13. ஸமணகப்பனித்³தே³ஸவண்ணனா

125. ஸமணகப்பாதி ஸமணவோஹாரா. ப⁴வந்தி, அஹேஸுந்தி வா பூ⁴தா, வத்தமானே, பூ⁴தே வா தப்பச்சயோ. விருள்ஹமூலாதி³பா⁴வம் ஆபஜ்ஜித்வா வட்³ட⁴மானகானம், வட்³டி⁴த்வா மஹந்தபா⁴வம் பத்தானஞ்ச ருக்க²லதாதி³ஸங்கா²தானம் பூ⁴தானம் கா³மோ, பூ⁴தா ஏவ வா கா³மோ ஸமூஹோ பூ⁴தகா³மோ. தஸ்ஸ ஸமாரம்போ⁴ சே²த³னபா²லனாதி³, தஸ்மிம். நிமித்தத்தே² சேதம் பு⁴ம்மம், தம்ஹேது பாசித்தியம் ஹோதீதி அத்தோ². கதகப்பியம் ஸமணகப்பியம் ப⁴வேதி ஸம்ப³ந்தோ⁴. தத்த² கதம் கப்பியம் யஸ்ஸாதி ப³ஹுப்³பீ³ஹி. கேனாதி ஆஹ ‘‘நகே²னா’’திஆதி³.

126. இதா³னி யஸ்ஸ ஸமாரம்போ⁴, தம் பூ⁴தகா³மம் விப⁴ஜித்வா த³ஸ்ஸேதும் ‘‘ஸ மூலா’’திஆதி³ ஆரத்³த⁴ம். ஸோதி பூ⁴தகா³மோ. ப⁴விதும் உப்பஜ்ஜிதும் பயோஜேதீதி காரிதந்தா தப்பச்சயோ, பபா⁴விதோ உப்பாதி³தோதி அத்தோ². அத² வா பப⁴வனம் பப⁴வோ, உப்பத்தி, ஸோவ பப⁴வோ, பபா⁴வம் கரோதீதி நாமதா⁴துதோ கத்தரி தப்பச்சயோ, பபா⁴விதோ உப்பன்னோதி அத்தோ². மூலஞ்ச க²ந்தோ⁴ ச பீ³ஜஞ்ச அக்³க³ஞ்ச ப²ளு ச மூல…பே… ப²ளூனி. ப²ளு நாம பப்³ப³ம். தானியேவ பீ³ஜானி, தேஹி பபா⁴விதோ உப்பாதி³தோ, அத² வா தேஹி அவதி⁴பூ⁴தேஹி, காரணபூ⁴தேஹி வா பபா⁴விதோ உப்பன்னோதி கமேன விகப்பத்³வயே ஸமாஸத்³வயம் வேதி³தப்³ப³ம். தத்த² மூலபீ³ஜம் நாம ஹலித்³தி³ஸிங்கி³வேராதி³.

க²ந்த⁴பீ³ஜம் நாம அஸ்ஸத்த²னிக்³ரோதா⁴தி³. பீ³ஜபீ³ஜம் நாம புப்³ப³ண்ணாபரண்ணாதி³. அக்³க³பீ³ஜம் நாம ஹிரிவேராதி³. ப²ளுபீ³ஜம் நாம உச்சு²னளாதி³. தத்த² மூலபீ³ஜாதீ³னி பஞ்ச பீ³ஜகா³மோ. தன்னிப்³ப³த்தோ ருக்க²லதாதி³ பூ⁴தகா³மோ.

