44. உபோஸத²னித்³தே³ஸவண்ணனா

410. து³வே உபோஸதா²தி ஸுலப⁴ப்பவத்திவஸேன வுத்தம். தயோ பன தி³வஸவஸேனேவ உபோஸதா² சாதுத்³த³ஸிகோ பன்னரஸிகோ ஸாமக்³கி³கோதி. தத்த² ஹேமந்தகி³ம்ஹவஸ்ஸானானம் திண்ணம் உதூனம் ததியஸத்தமபக்கே²ஸு த்³வே த்³வே கத்வா ச² சாதுத்³த³ஸிகா, ஸேஸா பன்னரஸிகாதி ஏவம் ஏகஸம்வச்ச²ரே சதுவீஸதிஉபோஸதா². இத³ம் தாவ லோகஸ்ஸ பகதிசாரித்தம். ‘‘ஆக³ந்துகேஹி ஆவாஸிகானம் அனுவத்திதப்³ப³’’ந்திஆதி³வசனதோ (மஹாவ. 178) பன ததா²ரூபபச்சயே ஸதி அஞ்ஞஸ்மிம்பி சாதுத்³த³ஸே உபோஸத²ம் காதும் வட்டதி.

411. ஸுத்துத்³தே³ஸோ ஸங்க⁴ஸ்ஸேவாதி யோஜனா. அதி⁴ட்டா²னஞ்ச தம் உபோஸதோ² சாதி கம்மதா⁴ரயோ. ஸேஸானந்தி த்³வின்னம் திண்ணம் வா. ‘‘து³வே’’திஆதி³னா ச சாதுத்³த³ஸோ பன்னரஸோ ஸாமக்³கீ³தி தி³வஸவஸேன, ஸுத்துத்³தே³ஸோ அதி⁴ட்டா²னம் பாரிஸுத்³தீ⁴தி கரணப்பகாரேன, ஸங்கு⁴போஸதோ² க³ணுபோஸதோ² புக்³க³லுபோஸதோ²தி புக்³க³லவஸேன சாதி நவ உபோஸதா² தீ³பிதா ஹோந்தி.

412. புப்³ப³கிச்சேதி –

‘‘ச²ந்த³பாரிஸுத்³தி⁴உதுக்கா²னம், பி⁴க்கு²க³ணனா ச ஓவாதோ³;

உபோஸத²ஸ்ஸ ஏதானி, புப்³ப³கிச்சந்தி வுச்சதீ’’தி. (மஹாவ. அட்ட². 168) –

ஏவம் அட்ட²கதா²சரியேஹி வுத்தே புப்³ப³கரணானந்தரம் கத்தப்³பே³ புப்³ப³கிச்சே.

புப்³ப³கரணேதி –

‘‘ஸம்மஜ்ஜனீ பதீ³போ ச, உத³கம் ஆஸனேன ச;

உபோஸத²ஸ்ஸ ஏதானி, புப்³ப³கரணந்தி வுச்சதீ’’தி. (மஹாவ. அட்ட². 168) –

ஏவம் அட்ட²கதா²சரியேஹேவ வுத்தே ஸப்³ப³பட²மம் கத்தப்³பே³ புப்³ப³கரணே. பத்தகல்லேதி உபோஸதா²தீ³னம் சதுன்னம் அங்கா³னம் ஸம்ப⁴வேன பத்தோ காலோ இமஸ்ஸாதி பத்தகாலம், பத்தகாலமேவ பத்தகல்லம். கிம் தம்? உபோஸதா²தி³கம்மம். தம் பன சதூஹி அங்கே³ஹி ஸங்க³ஹிதம். யதா²ஹு அட்ட²கதா²சரியா –

‘‘உபோஸதோ² யாவதிகா ச பி⁴க்கூ² கம்மப்பத்தா,

ஸபா⁴கா³பத்தியோ ச ந விஜ்ஜந்தி;

வஜ்ஜனீயா ச புக்³க³லா தஸ்மிம் ந ஹோந்தி,

பத்தகல்லந்தி வுச்சதீ’’தி. (மஹாவ. அட்ட². 168);

ஸமானிதேதி ஸம்மா ஆனீதே பவத்திதேதி அத்தோ². ஸோதி ஸுத்துத்³தே³ஸோ. பஞ்சதா⁴தி நிதா³னுத்³தே³ஸோ பாராஜிகுத்³தே³ஸோ ஸங்கா⁴தி³ஸேஸுத்³தே³ஸோ அனியதுத்³தே³ஸோ வித்தா²ருத்³தே³ஸோதி ஏவம் பஞ்சதா⁴.

