42. தே³ஸனானித்³தே³ஸவண்ணனா

382. இதா³னி தே³ஸனானித³ஸ்ஸனப்³யாஸேன ஹேட்டா² அவுத்தானி கானிசி ஸிக்கா²பதா³னி உபதி³ஸிதும் ‘‘சாகோ³’’திஆதி³மாஹ. பி⁴க்கு²பா⁴வஸ்ஸ யோ சாகோ³, ஸா பாராஜிகதே³ஸனாதி ஸம்ப³ந்தோ⁴. ப⁴வதி அனேனாதி பா⁴வோ, ஸத்³த³ப்பவத்தினிமித்தம், பி⁴க்கு²னோ பா⁴வோ பி⁴க்கு²-ஸத்³த³ஸ்ஸ பவத்தினிமித்தம் பி⁴க்கு²கிச்சம் பி⁴க்கு²பா⁴வோ, தஸ்ஸ. தி³ஸீ உச்சாரணே, உச்சாரணா பகாஸனா தே³ஸனா. ‘‘ச²ன்னமதிவஸ்ஸதி, விவட்டம் நாதிவஸ்ஸதீ’’தி (உதா³. 45) ஹி வுத்தம். இத⁴ பன பி⁴க்கு²பா⁴வபரிச்சாகோ³யேவ பாராஜிகாய பகாஸனா நாம பாராஜிகாய தே³ஸனா. ‘‘யோ’’தி வுத்தத்தா ‘‘ஸோ’’தி வத்தும் யுத்தம், ததா²பி ஸப்³பா³தீ³ஹி வுத்தஸ்ஸ வா லிங்க³மாதி³ய்யதே வக்க²மானஸ்ஸ வாதி வக்க²மானதே³ஸனாபேக்கா²ய ‘‘ஸோ’’தி வுத்தம். யதா² யேன பகாரேன ‘‘சா²தே³தி ஜானமாபன்ன’’ந்திஆதி³னா வுத்தம் யதா²வுத்தம், தேன. வுத்தமனதிக்கம்மாதி அப்³யயீபா⁴வவஸேன வா அத்தோ² வேதி³தப்³போ³. இதா⁴பி க³ருகாபத்தியா வுட்டா²னானதிக்கமேனேவ பகாஸனா தே³ஸனா ஸியாதி ‘‘வுட்டா²னம் க³ருகாபத்திதே³ஸனா’’தி வுச்சதி.

383. இதா³னி வத்தப்³ப³ம் ஸந்தா⁴ய ‘‘ஏவ’’ந்தி வுத்தம். ஏகஸ்ஸாதி ஏகஸ்ஸ பி⁴க்கு²னோ.

384. தும்ஹமூலேதி தும்ஹாகம் மூலே ஸமீபே. படிதே³ஸேமீதி பகாஸேமி. ஸம்வரேய்யாஸீதி ஸம்யமேய்யாஸி, ஸம்வரே பதிட்டே²ய்யாஸீதி அத்தோ².

385. நிஸ்ஸஜ்ஜித்வானாதி ஏகப³ஹுபா⁴வம் ஸன்னிஹிதாஸன்னிஹிதபா⁴வம் ஞத்வா ‘‘இத³ம் மே, ப⁴ந்தே, சீவர’’ந்திஆதி³னா நிஸ்ஸஜ்ஜித்வா. தேனாதி யஸ்ஸ சீவரம் நிஸ்ஸட்ட²ம், தேன. ‘‘இமம்…பே… த³ம்மீ’’தி நிஸ்ஸட்ட²சீவரம் தே³ய்யந்தி ஸம்ப³ந்தி⁴தப்³ப³ம். ‘‘இமம் சீவரம் த³ஸாஹாதிக்கந்த’’ந்திஆதி³னா யோஜேதப்³ப³ம்.

386. (க) சீவரந்தி திசீவராதி⁴ட்டா²னனயேன அதி⁴ட்டி²தேஸு ஸங்கா⁴டிஆதீ³ஸு யம் கிஞ்சி சீவரம். விப்பவுத்த²ந்தி விப்பயுத்தேன வுத்த²ம்.

