11. நிஸ்ஸக்³கி³யனித்³தே³ஸவண்ணனா

116-7. ரூபியேன அரூபியம் ரூபியஞ்ச இதரேன ரூபியஞ்ச பரிவத்தேய்யாதி ஸம்ப³ந்தோ⁴. தத்த² ரூபியேனாதி ரூபியஸங்கா²தேன நிஸ்ஸக்³கி³யவத்து²னா. அரூபியந்தி அரூபியஸங்கா²தம் து³க்கடவத்து²ம் கப்பியவத்து²ஞ்ச. இதரேனாதி அரூபியேன. நிஸ்ஸக்³கீ³தி நிஸ்ஸஜ்ஜனம் நிஸ்ஸக்³கோ³, புப்³ப³பா⁴கே³ கத்தப்³ப³ஸ்ஸ வினயகம்மஸ்ஸேதம் நாமம். நிஸ்ஸக்³கோ³ அஸ்ஸ அத்தீ²தி நிஸ்ஸக்³கி³, கிம் தம்? பாசித்தியம். ரூபியஸ்ஸ மூலக்³க³ஹணே பன ரூபியப்படிக்³க³ஹணஸிக்கா²பதே³ன நிஸ்ஸக்³கி³யம் பாசித்தியம்.

இதா³னி ரூபியாதி³ம் த³ஸ்ஸேதும் ‘‘இதா⁴’’திஆதி³ ஆரத்³த⁴ம். தத்த² கஹா…பே… மாஸகம் இத⁴ ரூபியந்தி ஸம்ப³ந்தோ⁴. தத்த² கஹாபணோ நாம ஸுவண்ணமயோ வா ரஜதமயோ வா ஏதரஹி பகதிகஹாபணோ வா. ஸஜ்ஜூ²தி ரஜதம். ஸிங்கீ³தி ஸுவண்ணபே⁴தோ³, ததா²பி சேத்த² ஸாமஞ்ஞேன ஸுவண்ணமதி⁴ப்பேதம். வோஹாரூபக³மாஸகந்தி வோஹாரம் கயவிக்கயம் உபக³ச்ச²தீதி வோஹாரூபக³ம், தஞ்ச தம் மாஸகஞ்ச. தம் பன ஸமுட்டா²பிதரூபஞ்ச அஸமுட்டா²பிதரூபஞ்ச லோஹதா³ருஆதி³மயம் வுச்சதி. இத⁴ ரூபியந்தி இமஸ்மிம் ஸிக்கா²பதே³ ரூபியம் நாமாதி அத்தோ². வத்த²முத்தாதி³ கப்பம் து³க்கடவத்து²ஞ்ச இதரந்தி யோஜனா. தத்த² வத்த²ஞ்ச முத்தா ச ஆதி³ யஸ்ஸாதி ஸமாஸோ. ஆதி³-ஸத்³தோ³ பச்சேகம் யோஜேதப்³போ³ ‘‘வத்தா²தி³ முத்தாதீ³’’தி. தத்த² பட²மேன ஆதி³-ஸத்³தே³ன கப்பாஸஸுத்தாபரண்ணாதி³கம் யம் கிஞ்சி கப்பியவத்து²ம், து³தியேன மணி ஸங்கோ² ஸிலா பவாளம் லோஹிதங்கோ மஸாரக³ல்லம் ஸத்தத⁴ஞ்ஞானி தா³ஸிதா³ஸகே²த்தவத்து²புப்பா²ராமப²லாராமாத³யோதி இத³ம் து³க்கடவத்து²ம் ஸங்க³ண்ஹாதி. வத்தா²தி³கப்பியவத்து²ம், முத்தாதி³து³க்கடவத்து²ஞ்ச இதரம் அஞ்ஞம் அரூபியம் நாமாதி அத்தோ².

