37. உக்³க³ஹனித்³தே³ஸவண்ணனா

281. புக்³க³ல-ஸத்³த³மத்தே பயுத்தே அத்தனோபி க³ஹணஸம்ப⁴வோ ஸியாதி ப்³யபி⁴சாரத்த²ம் அஞ்ஞ-ஸத்³த³ப்பயோகோ³. ஸதி ஸம்ப⁴வே ப்³யபி⁴சாரே விஸேஸனம் ஸாத்த²கம் ஹோதீதி. த³ஸபே⁴த³ம்பி ரதனந்தி ‘‘முத்தா மணி வேளுரியோ ஸங்கோ² ஸிலா பவாளம் ரஜதம் ஜாதரூபம் லோஹிதங்கோ மஸாரக³ல்ல’’ந்தி (பாசி. 506) ஏவம் வுத்தம் த³ஸபே⁴த³ம்பி ரதனம். உக்³க³ண்ஹந்தஸ்ஸாதி க³ண்ஹந்தஸ்ஸ ஸம்படிச்ச²ந்தஸ்ஸ.

282-3. தேஸு அத்தத்த²ம் உக்³க³ண்ஹந்தஸ்ஸ த்³வீஸு நிஸ்ஸக்³கீ³தி ஸம்ப³ந்தோ⁴. தேஸூதி தேஸு த³ஸஸு மஜ்ஜே². த்³வீஸூதி ரஜதஜாதரூபஸங்கா²தேஸு த்³வீஸு நிஸ்ஸக்³கி³யவத்தூ²ஸு. அத்தத்த²ந்தி இமினா நவகம்மாதீ³னம் பஞ்சன்னம் அத்தா²ய து³க்கடந்தி தீ³பேதி. ஸேஸேஸு து³க்கடந்தி அவஸேஸேஸு அட்ட²ஸு ஸப்³பே³ஸம்பி அத்தா²ய உக்³க³ண்ஹந்தஸ்ஸ து³க்கடந்தி அத்தோ². க³ணஞ்ச ஸங்க⁴ஞ்ச புக்³க³லஞ்ச அனாமஸித்வா ‘‘சேத்யஸ்ஸ நவகம்மஸ்ஸ த³ம்மீ’’தி வுத்தே ச ந படிக்கி²பேதி ஸம்ப³ந்த⁴னீயம். ந படிக்கி²பேதி இமினா ஸங்கா⁴தி³ம் ஆமஸித்வா வுத்தே படிக்கி²பனம் தீ³பேதி. படிக்கி²த்தே ‘‘கப்பியகாரகானம் வா ஹத்தே² ப⁴விஸ்ஸதி, மம புரிஸானம் மய்ஹமேவ வா ஹத்தே² ப⁴விஸ்ஸதி, கேவலம் தும்ஹே பச்சயே பரிபு⁴ஞ்ஜதா²’’தி வத³தி, வட்டதி. சதுபச்சயத்தா²ய ச தி³ன்னம் யேன யேன அத்தோ² ஹோதி, தத³த்த²ம் உபனேதப்³ப³ம். தேஸம் சீவரத்தா²ய தி³ன்னம் சீவரேயேவ உபனேதப்³ப³ம். ஸசே சீவரேன தாதி³ஸோ அத்தோ² நத்தி², பிண்ட³பாதாதீ³ஹி ஸங்கோ⁴ கிலமதி, ஸங்க⁴ஸுட்டு²தாய அபலோகேத்வா தத³த்தா²யபி உபனேதப்³ப³ம். ஏஸ நயோ பிண்ட³பாதகி³லானபச்சயத்தா²ய தி³ன்னேபி. ஸேனாஸனத்தா²ய தி³ன்னம் பன க³ருப⁴ண்ட³த்தா தத்தே²வ உபனேதப்³ப³ம், ஸேனாஸனேஸு நஸ்ஸந்தேஸு ஜக்³க³னத்த²ம் மூலச்சே²ஜ்ஜம் அகத்வா அவிஸ்ஸஜ்ஜேத்வா யாபனமத்தம் பரிபு⁴ஞ்ஜிதப்³ப³ம்.

