41. பகிண்ணகனித்³தே³ஸவண்ணனா

335. ஸத்³வாரப³ந்த⁴னே ஸோது³க்க²லகபாஸகே டா²னே தி³வா ஸயந்தேன பரிவத்தகம் த்³வாரம் ப³ந்தே⁴ய்யாதி ஸம்ப³ந்தோ⁴. த்³வாரஞ்ச த்³வாரப³ந்த⁴னஞ்ச த்³வாரப³ந்த⁴னானி மஜ்ஜே²பத³லோபவஸேன, ப³ந்த⁴ன-ஸத்³தே³னேவ வா த்³வாரபா³ஹா வுச்சந்தி, ஸஹ த்³வாரப³ந்த⁴னேஹீதி ஸத்³வாரப³ந்த⁴னம், டா²னம். ஹேட்டா² உது³க்க²லகஞ்ச உபரி பாஸகோ ச, ஸஹ உது³க்க²லபாஸகேஹீதி ஸமாஸோ. தாதி³ஸே டா²னே பாகாராதி³பரிக்கே²பேன ப⁴விதப்³ப³ந்தி பரிக்கி²த்தேதி விஞ்ஞாயதி. ஸோ ச உச்சதோ ஸஹஸேய்யப்பஹோனகே வுத்தனயோதி வத³ந்தி. ஸயந்தேனாதி பாதே³ பூ⁴மிதோ மோசேத்வா நிபஜ்ஜந்தேன. பரிவத்தகந்தி ஸம்வரணவிவரணவஸேன இதோ சிதோ ச பரிவத்தனயோக்³க³ம். த்³வாரந்தி அந்தமஸோ து³ஸ்ஸஸாணித்³வாரம்பி. ப³ந்தே⁴ய்யாதி ஸப்³ப³ந்திமேன விதி⁴னா யாவதா ஸீஸம் ந பவிஸதி, தாவதாபி ப³ந்தே⁴ய்ய, ஸம்வரேய்யாதி வுத்தம் ஹோதி.

336. ஆபோ⁴கோ³ சாபீதி ‘‘ஏஸ ஜக்³கி³ஸ்ஸதீ’’தி ஆபோ⁴கோ³ சாபி. ச-ஸத்³தே³ன ‘‘த்³வாரம் ஜக்³கா³ஹீ’’தி வசனம்பி ஸமுச்சினோதி. ஸவஸே தம் ஆகாரம் வினாதி ஸஸ்ஸ அத்தனோ வஸே ஆயத்தே டா²னே, யத்த² பன ப³ஹூனம் ஸஞ்சரணத்தா த்³வாரம் ஸம்வுதம்பி ஸம்வுதட்டா²னே ந திட்ட²தி, த்³வாரம் அலப⁴ந்தா பாகாரம் அபி⁴ருஹித்வாபி விசரந்தி, தாதி³ஸே பரிவேணே ஸம்வரணகிச்சம் நத்தி². அத² வா ஸஸ்ஸ வஸோ ஆயத்தோ, ந யக்கா²தீ³னம் தேஹி க³ஹிதகத்தஸ்ஸ, ப³ந்தி⁴த்வா நிபஜ்ஜாபிதத்தஸ்ஸ ச அபா⁴வேனாதி ஸவஸோ. தஸ்மிம் ஸதி புப்³பே³ வுத்தத்³வாரம் ஸம்வரணஆபோ⁴க³கரணவசனஸங்கா²தம் ஆகாரந்தி அத்தோ².

337. ரதனானீதி முத்தாதீ³னி த³ஸவிதா⁴னி. தத்த² பன ஜாதிப²லிகம் உபாதா³ய ஸப்³போ³பி மணி வேளுரியோபி லோஹிதங்கோ மஸாரக³ல்லோ ச தோ⁴தாபி அதோ⁴தவித்³தா⁴பி அனாமாஸா, காசமணி ச பானீயஸங்கோ² தோ⁴தோ அதோ⁴தோபி ஆமாஸா, ஸிலா தோ⁴தவித்³தா⁴ ஸுவண்ணேன ஸத்³தி⁴ம் பசிதா முக்³க³வண்ணா ச அனாமாஸா. சேதியக⁴ரகோ³பகானம் ஸுவண்ணசேதியே கசவரமேவ ஹரிதும் வட்டதி. ஆரகூடலோஹம்பி ஜாதரூபக³திகமேவ. இத்தி²ரூபானீதி அந்தமஸோ பிட்ட²மயஇத்தி²ரூபானிபி. த⁴ஞ்ஞந்தி அந்தமஸோ தத்த²ஜாதகம்பி மக்³கே³ பஸாரிதம்பி ஸத்தவித⁴ம் த⁴ஞ்ஞம். கீளாவஸேன அபரண்ணானி தாலப²லாதீ³னிபி அனாமாஸானி, பஸாரிதம்பி ந மத்³த³ந்தேன க³ந்தப்³ப³ம், அஸதி மக்³கே³ மக்³க³ம் அதி⁴ட்டா²ய க³ந்தப்³ப³ம். இத்தி²பஸாத⁴னந்தி அந்தமஸோ பிளந்த⁴னத்தா²ய ட²பிதம் நிவாஸனதாலபண்ணமுத்³தி³கம்பி.

338. ஸித்த²தேலோத³தேலேஹீதி மது⁴ஸித்த²கனிய்யாஸாதீ³ஸு யேன கேனசி தேலமிஸ்ஸகஸிலேஸேன ச உத³கமிஸ்ஸகதேலேன ச. ப²ணஹத்த²ப²ணேஹீதி ப²ணமிவ ப²ணம், அங்கு³லீஹி ப²ணகிச்சகரணேன ஹத்தோ²யேவ ப²ணம் ஹத்த²ப²ணம், த³ந்தமயாதி³ யம் கிஞ்சி ப²ணஞ்சேவ ஹத்த²ப²ணஞ்சாதி த்³வந்தோ³. ஓஸண்டே²ய்யாதி ஓலிகி²த்வா ஸன்னிஸீதா³பேய்ய.

339. ஏகபாவுரணா வா ஏகத்த²ரணா வா ந துவட்டயும், ஏகமஞ்சே ந துவட்டயுந்தி யோஜனா. ஏகம் பாவுரணம் ஏகம் அத்த²ரணம் ஏதேஸந்தி விக்³க³ஹோ. ந துவட்டயுந்தி ந நிபஜ்ஜேய்யும். ஏகஸ்மிம் பா⁴ஜனே வாபி ந பு⁴ஞ்ஜேய்யுந்தி யோஜேதப்³ப³ம்.

340. மனுஸ்ஸானம் பமாணங்கு³லேன அட்ட² அங்கு³லானி யஸ்ஸ, அதி⁴கேன ஸஹிதம் அட்ட²ங்கு³லந்தி ஸமாஸோ. லஸுணம் மக³தே⁴ஸு ஜாதம் ஆமலகப⁴ண்டி³கம் லஸுணம் ந கா²தே³ய்யாதி ஸம்ப³ந்தோ⁴. ந அகல்லகோதி அகி³லானோ.

