்ச தேஸம் வேத³னாதி³உப்பத்திஹேதுதாய அத்தபா⁴வஸ்ஸ பவத்தனமேவ.

காயட்ட²பனேனாதி கஸ்மா வுத்தம்? நனு கம்மஜாதி³ரூபம் கம்மாதி³னாவ பவத்ததீதி சோத³னம் ஸந்தா⁴யாஹ ‘‘கம்மஜனிதோபீ’’திஆதி³. உபாதி³ன்னரூபஸந்ததியா உபத்த²ம்ப⁴னேனேவ உதுசித்தஜரூபஸந்ததீனம்பி உபத்த²ம்ப⁴னஸித்³தி⁴ ஹோதீதி ‘‘த்³வின்னம் ரூபஸந்ததீன’’ந்தி வுத்தம். உபத்த²ம்ப⁴னமேவ ஸந்தா⁴ய ‘‘அனுபாலகோ ஹுத்வா’’தி ச வுத்தம். ரூபகாயஸ்ஸ டி²திஹேதுதா ஹி யாபனா அனுபாலனா.

ஸுகா²தி³வத்து²பூ⁴தந்தி ஸுகா²தீ³னம் பவத்திட்டா²னபூ⁴தம். ஆரம்மணம்பி ஹி வஸதி ஏத்த² ஆரம்மணகரணவஸேன ததா³ரம்மணா த⁴ம்மாதி வத்தூ²தி வுச்சதி. பு²ஸந்தோயேவாதி இத³ம் ப²ஸ்ஸஸ்ஸ பு²ஸனஸபா⁴வத்தா வுத்தம். ந ஹி த⁴ம்மானம் ஸபா⁴வேன வினா பவத்தி அத்தி². வேத³னாபவத்தியா வினா ஸத்தானம் ஸந்தா⁴வனதா நத்தீ²தி ஆஹ ‘‘ஸுகா²தி³…பே… ஹோதீ’’தி, ந சேத்த² ஸஞ்ஞீப⁴வகதா²யம் அஸஞ்ஞீப⁴வோ த³ஸ்ஸேதப்³போ³, தஸ்ஸாபி வா காரணபூ⁴தவேத³னாபவத்திவஸேனேவ டி²தியா ஹேதுனோ அப்³யாபிதா. ததா² ஹி ‘‘மனோஸஞ்சேதனா…பே… ப⁴வமூலனிப்பா²த³னதோ ஸத்தானம் டி²தியா ஹோதீ’’தி வுத்தா, ததோ ஏவ ‘‘விஞ்ஞாணம் விஜானந்தமேவாதி உபபத்திபரிகப்பனவஸேன விஜானந்தமேவா’’தி வுத்தோவாயமத்தோ²தி.

சத்தாரி ப⁴யானி த³ட்ட²ப்³பா³னி ஆதீ³னவவிபா⁴வனதோ. நிகந்தீதி நிகாமனா. ரஸதண்ஹம் ஸந்தா⁴ய வத³தி. ஸா ஹி கப³ளீகாரே ஆஹாரே ப³லவதீ. தேனேவ தத்த² அவதா⁴ரணம் கதம். பா⁴யதி ஏதஸ்மாதி ப⁴யம், நிகந்தியேவப⁴யம் மஹானத்த²ஹேதுதோ. உபக³மனம் விஸயிந்த்³ரியவிஞ்ஞாணேஸு விஸயவிஞ்ஞாணேஸு ஏவ ச ஸங்க³திவஸேன பவத்தி, தம் வேத³னாதி³உப்பத்திஹேதுதாய ‘‘ப⁴ய’’ந்தி வுத்தம். அவதா⁴ரணே பயோஜனம் வுத்தனயமேவ. ஸேஸத்³வயேபி ஏஸேவனயோ. ஆயூஹனம் அபி⁴ஸந்த³ஹனம், ஸம்விதா⁴னந்திபி வத³ந்தி. தம் ப⁴வூபபத்திஹேதுதாய ‘‘ப⁴ய’’ந்தி வுத்தம். அபி⁴னிபாதோ தத்த² தத்த² ப⁴வே படிஸந்தி⁴க்³க³ஹணவஸேன நிப்³ப³த்தி. ஸோ ப⁴வூபபத்திஹேதுகானம் ஸப்³பே³ஸம் அனத்தா²னம் மூலகாரணத்தா ‘‘ப⁴ய’’ந்தி வுத்தோ. இதா³னி நிகந்திஆதீ³னம் ஸப்படிப⁴யதம் வித்தா²ரதோ த³ஸ்ஸேதும் ‘‘கிம்காரணா’’திஆதி³ ஆரத்³த⁴ம். தத்த² நிகந்திம் கத்வாதி ஆலயம் ஜனேத்வா, தண்ஹம் உப்பாதே³த்வாதி அத்தோ².

ப²ஸ்ஸ உபக³ச்ச²ந்தாதி சக்கு²ஸம்ப²ஸ்ஸாதி³பே⁴த³ம் ப²ஸ்ஸம் பவத்தேந்தா. ப²ஸ்ஸஸ்ஸாதி³னோதி காயஸம்ப²ஸ்ஸவஸேன போ²ட்டப்³ப³ஸங்கா²தஸ்ஸ ப²ஸ்ஸஸ்ஸ அஸ்ஸாத³னஸீலா. காயஸம்ப²ஸ்ஸவஸேன ஹி ஸத்தானம் போ²ட்ட²ப்³ப³தண்ஹா பவத்ததீதி த³ஸ்ஸேதும் ப²ஸ்ஸாஹாராதீ³னவத³ஸ்ஸனே போ²ட்ட²ப்³பா³ரம்மணம் உத்³த⁴டம் ‘‘பரேஸம் ரக்கி²தகோ³பிதேஸூ’’திஆதி³னா. ப²ஸ்ஸஸ்ஸாதி³னோதி வா ப²ஸ்ஸாஹாரஸ்ஸாதி³னோதி அத்தோ². ஸதி ஹி ப²ஸ்ஸாஹாரே ஸத்தானம் ப²ஸ்ஸாரம்மணே அஸ்ஸாதோ³, நாஸதீதி. தேனாஹ ‘‘ப²ஸ்ஸஸ்ஸாத³மூலக’’ந்திஆதி³.

ஜாதினிமித்தஸ்ஸ ப⁴யஸ்ஸ அபி⁴னிபாதஸபா⁴வேன க³ஹிதத்தா ‘‘தம்மூலக’’ந்தி வுத்தம், கம்மாயூஹனனிமித்தந்தி அத்தோ².

அபி⁴னிபததீதி அபி⁴னிப்³ப³த்ததி. பட²மாபி⁴னிப்³ப³த்தி ஹி ஸத்தானம் தத்த² தத்த² அங்கா³ரகாஸுஸதி³ஸே ப⁴வே அபி⁴னிபாதஸதி³ஸீதி. தம்மூலகத்தாதி நாமரூபனிப்³ப³த்திமூலகத்தா.

தத்ராதி தாஸு உபமாஸு. பூ⁴தமத்த²ம் கத்வாதி ந பரிகப்பிதமத்த²ம், அத² கோ² பூ⁴தம் பூ⁴தபுப்³ப³ம் அத்த²ம் கத்வா. பாதே²ய்யஹத்தே²ஸு க³ச்ச²ந்தேஸு பாதே²ய்யம், க³ச்ச²ந்தம் விய ஹோதீதி வுத்தம் ‘‘க³ந்த்வா பாதே²ய்யம் நிட்டா²ஸீ’’தி. க³ந்த்வாதி வாக³மனஹேதூதி அத்தோ². கு²ப்பிபாஸாதுரதாய க⁴னச்சா²யம் ருக்க²ம் உபக³ந்தும் அஸமத்தா² விரள்ஹச்சா²யாயம் நிஸீதி³ம்ஸு. ந தா³னி ஸக்கா தம் மயா காதும் அதிது³ப்³ப³லபா⁴வதோ. பரிக்க²லிதக³திதருணதா³ரகோ கு²ப்பிபாஸாபி⁴பூ⁴தோ ச, தஸ்மா க³ச்ச²ந்தோயேவ மதோ.

ஸஜாதிமம்ஸதாயாதி (ஸம். நி. டீ. 2.2.63) ஸமானஜாதிமம்ஸதாய, மனுஸ்ஸமம்ஸதாயாதி அத்தோ². யம் மனுஸ்ஸமம்ஸம், தஞ்ஹி லோகே ஜிகு³ச்ச²னீயத்தா படிகுலம். ததா² ஹி தம் விஞ்ஞூஹி வஜ்ஜிதம், மனுஸ்ஸமம்ஸேஸுபி ஞாதிமம்ஸம் அயுத்தபரிபோ⁴க³தாய படிகூலம், தத்தா²பி புத்தமம்ஸம், தத்தா²பி பியபுத்தமம்ஸம், தத்தா²பி தருணமம்ஸம், தத்தா²பி ஆமகமம்ஸம், தத்தா²பி அகோ³ரஸாபி⁴ஸங்க²தம், தத்தா²பி அலோணம், தத்தா²பி அதூ⁴பிதந்தி ஏவம் ஹேட்டி²மதோ உத்தருத்தரஸ்ஸ படிகூலதரபா⁴வகாரணதா த³ட்ட²ப்³பா³. புத்தமம்ஸஸதி³ஸந்தி படிகூலதாஉபட்டா²பனேன புத்தமம்ஸஸதி³ஸம் கத்வா பஸ்ஸதி. தத்த² நிகந்திம் பரியாதி³யதீதி அரியமக்³கே³ன ஆஹாரே ஸாபேக்க²ம் கே²பேதி.

