12. பாசித்தியனித்³தே³ஸவண்ணனா

121. முஸா …பே… ஹரணேதி நிமித்தத்தே² பு⁴ம்மவசனம், தஸ்ஸ ‘‘பாசித்தி வுத்தா’’தி இமினா ஸம்ப³ந்தோ⁴. ஏவம் ஸப்³ப³த்த². முஸாவாதே³தி நிபாதேன ஸத்³தி⁴ம் தப்புரிஸோ. புப்³பே³பி ஜானித்வா வசனக்க²ணேபி ஜானந்தஸ்ஸ முஸாப⁴ணனனிமித்தந்தி அத்தோ². ப⁴ணனஞ்ச நாம இத⁴ அபூ⁴தஸ்ஸ வா பூ⁴ததம், பூ⁴தஸ்ஸ வா அபூ⁴ததம் கத்வா காயேன வா வாசாய வா விஞ்ஞாபனப்பயோகோ³. பாராஜிகஸங்கா⁴தி³ஸேஸாசாரவிபத்தியோ அமூலிகாய சோதே³ந்தஸ்ஸ யதா²க்கமம் ஸங்கா⁴தி³ஸேஸபாசித்தியது³க்கடானி. அனுபதா⁴ரேத்வா ஸஹஸா ப⁴ணந்தஸ்ஸ, ‘‘அஞ்ஞம் ப⁴ணிஸ்ஸாமீ’’தி அஞ்ஞம் ப⁴ணந்தஸ்ஸ யஸ்ஸ ப⁴ணதி, ஸோ ந ஸுணாதி, தஸ்ஸ ச அனாபத்தி.

ஓமஸதி அமனாபதாய கண்ணேஸு விஜ்ஜ²தி விய ஏதேன, ஓமஸதி வாதி ஓமஸோ, ஸோ சாயம் வாதோ³ச, தஸ்மிம். தீ³கோ⁴ பன கா³தா²ப³ந்த⁴வஸேன. ஏவம் ஸப்³ப³த்த². ஹீனுக்கட்டே²ஸு ச ஜாதினாமகோ³த்தவயகம்மஸிப்பஆபா³த⁴லிங்க³கிலேஸஆபத்திஅக்கோஸஸங்கா²தேஸு த³ஸஸு பூ⁴தேன வா அபூ⁴தேன வா ‘‘க²த்தியோஸி, சண்டா³லோஸீ’’திஆதி³னா காயேன வா வாசாய வா அனஞ்ஞாபதே³ஸேன பி⁴க்கு²னோ கு²ம்ஸேதுகாமதாய அக்கோஸவசனேதி அத்தோ². ‘‘ஸந்தி இதே⁴கச்சே சண்டா³லா’’திஆதி³னா அஞ்ஞாபதே³ஸேன வா ‘‘சோரோஸி, விகாரீஸி, மாதுகா⁴தகோஸீ’’திஆதீ³ஹி பாளிமுத்தபதே³ஹி வா பி⁴க்கு²ஸ்ஸ, யதா² வா ததா² வா அனுபஸம்பன்னம், பரம்முகா² பன ஸப்³ப³ம்பி அக்கோஸந்தஸ்ஸ து³க்கடம். கேவலம் த³வகம்யதாய வத³தோ பன ஸப்³ப³த்த² து³ப்³பா⁴ஸிதம்.

