4. பத³ட்டா²னஹாரவிப⁴ங்க³வண்ணனா

22. தேஸம் தேஸந்தி அனவஸேஸபரியாதா³னம், தேன யே ஸுத்தே வுத்தா ச த⁴ம்மா, யே ச தேஸம் காரணபூ⁴தம், தேஸம் ஸப்³பே³ஸம்பீதி வுத்தம் ஹோதி. ஸப்³ப³த⁴ம்மயாதா²வஅஸம்படிவேதோ⁴தி இமமத்த²ம் த³ஸ்ஸேதும் ‘‘கத்த² பன ஸோ’’திஆதி³ வுத்தம்.

பியாயிதப்³ப³ஜாதியந்தி பேமனீயஸபா⁴வம். மிச்சா²படிபதா³தி பமாதா³பத்தி, மிச்சா²பி⁴னிவேஸோ வா. ஏகவாரம் உப்பன்னாபி பாணாதிபாதசேதனா வேரப்பஸவனதோ தோ³ஸஸ்ஸ, ஏகவாரம் உப்பன்னாபி பமாதா³பத்தி, மிச்சா²பி⁴னிவேஸோ வா மோஹஸ்ஸ உப்பத்திகாரணந்தி பாளியம் அவுத்தம்பி நயதோ நித்³தா⁴ரேதப்³ப³ந்தி த³ஸ்ஸேந்தோ ‘‘தோ³ஸஸ்ஸ…பே… இமினாவ நயேன அத்தோ² வேதி³தப்³போ³’’தி ஆஹ. நிமித்தத்த²க்³க³ஹணலக்க²ணம் வண்ணஸண்டா²னம், அனுப்³யஞ்ஜனத்த²க்³க³ஹணலக்க²ணம் அனுப்³யஞ்ஜனந்தி ‘‘நிமித்தானுப்³யஞ்ஜனக்³க³ஹணலக்க²ணா’’தி வுத்தம். தத்த² தத்த² நிமித்தம் இத்தி²புரிஸனிமித்தம். அனுப்³யஞ்ஜனம் ஹத்த²பாத³ஹஸிதகதி²தாதி³. ப²ஸ்ஸோ பச்சயோ ஏதிஸ்ஸாதி ப²ஸ்ஸபச்சயா, தம்பா⁴வோ ப²ஸ்ஸபச்சயதா. அஸ்ஸாதே³தி ஏதாயாதி அஸ்ஸாதோ³, தண்ஹா.

வத்தூ²னி ஞேய்யத⁴ம்மோதி ஆஹ ‘‘வத்து²அவிப்படிபத்தி விஸயஸபா⁴வபடிவேதோ⁴’’தி. இதா⁴தி⁴ப்பேதம் ஸம்மாபடிபத்திம் த³ஸ்ஸேதும் ‘‘ஸீலஸமாதி⁴ஸம்பதா³ன’’ந்தி வுத்தம். ஏகதே³ஸுபலக்க²ணவஸேன, வண்ணக³ந்த⁴ராகி³ஸப்பாயவஸேன வா பாளியம் ‘‘வினீலகவிபுப்³ப³கக்³க³ஹணலக்க²ணா அஸுப⁴ஸஞ்ஞா’’தி வத்வா ‘‘தஸ்ஸா நிப்³பி³தா³பத³ட்டா²ன’’ந்தி வுத்தம் நிப்³பி³த³ம் த³ஸ்ஸேந்தோ ‘‘நிப்³பி³தா³’’திஆதி³ வுத்தம். தத்த² பரிதஸ்ஸனதோ விஸேஸேதும் ‘‘ஞாணேனா’’தி விஸேஸிதம். ததா² பவத்தந்தி நிப்³பி³த³னாகாரேன பவத்தனம்.

