10. அகப்பியமம்ஸனித்³தே³ஸவண்ணனா

113-4. மனுஸ்ஸஹத்தி²அஸ்ஸானஞ்ச …பே… உரக³ஸ்ஸ ச யம் மம்ஸஞ்ச, யம் உத்³தி³ஸ்ஸகதமம்ஸஞ்ச, அப்படிவேக்கி²தம் யஞ்ச மம்ஸம், தேஸு மம்ஸேஸூதி ஏவம் யோஜேத்வா அத்தோ² வேதி³தப்³போ³. தத்த² ஸீஸகீ³வாதரங்கே³ன சரந்தா அச்ச²விஸேஸாவ தரச்சா². உரக³ஸ்ஸாதி இமினா ஸப்³பா³பி தீ³க⁴ஜாதி ஸங்க³ஹிதா. உத்³தி³ஸ்ஸகதமம்ஸந்தி பி⁴க்கு²ம் உத்³தி³ஸித்வா கதம் உத்³தி³ஸ்ஸகதம், தஞ்ச தம் மம்ஸஞ்ச. ஏத்த² ச மம்ஸ-க்³க³ஹணேன மச்சா²னம்பி க³ஹணம் வேதி³தப்³ப³ம் உபலக்க²ணவஸேன, ச-ஸத்³தே³ன வா. பஞ்சஸுபி ஸஹத⁴ம்மிகேஸு யம் கிஞ்சி உத்³தி³ஸ்ஸகதம் ஸப்³பே³ஸம்பி ந கப்பதி, தம்பி அதி³ட்ட²அஸுதஅபரிஸங்கிததாய திகோடிபரிஸுத்³த⁴ம் வட்டதி. அப்படிவேக்கி²தந்தி அனுபபரிக்கி²தம், அனாபுச்சி²தந்தி அத்தோ². ஆபத்திபீ⁴ருகேன ஹி ரூபம் ஸல்லக்கே²ந்தேனாபி புச்சி²த்வா படிக்³க³ஹேதப்³ப³ம் பரிபு⁴ஞ்ஜிதப்³ப³ஞ்ச. மனுஸ்ஸானம் மம்ஸேஸு து²ல்லச்சயந்தி யோஜனா. தூ²லோ அச்சயோ ஏத்தா²தி ரஸ்ஸே, த்³வித்தே ச து²ல்லச்சயம். பாராஜிகஸங்கா⁴தி³ஸேஸேஹி ட²பேத்வா இதோ அதி⁴கம் வஜ்ஜம் நத்தி². ஸேஸேஸூதி அவஸேஸேஸு ஏகாத³ஸஸு.

115. இதா³னி மனுஸ்ஸாதீ³னம் அட்டி²ஆதீ³னிபி அகப்பியானீதி த³ஸ்ஸேதும் ‘‘அட்டி²பீ’’திஆதி³மாஹ. பி-ஸத்³தோ³ ‘‘லோஹித’’ந்திஆதீ³ஸுபி அனுவத்தேதப்³போ³. ஏஸந்தி மனுஸ்ஸாதீ³னம் த³ஸன்னம். வஸாஸு பன ஏகா மனுஸ்ஸவஸா ந வட்டதி. கீ²ராதீ³ஸு அகப்பியம் நாம நத்தி². உத்³தி³ஸ்ஸகதம்யேவ ஸசித்தகந்தி யோஜனா. ஸசித்தகந்தி உத்³தி³ஸ்ஸகதபா⁴வஜானனசித்தேன ஸஹ வத்ததீதி ஸசித்தகம். வத்து²வீதிக்கமவிஜானனசித்தேன ஹி ஸசித்தகத்தம். ஏத்த² ச ஸசித்தகத்தம் ஆபத்தியா ஏவ, ந ச மம்ஸஸ்ஸ, ததா²பி மம்ஸஸீஸேன ஆபத்தி ஏவ வுத்தாதி விஞ்ஞாதப்³ப³ந்தி.

அகப்பியமம்ஸனித்³தே³ஸவண்ணனா நிட்டி²தா.