ஸா கா³வீதி ‘‘ஸேய்யதா²பி பி⁴க்க²வே கா³வீ’’தி (ஸம். நி. 2.63) ஏவம் ஸுத்தே வுத்தகா³வீ. உத்³தா³லேத்வாதி உப்பாடேத்வா. நிஸ்ஸாய திட்ட²தீதி படிச்சபச்சயம் கத்வா பவத்ததி. து³க்க²து³க்க²தாதி³வஸேன திண்ணம்பி வேத³யிதானம் து³க்க²பா⁴வம் ஸந்தா⁴யாஹ ‘‘வேத³யிதது³க்க²ஸ்ஸா’’தி.

ஸாது⁴ஸம்மதாபி க³தி விபரிணாமஸங்கா²ரது³க்க²தாவஸேன கிலேஸது³க்க²வஸேன ச மஹாபரிளாஹாயேவாதி வுத்தம் ‘‘மஹாபரிளாஹட்டே²ன தயோ ப⁴வா’’தி. யதா² உபகட்³ட⁴கா த்³வே புரிஸா, ஏவம் குஸலாகுஸலவஸேன த்³வே மனோஸஞ்சேதனா. யதா² மனோஸஞ்சேதனா ந பவத்ததி, ததா² படிபஜ்ஜந்தோ தத்த² நிகந்திம் பரியாதி³யதீதி வேதி³தப்³போ³.

ஸத்திஸதேன ஹதா ஏவ உபமா ஸத்திஸதஹதூபமா, தஸ்ஸம் ஸத்திஸதஹதூபமாயம். தம் ஸத்திஸதம். அஸ்ஸ புரிஸஸ்ஸ. பதிதோகாஸேதி புரிமஸத்தீஹி பதிதப்பதே³ஸே. து³க்க²ஸ்ஸ பமாணம் நத்தி² அனேகஸ்ஸ அபராபரம் உப்பஜ்ஜனதோ. க²ந்த⁴ஜனனந்தி க²ந்தா⁴னம் அபராபருப்பாதோ³, பட²மாபி⁴னிப்³ப³த்தி பன படிஸந்தி⁴ ஏவ. ஆகு³சாரீ புரிஸோ விய படிஸந்தி⁴விஞ்ஞாணம் நானப்பகாரது³க்கு²ப்பாத³ஸன்னிஸ்ஸயதோ, தேஹி ச து³க்கே²ஹி உபக³ந்தப்³ப³தோ. ஸம்பயுத்தத⁴ம்மானம் பமுக²பா⁴வேன பவத்தியா ‘‘விஞ்ஞாணஸ்ஸ து³க்கு²ப்பாதோ³தி வுத்தா. ததா² ஹி வுத்தம் ‘‘மனோபுப்³ப³ங்க³மா த⁴ம்மா’’தி (த⁴. ப. 1, 2) யதா² விஞ்ஞாணம் ஆயதிம் படிஸந்தி⁴வஸேன ந பவத்ததி, ஏவம் கரணம் தத்த² நிகந்திபரியாதா³னம் த³ட்ட²ப்³ப³ம்.

பரிஞ்ஞாதம் வத்தூ²தி து³க்க²ஸச்சமாஹ. பஞ்சகாமகு³ணிகோ ராகோ³தி பஞ்சகாமகு³ணாரம்மணோ ராகோ³. பரிஞ்ஞாதோ ஹோதீதி பரிச்சி²ஜ்ஜ ஜானனேன ஸமதிக்கந்தோ ஹோதி. ரஸதண்ஹாய ஹி ஸம்மதே³வ விக³தாய ரூபதண்ஹாத³யோபி விக³தாயேவ ஹோந்தி. ததா² ச ஸதி காமராக³ஸம்யோஜனம் ஸமுச்சி²ன்னமேவ ஹோதி, ஏவம் கரணம் தத்த² நிகந்திபரியாதா³னம் த³ட்ட²ப்³ப³ம். பரிஞ்ஞாபி⁴ஸமயே ஹி ஸித்³தே⁴ பஹானாபி⁴ஸமயோ ஸித்³தோ⁴ ஏவாதி. பஹீனே ச காமராக³ஸம்யோஜனே ஓரம்பா⁴கி³யஸம்யோஜனானம் லேஸோபி நாவஸிஸ்ஸதீதி த³ஸ்ஸேந்தோ ஆஹ ‘‘நத்தி² தம் ஸம்யோஜன’’ந்திஆதி³. தேன கப³ளீகாராஹாரபரிஞ்ஞா அனாகா³மிதம் பாபேதீதி த³ஸ்ஸேதி. ஸேஸாஹாரபரிஞ்ஞா பன அரஹத்தனிட்டா² ஏவாதி த³ஸ்ஸேந்தோ ‘‘ப²ஸ்ஸே பி⁴க்க²வே’’திஆதி³மாஹ. தத்த² திஸ்ஸோ தண்ஹாதி காமதண்ஹா ரூபதண்ஹா அரூபதண்ஹாதி இமா திஸ்ஸோ தண்ஹா.

‘‘புரிமதண்ஹாஸமுத³யா’’தி ஸங்கே²பதோ வுத்தமத்த²ம் வித்தா²ரதோ த³ஸ்ஸேதும் ‘‘கத²’’ந்திஆதி³ ஆரத்³த⁴ம். தத்த² தண்ஹாபச்சயனிப்³ப³த்தாதி தண்ஹாபச்சயா நிப்³ப³த்தா. படிஸந்தி⁴க்க²ணே புரிமதண்ஹாஸமுத³யா ஆஹாரானம் ஸமுத³யத³ஸ்ஸனேனேவ பவத்திக்க²ணேபி உபாதி³ன்னகஆஹாரஸமுத³யோ த³ஸ்ஸிதோ ஹோதீதி தம் அனாமஸித்வா அனுபாதி³ன்னகானம் தண்ஹாஸமுத³யம் த³ஸ்ஸேதும் ‘‘யஸ்மா பனா’’திஆதி³ வுத்தம். இதா⁴தி இமஸ்மிம் ஸுத்தே மிஸ்ஸித்வா கதி²தா அவிஸேஸிதத்தா. ஸஹஜாததண்ஹாபச்சயனிப்³ப³த்தோதி ஏத்த² ஸஹஜாதக்³க³ஹணம் அஸஹஜாததண்ஹாபச்சயனிப்³ப³த்தோபி அனுபாதி³ன்னகஆஹாரோ லப்³ப⁴தீதி த³ஸ்ஸனத்த²ம். ஸோ பன அஸஹஜாததண்ஹாபச்சயனிப்³ப³த்ததாஸாமஞ்ஞேனபி யதா²வுத்தஉபாதி³ன்னகாஹாரேன ஸம்ஸயம் ஜனேய்யாதி ந உத்³த⁴டோ, ந ச ஏதம் காரணம் ‘‘ராக³ம் உபனிஸ்ஸாய தோ³மனஸ்ஸம் உப்பஜ்ஜதீ’’தி வசனதோ, தண்ஹோபனிஸ்ஸயபடிக⁴சித்தஸமுட்டா²னாய ச ஓஜாய வஸேன அனுபாதி³ன்னகஆஹாரஸ்ஸ லப்³ப⁴னதோ. கத²ம் பன தண்ஹா ஓஜாய உபனிஸ்ஸயபச்சயோ; ந ஹி பட்டா²னே கத்த²சி ரூபஸ்ஸ உபனிஸ்ஸயபச்சயோ வுத்தோ அத்தீ²தி. நாயம் விரோதோ⁴ ‘‘யஸ்மிம் ஸதி யம் ஹோதி, ஸோ தஸ்ஸ உபனிஸ்ஸயோ’’தி ஸுத்தந்தனயஸ்ஸ அதி⁴ப்பேதத்தா யதா²வுத்தத்த²ஸம்ப⁴வதோ. தேனேவாஹ ‘‘இமிஸ்ஸா…பே… தண்ஹாய நிரோதே⁴னா’’தி.

காரணே ஸப்³ப³ஸோ நிருத்³தே⁴ ப²லம்பி ஸப்³ப³ஸோ நிருஜ்ஜ²தீதி ஆஹ ‘‘ஆஹாரனிரோதோ⁴ பஞ்ஞாயதீ’’தி. ஆஹாரானம் து³க்க²ஸச்சேகதே³ஸத்தா ஆஹாரக்³க³ஹணம் து³க்க²ஸச்சக்³க³ஹணமேவ ஹோதீதி ஆஹ ‘‘இத⁴ சத்தாரிபி ஸச்சானி ஸரூபேனேவ வுத்தானீ’’தி. ஸச்சதே³ஸனா து³க்கா²தீ³னம் யாவதே³வ பரிஞ்ஞேய்யாதி³பா⁴வஸந்த³ஸ்ஸனத்தா², தஸ்மா ஜராமரணாதீ³ஸு பரிஞ்ஞேய்யாதி³பா⁴வோ அஸம்மோஹதோ ஸல்லக்கே²தப்³போ³தி த³ஸ்ஸேந்தோ ‘‘ஸப்³ப³த்த² அஸம்முய்ஹந்தேன ஸச்சானி உத்³த⁴ரிதப்³பா³னீ’’தி ஆஹ.