(க²) அகாலசீவரந்தி அனத்த²தே கதி²னே வஸ்ஸானஸ்ஸ பச்சி²மமாஸம் ட²பேத்வா ஸேஸே ஏகாத³ஸமாஸே, அத்த²தே கதி²னே தஞ்ச மாஸம் ஹேமந்திகே சத்தாரோ மாஸே ச ட²பேத்வா ஸேஸே ஸத்தமாஸே உப்பன்னம், காலேபி ஸங்க⁴ஸ்ஸ வா ‘‘இத³ம் அகாலசீவர’’ந்தி ஏகபுக்³க³லஸ்ஸ வா ‘‘இத³ம் துய்ஹம் த³ம்மீ’’தி உத்³தி³ஸித்வா தி³ன்னம். இதரம் பன காலசீவரம். மாஸாதிக்கந்தந்தி அகாலசீவரே உப்பன்னே ஊனஸ்ஸ பாரிபூரியா ஸங்க⁴க³ணாதி³தோ ஸதியா பச்சாஸாய மாஸமேகம் பரிஹாரோ லப்³ப⁴தி, தம் மாஸம் அதிக்கந்தம்.

(க³) புராணசீவரந்தி யம் அந்தமஸோ உஸ்ஸீஸகம் கத்வா நிபன்னோ. சீவரம் நாம ச²ன்னம் அஞ்ஞதரம் விகப்பனூபக³ம். ஏஸேவ நயோ ஸப்³பே³ஸு வக்க²மானசீவரப்படிஸம்யுத்தஸிக்கா²பதே³ஸு.

(க⁴) அஞ்ஞத்ர பாரிவத்தகாதி அந்தமஸோ ஹரீதகீக²ண்டே³னபி பாரிவத்தகம் வினா.

(ங) க³ஹபதிகந்தி பி⁴க்கூ²ஸு அபப்³ப³ஜிதகம். அஞ்ஞத்ர ஸமயாதி அச்சி²ன்னசீவரனட்ட²சீவரஸமயம் வினா, அச்சி²ன்னசீவரேஹி பன ஸாகா²பலாஸம் அத்தனா ப⁴ஞ்ஜித்வாபி வாகாதீ³னி க³ண்ஹித்வாபி நிவாஸேதும் வட்டதி, பகே³வ விஞ்ஞத்தி. சீவரம் விஞ்ஞாபிதந்தி ஸம்ப³ந்தோ⁴. கந்தி ஆஹ ‘‘அஞ்ஞாதக’’ந்திஆதி³.

(ச) தது³த்தரீதி ததோ வுத்தப்பமாணதோ உத்தரி, அச்சி²ன்னசீவரேன பி⁴க்கு²னா காயேன வா வாசாய வா அபி⁴ஹரித்வா பவாரிதசீவரதோ தீஸு நட்டே²ஸு த்³வே ஸாதி³தப்³பா³னி, த்³வீஸு நட்டே²ஸு ஏகம் ஸாதி³தப்³ப³ம். பகதியா ஸந்தருத்தரேன சரந்தேன த்³வீஸு நட்டே²ஸு த்³வேயேவ ஸாதி³தப்³பா³னி, ஏகஸ்மிம் நட்டே² ஏகம்யேவ ஸாதி³தப்³ப³ம். யஸ்ஸ ஏகம்யேவ ஹோதி, தஸ்மிம் நட்டே² த்³வே ஸாதி³தப்³பா³னி.

(ச²) அப்பவாரிதோதி க³ஹபதினா வா க³ஹபதானியா வா. விகப்பந்தி பட²மஅதி⁴ப்பேததோ மூலம் வட்³டா⁴பேந்தோ ஸுந்த³ரகாமதாய ‘‘ஆயதம் வா’’திஆதி³னா விஸிட்ட²கப்பம் அதி⁴கவிதா⁴னம்.

