12. ஓதரணஹாரவிப⁴ங்க³வண்ணனா

42. இந்த்³ரியேஹீதி கரணே கரணவசனம் ‘‘மக்³கே³ன க³ச்ச²தீ’’திஆதீ³ஸு விய, ‘‘ப²ரஸுனா சி²ந்த³தீ’’தி ஏவமாதீ³ஸு விய ச. ஓதரணாதி அனுப்பவேஸனா.

பஞ்ஞாக்க²ந்தே⁴ ஸங்க³ண்ஹனவஸேன ஸம்மாஸங்கப்போ வியாதி யோஜனா. அதி⁴சித்தஅனுயுத்தானம் ஸத்³த³ஹனுஸ்ஸஹனுபட்டா²னஸமாத³ஹனேஹி ஸத்³தா⁴தீ³ஸு உபகரோந்தேஸு ஏவ பஞ்ஞா த³ஸ்ஸனகிச்சம் ஸாதே⁴தீதி த³ஸ்ஸேந்தோ ‘‘ஸத்³தா⁴..பே… வுத்தானீ’’தி ஆஹ. நோ ச ப⁴வங்கா³தி தேஸம் ஸங்கா²ரானம் பவத்திகாரணதாபா⁴வம் த³ஸ்ஸேதி.

43. ததா² வுத்தோதி ‘‘நிஸ்ஸயோ’’தி வுத்தோ. சேதனாஸீஸேன தண்ஹம் ஏவ வத³தி சேதனாஸஹசரணதோ.

ரத்தஸ்ஸாதி மக்³கே³ன அஸமுச்சி²ன்னராக³ஸ்ஸ. யேன புக்³க³லோ ‘‘ரத்தோ’’தி வுச்சதி, தஸ்ஸ ராக³ஸ்ஸ ஸம்ப³ந்தி⁴னீ ஸுகா² வேத³னா வுத்தா தத்த² தஸ்ஸ அனுஸயனதோ. தேனாஹ ‘‘ஸுகா²ய…பே… வுத்த’’ந்தி. ஏஸ நயோ ஸேஸேஸுபி. தேனாஹ ‘‘ததா²’’திஆதி³.

தானி ஏவ இந்த்³ரியானீதி ஸுக²ஸோமனஸ்ஸுபேக்கி²ந்த்³ரியானி. ‘‘ஸங்கா²ரபரியாபன்னானீ’’தி வசனம் ஸந்தா⁴யாஹ ‘‘இத⁴ வேத³னாஸீஸேன சேதனா வுத்தா’’தி. ந ஹி வேத³னா ஸங்கா²ரக்க²ந்த⁴பரியாபன்னா ஹோதி. தண்ஹாய, தி³ட்டி²யாதி ச உபயோகே³ கரணவசனந்தி த³ஸ்ஸேந்தோ ‘‘தண்ஹாயா’’திஆதி³மாஹ. இதா³னி உபயோக³வஸேனேவ ‘‘தண்ஹாயா’’திஆதீ³னம் அத்த²ம் த³ஸ்ஸேதும் ‘‘யதா² வா’’திஆதி³மாஹ. தத்த² ஸேஸத⁴ம்மானந்தி தண்ஹாவஜ்ஜிதஅவிஸிட்ட²த⁴ம்மானம். தண்ஹாய நிஸ்ஸயபா⁴வேதி யதா³ தண்ஹா தேஸம் நிஸ்ஸயோ ஹோதி.

தண்ஹாய ஸேஸத⁴ம்மானம் பச்சயபா⁴வேதி யதா³ ஸேஸத⁴ம்மா தண்ஹாபச்சயா ஹோந்தி. ‘‘கரஜகாயஸன்னிஸ்ஸிதா’’தி இமினா வேத³னாதி³க்க²ந்த⁴த்தயனிஸ்ஸிதாபி க³ஹிதா காயப்பஸ்ஸத்³தி⁴பா⁴வதோ. காரணபா⁴வந்தி பரம்பரஹேதுபா⁴வம். தண்ஹாதி³ட்டி²உபயேனாதி தி³ட்டி²உபயேன ச தி³ட்டி²ஸஹக³ததண்ஹாஉபயேன ச.

‘‘ஆக³தீதி இதா⁴க³தி, க³தீதி பேச்சப⁴வோ’’தி பத³த்³வயேன வுத்தமேவத்த²ம் பாகடதரம் காதும் பாளியம் ‘‘ஆக³திக³தீபி ந ப⁴வந்தீ’’தி வுத்தம். இத⁴ ஹுரந்தி த்³வாராரம்மணத⁴ம்மா த³ஸ்ஸிதா ஆஸன்னதூ³ரபா⁴வேஹி த்³வாராரம்மணேஹி வினிவத்தேத்வா க³ஹிதத்தா. இத⁴ த்³வாரப்பவத்தத⁴ம்மா ‘‘உப⁴யமந்தரேனா’’தி பத³ஸ்ஸ அத்த²பா⁴வேன வுத்தா. சதுப்³யூஹஹாரே பன அனிந்த்³ரியப³த்³த⁴ரூபத⁴ம்மா ததா² வுத்தா. காரணபூ⁴தேன அனந்தரபச்சயபூ⁴தேன, உபனிஸ்ஸயபச்சயபூ⁴தேன ச. யே த⁴ம்மா உபாதா³ய ‘‘அத்தா’’தி ஸமஞ்ஞா, தேஸம் விஞ்ஞாணாதி³த⁴ம்மானம் அபா⁴வேன அனுப்பாத³த⁴ம்மதம் ஆபாதி³தத்தாதி அத்தோ². ‘‘அனிஸ்ஸிதஸ்ஸ சலிதம் நத்தீ²’’திஆதி³னா படிலோமதோ பச்சயபா⁴வோ த³ஸ்ஸிதோதி த³ஸ்ஸேந்தோ பாளியம் ‘‘ஏஸேவந்தோ து³க்க²ஸ்ஸாதி படிச்சஸமுப்பாதோ³’’தி வத்வா நனு ‘‘அவிஜ்ஜாபச்சயா ஸங்கா²ரா’’திஆதி³கோ படிச்சஸமுப்பாதோ³தி சோத³னம் ஸந்தா⁴ய யதா²வுத்தஸ்ஸ படிச்சஸமுப்பாத³பா⁴வம் த³ஸ்ஸேதும் ‘‘ஸோ து³விதோ⁴’’திஆதி³னா லோகியலோகுத்தரவஸேன படிச்சஸமுப்பாதோ³ விப⁴த்தோ. தத³த்த²தாயாதி வீதராக³விமுத்திஅத்த²தாய. தப்³பா⁴வந்தி லோகுத்தரபடிச்சஸமுப்பாத³பா⁴வம்.

ஓதரணஹாரவிப⁴ங்க³வண்ணனா நிட்டி²தா.