40. அவேப⁴ங்கி³யனித்³தே³ஸவண்ணனா

322-5. ஆராமா…பே… மத்திகப⁴ண்டா³னீதி ஏதே பஞ்ச அவிபா⁴ஜியாதி ஸம்ப³ந்தி⁴தப்³ப³ம். பஞ்சாதி ‘‘ஆராமாராமவத்தூ²னி ஏக’’ந்திஆதி³னா ராஸிவஸேன பஞ்ச, ஸரூபவஸேன பனேதானி பண்ணம் திணே பக்கி²பித்வா பஞ்சவீஸதிவிதா⁴னி ஹோந்தி. ததா² சாஹ –

‘‘த்³விஸங்க³ஹானி த்³வே ஹோந்தி, ததியம் சதுஸங்க³ஹம்;

சதுத்த²ம் நவகோட்டா²ஸம், பஞ்சமம் அட்ட²பே⁴த³னம்.

‘‘இதி பஞ்சஹி ராஸீஹி, பஞ்சனிம்மலலோசனோ;

பஞ்சவீஸவித⁴ம் நாதோ², க³ருப⁴ண்ட³ம் பகாஸயீ’’தி. (சூளவ. அட்ட². 321);

தத்த² ஆராமோ நாம புப்பா²ராமோ வா ப²லாராமோ வா. ஆராமவத்து² நாம தேஸம்யேவ பதிட்டா²னோகாஸோ, வினட்டே²ஸு வா தேஸு போராணகபூ⁴மிபா⁴கோ³. விஹாரோ நாம பாஸாதா³தி³ யம் கிஞ்சி ஸேனாஸனம். லோஹகும்பீ⁴ நாம காளலோஹேன வா தம்ப³லோஹேன வா கதகும்பீ⁴. கடாஹாதீ³ஸுபி ஏஸேவ நயோ. ஏத்த² பா⁴ணகந்தி அரஞ்ஜரோ வுச்சதி. வாரகோதி க⁴டோ. ராஸிம் அபேக்கி²த்வா ஏதேதி புல்லிங்க³னித்³தே³ஸோ. அவிபா⁴ஜியாதி மூலச்சே²ஜ்ஜவஸேன அவேப⁴ங்கி³யா. பரிவத்தனவஸேன பன பரிபு⁴ஞ்ஜந்தஸ்ஸ விஸ்ஸஜ்ஜேந்தஸ்ஸ ச அனாபத்தி. அவிஸ்ஸஜ்ஜியானி சாதி ச-ஸத்³தே³ன அவேப⁴ங்கி³யானி சாதி அவுத்தம் ஸம்பிண்டே³தி.

326-8. ஏகந்தக³ருப⁴ண்ட³த்தா ஆதி³தோ தயோ ராஸீ ட²பேத்வா சதுத்த²ராஸிதோ பட்டா²ய க³ருப⁴ண்டா³க³ருப⁴ண்டே³ விப⁴ஜிதும் ‘‘வல்லீ’’திஆதி³ ஆரத்³த⁴ம். அட்³ட⁴பா³ஹுமத்தாபி வல்லி ச அட்ட²ங்கு³லாயதோ வேளு ச முட்டி²மத்தம்பி திணாதி³ ச ஏகம்பி பண்ணஞ்ச பாகதா வா பஞ்சவண்ணா வா தாலபக்கப்பமாணாபி மத்திகா ச தாலபக்கப்பமாணாபி ஸுதா⁴ ச தாலபக்கப்பமாணாபி கங்கு³ட்ட²ஆதி³கா ச தி³ன்னா வா தத்த²ஜாதகா வா ஸங்கி⁴கா ரக்கி²தா அபா⁴ஜியா, ரஜ்ஜுயோத்தாதி³ ச தி³ன்னா ஸங்கி⁴கா அபா⁴ஜியாதி யோஜனா. வேளு பரிணாஹதோ பண்ணஸூசித³ண்ட³மத்தோ க³ஹேதப்³போ³. திணம் முஞ்ஜம் பப்³ப³ஜஞ்ச ஆதி³ஸத்³த³ஸங்க³ஹிதம் ட²பேத்வா அவஸேஸம் யம் கிஞ்சி திணம். பண்ணோ அட்ட²ங்கு³லப்பமாணோ ரித்தபோத்த²கோ க³ருப⁴ண்ட³மேவ. பாகதாதி பகதியா ஜாதா. பஞ்சவண்ணாதி ரத்தஸேதாதி³பஞ்சவண்ணா. ஸுதா⁴கங்கு³ட்டா²த³யோ மத்திகக்³க³ஹணேன க³ஹிதா. கங்கு³ட்ட²ஆதி³காதி ஆதி³-ஸத்³தே³ன ஸஜ்ஜுரஸஜாதிஹிங்கு³லகாதீ³னம் க³ஹணம். தி³ன்னாதி ஸங்க⁴ஸ்ஸ தி³ன்னா. தத்த²ஜாதாதி ஸங்கி⁴கபூ⁴மியம் ஜாதா. ரஜ்ஜுயோத்தாதீ³தி ஸுத்தமகசிவாகனாளிகேரஹீரசம்மமயா ரஜ்ஜு ச யோத்தாதி³ ச. ஆதி³-ஸத்³தே³ன மகசிவாகாதி³கே வட்டேத்வா கதா ஏகவட்டா க³ஹிதா. ப்³யதிரேகவஸேன பனேத்த² சதுத்த²ராஸிம்ஹி இதரே பா⁴ஜியாதி வேதி³தப்³பா³. ஸங்கி⁴கே கம்மே, சேதியஸ்ஸ வா கம்மே நிட்டி²தே பா⁴ஜியாதி யோஜனீயம்.