(ஜ) அஞ்ஞாதகே க³ஹபதிகேதி ப³ஹூனம் வஸேன வுத்தமத்தமேவ புரிமதோ விஸேஸோ.

(ஜ²) சோத³னாயாதி ‘‘அத்தோ² மே, ஆவுஸோ, சீவரேனா’’தி சோத³னாய. டா²னேனாதி காயசோத³னமாஹ. ராஜாதீ³ஹி பேஸிதேன ஹி தூ³தேன வேய்யாவச்சகரஸ்ஸ ஹத்தே² சீவரசேதாபன்னே நிக்கி²த்தே திஸ்ஸோ சோத³னா அனுஞ்ஞாதா, சோத³னாய தி³கு³ணம் டா²னம், தஸ்மா ஸசே சோதே³தியேவ, ந திட்ட²தி, ச² சோத³னா லப்³ப⁴ந்தி. ஸசே திட்ட²தியேவ, ந சோதே³தி, த்³வாத³ஸ டா²னானி லப்³ப⁴ந்தி. ஸசே உப⁴யம் கரோதி, ஏகாய சோத³னாய த்³வே டா²னானி ஹாபேதப்³பா³னி.

(ட) ஸுத்³தா⁴னி ச தானி காளகானி ச ஜாதியா ரஜனேன வா.

(ட²) துலந்தி சதூஹி துலாஹி காரேதுகாமதம் ஸந்தா⁴ய வுத்தம். அத்த²தோ பன யத்தகேஹி ஏளகலோமேஹி காதுகாமோ ஹோதி, தேஸு த்³வே கோட்டா²ஸா காளகானம், ஏகோ ஓதா³தானம், ஏகோ கோ³சரியானம் க³ஹேதப்³போ³. துலா நாம பலஸதம். கோ³சரியா நாம கபிலவண்ணா. இத³ம் மே ஸந்த²தம் காராபிதந்தி யோஜனா.

(ண) தியோஜனபரமந்தி க³ஹிதட்டா²னதோ தீணி யோஜனானி பரமோ அஸ்ஸ அதிக்கமனஸ்ஸாதி பா⁴வனபும்ஸகவஸேன அத்தோ² வேதி³தப்³போ³. அதிக்காமிதானீதி அந்தமஸோ ஸுத்தகேனபி ப⁴ண்ட³கதப⁴ண்ட³ஹரணம் வினா அந்தமஸோ வாதாபா³த⁴ப்படிகாரத்த²ம் கண்ணச்சி²த்³தே³ பக்கி²த்தானி அதிக்காமிதானி.

387-9. நிஸ்ஸஜ்ஜித்வானாதி வுத்தனயேன வத்தூ²னி நிஸ்ஸஜ்ஜித்வா. அதா²தி தே³ஸிதானந்தரம். ‘‘இமம் ஜானாஹீ’’தி கி³ஹிம் வதே³தி யோஜனா. ஸோதி ஆராமிகாதி³கோ கி³ஹீ. ‘‘இமினா கிம் ஆஹராமீ’’தி வதே³ய்யாதி ஸம்ப³ந்தோ⁴. வதே³ய்யாதி யதி³ வத³தி. இமந்தி அவத்வாதி ‘‘இமம் ஆஹரா’’தி அவத்வா பி⁴க்கூ²னம் கப்பியம் தேலாதி³ந்தி வதே³தி ஸம்ப³ந்தோ⁴. ஆதி³ந்தி ஸந்தி⁴வஸேன நிக்³க³ஹிதம். தேன பரிவத்தேத்வான ஸோ யம் கப்பியம் ஆஹரதீதி யோஜனா. தேனாதி நிஸ்ஸக்³கி³யவத்து²னா. த்³வேபேதே ட²பேத்வாதி ஏதே ரூபியப்படிக்³கா³ஹகரூபியஸம்வோஹாரகே த்³வே ட²பேத்வா ஸேஸேஹி பரிபு⁴ஞ்ஜிதும் லப்³ப⁴ந்தி ஸம்ப³ந்தோ⁴. பரிபு⁴ஞ்ஜிதுந்தி தம் பு⁴ஞ்ஜிதும். ததோதி பரிவத்திதகப்பியதோ. அஞ்ஞேனாதி அந்தமஸோ ஆராமிகேனாபி. தேஸந்தி வுத்தானம் த்³வின்னம்.

