9. படிக்³கா³ஹனித்³தே³ஸவண்ணனா

106. தா³தும் காமேதீதி தா³துகாமோ, தஸ்ஸ அபி⁴ஹாரோ ஈஸகம்பி ஓணமனாதி³னாபி⁴ஹரணந்தி தப்புரிஸோ, ஹத்த²ஸ்ஸ பாஸோ ஹத்த²பாஸோ. ருள்ஹீவஸேன து அட்³ட⁴தேய்யஹத்தோ² ஹத்த²பாஸோ நாம. ஸோ ச ஸசே பி⁴க்கு² நிஸின்னோ ஹோதி, ஆஸனஸ்ஸ பச்சி²மந்ததோ பட்டா²ய, ஸசே டி²தோ, பண்ஹிஅந்ததோ பட்டா²ய, ஸசே நிபன்னோ, யேன பஸ்ஸேன நிபன்னோ, தஸ்ஸ பாரிமந்ததோ பட்டா²ய தா³யகஸ்ஸ நிஸின்னஸ்ஸ டி²தஸ்ஸ வா ட²பேத்வா பஸாரிதஹத்த²ம் யம் ஆஸன்னதரம் அங்க³ம், தஸ்ஸ ஓரிமந்தேன பரிச்சி²ந்தி³த்வா வேதி³தப்³போ³. ஏரணக்க²மந்தி தா²மமஜ்ஜி²மேன புரிஸேன ஏரணஸ்ஸ உக்கி²பனஸ்ஸ க²மம் யோக்³க³ம். வத்து²ஸத்³தா³பேக்க²ம் நபும்ஸகத்தம். திதா⁴ தே³ந்தேதி காயகாயப்படிப³த்³த⁴னிஸ்ஸக்³கி³யானம் வஸேன தீஹி பகாரேஹி தா³யகே த³த³மானே. தத்த² யேன கேனசி ஸரீராவயவேன அந்தமஸோ பாத³ங்கு³லியாபி தீ³யமானம் காயேன தி³ன்னம் நாம ஹோதி, கடச்சு²ஆதீ³ஸு யேன கேனசி தீ³யமானம் காயப்படிப³த்³தே⁴ன, காயதோ பன காயப்படிப³த்³த⁴தோ வா மோசேத்வா ஹத்த²பாஸே டி²தஸ்ஸ காயேன வா காயப்படிப³த்³தே⁴ன வா பாதியமானம் நிஸ்ஸக்³கி³யேன பயோகே³ன தி³ன்னம் நாம. த்³விதா⁴ கா³ஹோதி காயகாயப்படிப³த்³தா⁴னம் வஸேன த்³வீஹி பகாரேஹி யேஹி கேஹிசி தீ³யமானஸ்ஸ க³ஹணம். ஏவம் படிக்³க³ஹோ பஞ்சங்கோ³தி யோஜனா. பஞ்சங்கோ³தி பஞ்ச அங்கா³னி யஸ்ஸாதி ப³ஹுப்³பீ³ஹி.

107. இதா³னி அனேரணக்க²மே ச கிஸ்மிஞ்சி காயப்படிப³த்³தே⁴ ச படிக்³க³ஹணாரோஹனம் த³ஸ்ஸேதும் ‘‘அஸம்ஹாரியே’’திஆதி³மாஹ. தத்த² அஸம்ஹாரியேதி ஆனேதுமஸக்குணேய்யே ப²லகபாஸாணாதி³ம்ஹி. தத்த²ஜாதேதி தேஸுயேவ ருக்கா²தீ³ஸு ஜாதே கிம்ஸுகபது³மினிபண்ணாதி³கே. சிஞ்சஆதீ³னம் ஸுகு²மே பண்ணேதி ஸம்ப³ந்தோ⁴. தானி ஹி ஸந்தா⁴ரேதும் ந ஸக்கோந்தி. தேஸம் பன ஸாகா²ஸு வட்டதி. ஆதி³-ஸத்³தே³ன ‘‘அங்க³’’ந்திஆதி³கம் ஸங்க³ண்ஹாதி. வா-ஸத்³தோ³ ஸமுச்சயே. அஸய்ஹபா⁴ரேதி தா²மமஜ்ஜி²மபுரிஸேன ஸஹிதும் ஸந்தா⁴ரேதும் அஸக்குணேய்யே பா⁴ரே. ஸப்³பே³ஸம் படிக்³க³ஹோ ‘‘ந ரூஹதீ’’தி இமினா ஸம்ப³ந்தோ⁴.