329. லோஹப⁴ண்டே³ஸு பி⁴க்கு²ஸாருப்பம் பத்தாதி³ வா ததா² விப்பகதாகதம் லோஹப⁴ண்ட³ம் ததா² பாத³க³ண்ஹகம் வாரகம் பா⁴ஜியந்தி யோஜனா. பத்தாதீ³தி அயோபத்தோ அயதா²லகம் தம்ப³லோஹதா²லகம் அஞ்ஜனிஸலாகா கண்ணமலஹரணீ ஸூசி பண்ணஸூசி கு²த்³த³கோ பிப்ப²லகோ கு²த்³த³கம் ஆரகண்ட³கம் குஞ்சிகா தாளாதி³. விப்பகதந்தி அபரினிட்டி²தம். அகதந்தி ஸப்³ப³ஸோ அகதம். பாத³க³ண்ஹகந்தி ஸீஹளதீ³பே பாத³க³ண்ஹனகம். பாதோ³ நாம சதுத்த²ம்ஸோ, மக³த⁴னாளியா பஞ்சனாளிமத்தா. மக³த⁴னாளி ச நாமேஸா ஊனபஞ்சபஸதா வேதி³தப்³பா³. ததா² க⁴டகோ தேலபா⁴ஜனஞ்ச. யாய வாஸியா ட²பேத்வா த³ந்தகட்ட²ச்சே²த³னம் வா உச்சு²தச்ச²னம் வா அஞ்ஞம் மஹாகம்மம் காதும் ந ஸக்கா, அயம் பா⁴ஜியா. ஸம்முஞ்ஜனித³ண்ட³க²ணனகம் பன அத³ண்ட³கம் ப²லமத்தமேவ, யம் ஸக்கா ஸிபாடிகாய பக்கி²பித்வா பரிஹரிதும், அயம் பா⁴ஜனீயா. திபுகோட்டகஉபகரணேஸு திபுச்சே²த³னகஸத்த²கம் ஸுவண்ணகாரூபகரணேஸு ஸுவண்ணச்சே²த³னகஸத்த²கம் சம்மகாரஉபகரணேஸு சம்மசி²ந்த³னகம் கு²த்³த³கஸத்த²ம் நஹாபிததுண்ணகாரஉபகரணேஸு ட²பேத்வா மஹாகத்தரிம் மஹாஸண்டா³ஸஞ்ச மஹாபிப்ப²லகஞ்ச ஸப்³பா³னி பா⁴ஜனீயப⁴ண்டா³னி. ததா² குஞ்சிகா. வுத்தவிபல்லாஸேன பன லோஹப⁴ண்டே³ அபா⁴ஜியாதி வேதி³தப்³பா³.

330. ‘‘வேளும்ஹீ’’திஆதி³னா தா³ருப⁴ண்டா³னி த³ஸ்ஸேதி. தா³ருப⁴ண்டே³ன பன ஸங்க³ஹேத்வா ஸப்³பா³பி தா³ருவேளுசம்முபாஹனாதி³விகதி வேதி³தப்³பா³. ச²த்தத³ண்டோ³ ச ஸலாகா சாதி த்³வந்தோ³. உபாஹனாய த³ண்ட³கோ உபாஹனத³ண்ட³கோ.

331. அனுஞ்ஞாதவாஸித³ண்டோ³தி அனுஞ்ஞாதவாஸியா த³ண்டோ³. அரணஞ்ஜனிஸிங்கா³தீ³தி ஆதி³-ஸத்³தே³ன அஞ்ஜனிஸலாகா ச²த்தம் முட்டி²பண்ணம் உபாஹனா த⁴ம்மகரணோ பாத³க³ண்ஹனகதோ அனதிரித்தம் ஆமலகதும்ப³ம் ஆமலகக⁴டோ லாபு³கதும்ப³ம் லாபு³கக⁴டோ விஸாணதும்ப³ந்தி இத³ம் ஸங்க³ண்ஹாதி.

332. யதா²வுத்ததோ அஞ்ஞம் தா³ருப⁴ண்டே³ஸு க³ருப⁴ண்ட³ம். மத்திகாமயோ பாத³க⁴டகோ பா⁴ஜியோதி யோஜனா. பாத³க⁴டகோதி பாத³ஸ்ஸ பஹோனகோ க⁴டகோ. இமினா மத்திகாப⁴ண்ட³ம் உபலக்கே²தி, தஸ்மா பத்தோ தா²லகம் குண்டி³காதி இமானி பா⁴ஜனீயானி, வுத்தாவஸேஸா அபா⁴ஜியா.

333-4. க³ருனா க³ருப⁴ண்ட³ஞ்ச தா²வரஞ்ச பரிவத்தேய்ய, தா²வரேன ச தா²வரம்பி பரிவத்தேய்யாதி யோஜேதப்³ப³ம். க³ருனா மஞ்சபீடா²தி³னா. தா²வரந்தி ஆராமாதி³ பட²மராஸித்³வயம். ததா² கத்வா ச பு⁴ஞ்ஜிதுந்தி ஏவஞ்ச பரிவத்தேத்வா ததோ ஆப⁴தம் கப்பியப⁴ண்ட³ம் பரிபு⁴ஞ்ஜேய்யாதி அத்தோ², விதி⁴ம்ஹி அயம் தும்பச்சயோ. பா²திகம்மேன வல்லாதி³ம் க³ண்ஹேதி ஸம்ப³ந்த⁴னீயம். பா²திகம்மம் நாம ஸமகம் வா அதிரேகம் வா தத³க்³க⁴னகம் வா வட்³டி⁴கம்மம். ஸேஸந்தி பட²மராஸித்திகந்தி.

அவேப⁴ங்கி³யனித்³தே³ஸவண்ணனா நிட்டி²தா.