14. பூ⁴மினித்³தே³ஸவண்ணனா

136. யாஸு வுத்த²ம் பக்கஞ்ச கப்பதி, தா கப்பியா பூ⁴மியோ ஸம்முதி ச ஸம்முதிகுடி ச…பே… க³ஹபதி ச க³ஹபதிகுடி சாதி இமா சதஸ்ஸோ ஹோந்தீதி யோஜேத்வா அத்தோ² வேதி³தப்³போ³. தத்த² பே⁴ஸஜ்ஜக்க²ந்த⁴கே (மஹாவ. 295) வுத்தாய உத்திது³தியகம்மவாசாய, அபலோகனகம்மவஸேன வா ஸாவேத்வா ஸம்மா உத்திஸம்பன்னம் கரீயதீதி ஸம்முதி, த²ம்பா⁴னம் பி⁴த்திபாதா³னம் வா உக்³க³மனம் உத்³த⁴ம் கத்வா ட²பனம், ‘‘கப்பியகுடிம் கரோமா’’தி வாசாய ஸாவனஞ்ச அந்தம் யஸ்ஸா ஸா உஸ்ஸாவனந்தா. ததா² ச வுத்தம் ‘‘த²ம்ப⁴ப்பதிட்டா²னஞ்ச வசனபரியோஸானஞ்ச ஸமகாலம் வட்டதீ’’தி (மஹாவ. அட்ட². 295). நிஸாத³னம் பவிஸனம் ஸன்னிவேஸனம் நிஸாதோ³, கு³ன்னம் விய நிஸாதோ³ ஏதிஸ்ஸாதி கோ³னிஸாதி³. பி⁴க்கு²ம் ட²பேத்வா ஸேஸஸஹத⁴ம்மிகா ஸப்³பே³ ச தே³வமனுஸ்ஸா இத⁴ க³ஹபதீதி ஸாமஞ்ஞேன அதி⁴ப்பேதா. ஏத்த² பன க³ஹபதிஸம்ப³ந்தி⁴னீ குடி தீ³கே⁴ன க³ஹபதீ.

‘‘யம் பன அகப்பியபூ⁴மியம் ஸஹஸேய்யப்பஹோனகே கே³ஹே வுத்த²’’ந்தி (மஹாவ. அட்ட². 295) அட்ட²கதா²வசனதோ யம் ஸங்கோ⁴ ஆகங்க²தி விஹாரம் வா அட்³ட⁴யோக³ம் வா பாஸாத³ம் வா ஹம்மியம் வா கு³ஹம் வா லேணாதி³ம் வா, தேஸம்பி ஸாமஞ்ஞவசனம் விஞ்ஞாயதீதி தம்தம்லக்க²ணப்பத்தா ஸஹஸேய்யப்பஹோனகா லேணாத³யோ சதூஸ்வேவ குடீஸு அந்தோக³தா⁴தி வேதி³தப்³ப³ம். இமாஸு சதூஸு ஸஹஸேய்யப்பஹோனகே பதே³ஸே யம் ஸங்கி⁴கம் புக்³க³லிகம் வா பி⁴க்கு²ஸந்தகம் ஏகரத்தம்பி அந்தோவுத்த²ம் அனுபஸம்பன்னேன பக்கஞ்ச யாவகாலிகம் யாமகாலிகஞ்ச அந்தோவுத்த²அந்தோபக்கஸங்க²ம் ந க³ச்ச²தி, கோ பன வாதோ³ இதரத்³வயே. தம் பன அகப்பியபூ⁴மியம்பி வுத்த²ம் பக்கஞ்ச வட்டதி. தேன வுத்தம் ‘‘யாஸு வுத்த²ம் பக்கஞ்ச கப்பதீ’’தி.

137. வாஸத்தா²ய கதே ஸங்கி⁴கே வா ஏகஸந்தகே வா ஸஹஸேய்யப்பஹோனகே கே³ஹே கப்பியாகுடி லத்³த⁴ப்³பா³தி ஸம்ப³ந்தோ⁴. தத்த² வாஸத்தா²யாதி இமினா அவாஸத்தா²ய கதம் நிவத்தேதி. ஏகஸந்தகேதி ஏகஸ்ஸ பி⁴க்கு²னோ ஸந்தகே. கப்பியாகுடீதி பா⁴வப்பதா⁴னோயம் நித்³தே³ஸோ, ந ஹி கே³ஹே கே³ஹம் லத்³து⁴ம் யுஜ்ஜதீதி கப்பியகுடிதாதி அத்தோ². தீ³கோ⁴ பன கா³தா²வஸேன, கப்பியா குடிதாதி வா விஸேஸனவஸேன த³ட்ட²ப்³ப³ம். ஸஹஸேய்யப்பஹோனகேதி ஏத்த² ஸஹஸேய்யப்பஹோனகம் வாஸாகா³ரலக்க²ணே வுத்தலக்க²ணம் ஸேனாஸனம்.

