38. தூ³ஸனனித்³தே³ஸவண்ணனா

297. த³த³தோதி ஸஸந்தகம் பரஸந்தகஞ்ச தே³ந்தஸ்ஸ. குலதூ³ஸனது³க்கடந்தி அத்தனோ து³ப்படிபத்தியா குலானம் தூ³ஸனம் பஸாத³வினாஸனம் குலதூ³ஸனம், தேன து³க்கடம் குலதூ³ஸனது³க்கடம்.

298. ஏத்த² ஸங்கி⁴கம் க³ருப⁴ண்ட³ம் இஸ்ஸரேன தே³ந்தஸ்ஸ து²ல்லச்சயந்தி ஸம்ப³ந்தோ⁴. ஏத்தா²தி ஏதேஸம் புப்பா²தீ³னம் மஜ்ஜே². இஸ்ஸரேனாதி தத்³தி⁴தலோபேன வுத்தம், இஸ்ஸரியேன இஸ்ஸரவதாயாதி அத்தோ². தே³ந்தஸ்ஸாதி குலஸங்க³ஹத்தா²ய இஸ்ஸரவதாய த³த³தோ. து²ல்லச்சயந்தி குலஸங்க³ஹத்தா²ய த³த³தோ ‘‘குலதூ³ஸனது³க்கட’’ந்தி ஸாமஞ்ஞவிஹிதது³க்கடேன ஸத்³தி⁴ம் ‘‘பஞ்சிமானி, பி⁴க்க²வே, அவிஸ்ஸஜ்ஜியானி, ந விஸ்ஸஜ்ஜேதப்³பா³னி ஸங்கே⁴ன வா க³ணேன வா புக்³க³லேன வா, விஸ்ஸஜ்ஜிதானிபி அவிஸ்ஸஜ்ஜிதானி ஹோந்தி. யோ விஸ்ஸஜ்ஜேய்ய, ஆபத்தி து²ல்லச்சயஸ்ஸா’’தி (சூளவ. 321) ஏவம் வுத்தது²ல்லச்சயந்தி அத்தோ². அஞ்ஞத்த² து²ல்லச்சயமேவ. ஸேனாஸனத்தா²ய நியமிதேபி ஏஸேவ நயோ. ஸங்க⁴ஸ்ஸ ஸந்தகம் தே²ய்யா தே³ந்தஸ்ஸ து³க்கடாதீ³னீதி ஸம்ப³ந்தி⁴தப்³ப³ம். தே³ந்தஸ்ஸாதி வுத்தனயமேவ. து³க்கடாதீ³னீதி குலஸங்க³ஹத்தா²ய த³த³தோ குலதூ³ஸனது³க்கடேன ஸத்³தி⁴ம் மாஸகே வா ஊனமாஸகே வா து³க்கடம், அதிரேகமாஸகே வா ஊனபஞ்சமாஸகே வா து²ல்லச்சயம், பஞ்சமாஸகே வா அதிரேகபஞ்சமாஸகே வா பாராஜிகந்தி ஏவம் து³க்கடாதீ³னி ஹோந்தீதி அத்தோ². அஞ்ஞத்த² து³க்கடாதீ³னேவ.