341. ஹீனுக்கட்டே²ஹி ஜாதிஆதீ³ஹி உக்கட்ட²ம் வா ஹீனம் வா உஜும் வா அஞ்ஞாபதே³ஸேன வா த³வா வதே³, து³ப்³பா⁴ஸிதந்தி ஸம்ப³ந்தோ⁴. ஜாதிஆதீ³ஹீதி ஜாதினாமகோ³த்தகம்மஸிப்பஆபா³த⁴லிங்க³கிலேஸஆபத்திஅக்கோஸேஹி. உக்கட்ட²ந்தி ஜாத்யாதீ³ஹியேவ உக்கட்ட²ம் உபஸம்பன்னம் அனுபஸம்பன்னம் வா. த³வாதி கேளிஹஸாதி⁴ப்பாயதாய. உஜும் வாதி ‘‘சண்டா³லோஸீ’’திஆதி³னா நயேன. அஞ்ஞாபதே³ஸேன வாதி ‘‘ஸந்தி இதே⁴கச்சே சண்டா³லா’’திஆதி³னா நயேன.

342. தீ³கே⁴ நகே²தி மம்ஸப்பமாணதோ. தீ³கே⁴ கேஸேதி த்³வங்கு³லதோ. ஸசேபி ந தீ³கா⁴, து³மாஸதோ ஏகதி³வஸம்பி அதிக்காமேதும் ந லப⁴தி. தீ³கே⁴ நாஸலோமேதி நாஸதோ ப³ஹி நிக்க²ந்தே. வீஸதிமட்ட²ந்தி வீஸதியா நகா²னம் மட்ட²ஞ்ச. ஸம்பா³தே⁴தி உபோ⁴ஸு உபகச்ச²கேஸு, முத்தகரணே ச லோமஹாரணஞ்ச ந லப்³பா⁴தி ஸம்ப³ந்த⁴னீயம். ந லப்³பா⁴தி ஏதே மட்டா²த³யோ ந லப்³ப⁴ந்தீதி அத்தோ², நிபாதோ வா லப்³பா⁴தி. ஆபா³த⁴ப்பச்சயா பன ஸம்பா³தே⁴ லோமம் ஸம்ஹரிதும் வட்டதி.

343. ஸங்கு⁴த்³தி³ட்ட²ம் வா ஸங்கி⁴கம் வா ஸயனாஸனம் யதா²வுட்³ட⁴ம் ந பா³தே⁴ய்யாதி யோஜனா. ஸங்க⁴ஸ்ஸ உத்³தி³ட்ட²ம் ஸங்கு⁴த்³தி³ட்ட²ம், ஸங்க⁴ம் உத்³தி³ஸ்ஸ கதந்தி அதி⁴ப்பாயோ. யோ யோ வுட்³டோ⁴ யதா²வுட்³ட⁴ம், வுட்³ட⁴ப்படிபாடியாதி அத்தோ². ந பா³தே⁴ய்யாதி ந படிபா³ஹேய்ய. அல்லபாதா³ நாம யேஹி அக்கந்தட்டா²னே உத³கம் பஞ்ஞாயதி. ஸயனாஸனந்தி மஞ்சபீடா²தி³, இமினா பரிப⁴ண்ட³கதா பூ⁴மீதிபி உபலக்கி²தா. ஸுதோ⁴தபாத³கம் வாபி ஸஉபாஹனோ ததே²வாதி ஸம்ப³ந்தோ⁴. ஸுதோ⁴தபாத³கந்தி தோ⁴தபாதே³ஹேவ அக்கமிதப்³ப³ட்டா²னம். தோ⁴தா பாதா³ யஸ்ஸ அக்கமனஸ்ஸாதி கிரியாவிஸேஸனஸமாஸோ. யதி³ பன தத்த² நேவாஸிகா அதோ⁴தபாதே³ஹிபி வளஞ்ஜேந்தி, ததே²வ வளஞ்ஜேதும் வட்டதி. ததே²வாதி பரிப⁴ண்ட³கதம் பூ⁴மிம் ஸேனாஸனம் வா நக்கமேதி அத்தோ².

344. ஸங்கா⁴டியாதி அதி⁴ட்டி²தஸங்கா⁴டியா. பாதே³ பரிக்³க³ஹேத்வா ஆஸனம் பல்லத்தோ², பல்லத்த²ம் கரோதீதி பல்லத்தா²திதா⁴துஸ்ஸ பல்லத்தே²தி ரூபம். விஹாரேபி அந்தரக⁴ரேபி பல்லத்தி²காய ந நிஸீதே³ய்யாதி அதி⁴ப்பாயோ, பரிகம்மகதம் பி⁴த்தாதி³ந்தி யோஜனா. பரிகம்மகதந்தி ஸேதவண்ணேன வா சித்தகம்மேன வா கதபரிகம்மம். ஆதி³-ஸத்³தோ³ த்³வாரவாதபானாதி³ம் ஸங்க³ண்ஹாதி. ந அபஸ்ஸயேதி சீவராதி³னா அப்படிச்சா²தே³த்வா அபஸ்ஸயனம் ந கரேய்ய. நோ ந ஆசமேதி நேவ ந ஆசமே, ஆசமேய்யாதி அத்தோ². த்³வே படிஸேதா⁴ பகதியத்த²ம் க³மேந்தீதி. ஸந்தேதி இமினா உத³கே அஸந்தே அனாபத்தீதி தீ³பேதி.

345. அகப்பியஸமாதா³னேதி பி⁴க்கூ²னம் ஸாமணேரானம் அகப்பியே ஸமாதா³னே. த³வாதி நிபாதோ, கீளாதி⁴ப்பாயேனாதி அத்தோ². ஸிலாபவிஜ்ஜ²னேதி அந்தமஸோ ஹத்த²யந்தேனபி ஸக்க²ரிகாயபி கி²பனே. ஸபா⁴கா³ய தே³ஸனாய ஆவிகம்மே ச து³க்கடந்தி யோஜேதப்³ப³ம். ஸபா⁴கா³யாதி வத்து²வஸேன ஸமானோ பா⁴கோ³ ஏதிஸ்ஸா ஆபத்தியாதி விக்³க³ஹோ. ச-ஸத்³தோ³ தாதி³ஸியா படிக்³க³ஹணமத்தம் ஸமுச்சினோதி.

346. படிஸ்ஸவோ நாம ‘‘உபோ⁴பி மயம் இத⁴ வஸ்ஸம் வஸிஸ்ஸாம, ஏகதோ உத்³தி³ஸாபேமா’’திஆதி³படிஜானனம், தஸ்ஸ விஸம்வாதோ³ பச்சா² அகரணம் படிஸ்ஸவவிஸம்வாதோ³, தஸ்மிம், நிமித்தத்தே² பு⁴ம்மம். ஸுத்³த⁴சித்தஸ்ஸாதி கத²னஸமயே ‘‘கரிஸ்ஸாமீ’’தி ஏவம் பவத்தசித்தஸ்ஸ. இதரஸ்ஸாதி அஞ்ஞஸ்ஸ அஸுத்³த⁴சித்தஸ்ஸ.

347. கிச்சேதி ஸுக்க²கட்டா²தி³க்³க³ஹணகிச்சே ஸதி ஏவ போரிஸம் புரிஸப்பமாணம் அபி⁴ருஹேய்யாதி ஸம்ப³ந்தோ⁴. ஆபதா³ஸூதி வாளமிக³த³ஸ்ஸனாதீ³ஸு.

