8. காலிகனித்³தே³ஸவண்ணனா

84. காலிகாதி மஜ்ஜ²ன்ஹிகபச்சி²மயாமஸத்தாஹயாவஜீவப்பவத்திஸங்கா²தோ காலோ ஏதேஸமத்தீ²தி காலிகா, ஸப்³பே³பி க²ஜ்ஜபோ⁴ஜ்ஜலேய்யபேய்யஸங்கா²தா அத்தா². தே பன க³ணனபரிச்சே²த³தோ சத்தாரோ ஹோந்தி. கிம் தே அப்படிக்³க³ஹிதாபி ஸபா⁴வேனேவ காலிகவோஹாரம் லப⁴ந்தி, உதா³ஹு அஞ்ஞதா²பீதி ஆஹ ‘‘படிக்³க³ஹிதா’’தி, படிக்³க³ஹிதாயேவ தே யாவகாலிகாதி³ காலிகவோஹாரலாபி⁴னோ, நோ அஞ்ஞதா²தி அதி⁴ப்பாயோ. இதா³னி தே த³ஸ்ஸேதி ‘‘யாவகாலிக’’ந்திஆதி³னா. தத்த² அருணுக்³க³மனதோ யாவ டி²தமஜ்ஜ²ன்ஹிகோ, தாவ பரிபு⁴ஞ்ஜிதப்³ப³த்தா யாவ மஜ்ஜ²ன்ஹிகஸங்கா²தோ காலோ அஸ்ஸாதி யாவகாலிகம், பிட்ட²கா²த³னீயாதி³கம் வத்து², டி²தமஜ்ஜ²ன்ஹிகதோ பட்டா²ய தம் பரிபு⁴ஞ்ஜிதும் ந ஸக்கா, காலபரிச்சே²த³ஜானனத்த²ம் காலத்த²ம்போ⁴ வா யோஜேதப்³போ³, காலந்தரே வா ப⁴த்தகிச்சம் காதப்³ப³ம். யாவ ரத்தியா பச்சி²மஸங்கா²தோ யாமோ, தாவ பரிபு⁴ஞ்ஜிதப்³ப³தோ யாமோ காலோ அஸ்ஸாதி யாமகாலிகம். படிக்³க³ஹேத்வா ஸத்தாஹம் நிதே⁴தப்³ப³தோ ஸத்தாஹோ காலோ அஸ்ஸாதி ஸத்தாஹகாலிகம். ட²பேத்வா உத³கம் அவஸேஸம் ஸப்³ப³ம்பி படிக்³க³ஹிதம் யாவஜீவம் பரிஹரித்வா ஸதி பச்சயே பரிபு⁴ஞ்ஜிதப்³ப³தோ ஜீவஸ்ஸ யத்தகோ பரிச்சே²தோ³ யாவஜீவம், தம் அஸ்ஸ அத்தீ²தி யாவஜீவிகம்.

நனு ச அஞ்ஞத்த² விய ‘‘யாவஜீவிக’’ந்தி ஏத்த² காலஸுதியா அபா⁴வே கத²ம் ‘‘சத்தாரோ காலிகா’’தி யுஜ்ஜதீதி? யுஜ்ஜதி, ஸோக³தானம் க²ந்த⁴வினிமுத்தஸ்ஸேவ காலஸ்ஸாபா⁴வதோ ஜீவஸங்கா²தஸ்ஸ ஜீவிதிந்த்³ரியஸ்ஸ க²ந்த⁴ஸங்க³ஹிதத்தா ஸோபி காலோயேவாதி. நனு சேத்த² ‘‘யாவகாலிக’’ந்திஆதி³னா நித்³தி³ட்டா²னேவ ‘‘காலிகா’’தி வுத்தானி, ‘‘காலிகானீ’’தி வத்தப்³ப³ம் ஸியாதி? நேத³மேவம் விஞ்ஞேய்யம், ‘‘காலிக’’ந்திஆதீ³னி வத்து²ஸம்ப³ந்தே⁴ன வுத்தானி, ‘‘காலிகா’’தி பன ஸாமஞ்ஞந்தரவஸேன அத்த²ஸத்³த³ஸம்ப³ந்தே⁴ன வுத்தந்தி நத்தி² விரோதோ⁴தி.