413. வினாந்தராயந்தி ராஜந்தராயோ சோரந்தராயோ அக்³யந்தராயோ உத³கந்தராயோ மனுஸ்ஸந்தராயோ அமனுஸ்ஸந்தராயோ வாளந்தராயோ ஸரீஸபந்தராயோ ஜீவிதந்தராயோ ப்³ரஹ்மசரியந்தராயோதி (மஹாவ. 150) வுத்தேஸு த³ஸஸு யம் கிஞ்சி அந்தராயம் வினா. ஸங்கே²பேனாதி வினா வித்தா²ரம். ‘‘ஏத்த² த்³வீஸு தீஸு வா உத்³தே³ஸேஸு விஸதே³ஸு தே²ரோவ இஸ்ஸரோ’’தி வுத்தத்தா அவத்தந்தேபி வட்டதீதி யோஜனா. ஏத்தா²தி பஞ்சஸு உத்³தே³ஸேஸு. அவத்தந்தேதி தே²ரஸ்ஸ வித்தா²ரேன அவத்தமானே அப்பகு³ணே. வட்டதீதி ஸம்கி²த்தேன உத்³தி³ஸிதும்பி வட்டதி. இமினாவ யஸ்ஸ கஸ்ஸசி உத்³தே³ஸகஸ்ஸ அவத்தந்தேபி வட்டதீதி விஞ்ஞாயதி. த்³வீஸு வத்தமானேஸு இஸ்ஸரத்தே அதி⁴கே வத்தப்³ப³மேவ நத்தீ²தி த³ஸ்ஸனத்த²ம் ‘‘தீஸூ’’தி வுத்தம். ‘‘தே²ரோவ இஸ்ஸரோ’’திஆதி³னா இத³ம் பரிதீ³பேதி – த்³வே அக²ண்டா³ ஸுவிஸதா³ வாசுக்³க³தா, தே²ராதே⁴ய்யம் பாதிமோக்க²ம், ஸசே பன ஏத்தகம்பி விஸத³ம் காதும் ந ஸக்கோதி, ப்³யத்தஸ்ஸ பி⁴க்கு²னோ ஆயத்தம் ஹோதி, தஸ்மா ஸயம் உத்³தி³ஸிதப்³ப³ம், அஞ்ஞா வா அஜ்ஜே²ஸிதப்³போ³தி.

414. உத்³தி³ஸந்தே ஸமா வா அத² தோ²கிகா வா யதி³ ஆக³ச்சே²ய்யுந்தி ஸம்ப³ந்த⁴னீயம். உத்³தி³ஸந்தே ஆவாஸிகேஹி பாதிமோக்கே² உத்³தி³ஸ்ஸமானே. ஸமா வா தோ²கிகா வாதி ஆவாஸிகேஹி ஸமா வா தோ²கிகா வா ஆக³ந்துகா பி⁴க்கூ². அவஸேஸகம் ஸோதப்³ப³ந்தி இமினா ஏத்தாவதாபி உபோஸதோ² கதோயேவ நாமாதி தீ³பேதி.