284. கே²த்தாதீ³னம் கேஸஞ்சி து³க்கடவத்தூ²னம் ஸம்படிச்ச²னூபாயம் த³ஸ்ஸேதும் ‘‘கே²த்த’’ந்திஆதி³ வுத்தம். தத்த² கே²த்தந்தி புப்³ப³ண்ணவிருஹனட்டா²னம். வத்து²ந்தி அபரண்ணஉச்சு²ப²லாதீ³னம் விருஹனட்டா²னம். தா³ஸபஸ்வாதி³கந்தி தா³ஸபஸுபுப்பா²ராமப²லாராமாதி³கம். படிக்கி²பித்வா கப்பியேன கமேன ச க³ண்ஹேய்யாதி ஸம்ப³ந்தோ⁴. கப்பியேன கமேன சாதி ஏத்த² கம-ஸத்³தோ³ வோஹாரப்படிபாடிவசனோ, தஸ்மா பரேஸம் அத்தனோ ச கப்பியவோஹாரக்கமேனேவாதி அத்தோ².

ஸோ ச கே²த்தவத்தூ²ஸு தாவ ‘‘சத்தாரோ பச்சயே பரிபு⁴ஞ்ஜதா²’’தி வா ‘‘கப்பியகாரகானம் ஹத்தே² ப⁴விஸ்ஸதீ’’தி வா ‘‘ஸங்கோ⁴ கப்பியப⁴ண்ட³ம் பு⁴ஞ்ஜதூ’’தி வா ‘‘ஸீமம் தே³மா’’தி வா பரேஹி வுத்தோ, ‘‘ஸாது⁴, உபாஸக மிக³பக்கி²னோ ஏத்த² நிப்³ப⁴யா ஸுகே²ன ஜீவிஸ்ஸந்தீ’’தி அத்தனா வா தளாகே யதா²வுத்தேனேவ ‘‘உத³கம் பரிபு⁴ஞ்ஜிஸ்ஸந்தி, ப⁴ண்ட³கம் தோ⁴விஸ்ஸந்தி, மிக³பக்கி²னோ பிவிஸ்ஸந்தீ’’தி பரேஹி வா ‘‘ஸாது⁴, உபாஸக, ஸங்கோ⁴ பானீயம் பிவிஸ்ஸதீ’’திஆதி³னா அத்தனா வா தா³ஸே ‘‘ஆராமிகம் த³ம்மி, வேய்யாவச்சகரம் த³ம்மி, கப்பியகாரகம் த³ம்மீ’’தி வா பஸூஸு ‘‘பஞ்சகோ³ரஸபரிபோ⁴க³த்தா²ய த³ம்மீ’’தி ஆராமே ‘‘வனம் த³ம்மீ’’தி ஏவமாதி³னா வுத்தோ வேதி³தப்³போ³. ஸசே பன கோசி அப்³யத்தோ அகப்பியவோஹாரேன கே²த்தாதி³ம் படிக்³க³ண்ஹாதி வா காரேதி வா, தம் பி⁴க்கூ²ஹி ந பரிபு⁴ஞ்ஜிதப்³ப³ம், தம் நிஸ்ஸாய லத்³த⁴ம் கப்பியப⁴ண்ட³ம்பி அகப்பியமேவ. அப்³யத்தேன பன லஜ்ஜீபி⁴க்கு²னா காராபிதேஸு கிஞ்சாபி படிக்³க³ஹணம் கப்பியம், பி⁴க்கு²ஸ்ஸ பயோக³பச்சயா உப்பன்னேன மிஸ்ஸத்தா விஸக³தபிண்ட³பாதோ விய, அகப்பியமம்ஸபோ⁴ஜனம் விய ச து³ப்³பி³னிப்³போ⁴க³ம் ஹோதி, ஸப்³பே³ஸம் அகப்பியமேவ.