390. அந்தமஸோ தன்னிப்³ப³த்தா ருக்க²ச்சா²யாபீதி ஸம்ப³ந்தோ⁴. தன்னிப்³ப³த்தாதி நிஸ்ஸட்ட²வத்து²னா கிணித்வா க³ஹிதஆராமே ருக்க²ச்சா²யா தன்னிப்³ப³த்தா ஹோதீதி ததோ நிப்³ப³த்தாதி ஸமாஸோ. ஆதி³தோ ஸந்த²தத்தயந்தி ஆதி³ம்ஹி கோஸியஸுத்³த⁴காளகத்³வேபா⁴க³ஸந்த²தத்தயம்.

391. ஏவம் சே நோ லபே⁴தா²தி ஏவம் பரிவத்தேத்வா கப்பியகாரகோ நோ சே லபே⁴ய்ய, ஸோ கி³ஹீ ‘‘இமம் ச²ட்³டே³ஹீ’’தி ஸம்ஸியோ வத்தப்³போ³, ஏவம் ரூபியச²ட்³ட³கோ கி³ஹீ நோ சே லபே⁴ய்ய, ஸம்மதோ பி⁴க்கு² ச²ட்³டே³ய்யாதி ஸம்ப³ந்தோ⁴. ஸம்மதோதி ‘‘யோ ச²ந்தா³க³திம் ந க³ச்சே²ய்யா’’திஆதி³னா (பாரா. 584) வுத்தபஞ்சங்க³ஸமன்னாக³தோ ரூபியச²ட்³ட³கஸம்முதியா ஸம்மதோ பி⁴க்கு².

392. ஏதானீதி படிக்³க³ஹிதரூபியானி. து³தியம் பத்தந்தி ஊனபஞ்சப³ந்த⁴னே ஸதி விஞ்ஞாபிதபத்தம் ஸங்கே⁴ வத்தும் லப்³ப⁴ரேதி பத³ஸம்ப³ந்தோ⁴. வத்துந்தி ‘‘அஹம் ப⁴ந்தே ரூபியம் படிக்³க³ஹேஸி’’ந்திஆதி³னா வத்தும். ஸேஸானி அவஸேஸனிஸ்ஸக்³கி³யவத்தூ²னி ஸங்கே⁴ ஏகஸ்மிம் க³ணே ச வத்தும் லப்³ப⁴ரேதி யோஜனா. பா⁴ஸந்தரேனபி வத்தும் லப்³ப⁴ந்தி ந கேவலம் பாளிபா⁴ஸாயமேவ, ஸீஹளாதி³பா⁴ஸாயபி நிஸ்ஸஜ்ஜிதும் லப்³ப⁴தீதி அத்தோ².

393. (க) நானப்பகாரந்தி சீவராதீ³னம் கப்பியப⁴ண்டா³னம் வஸேன அனேகவித⁴ம். கயோ க³ஹணம், விக்கயோ தா³னம். கயோ ச விக்கயோ ச கயவிக்கயம்.

(க³) ஊனபஞ்சப³ந்த⁴னேனாதி ஊனானி பஞ்ச ப³ந்த⁴னானி யஸ்ஸ, தேன, இத்த²ம்பூ⁴தலக்க²ணே கரணவசனம். யதா²கத²ஞ்சி பன பஞ்சப³ந்த⁴னோ பத்தோ, பஞ்சப³ந்த⁴னோகாஸோ வா, ஸோ அபத்தோ, அஞ்ஞம் விஞ்ஞாபேதும் வட்டதி.