ஆஹாரவாரவண்ணனா நிட்டி²தா.

ஸச்சவாரவண்ணனா

91. யேன யேன பரியாயேன ப்³யாகரோதீதி யேன யேன து³க்கா²தி³ஜராமரணாதி³பரியாயேன அரியஸச்சானி ஸங்கே²பதோ ச வித்தா²ரதோ ச கதே²தி. து³க்க²ந்தி து³க்க²ஸச்சம் து³க்க²ம், ந து³க்க²மத்தம்.

ஸச்சவாரவண்ணனா நிட்டி²தா.

ஜராமரணவாரவண்ணனா

92. தேஸம் தேஸந்தி ப்³யாபனிச்சா²வஸேனாயம் நித்³தே³ஸோ கதோ, தஸ்மா யதா² ‘‘கா³மோ கா³மோ ரமணீயோ’’தி வுத்தே ரமணீயதாய தாதி³ஸா ஸப்³பே³பி கா³மா ஸங்க³ஹம் க³ச்ச²ந்தி, ஏவம் ‘‘தேஸம் தேஸம் ஸத்தானம் ஜாதீ’’தி வுத்தே ஜாதிஸங்கா²தவிகாரவஸேன ஸப்³பே³பி ஸத்தா ஸங்க³ஹம் க³ச்ச²ந்தி. தேனாஹ ‘‘ஸங்கே²பதோ அனேகேஸம் ஸத்தானம் ஸாதா⁴ரணனித்³தே³ஸோ’’தி.

க³திஜாதிவஸேனாதி (ஸம். நி. டீ. 2.1.2) பஞ்சக³திவஸேன, தத்தா²பி ஏகேகாய க³தியா க²த்தியாதி³பு⁴ம்மதே³வாதி³ஹத்தி²ஆதி³ஜாதிவஸேன ச. நிகிய்யந்தி ஸத்தா ஏத்த², ஏதேன வாதி நிகாயோ, கோ³த்தசரணாதி³விபா⁴கோ³. ஜராய ஸபா⁴வோ நாம வயோஹானி, தஸ்மா ஜராதி வயோஹானிஸங்கா²தஸ்ஸ ஸபா⁴வஸ்ஸ நித்³தே³ஸோ, பாகடஜராவஸேன நித்³தே³ஸோ க²ண்டி³ச்சாதி³வஸேன க³ஹணதோ. ஜீரணமேவ ஜீரணதா, ஜீரந்தஸ்ஸ வா ஆகாரோ தா-ஸத்³தே³ன வுத்தோ. தேனாஹ ‘‘அயம் ஆகாரனித்³தே³ஸோ’’தி. த³ந்தாதீ³னம் வஸேன க²ண்ட³ம் ஜாதம் ஏதஸ்ஸாதி க²ண்டி³தோ, புக்³க³லோ. தஸ்ஸ பா⁴வோ க²ண்டி³ச்சம். பலிதம் ஏதஸ்ஸ அத்தீ²தி பலிதோ, தஸ்ஸ பா⁴வோ பாலிச்சம். வலி தசோ ஏதஸ்ஸாதி வலித்தசோ, தஸ்ஸ பா⁴வோ வலித்தசதா. இமே க²ண்டி³ச்சாத³யோ ஜரா. விகாரானம் த³ஸ்ஸனவஸேனாதி விபத்தித³ஸ்ஸனவஸேன. வாதஸ்ஸாதி மஹதோ வாதக்க²ந்த⁴ஸ்ஸ. க²ண்டி³ச்சாதி³வஸேன க³தமக்³கோ³ பாகடோ, தஸ்மா க²ண்டி³ச்சாதி³க்³க³ஹணம் ஜராய கிச்சனித்³தே³ஸோதி வுத்தந்தி த³ஸ்ஸேதி. ந ச க²ண்டி³ச்சாதீ³னேவ ஜராதி கலலகாலதோ பபு⁴தி புரிமரூபானம் ஜராபத்தக்க²ணே உப்பஜ்ஜமானானி பச்சி²மரூபானி பரிபக்கரூபானுரூபானி பரிணதபரிணதானி உப்பஜ்ஜந்தீதி அனுக்கமேன ஸுபரிணதரூபானம் பரிபாககாலே உப்பஜ்ஜமானானி க²ண்டி³ச்சாதி³ஸபா⁴வானி உப்பஜ்ஜந்தி, தானி உத³காதி³மக்³கே³ஸு திணருக்க²ஸம்ப⁴க்³க³தாத³யோ விய பரிபாகக³தமக்³க³ஸங்கா²தேஸு பரிபக்கரூபேஸு உப்பன்னானி ‘‘ஜராய க³தோ மக்³கோ³’’இச்சேவ வுத்தானி, ந ஜராதி.

பகதியாதி ப²லவிபச்சனபகதியா, ஜராய வா பாபுணிதப்³ப³ம் ப²லமேவபகதி, தாய ஜரா தீ³பிதா. ஸுப்பஸன்னானீதி ஸுட்டு² பஸன்னானி. தமேவ ஸுப்பஸன்னதம் கிச்சதோ த³ஸ்ஸேதும் ‘‘ஸுகு²மம்பீ’’திஆதி³ வுத்தம். திக்க²விஸத³தா ஹி தேஸம் இந்த்³ரியானம் ஸுப்பஸன்னதா. ஆலுளிதானீதி ஆகுலானி. அவிஸதா³னீதி அப்³யத்தானி.

காமம் ரூபத⁴ம்மேஸுபி க²ணிகஜரா து³ருபலக்கி²தா படிச்ச²ன்னாவ, ஸா பன யஸ்மா ஸந்தானவஸேன பவத்தியா பரிப்³யத்தாவ ஹோதீதி ‘‘பாகடஜரா’’இச்சேவ வுத்தா. அவீசி நிரந்தரா ஜரா அவீசிஜரா ஸதி ஸந்தானே ஸத்தானம் அனுப்பப³ந்த⁴தோ. ததோ அஞ்ஞேஸூதி மந்த³த³ஸகாதீ³ஸு புப்³ப³த³ஸகாதி³பரிச்சே²த³தோ அஞ்ஞேஸு யதா²வுத்தேஸு. அந்தரந்தராதி தேஸு ஏவ வுத்தப்பகாரேஸு புரிமத³ஸகாதி³தோ பச்சி²மத³ஸகாதீ³னம் அந்தரந்தரா. வண்ணவிஸேஸாதீ³னந்தி வண்ணவிஸேஸஸண்டா²னவிஸேஸஸம்ப²ஸ்ஸவிஸேஸாதீ³னம்.

வசனகவஸேனாதி க-காரேன ஹி பத³ம் வட்³டே⁴த்வா வுத்தம், தஸ்மா சவனம் சுதீதி வுத்தம் ஹோதி. தம் பன ஏகசதுபஞ்சவோகாரப⁴வேஸு சுதியா அவிஸேஸதோ க³ஹணந்தி ஆஹ ‘‘ஏகசதுபஞ்சக்க²ந்தா⁴னம் ஸாமஞ்ஞவசன’’ந்தி. சவனகவஸேனாதி வா சவனகஸ்ஸ புக்³க³லஸ்ஸ வஸேனாதி அத்தோ². சவனமேவ சவனதாதி ஆஹ ‘‘பா⁴வவசனேனா’’தி. லக்க²ணனித³ஸ்ஸனந்தி வயஸங்கா²தஸ்ஸ லக்க²ணஸ்ஸ நித³ஸ்ஸனம். சவந்தஸ்ஸ வா ஆகாரோ தா-ஸத்³தே³ன வுத்தோ ‘‘சவனதா’’தி. பி⁴ஜ்ஜனம் பே⁴தோ³தி வுத்தம் ‘‘சுதிக்க²ந்தா⁴னம் ப⁴ங்கு³ப்பத்திபரிதீ³பன’’ந்தி. யதா² பி⁴ன்னஸ்ஸ க⁴டஸ்ஸ கேனசி பரியாயேன க⁴னக⁴டபா⁴வேன டா²னம் நத்தி², ஏவம் பி⁴ன்னானம் க²ந்தா⁴னந்தி சவனம் அந்தரஹிதம் நாமாதி ஆஹ ‘‘அந்தரதா⁴னந்தி…பே… பரிதீ³பன’’ந்தி. யோ மச்சூதி வுச்சதி பே⁴தோ³, யஞ்ச மரணம் பாணசாகோ³, தது³ப⁴யம் ஏகஜ்ஜ²ம் கத்வா வுத்தம் ‘‘மச்சு மரண’’ந்தி ஏவம் வா ஏத்த² அத்தோ² த³ட்ட²ப்³போ³. காலஸ்ஸ அந்தகஸ்ஸ கிரியாதி யா லோகே வுச்சதி, ஸா சுதி, மரணந்தி அத்தோ². சவனகாலோ ஏவ வா அனதிக்கமனீயத்தா விஸேஸேன காலோதி வுத்தோதி தஸ்ஸ கிரியா அத்த²தோ சுதிக்க²ந்தா⁴னம் பே⁴த³ப்பத்தியேவ. ‘‘சுதி சவனதா’’திஆதி³னா புப்³பே³ வோஹாரமிஸ்ஸகேன நித்³தி³ட்ட²ம்.