415. உத்³தி³ட்ட²மத்தேதி உத்³தி³ட்ட²ம்யேவ உத்³தி³ட்ட²மத்தம். மத்த-ஸத்³தோ³ அவதா⁴ரணே. ஸகலாய ஏகச்சாய வா உட்டி²தாய ஸமா வா தோ²கிகா வா யதி³ ஆக³ச்சே²ய்யுந்தி யோஜனா. ஸகலாயாதி ஸப்³பா³ய பரிஸாய. ஏஸம் ஸந்திகே பாரிஸுத்³தி⁴ம் கரேய்யுந்தி ஏஸம் ஆவாஸிகானம் ஸமீபே தே ஆக³ந்துகா பி⁴க்கூ² பாரிஸுத்³தி⁴உபோஸத²ம் கரேய்யுந்தி அத்தோ². அத² ப³ஹுகா சே, ஸப்³ப³விகப்பேஸு புப்³ப³கிச்சம் கத்வாதி யோஜனீயம். விகப்பீயந்தி பரிகப்பீயந்தீதி விகப்பா, அவஸேஸஸவனபாரிஸுத்³தி⁴உபோஸத²விதா⁴னா ஸப்³பே³ ச தே விகப்பா சேதி ஸப்³ப³விகப்பா. தேஸு. புனுத்³தி³ஸேதி புன பாதிமோக்க²ம் உத்³தி³ஸேய்ய.

416. இதரானந்தி ஆக³ந்துகானம். இதரோதி சாதுத்³த³ஸோ. ஏத்த² பன யேஸம் பன்னரஸோ, தே அதீதம் உபோஸத²ம் சாதுத்³த³ஸிகம் அகம்ஸூதி வேதி³தப்³பா³. அயமேத்தா²தி⁴ப்பாயோ – தாதி³ஸே பச்சயே ஸதி சாதுத்³த³ஸிகஸ்ஸ கதத்தா தேஸம் யதா²வுத்தததியஸத்தமபக்க²ஸங்கா²தசாதுத்³த³ஸிகே ஸம்பத்தே தேரஸீசாதுத்³த³ஸீகத்தப்³ப³த்தா அனுபோஸத²த்தா பன தத்த² உபோஸதோ² ந கதோதி சாதுத்³த³ஸோயேவ பன்னரஸோ ஜாதோ. ஸமானேதரேதி ஸமா ஊனா இதரேதி பத³ச்சே²தோ³. இதரேதி ஆக³ந்துகா. புரிமானம் அனுவத்தந்தூதி ஆவாஸிகேஹி ‘‘அஜ்ஜுபோஸதோ² பன்னரஸோ’’தி புப்³ப³கிச்சே கயிரமானே புரிமானம் ஆவாஸிகானம் அனுவத்தந்தூதி அத்தோ². ஸசேதி⁴காதி யதி³ ஆக³ந்துகா ப³ஹுகா ஹோந்தி. புரிமாதி ஆவாஸிகா. தேஸம் அனுவத்தந்தூதி தேஸம் ஆக³ந்துகானம் ‘‘அஜ்ஜுபோஸதோ² சாதுத்³த³ஸோ’’தி புப்³ப³கிச்சே கயிரமானே அனுவத்தந்து. ஸேஸேபீதி ஆக³ந்துகானம் பன்னரஸவாரேபி. அயம் நயோதி ‘‘ஆக³ந்துகானம் பன்னரஸோ இதரானம் ஸசேதரோ’’திஆதி³கோ அயமேவ நயோ. ஏத்த² பன யேஸம் பன்னரஸோ, தே திரோரட்ட²தோ வா ஆக³தா அதீதம் வா உபோஸத²ம் சாதுத்³த³ஸிகம் அகம்ஸூதி வேதி³தப்³போ³.

417. அதீதுபோஸத²ஸ்ஸ சாதுத்³த³ஸியம் கதத்தா சாதுத்³த³ஸியம் பன்னரஸுபோஸதோ² கதோதி பன்னரஸீ ஆவாஸிகானம் பாடிபதோ³ ஜாதோதி ஆஹ ‘‘ஆவாஸிகானம் பாடிபதோ³’’தி. இதரானந்தி ஆக³ந்துகானம். உபோஸதோ²தி பன்னரஸோ உபோஸதோ². ஸமதோ²கானந்தி அத்தனா ஸமானம் வா தோ²கானம் வா ஆக³ந்துகானம். மூலட்டா²தி ஆவாஸிகா. காமதோ தே³ந்தூதி அத்தனோ இச்சா²ய தே³ந்து.