394. ஸம்மன்னித்வானாதி பத³பா⁴ஜனீயே வுத்தஞத்திது³தியகம்மேன ஸம்மன்னித்வா. ஸங்க⁴ஸ்ஸ பத்தந்தந்தி அந்த-ஸத்³தே³ன பத்தானம் அந்தே ப⁴வோ லாமகோ பத்தோயேவ க³ஹிதோ, நிஸ்ஸட்ட²பத்தஸ்ஸ விஜ்ஜமானகு³ணம் வத்வா தே²ரம், தே²ரஸ்ஸ பத்தம் து³தியத்தே²ரம் கா³ஹாபேத்வா ஏதேனேவ உபாயேன யாவஸங்க⁴னவகம் கா³ஹாபேத்வா யோ தத்த² ஸன்னிபதிதஸங்க⁴ஸ்ஸ பத்தேஸு பரியந்தோ பத்தோ, தம் பத்தந்தி. தஸ்ஸாதி கதனிஸ்ஸஜ்ஜனஸ்ஸ பி⁴க்கு²னோ. தா³பயேதி ஸம்மதேன பத்தகா³ஹாபகேன தா³பேய்ய.

395. (க) பே⁴ஸஜ்ஜந்தி பே⁴ஸஜ்ஜகிச்சம் கரோது வா, மா வா, ஏவம் லத்³த⁴வோஹாரம் ஸப்பிஆதி³கம் ஸத்தாஹகாலிகம்.

(க²) கி³ம்ஹானஸ்ஸ பச்சி²மமாஸே புரிமோ அத்³த⁴மாஸோ பரியேஸனகரணானம் கே²த்தம், பச்சி²மத்³த⁴மாஸோ பரியேஸனகரணனிவாஸனானம் கே²த்தம், வஸ்ஸிகமாஸா சத்தாரோபி அதி⁴ட்டா²னேன ஸஹ சதுன்னம்பி கே²த்தம், இமேயேவ பஞ்சமாஸா குச்சி²ஸமயோ, இதரஸத்தமாஸா பிட்டி²ஸமயோ. பிட்டி²ஸமயே பரியேஸந்தஸ்ஸ நிஸ்ஸக்³கி³யம் பாசித்தியம், குச்சி²ஸமயே ச அதிரேகத்³த⁴மாஸே கத்வா பரித³ஹதோ நிஸ்ஸக்³கி³யம் பாசித்தியம். தேன வுத்தம் ‘‘அதிரேகமாஸே ஸேஸே’’தி.

(க³) ஸாமம் த³த்வாதி வேய்யாவச்சாதீ³னி பச்சாஸீஸமானோ ஸயமேவ த³த்வா. அச்சி²ன்னந்தி தம் அகரோந்தம் தி³ஸ்வா ஸகஸஞ்ஞாய அச்சி²ன்னம். பி⁴க்கு²னோபி சீவரம் ட²பேத்வா அஞ்ஞம் பரிக்கா²ரம், அனுபஸம்பன்னஸ்ஸ ச யம் கிஞ்சி பரிக்கா²ரம் அச்சி²ந்த³தோ து³க்கடம். பரிச்சஜித்வா தி³ன்னம் ஸகஸஞ்ஞம் வினா அச்சி²ந்த³ந்தோ ப⁴ண்ட³க்³கே⁴ன காரேதப்³போ³.

(ங) விகப்பந்தி ‘‘ஆயதஞ்ச கரோஹி வித்த²தஞ்சா’’திஆதி³கம் அதி⁴கவிதா⁴னம்.

(ச) அச்சேகசீவரந்தி க³மிககி³லானக³ப்³பி⁴னிஅபி⁴னவுப்பன்னஸத்³தா⁴னம் அஞ்ஞதரேன பவாரணமாஸஸ்ஸ ஜுண்ஹபக்க²பஞ்சமிதோ பட்டா²ய ‘‘வஸ்ஸாவாஸிகம் த³ஸ்ஸாமீ’’தி தி³ன்னம் அச்சாயிகசீவரம். அச்சேகசீவரஸ்ஸ அனத்த²தே கதி²னே ஏகாத³ஸதி³வஸாதி⁴கோ மாஸோ, அத்த²தே கதி²னே ஏகாத³ஸதி³வஸாதி⁴கா பஞ்ச மாஸா சீவரகாலஸமயோ, தம் அதிக்காமேந்தஸ்ஸ நிஸ்ஸக்³கி³யம் பாசித்தியம். தேன வுத்தம் ‘‘சீவரகாலஸமயம் அதிக்காமித’’ந்தி. காலோ ச ஸோ ஸமயோ ச சீவரஸ்ஸ காலஸமயோ, தம்.