இதா³னி நிப்³ப³த்திதபரமத்த²னயேனேவ நித்³தே³ஸோதி த³ஸ்ஸேதும் ‘‘பரமத்தே²ன தீ³பேது’’ந்தி வுத்தம். ‘‘சவனகவஸேனா’’திஆதி³னா ஹி புக்³க³லவஸேன ச வோஹாராதி⁴ட்டா²னா ஸம்வண்ணனா கதா. ந கிஞ்சி களேவரம் நிக்கி²பகி ஓபபாதிகானம் சுதிக்க²ந்தா⁴னம் அந்தரதா⁴னமேவஹோதி, ததோ பரம் உதுஸமுட்டா²னரூபஸந்ததி ந பவத்ததி. ‘‘ஜாதிஸமுத³யா’’திஆதீ³ஸு யம் வத்தப்³ப³ம், தம் ‘‘தண்ஹாஸமுத³யா’’திஆதீ³ஸு வுத்தனயனேவ ஸக்கா விஞ்ஞாதுந்தி ந வுத்தம்.

ஜராமரணவாரவண்ணனா நிட்டி²தா.

ஜாதிவாரவண்ணனா

93. ஜாயனட்டே²னாதிஆதி³ ஆயதனவஸேன யோனிவஸேன ச த்³வீஹி த்³வீஹி பதே³ஹி ஸப்³ப³ஸத்தே பரியாதி³யித்வா ஜாதிம் த³ஸ்ஸேதும் வுத்தம். ஸம்மோஹவினோத³னியம் (விப⁴. அட்ட². 191) பன ‘‘ஜாயமானகவஸேன ஜாதி, ஸஞ்ஜாயனவஸேன ஸஞ்ஜாதீ’’தி வுத்தத்தா தத்த² ஏகேகேனேவ பதே³ன ஸப்³ப³ஸத்தே பரியாதி³யித்வா ஜாதிம் த³ஸ்ஸேதீதி த³ட்ட²ப்³ப³ம். ஸம்புண்ணா ஜாதி ஸஞ்ஜாதீதி கத்வா ‘‘ஸா பரிபுண்ணாயதனவஸேன யுத்தா’’தி வுத்தம். ஏதேனேவ கேவலம் ஜாதிஸத்³தே³ன வுத்தாய ஜாதியா அபரிபுண்ணாயதனதா த³ட்ட²ப்³பா³. அபி⁴ப்³யத்தா நிப்³ப³த்தி அபி⁴னிப்³ப³த்தி, பாகடா நிப்³ப³த்தீதி அத்தோ². ‘‘தேஸம் தேஸம் ஸத்தானம்…பே… அபி⁴னிப்³ப³த்தீ’’தி ஸத்தவஸேன பவத்தத்தா வோஹாரதே³ஸனா.

தத்ர தத்ராதி ஏத்த² சதுவோகாரப⁴வே த்³வின்னம், ஏகவோகாரப⁴வே த்³வின்னம், ஸேஸரூபதா⁴துயம் படிஸந்தி⁴க்க²ணே உப்பஜ்ஜமானானம் பஞ்சன்னம், காமதா⁴துயம் விகலாவிகலிந்த்³ரியவஸேன ஸத்தன்னம் நவன்னம் த³ஸன்னம், புன த³ஸன்னம், ஏகாத³ஸன்னஞ்ச ஆயதனானம் வஸேன ஸங்க³ஹோ வேதி³தப்³போ³. யதி³பி சுதிக்க²ந்தா⁴ அனந்தரானம் படிஸந்தி⁴கத⁴ம்மானம் அனந்தராதி³னா பச்சயா ஹோந்தி, யே பன ஸமுத³யா அஜனகா, தே ஏத்த² உபபத்திப⁴வோதி அதி⁴ப்பேதா. ஜனகோ ஏவ ப⁴வோதி அதி⁴ப்பேதோதி த³ஸ்ஸேந்தோ ‘‘ஜாதியா பச்சயபூ⁴தோ கம்மப⁴வோ வேதி³தப்³போ³’’தி ஆஹ.

ஜாதிவாரவண்ணனா நிட்டி²தா.

ப⁴வவாரவண்ணனா

94. பா⁴வனப⁴வனட்டே²ன ப⁴வோ து³விதோ⁴. தத்த² கம்மப⁴வோ ‘‘ப⁴வதி ஏதஸ்மா உபபத்திப⁴வோ’’தி பா⁴வனட்டே²ன ப⁴வோ. அட்ட²கதா²யம் பன உபபத்திப⁴வம் ‘‘ப⁴வதீதி ப⁴வோ’’தி வத்வா தஸ்ஸ காரணத்தா கம்மம் ப²லூபசாரேன ப⁴வோதி அயமத்தோ² வுத்தோ, உப⁴யத்தா²பி உபபத்திப⁴வஹேதுபா⁴வனேத்த² கம்மஸ்ஸ கம்மப⁴வபரியாயோதி த³ஸ்ஸிதம் ஹோதி. ஸப்³ப³தா²பீதி பா⁴வனப⁴வனகுஸலாகுஸலஉபபத்திஸம்பத்திப⁴வஹீனபணீதாதி³னா ஸப்³ப³ப்பகாரேனபி. காமப⁴வோதி வுத்தம் காமதண்ஹாஹேதுகதோ காமதண்ஹாய ஆரம்மணபா⁴வதோ ச. ரூபப⁴வூபக³கம்மம் ரூபப⁴வோ, ததா² அரூபப⁴வூபக³கம்மம் அரூபப⁴வோ, தம்தம்னிப்³ப³த்தக்க²ந்தா⁴ ரூபாரூபுபத்திப⁴வா, ரூபாரூபப⁴வபா⁴வோ பன தேஸம் ‘‘காமப⁴வோ’’தி ஏத்த² வுத்தனயேனேவ வேதி³தப்³போ³.

ப⁴வவாரவண்ணனா நிட்டி²தா.

உபாதா³னவாரவண்ணனா

95. உபாதா³னந்தி சதுப்³பி³த⁴ம்பி உபாதா³னம். யதா² ஹி காமஸ்ஸாத³வஸேன, ப⁴வஸ்ஸாத³வஸேன வா தம்தம்ஸுக³திப⁴வூபக³ம் கம்மம் கரோந்தஸ்ஸ காமுபாதா³னம், ஏவம் உச்சே²தா³தி³மிச்சா²பி⁴னிவேஸவஸேனாதி சத்தாரிபி உபாதா³னானி யதா²ரஹம் தஸ்ஸ தஸ்ஸ குஸலகம்மப⁴வஸ்ஸ உபனிஸ்ஸயவஸேனேவ பச்சயா ஹோந்தி, அகுஸலகம்மப⁴வஸ்ஸ அஸஹஜாதஸ்ஸ அனந்தரஸ்ஸ உபனிஸ்ஸயவஸேனபி ஆரம்மணவஸேனபி. ஸஹஜாதஸ்ஸ காமுபாதா³னம் ஸஹஜாத-அஞ்ஞமஞ்ஞ-நிஸ்ஸய-ஸம்பயுத்த-அத்தி²-அவிக³த-ஹேது-வஸேன ஸத்ததா⁴, ஸேஸஉபாதா³னானி தத்த² ஹேதுபச்சயபா⁴வம் பஹாய மக்³க³பச்சயம் பக்கி²பித்வா ஸத்ததா⁴வ பச்சயா ஹோந்தி. அனந்தரஸ்ஸ பன அனந்தரஸமனந்தரஅனந்தரூபனிஸ்ஸயனத்தி²விக³தாஸேவனவஸேன பச்சயா ஹோந்தி. தஸ்ஸித³ம்பி ஸஹஜாதாதீ³தி ஆதி³-ஸத்³தே³ன ஸங்க³ஹிதந்தி த³ட்ட²ப்³ப³ம். வத்து²காமம் உபாதி³யதி சித்தம், புக்³க³லோ வா ஏதேனாதி அத்தோ². தந்தி வத்து²காமம். காமேதீதி காமோ ச ஸோ உபாதி³யதீதி உபாதா³னஞ்சாதி யோஜனா. வுத்தனயேனாதி அபி⁴த⁴ம்மே வுத்தனயேன.

ஸஸ்ஸதோ அத்தாதி இத³ம் புரிமதி³ட்டி²ம் உபாதி³யமானம் உத்தரதி³ட்டி²ம் நித³ஸ்ஸேதும் வுத்தம். யதா² ஏஸா தி³ட்டி² த³ள்ஹீகரணவஸேன புரிமம் புரிமம் உத்தரா உத்தரா உபாதி³யதி, ஏவம் ‘‘நத்தி² தி³ன்ன’’ந்திஆதி³காபீதி. அத்தக்³க³ஹணம் பன அத்தவாது³பாதா³னந்தி நயித³ம் தி³ட்டு²பாதா³னத³ஸ்ஸனந்தி த³ட்ட²ப்³ப³ம். லோகோ சாதி அத்தக்³க³ஹணவினிமுத்தக³ஹணம் தி³ட்டு²பாதா³னபூ⁴தம் இத⁴ புரிமதி³ட்டி²உத்தரதி³ட்டி²வசனேஹி வுத்தந்தி வேதி³தப்³ப³ம். ஸப்³ப³தி³ட்டி²க³தஸ்ஸ ‘‘தி³ட்டு²பாதா³ன’’ந்தி ஏதம் அதி⁴வசனம் ‘‘ஸப்³பா³பி தி³ட்டி² தி³ட்டு²பாதா³ன’’ந்தி வசனதோ.