பேஸுஞ்ஞஹரணேதி பிஸுணஸ்ஸ பா⁴வோ பேஸுஞ்ஞம். அத்தனோ பியகம்யதாய வா பரஸ்ஸ பரேஸு பே⁴தா³தி⁴ப்பாயேன வா ஜாதிஆதீ³ஹி ஓமஸந்தஸ்ஸ பி⁴க்கு²னோ வசனம் ஸுத்வா பி⁴க்கு²ஸ்ஸ தஸ்ஸ பேஸுஞ்ஞஸ்ஸ ஹரணே. அனுபஸம்பன்னஸ்ஸ ஹரணே து³க்கடம். பத³ம் பத³ம் பத³ஸோ, விச்சா²யம் ஸோ, கோட்டா²ஸேன கோட்டா²ஸேனாதி அத்தோ². ஸங்கீ³தித்தயாருள்ஹோ திபிடகத⁴ம்மோ, அனாருள்ஹோ ச ராஜோவாதா³தி³கோ த⁴ம்மோ நாம, தேன ஸஹ பத³ஸோதி நிபாதஸ்ஸ ததியாதப்புரிஸோ. பத³ஸோத⁴ம்மேதி ஏகக்க²ராதி³னா கோட்டா²ஸேன கோட்டா²ஸேன அனுபஸம்பன்னேன ஸத்³தி⁴ம் யதா²வுத்தத⁴ம்மப⁴ணனேதி அத்தோ². பத³ஸோத⁴ம்மப⁴ணனஞ்ஹி பத³ஸோத⁴ம்ம-ஸத்³தே³ன உபசாரேன வுத்தம். அனுபஸம்பன்னேன ஸத்³தி⁴ம் ஏகதோ உத்³தே³ஸக்³க³ஹணே ஸஜ்ஜா²யகரணே, தம்ஸந்திகே உத்³தே³ஸக்³க³ஹணாதி³கே ச தேன ஸத்³தி⁴ம் ஏகதோ யேபு⁴ய்யேன பகு³ணம் க³ந்த²ம் ப⁴ணந்தஸ்ஸ ஓஸாரேந்தஸ்ஸ க²லிதட்டா²னே ‘‘ஏவம் ப⁴ணாஹீ’’தி ஏகதோ ப⁴ணந்தஸ்ஸபி அனாபத்தி.

அந்தமஸோ வத்தா²தி³னா யேன கேனசி ஸப்³ப³ச்ச²ன்னம் ச²த³னம் அனாஹச்ச தி³யட்³ட⁴ஹத்து²ப்³பே³தே⁴னாபி ஸப்³ப³பரிச்சி²ன்னம் யேபு⁴ய்யேனச²ன்னம் யேபு⁴ய்யேனபரிச்சி²ன்னஞ்ச ஸேனாஸனம் அகா³ரந்தி அதி⁴ப்பேதம். தத்ரட்டோ² பன பி⁴க்கு²ம் ட²பேத்வா அந்தமஸோ பாராஜிகவத்து²பூ⁴தோ திரச்சா²னக³தோபி அந்தமஸோ தத³ஹுஜாதா இத்தீ²பி உபசாரதோ அகா³ர-ஸத்³தே³ன வுச்சதி. ஸஹ அகா³ரேனாதி ஸாகா³ரோ, பி⁴க்கு². உபசாரேனேவ ச பன அனுபஸம்பன்னேன, மாதுகா³மேன ச ஸஹ ஸேய்யகப்பனம் ஸாகா³ரபா⁴வோ நாமாதி க³ஹேதப்³ப³ம். ஸங்க⁴ஸம்மதம் ஸேனாஸனபஞ்ஞாபகாதி³பே⁴த³ம் உபஸம்பன்னம் அயஸகாமா ஹுத்வா பி⁴க்கூ²ஹி யேன ச உஜ்ஜா²பேந்தி அவஜானாபேந்தி அவஞ்ஞாய ஓலோகாபேந்தி, லாமகதோ வா சிந்தாபேந்தி, தம் வசனம் உஜ்ஜா²பனகம். யேன கீ²யந்தி ஸப்³ப³த்த² தஸ்ஸ அவண்ணம் பகாஸேந்தி, தம் கீ²யனம்.