418. நோ சே தே³ந்தீதி யதி³ ஆவாஸிகா காயஸாமக்³கி³ம் ந தே³ந்தி, தேஸம் பன ஆவாஸிகானம் ஹிய்யோ உபோஸத²ஸ்ஸ கதத்தா அஜ்ஜ உபோஸத²கரணம் நத்தி². ப³ஹூஸு அனிச்சா²ய காயஸாமக்³கி³ம் த³தே³ய்யாதி யோஜனா. ப³ஹூஸூதி ஆக³ந்துகேஸு ப³ஹுகேஸு. ப³ஹி வா வஜேதி ஆவாஸிகபி⁴க்கு²பரிஸா நிஸ்ஸீமம் வா வஜேய்யாதி அத்தோ².

419. ஸாவேய்ய ஸுத்தந்தி பாதிமோக்க²ஸங்கா²தம் ஸுத்தம் வாயமித்வா ஸாவேய்ய.

420. ஸம்மஜ்ஜிதும் …பே… உத³காஸனம் பஞ்ஞபேதுஞ்ச மஹாதே²ரேன பேஸிதோ கல்லோ ந கரேய்ய ததா²தி ஸம்ப³ந்தோ⁴. கல்லோதி அகி³லானோ. ததா²தி து³க்கடம் அதிதி³ஸதி. ஆஸனேஸு அஸதி அந்தமஸோ ஸாகா²ப⁴ங்க³ம்பி கப்பியம் காராபேத்வா பஞ்ஞபேதப்³ப³ம். தேலே அஸதி கபல்லே அக்³கி³பி ஜாலேதப்³போ³.

421-3. பட்ட²பேத்வா த³காஸனந்தி பரிபோ⁴ஜனீயபானீயோத³கஞ்ச ஆஸனஞ்ச ஸன்னிஹிதம் கத்வா. க³ணஞத்திந்தி இதா³னி வக்க²மானம் க³ணேன ட²பேதப்³ப³ம் ஞத்திம். தேதி அஞ்ஞே து³வே பி⁴க்கூ². ஸமத்தபுப்³பா³ரம்பே⁴னாதி ஸமத்தோ நிட்டி²தோ புப்³பே³ஸு உத்தராஸங்க³ஏகம்ஸகரணாதீ³ஸு ஆரம்போ⁴ யஸ்ஸாதி திபத³ப³ஹுப்³பீ³ஹி. நவேன தே ஏவமீரியாதி ஸம்ப³ந்தோ⁴. தேதி இதரே த்³வே.

424. கத்தப்³ப³ம் கத்வா புப்³ப³கிச்சாதி³கம் ஸம்பாதே³த்வா நவோ ஏவம் ஈரியோதி யோஜனா.

