45. பவாரணானித்³தே³ஸவண்ணனா

433. ‘‘அஞ்ஞமஞ்ஞப்பவாரணா’’த்யாதீ³னம் அஞ்ஞமஞ்ஞேஹி காதப்³பா³ பவாரணா. தத்த² திண்ணம் சதுன்னஞ்ச க³ணஞத்திம் ட²பேத்வா அஞ்ஞமஞ்ஞப்பவாரணா, த்³வின்னம் பன அட்ட²பேத்வாவ. அதி⁴ட்டா²னந்தி அதி⁴ட்டா²னப்பவாரணா, யுபச்சயந்தானம் பா⁴வே நியதனபும்ஸகத்தா ‘‘அதி⁴ட்டா²ன’’ந்தி வுத்தம். ஸேஸா பஞ்சாதீ³ஹி காதப்³பா³ அவஸேஸா ஸங்க⁴ப்பவாரணா ஸங்க⁴வஸேன ஞத்திம் ட²பேத்வா காதப்³பா³. ஏதேன நவஸு ஸங்க⁴ப்பவாரணாத³யோ திஸ்ஸோ த³ஸ்ஸிதா. நவ ஹி பவாரணா சாதுத்³த³ஸீ பன்னரஸீ ஸாமக்³கீ³தி தி³வஸவஸேன, தேவாசீ த்³வேவாசீ ஏகவாசீதி கத்தப்³பா³காரவஸேன, ஸங்கே⁴ பவாரணா, க³ணே பவாரணா, புக்³க³லே பவாரணாதி காரகவஸேன ச. தத்த² புரிமவஸ்ஸம்வுத்தா²னம் புப்³ப³கத்திகபுண்ணமா வா தேஸம்யேவ ஸசே ப⁴ண்ட³னகாரகேஹி உபத்³து³தா பவாரணம் பச்சுக்கட்³ட⁴ந்தி, அத² கத்திகமாஸஸ்ஸ காளபக்க²சாதுத்³த³ஸோ வா பச்சி²மகத்திகபுண்ணமா வா பச்சி²மவஸ்ஸம்வுத்தா²னஞ்ச பச்சி²மகத்திகபுண்ணமா ஏவ வா பவாரணாதி³வஸா ஹோந்தி. இத³ம் பன பகதிசாரித்தம். ததா²ரூபப்பச்சயே ஸதி த்³வின்னம் கத்திகபுண்ணமானம் புரிமேஸு சாதுத்³த³ஸேஸுபி பவாரணம் காதும் வட்டதி. பி⁴ன்னஸ்ஸ பன ஸங்க⁴ஸ்ஸ ஸாமக்³கி³யம் யோ கோசி தி³வஸோ பவாரணாதி³வஸோ ஹோதி. இமா தி³வஸவஸேன திஸ்ஸோ பவாரணா. கத்தப்³பா³காரவஸேன பன வக்க²மானனயேன விஞ்ஞாதப்³பா³.

434. ‘‘புப்³ப³கிச்சே’’திஆதீ³ஸு –

‘‘ஸம்மஜ்ஜனீ பதீ³போ ச, உத³கம் ஆஸனேன ச;

பவாரணாய ஏதானி, புப்³ப³கரணந்தி வுச்சதி.

‘‘ச²ந்த³ப்பவாரணா உதுக்கா²னம், பி⁴க்கு²க³ணனா ச ஓவாதோ³;

பவாரணாய ஏதானி, புப்³ப³கிச்சந்தி வுச்சதி.

‘‘பவாரணா யாவதிகா ச பி⁴க்கூ² கம்மப்பத்தா,

ஸபா⁴கா³பத்தியோ ச ந விஜ்ஜந்தி;

வஜ்ஜனீயா ச புக்³க³லா தஸ்மிம் ந ஹோந்தி,

பத்தகல்லந்தி வுச்சதீ’’தி. –

ஏவம் அட்ட²கதா²யம் வுத்தா புப்³ப³கிச்சாத³யோ வேதி³தப்³பா³. ஞத்திந்தி இதா³னி வக்க²மானம் ஸாமஞ்ஞம் ஸங்க⁴ஞத்திம். ஏவம் பன ஞத்தியா ட²பிதாய காரணே ஸதி தேவாசிகத்³வேவாசிகஏகவாசிகஸமானவஸ்ஸிகவஸேனபி பவாரேதும் வட்டதி. அயமேவ பன ஞத்தி ‘‘ஸங்கோ⁴ பவாரேய்யா’’தி ஏத்த² ‘‘ஸங்கோ⁴ தேவாசிகம் பவாரேய்ய, ஸங்கோ⁴ த்³வேவாசிகம் பவாரேய்ய, ஸங்கோ⁴ ஏகவாசிகம் பவாரேய்ய, ஸங்கோ⁴ ஸமானவஸ்ஸிகம் பவாரேய்யா’’திபி ட²பேதும் வட்டதி. சாதுத்³த³ஸியம் பன ஸாமக்³கி³யஞ்ச ‘‘சாதுத்³த³ஸீ ஸாமக்³கீ³’’தி வத்தப்³ப³ம்.