85. இதா³னி தேஸு ‘‘பிட்ட²’’ந்திஆதி³னா யாவகாலிகம் த³ஸ்ஸேதி. தத்த² பிட்ட²ம் மூலம் ப²லந்தி பிட்ட²கா²த³னீயம் மூலகா²த³னீயம் ப²லகா²த³னீயஞ்ச. தத்த² ஸத்தன்னம் தாவ த⁴ஞ்ஞானம் த⁴ஞ்ஞானுலோமானம் அபரண்ணானஞ்ச பிட்ட²ம் பனஸலபு³ஜஅம்பா³டகதோ⁴ததாலபிட்டா²தி³கஞ்சேதி தேஸு தேஸு ஜனபதே³ஸு பகதிஆஹாரவஸேன 03 மனுஸ்ஸானம் கா²த³னீயபோ⁴ஜனீயகிச்சஸாத⁴கம் பிட்ட²ம் பிட்ட²கா²த³னீயம். ‘‘அதோ⁴தம் தாலபிட்ட²ம் கீ²ரவல்லிபிட்ட²’’ந்திஆதி³னா க³ணியமானானம் க³ணனாய அந்தோ நத்தி², கா²த³னீயபோ⁴ஜனீயகிச்சஸாத⁴கபா⁴வோயேவ பனேதேஸம் லக்க²ணம், ஸுப³ஹும் வத்வாபி இமஸ்மிம்யேவ லக்க²ணே டா²தப்³ப³ந்தி ந வித்தா²ரயாம. ஏவம் ஸப்³ப³த்த². தம்ப³கதண்டு³லேய்யாதி³மூலம் மூலகா²த³னீயம். பனஸலபு³ஜனாளிகேராதி³ப²லம் ப²லகா²த³னீயம். க²ஜ்ஜந்தி ஸக்க²லிமோத³காதி³புப்³ப³ண்ணாபரண்ணமயம் கா²த³னீயஞ்ச. கோ³ரஸோதி கீ²ரத³தி⁴தக்கஸங்கா²தோ கு³ன்னம் ரஸோ ச. த⁴ஞ்ஞபோ⁴ஜனந்தி ஸானுலோமானம் த⁴ஞ்ஞானம் ஓத³னஸத்துகும்மாஸஸங்கா²தபோ⁴ஜனஞ்ச. டீகாயம் பன ‘‘ஸானுலோமானி ஸத்தத⁴ஞ்ஞானி ச பஞ்சவித⁴போ⁴ஜனஞ்சா’’தி வுத்தம், தம் ந யுத்தம், த⁴ஞ்ஞானம் விஸும் க³ஹணே பயோஜனாபா⁴வா, பயோஜனஸம்ப⁴வே ச ப²லக்³க³ஹணேனேவ தேஸம் க³ஹணஸம்ப⁴வதோ.

யாகு³ஸூபப்பபு⁴தயோதி யாகு³ ச ஸூபஞ்ச, தம் பபு⁴தி யேஸம் தேதி ஏதே யாவகாலிகா ஹோந்தீதி ஸம்ப³ந்தோ⁴. ஏத்த² ச பபு⁴தி-ஸத்³தே³ன மச்ச²மம்ஸஸங்கா²தம் த⁴ஞ்ஞபோ⁴ஜனதோ அவஸிட்ட²ம் போ⁴ஜனஞ்ச பிட்ட²மூலப²லகா²த³னீயதோ அவஸிட்ட²ம் கந்த³கா²த³னீயம், முளாலகா²த³னீயாதி³ஞ்ச ஸங்க³ண்ஹாதி. தேஸு தீ³கோ⁴ ச பி⁴ஸகந்தா³தி³ வட்டோ ச உப்பலகண்டா³தி³ கந்த³கா²த³னீயம், பது³மமூலாதி³ ச தம்ஸதி³ஸம் ஏரகமூலாதி³ ச முளாலகா²த³னீயம், தாலாதீ³னம் களீரஸங்கா²தா மத்த²கா மத்த²ககா²த³னீயம், உச்சு²க்க²ந்தா⁴த³யோ நீலுப்பலாதீ³னம் த³ண்ட³க்க²ந்த⁴காதி³ க²ந்த⁴கா²த³னீயம், தம்ப³கதண்டு³லேய்யாதீ³னம் பண்ணம் பத்தகா²த³னீயம், உச்சு²தசோவ ஏகோ ஸரஸோ தசகா²த³னீயம், தம்ப³கஸிக்³கு³புப்பா²தி³ புப்ப²கா²த³னீயம், லபு³ஜட்டி²பனஸட்டி²ஆதி³கம் அட்டி²கா²த³னீயம்.

86. ‘‘மதூ⁴’’திஆதி³னா யாமகாலிகம் த³ஸ்ஸேதி. மது⁴ ச முத்³தி³கா ச ஸாலூகஞ்ச சோசஞ்ச மோசஞ்ச அம்ப³ஞ்ச ஜம்பு³ சாதி த்³வந்தோ³. முத்³தி³கா ப²லேபி இத்தி²யம், ப²லே ஸேஸா நபும்ஸகே, ‘‘ஜம்பு³’’ இதி ப²லவாசீ நபும்ஸகஸத்³த³ந்தரம், ததோ ஜாதம் மது⁴பானாதி³ மது⁴…பே… ஜம்பு³ஜம், தஞ்ச பா²ருஸஞ்ச பானகந்தி யோஜனா. தத்த² மது⁴ஜம் பானம் நாம முத்³தி³கானம் ஜாதிரஸம் உத³கஸம்பி⁴ன்னம் கத்வா கதபானம். தம் அத்தனா கதம் புரேப⁴த்தமேவ ஸாமிஸம் நிராமிஸம்பி வட்டதி. அனுபஸம்பன்னேஹி கதம் லபி⁴த்வா பன புரேப⁴த்தம் படிக்³க³ஹிதம் புரேப⁴த்தம் ஸாமிஸம்பி வட்டதி, பச்சா²ப⁴த்தம் பன நிராமிஸமேவ வட்டதி. ஏஸ நயோ ஸப்³ப³பானேஸு. முத்³தி³கஜம் பானம் நாம முத்³தி³கானம் உத³கே மத்³தி³த்வா கதபானம். ததா² ஸேஸபானானி யதா²னுரூபம் வேதி³தப்³பா³னி, ஸாலூகம் ரத்துப்பலாதீ³னம் ஸாலூகம். சோசம் அட்டி²ககத³லிப²லம். மோசம் அனட்டி²கம். இமானி அட்ட² பானானி ஸீதானிபி ஆதி³ச்சபாகானிபி வட்டந்தி, அக்³கி³பாகானி பன ந வட்டந்தி. தேனாஹ ‘‘நாக்³கி³ஸந்தத்த’’ந்தி.

