10. வேவசனஹாரவிப⁴ங்க³வண்ணனா

37. அஞ்ஞமஞ்ஞேஹீதி அஞ்ஞேஹி அஞ்ஞேஹி. ஆயதிந்தி பச்சவேக்க²ணகாலே. கத²ஞ்சீதி யேன கேனசி பகாரேன, பட²மம் வுத்தேன பரியாயேன அப்படிவிஜ்ஜ²ந்தோ அபரேன பரியாயேன படிவிஜ்ஜே²ய்யாதி அதி⁴ப்பாயோ. பரியாயவசனம் நித்³தி³ஸதீதி ஸம்ப³ந்தோ⁴. ஏவம் ஸப்³ப³த்த². தஸ்மிம் க²ணேதி பரியாயவசனஸ்ஸ வுத்தக்க²ணே. விக்கி²த்தசித்தானந்தி ஆரம்மணந்தரேஹி விவித⁴கி²த்தசித்தானம். அஞ்ஞவிஹிதானந்தி அஞ்ஞம் சிந்தேந்தானம். கஸ்மா பன அஞ்ஞேன பரியாயேன தத³த்தா²வபோ³த⁴னம், நனு தேன வுத்தே த³ள்ஹீகரணம் ஹோதீதி சோத³னம் ஸந்தா⁴யாஹ ‘‘தேனேவா’’திஆதி³. தத்த² தத³ஞ்ஞேஸந்தி தேஹி விக்கி²த்தசித்தாதீ³ஹி அஞ்ஞேஸம், யேஹி பட²மம் வசனம் ஸம்மதே³வ க³ஹிதம். தத்தா²தி வுத்தவசனேனேவ புனப்புனம் வசனே. அதி⁴க³தஅன்வத்த²தாய புனருத்தி பரிவஜ்ஜனத்த²ம் விஸேஸனபா⁴வேன தாஹி தாஹி ஸஞ்ஞாஹிபி அயம்பி ஸத்³தோ³ இமஸ்ஸத்த²ஸ்ஸ வாசகோ, அயம்பி ஸத்³தோ³ இமஸ்ஸத்த²ஸ்ஸ வாசகோதி பஞ்ஞாபனேஹி. தே³ஸேதப்³ப³ஸ்ஸ தஸ்ஸ தஸ்ஸ அத்த²ஸ்ஸ அத்தனோ சித்தே உபனிப³ந்த⁴னம் ட²பனம். தத்தா²தி த⁴ம்மனிருத்திபடிஸம்பி⁴தா³யம். பீ³ஜாவாபனம் ஹேதுஸம்பாத³னம்.

ஏவம் ப⁴க³வதோ பரியாயதே³ஸனாயம் அனேகானி பயோஜனானி வத்வா இதா³னி அத்தனோ ஸம்மாஸம்பு³த்³த⁴தாய ஏவம் ததா²க³தா பு³த்³த⁴லீலாய அனேகேஹி பரியாயேஹி த⁴ம்மம் தே³ஸேந்தீதி த³ஸ்ஸேந்தோ ‘‘கிம் ப³ஹுனா’’திஆதி³மாஹ.

பாளியம் ‘‘பிஹா நாம யா வத்தமானஸ்ஸ அத்த²ஸ்ஸ பத்த²னா’’தி பச்சுப்பன்னவிஸயதம் த³ஸ்ஸேத்வா புன அனாக³தவிஸயதம் த³ஸ்ஸேதும் ‘‘ஸேய்யதரம் வா’’திஆதி³ வுத்தந்தி ‘‘அனாக³தபச்சுப்பன்னத்த²விஸயா தண்ஹா பிஹா’’தி ஆஹ.

அத்த²னிப்ப²த்திபடிபாலனாதி இமஸ்மிம் வா பதே³ பிஹாய ஏவத்த²வஸேன அனாக³தபச்சுப்பன்னத்த²விஸயபா⁴வதீ³பனதோ.

த⁴ம்மாரம்மணேனேவ ஸங்க³ஹிதா ‘‘த⁴ம்மாரம்மண’’ந்த்வேவ க³ஹணம் க³தா. சதுவீஸதி பதா³னீதி ஏத்த² கே³ஹஸிததோ³மனஸ்ஸூபவிசாராதீ³னம் சதுன்னம் ச²க்கானம் வஸேன சதுவீஸ கோட்டா²ஸா.