(ச²) ஸப்படிப⁴யே ஆரஞ்ஞகஸேனாஸனே வஸ்ஸம் உபக³ந்த்வா விஹரந்தேன பி⁴க்கு²னா திண்ணம் சீவரானம் அஞ்ஞதரம் சீவரம் புரிமிகாய உபக³ந்த்வா மஹாபவாரணாய பவாரிததா, கத்திகமாஸதா, பஞ்சத⁴னுஸதிகபச்சி² மப்பமாணயுத்தஸேனாஸனதா, ஸாஸங்கஸப்படிப⁴யதாதி ஏவம் வுத்தசதுரங்க³ஸம்பத்தியாஅந்தரக⁴ரே நிக்கி²பித்வா ஸதி பச்சயே சா²ரத்தபரமம் தேன சீவரேன விப்பவஸிதப்³ப³ம். ததோ சே உத்தரி விப்பவஸேய்ய, நிஸ்ஸக்³கி³யம் பாசித்தியம். தேன வுத்தம் ‘‘அதிரேகசா²ரத்த’’ந்திஆதி³.

(ஜ) ஜானந்தி ஜானந்தோ.

396. ஆதி³ம்ஹி வியாதி பட²மனிஸ்ஸக்³கி³யே விய.

397. (க²) அந்தரக⁴ரம் பவிட்டா²ய பி⁴க்கு²னியா ஹத்த²தோ கா²த³னீயாதி³ப்படிக்³க³ஹணே ச பி⁴க்கூ²ஸு குலேஸு பு⁴ஞ்ஜந்தேஸு ‘‘இத⁴ பூவம், ஸூபம் தே³தா²’’திஆதி³னா நயேன வோஸாஸமானாய பி⁴க்கு²னியா அனபஸாத³னேன ச ஸேக²ஸம்மதேஸு குலேஸு புப்³பே³ அனிமந்திதஸ்ஸ கா²த³னீயாதீ³னம் படிக்³க³ஹணே ச ஸப்படிப⁴யே ஆரஞ்ஞகஸேனாஸனே விஹரந்தஸ்ஸ புப்³பே³ அப்படிஸம்விதி³தகா²த³னீயாதி³ப்படிக்³க³ஹணே ச பாடிதே³ஸனீயம் நாம ஆபத்தினிகாயோ வுத்தோ. தேன வுத்தம் ‘‘கா³ரய்ஹ’’ந்திஆதி³.

398. ‘‘அதே³ஸனாகா³மினிய’’ந்திஆதி³ ‘‘ந தே³ஸயே’’தி ஏத்த² கம்மம். பாராஜிகா ஸங்கா⁴தி³ஸேஸா ச அதே³ஸனாகா³மினியோ நாம. ந ஆபத்தி அனாபத்தி, தம். கததே³ஸனம் தே³ஸிதம். நானாஸம்வாஸனிஸ்ஸீமட்டி²தானம் ந தே³ஸயேதி ஸம்ப³ந்தோ⁴. ஏவம் சதுபஞ்சஹி ந தே³ஸயே, மனஸா ந தே³ஸயே, அபகதத்தானம் ந தே³ஸயே, நானா ‘‘ஏகா’’தி ந தே³ஸயேதி. மனஸாதி கேவலம் சித்தேனேவ. நானாதி ஸம்ப³ஹுலா ஆபத்தியோ ‘‘ஏகா’’தி வத்வா. ஏகம் பன ஆபத்திம் ‘‘ஸம்ப³ஹுலா’’தி தே³ஸேதும் வட்டதீதி.

தே³ஸனானித்³தே³ஸவண்ணனா நிட்டி²தா.