87-8. அவஸேஸானி பன வேத்ததிந்திணிகமாதுலுங்க³கபித்த²கரமந்தா³தி³கு²த்³த³கப²லபானானி அட்ட²பானக³திகானேவ. தேனாஹ ‘‘ஸானுலோமானி த⁴ஞ்ஞானி, ட²பேத்வா ப²லஜோ ரஸோ’’தி. ஏகஸ்ஸ பன வக்க²மானானஞ்ச ‘‘புப்ப²ரஸோ’’திஆதீ³னம் ‘‘ஸீதோத³மத்³தி³தாதி³ச்சபாகோ வா யாமகாலிகோ’’தி இமினா ஸம்ப³ந்தோ⁴ வேதி³தப்³போ³. தாலனாளிகேரபனஸலபு³ஜஅலாபு³கும்ப⁴ண்ட³புஸ்ஸப²லதிபுஸஏளாலுகப²லானீதி நவ மஹாப²லானி, ஸப்³ப³ஞ்ச அபரண்ணம் ஸத்தத⁴ஞ்ஞானி அனுலோமேந்தீதி ஸஹ அனுலோமேஹீதி ஸானுலோமானி. ஸானுலோமத⁴ஞ்ஞானம் பன ரஸோ யாவகாலிகோ. ‘‘ஸானுலோமானி த⁴ஞ்ஞானீ’’தி ப²லானி விஞ்ஞாயந்தி. ப²லஸுதியா ‘‘ஸேஸப²லஜோ’’தி வத்தப்³பே³ க³ம்யமானத்தா ந வுத்தம். மது⁴கபுப்ப²மஞ்ஞத்ராதி மது⁴கபுப்ப²ம் ட²பேத்வா. பக்கடா³கஜந்தி பக்கேஹி யாவகாலிகேஹி டா³கேஹி ஜாதம் ரஸம். ஸீதமுத³கம் ஸீதோத³ம், கீ²ரோதே³ விய ஸீதோதே³ மத்³தி³தோதி தப்புரிஸோ. ஆதி³ச்ச-ஸத்³தோ³ ஆதபே வத்ததி உபசாரதோதி ஆதி³ச்சே பாகோ யஸ்ஸாதி ஸமாஸோ.

89. ஸத்தாஹகாலிகம் த³ஸ்ஸேதி ‘‘ஸப்பீ’’திஆதி³னா. தத்த² ஸத்தாஹகாலிகாதி யதா²வுத்தானி ஸப்பிஆதீ³னி ஸத்தாஹகாலிகானி. இதா³னி ஸப்பிஆதீ³னி விப⁴ஜதி ‘‘ஸப்பீ’’திஆதி³னா. தத்த² யேஸம் கோ³மஹிம் ஸாதீ³னம் மம்ஸம் கப்பதி, தேஸம் ஸப்பி ஸப்பி நாமாதி ‘‘ஸப்பீ’’திஆதி³னா ஸப்பிலக்க²ணமாஹ. அகப்பியமம்ஸஸப்பினோபி கப்பியஸம்ப⁴வே தத்த² ஸத்தாஹாதிக்கமே து³க்கடஸ்ஸ வக்க²மானத்தா நிஸ்ஸக்³கி³யவத்து²மேவ சேத்த² த³ஸ்ஸேதும் ‘‘யேஸம் மம்ஸமவாரித’’ந்தி வுத்தம். கீ²ராதீ³ஸு ஹி தேஸமகப்பியம் நாம நத்தி². நவனீதஸ்ஸ ஸப்பிஸதி³ஸதாய நவனீதலக்க²ணம் விஸும் ந வுத்தம். உபரி ஸப்பிபிண்ட³ம் ட²பேத்வா ஸீதலபாயாஸம் தே³ந்தி, யம் பாயாஸேன அஸம்ஸட்ட²ம், தம் ஸத்தாஹகாலிகம், மிஸ்ஸிதம் பன ஆதி³ச்சபாகம் கத்வா பரிஸ்ஸாவிதம், ததா² கீ²ரம் பக்கி²பித்வா பக்கதேலம்பி, தேஸு நவனீதம் நாம நவுத்³த⁴டம். தேன கதம் பன ஸப்பி.

90. திலா ச வஸா ச ஏரண்டா³னி ச மது⁴கானி ச ஸாஸபா சாதி த்³வந்தோ³. தேஹி ஸம்ப⁴வோ யஸ்ஸாதி பா³ஹிரத்தோ², தம் தேலம் நாமாதி அத்தோ². கு²த்³தா³ கு²த்³த³மது⁴மக்கி²கா ச ப⁴மரா ச கு²த்³த³ப⁴மரம், கு²த்³த³ஜந்துகத்தா நபும்ஸகேகவசனம். மது⁴ம் கரோந்தீதி மது⁴கரியோ, தா ஏவ மக்கி²கா மது⁴கரிமக்கி²கா, கு²த்³த³ப⁴மரமேவ மது⁴கரிமக்கி²காதி கம்மதா⁴ரயோ. தாஹி கதம் மது⁴ மது⁴ நாமாதி அத்தோ². டீகாயம் பன விஸும் மது⁴கரீ-ஸத்³த³ம் விகப்பேத்வா ‘‘த³ண்ட³கேஸு மது⁴கரா மது⁴கரிமக்கி²கா நாமா’’தி வுத்தம். மது⁴படலம் வா மது⁴ஸித்த²கம் வா ஸசே மது⁴னா மக்கி²தம், மது⁴க³திகமேவ. தும்ப³லகானம் சீரிகானஞ்ச நிய்யாஸஸதி³ஸம் மது⁴ பன யாவஜீவிகம். ரஸோ நிக்கஸடோ ஆதி³ யஸ்ஸா ஸா ரஸாதி³. ஆதி³-ஸத்³தே³ன பா²ணிதாதீ³னம் க³ஹணம், ஸா உச்சு²விகதி. பக்காதி அவத்து²கபக்கா வா, பா²ணிதம் பா²ணிதம் நாமாதி அத்தோ². ஸீதூத³கேன கதமது⁴கபுப்ப²பா²ணிதம் பன பா²ணிதக³திகமேவ. அம்ப³பா²ணிதாதீ³னி யாவகாலிகானி. ஏதானி யதா²வுத்தானி ஸப்பிஆதீ³னி புரேப⁴த்தம் ஸாமிஸபரிபோ⁴கே³னாபி, பச்சா²ப⁴த்ததோ பட்டா²ய பன தானி ச பச்சா²ப⁴த்தம் படிக்³க³ஹிதானி ச ஸத்தாஹம் நித³ஹித்வா நிராமிஸபரிபோ⁴கே³ன பரிபு⁴ஞ்ஜிதப்³பா³னி.

