7. பவாரணானித்³தே³ஸவண்ணனா

73. யேன இரியாபதே²ன உபலக்கி²தோ பஞ்சன்னம் போ⁴ஜனானம் யம் கிஞ்சி போ⁴ஜனம் பு⁴ஞ்ஜமானோ அயம் பி⁴க்கு² கப்பியானம் பஞ்சன்னம் போ⁴ஜனானம் ஹத்த²பாஸோபனீதானம் பவாரிதோ, ததோ இரியாபத²தோ அஞ்ஞேன இரியாபதே²ன அனதிரித்தகம் யாவகாலிகம் பு⁴ஞ்ஜேய்ய சே, இமஸ்ஸ பாசித்தி ஹோதீதி பத³த்த²யோஜனா. பு⁴ஞ்ஜனத்தா²ய படிக்³க³ஹணே பன து³க்கடம். தத்த² இரியாய காயிககிரியாய பதோ² பவத்தனூபாயோ இரியாபதோ², டா²னக³மனனிஸஜ்ஜனஸயனானி. பவாரேதி படிக்கி²பதீதி பவாரிதோ, அத² வா பவாரணம் படிக்கி²பனம் பவாரிதம், தமஸ்ஸ அத்தீ²தி பவாரிதோ, கதப்பவாரணோ கதப்படிக்கே²போதி அத்தோ², அத² வா பரிவேஸகேன வாரீயதீதி பவாரிதோ படிக்கே²பிதோ. அனதிரித்தகந்தி யம் பவாரேத்வா ஆஸனா வுட்ட²ஹந்தஸ்ஸ ‘‘அலமேதம் ஸப்³ப³’’ந்தி ஏவம் அதிரித்தகரணாதீ³ஹி ஸத்தஹி வினயகம்மாகாரேஹி கப்பியம் கதம், தஞ்ச ‘‘அஜ்ஜ வா யதா³ வா இச்ச²தி, ததா³ கா²தி³ஸ்ஸதீ’’தி ஆஹடம், கி³லானாதிரித்தஞ்ச அதிரித்தம் அதி⁴கந்தி வுச்சதி, ததோ அஞ்ஞம் அனதிரித்தகம் அனதி⁴கந்தி அத்தோ². குஸலம் சித்தம் பாதேதீதி பாசித்தி, தஸ்மா இத்தி²யம் திம்ஹி த-காரஸ்ஸ ச-காரே, த்³வித்தே ச பாசித்தி. யாமகாலிகம் ஸத்தாஹகாலிகம் யாவஜீவிகம் ஆஹாரத்தா²ய படிக்³க³ண்ஹதோ ஆபத்தி து³க்கடஸ்ஸ, அஜ்ஜோ²ஹாரே அஜ்ஜோ²ஹாரே ஆபத்தி து³க்கடஸ்ஸ.

74. இதா³னி யாய பவாரிதா, ஸா பஞ்சங்க³ஸம்பன்னாயேவ பவாரணா நாம ஹோதீதி த³ஸ்ஸேதும் ‘‘அஸன’’ந்திஆதி³மாஹ. தத்த² அஸனந்தி பு⁴ஞ்ஜமானஸ்ஸ பு⁴ஞ்ஜனம். இமினா யம் விப்பகதம் போ⁴ஜனம், தம் த³ஸ்ஸேதி. போ⁴ஜனஞ்சேவாதி பவாரணப்பஹோனகம் போ⁴ஜனஞ்சேவ ஹோதீதி. அபி⁴ஹாரோதி தா³யகஸ்ஸ காயேன பவாரணப்பஹோனகஸ்ஸ அபி⁴ஹரணம், ந வாசாய. ஸமீபதாதி அட்³ட⁴தேய்யஹத்த²ப்பமாணஸங்கா²தா ஸமீபதா ச. ஏத்த² பன ஸசே பி⁴க்கு² நிஸின்னோ ஹோதி, ஆஸனஸ்ஸ பச்சி²மந்ததோ பட்டா²ய, ஸசே டி²தோ, பண்ஹிஅந்ததோ பட்டா²ய, ஸசே நிபன்னோ, யேன பஸ்ஸேன நிபன்னோ, தஸ்ஸ பாரிமந்ததோ பட்டா²ய தா³யகஸ்ஸ டி²தஸ்ஸ வா நிஸின்னஸ்ஸ வா நிபன்னஸ்ஸ வா ட²பேத்வா பஸாரிதஹத்த²ம் யம் ஆஸன்னதரம் அங்க³ம், தஸ்ஸ ஓரிமந்தேன பரிச்சி²ந்தி³த்வா அட்³ட⁴தேய்யஹத்த²பாஸோ வேதி³தப்³போ³. காயவாசாபடிக்கே²போதி தஸ்ஸ அபி⁴ஹடபோ⁴ஜனஸ்ஸ அங்கு³லிசலனாதி³காயவிகாரேன வா ‘‘அல’’ந்திஆதி³னா வசீவிகாரேன வா படிக்கி²பனம். இதி இமேஹி பஞ்சஹங்கே³ஹி பவாரணா பகாரயுத்தவாரணா பஞ்சஅங்கா³தி ஸம்ப³ந்தோ⁴. பஞ்ச அங்கா³னி யஸ்ஸா ஸா பஞ்சஅங்கா³.

