39. வஸ்ஸூபனாயிகனித்³தே³ஸவண்ணனா

309-310. புரிமிகா பச்சி²மிகா இதி வஸ்ஸூபனாயிகா து³வேதி ஸம்ப³ந்தோ⁴. ஆஸாள்ஹிபுண்ணமாய அனந்தரே பாடிபத³தி³வஸே உபக³ந்தப்³பா³ பச்சி²மிகாய புரே ப⁴வாதி புரிமா, ஸா ஏவ புரிமிகா. ததோ பச்சா² ப⁴வா அபராய புண்ணமாய அனந்தரே பாடிபத³தி³வஸே உபக³ந்தப்³பா³ பச்சி²மிகா. உபனயனம் பாபுணனம் உபக³மனம் உபனாயிகா, வஸ்ஸந்தி வுட்டி², இத⁴ பன வஸ்ஸகாலம் ‘‘வஸ்ஸ’’ந்தி உபசாரேன க³ஹேத்வா தத்த² வாஸோ உபசாரேனேவ ‘‘வஸ்ஸ’’ந்தி வுச்சதி, வஸ்ஸஸ்ஸ வஸ்ஸாவாஸஸ்ஸ உபனாயிகா வசீபே⁴த³வஸேன வா ஆலயகரணவஸேன வா உபக³மனம் வஸ்ஸூபனாயிகா. தத்த² ஆலயபரிக்³கா³ஹோ ச வசீபே⁴தோ³ சாதி புரிமிகா வஸ்ஸூபனாயிகா து³வே, ஆலயபரிக்³கா³ஹோ ச வசீபே⁴தோ³ சாதி பச்சி²மிகா வஸ்ஸூபனாயிகா து³வேபி⁴ ஸம்ப³ந்தி⁴தப்³ப³ம். தத்தா²தி தாஸு த்³வீஸு. தது³ப⁴யம் த³ஸ்ஸேதும் ‘‘ஏதி³ஸோ’’திஆதி³ வுத்தம். ஸோ ஆலயபரிக்³கா³ஹோ ச வசீபே⁴தோ³ ச ‘‘இமஸ்மிம் விஹாரே இமம் தேமாஸம் வஸ்ஸம் உபேமி, இத⁴ வஸ்ஸம் உபேமீ’’தி ஏதி³ஸோ, ஏதாதி³ஸோதி அத்தோ². ஏத்த² ச கமுப்பத்திஅனாத³ரா வசீபே⁴தோ³ பட²மம் வுத்தோ. உப⁴யதா² வஸ்ஸம் உபக³ந்தும் வட்டதி. தேனேவ அட்ட²கதா²யம் (வி. ஸங்க³. அட்ட². 179; மஹாவ. அட்ட². 207) ‘‘ஸசேபி ‘இத⁴ வஸ்ஸம் வஸிஸ்ஸாமீ’தி ஆலயோ அத்தி², அஸதியா பன வஸ்ஸம் ந உபேதி, க³ஹிதஸேனாஸனம் ஸுக்³க³ஹிதம், சி²ன்னவஸ்ஸோ ந ஹோதி, பவாரேதும் லப⁴தியேவ, வினாபி ஹி வசீபே⁴த³ம் ஆலயகரணமத்தேனபி வஸ்ஸம் உபக³தமேவ ஹோதீ’’தி வுத்தம். நாவாஸத்த²வஜேஸு பன பரியேஸித்வா ஸேனாஸனம் அலப⁴ந்தேன ஆலயகரணமத்தேனேவ உபக³ந்தப்³ப³ம். உபக³ச்ச²ந்தேன ச விஹாரம் படிஜக்³கி³த்வா பானீயம் பரிபோ⁴ஜனீயம் உபட்டா²பேத்வா ஸப்³ப³ம் சேதியவந்த³னாதி³ஸாமீசிகம்மம் நிட்டா²பேத்வா உபக³ந்தப்³ப³ம். ஆலயபரிக்³க³ஹே ஆலயம் த³ஸ்ஸேதும் ‘‘சித்துப்பாதே³த்த² ஆலயோ’’தி ஆஹ. ஏத்தா²தி த்³வீஸு.

311. தத³ஹூதி தஸ்மிம் வஸ்ஸூபனாயிகதி³வஸே. ஜானந்தி ‘‘அஜ்ஜ வஸ்ஸூபனாயிகா’’தி ஜானந்தோ, அனுபக³ச்ச²தோதிமஸ்ஸ விஸேஸனம்.