ஸீலப்³ப³தம் உபாதி³யந்தீதி ஸீலப்³ப³தம் ‘‘ஸுத்³தி⁴மக்³கோ³’’தி உபாதி³யந்தி. ஏதேன மிச்சா²பி⁴னிவேஸேன. ஸயம் வா தம் மிச்சா²பி⁴னிவேஸஸஹக³தம். ஸீலப்³ப³தஸஹசரணதோ ஸீலப்³ப³தஞ்ச தம் த³ள்ஹக்³கா³ஹபா⁴வதோ உபாதா³னஞ்சாதி ஸீலப்³ப³துபாதா³னம். ஏவம் ஸுத்³தீ⁴தி அபி⁴னிவேஸதோதி ஏவம் கோ³ஸீலகோ³வதாதி³சரணேன ஸம்ஸாரஸுத்³தீ⁴தி அபி⁴னிவேஸபா⁴வதோ. ஏதேன தம் ஸஹசரணதோ அபி⁴னிவேஸஸ்ஸ தம்ஸத்³தா³ரஹதம் த³ஸ்ஸேதி.

வத³ந்தீதி ‘‘அத்தி² மே அத்தா’’திஆதி³னா வோஹரந்தி. ஏதேன தி³ட்டி²க³தேன. அத்தவாத³மத்தமேவாதி அத்தாதி வாசாமத்தமேவ. ஏதேன வாசாவத்து²மத்தமேதம், யதி³த³ம் பா³ஹிரகபரிகப்பிதோ அத்தாதி த³ஸ்ஸேதி.

தண்ஹா காமுபாதா³னஸ்ஸாதி ஏத்த² ‘‘தத்த² கதமம் காமுபாதா³னம்? யோ காமேஸு காமச்ச²ந்தோ³ காமராகோ³ காமனந்தீ³ காமதண்ஹா காமஸ்னேஹோ காமபரிளாஹோ காமமுச்சா² காமஜ்ஜோ²ஸானம். இத³ம் வுச்சதி காமுபாதா³ன’’ந்தி வசனதோ தண்ஹாத³ள்ஹத்தம் காமுபாதா³னம். தண்ஹாத³ள்ஹத்தந்தி ச புரிமதண்ஹாஉபனிஸ்ஸயபச்சயதோ த³ள்ஹபூ⁴தா உத்தரதண்ஹா ஏவ. கேசி பனாஹு –

‘‘அப்பத்தவிஸயபத்த²னா தண்ஹா அந்த⁴காரே சோரஸ்ஸஹத்த²ப்பஸாரணம் விய, ஸம்பத்தவிஸயக்³க³ஹணம் உபாதா³னம் தஸ்ஸேவ ப⁴ண்ட³க்³க³ஹணம் வியா’’தி. அப்பிச்ச²ஸந்துட்டி²படிபக்கா² ஏதே த⁴ம்மா பரியேஸனாரக்க²து³க்க²மூலானி, தஸ்மா வுத்தலக்க²ணா தண்ஹா வுத்தலக்க²ணஸ்ஸேவ உபாதா³னஸ்ஸ அனானந்தரஸ்ஸ உபனிஸ்ஸயவஸேன பச்சயோ, ஆரம்மணாதி³வஸேனபி பச்சயோ ஹோதியேவ, அனந்தராதீ³னம் பன அனந்தராதி³வஸேன பச்சயோ. ஸப்³ப³ஸ்ஸபி ஹி லோப⁴ஸ்ஸ தண்ஹாபரியாயோபி காமுபாதா³னபரியாயோபி லப்³ப⁴தேவாதி. அவஸேஸானந்தி தி³ட்டு²பாதா³னாதீ³னம். ஸஹஜாதாதி³வஸேனாதி ஸஹஜாதானம் ஸஹஜாதாதி³வஸேன, அஸஹஜாதானம் அனந்தரஉபனிஸ்ஸயாதி³வஸேனாதி ஸப்³ப³ம் ஹேட்டா² வுத்தனயேனேவ வேதி³தப்³ப³ம்.

உபாதா³னவாரவண்ணனா நிட்டி²தா.

தண்ஹாவாரவண்ணனா

96. ‘‘சக்கு²ஸம்ப²ஸ்ஸோ’’திஆதி³ ப²ஸ்ஸஸ்ஸ மாதிதோ நாமம் விய புத்தஸ்ஸ வத்து²தோ தஸ்ஸ நிஸ்ஸயபா⁴வேன உப்பத்திஹேதுத்தா, ஆரம்மணம் பன கேவலம் உப்பத்திஹேதூதி வுத்தம் ‘‘ஸேட்டி²…பே… நாம’’ந்தி. காமராக³பா⁴வேனாதி வத்து²காமஸ்ஸ ரஜ்ஜனவஸேன. ரூபம் அஸ்ஸாதே³ந்தீதி ருபாரம்மணம் தண்ஹாபி⁴னந்த³னாவஸேன அபி⁴ரமமானா ஏவ அஸ்ஸாதே³ந்தீ. நிச்சந்திஆதி³னா தி³ட்டா²பி⁴னந்த³னாமுகே²ன ரூபம் அபி⁴ரமந்தீ. பேச்ச ந ப⁴விஸ்ஸதீதி பி⁴ஜ்ஜித்வா ந ஹோதி புன அனுப்பஜ்ஜனதோ. ததா² ஸத்³த³கண்ஹாத³யோபீதி யதா² ரூபதண்ஹா காமராக³பா⁴வேன ஸஸ்ஸதராக³வஸேன உச்சே²த³ராக³வஸேனாதி ச பவத்தியா திஸ்ஸோ தண்ஹா, ததா² ஸத்³த³தண்ஹா க³ந்த⁴ரஸபோ²ட்ட²ப்³ப³த⁴ம்மதண்ஹாபி. தண்ஹாவிசரிதானீதி தண்ஹாஸமுதா³சாரா, ஸமுதா³சாரவஸேன பவத்ததண்ஹாதி அத்தோ².

அஜ்ஜ²த்திகஸ்ஸுபாதா³யாதி (விப⁴. அட்ட². 973; ஸம். நி. டீ. 2.2.2) அஜ்ஜ²த்திகம் க²ந்த⁴பஞ்சகம் உபாதா³ய. உபயோக³த்தே² ஹி இத³ம் ஸாமிவசனம். அஸ்மீதி ஹோதீதி யதே³தம் அஜ்ஜ²த்தம் க²ந்த⁴பஞ்சகம் உபாதா³ய தண்ஹாமானதி³ட்டி²வஸேன ஸமூஹகா³ஹதோ அஸ்மீதி ஏவம் ஹோதி, தஸ்மிம் ஸதீதி அத்தோ². இத்த²ஸ்மீதி ஹோதீதி க²த்தியாதீ³ஸு ‘‘இத³ம்பகாரோ அஹ’’ந்தி ஏவம் தண்ஹாமானதி³ட்டி²வஸேன ஹோதீதி இத³மேத்த² அனுபனிதா⁴ய க³ஹணம். ஏவமாதி³னாதி ஆதி³-ஸத்³தே³ன ‘‘ஏவம்ஸ்மீதி, அஞ்ஞதா²ஸ்மீதி, ப⁴விஸ்ஸந்தி, இத்த²ம் ப⁴விஸ்ஸந்தி, ஏவம் ப⁴விஸ்ஸந்தி, அஞ்ஞதா² ப⁴விஸ்ஸந்தி, அஸஸ்மீதி, ஸதஸ்மீதி, ஸியந்தி, இத்த²ம் ஸியந்தி, ஏவம் ஸியந்தி, அஞ்ஞதா² ஸியந்தி, அபாஹம் ஸியந்தி, அபாஹம் இத்த²ம் ஸியந்தி, அபாஹம் ஏவம் ஸியந்தி, அபாஹம் அஞ்ஞதா² ஸிய’’ந்தி (விப⁴. 973) இமேஸம் தண்ஹாவிசரிதானம் க³ஹணம். தத்த² ஏவம்ஸ்மீதி இத³ம் ஸமதோ உபனிதா⁴ய க³ஹணம், யதா² அயம் க²த்தியோ, யதா² அயம் ப்³ராஹ்மணோ, ஏவம் அஹம்பீதி அத்தோ². அஞ்ஞதா²ஸ்மீதி இத³ம் அஸமணோ உபனிதா⁴ய க³ஹணம், யதா² அயம் க²த்தியோ, யதா² அயம் ப்³ராஹ்மணோ, ததோ அஞ்ஞதா² அஹம் ஹீனோ வா அதி⁴கோ வாதி அத்தோ². இதி இமானி புப்³பே³ வுத்தானி த்³வேதி ஏதானி பச்சுப்பன்னவஸேன சத்தாரி தண்ஹாவிசரிதானி. ப⁴விஸ்ஸந்திஆதீ³னி பன சத்தாரி அனாக³தவஸேன வுத்தானி. தேஸம் புரிமசதுக்கே வுத்தனயேனேவ அத்தோ² வேதி³தப்³போ³. அஸஸ்மீதி அஸதீதி அஸம். நிச்சஸ்ஸேதம் அதி⁴வசனம், தஸ்மா ஸஸ்ஸதோ அஸ்மீதி அத்தோ². ஸதஸ்மீதி ஸீத³தீதி ஸதம். அனிச்சஸ்ஸேதம் அதி⁴வசனம், தஸ்மா அஸஸ்ஸதோ அஸ்மீதி அத்தோ². இதி இமானி த்³வே ஸஸ்ஸதுச்சே²த³வஸேன வுத்தானி. இதோ பரானி ஸியந்திஆதீ³னி சத்தாரி ஸம்ஸயபரிவிதக்கவஸேன வுத்தானி, தானி புரிமசதுக்கே வுத்தனயேன அத்த²தோ வேதி³தப்³பா³னி. அபாஹம் ஸியந்திஆதீ³னி சத்தாரி ‘‘அபி நாமாஹம் ப⁴வேய்ய’’ந்தி ஏவம் பத்த²னாகப்பனவஸேன வுத்தானி, தானி புரிமசதுக்கே வுத்தனயேனேவ வேதி³தப்³பா³னி.