122. தலந்தி ஹத்த²தலமதி⁴ப்பேதம். தக்³க³ஹணேன பன காயோவ தலம். ஸத்தீதி காயப்படிப³த்³தா⁴ ஸத்தி ஆவுத⁴விஸேஸோ, உபலக்க²ணத்தா பன ஸப்³ப³ம்பி காயப்படிப³த்³த⁴ம் ஸத்தி. தலஞ்ச ஸத்தி ச தலஸத்தி. இத⁴ பன கோபேன பி⁴க்கு²ஸ்ஸ தலஸத்திஉக்³கி³ரணம் தலஸத்தி. ஸசே பன விரத்³தோ⁴ பஹாரம் தே³தி, ந பஹரிதுகாமதாய தி³ன்னத்தா து³க்கடம், பஹரிதுகாமதாய பாசித்தியம், அனுபஸம்பன்னே து³க்கடம், மோக்கா²தி⁴ப்பாயஸ்ஸ அனாபத்தி.

பஞ்ஞத்தேன வத³தோ உபஸம்பன்னஸ்ஸ வா தேன வுச்சமானத⁴ம்மஸ்ஸ வா அனாத³ரகரணம் அனாத³ரோ. அனுபஸம்பன்னஸ்ஸ தேன வுச்சமானஸ்ஸ வா உபஸம்பன்னேன, பரேன வா அபஞ்ஞத்தேன வா வுச்சமானஸ்ஸ அனாத³ரே து³க்கடம்.

‘‘ஊனவஸ்ஸோ த்வம் மஞ்ஞே’’திஆதி³னா பி⁴க்கு²னோ குக்குச்சஸ்ஸ உப்பாத³னம் அனுபஸம்பன்னஸ்ஸ து³க்கடம்.

அனாபுச்சா² கா³மப்பவேஸனேதி பகதிவசனேன புச்சி²துமனுரூபம் அந்தோஉபசாரஸீமாய த³ஸ்ஸனூபசாரே பி⁴க்கு²ம் தி³ஸ்வா ‘‘விகாலே கா³மப்பவேஸனம் ஆபுச்சா²மீ’’தி அனாபுச்சி²த்வா விகாலே கா³மப்பவேஸனே. தீ³கோ⁴ பன ஸந்தி⁴வஸேன. ஆபதா³ஸு அனாபத்தி.

பரம்பரபோ⁴ஜனேதி பரோ ச பரோ ச பரம்பரா ம-காரோ ஸந்தி⁴வஸேன, தஸ்மா பரம்பரா உப்பத்தவிஸயஅபாதா³னவசனம், பரதோ பரதோ லத்³தா⁴ பு⁴ஞ்ஜனேதி அத்தோ². அயமேத்த² அதி⁴ப்பாயோ – பஞ்சஹி போ⁴ஜனேஹி நாமம் க³ஹேத்வா நிமந்திதஸ்ஸ யேன யேன பட²மம் நிமந்திதோ, தஸ்ஸ தஸ்ஸ போ⁴ஜனதோ உப்படிபாடியா, ‘‘மய்ஹம் ப⁴த்தபச்சாஸம் துய்ஹம் த³ம்மீ’’தி வா ‘‘விகப்பேமீ’’தி வா ஆதி³னா ஸம்முகா² வா பரம்முகா² வா அவிகப்பேத்வா வா அஞ்ஞதோ அஞ்ஞதோ பஞ்சபோ⁴ஜனாதீ³னி லத்³தா⁴ பு⁴ஞ்ஜமானேதி. கி³லானசீவரதா³னசீவரகாரஸமயே அனாபத்தி.