யோனிஸோ உம்முஜ்ஜந்தியா விதே³ஹரஞ்ஞோ தீ⁴தாய ருசாய ஜாதிஸ்ஸரஞாணம் கம்மஸ்ஸகதஞ்ஞாணஸ்ஸ காரணம் அஹோஸி, ந பன அஸப்புரிஸூபனிஸ்ஸயதோ, அயோனிஸோ உம்முஜ்ஜந்தஸ்ஸ தஸ்ஸேவ ரஞ்ஞோ ஸேனாபதினோ அலாதஸ்ஸ பீ³ஜகஸ்ஸ தா³ஸஸ்ஸாதி இமமத்த²ம் த³ஸ்ஸேந்தோ ‘‘இமஸ்ஸ ச…பே… உதா³ஹரிதப்³போ³’’தி ஆஹ. ஸோதி பஸாதோ³. அவத்தா²விஸேஸோதி ஸம்பயுத்தத⁴ம்மானம் அனாவிலபா⁴வலக்கி²தோ அவத்தா²பே⁴தோ³. ஆயதனக³தோதி டா²னக³தோ, ரதனத்தயவிஸயோதி அத்தோ². ‘‘காயோ’’திஆதி³னா அவத்தா²விஸேஸேன வினா ஸபா⁴வஸித்³த⁴மேவ பத³ட்டா²னம் த³ஸ்ஸேதி.

இமஸ்மிம் ச டா²னே பாளியம் புப்³பே³ யேஸம் த⁴ம்மானம் பத³ட்டா²னம் நித்³தா⁴ரிதம், தே த⁴ம்மா யேஸம் த⁴ம்மானம் பத³ட்டா²னானி ஹோந்தி, தே த³ஸ்ஸேதும் ‘‘அபரோ நயோ’’திஆதி³ ஆரத்³த⁴ந்தி வேதி³தப்³ப³ம். அஸ்ஸாத³மனஸிகாரோ அயோனிஸோமனஸிகாரலக்க²ணோ வுத்தோ நித³ஸ்ஸனமத்தஅத்தோ²தி வேதி³தப்³போ³, யேபு⁴ய்யேன ஸத்தானம் லோப⁴வஸேன அயோனிஸோமனஸிகாரா ஸம்வத்தந்தீத்தி த³ஸ்ஸனத்த²ம் வா ஏவம் வுத்தம். உபபத்தி ஏவ ஓபபச்சயம், தஸ்ஸ பா⁴வோ ஓபபச்சயிகந்தி ஆஹ ‘‘உபபத்திப⁴வபா⁴வேனா’’தி. வவத்தி²தபா⁴வோதி வவத்தி²தபா⁴வோ ரூபஸ்ஸ த³ஸ்ஸனாதி³படினியதாரம்மணகிச்சதா. ப⁴வஸ்ஸ அங்கா³னீதி ப⁴வஸ்ஸ காரணானி. து³தியே அங்கா³னீதி அவயவா, கம்மவட்டம்பி வா காரணங்க³பா⁴வேன யோஜேதப்³ப³ம்.

கம்மட்டா²னஸ்ஸாதி பா⁴வனாய ப்³ரூஹனா வட்³ட⁴னா. தேஸூதி தித்த²ஞ்ஞுதாதீ³ஸு. கல்யாணமித்தஸ்ஸ ஸம்மதே³வ பயிருபாஸனாயபீதி தம் நிஸ்ஸாய லத்³தே⁴ன ஸப்³பா³ய த⁴ம்மஸ்ஸவனேன த⁴ம்முபஸம்ஹிதம் பாமோஜ்ஜம் ஹோதீதி தித்த²ஞ்ஞுதா பீதஞ்ஞுதாய பத³ட்டா²னம். ஏவம் யாய விமுத்தியா ஸதி விமுத்திஞாணத³ஸ்ஸனம் ஹோதீதி ஸா தஸ்ஸ பத³ட்டா²னந்தி அயமத்தோ² பாகடோதி ஆஹ ‘‘புரிமானம்…பே… ஸுவிஞ்ஞேய்யோ ஏவா’’தி. ஸஹ அதி⁴ட்டா²னேனாதி ஞாதபரிஞ்ஞாய ஸத்³தி⁴ம். ஞாதபரிஞ்ஞா ஹி தீரணபரிஞ்ஞாய அதி⁴ட்டா²னம். ஸேஸம் ஸுவிஞ்ஞேய்யமேவ.

பத³ட்டா²னஹாரவிப⁴ங்க³வண்ணனா நிட்டி²தா.