437. தே²ரேஸு உக்குடிகம் நிஸஜ்ஜ பவாரேந்தேஸு நவோ யாவ ஸயம் பவாரேதி, தாவ உக்குடிகோ ஏவ அச்ச²தூதி யோஜனா. அச்ச²தூதி நிஸீதே³ய்ய.

440-2. த⁴ம்மஸாகச்சா² ச கலஹோ சாதி த்³வந்தோ³. ரத்தியா கே²பிதபா⁴வதோ தேவாசிகாய ஓகாஸே அஸதி த³ஸவிதே⁴ வா அந்தராயே ஸதி ‘‘ஸுணாது மே…பே… ஸமானவஸ்ஸிகம் பவாரேய்யா’’தி அனுரூபதோ ஞத்திம் வத்வா யதா²ட²பிதஞத்தியா அனுரூபேன பவாரேய்யாதி ஸம்ப³ந்தோ⁴ வேதி³தப்³போ³. அனுரூபதோதி ‘‘ஸுணாது மே…பே… தா³னம் தே³ந்தேஹி ரத்தி கே²பிதா, ஸசே…பே… ரத்தி விபா⁴யிஸ்ஸதி, யதி³ ஸங்க⁴ஸ்ஸ பத்தகல்ல’’ந்திஆதி³னா தேன கே²பிதரத்தியா அனுரூபேன. ‘‘ஸுணாது மே ப⁴ந்தே ஸங்கோ⁴, அயம் ராஜந்தராயோ, ஸசே ஸங்கோ⁴ தேவாசிகம்…பே… ஸங்கோ⁴ ப⁴விஸ்ஸதி, அதா²யம் ராஜந்தராயோ ப⁴விஸ்ஸதி, யதி³ ஸங்க⁴ஸ்ஸ பத்தகல்ல’’ந்திஆதி³னா ராஜந்தராயாதீ³னம் அனுரூபேன வாதி அத்தோ². ‘‘அதா²யம் ப்³ரஹ்மசரியந்தராயோ ப⁴விஸ்ஸதீ’’தி பன பேய்யாலவஸேன அந்தே வுத்தம் ப்³ரஹ்மசரியந்தராயம் க³ஹேத்வா வுத்தம். ‘‘த்³வேவாசிக’’ந்திஆதி³கம் பன விஸும் விஸும் வத்தப்³ப³ம்பி லங்க⁴னக்கமேன ஸம்பிண்டே³த்வா வுத்தம். வசனஸமயே பன ‘‘த்³வேவாசிகம் பவாரேய்ய’’இச்சாதி³னா வத்தப்³ப³ம். ஆக³ச்சே²ய்யும் யதி³ ஸமாஆதி³கா சாதி ‘‘ஆக³ச்சே²ய்யும் யதி³ ஸமா’’இச்சாத³யோ உபோஸதே² வுத்தா கா³தா²யோ ச. ஏத்தா²தி ஏதிஸ்ஸம் பவாரணாயம். அயமேவ ச ஆஹரணக்கமோ –

ஆக³ச்சே²ய்யும் யதி³ ஸமா, பவாரேந்தேவ தோ²கிகா;

பவாரிதா தே ஸுப்பவாரிதா, அஞ்ஞேஹி ச பவாரியம்;

பவாரிதேஸு ஸகலா-யேகச்சாயுட்டி²தாய வா.

பவாரேய்யுஞ்ச தே தேஸம், ஸந்திகே ப³ஹுகா ஸசே;

கத்வா ஸப்³ப³விகப்பேஸு, புப்³ப³கிச்சம் புனுத்³தி³ஸேதி.

‘‘ஆவாஸிகானம் பன்னரஸோ’’திஆதி³கா கா³தா²யோ பன ஏத்தா²பி ஸமானா.

443. ஞத்திம் வத்வாதி வக்க²மானக³ணஞத்திம் வத்வா.

444. ஸமுதீ³ரியாதி அஞ்ஞே த்³வே தயோ வா வக்க²மானக்கமேன வத்தப்³பா³.

446-8. கத்தப்³ப³ம் கத்வாதி யோஜேதப்³ப³ம். கத்தப்³ப³ந்தி புப்³ப³கிச்சாதி³கம். நவேனபி ‘‘அஹம் ப⁴ந்தே…பே… படிகரிஸ்ஸாமீ’’தி தே²ரோ ஈரியோதி யோஜேதப்³ப³ம். ஏவந்தி இதா³னி வக்க²மானம் பராமஸதி.