427. யத்தா²தி யஸ்மிம் விஹாரே ஏகேகஸ்ஸ பாரிஸுத்³தி⁴ம் ஹரித்வானாதி ஸம்ப³ந்தோ⁴. ஏகேகஸ்ஸாதி ஏத்த² விச்சா²யம் த்³வித்தம். கிரியாய கு³ணேன த³ப்³பே³ன வா பி⁴ன்னே அத்தே² ப்³யாபிதும் இச்சா² விச்சா². ஏத்த² பன ச²ந்த³பாரிஸுத்³தி⁴ஹரணஸங்கா²தாய கிரியாய சதூஸு ச தீஸு ச த்³வீஸு ச பி⁴ன்னமேகேகம் ப்³யாபிதும் ஸம்ப³ந்தி⁴தும் இச்சா²தி விச்சா². இதரீதரேதி ஏத்தா²பி கரணகிரியாவஸேன வேதி³தப்³ப³ம். தயோ த்³வே ஏகோ வா தம் தம் ஸங்கு⁴போஸத²ம் க³ணுபோஸத²ம் புக்³க³லுபோஸத²ம் வாதி வுத்தம் ஹோதி. அயமேத்தா²தி⁴ப்பாயோ – சதூஸு ஏகஸ்ஸ ஆஹரித்வா தயோ பாரிஸுத்³தி⁴உபோஸத²ம் கரோந்தி, தீஸு வா ஏகஸ்ஸ ஆஹரித்வா த்³வே ஸங்கு⁴போஸத²ம் கரோந்தி, அத⁴ம்மேன வக்³க³ம் உபோஸத²கம்மம். அத² பன ஏகஸ்ஸ ஆஹரித்வா தயோ ஸங்கு⁴போஸத²ம் கரோந்தி, ஏகஸ்ஸ ஆஹரித்வா த்³வே பாரிஸுத்³தி⁴உபோஸத²ம் கரோந்தி, அத⁴ம்மேன வக்³க³ம் நாம ஹோதி. யதி³ பன சத்தாரோபி ஸன்னிபதித்வா பாரிஸுத்³தி⁴உபோஸத²ம் கரோந்தி, தயோ வா த்³வே வா ஸங்கு⁴போஸத²ம் கரோந்தி, அத⁴ம்மேன ஸமக்³க³ம் நாம ஹோதீதி. தப்³பி³பரியாயேன த⁴ம்மேன ஸமக்³க³ம் வேதி³தப்³ப³ம்.

428. வக்³கே³ ஸமக்³கே³ வா ‘‘வக்³கோ³’’தி ஸஞ்ஞினோ விமதிஸ்ஸ வா கரோதோ து³க்கடந்தி ஸம்ப³ந்தோ⁴. வக்³கே³தி வக்³க³ஸங்கே⁴. விமதிஸ்ஸாதி ‘‘வக்³கோ³ நு கோ², ஸமக்³கோ³’’தி ஏவம் வேமதிகஸ்ஸ. இமினாவ குக்குச்சபகதவாரோபி உபலக்கி²தோ. கரோதோதி உபோஸத²ம் கரோந்தஸ்ஸ. பே⁴தா³தி⁴ப்பாயேன கரோதோதி யோஜனா. ஏத்த² பன பாபஸ்ஸ ப³லவதாய து²ல்லச்சயம் வுத்தம். ஸஞ்ஞினோதி ஸஞ்ஞாஸீஸேன சித்தம் வுத்தம், சித்தவதோதி அத்தோ².

429-30. ‘‘உக்கி²த்தஸ்ஸா’’திஆதி³னா வஜ்ஜனீயபுக்³க³லே த³ஸ்ஸேதி. உக்கி²த்தஸ்ஸாதி கத்துஅத்தே² ஸாமிவசனம். நிஸின்னஸத்³த³ஸ்ஸ கம்மஸாத⁴னத்தா உக்கி²த்தாதீ³ஹி கத்தூஹி ப⁴விதப்³ப³ந்தி. ‘‘ஸேஸான’’ந்தி விஸேஸனஸ்ஸ பி⁴க்கூ²னம் ப்³யபி⁴சாரேன ஸாத்த²கதா. அப⁴ப்³ப³ஸ்ஸ பண்ட³காதி³ஏகாத³ஸவித⁴ஸ்ஸ அப⁴ப்³ப³ஸ்ஸ. நிஸின்னபரிஸாயஞ்ச பாதிமோக்க²ம் ந உத்³தி³ஸேதி ஸம்ப³ந்தோ⁴. ஸபா⁴கா³பத்திகோ ததா² ந உத்³தி³ஸேதி யோஜேதப்³ப³ம். விகாலபோ⁴ஜனாதி³வத்து²தோ ஸமானோ பா⁴கோ³ கோட்டா²ஸோ ஏதிஸ்ஸாதி ஸபா⁴கா³, ஸா ஆபத்தி அஸ்ஸாதி ப³ஹுப்³பீ³ஹி.