ஏத்த² ச ஸஸ்ஸதுச்சே²த³வஸேன வுத்தா த்³வே தி³ட்டி²ஸீஸா நாம, அஸ்மி, ப⁴விஸ்ஸம், ஸியம், அபாஹம் ஸியந்தி ஏதே பன சத்தாரோ ஸுத்³த⁴ஸீஸா ஏவ, ‘‘இத்த²ஸ்மீ’’திஆத³யோ தயோ தயோதி த்³வாத³ஸ ஸீஸமூலகா நாம. ஏவமேதானி த்³வே தி³ட்டி²ஸீஸா, சத்தாரோ ஸுத்³த⁴ஸீஸா, த்³வாத³ஸ ஸீஸமூலகாதி அஜ்ஜ²த்திகஸ்ஸுபாதா³ய அட்டா²ரஸ்ஸ தண்ஹாவிசரிதானி வேதி³தப்³பா³னி.

பா³ஹிரஸ்ஸுபாதா³யாதி பா³ஹிரம் க²ந்த⁴பஞ்சகம் உபாதா³ய. இத³ம்பி ஹி உபயோக³த்தே² ஸாமிவசனம். இமினாதி இமினா ருபேன வா…பே… விஞ்ஞாணேன வாதி ஏவம் ரூபாதீ³ஸு ஏகமேவ ‘‘அஹ’’ந்தி, இதரம் கிஞ்சனபலிபோ³த⁴பா⁴வேன க³ஹேத்வா தண்ஹாதி³வஸேன ‘‘அஸ்மீ’’தி அபி⁴னிவிஸதி, ‘‘இமினா’’தி அயமேத்த² விஸேஸோ. அஸ்மீதி இமினா க²க்³கே³ன வா ச²த்தேன வா அபி⁴ஸேகேன வா ‘‘க²த்தியோஹமஸ்மீ’’தி அபி⁴னிவிஸதி. பா³ஹிரரூபாதி³னிஸ்ஸிதானீதி பா³ஹிரானி பரஸந்ததிபரியாபன்னானி ரூபவேத³னாதீ³னி நிஸ்ஸிதானி. அட்டா²ரஸாதி இமினா ‘‘அஸ்மீ’’திஆதி³னயப்பவத்தானி அட்டா²ரஸ, தானி புப்³பே³ வுத்தனயேனேவ வேதி³தப்³பா³னி. ‘‘இமினா’’தி ஹி அயமேவேத்த² விஸேஸோ, தஸ்மா ‘‘த்³வே தி³ட்டி²ஸீஸா’’திஆதி³னா வுத்தனயேனேவ நித்³தா⁴ரேத்வா வேதி³தப்³பா³. உப⁴யம் பன ஏகஜ்ஜ²ம் கத்வா ஆஹ ‘‘ச²த்திம்ஸா’’தி.

நித்³தே³ஸத்தே²னாதி ‘‘ச²யிமே ஆவுஸோ தண்ஹாகாயா’’திஆதி³னித்³தே³ஸபாளியா அத்த²வசனேன. நித்³தே³ஸவித்தா²ராதி தஸ்ஸ ச நித்³தே³ஸஸ்ஸ அட்ட²ஸததண்ஹாவிசரிதவஸேன வித்தா²ரேன. வித்தா²ரஸ்ஸ ச புன ஸங்க³ஹதோதி த்³வீஹி ஆகாரேஹி வித்தா²ரிதஸ்ஸ அட்டா²ரஸதண்ஹாவிசரிதபபே⁴த³ஸ்ஸ ச²ளேவ திஸ்ஸோயேவாதி ச புன ஸங்க³ஹணதோ ச.

விபாகவேத³னா அதி⁴ப்பேதா விஸேஸதோ அத்தானம் அஸ்ஸாதே³தப்³ப³தோ. தமேவ ஹிஸ்ஸா அஸ்ஸாதே³தப்³ப³தம் பகாஸேதும் ‘‘கத²’’ந்திஆதி³ வுத்தம். அஸ்ஸாத³னேனாதி அபி⁴ரதியா. மமாயந்தாதி த⁴னாயந்தா. சித்தகாராதீ³னந்தி ஆதி³-ஸத்³தே³ன இட்ட²வண்ணாரம்மணதா³யகானம் ஸங்க³ஹோ. ஸிப்பஸந்த³ஸ்ஸனகாதீ³னந்தி ஆதி³-ஸத்³தே³ன வேஜ்ஜாதீ³னம் ஸங்க³ஹோ. வேஜ்ஜா ஹி ரஸாயதனோஜாவஸேன தது³பத்த²ம்பி⁴தவஸேன ச த⁴ம்மாரம்மணஸ்ஸ தா³யகா. ஸ்வாயம் ஆதி³-ஸத்³தோ³ ‘‘வீணாவாத³காதீ³’’திஆதி³னா பச்சேகஞ்ச யோஜேதப்³போ³, புத்தம் மமாயந்தாதி புத்தம் ஸம்பியாயந்தா. புத்தோ விய சேத்த² வேத³னா த³ட்ட²ப்³பா³, ஸப்பாயஸப்பிகீ²ராதீ³னி விய வேத³னாய பச்சயபூ⁴தானி இட்ட²ரூபாதி³ஆரம்மணானி, தா⁴தி விய ரூபாதி³ச²ளாரம்மணதா³யகா சித்தகாராத³யோ த³ட்ட²ப்³பா³.

தண்ஹாவாரவண்ணனா நிட்டி²தா.

வேத³னாவாரவண்ணனா

97. சக்கு²ஸம்ப²ஸ்ஸஜா ஏவ வேத³னா அதீதாதி³பே⁴த³பி⁴ன்னா ராஸிவஸேன ஏகஜ்ஜ²ம் க³ஹேத்வா ஏகோ வேத³னாகாயோ யதா² வேத³னாக்க²ந்தோ⁴, ஏவம் ஸோதஸம்ப²ஸ்ஸஜாதி³காதி பாளியம் ‘‘ச²யிமே ஆவுஸோ வேத³னாகாயா’’தி வுத்தந்தி ஆஹ ‘‘வேத³னாகாயாதி வேத³னாஸமூஹா’’தி. சக்கு²ஸம்ப²ஸ்ஸதோ ஜாதா சக்கு²ஸம்ப²ஸ்ஸஜா வேத³னா. ஸா பன உபாதி³ன்னாபி அனுபாதி³ன்னாபி, தது³ப⁴யஸ்ஸபி ஸங்க³ண்ஹந்தேன அத்த²வண்ணனாய கதத்தா ஆஹ ‘‘அயம் தாவேத்த² ஸப்³ப³ஸங்கா³ஹிககதா²’’தி. இதா³னி ‘‘விபாகவிதி⁴ அய’’ந்தி உபாதி³ன்னயேவ க³ண்ஹந்தோ ‘‘விபாகவஸேனா’’திஆதி³மாஹ. மனோத்³வாரே மனோவிஞ்ஞாணதா⁴துஸம்பயுத்தாதி ததா³ரம்மணமனோவிஞ்ஞாணதா⁴துஸம்பயுத்தா.

அவஸேஸானந்தி ஸம்படிச்ச²னாதி³வேத³னானம். உபனிஸ்ஸயாதீ³தி ஆதி³-ஸத்³தே³ன அனந்தராதீ³னம் ஸங்க³ஹோ த³ட்ட²ப்³போ³. அனந்தரானஞ்ஹி அனந்தராதி³வஸேன, இதரேஸம் உபனிஸ்ஸயவஸேன ப²ஸ்ஸோ பச்சயோ ஹோதி, மனோத்³வாரே பன ததா³ரம்மணவேத³னானம் மனோஸம்ப²ஸ்ஸோ உபனிஸ்ஸயவஸேன பச்சயோ. அத்³வாரிகானந்தி த்³வாரரஹிதானம். ந ஹி படிஸந்தி⁴ஆதி³வேத³னானம் கிஞ்சி த்³வாரம் அத்தி². ஸஹஜாதமனோஸம்ப²ஸ்ஸஸமுத³யாதி ஏதேனஸ்ஸ தாஸம் ஸஹஜாதகோடியா பச்சயபா⁴வமாஹ.