91. இதா³னி ஓதி³ஸ்ஸ அனுஞ்ஞாதவஸாய பாகதோ விபா⁴க³ம் த³ஸ்ஸேத்வா ததோ ஸப்பிஆதீ³னம் த³ஸ்ஸேதும் ‘‘ஸவத்தூ²’’திஆதி³மாஹ. தத்த² புரேப⁴த்தம் ஸாமம் வா அத்தனா ஏவ. வா-ஸத்³தே³ன பரேஹி வா. அமானுஸா மனுஸ்ஸவஸாரஹிதா. வஸா அச்சா²தீ³னம் அகப்பியானம், ஸூகராதீ³னம் கப்பியானஞ்ச ஸத்தானம் வஸா. ஸவத்து²பக்கா ஸத்தாஹகாலிகா ஹோதீதி ஸேஸோ. ஸவத்து²பக்காதி ஸவத்து²கம் கத்வா பக்கா. அயமேத்த² அதி⁴ப்பாயோ – ஸசே பன வஸம் புரேப⁴த்தம் படிக்³க³ஹேத்வா பசித்வா தேலம் பரிஸ்ஸாவிதம் ஸத்தாஹானி நிராமிஸபரிபோ⁴கே³ன பரிபு⁴ஞ்ஜிதப்³ப³ம். அத² பரேஹி கதம் புரேப⁴த்தம் படிக்³க³ஹிதம், புரேப⁴த்தம் ஸாமிஸம்பி வட்டதி, பச்சா²ப⁴த்ததோ பட்டா²ய நிராமிஸமேவ, நோ சே, து³க்கடம் ஹோதீதி. காரியே காரணோபசாரேன பனேத்த² ‘‘வஸா’’தி தேலமேவ வுத்தம், வஸா பன யாவகாலிகாவ.

டீகாயம் பன வஸாய ‘‘ஸத்தாஹகாலிகே ஆக³தட்டா²னம் நத்தீ²தி வத³ந்தீ’’தி வத்வா ‘‘தம் உபபரிக்கி²தப்³ப³’’ந்தி வஸாய ஸத்தாஹகாலிகத்தமாஸம்கியம் வுத்தம். கிமேத்த² உபபரிக்கி²தப்³ப³ம்? பே⁴ஸஜ்ஜம் அனுஜானதா ப⁴க³வதா ‘‘யானி கோ² பன தானி கி³லானானம் பி⁴க்கூ²னம் படிஸாயனீயானி பே⁴ஸஜ்ஜானி, ஸேய்யதி²த³ம் – ஸப்பி நவனீதம் தேலம் மது⁴ பா²ணிதம், தானி படிக்³க³ஹேத்வா ஸத்தாஹபரமம் ஸன்னிதி⁴காரகம் பரிபு⁴ஞ்ஜிதப்³பா³னீ’’தி (பாரா. 622) ஸப்பிஆதீ³னமேவ ஸத்தாஹகாலிகத்தம் வுத்தம். பே⁴ஸஜ்ஜக்க²ந்த⁴கேபி ‘‘அனுஜானாமி, பி⁴க்க²வே, தானி பஞ்ச பே⁴ஸஜ்ஜானி படிக்³க³ஹேத்வா காலேபி விகாலேபி பரிபு⁴ஞ்ஜிது’’ந்தி (மஹாவ. 260) தானி பஞ்சேவ ‘‘பே⁴ஸஜ்ஜானீ’’தி வத்வா தேலம் நியமதோ ‘‘அனுஜானாமி, பி⁴க்க²வே, வஸானி பே⁴ஸஜ்ஜானி அச்ச²வஸம் மச்ச²வஸம் ஸுஸுகாவஸம் ஸூகரவஸம் க³த்³ரப⁴வஸம் காலே படிக்³க³ஹிதம் காலே நிப்பக்கம் காலே ஸம்ஸட்ட²ம் தேலபரிபோ⁴கே³ன பரிபு⁴ஞ்ஜிது’’ந்தி (மஹாவ. 262) வுத்தம். பே⁴ஸஜ்ஜஸிக்கா²பத³ட்ட²கதா²யஞ்ச (கங்கா². அட்ட². பே⁴ஸஜ்ஜஸிக்கா²பத³வண்ணனா) ‘‘ட²பேத்வா மனுஸ்ஸவஸம் அஞ்ஞம் யம் கிஞ்சி வஸ’’ந்திஆதி³னா வஸாதேலஸ்ஸ விதா⁴னம் த³ஸ்ஸேத்வா ‘‘அஞ்ஞேஸம் யாவகாலிகவத்தூ²னம் வத்து²ம் பசிதும் ந வட்டதியேவா’’தி வத³தா அட்ட²கதா²சரியேன யாவகாலிகேஸு வஸம் ட²பேத்வா அஞ்ஞேஸம் யாவகாலிகவத்தூ²னம் வத்து²ம் பசிதும் ந வட்டதீதி அயமேத்த² அத்தோ² தீ³பிதோதி வஸா ‘‘யாவகாலிகாயேவா’’தி விஞ்ஞாயதீதி கோ ஏத்த² ஸுகு²மோ நயோதி.