123. ஸேய்யம் ஸேனாஸனானி வா அனுத்³த⁴ரித்வா க³மனேதி ஸம்ப³ந்தோ⁴. வா-ஸத்³தோ³ ஸமுச்சயே. தத்த² ‘‘பி⁴ஸி சிமிலிகா உத்தரத்த²ரணம் பூ⁴மத்த²ரணம் தட்டிகா சம்மக்க²ண்டோ³ நிஸீத³னம் பச்சத்த²ரணம் திணஸந்தா²ரோ பண்ணஸந்தா²ரோ’’தி (பாசி. 116) வுத்தாஸு த³ஸஸு ஸேய்யாஸு ஏகம்பி அத்தனோ வஸ்ஸக்³க³னே க³ஹேத்வா ஸங்கி⁴கே ஸப்³ப³ப்படிச்ச²ன்னே கு³த்தே ஸேனாஸனே ஸந்த²ரித்வா வா ஸந்த²ராபேத்வா வா யதா² ட²பிதம் உபசிகாதீ³ஹி ந க²ஜ்ஜதி, ததா² ட²பனவஸேன அனுத்³த⁴ரித்வா பரிக்கி²த்தஸ்ஸ ஆராமஸ்ஸ பரிக்கே²பம், அபரிக்கி²த்தஸ்ஸ உபசாரம் அதிக்கமித்வா க³மனே ச, ததா² மஞ்சபீட²திஸிகோச்ச²ஸங்கா²தானி ஸேனாஸனானி வஸ்ஸகாலே அஜ்ஜோ²காஸே ஸந்த²ரித்வா வா ஸந்த²ராபேத்வா வா அனுபஸம்பன்னேன அனுத்³த⁴ரித்வா தா²மமஜ்ஜி²மஸ்ஸ புரிஸஸ்ஸ லேட்³டு³பாதம் அதிக்கமித்வா க³மனே சாதி அத்தோ². யதா²வுத்ததோ பன அஞ்ஞத்த² து³க்கடம்.

இத்தி²யா அத்³தா⁴னக³மனேதி ‘‘க³ச்சா²ம ப⁴கி³னி, க³ச்சா²ம அய்யா’’தி அஞ்ஞமஞ்ஞம் ஸம்வித³ஹித்வா ‘‘அஜ்ஜ வா ஸ்வே வா’’திஆதி³னா நியமிதகாலவிஸங்கேதம் அகத்வாபி த்³வாரவிஸங்கேதம் மக்³க³விஸங்கேதம் கத்வாபி இத்தி²யா ஸத்³தி⁴ம் அத்³தா⁴னமக்³க³க³மனேதி அத்தோ².

ஏகேகாய நிஸீத³னேதி ஏகேன ஏகாதி ஏகேகா, தஸ்ஸா நிஸஜ்ஜாயாதி அத்தோ². ஏகேன ஸஹ ஏகிஸ்ஸா நிஸஜ்ஜம் வினா ஏகாய ஸஹ ஏகஸ்ஸ நிஸஜ்ஜம் நாம நத்தீ²தி ஏகாய ஸஹ ஏகஸ்ஸ நிஸஜ்ஜாயம் ஸதி நிஸின்னஸ்ஸ பி⁴க்கு²னோ பாசித்தியந்தி அதி⁴ப்பாயோ. ‘‘ஏகாயேகனிஸீத³னே’’தி வா பாடோ².

124. ரூபாதீ³னம் உபஸம்ஹாரேன, ப⁴யானககதா²கத²னேன வா உபஸம்பன்னஸ்ஸ பி⁴ம்ஸாபனே. அனுபஸம்பன்னஸ்ஸ து³க்கடம்.

ஆகோடனே உபஸம்பன்னஸ்ஸ அந்தமஸோ உப்பலபத்தேனாபி பஹாரதா³னே. அனுபஸம்பன்னஸ்ஸ அந்தமஸோ திரச்சா²னக³தஸ்ஸபி து³க்கடம். மோக்கா²தி⁴ப்பாயஸ்ஸ அனாபத்தி.

