15. உபஜ்ஜா²சரியவத்தனித்³தே³ஸவண்ணனா

145. ‘‘இத³ம் தயா து³க்கதம், து³ப்³பா⁴ஸித’’ந்திஆதீ³னி வத்வா சோத³னதோ, அத்தனோ வஜ்ஜம் அஸ்ஸரந்தஸ்ஸ ஸதுப்பாத³வஸேன ஸாரணதோ, ஸம்மா படிபத்தியம் ஸாரணதோ பவத்தாபனதோ வா வஜ்ஜாவஜ்ஜம் உபனிஜ்ஜா²யதி பு⁴ஸம் சிந்தேதீதி உபஜ்ஜா². உபஜ்ஜா² ஏவ உபஜ்ஜா²யோ. ‘‘ஏவம் தயா பு³த்³த⁴வசனம் ஸஜ்ஜா²யிதப்³ப³ம், ஏவம் அதிக்கமிதப்³ப³ம், ஏவம் படிக்கமிதப்³ப³’’ந்திஆதி³னா ஆசாரஸிக்கா²பனே ஆசரதி பவத்ததீதி ஆசரியோ. ஸோ ச நிஸ்ஸயபப்³ப³ஜ்ஜாஉபஸம்பதா³த⁴ம்மாசரியவஸேன சதுப்³பி³தோ⁴. உபஜ்ஜா² ச ஆசரியோ ச உபஜ்ஜா²சரியா, தே. நிஸ்ஸாய வஸமானோதி இமினா நிஸ்ஸயபப்³ப³ஜ்ஜாஉபஸம்பதா³த⁴ம்மந்தேவாஸிகேஸு யோ நிஸ்ஸாய வஸதி, தம் த³ஸ்ஸேதி. சதூஸு ஹி தேஸு நிஸ்ஸயந்தேவாஸிகேன யாவ ஆசரியம் நிஸ்ஸாய வஸதி, தாவஸப்³ப³ம் ஆசரியவத்தம் காதப்³ப³ம், நேதரேஹி. இதரேஹி, நிஸ்ஸயமுத்தகேஹிபி யாவ சீவரரஜனம், தாவ ச அரதிவினோத³னாதி³கஞ்ச வத்தம் காதப்³ப³ம். அனாபுச்சி²த்வா பத்தசீவரதா³னாதி³ம்ஹி பன ஏதேஸம் அனாபத்தி. ஸத்³தி⁴விஹாரிகஸ்ஸ பன உபஜ்ஜா²யானம் யாவ சீவரரஜனம், தாவ ச அரதிவினோத³னாதி³கஞ்ச அகரோந்தஸ்ஸ நிஸ்ஸயமுத்தகஸ்ஸாபி அமுத்தகஸ்ஸாபி ஆபத்தியேவ. ஏகச்சஸ்ஸ பத்ததா³னாதி³தோ பட்டா²ய அமுத்தனிஸ்ஸயஸ்ஸேவ ஆபத்தி. தேஸு மஜ்ஜே² த்³வே ஆசரியஸ்ஸ யாவஜீவம் பா⁴ரா. இதரே பன யாவ ஸமீபே வஸந்தி, தாவதே³வ, தஸ்மா ஆசரியேனாபி தேஸு ஸம்மா வத்திதப்³ப³ம், உபஜ்ஜா²யேன ஸத்³தி⁴விஹாரிகேஸு வத்தப்³ப³மேவ நத்தி². ஸுபேஸலோதி பியம் ஸீலமஸ்ஸாதி பேஸலோ, வுத்³தி⁴, ய-லோபேன ஈ-காரஸ்ஸ அத்தகரணேன, ஸுட்டு² பேஸலோ ஸுபேஸலோ, ஸிக்கா²காமோதி அத்தோ². ‘‘த³ந்தகட்ட²’’ந்திஆதி³ ‘‘த³தே³’’திமஸ்ஸ கம்மம். த³தே³தி ஸம்மா ஆத³ரேன யதா²தி⁴ப்பாயம் த³தே³ய்யாதி அத்தோ². காலேதி தத³னுரூபே காலே.

