1. பாராஜிகனித்³தே³ஸோ

1. ஸம் நிமித்தம் பவேஸந்தோ, பி⁴க்கு² மக்³க³த்தயே சுதோ;

பவேஸனட்டி²துத்³தா⁴ர-பவிட்டே² சேபி ஸாதி³யம்.

2. அதி³ன்னம் மானுஸம் ப⁴ண்ட³ம், தே²ய்யாயேகேன ஆதி³யம்;

பஞ்சவீஸாவஹாரேஸு, க³ருகம் சே சுதோ ப⁴வே.

3. ஆதி³யந்தோ ஹரந்தோவ-ஹரந்தோபிரியாபத²ம்;

விகோபேந்தோ ததா² டா²னா, சாவேந்தோபி பராஜிகோ.

4. தத்த² நானேகப⁴ண்டா³னம், பஞ்சகானம் வஸா பன;

அவஹாரா த³ஸஞ்சேதி, விஞ்ஞாதப்³பா³ விபா⁴வினா.

5. ஸாஹத்தா²ணத்திகோ சேவ, நிஸ்ஸக்³கோ³ சாத்த²ஸாத⁴கோ;

து⁴ரனிக்கே²பனஞ்சேவ, இத³ம் ஸாஹத்த²பஞ்சகம்.

6. புப்³ப³ஸஹப்பயோகோ³ ச, ஸம்விதா⁴ஹரணம்பி ச;

ஸங்கேதகம்மம் நிமித்தம், புப்³ப³ப்பயோக³பஞ்சகம்.

7. தே²ய்யாபஸய்ஹபரிகப்ப-ப்படிச்ச²ன்னகுஸாதி³கா;

அவஹாரா இமே பஞ்ச, விஞ்ஞாதப்³பா³ விபா⁴வினா.

8. மனுஸ்ஸபாணம் பாணோதி, ஜானம் வத⁴கசேதஸா;

ஜீவிதா யோ வியோஜேதி, ஸாஸனா ஸோ பராஜிதோ.

9. ஜா²னாதி³பே⁴த³ம் ஹத³யே அஸந்தம்,

அஞ்ஞபதே³ஸஞ்ச வினாதி⁴மானம்;

மனுஸ்ஸஜாதிஸ்ஸ வதே³ய்ய பி⁴க்கு²,

ஞாதக்க²ணே தேன பராஜிகோ ப⁴வேதி.