அஞ்ஞேஸம் வஸாதேலதோ பரேஸம் யாவகாலிகவத்தூ²னம் யேஸம் தேஸம் யாவகாலிகவத்தூ²னம் ஸப்பிஆதீ³னம் வத்து²ம் யாவகாலிகஸங்கா²தம் கீ²ராதி³கம் ந பசேதி ஸம்ப³ந்தோ⁴. அயமேத்த² அதி⁴ப்பாயோ – யதா² ஸத்தாஹபரிபோ⁴க³த்தா²ய வஸம் காலே படிக்³க³ஹேத்வா காலே பசிதும் வட்டதி, ந ஏவம் ஸப்பிஆதீ³னம் வத்து²பூ⁴தம் கீ²ராதி³யாவகாலிகம், தம் பன ஸத்தாஹபரிபோ⁴க³த்தா²ய காலேபி ந வட்டதி. தானி ஹி யதி³ தம் படிக்³க³ஹேத்வா ஸயம் கதானி, பச்சா²ப⁴த்ததோ பட்டா²ய ந வட்டந்தி ஸவத்து²கப்படிக்³க³ஹிதத்தா, ஸாமிஸம் ந வட்டந்தி ஸாமம்பக்கத்தா, புரேப⁴த்தம்பி ந வட்டந்தி யாவகாலிகவத்து²தோ விவேசிதத்தா. பரேஹி கதானி பன புரேப⁴த்தம் ஸாமிஸம்பி வட்டந்தி அத்தனா அபக்கத்தா. யாவஜீவிகானி து ஸாஸபமது⁴கஏரண்ட³அட்டீ²னி தேலகரணத்த²ம் படிக்³க³ஹேத்வா தத³ஹேவ கதம் தேலம் ஸத்தாஹகாலிகம், து³தியதி³வஸே கதம் சா²ஹம் வட்டதி, ஏவம் யாவ ஸத்தமதி³வஸே கதம் தத³ஹேவ வட்டதி, உக்³க³தே அருணே நிஸ்ஸக்³கி³யம், அட்ட²மே தி³வஸே அனஜ்ஜோ²ஹரணீயம், உக்³க³ஹிதேன யேன கேனசி வத்து²னா கதஸதி³ஸம் ஹோதி. தேலத்தா²ய படிக்³க³ஹிதஸாஸபாதீ³னம் ஸத்தாஹாதிக்கமேன து³க்கடம். நிப்³ப³த்திதம் ஸப்பி வா நவனீதம் வா காலேபி விகாலேபி படிக்³க³ஹேத்வா பசிதும் வட்டதி. தம் பன தத³ஹு புரேப⁴த்தம்பி ஸாமிஸம் ந வட்டதி, ஸம்ஸக்³க³தோ யாவகாலிகம்பி ஸாமம்பக்கம் ஸியாதி நிராமிஸம் பன ஸத்தாஹம்பி வட்டதி.

92. இதா³னி ‘‘ஹலித்³தி³’’ந்திஆதி³னா யாவஜீவிகம் த³ஸ்ஸேதி. தத்த² ‘‘ஹலித்³தி³ நாம நிஸா’’திஆதி³னா வுச்சமானேபி பரியாயவசனே ஸம்மோஹோ ஸியாதி ந தம்வசனேன பு⁴ஸம் ஸம்மோஹயிஸ்ஸாம, தஸ்மா தானி உபதே³ஸதோவ வேதி³தப்³பா³னி. தத்த² ‘‘ஹலித்³தி³’’ந்தி பி³ந்து³ஆக³மேன வுத்தம். உபசாரேன து மூலாதீ³னி ஹலித்³தா³தி³ஸத்³தே³ன வுத்தானி. தா ஹலித்³தா³த³யோ கேசி இத்தி²லிங்கா³யேவ. மூலப²லே வசத்தஞ்ச…பே… ப⁴த்³த³முத்தஞ்ச அதிவிஸாதி பத³ச்சே²தோ³. பஞ்சமூல-ஸத்³தே³ன சூளபஞ்சமூலமஹாபஞ்சமூலானி க³ஹிதானி. ஆதி³-ஸத்³தே³ன வஜகலிமூலே ஜரட்ட²ந்தி ஏவமாதீ³னம் ஸங்க³ஹோ.

93-5. கோ³ட்ட²ப²லந்தி மத³னப²லந்தி வத³ந்தீதி. தீணி ப²லானி யஸ்ஸம் ஸங்க³ஹிதம் ஸா திப²லா. ஏரண்ட³காதீ³னந்தி ஆதி³-ஸத்³தே³ன ஜாதிருக்கா²தீ³னம் க³ஹணம். ஸுலஸாதீ³னம் பண்ணந்தி ஸம்ப³ந்தோ⁴. ஆதி³-ஸத்³தே³ன அஸோகாதீ³னம் க³ஹணம். ஸூபேய்யபண்ணந்தி தம்ப³கதண்டு³லேய்யாதி³ஸூபயோக்³க³பண்ணம். உச்சு²னிய்யாஸம் ட²பேத்வா ஸப்³போ³ நிய்யாஸோ ச ஸரஸம் உச்சு²ஜம் தசஞ்ச ட²பேத்வா ஸப்³போ³ தசோ சாதி ஸம்ப³ந்தோ⁴. தத்த² ஹிங்கு³கணிகாரனிய்யாஸாதி³ ஸப்³போ³ நிய்யாஸோ நாம. நிரஸஉச்சு²தசாதி³ ஸப்³போ³ தசோ நாம. லோணம் ஸாமுத்³தா³தி³. லோஹம் அயதம்பா³தி³. ஸிலா காளஸிலாதி³.