வேத³னாவாரவண்ணனா நிட்டி²தா.

ப²ஸ்ஸவாரவண்ணனா

98. சக்கு²ம் நிஸ்ஸாய உப்பன்னோ ஸம்ப²ஸ்ஸோ சக்கு²ஸம்ப²ஸ்ஸோ. பஞ்சவத்து²காதி சக்கா²தி³பஞ்சவத்து²கா சக்கா²தி³பஞ்சவத்து²ஸன்னிஸ்ஸயா. ‘‘உபாதி³ன்னககதா² ஏஸா’’தி பா³வீஸதிக்³க³ஹணம், பவத்திகதா²பா⁴வதோ லோகியக்³க³ஹணம். விபாகமனஸம்பயுத்தப²ஸ்ஸாதி விபாகமனோவிஞ்ஞாணஸம்பயுத்தா ப²ஸ்ஸா. பச்சயுப்பன்னேன விய பச்சயேனபி உபாதி³ன்னகேனேவ ப⁴விதப்³ப³ந்தி ‘‘ச²ன்னம் சக்கா²தீ³னம் ஆயதனான’’ந்தி வுத்தம்.

ப²ஸ்ஸவாரவண்ணனா நிட்டி²தா.

ஸளாயதனவாரவண்ணனா

99. நித³ஸ்ஸனமத்தஞ்சேதம், தஸ்மா யதா² ஏத்த² அரூபலோகாபேக்கா²ய ச²ட்டா²யதனஞ்ச ஸளாயதனஞ்ச ஸளாயதனந்தி ஏகஸேஸோ இச்சி²தப்³போ³, ஏவம் யேஸம் பச்சயுப்பன்னோ உபாதி³ன்னோ, பச்சயோ பன அனுபாதி³ன்னோதிபி இச்சி²தப்³போ³. தேஸம் மதேன பா³ஹிராயதனவஸேனபி ஏகஸேஸோ வேதி³தப்³போ³ ‘‘ச²ட்டா²யதனஞ்ச ஸளாயதனஞ்ச ஸளாயதனஞ்ச ஸளாயதன’’ந்தி. விஸுத்³தி⁴மக்³கோ³பி இமஸ்ஸ ஆக³மஸ்ஸ அத்த²ஸம்வண்ணனாதி ஆஹ ‘‘விஸுத்³தி⁴மக்³கே³…பே… வுத்தனயமேவா’’தி. ஏஸ நயோ அஞ்ஞத்தா²பி விஸுத்³தி⁴மக்³க³க்³க³ஹணே.

ஸளாயதனவாரவண்ணனா நிட்டி²தா.

நாமரூபவாரவண்ணனா

100. நமனலக்க²ணந்தி ஆரம்மணாபி⁴முக²ம் நமனஸபா⁴வம் தேன வினா அபவத்தனதோ. ருப்பனம் ஸீதாதி³விரோதி⁴பச்சயஸன்னிபாதே விஸதி³ஸுப்பத்தி. இமே பன தயோதிஆதி³னா ஸப்³ப³சித்துப்பாத³ஸாதா⁴ரணவஸேனேவ தம்ஸங்கா²ரக்க²ந்த⁴க்³க³ஹணம், தஸ்மா யே யத்த² அஸாதா⁴ரணா, தேபி அத்த²தோ க³ஹிதாயேவாதி த³ஸ்ஸேதி.

உபாதி³யித்வாதி பச்சயே கத்வா. பச்சயகரணமேவ ஹி பச்சயுப்பன்னஸ்ஸ பச்சயபூ⁴தத⁴ம்மானம் உபாதி³யனம். ஸமூஹஸம்ப³ந்தே⁴ ஸாமிவசனம் ஏதந்தி ‘‘ஸமூஹத்தே² ஏதம் ஸாமிவசன’’ந்தி வுத்தம் தேன வினா ஸம்ப³ந்த⁴ஸ்ஸ அபா⁴வதோ. தேனாதி தஸ்மா. தம் ஸப்³ப³ம்பீதி தம் பூ⁴துபாதா³யபபே⁴த³ம் ஸப்³ப³ம்பி ஸத்தவீஸதிவித⁴ம். யஸ்ஸ நாமஸ்ஸாதி சதுவோகாரப⁴வே நாமஸ்ஸ. விஞ்ஞாணம்பி தப்பரியாபன்னமேவ வேதி³தப்³ப³ம். ரூபஸ்ஸாதி ஏகவோகாரப⁴வே ரூபஸ்ஸ. விஞ்ஞாணம் பன பஞ்சவோகாரப⁴வே ஸங்கா²ரவிஞ்ஞாணமேவ. யஸ்ஸ பஞ்சவோகாரப⁴வே நாமரூபஸ்ஸ. தஸ்ஸ வஸேனாதி ஸஹஜாதஸ்ஸ ஸஹஜாதாதி³வஸேன, அனந்தரஸ்ஸ அனந்தராதி³வஸேன, இதரஸ்ஸ உபனிஸ்ஸயாதி³வஸேன தஸ்ஸ நாமஸ்ஸ யதா²ரஹம் தஸ்ஸ தஸ்ஸ விஞ்ஞாணஸ்ஸ பச்சயபா⁴வோ வேதி³தப்³போ³.

நாமரூபவாரவண்ணனா நிட்டி²தா.

விஞ்ஞாணவாரவண்ணனா

101. தேபூ⁴மகவிபாகக்³க³ஹணே காரணம் ஹேட்டா² வுத்தமேவ. ஸங்கா²ரோ யஸ்ஸ விஞ்ஞாணஸ்ஸாதி ஏத்த² அட்ட²விதோ⁴பி காமாவசரபுஞ்ஞாபி⁴ஸங்கா²ரோ ஸோளஸவித⁴ஸ்ஸ காமாவசரவிபாகவிஞ்ஞாணஸ்ஸ, பஞ்சவிதோ⁴பி ரூபாவசரபுஞ்ஞாபி⁴ஸங்கா²ரோ பஞ்சவித⁴ஸ்ஸ ரூபாவசரவிபாகவிஞ்ஞாணஸ்ஸ, த்³வாத³ஸவிதோ⁴பி அபுஞ்ஞாபி⁴ஸங்கா²ரோ ஸத்தவித⁴ஸ்ஸ அகுஸலவிபாகவிஞ்ஞாணஸ்ஸ, சதுப்³பி³தோ⁴பி ஆனேஞ்ஜாபி⁴ஸங்காரோ சதுப்³பி³த⁴ஸ்ஸ அரூபாவசரவிபாகவிஞ்ஞாணஸ்ஸ யதா²ரஹம் படிஸந்தி⁴பவத்தீஸு கம்மபச்சயேன சேவ உபனிஸ்ஸயபச்சயேன ச பச்சயோ ஹோதி. அயமேத்த² ஸங்கே²போ, வித்தா²ரோ பன விஸுத்³தி⁴மக்³கே³ (விஸுத்³தி⁴. 2.620) வுத்தனயேன வேதி³தப்³போ³.

விஞ்ஞாணவாரவண்ணனா நிட்டி²தா.

ஸங்கா²ரவாரவண்ணனா

102. அபி⁴ஸங்க²ரணலக்க²ணோதி அபி⁴ஸஞ்சேதயிதஸபா⁴வோ, ஆயூஹனலக்க²ணோதி அத்தோ². சோபனவஸேனாதி காயவிஞ்ஞத்திஸங்கா²தசோபனவஸேன. தேன பஞ்சத்³வாரிகசேதனா படிக்கி²பதி. வசனபே⁴த³வஸேனாதி வாசானிச்சா²ரணவஸேன. வசீவிஞ்ஞத்திஸமுட்டா²பனவஸேனாதி அத்தோ². யதா²வுத்தா வீஸதி, நவ மஹக்³க³தகுஸலசேதனா சாதி ஏகூனதிம்ஸ மனோஸஞ்சேதனா. ‘‘குஸலானம் உபனிஸ்ஸயவஸேனா’’தி வுத்தம், ஏகச்சானம் ஆரம்மணவஸேனபீதி வத்தப்³ப³ம். ஸஹஜாதாதி³வஸேனாதி ஸஹஜாத-அஞ்ஞமஞ்ஞ-நிஸ்ஸய-ஸம்பயுத்த-அத்தி²-அவிக³தஹேதுவஸேன, அனந்தரானம் அனந்தரஸமனந்தரஅனந்தரூபனிஸ்ஸயனத்தி²விக³தாஸேவனஸேன பச்சயோ. அபி-ஸத்³தே³ன உபனிஸ்ஸயம் ஸங்க³ண்ஹாதி.

ஸங்கா²ரவாரவண்ணனா நிட்டி²தா.