299-300. குலஸங்க³ஹத்த²ம் ப²லபுப்பூ²பக³ம் ருக்க²ம் ஸப்³ப³தா² ரோபேதுஞ்ச ரோபாபேதுஞ்ச ஜக்³கி³துஞ்ச ந வட்டதீதி ஸம்ப³ந்த⁴னீயம். ச-ஸத்³தோ³ ஓசினிதும் ஓசினாபேதும், க³ந்தி²தும் க³ந்தா²பேதுந்தி ச அவுத்தானி ச ஸமுச்சினோதி. ப²லபுப்பா²னி ஸம்பாத³னவஸேன உபக³ச்ச²தீதி ப²லபுப்பூ²பக³ம். ஸப்³ப³தா²தி கப்பியவோஹாரஅகப்பியவோஹாரபரியாயஓபா⁴ஸனிமித்தகம்மவஸேன ஸப்³ப³ப்பகாரேனேவ. தத்த² கப்பியவோஹாரோ நாம ‘‘இமம் ருக்க²ம் ஜான, இமம் ஆவாடம் ஜான, இமம் மாலாவச்ச²ம் ஜான, ஏத்த² உத³கம் ஜானா’’தி வசனம், ஸுக்க²மாதிகாய உஜுகரணஞ்ச. தப்³பி³பரியாயேன அகப்பியவோஹாரோ நாம. பரியாயோ நாம ‘‘பண்டி³தேன மாலாவச்சா²த³யோ ரோபாபேதப்³பா³, ந சிரஸ்ஸேவ உபகாராய ஸம்வத்தந்தீ’’திஆதி³வசனம். ஓபா⁴ஸோ நாம குத்³தா³லக²ணித்தாதீ³னி ச மாலாவச்சே² ச க³ஹேத்வா டா²னம். நிமித்தகம்மம் நாம குத்³தா³லஉத³கபா⁴ஜனாதீ³னம் ஆஹரித்வா ஸமீபே ட²பனம். ஜக்³கி³துந்தி வத³ந்தி உத³கஸேசனாதீ³னி கத்வா. க³ந்த²னக³ந்தா²பனேஸு பன ஸப்³பா³பி ச² புப்ப²விகதியோ வேதி³தப்³பா³ க³ந்தி²மம் கோ³ப்பி²மம் வேதி⁴மம் வேடி²மம் பூரிமம் வாயிமந்தி. நாமவஸேனேவ பனேதேஸம் விஸேஸோ வேதி³தப்³போ³. தம் பன குலஸங்க³ஹதோ அஞ்ஞத்ராபி பி⁴க்கு²ஸ்ஸ காதும்பி அகப்பியவசனேன காராபேதும்பி ந வட்டதி. ‘‘ஏவம் ஜான, ஏவம் கதே ஸோபே⁴ய்ய, யதா² ஏதானி புப்பா²னி ந விகிரியந்தி, ததா² கரோஹீ’’திஆதி³னா பன கப்பியவசனேன காராபேதும் வினா குலஸங்க³ஹம் வட்டதி. ரோபனாதீ³னீதி அகப்பியபத²வியம் ரோபாபனஸிஞ்சாபனாதீ³னி, அஞ்ஞத்த² ரோபனாதீ³னி.

301-2. இதா³னி புப்ப²தா³னாதீ³ஸு அட்ட²ஸு குலஸங்க³ஹவத்தூ²ஸு அவஸேஸானி த்³வே த³ஸ்ஸேதும் ‘‘வுத்தாவா’’திஆதி³மாஹ. வுத்தாவ மிச்சா²ஜீவவிவஜ்ஜனாயம் வுத்தா ஏவ. ஜங்க⁴பேஸனே வினிச்ச²யோ வுச்சதீதி பாட²ஸேஸோ. பிதரோ ப⁴ண்டு³ம் ஸகம் வேய்யாவச்சகரம் ட²பேத்வா கி³ஹிகம்மேஸு தூ³தஸாஸனம் ஹரணே பத³வாரேன து³க்கடந்தி ஸம்ப³ந்தோ⁴. ஸஹத⁴ம்மிகேஸு வத்தப்³ப³மேவ நத்தீ²தி பிதாத³யோவ வுத்தா. கி³ஹிகம்மஸூதி விஸயஸத்தமீ. பத³வாரேனாதி பத³க்கமேன, பதே³ பதே³தி அதி⁴ப்பாயோ. பட²மம் ஸாஸனம் அக்³க³ஹேத்வாபி புன வத³தோ து³க்கடந்தி யோஜேதப்³ப³ம். புனாதி பச்சா². ‘‘அயம் தா³னி ஸோ கா³மோ, ஹந்த³ நம் ஸாஸனம் ஆரோசேமீ’’தி மக்³கா³ ஓக்கமந்தஸ்ஸ ச பதே³ பதே³ வத³தோ ச து³க்கடந்தி அதி⁴ப்பாயோ. தஸ்ஸ பன ஸாஸனம் படிக்கி²பித்வா ஸயமேவ காருஞ்ஞே டி²தேன க³ந்த்வா அத்தனோ பதிரூபம் ஸாஸனம் ஆரோசேதும், ‘‘மம வசனேன ப⁴க³வதோ பாதே³ வந்த³தா²’’திஆதி³கம் கி³ஹீனம் கப்பியஸாஸனம் ஹரிதுஞ்ச வட்டதி.

303. அபூ⁴தாரோசனரூபியஸம்வோஹாருக்³க³ஹாதி³ஸாதி அபூ⁴தாரோசனாய ரூபியஸம்வோஹாரே ச உக்³க³ஹே உப்பன்னபச்சயே ஆதி³ஸந்தி கதே²ந்தி பகாஸேந்தீதி அபூ⁴தா…பே… ஹாதி³ஸா, தம்ஸதி³ஸாதி வுத்தம் ஹோதி.