96. ஸுத்³த⁴ஸித்த²ந்தி மது⁴னா அமக்கி²தம். மது⁴மக்கி²தம் பன ஸத்தாஹகாலிகம். யஞ்ச கிஞ்சி ஸுஜா²பிதந்தி து³ஜ்ஜா²பிதம் அகத்வா ஸுஜ்ஜா²பிதம் யம் கிஞ்சி ச. விகடாதி³ப்பபே⁴த³ந்தி விகடம் கூ³த²மத்திகாமுத்தசா²ரிகாஸங்கா²தம் ஆதி³ யஸ்ஸ, ஸோ பபே⁴தோ³ யஸ்ஸாதி பா³ஹிரத்தோ², தம். யம் கிஞ்சி சாதி ஸம்ப³ந்தோ⁴. ஏத்த² பன ஆதி³-ஸத்³தே³ன கந்த³கா²த³னீயே கீ²ரகாகோலாத³யோ, முளாலகா²த³னீயே ஹலித்³தி³ஸிங்கி³வேரமூலாத³யோ, மத்த²ககா²த³னீயே ஹலித்³தி³ஸிங்கி³வேரகளீராத³யோ, க²ந்த⁴கா²த³னீயே உப்பலபண்ணத³ண்டா³த³யோ, புப்ப²கா²த³னீயே சம்பகபுப்பா²த³யோ, அட்டி²கா²த³னீயே மது⁴கட்டி²ஏரண்ட³ஸாஸபாத³யோ, பிட்ட²கா²த³னீயே அதோ⁴ததாலபிட்டா²த³யோ ச ஸங்க³ஹிதாதி த³ட்ட²ப்³பா³.

97. இதா³னி ஸப்³ப³ஸோ யாவஜீவிகம் த³ஸ்ஸேதும் அஸக்குணேய்யத்தா வுத்தானி ச அவுத்தானி ச ஏகதோ ஸம்பிண்டே³த்வா தத்த² லக்க²ணம் ட²பேந்தோ ‘‘மூல’’ந்திஆதி³மாஹ. தத்த² ‘‘ஸாரோ’’தி வத்தப்³பே³ ‘‘ஸார’’ந்தி லிங்க³விபல்லாஸேனாஹ. ‘‘ஸாரோ ப³லே தி²ரம்ஸே சா’’தி ஹி நிக⁴ண்டு³. ஆஹாரட்ட²ந்தி ஆஹாரேன ஜாதோ அத்தோ² பயோஜனம் ஆஹாரத்தோ², ஸோவ ஆஹாரட்டோ², தம் ஆஹாரகிச்சந்தி வுத்தம் ஹோதி.

98. இதா³னி சதூஸு கப்பியாகப்பியாதி³விபா⁴க³ம் த³ஸ்ஸேதி ‘‘ஸப்³பா³’’திஆதி³னா. தத்த² ஸப்³பே³ காலிகா, தேஸம் ஸம்போ⁴கோ³ அனுப⁴வோதி ஸமாஸோ. காலேதி புப்³ப³ண்ஹகாலே. ஸப்³ப³ஸ்ஸாதி கி³லானாகி³லானஸ்ஸ. ஸதி பச்சயேதி தீஸு யாமகாலிகம் பிபாஸாதி³காரணே ஸதி, ஸத்தாஹகாலிகம் யாவஜீவிகஞ்ச கே³லஞ்ஞகாரணே ஸதீதி அத்தோ², காலதோ விக³தோ விகாலோ, தஸ்மிம், யாமகாலிகம் விகாலே ஆஹாரத்தா²ய அஜ்ஜோ²ஹரணே, ஸத்தாஹகாலிகம் பன யாவஜீவிகஞ்ச தத³த்தா²ய படிக்³க³ஹணமத்தேபி து³க்கடம்.

99. உபோ⁴தி யாவகாலிகம் யாமகாலிகஞ்ச. தத்த² யாவகாலிகம் அத்தனோ காலாதிக்கந்தம் விகாலபோ⁴ஜனபி⁴க்கா²பதே³ன பாசித்தியம் ஜனயதி, யாமகாலிகம் யாமாதிக்கந்தம் ஸன்னிதி⁴ஸிக்கா²பதே³ன. ஏதே உபோ⁴பி அந்தோவுத்த²ஞ்ச ஸன்னிதி⁴ஞ்ச ஜனயந்தீதி ஸம்ப³ந்தோ⁴. ‘‘அந்தோவுத்த²ம் ஸன்னிதி⁴’’ந்தி பா⁴வப்பதா⁴னோயம் நித்³தே³ஸோ, அந்தோவுத்த²த்தம் ஸன்னிதி⁴த்தஞ்சாதி அத்தோ².