449. ‘‘யஸ்மி’’ந்திஆதி³ வுத்தனயத்தா உத்தானமேவ.

450. கா³தா²யோதி ‘‘வக்³கே³ ஸமக்³கே³ வக்³கோ³தி, ஸஞ்ஞினோ’’திஆதி³கா ஹேட்டா² வுத்தகா³தா²யோ வா. அயம் பனேத்த² விஸேஸோ – கரோதோதி ஏத்த² பவாரணம் கரோதோதி அத்தோ² க³ஹேதப்³போ³. ததிய கா³தா²ய ‘‘பாதிமோக்க²ம் ந உத்³தி³ஸே’’தி அபனேத்வா ‘‘நோ கரேய்ய பவாரண’’ந்தி பத³ம் பக்கி²பிதப்³ப³ம். சதுத்த²கா³தா²ய ‘‘அனுபோஸதே²’’திஆதி³கா³தா²ப³ந்த⁴ம் அபனேத்வா ‘‘நேவ பவாரணே காதும், ஸா கப்பதி பவாரணா’’தி பக்கி²பிதப்³ப³ம். பஞ்சமகா³தா²ய ‘‘அட்டி²தோபோஸதா²வாஸா’’தி அபனேத்வா ‘‘பவாரணாடி²தாவாஸா’’தி பக்கி²பிதப்³ப³ம்.

451. ஸங்க⁴ம்ஹி பவாரிதேவாதி புரிமவஸ்ஸூபக³தே ஸங்க⁴ம்ஹி பவாரிதே ஏவ. பாரிஸுத்³தி⁴உபோஸத²ம் கரேய்யாதி ந ஏகஸ்மிம் உபோஸத²க்³கே³ த்³வே ஞத்தியோ ட²பேதப்³பா³தி அதி⁴ப்பாயோ. பச்சி²மிகாய உபக³ந்த்வா அபரினிட்டி²தவஸ்ஸோ அவுத்தோ². அனுபாக³தோதி வஸ்ஸம் அனுபாக³தோ. அயமேத்தா²தி⁴ப்பாயோ – புரிமிகாய வஸ்ஸம் உபக³தா பஞ்ச வா அதிரேகா வா பச்சி²மிகாய உபக³தா தேஹி ஸமா வா ஊனதரா வா புரிமிகாய வா உபக³தேஹி பச்சி²மிகாய உபக³தா தோ²கதரா சேவ ஹோந்தி, ஸங்க⁴ப்பவாரணாய க³ணம் பூரேந்தி ஸங்க⁴ப்பவாரணாவஸேன ஞத்திம் ட²பேத்வா, அத² ச உபோ⁴பி ஏகதோ ஹுத்வா ஸங்க⁴ம் ந பூரேந்தி, க³ணம் பன பூரேந்தி, க³ணஞத்திம் ட²பேத்வா பவாரேதப்³ப³ம், பச்சா² தேஸம் ஸந்திகே பாரிஸுத்³தி⁴உபோஸதோ² காதப்³போ³. யதி³ பன புரிமிகாய ஏகோ, பச்சி²மிகாய ஏகோ, ஏகேன ஏகஸ்ஸ ஸந்திகே பவாரேதப்³ப³ம், ஏகேன பாரிஸுத்³தி⁴உபோஸதோ² காதப்³போ³. ஸசே புரிமேஹி வஸ்ஸூபக³தேஹி பச்சா² வஸ்ஸூபக³தா ஏகேனபி அதி⁴கா ஸங்க⁴ம் பூரேந்தி, பட²மம் பாதிமோக்க²ம் உத்³தி³ஸித்வா பச்சா² தேஸம் ஸந்திகே பவாரேதப்³ப³ந்தி. க³ணேபி ஏஸேவ நயோ. ஏவமுபரிபி யதா²யோக³ம் சிந்தனீயம்.

452. சாதுமாஸினியாதி அபரகத்திகபுண்ணமாயம். ஸங்கே⁴னாதி பட²மம் வஸ்ஸூபக³தேன ஸங்கே⁴ன. வுத்தா² வஸ்ஸா யேஹி தே வுத்த²வஸ்ஸா, பச்சி²மவஸ்ஸூபக³தா. ஸசே அப்பதரா ஸியுந்தி இமினா யதி³ அதி⁴கதரா வா ஸமஸமா வா ஹோந்தி, பவாரணாஞத்திம் ட²பேத்வா பச்சி²மவஸ்ஸூபக³தேஹி பட²மம் பவாரிதே பச்சா² இதரேஹி பாரிஸுத்³தி⁴உபோஸதோ² காதப்³போ³தி தீ³பேதீதி.

பவாரணானித்³தே³ஸவண்ணனா நிட்டி²தா.