312. து³தியந்தி பச்சி²மிகம். அனுபக³தோதி கேனசி அந்தராயேன புரிமிகம் அனுபக³தோ. தேமாஸந்தி புரிமம் வா தேமாஸம் பச்சி²மம் வா தேமாஸம். வஸ்ஸம் உபக³ந்த்வா பன அருணம் அனுட்டா²பேத்வாபி தத³ஹேவ ஸத்தாஹகரணீயேன பக்கமந்தஸ்ஸாபி அந்தோஸத்தாஹே நிவத்தேந்தஸ்ஸாபி அனாபத்தி.

313-5. மாதாபிதூனம் பஞ்சன்னம் ஸஹத⁴ம்மிகானஞ்ச அத்தா²ய கி³லானதது³பட்டா²கப⁴த்தம் ஓஸத⁴ஞ்ச ஏஸிஸ்ஸம் வா புச்சி²ஸ்ஸாமி வா உபட்டி²ஸ்ஸம் வா க³ந்த்வா அஹம் நாபி⁴ரதம் வூபகாஸேஸ்ஸம் வா குக்குச்சம் வினோத³னஞ்ச தி³ட்டி²ம் விவேசனஞ்ச க³ருகாதி³கம் வுட்டா²னம் வாபி உஸ்ஸுக்கம் வாபி கரிஸ்ஸம் வாபி காரேஸ்ஸம் வாபீதி ஏவமாதி³னா ஸத்தாஹகிச்சேன பஹிதேபி வா அபஹிதேபி வா க³ந்தும் லப்³ப⁴ந்தி யோஜனா.

ஏத்த² பன லப்³ப⁴மானகவஸேன யோஜேத்வா வக்க²மானனயேன அத்தோ² வேதி³தப்³போ³. மாதாதி³ஸுதியா தேயேவ கி³லான-ஸத்³தே³ன க³ய்ஹந்தி, தேஸம் உபட்டா²கா தது³பட்டா²கா, கி³லானா ச தது³பட்டா²கா ச, தேஸம் ப⁴த்தந்தி ஸமாஸோ. ஓஸத⁴ந்தி தேஸம்யேவ கி³லானானம் பே⁴ஸஜ்ஜம். ஏஸிஸ்ஸந்தி பரியேஸிஸ்ஸாமி. புச்சி²ஸ்ஸாமீதி தேயேவ ஸத்தஜனே கி³லானே புச்சி²ஸ்ஸம். உபட்டி²ஸ்ஸந்தி தேயேவ கி³லானே உபட்ட²ஹிஸ்ஸாமி. அபி⁴ரமதீதி அபி⁴ரதோ, விஸபா⁴க³ரூபாதி³த³ஸ்ஸனேன ஸாஸனே ந அபி⁴ரதோ நாபி⁴ரதோ. அபி⁴ரமணம் வா அபி⁴ரதம், நத்தி² அபி⁴ரதமஸ்ஸாதி நாபி⁴ரதோ, தம். ஸஹத⁴ம்மிகேஸு யோ நாபி⁴ரதோ, தம் வூபகாஸேஸ்ஸம் விக்கே²பஹரணத்த²ம் அஞ்ஞத்த² நயிஸ்ஸாமி. குக்குச்சந்தி பஞ்சன்னம்யேவ உப்பன்னம் வினயகுக்குச்சம். கிதகயோகே³ விகப்பேன து³தியா. தி³ட்டி²ந்தி தேஸம்யேவ மிச்சா²தி³ட்டி²யா. க³ருகமாதி³கந்தி க³ருகம் ஆதி³ யஸ்ஸாதி விக்³க³ஹோ. ஆதி³-ஸத்³தே³ன ஸாமணேரானம் வஸ்ஸபுச்ச²னம், ஸிக்கா²ஸமாத³யிதுகாமதா, தஜ்ஜனீயாதி³கம்மகரணம் ஸங்க³ஹிதம். வுட்டா²னந்தி பி⁴க்கு²னோ க³ருகாபத்தியா பரிவாஸமானத்ததா³னாதீ³ஹி வுட்டா²னம். உஸ்ஸுக்கந்தி வஸ்ஸபுச்ச²னாதி³உஸ்ஸுக்கம். ஏவமாதி³னாதி ஏத்த² ஆதி³-ஸத்³தே³ன தி³ட்டி²க³தாதீ³னம் த⁴ம்மகதா²கரணாதி³ம் ஸங்க³ண்ஹாதி. க³ந்தும் லப்³ப⁴ந்தி ஏத்த² க³ச்ச²ந்தேன அந்தோஉபசாரஸீமாயம் டி²தேனேவ ‘‘அந்தோஸத்தாஹே ஆக³ச்சி²ஸ்ஸாமீ’’தி ஆபோ⁴க³ம் கத்வா க³ந்தப்³ப³ம். ஸசே ஆபோ⁴க³ம் அகத்வா உபசாரஸீமம் அதிக்கமதி, சி²ன்னவஸ்ஸோ ஹோதீதி வத³ந்தி. ஸத்தாஹகிச்சேனாதி ஸத்தாஹஸ்ஸ லப்³ப⁴மானகம் வுத்தம் வக்க²மானஞ்ச ஸங்க⁴கம்மாதி³ கிச்சம் ஸத்தாஹகிச்சம். ஸத்தமஅருணமத்தஸ்ஸேவ விஹாரே உட்டா²பனீயத்தா ஸத்தாஹஸ்ஸ ஸாகல்லேன க³ஹணம்.