75. இதா³னி ஏதேஸு ஓத³னாதி³பஞ்சவித⁴ம் போ⁴ஜனம் த³ஸ்ஸேத்வா தானி ச புன விப⁴ஜித்வா த³ஸ்ஸேதும் ‘‘ஓத³னோ’’திஆதி³ ஆரத்³த⁴ம். தத்த² ஸாலீதி ரத்தஸாலிஆதி³கா ஸப்³பா³பி ஸாலிஜாதி. வீஹீதி ஸப்³பா³பி வீஹினாமிகா வீஹிஜாதி. கங்கூ³தி ஸேதரத்தகாளபே⁴தா³ ஸப்³பா³பி கங்கு³ஜாதி. குத்³ரூஸோ நாம காளகோத்³ரவோ. வரகோ நாம ஸேதவண்ணோ கோத்³ரவோ. யவகோ³து⁴மேஸு பன பே⁴தோ³ நத்தி². ஏவம் யதா²வுத்தானம் ஸானுலோமானம் ஸத்தன்னம் த⁴ஞ்ஞானம் போ⁴ஜ்ஜயாகு³ சாதி ஸம்ப³ந்தோ⁴. போ⁴ஜ்ஜயாகு³ சாதி உண்ஹம் வா ஸீதலம் வா பு⁴ஞ்ஜந்தானம் போ⁴ஜனகாலே க³ஹிதட்டா²னே ஓதி⁴ பஞ்ஞாயதி, ஸா போ⁴ஜ்ஜயாகு³. ச-ஸத்³தே³ன ஓத³னோ சாதி ஸம்ப³ந்தோ⁴, ஓத³னோ நாமாதி அத்தோ². ஸசே பன ப⁴த்தே உத³ககஞ்ஜிககீ²ராதீ³னி ஆகிரித்வா ‘‘யாகு³ம் க³ண்ஹதா²’’தி தே³ந்தி, கிஞ்சாபி தனுகா ஹோதி, பவாரணம் ஜனேதி. ஸசே பன உத³காதீ³ஸு பக்கி²பித்வா பசித்வா தே³ந்தி, யாகு³ஸங்க³ஹமேவ க³ச்ச²தி. ஸசே பன தனுகாயபி யாகு³யா ஸாஸபமத்தம்பி மச்ச²மம்ஸக²ண்ட³ம் வா ந்ஹாரு வா பக்கி²த்தம் ஹோதி, பவாரணம் ஜனேதி.

76. ஸாமாகாதி³திணம் குத்³ரூஸகே ஸங்க³ஹம் க³தம், வரகசோரகோ வரகே ஸங்க³ஹம் க³தோ, நீவாரோ சேவ ஸாலியம் ஸங்க³ஹம் க³தோதி யோஜனா. ஸாமாகாதி³திணந்தி ஸாமாகோ ஆதி³ யஸ்ஸ, தமேவ திணம் திணத⁴ஞ்ஞந்தி ஸமாஸோ.