348. பரிஸ்ஸாவனம் வினாதி ஸம்ப³ந்தோ⁴. அத்³தா⁴னந்தி ஹேட்டி²மந்தேன அத்³த⁴யோஜனஸங்கா²தம் அத்³தா⁴னம். ஸசே ந ஹோதி பரிஸ்ஸாவனம் வா த⁴ம்மகரணோ வா, ஸங்கா⁴டிகண்ணோபி அதி⁴ட்டா²தப்³போ³. யாசமானஸ்ஸாதி பரிஸ்ஸாவனம் யாசந்தஸ்ஸ.

349. ஆபா³த⁴ப்பச்சயா அஞ்ஞத்ர ஸேஸங்கே³ ச அத்தகா⁴தனே ச து³க்கடந்தி யோஜனா. ஸேஸங்கே³தி அங்க³ஜாததோ கண்ணனாஸாதி³அவஸேஸே அவயவச்சே²த³னே. அத்தகா⁴தனேதி ஆஹாருபச்சே²தா³தி³னா அத்தனோ மாரணே.

350. தூலிகாய கயிரமானம் இத்தி²புரிஸாதி³கம் சித்தஞ்ச போத்த²கஞ்ச கட்டா²தீ³ஸு கயிரமானம் சித்தபோத்த²கானி, தானியேவ ரூபானீதி ஸமாஸோ. ஜாதகாதீ³னி பன பரேஹி காராபேதும் லப்³ப⁴ந்தி. மாலாகம்மாதீ³னி ஸயம்பி காதும் லப்³ப⁴ந்தி. ஆராமாரஞ்ஞகே³ஹேஸு பு⁴ஞ்ஜந்தம் ந உட்டா²பேய்யாதி யோஜேதப்³ப³ம். விஹாரஸங்கா²தோ ஆராமோ ச அரஞ்ஞஞ்ச அந்தரக⁴ரஸங்கா²தம் கே³ஹஞ்சாதி த்³வந்தோ³. ‘‘ஆராம…பே… கே³ஹேஸூ’’தி வத்தப்³பே³ ஏ-காரஸ்ஸ அ-காரகரணேன கா³தா²ப³ந்த⁴வஸேன வுத்தம். ஓகாஸே கதே பன ‘‘பவிஸதா²’’தி வுத்தே ச பவிஸிதப்³ப³ம் உபனிஸீதி³தப்³ப³ஞ்ச.

351. புமயுத்தானி யானானி ச ஸிவிகஞ்ச ஹத்த²வட்டகஞ்ச பாடங்கிஞ்ச அபி⁴ருஹிதும் கி³லானஸ்ஸ கப்பதேதி ஸம்ப³ந்தோ⁴. புமயுத்தானீதி அஸ்ஸக³வாதி³புரிஸயுத்தானி, ந தே⁴னுயுத்தானி, ஸாரதி² பன இத்தீ² வா ஹோது புரிஸோ வா, வட்டதி. ஹத்த²வட்டகேபி ஏஸேவ நயோ, யானானீதி ரத²ஸகடாதீ³னி, ஸிவிகந்தி பீட²கஸிவிகம், பீட²கயானந்தி அத்தோ². பாடங்கீதி அந்தோ³லிகா. கி³லானஸ்ஸாதி ஏத்த² கி³லானோ நாம ந அப்பகேனபி ஸீஸாபா³தா⁴தி³மத்தேன வேதி³தப்³போ³, யோ பன ந ஸக்கோதி வினா யானேன க³ந்தும், ஏவரூபோ வேதி³தப்³போ³. ததா² ஹி யானம் அனுஜானந்தேன ப⁴க³வதா கோஸலேஸு ஜனபதே³ஸு ப⁴க³வந்தம் த³ஸ்ஸனாய ஸாவத்தி²ம் க³ச்ச²ந்தம் அஞ்ஞதரம் கி³லானம் பி⁴க்கு²ம் க³ந்துமஸக்குணேய்யதாய அஞ்ஞதரஸ்மிம் ருக்க²மூலே நிஸின்னம் தி³ஸ்வா மனுஸ்ஸேஹி தம் பவத்திம் ஞத்வா ‘‘ஏஹி, ப⁴ந்தே, க³மிஸ்ஸாமா’’தி வுத்தே ‘‘நாஹம், ஆவுஸோ, க³மிஸ்ஸாமி, கி³லானோம்ஹீ’’தி வுத்தவத்து²ஸ்மிம் (மஹாவ. 253) அனுஞ்ஞாதம், ததா² வத³ந்தோ ச ஸோ பி⁴க்கு² க³மனுபச்சே²த³ஸாத⁴கமேவ கே³லஞ்ஞம் ஸந்தா⁴யாஹாதி விஞ்ஞாயதி அதி⁴ப்பேதத்த²னிப்ப²த்தியா உபச்சி²ன்னத்தா, அபிச யானேன ஏகபரிச்சே²தா³ய உபாஹனாய பரிச்சே²த³ம் ட²பேந்தேன அட்ட²கதா²சரியேன ‘‘கி³லானேன பி⁴க்கு²னா ஸஉபாஹனேனாதி ஏத்த² கி³லானோ நாம யோ ந ஸக்கோதி அனுபாஹனேன கா³மம் பவிஸிது’’ந்தி அட்ட²கதா²யம் (மஹாவ. அட்ட². 256) வுத்தம், தஸ்மா யதா²வுத்தகி³லானோவ கி³லானோதி நிட்ட²மேத்த² க³ந்தப்³ப³ம்.

352. த³வம் கரணேதி கேளியா கரணே. அஞ்ஞஸ்ஸாதி அந்தமஸோ து³ஸ்ஸீலஸ்ஸாபி. உபலாளனேதி ‘‘பத்தம் த³ஸ்ஸாமி, சீவரம் த³ஸ்ஸாமீ’’திஆதி³னா.

353. விவரித்வா ந த³ஸ்ஸயேதி ஸம்ப³ந்த⁴னீயம். தா பி⁴க்கு²னியோ.

354. ஓவாத³ந்தி பி⁴க்கு²னீஹி தேரஸியம் வா சாதுத்³த³ஸியம் வா ஆக³ந்த்வா உபோஸத²ம் புச்சி²த்வா ‘‘சாதுத்³த³ஸோ’’திஆதி³னா பி⁴க்கு²னா ஆசிக்கி²தே புன தாஹி உபோஸத²தி³வஸே ஸமாக³ந்த்வா ஓவாதூ³பஸங்கமனயாசனம், தம் பாதிமோக்கு²த்³தே³ஸகஸ்ஸ ஆரோசேத்வா தேன கதஸன்னிட்டா²னம் க³ஹேத்வா பாடிபதே³ பச்சாஹரிதப்³ப³ந்தி அஜானனகம் பா³லஞ்ச ததா² காதும் அஸமத்த²ம் கி³லானஞ்ச பாடிபதே³ க³ந்துகாமம் க³மியஞ்ச வஜ்ஜேத்வா அஞ்ஞஸ்ஸ க³ஹணபச்சாஹரணானி அகாதும் ந வட்டதி. தேன வுத்தம் ‘‘ந க³ண்ஹதோ’’திஆதி³.