ஸங்க⁴மஜ்ஜே² வினயத⁴ரேன அனுயுஞ்ஜியமானஸ்ஸ புச்சி²ததோ அஞ்ஞஸ்ஸ வாதோ³ அஞ்ஞேன அஞ்ஞம் படிசரணம் அஞ்ஞவாதோ³. ததே²வ புச்சி²யமானஸ்ஸ அகதே²துகாமதாய விஹேஸனம் துண்ஹீபா⁴வோ விஹேஸா. அஞ்ஞவாத³கஸ்ஸ விஹேஸகஸ்ஸ ச ஞத்திது³தியகம்மேன அஞ்ஞவாத³கவிஹேஸககம்மே கதே புன அஞ்ஞவாதே³ விஹேஸாய பாசித்தியம். அனாரோபிதே பன கம்மே து³க்கடம். கிஞ்சி வீதிக்கமம் தி³ஸ்வா ‘‘ஆவுஸோ, இத³ம் நாம தயா கத’’ந்தி வுத்தே தம் ந கதே²துகாமோ துண்ஹீபூ⁴தோ ஸங்க⁴ம் விஹேஸேதீதி விஹேஸகோ. அனாசாரம் ஆசரித்வா ஸங்க⁴மஜ்ஜே² ஆபத்தியா, வத்து²னா வா அனுயுஞ்ஜியமானே தம் அகதே²துகாமோ ‘‘கோ ஆபன்னோ, கிஸ்மிம் ஆபன்னோ’’திஆதி³னா நயேன அஞ்ஞேஹி வசனேஹி தம் வசனம் படிச்சா²தே³ந்தோ யோ அஞ்ஞம் வத³தி, அயம் அஞ்ஞவாத³கோ நாம.

து³ட்டு²ல்லம் நாம பாராஜிகஸங்கா⁴தி³ஸேஸா, இத⁴ பன ஸங்கா⁴தி³ஸேஸோவ. பகாஸோ ச சா²தோ³ ச பகாஸசா²தோ³, து³ட்டு²ல்லஸ்ஸ பகாஸசா²தோ³தி தப்புரிஸோ. அபி⁴ண்ஹாபத்திகஸ்ஸ பி⁴க்கு²னோ ஆயதிம் ஸம்வரத்தா²ய ஆபத்திபரியந்தம் குலபரியந்தஞ்ச கத்வா வா அகத்வா வா திக்க²த்தும் அபலோகேத்வா காதப்³ப³ம். பி⁴க்கு²ஸம்முதிம் ட²பேத்வா அனுபஸம்பன்னஸ்ஸ ‘‘அயம் அஸுசிம் மோசேத்வா ஸங்கா⁴தி³ஸேஸம் ஆபன்னோ’’திஆதி³னா நயேன வத்து²னா ஸத்³தி⁴ம் ஆபத்திம் க⁴டேத்வா தஸ்ஸ து³ட்டு²ல்லஸ்ஸ பகாஸனே ஆரோசனே ச, தஸ்ஸேவ யேன கேனசி உபாயேன ஞத்வா சா²த³னே ச, அது³ட்டு²ல்லாரோசனே சா²த³னே ச, அனுபஸம்பன்னஸ்ஸ பன புரிமபஞ்சமஸிக்கா²பதே³ இதரா து³ட்டு²ல்லேபி து³க்கடம்.

ஹாஸோத³கேதி ஏத்த² ஹாஸே உத³கேதி பத³விபா⁴கோ³ வேதி³தப்³போ³. யேன கேனசி ஸரீராவயவேன ஹஸாதி⁴ப்பாயஸ்ஸ உபகச்ச²காதீ³ஸு ஹாஸே பு²ஸனே. ஹாஸனிமித்தஞ்ஹி பு²ஸனம் ஹாஸோ. அனுபஸம்பன்னே து³க்கடம். உத³கே ஹாஸேதி உபரிகோ³ப்ப²கே உத³கே ஹஸாதி⁴ப்பாயஸ்ஸ உம்முஜ்ஜனனிமுஜ்ஜனேன கீளாய. கீளா ஹி இத⁴ ஹாஸோதி வுத்தோ. நாவாய கீளதோ, ஹத்தா²தி³னா கட்டா²தி³னா வா உத³கம் ஹனதோ அந்தமஸோ பா⁴ஜனக³தகஞ்ஜிகாதீ³னிபி கி²பனகீளாய கீளதோ து³க்கடம். அஹஸாதி⁴ப்பாயஸ்ஸ அனாபத்தி.