100. அதினாமிதேதி அதிக்காமிதே. பாசித்தீதி ஸத்தாஹாதிக்கந்தம் பே⁴ஸஜ்ஜஸிக்கா²பதே³ன நிஸ்ஸக்³கி³யபாசித்தியாபத்தி ச ஹோதீதி அத்தோ². ஸசே த்³வின்னம் ஸந்தகம் ஏகேன படிக்³க³ஹிதம் அவிப⁴த்தம் ஹோதி, ஸத்தாஹாதிக்கமே த்³வின்னம்பி அனாபத்தி, பரிபு⁴ஞ்ஜிதும் பன ந வட்டதி. பாளினாருள்ஹேதி பாளியம் அனாருள்ஹே ஸப்பிஆதி³ம்ஹி ஸத்த அஹானி அதினாமிதேதி ஸம்ப³ந்தோ⁴. ஸப்பீதி மனுஸ்ஸாதீ³னம் ஸப்பி. ஆதி³-ஸத்³தே³ன தேஸம்யேவ நவனீதம், நாளிகேராதி³தேலம், ஸீதோத³கேன கதம் மது⁴கபுப்ப²பா²ணிதஞ்ச ஸங்க³ஹிதம்.

101. நிஸ்ஸட்ட²லத்³த⁴ந்தி நிஸ்ஸட்ட²ம் வினயகம்மவஸேன நிஸ்ஸஜ்ஜிதஞ்ச தம் லத்³த⁴ஞ்ச புன ததே²வாதி நிஸ்ஸட்ட²லத்³த⁴ம். தம் க³ஹேத்வாதி ஸேஸோ. நிஸ்ஸஜ்ஜனவிதா⁴னம் பன வக்க²மானனயேன வேதி³தப்³ப³ம். ‘‘நங்க³’’ந்திஆதி³ உபலக்க²ணமத்தம். தேன மக்கி²தானி காஸாவாதீ³னி ச பன அபரிபோ⁴கா³னியேவ. அஞ்ஞஸ்ஸ பன காயிகபரிபோ⁴கோ³ வட்டதி. விகப்பேந்தஸ்ஸ ஸத்தாஹே ஸாமணேரஸ்ஸாதி ஏத்த² டீகாயம் ‘‘இத³ம் ஸப்பிம் துய்ஹம் விகப்பேமீ’’திஆதி³னா தேஸம் தேஸம் நாமம் க³ஹேத்வா ஸம்முகா²பரம்முகா²விகப்பனவஸேன அத்த²ம் த³ஸ்ஸேத்வா தம் ஸாத⁴யந்தேஹி அவிகப்பிதே விகப்பிதஸஞ்ஞீ நிஸ்ஸக்³கி³யம் பாசித்திய’’ந்தி ஆபத்திவாரே பாளி ஆஹடா. ‘‘ஸசே உபஸம்பன்னஸ்ஸ விகப்பேதி, அத்தனோ ஏவ ஸந்தகம் ஹோதி, படிக்³க³ஹணம்பி ந விஜஹதீ’’தி தோ³ஸம் வத்வா அனுபஸம்பன்னஸ்ஸ விகப்பனே அத்தஸந்தகத்தாபா⁴வோ, படிக்³க³ஹணவிஜஹனஞ்ச பயோஜனம் வுத்தம். தத்த² வதா³ம – ஆபத்திவாரே ‘‘அவிகப்பிதே’’திஆதி³பாளியேவ நத்தி², ‘‘அனதி⁴ட்டி²தே அதி⁴ட்டி²தஸஞ்ஞீ நிஸ்ஸக்³கி³யம் பாசித்தியம், அவிஸ்ஸஜ்ஜிதே விஸ்ஸஜ்ஜிதஸஞ்ஞீ நிஸ்ஸக்³கி³யம் பாசித்திய’’ந்திஆதி³னா (பாரா. 624) பாளியா ஆக³தத்தா தத³னுரூபமேவ அனாபத்திவாரே ‘‘அதி⁴ட்டே²தி, விஸ்ஸஜ்ஜேதீ’’திஆதி³னாவ பாளி ஆக³தா. யதி³ ப⁴வேய்ய, வண்ணனீயட்டா²னதாய அட்ட²கதா²ய ப⁴விதப்³ப³ம், ந சேத்த² அட்ட²கதா²யம் விஜ்ஜதி. அனுபஸம்பன்னஸ்ஸ விகப்பனே ச கத²ம் படிக்³க³ஹணம் விஜஹதி ஸிக்கா²பச்சக்கா²னாதீ³ஸு ச²ஸு படிக்³க³ஹணவிஜஹனகாரணேஸு விகப்பனஸ்ஸ அனந்தோக³த⁴த்தா, தஸ்மா நாயமேத்த² அத்தோ²தி.