அவிஜ்ஜாவாரவண்ணனா

103. ‘‘து³க்க²ஸச்சேஅஞ்ஞாண’’ந்தி ஸங்கே²பதோ வுத்தமத்த²ம் விவரிதும் ‘‘தத்தா²’’திஆதி³ ஆரத்³த⁴ம். தந்தி அஞ்ஞாணம். ஸதிபி பஹாதப்³ப³த்தே பரிஞ்ஞேய்யத்தவஸேன அந்தோக³த⁴ம். து³க்க²ஸச்சஞ்சஸ்ஸாதி வத்து²ஸங்கா²தம் ஸம்பயுத்தக²ந்த⁴ஸங்கா²தஞ்ச து³க்க²ஸச்சம் அஸ்ஸ அஞ்ஞாணஸ்ஸ. தம் ஹிஸ்ஸ நிஸ்ஸயபச்சயோ ஹோதி. தஸ்ஸாதி து³க்க²ஸச்சஸ்ஸ. யாதா²வலக்க²ணபடிவேத⁴னிவாரணேனாதி ஸங்க²தஅவிபரீதஸபா⁴வபடிவிஜ்ஜ²னஸ்ஸ நிவாரணேன. ஏதேனஸ்ஸ பரிஞ்ஞாபி⁴ஸமயஸங்கா²தஸ்ஸ அரியமக்³க³படிவேத⁴ஸ்ஸ விப³ந்த⁴கபா⁴வமாஹ. ஞாணப்பவத்தியாதி ‘‘இத³ம் து³க்க²ம், ஏத்தகம் து³க்க²’’ந்தி அனுபு³ஜ்ஜ²னாகாராய புப்³ப³பா⁴க³ஞாணப்பவத்தியா. ஏத்தா²தி து³க்க²ஸச்சே. அப்பதா³னேனாதி அவிஸ்ஸஜ்ஜனேன. ஏதேனஸ்ஸா அனுபோ³த⁴ஞாணஸ்ஸபி விப³ந்த⁴கதமாஹ.

தீஹி காரணேஹி வேதி³தப்³ப³ம் அந்தோக³தா⁴பா⁴வதோ. இத⁴ ஸம்பயுத்தக²ந்த⁴வஸேனேவ வத்து²தோ ஸமுத³யே அஞ்ஞாணம் த³ட்ட²ப்³ப³ம். ஏகேனேவாதி இதரம் காரணத்தயம் படிக்கி²பதி. யதி³பி அஞ்ஞாணம் நிரோத⁴மக்³கே³ ஆரம்மணம் ந கரோதி, குதோ தத³ந்தோக³த⁴தப்³ப³த்து²தா, தே பன ஜானிதுகாமஸ்ஸ தப்படிச்சா²த³னவஸேன அனிரோத⁴மக்³கே³ஸு நிரோத⁴மக்³க³க்³கா³ஹஹேதுதாவஸேன ச பவத்தமானம் ‘‘நிரோதே⁴ படிபதா³யஞ்ச அஞ்ஞாண’’ந்தி வுச்சதி. தேனாஹ ‘‘படிச்சா²த³னதோ’’திஆதி³. தஸ்ஸத்தோ² வுத்தோயேவ. க³ம்பீ⁴ரத்தாதி ஸபா⁴வேனேவ க³ம்பீ⁴ரத்தா. அகா³த⁴அபதிட்டா²பா⁴வேன தம்விஸயஸ்ஸ ஞாணஸ்ஸ உப்பாதே³தும் அஸக்குணேய்யத்தா து³த்³த³ஸம். புரிமம் பன ஸச்சத்³வயம். வஞ்சனீயட்டே²னாதி வஞ்சகபா⁴வேன அயாதா²வபா⁴வேன உபட்டா²னதோ து³த்³த³ஸத்தா க³ம்பீ⁴ரம், ந ஸபா⁴வதோ, தஸ்மா தம்விஸயம் அஞ்ஞாணம் உப்பஜ்ஜதி. தத்தா²தி தஸ்மிம் புரிமஸச்சத்³வயே அனிச்சாதி³ஸபா⁴வலக்க²ணஸ்ஸ து³த்³த³ஸத்தா ஏவ நிச்சாதி³விபல்லாஸவஸேன பவத்ததி அஞ்ஞாணந்தி ஆனேத்வா ஸம்ப³ந்தி⁴தப்³ப³ம்.

இதா³னி நித்³தே³ஸவிபா⁴கே³னபி அவிஜ்ஜாய ஸச்சேஸு பவத்திவிபா⁴க³ம் த³ஸ்ஸேதும் ‘‘அபிசா’’திஆதி³ வுத்தம். தத்த² து³க்கே²தி ஏத்தகேன பு⁴ம்மனித்³தே³ஸேன. ஸங்க³ஹதோதி பரிஞ்ஞேய்யதாய து³க்கே²ன ஸங்க³ஹேதப்³ப³தோ. தேன நித்³தா⁴ரணத்த²ம் த³ஸ்ஸேதி. து³க்க²ஸ்மிஞ்ஹி அவிஜ்ஜா நித்³தா⁴ரீயதி, ந அஞ்ஞஸ்மிம். வத்து²தோதி ஆதா⁴ரத்த²ம். து³க்க²ஸன்னிஸ்ஸயா ஹி அவிஜ்ஜா. ஆரம்மணதோதி விஸயத்த²ம் தம் ஆரப்³ப⁴ பவத்தனதோ. கிச்சதோதி ப்³யாபனத்த²ம் சா²த³னவஸேன தம் ப்³யாபேத்வா பவத்தனதோ. இமினா நயேன ஸேஸேஸுபி அத்தோ² வேதி³தப்³போ³. அவிஸேஸதோதி விஸேஸாபா⁴வதோ, வுத்தனயேன து³க்கா²தீ³ஸு பவத்திஆகாரவிஸேஸம் அக்³க³ஹேத்வாதி அத்தோ². ஸபா⁴வதோதி ஸரஸலக்க²ணதோ. சதுன்னம்பி ஸச்சானம் அஜானனஸபா⁴வா ஹி அவிஜ்ஜா. காமராக³ப⁴வராகா³ காமாஸவப⁴வாஸவாதி ஆஹ ‘‘ஸஹஜாதாதி³வஸேனா’’தி. நனு அவிஜ்ஜா ஏவ அவிஜ்ஜாஸவோ, ஸோ கத²ம் அவிஜ்ஜாய பச்சயோதி ஆஹ ‘‘புப்³பு³ப்பன்னா’’திஆதி³.

அவிஜ்ஜாவாரவண்ணனா நிட்டி²தா.

ஆஸவவாரவண்ணனா

104. ஆஸவவாரே ஆஸவ-ஸத்³த³த்தோ² ஆஸவவிசாரோ ச ஹேட்டா² வுத்தோயேவ. கஸ்மா பனாயம் வாரோ வுத்தோ, நனு அவிஜ்ஜாதி³காவ படிச்சஸமுப்பாத³தே³ஸனாதி சோத³னம் ஸந்தா⁴ய ‘‘அயம் வாரோ’’திஆதி³ ஆரத்³த⁴ம். படிச்சஸமுப்பாத³பதே³ஸூதி படிச்சஸமுப்பாத³கோட்டா²ஸேஸு. த்³வாத³ஸகோட்டா²ஸா ஹி ஸத்து² படிச்சஸமுப்பாத³தே³ஸனா. தஸ்ஸாபி பச்சயத³ஸ்ஸனவஸேனாதி நாயம் காபிலானம் மூலபகதி விய அப்பச்சயா, அத² கோ² ஸப்பச்சயாதி அவிஜ்ஜாயபி பச்சயத³ஸ்ஸனவஸேன. ஆஸவஸமுத³யேனாதி அதீதப⁴வே ஆஸவானம் ஸமுத³யேன ஏதரஹி அவிஜ்ஜாய ஸமுத³யோ, ஏதரஹி அவிஜ்ஜாய ஸமுத³யேன அனாக³தே ஆஸவஸமுத³யோதி ஏவம் ஆஸவாவிஜ்ஜானம் பச்சயபச்சயுப்பன்னகபா⁴வேன அபராபரம் பவத்தமானம் ஆதி³கோடிஅபா⁴வேனேவ தன்னிமித்தஸ்ஸ ஸம்ஸாரஸ்ஸ ஆதி³கோடிஅபா⁴வதோ அனமதக்³க³தாஸித்³தி⁴ வேதி³தப்³பா³.

த்³வத்திம்ஸ டா²னானீதி த்³வத்திம்ஸ ஸச்சப்படிவேத⁴காரணானி, த்³வத்திம்ஸ வா சதுஸச்சகம்மட்டா²னானி. இமம்ஹா ஸம்மாதி³ட்டி²ஸுத்தாதி யாய அரியஸாவகோ ஸம்மாதி³ட்டி² நாம ஹோதி, ஸா அரியா ஸம்மாதி³ட்டி² ஏத்த² வுத்தாதி ஸம்மாதி³ட்டி²ஸுத்தம், இதோ ஸம்மாதி³ட்டி²ஸுத்ததோ.

சதுஸச்சபரியாயேஹீதி சதுஸச்சாதி⁴க³மகாரணேஹி. அரஹத்தபரியாயேஹீதி ‘‘ஸோ ஸப்³ப³ஸோ ராகா³னுஸயம் பஹாயா’’திஆதி³னா அரஹத்தாதி⁴க³மகாரணேஹி. தேனாஹ ‘‘சதுஸட்டி²யா காரணேஹீ’’தி.

ஆஸவவாரவண்ணனா நிட்டி²தா.

ஸம்மாதி³ட்டி²ஸுத்தவண்ணனாய லீனத்த²ப்பகாஸனா ஸமத்தா.