118. ஏத்தாவதா ரூபியஸம்வோஹாரம் த³ஸ்ஸேத்வா இதா³னி கப்பியப⁴ண்டே³ கயவிக்கயம் த³ஸ்ஸேதுமாஹ ‘‘இம’’ந்திஆதி³. தத்த² ‘‘இமம் க³ஹேத்வா இமம் தே³ஹி, இமம் கர, இமம் ஆனயா’’தி வா ‘‘இமம் பு⁴த்வா இமம் தே³ஹி, இமம் கர, இமம் ஆனயா’’தி வா ‘‘இமம் தே³மி, இமம் தே³ஹி, இமம் கர, இமம் ஆனயா’’தி வா கயவிக்கயே ஸமாபன்னே நிஸ்ஸக்³கீ³தி யோஜனா. தத்த² இமந்தி தண்டு³லாதி³ம். பு⁴த்வாதி ஓத³னாதி³ம் பு⁴ஞ்ஜித்வா. இமம் தே³ஹீதி ஏதம் வத்தா²தி³கம் தே³ஹி. இமம் கராதி ஏதம் ரஜனபசனாதி³ம் கரோஹி. இமம் ஆனயாதி ஏதம் ரஜனகட்டா²தி³ம் ஆனேஹி. இமம் தே³மீதி ஏதம் வத்தா²தி³கம் தவ தே³மி. ஸமாபன்னேதி கதே. தஸ்மா கப்பியம் ப⁴ண்ட³ம் பரிவத்தேந்தேன அஞ்ஞாதகேஹி ஸத்³தி⁴ம் ‘‘இமம் தே³ஹீ’’தி வத³தோ விஞ்ஞத்தி, ‘‘இமம் க³ண்ஹாஹீ’’தி வத³தோ ஸத்³தா⁴தே³ய்யவினிபாதனம், ‘‘இமினா இமம் தே³ஹீ’’தி வத³தோ கயவிக்கயந்தி வுத்தா திஸ்ஸோ ஆபத்தியோ. மாதாபிதூஹி பன ஸத்³தி⁴ம் கயவிக்கயமத்தம் மோசேந்தேன பரிவத்தேதப்³ப³ம். அயஞ்ஹி கயவிக்கயோ ட²பேத்வா பஞ்சஸஹத⁴ம்மிகே அவஸேஸேஹி கி³ஹிபப்³ப³ஜிதேஹி ந வட்டதி. ஸசே பன நவகம்மானி காரேதி, அட்ட²கதா²பமாணேன பாசித்தியமத்தம் தே³ஸேதப்³ப³ம்.

119-120. இதா³னி பரிணாமனவஸேன ஆபத்திபே⁴த³ம் த³ஸ்ஸேதும் ‘‘அத்தனோ’’திஆதி³ ஆரத்³த⁴ம். தத்தா²யம் பிண்ட³த்தோ² – ஸங்க⁴ஸ்ஸ நதம் லாப⁴ம் அத்தனோ பரிணாமேய்ய, நிஸ்ஸக்³கி³. அஞ்ஞதோ புக்³க³லஸ்ஸ பரிணாமேய்ய, பாசித்தி. அஞ்ஞஸ்ஸ ஸங்க⁴ஸ்ஸ வா சேதியஸ்ஸ வா பரிணாமேய்ய, து³க்கடம். அஞ்ஞஸ்ஸ புக்³க³லஸ்ஸ வா சேதியஸ்ஸ வா நதம் லாப⁴ம் அத்தனோ வா ஸங்க⁴ஸ்ஸ வா அஞ்ஞபுக்³க³லஸ்ஸ வா அஞ்ஞசேதியஸ்ஸ வா பரிணாமேய்ய, து³க்கடந்தி யோஜனா. தத்த² நதந்தி காயேன வா வசஸா வா நின்னம் கதம். லாப⁴ந்தி லபி⁴தப்³ப³ம் சீவராதி³. அஞ்ஞதோ அஞ்ஞஸ்மிம் புக்³க³லே வா சேதியே வா, சேதியே பன து³க்கடம். அஞ்ஞஸ்ஸாதி சேதியாதி³னோ அந்தமஸோ ஸுனக²ஸ்ஸ. அஞ்ஞதோ வாதி சேதியாதி³ம்ஹி வா. ஸங்க⁴ஸ்ஸாதி பன இத³ம் காகக்கி²கோ³ளகஞாயேன ‘‘நதம் பரிணாமேய்யா’’தி உப⁴யத்த² பரிவத்ததி. நிஸ்ஸட்ட²ம் ஸகஸஞ்ஞாய ந த³தே³ய்ய வா, து³க்கடந்தி ஸம்ப³ந்தோ⁴. அஞ்ஞதா² அஞ்ஞேன பகாரேன, தே²ய்யஸஞ்ஞாய ந த³தே³ய்ய சேதி வுத்தம் ஹோதி. இதரந்தி வத்து²வஸேன அஞ்ஞம் பாராஜிகம் து²ல்லச்சயம் து³க்கடஞ்ச ஹோதீதி அத்தோ².

நிஸ்ஸக்³கி³யனித்³தே³ஸவண்ணனா நிட்டி²தா.