77. ப⁴ட்ட²த⁴ஞ்ஞமயோதி க²ரபாகப⁴ஜ்ஜிதேஹி ஸத்தவிதே⁴ஹி த⁴ஞ்ஞேஹி கோட்டேத்வா கதோ, அந்தமஸோ சுண்ணம்பி குண்ட³கம்பி ஸத்து நாமாதி அத்தோ². ஸமபாகப⁴ஜ்ஜிதானம் பன ஆதபஸுக்கா²னம் வா தண்டு³லானம் ஸத்து வா குண்ட³கானி ஏவ வா ந பவாரேந்தி. யவேன ஸம்ப⁴வோ உப்பத்தி அஸ்ஸாதி யவஸம்ப⁴வோ, கும்மாஸோ கும்மாஸோ நாம. முக்³கா³தீ³ஹி கதோ பன பவாரணம் ந ஜனேதி. கப்பியோ சாதி கப்பியோயேவ மம்ஸோ ‘‘மம்ஸோ’’தி வுத்தோதி யோஜனா. சாதி அவதா⁴ரணே. அகப்பியோ பன படிக்கி²பிதப்³போ³வ. படிக்கி²த்தோபி ந பவாரேதி. உத³கே ஸம்ப⁴வோ யஸ்ஸ ஸோ மச்சோ² நாம. த்³வீஸு பனேதேஸு ஸசே யாகு³ம் பிவந்தஸ்ஸ யாகு³ஸித்த²மத்தேஸுபி மச்ச²க²ண்டே³ஸு வா மம்ஸக²ண்டே³ஸு வா ஏகம் கா²தி³தம் ஏகம் ஹத்தே² வா பத்தே வா ஹோதி, ஸோ சே அஞ்ஞம் படிக்கி²பதி, பவாரேதி. த்³வேபி கா²தி³தானி ஹோந்தி, முகே² ஸாஸபமத்தம்பி அவஸிட்ட²ம் நத்தி², ஸசேபி அஞ்ஞம் படிக்கி²பதி, ந பவாரேதி.

78. இதா³னி ‘‘கீதி³ஸம் பு⁴ஞ்ஜந்தோ கிந்தி வத்வா உபனீதம் கிம் நாம நிஸேதே⁴ந்தோ பவாரேதி நாமா’’தி சோத³னம் மனஸி நிதா⁴யாஹ ‘‘பு⁴ஞ்ஜந்தோ’’திஆதி³. தத்த² கப்பம் வா அகப்பம் வா பஞ்சஸு போ⁴ஜனேஸு யம் கிஞ்சி போ⁴ஜனம் பு⁴ஞ்ஜந்தோ பி⁴க்கு² தன்னாமேன தேஸம் பவாரணாஜனகபோ⁴ஜனானம் நாமேன வா ‘‘இம’’ந்தி ஸாமஞ்ஞேன வா வத்வா அபி⁴ஹடம் ஹத்த²பாஸோபனீதம் கப்பம் கப்பியம் யதா²வுத்தபோ⁴ஜனம் நிஸேத⁴யம் நிஸேத⁴யந்தோ பவாரேய்யாதி பத³த்த²ஸம்ப³ந்தோ⁴. அயமேத்த² அதி⁴ப்பாயோ – யேன சே அகப்பியமம்ஸஞ்ச குலதூ³ஸனவேஜ்ஜகம்மஉத்தரிமனுஸ்ஸத⁴ம்மாரோசனஸாதி³தரூபியாதீ³ஹி நிப்³ப³த்தம் அகப்பியபோ⁴ஜனஞ்ச ததா² அஞ்ஞஞ்ச கப்பியம் வா அகப்பியம் வா ஏகஸித்த²மத்தம்பி அஜ்ஜோ²ஹடம் ஹோதி, ஸோ ஸசே பத்தமுக²ஹத்தே²ஸு யத்த² கத்த²சி போ⁴ஜனே ஸதி ஸாபேக்கோ²வ அஞ்ஞம் ஹத்த²பாஸே டி²தேன ‘‘ஓத³னம் க³ண்ஹதா²’’திஆதி³னா பவாரணப்பஹோனகஸ்ஸேவ நாமேன வா ‘‘இம’’ந்தி ஸாமஞ்ஞவஸேனேவ வா காயேனேவ அபி⁴ஹடம் வுத்தலக்க²ணம் கப்பியமேவ போ⁴ஜனம் கேவலம் வா மிஸ்ஸம் வா காயேன வா வாசாய வா படிக்கி²பதி பவாரேதீதி. ‘‘ஆகிர ஆகிர, கோட்டேத்வா கோட்டேத்வா பூரேஹீ’’தி பன வத்தும் வட்டதி.