இதா³னி தேஸு பீ³ஜகா³மஸமாரம்பே⁴ து³க்கடம் த³ஸ்ஸேதி அபரத்³தே⁴ன. பூ⁴தகா³மவியோஜிதம் பீ³ஜம் ஆரம்பே⁴ து³க்கடந்தி ஸம்ப³ந்தோ⁴. பூ⁴தகா³மதோ வியோஜிதந்தி தப்புரிஸோ. பீ³ஜந்தி பூ⁴மியம் ரோபிதமரோபிதம்பி நிக்³க³தவித³த்தி²மத்தபத்தவட்டிபி மூலபீ³ஜானி. ‘‘ஆரம்பே⁴’’தி கிதகபச்சயஸ்ஸ யோகே³ அவுத்தே கம்மனி ச²ட்டு²ப்பத்தியம் விகப்பேன உப⁴யத்த² து³தியா. ஆரம்பே⁴தி ஸமாரம்பே⁴. தஸ்மா ‘‘இமம் புப்ப²ம் ப²லம் வா ஜான, இமம் கப்பியம் கரோஹீ’’திஆதி³னா கப்பியவசனேன பூ⁴தகா³மதோ வியோஜிதம் பீ³ஜஜாதம் பீ³ஜகா³மபரிமோசனத்த²ம் புன கப்பியம் காராபேத்வா பரிபு⁴ஞ்ஜிப⁴ப்³ப³ம். ‘‘அனுஜானாமி, பி⁴க்க²வே, பஞ்சஹி ஸமணகப்பேஹி ப²லம் பரிபு⁴ஞ்ஜிதும் அக்³கி³பரிஜிதம் ஸத்த²பரிஜிதம் நக²பரிஜிதம் அபீ³ஜம் நிப்³ப³த்தபீ³ஜஞ்ஞேவ பஞ்சம’’ந்தி (சூளவ. 250) வுத்தேஸு பஞ்சஸு நக²பரிஜிதாதீ³னி தீணி த³ஸ்ஸிதானி.

127. இதா³னி அவஸிட்டா²னி த்³வே த³ஸ்ஸேதும் ‘‘நிப்³ப³த்தபீ³ஜ’’ந்திஆதி³கம் பட²மத்³த⁴ம் ஆஹ. தத்த² நிப்³ப³த்தபீ³ஜந்தி நிப்³ப³த்தனியந்தி நிப்³ப³த்தம், நிபுப்³ப³ வது வத்தனேதிமஸ்மா தப்பச்சயோ, நிப்³ப³த்தம் பீ³ஜம் யஸ்ஸ தம் நிப்³ப³த்தபீ³ஜம், பீ³ஜம் நிப்³ப³த்தேத்வா விஸும் கத்வா பரிபு⁴ஞ்ஜிதப்³ப³ம் அம்ப³பனஸாதி³. நோபீ³ஜம் நாம தருணம்ப³ப²லாதி³. இதா³னி பீ³ஜகா³மபூ⁴தகா³மேஸு கப்பியகரணப்பகாராதி³விஸேஸம் த³ஸ்ஸேந்தோ ‘‘கடாஹா’’திஆதி³மாஹ. தத்த² கடாஹேன ப³த்³த⁴ம் பீ³ஜம் யேஸந்தி பா³ஹிரத்தோ².

128. பா⁴ஜனே பூ⁴மியம்பி வா ஏகாப³த்³தே⁴ஸு பீ³ஜேஸு ஏகஸ்மிஞ்ச கப்பியே கதேதி யோஜனா. பீ³ஜேஸூதி பீ³ஜகா³மபூ⁴தகா³மேஸு. பூ⁴தகா³மோபி ஹி இத⁴ ‘‘பீ³ஜ’’ந்தி ருள்ஹீவஸேன வுச்சதி.

129. நிக்கி²த்தேதி ட²பிதே. கப்பியம் புன கரேய்யாதி ஜாதமூலபண்ணபா⁴வதோ பூ⁴தகா³மத்தா பூ⁴தகா³மதோ பரிமோசிதம் பீ³ஜகா³மபரிமோசனத்த²ம் புன கப்பியம் காரேய்யாதி அத்தோ². தேனாஹ ‘‘பூ⁴தகா³மோ ஹி ஸோ ததா³’’தி. ஹி-ஸத்³தோ³ ஹேதும்ஹி. ததா³தி மூலே ச பண்ணே ச ஜாதகாலே ஸசே மூலமத்தம் ஸஞ்ஜாயதி, உபரிபா⁴கே³ ஸசே அங்குரோ ஜாயதி, ஹேட்டா²பா⁴கே³ சி²ந்தி³தும் வட்டதி. மூலமத்தேஸு வா பன பண்ணமத்தேஸு வா நிக்³க³தேஸு ஸசேபி ரதனப்பமாணாபி ஸாகா² நிக்க²மந்தி, பீ³ஜகா³மஸங்க³ஹிதா ஹோந்தி.