355. லோகாயதந்தி நிரத்த²ககாரணப்படிஸம்யுத்தம் தித்தி²யஸத்த²ம். திரச்சா²னவிஜ்ஜா ச இமினாவ உபலக்கி²தா. ந வாசேய்யாதி பரேஸம் ந வாசேய்ய. இமினாவ அத்தனோ பரியாபுணனம்பி படிக்கி²த்தம் லோகாயததிரச்சா²னவிஜ்ஜாதி ச ராக³தோ³ஸமோஹவட்³டா⁴னி பு³த்³தா⁴தி³க³ரஹிதா ஸக்³க³மோக்கா²னம் திரோ திரியதோ அஞ்சிதா க³தா பவத்தா கப்³ப³னாடகாதி³கா ஸப்³பா³பி விஜ்ஜா அனுலோமவஸேன வா வினயபரியாயம் பத்வா க³ருகே டா²தப்³ப³ந்தி வினயயுத்திதோபி ஸங்க³ஹிதாதி வேதி³தப்³பா³. ஏவஞ்ச நோ க³ரூனமுபதே³ஸோ. பேளாயபீதி யத்த² பாதிம் ட²பேத்வா ஸுகி²னோ பு⁴ஞ்ஜந்தி, தம்ப³லோஹேன ரஜதேன வா கதாய தாய ஆஸித்தகூபதா⁴னஸங்கா²தாய பேளாய ட²பேத்வா.

356. பாருதஞ்ச நிவாஸனஞ்ச, கி³ஹீனம் ஹத்தி²ஸோண்டா³தி³வஸேன பாருதனிவாஸனம் யஸ்ஸ பாருபனஸ்ஸ நிவாஸனஸ்ஸாதி கிரியாவிஸேஸனஸமாஸோ. கி³ஹிபாருதனிவாஸனம் ந பாருபே ந நிவாஸேய்யாதி ஸம்ப³ந்தோ⁴. ஸம்வேல்லியம் ந நிவாஸேய்யாதி மல்லகம்மகராத³யோ விய கச்ச²ம் கத்வா ந நிவாஸேய்ய. ஏவம் நிவாஸேதும் கி³லானஸ்ஸாபி மக்³க³ப்படிபன்னஸ்ஸாபி ந வட்டதி. யம்பி மக்³க³ம் க³ச்ச²ந்தா ஏகம் வா த்³வே வா கோணே உக்கி²பித்வா அந்தரவாஸகஸ்ஸ உபரி லக்³க³ந்தி, ந வட்டதி. ஏவம் அபாருபித்வா அனிவாஸேத்வா ச நிப்³பி³காரம் பரிமண்ட³லம் பாருபிதப்³ப³ம் திமண்ட³லம் படிச்சா²தே³ந்தேன பரிமண்ட³லம் நிவாஸேதப்³ப³ஞ்ச, ததா² அபாருபித்வா அனிவாஸேத்வா ச ஆராமே வா அந்தரக⁴ரே வா அனாத³ரேன யம் கிஞ்சி விகாரம் கரோந்தஸ்ஸ து³க்கடம். தா³யந்தி வனம். நாலிம்பயேய்யாதி ‘‘ஸப்³பூ³பகாரானி வினஸ்ஸந்தூ’’தி வா கி²ட்³டா³தி⁴ப்பாயேன வா நாலிம்பயேய்ய.

357. வட்³டி⁴ம் நோ பயோஜயே அஞ்ஞாதகப்பவாரிதே நோ யாசேதி யோஜனா. அஞ்ஞஸ்ஸாதி ஸஹத⁴ம்மிகஸ்ஸாபி. கதிபாஹம் பு⁴த்வா வாதி யோஜனீயம். புனோதி நிபாதோ.

358. த³ண்டி³னம் ஞத்வா வா அஞத்வா வா உத்³தி³ஸ்ஸ ரக்க²ம் யாசனே த³ண்டி³தே த³ண்டோ³ அஸ்ஸ கீ³வாதி யோஜனா. த³ண்ட³ம் க³ண்ஹதீதி பச்சயந்தஸ்ஸ த³ண்டி³னம் த³ண்ட³க்³க³ஹணந்தி அத்தோ². உத்³தி³ஸ்ஸாதி ‘‘அம்ஹாகம் விஹாரே அஸுகேன ச அஸுகேன ச இத³ம் நாம கத’’ந்தி, ‘‘கரிஸ்ஸ’’ந்தி வா ஏவம் அதீதம் வா அனாக³தம் வா ஆரப்³ப⁴. யாசனேதி வோஹாரிகேஸு யாசனே ஸதி. த³ண்டி³தேதி தேஹி த³ண்டே³ க³ஹிதே ஸோ த³ண்டோ³ அஸ்ஸ யாசகஸ்ஸ பி⁴க்கு²னோ கீ³வா, இணம் ஹோதீதி அத்தோ². வோஹாரிகேஹி பன ‘‘கேனா’’தி வுத்தே ‘‘அஸுகேனாதி வத்தும் அம்ஹாகம் ந வட்டதி, தும்ஹேயேவ ஜானிஸ்ஸத², கேவலஞ்ஹி மயம் ரக்க²ம் யாசாம, தம் நோ தே³த², அவஹடப⁴ண்ட³ஞ்ச மம் ஆஹராபேதா²’’தி வத்தப்³ப³ம். ஏவம் அனோதி³ஸ்ஸ ஆசிக்க²ணா ஹோதி, ஸா வட்டதி. பாராஜிகாதி³காதி பாராஜிகது²ல்லச்சயது³க்கடானி.

359. ‘‘ஹரந்தேஸு பரிக்கா²ரம்,

சோரோ சோரோதி பா⁴ஸிதே;

அனத்தா²யேஸம் க³ண்ஹந்தே’’தி. –

பாடே²ஹி ப⁴விதப்³ப³ம். ஏவஞ்ஹி ஸதி ‘‘ஹரந்தேஸூ’’தி ப³ஹுவசனேன ஸஹ க⁴டதே. பரிக்கா²ரம் ஹரந்தேஸு ஏஸம் அனத்தா²ய ‘‘சோரோ சோரோ’’தி பா⁴ஸிதே த³ண்ட³ம் க³ண்ஹந்தே தத்தகம் அஸ்ஸ கீ³வாதி யோஜேதப்³ப³ம். ஹரந்தேஸூதி சோரேஸு க³ஹேத்வா க³ச்ச²ந்தேஸு. ஏஸந்தி சோரானம். க³ண்ஹந்தேதி வோஹாரிகஜனே க³ண்ஹந்தே. யத்தகம் க³ஹிதம், தத்தகம் அஸ்ஸ பி⁴க்கு²னோ கீ³வா, ப⁴ண்ட³தே³ய்யம் ஹோதீதி அத்தோ².