நிச்சு²ப⁴னே விஹாராதி ஸங்கி⁴கவிஹாரதோ பி⁴க்கு²னோ நிக்கட்³ட⁴னனிக்கட்³டா⁴பனே. ஏத்த² ச ஏகப்பயோகே³ ஏகா, நானாபயோகே³ த்³வாரக³ணனாய ஆபத்தியோ. புக்³க³லிகனிக்கட்³ட⁴னே, தஸ்ஸ பரிக்கா²ரனிக்கட்³ட⁴னே, அனுபஸம்பன்னஸ்ஸ பன தஸ்ஸ பரிக்கா²ரஸ்ஸ வா நிக்கட்³ட⁴னே து³க்கடம். ந ஸம்மாவத்தந்தானம் அந்தேவாஸிகஸத்³தி⁴விஹாரிகானம் வா நிக்கட்³ட⁴னே, அத்தனோ விஸ்ஸாஸிகஸ்ஸ விஹாரா நிக்கட்³ட⁴னே, ப⁴ண்ட³னகாரகஸ்ஸ பன ஸகலஸங்கா⁴ராமதோ நிக்கட்³ட⁴னே அனாபத்தி.

அனுபக²ஜ்ஜ ஸயனேதி ‘‘வுட்³டோ⁴, கி³லானோ, ஸங்கே⁴ன தி³ன்னோ’’தி ஜானித்வா மஞ்சபீடா²னம் வா தஸ்ஸ பி⁴க்கு²னோ பவிஸந்தஸ்ஸ வா நிக்க²மந்தஸ்ஸ வா உபசாரம் அனுபக²ஜ்ஜ அனுபவிஸித்வா ஸங்கி⁴கே விஹாரே ‘‘யஸ்ஸ ஸம்பா³தோ⁴ ப⁴விஸ்ஸதி, ஸோ பக்கமிஸ்ஸதீ’’தி அதி⁴ப்பாயேன நிஸீத³னனிஸஜ்ஜனவஸேன ஸயனே. புக்³க³லிகே து³க்கடம்.