38. ஸாயேவ பத்த²னாகாரேன த⁴ம்மனந்தீ³திஆதி³மாஹாதி ஏத்த² அயமத்தோ² – ஸா ஏவ பத்த²னாகாரேன பவத்தியா ஆஸாதி³பரியாயேன வுத்தா தண்ஹா ரூபாதி³த⁴ம்மேஸு நந்த³னட்டே²ன த⁴ம்மனந்தீ³. தேஸம் ஏவ பியாயனட்டே²ன த⁴ம்மபேமம். கி³லித்வா பரினிட்ட²பேத்வா டா²னதோ த⁴ம்மஜ்ஜோ²ஸானந்தி.

இமினாபீதி ந கேவலம் ‘‘பஞ்ஞா பஜானனா’’திஆதி³ஆவேணிகபரியாயேனேவ வேவசனம் வத்தப்³ப³ம், அத² கோ² இமினா ஆதி⁴பதேய்யாதி³ஸாதா⁴ரணபரியாயேனபி வேவசனம் வத்தப்³ப³ந்தி அத்தோ². இமினாவ நயேனாதி ஏதேன பரியாயவசனேன. ந ஹி தே³ஸனத்த²ஸாத⁴னம் ‘‘இதிபி ஸோ ப⁴க³வா’’திஆதி³பாளினயத³ஸ்ஸனந்தி த³ஸ்ஸேதி. ப³லனிப்ப²த்திக³தோதிஆதீ³ஸு த³ஸஸு ததா²க³தப³லேஸு நிப்ப²த்திம் பாரிபூரிம் க³தோ. ஸம்போ³தி⁴பஹானந்தராயதே³ஸனா விஸேஸசோத³னாஸு விஸாரத³பா⁴வஸங்கா²தானி சத்தாரி ஞாணானி பத்தோ அதி⁴க³தோதி வேஸாரஜ்ஜப்பத்தோ.

லோப⁴ஜ்ஜா²ஸயாதி³அஜ்ஜா²ஸயம் விஸேஸேன அதிவத்தோதி அஜ்ஜா²ஸயவீதிவத்தோ. அதீதஹேதுஸங்கே²பாதி³ஸங்கே²பவிரஹிததாய அஸங்கே²பஸங்கா²தம் நிப்³பா³னம், அகுப்பத⁴ம்மதாய கு³ணேஹி வா அஸங்கே²பம் அஸங்க்²யேய்யம் க³தோ உபக³தோதி அஸங்கே²பக³தோ. ஸேஸம் ஸுவிஞ்ஞேய்யமேவ. உத்³தே⁴ய்யந்தி உத்³த⁴ரிதப்³ப³ம்.

த⁴ம்மானுஸ்ஸதியம் ஏவம் அத்தோ² த³ட்ட²ப்³போ³தி ஸம்ப³ந்தோ⁴. ஸம்ஸாரது³க்க²தோ பாதி, ஸந்தேன ஸுகே²ன ரமேதி சாதி வா பாரம்.

அபூ⁴தபுப்³ப³த்தாதி அனுப்பன்னபுப்³ப³த்தா, தேனஸ்ஸ நிச்சதம்வ விபா⁴வேதி கேனசி தே³வதோபஸக்³கா³தி³னா அனுபஸஜ்ஜனீயத்தா அனுபஸட்ட²த்தா.

‘‘து³ப்பஸ்ஸ’’ந்திபி பாளி, து³ரதி⁴க³மந்தி அத்தோ². கு³ணஸோபா⁴ஸுரபி⁴பா⁴வேனாதி கு³ணேஹி ஸோபா⁴ய, ஸுக³ந்தி⁴பா⁴வேன ச.

யதா² அக்க²ணவேதீ⁴ புக்³க³லோ ஸிப்பனிப்ப²த்தியா ரத்தந்த⁴காரதிமிஸாய அசிரக்க²ணாலோகேன அதிஸுகு²மம்பி தூ³ரக³தம் லக்க²ம் விஜ்ஜ²தி, ஏவம் அரியஸாவகோ ஸீலஸம்பத்தியா அதிஸுகு²மம் நிப்³பா³னம் சதுஸச்சத⁴ம்மம் ஏகபடிவேதே⁴னேவ படிவிஜ்ஜ²தீதி ஆஹ ‘‘ஸிப்பஞ்ச ஸீலம் அக்க²ணவேதி⁴தாயா’’தி. லோகிகந்தி நித³ஸ்ஸனமத்தம் த³ட்ட²ப்³ப³ம் லோகுத்தரத⁴ம்மஓலோகனஸ்ஸாபி அதி⁴ட்டா²னபா⁴வதோ.

வேவசனஹாரவிப⁴ங்க³வண்ணனா நிட்டி²தா.