16. வச்சபஸ்ஸாவட்டா²னிகனித்³தே³ஸவண்ணனா

156. வச்சபஸ்ஸாவட்டா²னிகந்தி டா²னம்ஹி டா²னே வா ப⁴வம் வச்சபஸ்ஸாவட்டா²னிகம். யதா²வுட்³ட⁴ம் வச்சம் ந கரேய்யாதி ஸம்ப³ந்தோ⁴. யே யே வுட்³டா⁴ யதா²வுட்³ட⁴ம், ஆக³தப்படிபாடிம் ஹித்வா வுட்³ட⁴ப்படிபாடியாதி அத்தோ². வச்சந்தி உபலக்க²ணமத்தம், பஸ்ஸாவஞ்ச நஹானஞ்ச ந கரேய்யாதி அதி⁴ப்பாயோ. ததே³வ ஸமத்தே²தி ‘‘யாதானுபுப்³பி³யா’’திஆதி³னா. யாதானுபுப்³பி³யாதி யாதானம் க³தானம் அனுபுப்³பி³ அனுக்கமோ யாதானுபுப்³பி³, தாய. வச்ச…பே… தித்த²ஞ்சாதி ஏதம் தயம் லப்³ப⁴தீதி அத்தோ², பி⁴க்கு²னாதி விஞ்ஞாயதி.

157. உப்³ப⁴ஜித்வா ச ஸஹஸா ச நோ பவிஸேய்யாதி ஸம்ப³ந்தோ⁴. உப்³ப⁴ஜித்வாதி சீவரம் தூ³ரதோவ உக்கி²பித்வா. ஸஹஸாதி ஸீக⁴ம். உக்காஸித்வா பவிஸேய்யாதி யோஜனா.

158. வச்சபஸ்ஸாவதோ³ணீனம் ப³ஹீதி ஸம்ப³ந்தோ⁴. உப⁴யந்தி வச்சம்பி பஸ்ஸாவம்பி.

159. கூபேதி வச்சாவாடே. கட்ட²ந்தி அவலேக²னகட்ட²ம். ப²ருஸேனாதி க²ரேன அவலேக²னகட்டே²ன. உஹதஞ்சாபீதி அத்தனா வா பரேன வா உஹதஞ்சாபி வச்சமக்கி²தஞ்சாபீதி அத்தோ². தோ⁴வயேதி ஸதி உத³கே, உத³கே அஸதி கட்டே²னபி ஸோதே⁴ய்ய.

160. ந நிக்க²மேதி ந நிக்க²மேய்ய. சபு சபூதி அனுகரணம், விச்சா²யம் த்³வித்தே சபு சபு கத்வாதி கிரியாவிஸேஸனம். நாசமேய்யாதி ந தோ⁴வேய்ய. ஸதி பன உத³கே ஆசமிதப்³ப³ம், அஸதி யேன கேனசி புஞ்சி²த்வா க³ந்தப்³ப³ம், ஸப்³ப³ஸாதா⁴ரணட்டா²னே ச ஆசமனகும்பி⁴யா உத³கம் ந ஸேஸேதப்³ப³ம். உக்லாபந்தி கசவரம். விஸோத⁴யேதி விஹாரஸோத⁴னே விய வச்சபஸ்ஸாவகுடியோ, பரிவேணகோட்ட²கே ச ஸம்மஜ்ஜேய்ய. ஸப்³ப³த்தே²வ ச பன வத்தபே⁴தே³ து³க்கடம்.

வச்சபஸ்ஸாவட்டா²னிகனித்³தே³ஸவண்ணனா நிட்டி²தா.