304. பிதூனம் ஹராபேத்வா ஹரித்வாபி புப்பா²னி வத்து²பூஜத்த²ம் தா³தும், ஸேஸஞாதீனம் பத்தானம் வத்து²பூஜத்த²ம் தா³துந்தி யோஜனீயம். ‘‘ஹராபேத்வா ஹரித்வா’’தி வுத்தே ‘‘பக்கோஸித்வா பக்கோஸாபேத்வா வா’’தி வுத்தமேவ ஸியாதி ந வுத்தம். பத்தானந்தி பக்கோஸகேன பத்தாபி க³ஹிதா. வத்து²பூஜத்த²ந்தி ரதனத்தயபூஜனத்த²ம். உபாஸகானம்பி பன ஸம்பத்தானம் வத்து²பூஜத்த²ம் தா³தும் வட்டதியேவ. லிங்கா³தி³பூஜத்த²ந்தி ஸிவலிங்க³கி³ண்டு³பி³ம்பா³தி³பூஜனத்த²ம்.

305. ததா² ப²லந்தி இமினா புப்பே² வுத்தம் ஸப்³ப³ம் அபதி³ஸதி. பரிப்³ப³யவிஹீனானந்தி பரிப்³ப³யம் பாதே²ய்யம் விஹீனம் நட்ட²ம் யேஸம் ஆக³ந்துகானந்தி ஸமாஸோ. ஸபரந்தி அத்தனோ விஸ்ஸாஸிகா. அட்ட²கதா²யம் (பாரா. அட்ட². 2.436-437) பன ‘‘அத்தனோ ஸந்தகம்யேவா’’தி வசனம் து²ல்லச்சயாதி³விபா⁴க³தோ மோசேத்வா வுத்தம்.

306. ஸம்மதேன தே³ய்யந்தி யோஜனா. தே³ய்யந்தி சதுத்த²பா⁴க³ம் தா³தப்³ப³ம். இதரேன து அபலோகேத்வா தா³தப்³ப³ந்தி ஸம்ப³ந்தி⁴தப்³ப³ம். இதரேன து அஸம்மதேன பன.

307. பரிச்சி²ஜ்ஜாதி ‘‘ஏத்தகானி ப²லானி தா³தப்³பா³னீ’’தி ஏவம் ப²லபரிச்சே²தே³ன வா ‘‘இமேஹி ருக்கே²ஹி தா³தப்³பா³னீ’’தி ஏவம் ருக்க²பரிச்சே²தே³ன வா பரிச்சி²ந்தி³த்வா. ததோதி பரிச்சி²ன்னப²லதோ ருக்க²தோ வா. யாசமானஸ்ஸ கி³லானஸ்ஸேதரஸ்ஸ வாதி ஸம்ப³ந்த⁴னீயம். ருக்கா²வ த³ஸ்ஸியாதி ‘‘இத⁴ ப²லானி ஸுந்த³ரானி, இதோ க³ண்ஹதா²’’தி அவத்வா ‘‘இதோ க³ஹேதும் லப்³ப⁴தீ’’தி ருக்கா² வா த³ஸ்ஸேதப்³பா³.

308. இதா³னி அட்ட²ஸு புப்பா²தீ³னம் சதுன்னம் வினிச்ச²யம் த³ஸ்ஸேத்வா யதா²வுத்தப²லபுப்ப²வினிச்ச²யம் அவஸேஸேஸு சதூஸு அபதி³ஸந்தோ ‘‘ஸிரீஸா’’திஆதி³மாஹ. ஸிரீஸசுண்ணகஸவாதி³சுண்ணேதி கஸாவம் யம் கிஞ்சி ஆதி³ யஸ்ஸ, தமேவ சுண்ணம், ஸிரீஸசுண்ணஞ்ச கஸாவாதி³சுண்ணஞ்சாதி ஸமாஸோ. ‘‘ஸிரீஸசுண்ணம் வா அஞ்ஞம் வா கஸாவ’’ந்தி ஹி அட்ட²கதா²யம் (பாரா. அட்ட². 2.436-437) வுத்தம். ‘‘கஸாவாதீ³’’தி வத்தப்³பே³ ரஸ்ஸேன வுத்தம். ஸேஸேஸூதி வேளுஆதீ³ஸு தீஸு. பாளியா அவுத்தஸ்ஸாபி அட்ட²கதா²யம் வுத்தத்தா ஆஹ ‘‘பண்ணம்பேத்த² பவேஸயே’’தி. ஏத்தா²தி புப்பா²தீ³ஸூதி.

தூ³ஸனனித்³தே³ஸவண்ணனா நிட்டி²தா.