146. பத்தே ச…பே… சீவரே ச வத்தம் சரேதி ஸம்ப³ந்தோ⁴. சரேதி கரேய்ய. தத்த² நீசம் கத்வா ஸாது⁴கம் அபரிக⁴ம்ஸந்தேன தோ⁴வனம், முஹுத்தம் உண்ஹே ஓதாபனம், ட²பனட்டா²னம் உபபரிக்கி²த்வா சம்மாதி³னா கேனசி அந்தரஹிதாய நிக்கி²பனம் பத்தே வத்தம். கா³மம் பவிஸந்தானம் நிவாஸனகாயப³ந்த⁴னஸங்கா⁴டிதா³னம், தோ⁴வித்வா ஸோத³கபத்தஸ்ஸ தா³னம் கா³மப்பவேஸே வத்தம். யதி³ ஆகங்க²ந்தி, பரிமண்ட³லம் நிவாஸேத்வா ச பாருபித்வா ச நாதிதூ³ரனச்சாஸன்னே க³மனம், பத்தபரியாபன்னக்³க³ஹணஞ்ச க³மனே வத்தம். நிவத்தேந்தே பன பட²மதரம் ஆக³ந்த்வா ஆஸனபஞ்ஞாபனம், பாதோ³த³காதி³உபனிக்கி²பனம், பத்தசீவரப்படிக்³க³ஹணம் ஆக³மே ஆக³மனே வத்தம். ப⁴ணந்தானம் அந்தரா கதா²அனோபாதனம் ஸப்³ப³த்த² வத்தம். ஆஸனபஞ்ஞாபனம், உட்டி²தேஸு ஆஸனஉத்³த⁴ரணம், பாத³பீட²கத²லானம் உபனிக்கி²பனம், படிஸாமனஞ்ச ஆஸனே பாத³பீடே² பாத³கத²லே ச வத்தம். தோ⁴தபாத³ட்ட²பனகம் பாத³பீட²ம். அஞ்ஞம் கத²லம். உபாஹனா ச சீவரஞ்சாதி த்³வந்தோ³, தஸ்மிம். ஸுக்க²அல்லசோளேஹி புஞ்ச²னம் உபாஹனாய வத்தம். ஸின்னசீவரஸ்ஸ முஹுத்தம் ஓதாபனம், சதுரங்கு³லம் கண்ணம் உஸ்ஸாரேத்வா சீவரஸம்ஹரணஞ்ச சீவரே வத்தம்.

147. பரிபோ⁴ஜனீய…பே… பஸ்ஸாவட்டா²னிஸு ச விஹாரஸோத⁴னே ச புன பஞ்ஞாபனே ச வத்தம் ததா²தி ஸம்ப³ந்தோ⁴. வச்சஞ்ச பஸ்ஸாவோ ச வச்சபஸ்ஸாவா. திட்ட²தி ஏத்தா²தி டா²னீ, குடி. வச்சபஸ்ஸாவானம் டா²னீதி தப்புரிஸோ. அத² வா திட்ட²தி ஏத்தா²தி டா²னம், ஸோயேவ ஸமாஸோ, வச்சபஸ்ஸாவஸ்ஸ ச பதனட்டா²னம், தம் அஸ்ஸ அத்தீ²தி இட்ட²கே³ஹாதி³. பரிபோ⁴ஜனீயஞ்ச பானீயஞ்ச வச்சபஸ்ஸாவட்டா²னீ ச பரி…பே… ட்டா²னீ. தாஸு தேஸு வா. பாதோ³த³கஉண்ஹஸீதனஹானோத³கப்படியாதா³பனம் பரிபோ⁴ஜனீயே வத்தம். பாதப்³ப³பானீயேன புச்ச²னம் உபட்டா²பனஞ்ச பானீயே வத்தம். ஸம்மஜ்ஜனபானீயஉபட்டா²பனம் வச்சபஸ்ஸாவட்டா²னீஸு வத்தம். பட²மம் பத்தசீவராதீ³னி ஹராபேத்வா ஏகமந்தே நிக்கி²பனாதி³, உல்லோகதோ பட்டா²ய மக்கடஸந்தானம் ஓஹாரேத்வா ஸம்மஜ்ஜனஞ்ச விஹாரஸோத⁴னே வத்தம். ஓதாபேத்வா ஸோதே⁴த்வா பப்போ²டேத்வா அதிஹரித்வா யதா²டா²னே பூ⁴மத்த²ரணாதி³பஞ்ஞாபனம் புன பஞ்ஞாபனே வத்தம். ததா²தி இமினா ‘‘சரே’’தி இத³ம் அதிதி³ஸதி.