360. பாகாரகுட்டானம் ப³ஹி வளஞ்ஜே வாபி வீஹாதி³னாளிகேராதி³ரோபிமே ஹரிதே வாபி விகா⁴ஸுச்சாரஸங்காரமுத்தம் நாவலோகிய ச²ட்³டே³ய்ய, து³க்கடந்தி ஸம்ப³ந்தோ⁴. வளஞ்ஜே நாவலோகியாதி ச இமினா ஓலோகேத்வா வா அவளஞ்ஜே வா விகா⁴ஸாதீ³னி ச²ட்³டே³ந்தஸ்ஸ அனாபத்தீதி தீ³பேதி. வீஹி ஆதி³ யேஸம் ஸாலிஆதீ³னம் தே வீஹாத³யோ, நாளிகேரோ ஆதி³ யேஸம் அம்ப³பனஸாதீ³னம் தே நாளிகேராத³யோ, வீஹாத³யோ ச நாளிகேராத³யோ சாதி த்³வந்தோ³, தேஸம் ரோபோ, தேன நிப்³ப³த்தம் வீஹாதி³…பே… ரோபிமம். ஹரிதேதி ஹரிதட்டா²னே. விகா⁴ஸோ நாம உச்சி²ட்டோ²த³கசலகாதி³.

361. த⁴ம்மயுத்தம்பி நச்சஞ்ச கீ³தஞ்ச வாதி³தஞ்ச யோஜாபேதுஞ்ச பயோஜேதுஞ்ச பயுத்தானி பஸ்ஸிதுஞ்ச ‘‘உபஹாரம் கரோமா’’தி வுத்தே ஸம்படிச்சி²தும் வா ந லப்³ப⁴ந்தி ஸம்ப³ந்தோ⁴. த⁴ம்மயுத்தம்பீதி ரதனத்தயகு³ணூபஸம்ஹிததாய அந்தமஸோ த⁴ம்மேன புஞ்ஞேன ஸம்யுத்தம்பி. நச்சந்தி அந்தமஸோ மோரஸுகமக்கடாதீ³னம் நச்சம்பி. கீ³தந்தி அந்தமஸோ கீ³தஸ்ஸ புப்³ப³பா⁴கே³ கயிரமானம் த³ந்தகீ³தம்பி. வாதி³தந்தி அந்தமஸோ உத³கபே⁴ரிவாதி³தம்பி. யோஜாபேதுந்தி அஞ்ஞேஹி காராபேதும். பயோஜேதுந்தி அத்தனா காதும். ஆயதகேன கீ³தஸ்ஸரேன த⁴ம்மம்பி பா⁴ஸிதும் ந வட்டதி. பயுத்தானீதி பரேஹி யேஹி கேஹிசி கதானி. பஸ்ஸிதுந்தி இமினா அனோலோசனத³ஸ்ஸனம்பி க³ஹிதந்தி ஸோதுந்திபி அத்தோ² விஞ்ஞாயதி. அந்தராராமே டி²தஸ்ஸ பஸ்ஸதோ அனாபத்தி. வீதி²யம் ட²த்வா கீ³வம் பரிவத்தேத்வா பஸ்ஸதோபி ஆபத்தியேவ. யேன கேனசி கரணீயேன க³தட்டா²னே பஸ்ஸதி, ஸுணாதி வா, அனாபத்தி. ஸம்படிச்சி²துந்தி ‘‘ஸாதூ⁴’’தி ஸம்படிச்சி²தும். ‘‘உபஹாரகரணம் நாம ஸுந்த³ர’’ந்தி வத்தும் வட்டதி. வா-ஸத்³தோ³ ஸமுச்சயே.

362. ‘‘கீளத்த²ம் கதம் ராஜாகா³ர’’ந்திஆதி³னா ஸம்ப³ந்தி⁴தப்³ப³ம். சித்தேன விசித்தகம் ஆகா³ரம் சித்தாகா³ரகம்.

363. ஆஸனேன நவே ந படிபா³ஹேய்யாதி யோஜனா. ஆஸனேனாதி ஆஸனதோ. ந படிபா³ஹேய்யாதி ந உட்டா²பேய்ய. உண்ஹே சீவரம் ந நித³ஹேய்யாதி யோஜனீயம். ந நித³ஹேய்யாதி அதி⁴கம் ந நித³ஹேய்ய. க³ருனாதி ஆசரியுபஜ்ஜா²யேன. பணாமிதோதி ‘‘மா இத⁴ பவிஸா’’திஆதி³னா நிக்கட்³டி⁴தோ.

364. ஸத்தஹி ஆபத்தீஹி ச பி⁴க்கு²ம் வாபி அஞ்ஞேனேவ ச உபாஸகம் வாபி பரம்முகா² அக்கோஸனே து³க்கடந்தி யோஜேதப்³ப³ம். ஆபத்தீஹி சாதி ச-ஸத்³தோ³ அவதா⁴ரணே. அஞ்ஞேனேவ சாதி ஏத்த² ஏவ சாதி நிபாதஸமுதா³யோ, ஏகோ ஏவ வா அவதா⁴ரணே, வுத்ததோ அஞ்ஞேனேவ ‘‘அஸத்³தோ⁴’’திஆதி³னாதி அத்தோ². பரம்முகா²தி நிபாதோ, தஸ்ஸ அஸம்முகே²தி அத்தோ². ஸம்முகா² வத³ந்தஸ்ஸ பாசித்தியம். பாபக³ரஹணவஸேன பன வத³தோ அனாபத்தி.

365. ஸத்³தா⁴தே³ய்யம் ஸத்³தா⁴ய தா³தப்³ப³ம் சீவரஞ்ச ச-ஸத்³தே³ன அவஸேஸம்பி வினிபாதேதும் நாஸேதும் ந லப்³ப⁴ம், பிதூனம் லப்³ப⁴ந்தி ஸம்ப³ந்தோ⁴. ஞாதீனம்பீதி பி-ஸத்³தோ³ ஸம்பா⁴வனே.

366. அஞ்ஞத்ர வஸ்ஸம்வுத்தோ² அஞ்ஞதோ பா⁴க³ம் க³ண்ஹேய்ய, து³க்கடந்தி ஸம்ப³ந்தோ⁴. அஞ்ஞத்ராதி அஞ்ஞஸ்மிம் விஹாரே. அஞ்ஞதோதி அஞ்ஞவிஹாரதோ. படிதே³ய்யாதி க³ஹிதட்டா²னே த³தே³ய்ய. க³ஹிதே தஸ்மிம் வத்து²ஸ்மிம் நட்டே² வா ஜிண்ணே வா தஸ்ஸ கீ³வாஹோ தீதி ஸம்ப³ந்தோ⁴. சோதி³தோ நோ த³தே³ய்ய, தேஸம் து⁴ரனிக்கே²பதோ ப⁴ண்ட³க்³க⁴காரியோ ஹோதீதி யோஜனா. சோதி³தோதி வத்து²ஸாமிகேஹி ‘‘தே³ஹீ’’தி வுத்தோ. தேஸந்தி தஸ்மிம் விஹாரே லாபீ⁴னம் பி⁴க்கூ²னம்.