316. ஸங்க⁴கம்மே வஜேதி ஸங்க⁴ஸ்ஸ கிச்சே உபோஸதா²கா³ராதீ³ஸு ஸேனாஸனேஸு வா சேதியச²த்தவேதி³காதீ³ஸு வா அந்தமஸோ புக்³க³லிகஸேனாஸனேஸு வாபி கத்தப்³ப³னிமித்தே வஜேய்யாதி அத்தோ². த⁴ம்மஸவனத்த²ம் நிமந்திதோ வாபி வஜே, க³ரூஹி பேஸிதோ வாபி வஜே, க³ரூனம் பஸ்ஸிதும் வாபி வஜேதி யோஜேதப்³ப³ம். நிமந்திதோதி ஏத்த² ஸசே பட²மம்யேவ கதிகா கதா ஹோதி, ‘‘அஸுகதி³வஸம் நாம ஸன்னிபதிதப்³ப³’’ந்தி நிமந்திதோயேவ நாம ஹோதி. க³ரூஹீதி ஆசரியுபஜ்ஜா²யேஹி. பஹிதோதி ப⁴ண்ட³தோ⁴வனாதி³அத்தா²ய பேஸிதோ. பஸ்ஸிதுந்தி அகி³லானேபி.

317. ப⁴ண்ட³…பே… த³ஸ்ஸனே ந வஜேதி யோஜனீயம். ஏத்தா²பி நிமித்தத்தே² ஸத்தமீ. ப⁴ண்ட³ம் நாம சீவரம். ஞாதீ மாதாபிதூஹி அஞ்ஞே. உபட்டா²கா உபாஸகா. ‘‘அஜ்ஜேவ ஆக³மிஸ்ஸ’’ந்தி அதூ³ரகோ³ ந பாபுணேய்ய, லப்³ப⁴ந்தி ஸம்ப³ந்தோ⁴. லப்³ப⁴ந்தி இமஸ்ஸ அபாபுணனம் வுத்தகம்மம். அஜ்ஜேவாக³மிஸ்ஸந்தி ஸாமந்தவிஹாரம் க³ந்த்வா புன ஆக³ச்ச²ந்தஸ்ஸ அந்தராமக்³கே³ ஸசே அருணுக்³க³மனம் ஹோதி, வஸ்ஸச்சே²தோ³பி ந ஹோதி, ரத்திச்சே²த³து³க்கடஞ்ச நத்தீ²தி வத³ந்தி.

318. ஸேஸஞாதீஹீதி மாதாபிதூஹி அவஸேஸஞாதீஹி. நித்³தி³ஸித்வாவாதி தா³னத⁴ம்மஸவனாதீ³னி. ‘‘பஹிதே பேஸிதே’’தி சேத்த² ‘‘லப்³ப⁴’’ந்தி அனுவத்தனீயம்.

319. அத்தனோ அந்தராயே ஸதீதி சோரஸரீஸபவாளஜீவிதப்³ரஹ்மசரியந்தராயே, அந்தமஸோ பே⁴ஸஜ்ஜாலாப⁴பதிரூபஉபட்டா²காலாபே⁴பி. ‘‘வஸ்ஸச்சே²த³காரணம்பி ஸத்தாஹகரணீயம் ஸியா’’தி கேசி போராணா வத³ந்தி, தம் யுத்தம் விய தி³ஸ்ஸதி, ஸப்³ப³தா² வஸ்ஸச்சே²தே³ன ப³ஹி வாஸாய அனுஞ்ஞாதகாரணம் ஸத்தாஹமத்தம் ப³ஹி வீதினாமேத்வா அந்தோவிஹாரேயேவ வாஸேன வஸ்ஸச்சே²தா³காரணம் கத²ம் நாம ந ஸியாதி. சி²ன்னவஸ்ஸோ நோ பவாரயேதி ஸம்ப³ந்தோ⁴.