மயமேத்த² ஏவமத்த²ம் ப⁴ணாம – விகப்பேந்தஸ்ஸாதி ஏத்த² விகப்பனம் ஸம்வித³ஹனம் ‘‘சித்தஸங்கப்போ’’திஆதீ³ஸு விய, உப⁴யத்த² பன உபஸக்³கே³ஹி நானத்தமத்தம், தஸ்மா அந்தோஸத்தாஹே ஸாமணேரஸ்ஸ யஸ்ஸ கஸ்ஸசி விகப்பேந்தஸ்ஸ ஸம்வித³ஹந்தஸ்ஸ பரிச்சாக³ஸஞ்ஞம் பரிச்சாக³சேதனம் பரிச்சாகா³தி⁴ப்பாயம் உப்பாதே³ந்தஸ்ஸ அனாபத்தீதி அத்தோ². இத³ஞ்ச மஹாஸுமத்தே²ரவாத³மோலுப்³ப⁴ வுத்தம். வுத்தஞ்ஹி ‘‘தேன சித்தேனா’’திஆதீ³ஸு பாளிவசனேஸு அதி⁴ப்பாயம் த³ஸ்ஸேந்தேன, ‘‘இத³ம் கஸ்மா வுத்தம். ஏவஞ்ஹி அந்தோஸத்தாஹே த³த்வா பச்சா² படிலபி⁴த்வா பரிபு⁴ஞ்ஜந்தஸ்ஸ அனாபத்தித³ஸ்ஸனத்த²’’ந்தி (பாரா. அட்ட². 2.625). மஹாபது³மத்தே²ரோ பனாஹ ‘‘ஸத்தாஹாதிக்கந்தஸ்ஸ பன பரிபோ⁴கே³ அனாபத்தித³ஸ்ஸனத்த²மித³ம் வுத்த’’ந்தி (பாரா. அட்ட². 2.625). அயமேவ வாதோ³ தேஸு ஸுந்த³ரதரோ. ஸத்தாஹே மக்க²னாதி³ம் அதி⁴ட்ட²தோ ச அஞ்ஞஸ்ஸ த³த³தோபி ச அனாபத்தீதி ஸம்ப³ந்தோ⁴. ஆதி³-ஸத்³தே³ன அப்³ப⁴ஞ்ஜனாதி³ம் ஸங்க³ண்ஹாதி. அயமேத்தா²தி⁴ப்பாயோ – ஸப்பிஆதி³ம் அப்³ப⁴ஞ்ஜனாதி³ம் மது⁴ம் அருமக்க²னம், பா²ணிதம் க⁴ரதூ⁴பனம் அதி⁴ட்ட²தோ அனாபத்தீதி. அஞ்ஞஸ்ஸாதி உபஸம்பன்னஸ்ஸ வா அனுபஸம்பன்னஸ்ஸ வா.

102. யாவகாலிகஆதீ³னி அத்தனா ஸஹ ஸம்ஸட்டா²னி ஸப்³பா⁴வம் கா³ஹாபயந்தீதி ஸம்ப³ந்தோ⁴. ஸப்³பா⁴வந்தி ஸஸ்ஸ அத்தனோ பா⁴வோ த்³வித்தே ஸப்³பா⁴வோ, தம். தஸ்மாதி யஸ்மா ஏவம், தஸ்மா. ஏவமுதீ³ரிதந்தி ஏவம் ‘‘விகப்பேந்தஸ்ஸ ஸத்தாஹே’’திஆதி³னா வுத்தம். அயமேத்த² அதி⁴ப்பாயோ – யஸ்மா அத்தனா ஸம்ஸட்டா²னி அத்தனோ பா⁴வம் கா³ஹாபயந்தி யாவகாலிகாதீ³னி, தஸ்மா ஸத்தாஹாதிக்காமிதானி ஸத்தாஹகாலிகானி பாசித்தியஜனகானி ஸம்ஸட்டா²னி அத்தஸம்ஸட்டா²னிபி பாசித்தியஜனகானி கரோந்தீதி அவிகப்பனாதி³ம்ஹி ஸதி ப்³யதிரேகதோ பாசித்தியாபத்திபரிதீ³பகம் ‘‘விகப்பேந்தஸ்ஸா’’திஆதி³கம் வாக்யத்தயம் வுத்தந்தி. டீகாயம் பன ‘‘இதா³னி வக்க²மானம் ஸந்தா⁴ய ஏவந்தி வுத்த’’ந்தி வுத்தம். தம் வக்க²மானஸ்ஸ அதீதஉதீ³ரிதத்தாயோக³தோ கத²ம் யுஜ்ஜதீதி. ஏவமுதீ³ரிதந்தி வா பாளியம் அட்ட²கதா²யஞ்ச ஏவமேவ வுத்தந்தி அத்தோ². ஏவ-ஸத்³தோ³ அவதா⁴ரணே.

103-5. இதா³னி அத்தஸம்ஸட்டா²னம் யாவகாலிகாதீ³னம் ஸப்³பா⁴வகா³ஹாபனம் ஸரூபதோ த³ஸ்ஸேதும் ‘‘புரே’’திஆதி³மாஹ. தத்த² ஸத்தாஹந்தி ஸத்த அஹானி யஸ்ஸ தம் ஸத்தாஹம், ஸத்தாஹகாலிகம். ச-ஸத்³தோ³ அட்டா²னப்பயுத்தோ, ஸோ ஸத்தாஹஞ்ச யாவஜீவிகஞ்சாதி யோஜேதப்³போ³. ஸேஸகாலிகஸம்மிஸ்ஸந்தி ஸேஸேஹி தத³ஹு படிக்³க³ஹிதேஹி காலிகேஹி யாவகாலிகயாமகாலிகஸங்கா²தேஹி ஸம்மிஸ்ஸம். பாசித்தீதி ஸன்னிதி⁴ஸிக்கா²பதே³ன பாசித்தி. தத³ஹு படிக்³க³ஹிதந்தி தஸ்மிம்யேவ தி³னே புரேப⁴த்தம் படிக்³க³ஹிதம். தத³ஹேவாதி தஸ்மிம்யேவ தி³னே புரேப⁴த்தமேவ. ஸேஸந்தி ஸத்தாஹகாலிகம் யாவஜீவிகஞ்ச. ஏவந்தி யாமே ஏவ பரிபு⁴ஞ்ஜயேதி விஜானீயந்தி ஸம்ப³ந்தோ⁴. இதரந்தி ஸத்தாஹகாலிகதோ அஞ்ஞம் யாவஜீவிகம்.

காலிகனித்³தே³ஸவண்ணனா நிட்டி²தா.