367. ஸந்தருத்தரோ வா கல்லோ ஸஉபாஹனோ வா கா³மம் ந பவிஸேய்ய, சாமரீமகஸபீ³ஜனிம் ந தா⁴ரேய்யாதி யோஜனீயம். அந்தரஞ்ச உத்தரஞ்ச, ஸஹ அந்தருத்தரேன ஸந்தருத்தரோ. அக்³க³ளகு³த்தே விஹாரே ஸங்கா⁴டிம் நிக்கி²பித்வா க³ந்தும் வட்டதி. ஆரஞ்ஞகேன பன ப⁴ண்டு³க்க²லிகாய பக்கி²பித்வா பாஸாணருக்க²ஸுஸிராதீ³ஸு படிச்ச²ன்னேஸு ட²பேத்வா க³ந்தப்³ப³ம். அந்தருத்தரானம் நிக்கே²பே அயமேவ நயோ. கல்லோதி அகி³லானோ. மகஸானம் பீ³ஜனீ மகஸபீ³ஜனீ, சமரீனம் வாளேஹி கதா மகஸபீ³ஜனீதி ஸமாஸோ.

368. ஆராமதோ ப³ஹீதி ஸம்ப³ந்த⁴னீயம். ஆராமதோதி ஆராமூபசாரதோ. ந தா⁴ரேய்யாதி அகி³லானோ ந தா⁴ரேய்ய. யஸ்ஸ பன காயதா³ஹோ வா பித்தகோபோ வா ஹோதி, சக்கு² வா து³ப்³ப³லம், அஞ்ஞோ வா கோசி ஆபா³தோ⁴ வினா ச²த்தேன உப்பஜ்ஜதி, தஸ்ஸ கா³மே வா அரஞ்ஞே வா ச²த்தம் வட்டதி. கு³த்தியா லப்³ப⁴தீதி வஸ்ஸே சீவரகு³த்தத்த²ம், வாளமிக³சோரப⁴யேஸு அத்தகு³த்தத்த²ம்பி லப்³ப⁴தீதி அத்தோ². ஏகபண்ணச²த்தம் பன ஸப்³ப³த்தே²வ வட்டதி.

369. உப⁴தோகாஜம் ந கா³ஹேய்யாதி ஸம்ப³ந்தோ⁴. உப⁴தோ த³ண்ட³ஸ்ஸ உப⁴யகோடியம் பா⁴ரப³ந்த⁴காஜம் உப⁴தோகாஜம், அலோபதப்புரிஸோ. ஏகந்தரிககாஜகந்தி அந்தரமேவ அந்தரிகம், ஏகஞ்ச அந்தரிகஞ்சாதி த்³வந்தோ³, ஏகந்தரிகே பா⁴ரப³ந்த⁴காஜந்தி தப்புரிஸோ ஏகதோகாஜகம், அந்தரிககாஜகந்தி வுத்தம் ஹோதி. ஹத்தே² ஓலம்போ³ அஸ்ஸ பா⁴ரஸ்ஸாதி ஸமாஸோ.

370. அனோகாஸகதந்தி ‘‘கரோது மே ஆயஸ்மா ஓகாஸம், அஹம் தம் வத்துகாமோ’’தி ஏவம் சோத³கேன ஓகாஸே காராபிதே நத்தி² ஓகாஸோ கதோ அனேன சுதி³தகேனாதி ப³ஹுப்³பீ³ஹி. சோதே³ய்யாதி சாவனஅக்கோஸகம்மவுட்டா²னாதி⁴ப்பாயேன சோதே³ய்ய. உபோஸத²ப்பவாரணட்ட²பனஅனுவிஜ்ஜத⁴ம்மகதா²தி⁴ப்பாயேஸு ஓகாஸகம்மம் நத்தி². ஸுத்³த⁴ஸ்ஸாதி அனாபத்திகதாய ஸுத்³த⁴ஸ்ஸ. அவத்து²ஸ்மிந்தி அகாரணே. ததா²தி து³க்கடம் அதிதி³ஸதி. கரோந்தேனாபி ‘‘பூ⁴தமேவ நு கோ² ஆபத்திம் வத³தி, அபூ⁴த’’ந்தி ஏவம் உபபரிக்கி²த்வா காதப்³பா³. ‘‘அனுஜானாமி, பி⁴க்க²வே, புக்³க³லம் துலயித்வா ஓகாஸம் காது’’ந்தி (மஹாவ. 153) ஹி வுத்தம்.

371. ஸத்தானம் பகதங்கு³லேன அட்ட²ங்கு³லாதி⁴கம் மஞ்சப்படிபாத³ம் வா உச்சபாத³கம் மஞ்சம் வா ந தா⁴ரயேதி யோஜனா. பகதியா அங்கு³லம் பகதங்கு³லம். தஞ்ச வட்³ட⁴கிஅங்கு³லம் வேதி³தப்³ப³ம். அட்ட² ச தானி அங்கு³லானி ச, தேஹி தமதி⁴கம் யஸ்ஸாதி ஸமாஸோ. மஞ்சானம் படிபாதோ³, யத்த² மஞ்சபாதே³ நிக்கி²பந்தி. அட்ட²ங்கு³லதோ உச்சா பாதா³ யஸ்ஸாதி ப³ஹுப்³பீ³ஹி.

372. மூக³ப்³ப³தாதி³ந்தி மூகா³னமிவ துண்ஹீபா⁴வஸங்கா²தம் வதம் ஆதி³ யஸ்ஸ கோ³வதாதி³னோ தித்தி²யவதஸ்ஸாதி ஸமாஸோ. கு²ரமேவ ப⁴ண்ட³ம் கு²ரப⁴ண்ட³ம். புப்³பே³ ந்ஹாபிதோ ந்ஹாபிதபுப்³ப³கோ, விஸேஸனஸ்ஸ பரனிபாதோ.

373. ஹத்த²கம்மந்தி ஹத்தே²ன காதப்³ப³ம் வட்³ட⁴கிஆதீ³னம் கம்மம். அனுஸ்ஸரணம் ‘‘கப்பியத்தம் மே யேன யாசிதம், அம்ஹேஹி இமஸ்ஸ தா³தப்³ப³’’ந்தி ஏவம் சித்தப்பவத்திஅனுஸாரோ, தஸ்ஸா யாசனாய அனுஸாரோ தத³னுஸாரோ, ததோ லத்³த⁴ம் யம் கிஞ்சி க³ஹேதுந்தி யோஜனா. கம்மதோ நிக்³க³தோ நிக்கம்மோ, விகா⁴ஸாதா³தி³. தம் அயாசித்வாபி காரேதுந்தி ஸம்ப³ந்தோ⁴. ஆஹராபேதுந்தி அரஞ்ஞதோ ஆனேதும். அபரஸந்தகந்தி தா³ருதிணபலாலாதி³கம் அபரபரிக்³க³ஹிதம்.

374. கி³ஹீனம் யத்தகம் தே³தி, கோ³பகே தே³ந்தே க³ஹேதும் லப்³ப⁴ம், ஸங்க⁴சேதியஸந்தகே யதா²பரிச்சே²த³ம் க³ஹேதும் லப்³ப⁴ந்தி யோஜனா. தே³தீதி கோ³பகோ பி⁴க்கூ²னம் தே³தி. க³ஹேதுந்தி தத்தகம் க³ஹேதும். ஸங்க⁴சேதியஸந்தகேதி வேதனகோ³பகேஹி தீ³யமானே ஸங்க⁴ஸ்ஸ சேதியஸ்ஸ ச ஸந்தகே. யதா²பரிச்சே²த³ந்தி யம் தேஸம் ஸங்கே⁴ன அனுஞ்ஞாதம் ஹோதி ‘‘தி³வஸே தி³வஸே ஏத்தகம் நாம கா²த³தா²’’தி, தம் பரிச்சே²த³ம் அனதிக்கம்ம. ஸங்கி⁴கே ச சேதியஸந்தகே ச கேணியா க³ஹேத்வா ஆரக்க²ந்தஸ்ஸேவ ஹி தா³னே பரிச்சே²தோ³ நத்தி².