320. ‘‘அஸேனாஸனிகேனா’’தி இமினாவ விஞ்ஞாயமானத்த²த்தேபி ‘‘அஜ்ஜோ²காஸே சா’’தி வசனம் ‘‘அஹம் அப்³போ⁴காஸிகோ, கிம் மே ஸேனாஸனேனா’’தி வாஸானிவத்தனத்த²ம் வுத்தம். ருக்க²ஸ்ஸ ஸுஸிரேதி ஸுத்³தே⁴ ருக்க²ஸுஸிரே. மஹந்தஸ்ஸ பன ஸுஸிரஸ்ஸ அந்தோ பத³ரச்ச²த³னகுடிகம் கத்வா பவிஸனத்³வாரம் யோஜேத்வா உபக³ந்தும் வட்டதி. ‘‘விடபேபி அட்டகம் ப³ந்தி⁴த்வா’’திஆதி³ வுத்தனயமேவ. ததா² ச²த்தசாடீஸுபி தத³னுரூபேன வேதி³தப்³ப³ம். ச²வகுடி நாம டங்கிதமஞ்சாதி³பே⁴தா³ குடி. தத்த² டங்கிதமஞ்சோ நாம தீ³கே⁴ மஞ்சபாதே³ மஜ்ஜே² விஜ்ஜி²த்வா அடனியோ பவேஸேத்வா கதோ, சதுன்னம் பாஸாணானம் உபரி பாஸாணம் அத்த²ரித்வா கதம்பி டங்கிதமஞ்சோ.

321. அஸேனாஸனிகேனாதி யஸ்ஸ திணபண்ணஇட்ட²கஸிலாஸுதா⁴ஸங்கா²தானம் பஞ்சன்னம் ச²த³னானம் அஞ்ஞதரேன ச²ன்னம் யோஜிதத்³வாரப³ந்த⁴னம் ஸேனாஸனம் நத்தி², தேன. இத³ம் பன வசீபே⁴த³ம் கத்வா அதி⁴ட்டா²னம் ஸந்தா⁴ய வுத்தந்தி வத³ந்தி, தத³யுத்தம், ததா² ச ஸதி நாவாதீ³ஸு விய விஸும் விதா⁴னேன ப⁴விதப்³ப³ந்தி. நாவாஸத்த²வஜூபகோ³தி இமினா அஸேனாஸனிகேன நாவாதீ³ஸு வஸ்ஸம் உபக³ந்தும் வட்டதீதி தீ³பேதி. தத்த² ச குடிகம் பரியேஸித்வா லப⁴ந்தேன தத்த² பவிஸித்வா விஹாராபா⁴வதோ ‘‘விஹாரே’’தி அவத்வா ‘‘இத⁴ வஸ்ஸம் உபேமீ’’தி திக்க²த்தும் வத்தப்³ப³ம், அலப⁴ந்தேன ஆலயோ காதப்³போ³. பவாரேதுஞ்சாதி ச-ஸத்³தே³ன வஸ்ஸச்சே²த³னிமித்தாய ஆபத்தியா அபா⁴வம் ஸம்பிண்டே³தி. ‘‘வஜே ஸத்தே² நாவாயந்தி தீஸு டா²னேஸு நத்தி² வஸ்ஸச்சே²தே³ ஆபத்தி, பவாரேதுஞ்ச லப்³ப⁴தீ’’தி (மஹாவ. அட்ட². 203) அட்ட²கதா²யம் வுத்தம். வஸ்ஸச்சே²தே³தி ச ‘‘அனுஜானாமி, பி⁴க்க²வே, யேன வஜோ தேன க³ந்து’’ந்தி (மஹாவ. 203) வுத்தத்தா, ஸத்த²ஸ்ஸ நாவாய ச க³மனஸபா⁴வேனேவ டி²தத்தா ச வஸ்ஸூபக³தட்டா²னே அவஸித்வா அஞ்ஞத்த² க³மனமத்தம் ஸந்தா⁴ய வுத்தந்தி வேதி³தப்³ப³ம்.

வஸ்ஸூபனாயிகனித்³தே³ஸவண்ணனா நிட்டி²தா.