108. இதா³னி படிக்³க³ஹணவிஜஹனம் த³ஸ்ஸேதி ‘‘ஸிக்கா²’’திஆதி³னா. தத்த² ஸிக்கா²மரணலிங்கே³ஹீதி ஸிக்கா²பச்சக்கா²னேன ச மரணேன ச லிங்க³பரிவத்தனேன ச. அனபேக்க²விஸக்³க³தோதி நத்தி² அபேக்கோ² ஏதஸ்ஸாதி அனபேக்கோ², ஸோவ விஸக்³கோ³, ததோ ச. அச்சே²தா³தி சோராதீ³ஹி அச்சி²ந்தி³த்வா க³ஹணேன. அனுபஸம்பன்னதா³னாதி அனுபஸம்பன்னஸ்ஸ தா³னேன. ச-ஸத்³தோ³ ஸப்³ப³த்த² ஆனேதப்³போ³. கா³ஹோதி படிக்³க³ஹணம். உபஸம்மதீதி விஜஹதி.

109-10. இதா³னி அப்படிக்³க³ஹிதம் பரிபோ⁴கே³ தோ³ஸம் த³ஸ்ஸேதும் ‘‘அப்படிக்³க³ஹித’’ந்திஆதி³மாஹ. தத்த² ஸப்³ப³ந்தி சதுகாலிகபரியாபன்னம் ஸகலம்பி. இதா³னி அப்படிக்³க³ஹேத்வா பரிபு⁴ஞ்ஜிதப்³ப³ம் த³ஸ்ஸேதும் ‘‘ஸுத்³த⁴’’ந்திஆதி³மாஹ. தத்த² ஸுத்³த⁴ம் நாதிப³ஹலம் உத³கஞ்ச ததா² அங்க³லக்³க³ம் அவிச்சி²ன்னம் த³ந்த…பே… கூ³த²கஞ்ச லோண…பே… கரீஸகஞ்ச கப்பதேதி ஸம்ப³ந்தோ⁴. தத்த² ஸுத்³த⁴ந்தி ரஜரேணூஹி அஞ்ஞரஸேன ச அஸம்மிஸ்ஸதாய பரிஸுத்³த⁴ம். நாதிப³ஹலந்தி யம் கஸிதட்டா²னே ப³ஹலமுத³கம் விய முகே² வா ஹத்தே² வா ந லக்³க³ம், தம். அவிச்சி²ன்னந்தி அங்க³தோ விச்சி²ந்தி³த்வா ந க³தம். த³ந்தானி ச அக்கீ²னி ச கண்ணஞ்ச த³ந்தக்கி²கண்ணம் பாண்யங்க³த்தா, தஸ்ஸ கூ³த²கந்தி தப்புரிஸோ. லோணம் ஸரீருட்டி²தம். ஸிங்கா⁴ணீதி ஸிங்கா⁴ணிகா. விச்சி²ன்னம் ந படிக்³க³ஹேதப்³ப³ம்.

111. இதா³னி ‘‘கூ³தா²’’திஆதி³னா காலோதி³ஸ்ஸம் த³ஸ்ஸேதி. ததா²விதே⁴தி ஸப்பத³ட்ட²க்க²ணாதி³கே ததா²விதே⁴ காலே. ததா² தாதி³ஸோ விதோ⁴ காலோ ஏதஸ்ஸாதி ப³ஹுப்³பீ³ஹி. ஸேவேய்யாதி ஸேவனம் கரேய்ய, பரிபு⁴ஞ்ஜேய்யாதி வுத்தம் ஹோதி. அஸந்தே கப்பகாரகேதி ஏத்த² து³ப்³ப³சோபி அஸமத்தோ²பி கப்பியகாரகோ அஸந்தபக்கே²யேவ திட்ட²தீதி வேதி³தப்³போ³. காலோதி³ஸ்ஸத்தா பன சா²ரிகாய அஸதி அல்லதா³ரும் ருக்க²தோ சி²ந்தி³த்வா காதும், மத்திகாய அஸதி பூ⁴மிம் க²ணித்வாபி மத்திகம் க³ஹேதும் வட்டதி.