375. ‘‘காயவாசாஹி த்³வீஹி ஆபத்திம் ஆபஜ்ஜேய்யா’’தி யேபு⁴ய்யவஸேன வுத்தம், மேது²னத⁴ம்மே பரூபக்கமே ஸதி ஸாதி³யந்தஸ்ஸ அகிரியஸமுட்டா²னபா⁴வஸம்ப⁴வதோ. ச²ஹி வாதி ஆபத்துப்பத்திகாரணஸங்கா²தேஹி ச²ஹி ஸமுட்டா²னேஹி வா ஆபத்திம் ஆபஜ்ஜேய்யாதி ஸம்ப³ந்தோ⁴. ஸப்³பா³பத்தீனஞ்ஹி காயோ வாசா காயவாசா காயசித்தம் வாசாசித்தம் காயவாசாசித்தந்தி ச² ஸமுட்டா²னானி. தத்த² புரிமானி தீணி அசித்தகானி, பச்சி²மானி ஸசித்தகானி.

திதா⁴ ஏகஸமுட்டா²னா, பஞ்சதா⁴ த்³விஸமுட்டி²தா;

த்³விதா⁴ திசதுரோ டா²னா, ஏகதா⁴ ச²ஸமுட்டி²தா.

தத்த² சதுத்தே²ன பஞ்சமேன ச²ட்டே²ன ச ஸமுட்டா²னதோ ஏகஸமுட்டா²னா திதா⁴. பட²மசதுத்தே²ஹி ச து³தியபஞ்சமேஹி ச ததியச²ட்டே²ஹி ச சதுத்த²ச²ட்டே²ஹி ச பஞ்சமச²ட்டே²ஹி ச ஸமுட்டா²னதோ த்³விஸமுட்டி²தா பஞ்சதா⁴. பட²மேஹி ச தீஹி பச்சி²மேஹி ச தீஹி ஸமுட்டா²னதோ திஸமுட்டா²னா த்³விதா⁴. பட²மததியசதுத்த²ச²ட்டே²ஹி ச து³தியததியபஞ்சமச²ட்டே²ஹி ச ஸமுட்டா²னதோ சதுஸமுட்டா²னா த்³விதா⁴. ச²ஹிபி ஸமுட்டி²தோ ச²ஸமுட்டா²னா ஏகதா⁴. அலஜ்ஜி…பே… ஸஞ்ஞிதாய சாதி இமேஹி ச²ஹி வா ஆபத்திம் ஆபஜ்ஜேய்யாதி ஸம்ப³ந்தோ⁴. யோ ஸஞ்சிச்ச ஆபத்திம் ஆபஜ்ஜதி, ஆபத்திம் பரிகூ³ஹதி, அக³திக³மனஞ்ச க³ச்ச²தி, ஏதி³ஸோ வுச்சதி அலஜ்ஜீ புக்³க³லோ. அலஜ்ஜீ ச அஞ்ஞாணோ ச குக்குச்சபகதோ ச குக்குச்சேன அபி⁴பூ⁴தோதி த்³வந்தோ³. பா⁴வே த்தப்பச்சயோ.

தத்த² யோ அகப்பியபா⁴வம் ஜானந்தோயேவ மத்³தி³த்வா வீதிக்கமம் கரோதி, அயம் அலஜ்ஜிதா ஆபஜ்ஜதி. மந்தோ³ மோமூஹோ கத்தப்³பா³கத்தப்³ப³ம் அஜானந்தோ அகத்தப்³ப³ம் கரோதி, கத்தப்³ப³ம் விராதே⁴தி, அயம் அஞ்ஞாணத்தா ஆபஜ்ஜதி. கப்பியாகப்பியம் நிஸ்ஸாய குக்குச்சே உப்பன்னே வினயத⁴ரம் அபுச்சி²த்வா மத்³தி³த்வா வீதிக்கமதி, அயம் குக்குச்சபகதத்தா ஆபஜ்ஜதி. ஸதியா ப்லவோ ஸம்மோஹோ ஸதிப்லவோ, ஸஹஸேய்யதிசீவரவிப்பவாஸாதீ³னி ஸதிப்லவா ஆபஜ்ஜதி. கப்பஞ்ச அகப்பியஞ்ச கப்பாகப்பியம், கப்பாகப்பியே ஸஞ்ஞா, ஸா அஸ்ஸ அத்தீ²தி கப்பா…பே… ஸஞ்ஞீ, தஸ்ஸ பா⁴வோதி தா-பச்சயோ. ய-லோபேன பன ‘‘ஸஞ்ஞிதா’’தி வுத்தம், கரணத்தே² வா பச்சத்தவசனம். தே ச ‘‘அகப்பியே’’திஆதீ³னம் யதா²க்கமேன யுஜ்ஜந்தி. தத்த² யோ அச்ச²மம்ஸம் ‘‘ஸூகரமம்ஸ’’ந்தி கா²த³தி, விகாலே காலஸஞ்ஞிதாய பு⁴ஞ்ஜதி, அயம் அகப்பியே கப்பியஸஞ்ஞிதாய ஆபஜ்ஜதி. யோ பன ஸூகரமம்ஸம் ‘‘அச்ச²மம்ஸ’’ந்தி கா²த³தி, காலே விகாலஸஞ்ஞாய பு⁴ஞ்ஜதி, அயம் கப்பியே அகப்பியஸஞ்ஞிதாய ஆபஜ்ஜதி.

376. அலஜ்ஜிஅஞ்ஞாணதாய காயவாசாஹி ஆபத்திம் சா²த³யேதி யோஜனா. லிங்கே³தி லிங்க³பரிவத்தனனிமித்தம். லிங்கே³ ஸங்கே⁴ ச க³ணே ச ஏகஸ்மிம் சாதி ஆபத்திவுட்டி²தி சதுதா⁴ ஹோதீதி ஸேஸோ.

377. பச்சயத்³வயேதி சீவரே பிண்ட³பாதே ச. பரிகதோ²பா⁴ஸவிஞ்ஞத்தீதி அபி⁴லாபமத்தமேதம். ஸஹசரிதஸ்ஸ பன நிமித்தகம்மஸ்ஸாபி ஏத்தே²வ ஸங்க³ஹோ வேதி³தப்³போ³. தத்த² பரியாயேன கத²னம் பரிகதா². உஜுகமேவ அவத்வா யதா² அதி⁴ப்பாயோ விபூ⁴தோ ஹோதி, ஏவம் ஓபா⁴ஸனம் ஓபா⁴ஸோ. பச்சயே உத்³தி³ஸ்ஸ யதா² அதி⁴ப்பாயோ ஞாயதி, ஏவம் விஞ்ஞாபனம் விஞ்ஞத்தி. நிமித்தகரணம் நிமித்தகம்மம். ததியேதி ஸேனாஸனே. ஸேஸேதி கி³லானபச்சயே.