148. விஹாரம் ஸோதே⁴ந்தோ பி⁴க்கு² படிவாதே வா ஸங்க³ணே வா பானீயஸாமந்தா வா ஸயனாஸனம் ந பப்போ²டேய்யாதி ஸம்ப³ந்தோ⁴. பானீய-ஸத்³தே³ன பரிபோ⁴ஜனீயஞ்ச ஸங்க³ஹிதம். படிவாதேதி உபரிவாதே. ஸங்க³ணேதி ப³ஹூனம் ஸமோஸரணே விவடப்பதே³ஸே. ஸயனாஸனம் நாம பூ⁴மத்த²ரணமஞ்சாதி³.

149. ந்ஹானே வத்தம் சரே, ந்ஹாதஸ்ஸ காதப்³பே³ சரேதி ஸம்ப³ந்த⁴ஸ்ஸ புரிஸாதீ⁴னதாய ஸம்ப³ந்தோ⁴ வேதி³தப்³போ³. சீவரப்படிக்³க³ஹணக³த்தபரிகம்மகரணம் நஹானே வத்தம். காதப்³பே³ சரேதி க³த்ததோ உத³கஸம்மஜ்ஜனனிவாஸனதா³னாதி³கிச்சே பவத்தேய்யாதி அத்தோ². ‘‘வனப்பகு³ம்பே³’’திஆதீ³ஸு விய ஸிஸ்ஸ ஏ-காராதே³ஸம் ரூபம், தஸ்மா காதப்³ப³ம் வத்தம் சரேய்யாதி யோஜேத்வா வேதி³தப்³ப³ம். பு³தா⁴ பன ‘‘ந்ஹானே ந்ஹாதஸ்ஸ காதப்³பே³ வத்தம் சரே’’தி யோஜேத்வா அத்த²ம் வத³ந்தி. ஏவம் ஸதி காதப்³ப³-ஸத்³த³ஸ்ஸ கம்மஸாத⁴னத்தா வத்தமேவ காதப்³ப³ம் நாமாதி ‘‘வத்தே வத்தம் சரே’’தி வுத்தம் விய ஹோதீதி விருஜ்ஜ²தி. ‘‘நஹாதேன நஹாதஸ்ஸா’’தி வா பாடோ², உத³கே க³த்தபரிகம்மேன தே²ரம் பட²மம் நஹாபேத்வா ஸயம்பி நஹாதேனாதி அத்தோ². பாளியம்பி ‘‘நஹாதேன பட²மதரம் உத்தரித்வா’’தி (மஹாவ. 67) அத்தி². அத² ரங்க³பாகே தோ⁴வனே ஸிப்³ப³னே ச வத்தம் சரேதி ஸம்ப³ந்தோ⁴, ரஜனபாகே சீவரதோ⁴வனே சீவரஸிப்³ப³னே சாதி அத்தோ². ரஜந்தோ சீவரே தே²வே டி²தே ந வஜேதி ஸம்ப³ந்தோ⁴. ரஜந்தோதி சீவரம் ரஜந்தோ. தே²வேதி ரஜனபி³ந்து³ம்ஹி.

150. ஏகச்சஸ்ஸாதி ஆசரியுபஜ்ஜா²யானம் வேரினோ புக்³க³லஸ்ஸ பத்தம் வா சீவரானி வா கிஞ்சனம் பரிக்கா²ரம் வா ந த³தே³ய்ய ந க³ண்ஹேய்ய வாதி ஸம்ப³ந்தோ⁴. தத்த² ந த³தே³ய்ய ந க³ண்ஹேய்யாதி படிஸாமனத்தா²யபி ந த³தே³ய்ய, ந க³ண்ஹேய்ய வாதி அத்தோ². ‘‘ஆகிஞ்சன’’ந்திஆதீ³ஸு விய கிஞ்சன-ஸத்³தோ³ த³ட்ட²ப்³போ³, தஸ்ஸ கிஞ்சீதி அத்தோ². கிஞ்சினந்தி வா பாடோ², கிஞ்சி நம் பரிக்கா²ரந்தி யோஜனா. பத³ஸித்³தி⁴வஸேனேத்த² நந்தி த-ஸத்³த³ப்பயோகோ³ கதோ.

151-2. பச்ச²தோ காதுந்தி பச்சா²ஸமணம் காதும். தஸ்ஸாதி ஏகச்சஸ்ஸ. பச்ச²தோதி பச்சா²ஸமணோ ஹுத்வா. நின்னேதுந்தி ஏகச்சஸ்ஸ நீஹரிதும். ஸப்³ப³த்த² அனாபுச்சா² ந வட்டதீதி யோஜேதப்³ப³ம். கிச்சயம் வாதி வேய்யாவச்சாதி³ யம் கிஞ்சி கிச்சம் வா. கிச்சமேவ கிச்சயம், கஸ்ஸ யோ ‘‘ஸேனியோ’’திஆதீ³ஸு விய. பரிகம்மம் வாதி பிட்டி²பரிகம்மாதி³பரிகம்மம். அத்தனோ காராபேதும் வாதி ஏகச்சேன அத்தனோ காராபேதும் வா. காதும் வாதி தஸ்ஸ அத்தனா காதும் வா.