79-80. இதா³னி யே பவாரணம் ந ஜனேந்தி, தே த³ஸ்ஸேதும் ‘‘லாஜா’’திஆதி³மாஹ. தத்த² லாஜா…பே… ப²லாதீ³னி பவாரணம் ந ஜனேந்தீதி ஸம்ப³ந்தோ⁴. லாஜாதி ஸாலிஆதீ³ஹி கதா லாஜா. தம்ஸத்துப⁴த்தானீதி தேஹி லாஜேஹி கதா ஸத்து சேவ ப⁴த்தானி ச. கோ³ரஸோதி கு³ன்னம் ரஸோ கீ²ராதி³. ஸுத்³த⁴க²ஜ்ஜகோதி மச்ச²மம்ஸேஹி அஸம்மிஸ்ஸதாய ஸுத்³த⁴க²ஜ்ஜகோ. ஸத்துயோ பிண்டே³த்வா கதோ அபக்கோ ஸத்துகு³ளோ பன ஸத்துமோத³கஸங்கா²தோ பவாரேதி. தண்டு³லாதி ஸமபாகப⁴ஜ்ஜிதானம் ஸாலிஆதீ³னம் தண்டு³லா, ப⁴ஜ்ஜிததண்டு³லா ஏவ வா. ப⁴ட்ட²பிட்ட²ந்தி ஸுத்³த⁴ம் யம் கிஞ்சி ப⁴ஜ்ஜிதம் பிட்ட²ம். புது²காதி ஸாலிஆதீ³னம் புது²கா. புது²கா ஹி தந்திஆக³மயுத்தியா விஸும்பி க³ய்ஹதி, ஏகதோபி, தஸ்மா வுத்தாவஸேஸானம் புது²காவேளுஆதீ³னம் ப⁴த்தந்தி ச ஸம்ப³ந்தோ⁴. வேளூதி தேஸம் தண்டு³லா வுச்சந்தி. புது²கா ச வேளு ச, தே ஆத³யோ யேஸந்தி ஸமாஸோ. ச-ஸத்³தோ³ பனேத்த² ஸப்³ப³த்தா²பி யோஜேதப்³போ³. ஆதி³-ஸத்³தே³ன கந்த³மூலப²லானிபி க³ய்ஹந்தி. வுத்தாவஸேஸானந்தி வுத்தேஹி ஸத்தவிதே⁴ஹி த⁴ஞ்ஞேஹி அவஸேஸானம். ரஸயாகூ³தி ரஸேஹி பக்கமம்ஸாதீ³ஹி ஸம்மிஸ்ஸா யாகு³. ரஸோபி தாதி³ஸோவ. ஸுத்³த⁴யாகூ³தி மம்ஸாதீ³ஹி அமிஸ்ஸா ஸுத்³த⁴யாகு³. ப²லாதீ³னீதி ஆதி³-ஸத்³தே³ன கந்தா³தீ³னம்பி க³ஹணம். அபி சாதி நிபாதோ, நிபாதஸமுதா³யோ வா ஸமுச்சயே, ஸோ பச்சேகம் யோஜேதப்³போ³.

81. இதா³னி யஸ்மா ஸத்தஹி வினயகம்மாகாரேஹி யம் அதிரித்தம் அகதம், தத்த² பாசித்தியம் வுத்தம், ப்³யதிரேகதோ அதிரித்தகதே நத்தி², தஸ்மா அதிரித்தம் கரோந்தேன ஏவம் காதப்³ப³ந்தி த³ஸ்ஸேந்தோ ‘‘பவாரிதேனா’’திஆதி³மாஹ. தத்த² பவாரிதேன வுட்டா²ய அதிரித்தம் ந காதப்³ப³ம், போ⁴ஜனம் அபு⁴த்தேன ச அதிரித்தம் ந காதப்³ப³ந்தி ஸம்ப³ந்தோ⁴. போ⁴ஜனந்தி பவாரணப்பஹோனகபோ⁴ஜனம். அபு⁴த்தேனாதி ஏகஸித்த²மத்தம்பி அபு⁴த்தாவினா. யேன யம்வா புரே கதந்தி ஏத்த² ச ஏவ-ஸத்³தோ³ தீ³க⁴ம் கத்வா நித்³தி³ட்டோ², ஸோ ச அஜ்ஜா²ஹடேன தம்-ஸத்³தே³ன ஸம்ப³ந்தீ⁴யதி, தஸ்மா யேன பி⁴க்கு²னா யம் போ⁴ஜனம் புரே புப்³பே³ அதிரித்தம் கதம், தேனேவ தமேவ அதிரித்தம் ந காதப்³ப³ந்தி யோஜேத்வா அத்தோ² வேதி³தப்³போ³. தஸ்மா கப்பியம் காரேத்வா பு⁴ஞ்ஜந்தஸ்ஸ அஞ்ஞம் ஆமிஸம் ஆகிரந்தி, தம் ஸோ புன காதும் ந லப⁴தி, தஸ்மிம் போ⁴ஜனே கரியமானே பட²மகதேன ஸத்³தி⁴ம் கதம் ஹோதீதி. அஞ்ஞஸ்மிம் பன தேன வா அஞ்ஞேன வா காதும் வட்டதி.