378. பஞ்சன்னம் ஸஹத⁴ம்மிகானம் அச்சயே தா³னம் ந ரூஹதீதி ஸம்ப³ந்தோ⁴. அச்சயே தா³னந்தி ‘‘மமச்சயேன மய்ஹம் ஸந்தகம் உபஜ்ஜா²யஸ்ஸ ஹோதூ’’திஆதி³னா ஏவம் அத்தனோ அபக³மே தா³னம். தந்தி அச்சயேன தி³ன்னம் சீவராதி³கம் ஸங்க⁴ஸ்ஸேவ ச ஹோதி, ந பி⁴க்கு²னோதி அதி⁴ப்பாயோ. கி³ஹீனம் பனாதி கி³ஹீனம் அச்சயே தா³னம் பன. இத³மேத்த² தா³னக்³க³ஹணலக்க²ணம் – ‘‘இத³ம் துய்ஹம் த³ம்மீ’’திஆதி³னா ஸம்முகா² வா ‘‘இத்த²ன்னாமஸ்ஸ தே³மீ’’திஆதி³னா பரம்முகா²பி தி³ன்னம்யேவ ஹோதி. ‘‘துய்ஹம் க³ண்ஹாஹீ’’தி வுத்தே ‘‘மய்ஹம் க³ண்ஹாமீ’’தி வத³தி, ஸுதி³ன்னம் ஸுக்³க³ஹிதஞ்ச. ‘‘தவ ஸந்தகம் கரோஹி, தவ ஸந்தகம் ஹோது, தவ ஸந்தகம் காராபேஹீ’’தி வுத்தே ‘‘மம ஸந்தகம் கரோமி, மம ஸந்தகம் ஹோது, மம ஸந்தகம் கரிஸ்ஸாமீ’’தி வத³தி. து³த்³தி³ன்னம் து³க்³க³ஹிதஞ்ச. ஸசே பன ‘‘தவ ஸந்தகம் கரோஹீ’’தி வுத்தே ‘‘ஸாது⁴, ப⁴ந்தே, மய்ஹம் க³ண்ஹாமீ’’தி க³ண்ஹாதி, ஸுக்³க³ஹிதந்தி.

379. பி⁴க்கு² வா ஸாமணேரோ வா உபஸ்ஸயே பி⁴க்கு²னீனம் விஹாரே காலம் கயிராத² யதி³ காலங்கரேய்ய, தத்த² தஸ்மிம் உபி⁴ன்னம் ஸந்தகே பி⁴க்கு²ஸங்கோ⁴ ஏவ தா³யஜ்ஜோ ஸாமீ ஹோதீதி ஸேஸோ. ஸேஸேபீதி அவஸேஸே பி⁴க்கு²னிஸிக்க²மானஸாமணேரிஸந்தகேபி. அயம் நயோதி யதி³ தே பி⁴க்கூ²னம் விஹாரே காலம் கரேய்யும், தேஸம் ஸந்தகே பி⁴க்கு²னிஸங்கோ⁴ ஏவ தா³யஜ்ஜோதி அயமேவ நயோதி அத்தோ².

380. ‘‘இமம் நேத்வா அஸுகஸ்ஸ தே³ஹீ’’தி தி³ன்னம் யாவ பரஸ்ஸ ஹத்த²ம் ந பாபுணாதி, தாவ புரிமஸ்ஸேவ, யோ பஹிணதி, தஸ்ஸேவாதி அத்தோ². த³ம்மீதி ‘‘இத்த²ன்னாமஸ்ஸ தே³மீ’’தி தி³ன்னம் பன பச்சி²மஸ்ஸேவ, யஸ்ஸ பஹிணதி, தஸ்ஸேவ ஸந்தகந்தி அத்தோ². இமம் விதி⁴ம் ‘‘வுத்தனயேன இமே ஸாமினோ ஹோந்தீ’’தி ஏதம் பகாரம் ஞத்வா விஸ்ஸாஸக்³கா³ஹம் வா க³ண்ஹே, மதகசீவரம் வா அதி⁴ட்டே²தி யோஜனா. விஸ்ஸாஸகா³ஹந்தி ஸாமீஸு ஜீவந்தேஸு விஸ்ஸாஸேன கா³ஹம் க³ஹேத்வா. மதகசீவரம் அதி⁴ட்டே²தி தேஸு மதேஸு அஞ்ஞே சே பி⁴க்கூ² ந ஸந்தி, ‘‘மய்ஹம் தம் பாபுணாதீ’’தி மதகசீவரம் அதி⁴ட்டே²ய்ய. அஞ்ஞேஸம் அத³த்வா தூ³ரே ட²பிதமதகபரிக்கா²ரா பன தத்த² தத்த² ஸங்க⁴ஸ்ஸேவ ஹோந்தி. பி⁴க்கு²ம்ஹி காலகதே ஸங்கோ⁴ ஸாமீ பத்தசீவரே, அபிச கி³லானுபட்டா²கா ப³ஹூபகாரா, ஸங்கே⁴ன திசீவரஞ்ச பத்தஞ்ச கி³லானுபட்டா²கானம் தா³தப்³ப³ம். யம் தத்த² லஹுப⁴ண்ட³ம் லஹுபரிக்கா²ரம், தம் ஸம்முகீ²பூ⁴தேன ஸங்கே⁴ன பா⁴ஜேதப்³ப³ம். யம் தத்த² க³ருப⁴ண்ட³ம் க³ருபரிக்கா²ரம், தம் ஆக³தானாக³தஸ்ஸ சாதுத்³தி³ஸஸ்ஸ ஸங்க⁴ஸ்ஸ அவிஸ்ஸஜ்ஜியம் அவேப⁴ங்கி³யம். கி³லானுபட்டா²கோ நாம கி³ஹீ வா ஹோது பப்³ப³ஜிதோ வா, அந்தமஸோ மாதுகா³மோபி, ஸப்³பே³ பா⁴க³ம் லப⁴ந்தி. ப³ஹூ சே ஸப்³பே³ ஸமக்³கா³ ஹுத்வா உபட்ட²ஹந்தி, ஸப்³பே³ஸம் ஸமபா⁴கோ³ தா³தப்³போ³. யோ பனேத்த² விஸேஸேன உபட்ட²ஹதி, தஸ்ஸ விஸேஸோ காதப்³போ³.

381. ‘‘லோஹப⁴ண்டே³ பஹரணிம் ட²பேத்வா ஸப்³ப³ம் கப்பதீ’’திஆதி³னா யோஜேதப்³ப³ம். பஹரணிந்தி ஆவுத⁴ம். பாது³கா ச ஸங்கமனீயோ பல்லங்கோ சாதி த்³வந்தோ³. மத்திகாமயே கதகம் கும்ப⁴காரிகஞ்ச ட²பேத்வா ஸப்³ப³ம் கப்பதீதி யோஜனீயம், த⁴னியஸ்ஸேவ ஸப்³ப³மத்திகாமயகுடி கும்ப⁴காரிகாதி.

பகிண்ணகனித்³தே³ஸவண்ணனா நிட்டி²தா.