4. பாசித்தியனித்³தே³ஸோ

30. ஸம்பஜானமுஸாவாதே³, பாசித்தியமுதீ³ரிதம்;

பி⁴க்கு²ஞ்ச ஓமஸந்தஸ்ஸ, பேஸுஞ்ஞஹரணேபி ச.

31. ட²பேத்வா பி⁴க்கு²னிம் பி⁴க்கு²ம், அஞ்ஞேன பிடகத்தயம்;

பத³ஸோத⁴ம்மம் ப⁴ணந்தஸ்ஸ, பாசித்தியமுதீ³ரிதம்.

32. அனுபஸம்பன்னேனேவ, ஸயித்வான திரத்தியம்;

பாசித்தி ஸஹஸேய்யாய, சதுத்த²த்த²ங்க³தே புன.

33. இத்தி²யா ஏகரத்தம்பி, ஸேய்யம் கப்பயதோபி வா;

தே³ஸேந்தஸ்ஸ வினா விஞ்ஞும், த⁴ம்மஞ்ச ச²ப்பது³த்தரிம்.

34. து³ட்டு²ல்லம் பி⁴க்கு²னோ வஜ்ஜம், பி⁴க்கு²ஸம்முதியா வினா;

அபி⁴க்கு²னோ வத³ந்தஸ்ஸ, பாசித்தியமுதீ³ரிதம்.

35. க²ணேய்ய வா க²ணாபேய்ய, பத²விஞ்ச அகப்பியம்;

பூ⁴தகா³மம் விகோபேய்ய, தஸ்ஸ பாசித்தியம் ஸியா.

36. அஜ்ஜோ²காஸே து மஞ்சாதி³ம், கத்வா ஸந்த²ரணாதி³கம்;

ஸங்கி⁴கம் யாதி பாசித்தி, அகத்வாபுச்ச²னாதி³கம்.

37. ஸங்கி⁴காவஸதே² ஸேய்யம், கத்வா ஸந்த²ரணாதி³கம்;

அகத்வாபுச்ச²னாதி³ம் யோ, யாதி பாசித்தி தஸ்ஸபி.

38. ஜானம் ஸப்பாணகம் தோயம், பாசித்தி பரிபு⁴ஞ்ஜதோ;

அஞ்ஞாதிகா பி⁴க்கு²னியா, ட²பேத்வா பாரிவத்தகம்.

39. சீவரம் தே³தி பாசித்தி, சீவரம் ஸிப்³ப³தோபி ச;

அதிரித்தம் அகாரேத்வா, பவாரேத்வான பு⁴ஞ்ஜதோ.

40. பி⁴க்கு²ம் ஆஸாத³னாபேக்கோ², பவாரேதி பவாரிதம்;

அனதிரித்தேன பு⁴த்தே து, பாசித்தியமுதீ³ரிதம்.

41. ஸன்னிதி⁴போ⁴ஜனம் பு⁴ஞ்ஜே, விகாலே யாவகாலிகம்;

பு⁴ஞ்ஜதோ வாபி பாசித்தி, அகி³லானோ பணீதகம்.

42. விஞ்ஞாபேத்வான பு⁴ஞ்ஜேய்ய, ஸப்பிப⁴த்தாதி³கம்பி ச;

அப்படிக்³க³ஹிதம் பு⁴ஞ்ஜே, த³ந்தகட்டோ²த³கம் வினா.

43. தித்தி²யஸ்ஸ த³தே³ கிஞ்சி, பு⁴ஞ்ஜிதப்³ப³ம் ஸஹத்த²தோ;

நிஸஜ்ஜம் வாரஹோ கப்பே, மாதுகா³மேன சேகதோ.

44. ஸுராமேரயபானேபி, பாசித்தியமுதீ³ரிதம்;

அங்கு³லிபதோத³கே சாபி, ஹஸத⁴ம்மேபி சோத³கே.

45. அனாத³ரேபி பாசித்தி, பி⁴க்கு²ம் பீ⁴ஸயதோபி வா;

ப⁴யானகம் கத²ம் கத்வா, த³ஸ்ஸேத்வா வா ப⁴யானகம்.

46. ட²பேத்வா பச்சயம் கிஞ்சி, அகி³லானோ ஜலேய்ய வா;

ஜோதிம் ஜலாபயேய்யாபி, தஸ்ஸ பாசித்தியம் ஸியா.

47. கப்பபி³ந்து³மனாதா³ய, நவசீவரபோ⁴கி³னோ;

ஹஸாபேக்க²ஸ்ஸ பாசித்தி, பி⁴க்கு²னோ சீவராதி³கம்.

48. அபனேத்வா நிதே⁴ந்தஸ்ஸ, நிதா⁴பேந்தஸ்ஸ வா பன;

ஜானம் பாணம் மாரேந்தஸ்ஸ, திரச்சா²னக³தம்பி ச.

49. சா²தே³துகாமோ சா²தே³தி, து³ட்டு²ல்லம் பி⁴க்கு²னோபி ச;

கா³மந்தரக³தஸ்ஸாபி, ஸம்விதா⁴யித்தி²யா ஸஹ.

50. பி⁴க்கு²ம் பஹரதோ வாபி, தலஸத்திகமுக்³கி³ரே;

சோதே³தி வா சோதா³பேதி, க³ருகாமூலகேனபி.

51. குக்குச்சுப்பாத³னே சாபி, ப⁴ண்ட³னத்தா²யுபஸ்ஸுதிம்;

ஸோதும் ப⁴ண்ட³னஜாதானம், யாதி பாசித்தியம் ஸியா.

52. ஸங்க⁴ஸ்ஸ லாப⁴ம் பரிணாமிதம் து,

நாமேதி யோ தம் பரபுக்³க³லஸ்ஸ;

புச்ச²ம் அகத்வாபி ச ஸந்தபி⁴க்கு²ம்,

பாசித்தி கா³மஸ்ஸ க³தே விகாலேதி.