130. உத³கஸம்ப⁴வோ ஸேவாலோ ச சேதியாதீ³ஸு ஸேவாலோ ச பூ⁴தகா³மோவாதி ஸம்ப³ந்தோ⁴. ஆதி³-ஸத்³தே³ன பாகாராதி³க்³க³ஹணம். யதி³ த்³வே தீணி பண்ணானி ந ஜாயந்தி, அக்³க³பீ³ஜஸங்க³ஹம் க³ச்ச²தி. ஸுக்கோ² பன ஸம்மஜ்ஜிதப்³போ³. மூலபண்ணே வினிக்³க³தே பீ³ஜோபி பூ⁴தகா³மோவாதி ஸம்ப³ந்தோ⁴. பண்ணேதி இமினா அங்குரமத்தம் படிக்கி²பதி.

131. க⁴டாதி³பிட்டே² ஸேவாலோ ச அஹிச²த்தகமகுளஞ்ச து³க்கடஸ்ஸேவ வத்தூ²னீதி ஸம்ப³ந்தோ⁴. பிட்டே²தி இமினா அந்தோ அப்³போ³ஹாரிகோதி த³ஸ்ஸேதி. பு²ல்லந்தி பு²ல்லிதம் அஹிச²த்தகம். அப்³யவஹாரிகந்தி ஆபத்திவோஹாரயோக்³க³ம் ந ஹோதீதி அத்தோ².

132. அல்லருக்கே² லாகா²னிய்யாஸச²த்தானி விகோபிய க³ண்ஹதோ தத்த² அக்க²ரம் சி²ந்த³தோ வாபி பாசித்தீதி ஸம்ப³ந்தோ⁴. தத்தா²தி அல்லருக்கே². ‘‘விகோபய’’ந்தி போத்த²கேஸு பாடோ² தி³ஸ்ஸதி, ஸோ அபாடோ² பட²மந்ததாய காரணாபா⁴வதோ. ‘‘விகோபியா’’தி பன பாடோ² க³ஹேதப்³போ³. விகோபியாதி இமினா அவிகோபேத்வா க³ஹணே அனாபத்தீதி தீ³பேதி.

133. தா³ருமக்கடகாதி³னாதி ஆணிம் கோட்டேத்வா தா³ருயந்தம் கத்வா தத்த² கண்டகம் ஓலம்பே³ந்தி, ஏதம் தா³ருமக்கடகம் நாம. ஆதி³-ஸத்³தே³ன கண்டகப³ந்த⁴னாதீ³னம் க³ஹணம். திணாதி³ம் சி²ந்தி³தும், க³ண்டி²கம் காதுஞ்ச ந கப்பதீதி யோஜனா. சி²ந்தி³துந்தி சி²ந்த³னம்.

134. பூ⁴தகா³மம் வாதி பூ⁴தகா³மம் வா. பீ³ஜம் வாதி பீ³ஜகா³மம் வா. ‘‘சி²ந்த³ வா’’திஆதி³னா ஸப்³ப³த்த² வா-ஸத்³தோ³ யோஜேதப்³போ³. பச வாதி பசனம் கரோஹீதி வா. ‘‘பட’’ இதி வா பாடோ², தஸ்ஸ உப்பாதே³ஹீதி அத்தோ². ‘‘இமம் ருக்க²ம் சி²ந்தா³ஹீ’’திஆதி³னா பன அவத்வா ‘‘ருக்க²ம் சி²ந்தா³’’திஆதி³னா அனியமேத்வா வத்தும் வட்டதி.

135. இமந்தி ஏதம் ருக்கா²தி³ம். இமம் ஸோதே⁴ஹீதி ஏத்த² இதி-ஸத்³த³ம் கத்வா அத்தோ² வத்தப்³போ³தி.

ஸமணகப்பனித்³தே³ஸவண்ணனா நிட்டி²தா.