153. ஸீமதோ நிக்³க³தா ப³ஹிபூ⁴தா நிஸ்ஸீமா, தம். ஆசரியுபஜ்ஜா²யேஸு அவத்வா தூ³ரம் பி⁴க்கா²சாரம் க³தேஸுபி அபஸ்ஸந்தேன கா³மோ பவிஸிதப்³போ³. தி³ட்ட²ட்டா²னதோ பட்டா²ய பன ஆபுச்சி²தும்யேவ வட்டதி. அத்தனோ கிச்சயம் வாபீதி அத்தனோ ஸீமாயபி பத்தபசனசீவரரஜனாதி³கம் ஸகம் கரணீயம் வாபி காதும்.

154. அரதிந்தி ஸாஸனே அனபி⁴ரதிம். ஸங்கா⁴யத்தேஸு கம்மேஸூதி பரிவாஸாதி³தஜ்ஜனீயாதீ³ஸு ஸங்க⁴ப்படிப³த்³தே⁴ஸு கம்மேஸு. உஸ்ஸுக்கம் வாபீதி ஆசரியுபஜ்ஜா²யேஸு க³ருத⁴ம்மம் அஜ்ஜா²பன்னேஸு, கம்மாரஹேஸு ச ‘‘கிந்தி நு கோ² ஸங்கோ⁴ பரிவாஸம் த³தே³ய்யா’’திஆதி³னா உஸ்ஸாஹம் வாபி.

155. கி³லானேஸு உபட்டே²ய்யாதி ‘‘பஞ்சஹி, பி⁴க்க²வே, அங்கே³ஹி ஸமன்னாக³தோ கி³லானுபட்டா²கோ அலம் கி³லானம் உபட்டா²தும், படிப³லோ ஹோதி பே⁴ஸஜ்ஜம் ஸம்விதா⁴தும், ஸப்பாயாஸப்பாயம் ஜானாதி, அஸப்பாயம் அபனாமேதி, ஸப்பாயம் உபனாமேதி, மேத்தசித்தோ கி³லானம் உபட்டா²தி நோ ஆமிஸந்தரோ, அஜேகு³ச்சீ² ஹோதி உச்சாரம் வா பஸ்ஸாவம் வா கே²ளம் வா வந்தம் வா நீஹாதும், படிப³லோ ஹோதி கி³லானம் காலேன காலம் த⁴ம்மியா கதா²ய ஸந்த³ஸ்ஸேதும் ஸமாத³பேதும் ஸமுத்தேஜேதும் ஸம்பஹம்ஸேது’’ந்தி (மஹாவ. 366) ஏவம் வுத்தபஞ்சங்க³ஸமன்னாக³தேன ஹுத்வா கி³லானேஸு உபட்ட²ஹேய்யாதி அத்தோ². இமினா ஸப்³பே³ஹிபி ஆசரிதப்³ப³ம் கி³லானவத்தம் உபதி³ஸதி. வுட்டா²னந்தி கே³லஞ்ஞா வுட்டி²தம். ஆக³மேதி ஆக³மேய்ய, ஓலோகேய்யாதி அத்தோ². உபஜ்ஜா²சரியேஹி ச ஸத்³தி⁴விஹாரிகஅந்தேவாஸிகேஸு யதி³ தே கி³லானா ஹோந்தி, ஆதி³தோ பட்டா²ய சீவரே ரஜனபரியோஸானஞ்ச அரதிவினோத³னாதி³கஞ்ச வத்தம், அகி³லானேஸு பன உத்³தே³ஸபரிபுச்சா² ஓவாதா³னுஸாஸனியா அனுக்³க³ஹோபத்தசீவராதி³தா³னஞ்சாதி ஸப்³ப³ம் காதப்³ப³ம். தேனேவ ஹேட்டா² வுத்தம் ‘‘தஸ்மா ஆசரியேனாபி தேஸு ஸம்மா வத்திதப்³ப³ம், உபஜ்ஜா²யேன ஸத்³தி⁴விஹாரிகேஸு வத்தப்³ப³மேவ நத்தீ²’’தி.

உபஜ்ஜா²சரியவத்தனித்³தே³ஸவண்ணனா நிட்டி²தா.