138. இதா³னி தா குடியோ கமேன த³ஸ்ஸேத்வா தத்த² படிபஜ்ஜிதப்³ப³விதி⁴ம், தாஸம் ஸப்³ப³தா²பக³மஞ்ச த³ஸ்ஸேதும் ‘‘கே³ஹே’’திஆதி³மாஹ. தத்த² ‘‘கப்பியகுடிம் கரோம, கப்பியகுடிம் கரோமா’’தி ஏவமீரயந்தி ஸம்ப³ந்தோ⁴. இட்ட²கா ச த²ம்பா⁴ ச ‘‘இட்ட²காத²ம்பா⁴’’தி வத்தப்³பே³ ரஸ்ஸோ. இட்ட²கத²ம்பா⁴ ஆதி³ யஸ்ஸ பி⁴த்திபாஸாத³ஸ்ஸாதி ப³ஹுப்³பீ³ஹி. பச்சா² பட²மஸத்³தே³ன கம்மதா⁴ரயோ. ‘‘ட²பேய்ய சே, ஸா உஸ்ஸாவனந்திகா’’தி ஏவம் சே-ஸா-ஸத்³தே³ யோஜேத்வா அத்தோ² வேதி³தப்³போ³.

139. ஸகலோ அபரிக்கி²த்தோ ஆராமோபி வாதி ஸம்ப³ந்தோ⁴. ஸேனாஸனம் பரிக்கி²த்தம் வா ஹோது, அபரிக்கி²த்தம் வா, ந தம் பமாணம்.

140. அஞ்ஞேஹி கப்பியகுடியா அத்தா²ய தி³ன்னோ வா தேஸம் ஸந்தகோ வாதி யோஜனா.

141. அவிரோத⁴பா⁴வேன கப்பனீயா கப்பா, கப்ப ஸாமத்தி²யமிச்சேதஸ்மா இத்தி²யம் ஆபச்சயே ரூபம், ந கப்பா அகப்பா, அகப்பா ச ஸா குடி சேதி அகப்பகுடி, தாய. ஸப்பிஆதீ³தி இமினா ஸத்தாஹகாலிகம் யாவஜீவிகஞ்ச க³ஹிதம்.

142. தேஹேவாதி அகப்பகுடியம் வுத்த²ஸப்பிஆதீ³ஹி ஏவ ஸத்³தி⁴ம் ஸத்தாஹகாலிகஸம்ஸட்ட²தாய ‘‘ஸத்தாஹம் கப்பதே’’தி வுத்தம். ஸாமிஸேதி ஆமிஸஸங்கா²தேன புரிமத்³வயேன ஸஹிதே. ஸாமபாகதாதி ஸாமம் அத்தனா பாகோ ஏதஸ்ஸாதி ஸாமபாகம், ஸத்தாஹகாலிகேன ஸஹ பக்கம் ஸாமிஸம் யாவஜீவிகம், தஸ்ஸ பா⁴வோ ஸாமபாகதா. ஸயம் பக்கம் தம் அத்தனா ஸம்ஸட்ட²தாய தம்பி ஆமிஸம் ஸாமபாகக³திகம் கரோதீதி தஸ்ஸ ஸாமபாகதா ஹோதீதி அதி⁴ப்பாயோ.

143. அதி⁴ட்டி²தாதி பதிட்டி²தா. ஏவ-ஸத்³தோ³ திட்ட²திஸத்³த³ஸ்ஸ அந்தே த³ட்ட²ப்³போ³.

144. ஸப்³பே³ஸூதி த²ம்பா⁴தீ³ஸு ஸகலேஸு. ஜஹிதம் வத்து² குடிபூ⁴மி யஸ்ஸா ஜஹிதவத்து²கா. பரிக்கி²த்தே ஜஹிதவத்து²காதி ஸம்ப³ந்தோ⁴. ஸேஸாதி இதரா த்³வே குடியோ. ச²த³னவிப்³ப⁴மாதி ச²த³னஸ்ஸ வினாஸா. ஏத்தா²பி ‘‘ஜஹிதவத்து²கா’’தி ஆனேதப்³ப³ந்தி.

பூ⁴மினித்³தே³ஸவண்ணனா நிட்டி²தா.