ஏத்த² ச பாசித்தீதி உத்³தி³ஸித்வா கானிசி பஸித்³தா⁴னி த³ஸ்ஸிதானி. அவுத்தானி பன தாதி³ஸானி இமினாவ ஸாமஞ்ஞவசனேன ஸங்க³ஹேத்வா வேதி³தப்³பா³னி. கத²ம்? அசேலகாதி³அஞ்ஞதித்தி²யானம் யஸ்ஸ கஸ்ஸசி ஆமிஸஸ்ஸ ஸஹத்தா² தா³னே ச, ஸப்பினவனீததேலமது⁴பா²ணிதமச்ச²மம்ஸகீ²ரத³தி⁴ஸங்கா²தானம் பணீதபோ⁴ஜனானம் அத்தனோ அத்தா²ய விஞ்ஞாபேத்வா பு⁴ஞ்ஜனே, ராக³பரியுட்டி²தஇத்தி²புரிஸஸ்ஸ யோக்³கே³ குலே அனுபவிஸித்வா நிஸஜ்ஜனகப்பனே, பஞ்சன்னம் போ⁴ஜனானம் அஞ்ஞதரேன நிமந்திதோ தஸ்மிம் பு⁴த்தே வா அபு⁴த்தே வா ஸந்தம் பி⁴க்கு²ம் அனாபுச்சி²த்வா புரேப⁴த்தம் பச்சா²ப⁴த்தம் வா யஸ்மிம் குலே நிமந்திதோ, ததோ கி³லானசீவரதா³னகாரஸமயம் ட²பேத்வா அஞ்ஞஸ்மிம் அஞ்ஞகுலப்பவேஸனே, ட²பேத்வா ஏகதி³வஸம் அஞ்ஞஸ்மிம் தி³னே ஆவஸத²பிண்ட³ஸ்ஸ அகி³லானேன ஹுத்வா பு⁴ஞ்ஜனே, ரத்திபரிச்சே²த³ம் வா பே⁴ஸஜ்ஜபரிச்சே²த³ம் வா கத்வா பவாரிததோ உத்தரி அஞ்ஞத்ர புன பவாரணாய அஞ்ஞத்ர நிச்சப்பவாரணாய விஞ்ஞாபனே, அஞ்ஞத்ர ததா²ரூபபச்சயா கா³மதோ நிக்க²ந்தஸேனாத³ஸ்ஸனாய க³மனே, பச்சயேனபி க³ந்த்வா திரத்ததோ உத்தரி ஸேனாய வாஸே, தஸ்ஸ ச வஸந்தஸ்ஸ யுத்³த⁴ட்டா²னப³லக³ணட்டா²னஸேனானிவேஸஅனீகத³ஸ்ஸனத்த²ம் க³மனே, பிட்டா²தீ³ஹி கதமஜ்ஜஸங்கா²தஸுராய, புப்பா²தீ³ஹி கதஆஸவஸங்கா²தமேரயஸ்ஸ ச பானே, பதீ³புஜ்ஜலபத்தபசனாதி³காரணம் வினா விஸிப்³பி³துகாமதாய அகி³லானஸ்ஸ அக்³கி³னோ ஜாலனஜாலாபனே, கப்பபி³ந்து³ம் அனாதா³ய நவசீவரபரிபோ⁴கே³, ஸாமம் சீவரம் விகப்பேத்வா அபச்சுத்³தா⁴ய பரிபோ⁴கே³, பி⁴க்கு²ஸந்தகபத்தாதி³னோ அந்தமஸோ ஹஸாதி⁴ப்பாயேனபி அபனிதா⁴னே அபனிதா⁴பனே, ஸஞ்சிச்ச திரச்சா²னக³தஸ்ஸ ஜீவிதவோரோபனே, ஸஞ்சிச்ச யதா²த⁴ம்மம் நிஹதாதி⁴கரணஸ்ஸ புனகம்மாய உக்கோடனே, ஸஞ்சிச்ச தே²ய்யஸத்தே²ன ஸத்³தி⁴ம் ஸம்விதா⁴ய ஏகத்³தா⁴னக³மனே, பி⁴க்கூ²ஹி ஸிக்கா²பதே³ஹி வுச்சமானஸ்ஸ அஞ்ஞம் அவிசாரேத்வா ‘‘ந தத்த² ஸிக்கி²ஸ்ஸாமீ’’தி ப⁴ணனே, ஸிக்கா²பத³விவண்ணனே, இமேஸம் ‘‘ஸுத்வா ஓரமிஸ்ஸாமீ’’தி அதி⁴ப்பாயம் வினா விவாதா³பன்னானம் உபஸ்ஸுதிட்டா²னே, த⁴ம்மிகானம் கம்மானம் ச²ந்த³ம் த³த்வா பச்சா² கீ²யனத⁴ம்மாபஜ்ஜனே, ஸங்கே⁴ வினிச்ச²யே வத்தமானே ச²ந்த³ம் அத³த்வா பக்கமனே, ஸமக்³கே³ன ஸங்கே⁴ன சீவரம் த³த்வா பச்சா² கீ²யனத⁴ம்மாபஜ்ஜனே, அஞ்ஞத்ர அஜ்ஜா²ராமா அஜ்ஜா²வஸதா² வா ரதனஸ்ஸ வா ரதனஸம்மதஸ்ஸ வா உக்³க³ண்ஹனஉக்³க³ஹாபனே பாசித்தியந்தி.

பாசித்தியனித்³தே³ஸவண்ணனா நிட்டி²தா.