82. ‘‘கப்பிய’’ந்திஆதீ³னி ‘‘கரோந்தோ’’தி ஏதஸ்ஸ கம்மபதா³னி. கப்பியஞ்சேவ க³ஹிதஞ்சேவ உச்சாரிதஞ்சேவ ஹத்த²பாஸக³ஞ்சேவ யாவகாலிகம் அதிரித்தம் கரோந்தோ ‘‘அலமேதம் ஸப்³ப³’’ந்தி ஏவம் பா⁴ஸதூதி யோஜனா. தத்த²யம் ப²லம் வா கந்த³மூலாதி³ வா பஞ்சஹி ஸமணகப்பேஹி கப்பியம் கதம், யஞ்ச கப்பியமம்ஸம் வா கப்பியபோ⁴ஜனம் வா, ஏதம் கப்பியம் நாம. க³ஹிதந்தி பி⁴க்கு²னா படிக்³க³ஹிதம். உச்சாரிதந்தி கப்பியம் காரேதும் ஆக³தேன பி⁴க்கு²னா ஈஸகம்பி உக்கி²த்தம் வா அபனாமிதம் வா, தம் பன அதிரித்தகாரகேன ‘‘அலமேதம் ஸப்³ப³’’ந்தி வுத்தேன காதப்³ப³ம். ஹத்த²பாஸக³ந்தி கப்பியம் காரேதும் ஆக³தேன ஹத்த²பாஸம் க³தம். அதிரித்தம் கரோந்தோதி ஈதி³ஸம் சதுப்³பி³தா⁴காரஸம்பன்னம் போ⁴ஜனம் அதிரித்தம் கரோந்தோ பவாரேத்வா ஆஸனா அவுட்டி²தோ வா அப்பவாரேத்வாபி ஸப்³ப³தா² பு⁴த்தோ வாதி ஏவம் து³வித⁴வினயகம்மாகாரஸம்பன்னோ பி⁴க்கு². அலமேதம் ஸப்³ப³ந்தி ஏவம் பா⁴ஸதூதி அலமேதம் ஸப்³ப³ம் இதி ஏவம் பா⁴ஸது. ஏவம் ஸத்தவித⁴ம் வினயகம்மாகாரம் ஸம்பாதே³ந்தோ வசீபே⁴த³ம் கத்வா ஸகிம்பி ஏவம் வதே³ய்யாதி அத்தோ².

83. கப்பியம் கரோந்தேன பன அனுபஸம்பன்னஸ்ஸ ஹத்தே² டி²தம் ந காதப்³ப³ம். தேனாஹ ‘‘ந கரே…பே… ஹத்த²க³’’ந்தி. உபஸம்பன்னதோ அஞ்ஞோ அனுபஸம்பன்னோ, தஸ்ஸ ஹத்தே² க³தம் அனுபஸம்பன்னஹத்த²க³ம். பேஸயித்வாபீதி ஸசே தத்த² அஞ்ஞோ ப்³யத்தோ பி⁴க்கு² நத்தி², யத்த² அத்தி², தத்த² பேஸயித்வாபி. தம் அதிரித்தகதம் அகாரகோ அதிரித்தகாரகதோ அஞ்ஞோ ஸப்³போ³ பவாரிதோபி அப்பவாரிதோபி பு⁴ஞ்ஜிதும் லப்³ப⁴தேதி ஸம்ப³ந்த⁴னீயம். பவாரிதேன பன முக²ஞ்ச ஹத்த²ஞ்ச ஸோதே⁴த்வா பு⁴ஞ்ஜிதப்³ப³ம்.

பவாரணானித்³தே³ஸவண்ணனா நிட்டி²தா.