ச²ந்தே³ன பரிவுத்தே²னாதி ஏத்த² சதுப்³பி³த⁴ம் பாரிவாஸியம் பரிஸபாரிவாஸியம் ரத்திபாரிவாஸியம் ச²ந்த³பாரிவாஸியம் அஜ்ஜா²ஸயபாரிவாஸியந்தி. தத்த² பி⁴க்கூ² கேனசிதே³வ கரணீயேன ஸன்னிபதிதா ஹோந்தி, அத² மேகு⁴ட்டா²னாதி³னா கேனசிதே³வ கரணீயேன அனோகாஸோ, அத² ‘‘அஞ்ஞத்த² க³ச்சா²மா’’தி ச²ந்த³ம் அவிஸ்ஸஜ்ஜித்வாவ உட்ட²ஹந்தி, இத³ம் பரிஸபாரிவாஸியம் நாம கிஞ்சாபி பரிஸபாரிவாஸியம், ச²ந்த³ஸ்ஸ பன அவிஸ்ஸட்ட²த்தா கம்மம் காதும் வட்டதி.

‘‘யாவ பன ஸப்³பே³ ஸன்னிபதந்தி, தாவ த⁴ம்மம் ஸுணிஸ்ஸாமா’’தி ஏகம் அஜ்ஜே²ஸந்தி, தஸ்மிம் த⁴ம்மகத²ம் கதே²ந்தேயேவ அருணோ உக்³க³ச்ச²தி, ஸசே சாதுத்³த³ஸிகம் காதும் நிஸின்னா, பன்னரஸோதி காதும் வட்டதி, ஸசே பன்னரஸிகம் காதும் நிஸின்னா, பாடிபதே³ அனுபோஸதே² உபோஸத²ம் காதும் ந வட்டதி, அஞ்ஞம் பன ஸங்க⁴கிச்சம் காதும் வட்டதி, இத³ம் ரத்திபாரிவாஸியம் நாம.

ஏவம் பன நிஸின்னே கோசி நக்க²த்தபாட²கோ பி⁴க்கு² ‘‘அஜ்ஜ நக்க²த்தம் தா³ருணம், இமம் கம்மம் மா கரோதா²’’தி வத³தி, தே தஸ்ஸ வசனேன ச²ந்த³ம் விஸ்ஸஜ்ஜேத்வா தத்தே²வ நிஸின்னா ஹோந்தி, அத²ஞ்ஞோ ஆக³ந்த்வா ‘‘நக்க²த்தம் படிமானேந்தம், அத்தோ² பா³லம் உபச்சகா³’’தி (ஜா. 1.1.49) வத்வா ‘‘கிம் நக்க²த்தேன, கரோதா²’’தி வத³தி, இத³ம் ச²ந்த³பாரிவாஸியஞ்சேவ அஜ்ஜா²ஸயபாரிவாஸியஞ்ச. ஏகஸ்மிம் பாரிவாஸியே புன ச²ந்த³பாரிஸுத்³தி⁴ம் ஆனேத்வா கம்மம் காதும் வட்டதி.

431. ஆபன்னஞ்ச வேமதிகஞ்ச அதே³ஸயித்வா வா நாவிகத்வா வா உபோஸத²ம் காதும் ந ச கப்பதீதி ஸம்ப³ந்தோ⁴. நாவிகத்வாதி க³ருகாபத்திம் அனாவிகத்வா. ந சாதி நேவ.

432. அட்டி²தோபோஸதா²தி அட்டி²தோ அவிஸ்ஸட்டோ² உபோஸதோ² யஸ்மிந்தி ப³ஹுப்³பீ³ஹி. தத³ஹூதி தஸ்மிம் உபோஸத²தி³வஸே. அந்தராயம் வா ஸங்க⁴ம் வா வினா அதி⁴ட்டா²தும் ஸீமமேவ வா ந வஜேதி யோஜனா. அதி⁴ட்டா²துந்தி இமினா க³ணுபோஸத²ம்பி உபலக்கே²தி. ஸீமந்தி இமினா நதி³ம்பி.

உபோஸத²னித்³தே³ஸவண்ணனா நிட்டி²தா.