112. து³ரூபசிண்ணேதி து³ட்டு²ம் உபசிண்ணம் ஆமட்ட²ம் து³ரூபசிண்ணம். ஸசே பி⁴க்கு² அப்படிக்³க³ஹிதம் ஸாமிஸம் பா⁴ஜனம் டி²தட்டா²னதோ அபனேத்வா ஆமஸதி, பிதா⁴னம் ஆமஸதி, உபரி டி²தகசவராதி³ம் ச²ட்³டே³தி, தத்த²ஜாதகப²லினியா ஸாகா²ய வா வல்லியா வா க³ஹேத்வா வா சாலேதி, து³ரூபசிண்ணம் நாம ஹோதி. தஸ்மிம் து³க்கடந்தி ஸம்ப³ந்தோ⁴. ப²லருக்க²ம் பன அபஸ்ஸயிதும் வா தத்த² கண்டகம் வா ப³ந்தி⁴தும் வட்டதி. அரஞ்ஞே பதிதஅம்ப³ப²லாதி³ம் ‘‘ஸாமணேரஸ்ஸ த³ஸ்ஸாமீ’’தி ஆஹரித்வா தா³தும் வட்டதி. ரஜோகிண்ணேதி ரஜஸா ஓகிண்ணே, தஸ்மிம் பத்தாதி³கே யம் கிஞ்சி படிக்³க³ண்ஹதோ வினயது³க்கடம் ஹோதீதி அத்தோ². ஸசே பிண்டா³ய சரந்தஸ்ஸ பத்தே ரஜம் பததி, படிக்³க³ஹேத்வா பி⁴க்கா² க³ண்ஹிதப்³பா³. ‘‘படிக்³க³ஹேத்வா தே³தா²’’தி வுத்தேபி ஆகிரந்தி, ஹத்த²தோ அமோசேந்தேனேவ படிக்³கா³ஹாபகஸ்ஸ ஸந்திகம் நேத்வா படிக்³க³ஹேதப்³ப³ம். ஸசே மஹாவாதோ ததோ ததோ ரஜம் பாதேதி, ந ஸக்கா ஹோதி பி⁴க்க²ம் க³ஹேதும், ‘‘அனுபஸம்பன்னஸ்ஸ த³ஸ்ஸாமீ’’தி ஸுத்³த⁴சித்தேன ஆபோ⁴க³ம் கத்வா க³ண்ஹிதும் வட்டதி. தம் பன தேன தி³ன்னம் வா விஸ்ஸாஸேன வா படிக்³க³ஹேத்வா பரிபு⁴ஞ்ஜிதும் வட்டதி.

அதா²தி வக்க²மானாரம்பே⁴. உக்³க³ஹப்படிக்³க³ஹேதி உக்³க³ஹித்தா²தி உக்³க³ஹோ, உக்³க³ஹிதம், தஸ்ஸ படிக்³க³ஹோ, தஸ்மிம். அப்படிக்³க³ஹிதபா⁴வம் ஜானதோ அத்தனா ஏவ உக்³க³ஹேத்வா க³ஹணேதி அதி⁴ப்பாயோ. மாதாபிதூனம் அத்தா²ய பன அப்படிக்³க³ஹேத்வா தேலாதீ³னி, சா²யத்தா²ய ஸாகா²தீ³னி வா க³ஹேத்வா பச்ச²தோ பு⁴ஞ்ஜிதுகாமதாய படிக்³க³ஹேத்வா பரிபு⁴ஞ்ஜிதும் வட்டதி. உச்சு²ஆதீ³ஸு பா²லிதேஸு மலம் ந பஞ்ஞாயதி, மூலபே⁴ஸஜ்ஜாதீ³னி பிஸந்தானம் வா கோட்டேந்தானம் வா நிஸத³னிஸத³போதகஉது³க்க²லமுஸலானி கீ²யந்தி, த³ந்தந்தரே லக்³க³ம் ஸுகு²மஆமிஸம் ஹோதி, ரஸோ ந பஞ்ஞாயதி, அப்³போ³ஹாரிகம். அந்தோவுத்தே²தி அகப்பியகுடியா ச²த³னப்³ப⁴ந்தரே வுத்தே²தி அத்தோ². ஸயம்பக்கேதி அத்தனா யத்த² கத்த²சி பக்கே. ஸசே வாஸிஆதி³ம் தாபேத்வா தக்காதீ³ஸு பக்கி²பதி, ஏத்தாவதாபி ஸாமபாகதோ ந முச்சதி. புரிமகாலிகத்³வயே புனபாகஞ்ஹி ட²பேத்வா யம் கிஞ்சி ஆமிஸம் பி⁴க்கு²னோ பசிதும் ந வட்டதி. ஸசேபிஸ்ஸ உண்ஹயாகு³யா ஸுலஸிபண்ணாதீ³னி வா ஸிங்கி³வேரம் வா பக்கி²பந்தி, சாலேதும் ந வட்டதி. உத்தண்டு³லம் ப⁴த்தம் லபி⁴த்வா பித³ஹிதும் ந வட்டதி. அந்தோபக்கேதி அகப்பியகுடியா அந்தோ பக்கே. ஸப்³ப³த்த² து³க்கடந்தி ஸம்ப³ந்தோ⁴.

படிக்³கா³ஹனித்³தே³ஸவண்ணனா நிட்டி²தா.