285-6. நவ…பே… கிரியா ச அனவே மத்திகுத்³தா⁴ரணஞ்ச ப³ந்தோ⁴ ச ஆளியா தி²ரகாரோ ச அனவே கேதா³ரே அதிரேகபா⁴க³க்³க³ஹணஞ்ச நவே ச அபரிச்சி²ன்னபா⁴கே³ ஸஸ்ஸே ‘‘ஏத்தகே தே³தா²’’தி கஹாபணுட்டா²பனஞ்சாதி ஸப்³பே³ஸம்பி அகப்பியந்தி ஸம்ப³ந்தோ⁴. மாதிகா ச கேதா³ரோ ச தளாகோ சாதி த்³வந்தோ³ மாதிக…பே… தளாகா. தேஸம் கிரியாதி ஸமாஸோ. அனவேதி சதுபச்சயவஸேன படிக்³க³ஹிதே புராணதளாகே. உத³கவஸேன படிக்³க³ஹிதே பன ஸுத்³த⁴சித்தானம் வட்டதி. ப³ந்தோ⁴தி பாளியா ப³ந்தோ⁴. போராணகேதா³ரே நியமிதபகதிபா⁴க³த்தா ஆஹ ‘‘அனவே’’தி. அபரிச்சி²ன்னபா⁴கே³தி ‘‘ஏத்தகே பூ⁴மிபா⁴கே³ ஏத்தகோ பா⁴கோ³ தா³தப்³போ³’’தி ஏவம் அபரிச்சி²ன்னபா⁴கே³.

287-9. ‘‘கஸ வப்ப’’ இச்சாதி³ம் அவத்வா ச ‘‘ஏத்தகாய பூ⁴மியா ஏத்தகோ பா⁴கோ³ தே³ய்யோ’’தி பூ⁴மிம் வா பதிட்டா²பேதி, தஸ்ஸேவேதமகப்பியந்தி ஸம்ப³ந்தோ⁴. ச-ஸத்³தோ³ அவதா⁴ரணே. பதிட்டா²பேதீதி யோ பி⁴க்கு² பதிட்டா²பேதி. தஸ்ஸேவாதி தஸ்ஸ பதிட்டா²பகபி⁴க்கு²ஸ்ஸேவ. ஏதந்தி பதிட்டா²பிதபூ⁴மிதோ லத்³த⁴த⁴ஞ்ஞம் ‘‘ஏத்தகே பூ⁴மிபா⁴கே³ ஸஸ்ஸம் கதம், ஏத்தகம் க³ண்ஹதா²’’தி ஏவம் வத³ந்தே பமாணக³ண்ஹனத்த²ம் த³ண்ட³ரஜ்ஜுபி⁴ மினனே வா க²லே ட²த்வா ரக்க²ணே வா தம் நீஹராபனே வா கோட்டா²கா³ராதி³படிஸாமனே வா ஏதம் தஸ்ஸேவ அகப்பியந்தி ஸம்ப³ந்த⁴னீயம். பதிட்டா²பேதி சாதி ஸோ பி⁴க்கு² பதிட்டா²பேதி ச. கதந்தி அம்ஹேஹி கதம். வத³ந்தேவந்தி ஏவம் கஸ்ஸகே வத³ந்தே. பமாணந்தி பூ⁴மிப்பமாணம். நீஹராபனேதி க²லதோ கே³ஹஸ்ஸ நீஹராபனே. ஏதந்தி மிதலத்³த⁴ரக்கி²தாதி³கம். தஸ்ஸேவாதி மானகரக்க²காதி³னோ ஏவ. அபுப்³ப³ஸ்ஸ அனுப்பாதி³தத்தா அஞ்ஞேஸம் கப்பதீதி ஆஹ ‘‘தஸ்ஸேவேதமகப்பிய’’ந்தி.

290. படிஸாமனப்பஸங்கே³னாஹ ‘‘படிஸாமேய்யா’’திஆதி³. பிதுஸந்தகம்பி கி³ஹிஸந்தகம் யம் கிஞ்சீதி ஸம்ப³ந்தோ⁴. பிதுஸந்தகந்தி பிதா ச மாதா ச பிதரோ, தேஸம் ஸந்தகம். கி³ஹிஸந்தகந்தி இமினா பஞ்சன்னம் ஸஹத⁴ம்மிகானம் ஸந்தகம் யம் கிஞ்சி பரிக்கா²ரம் படிஸாமேதும் வட்டதீதி தீ³பேதி. யம் கிஞ்சீதி கப்பியம் அகப்பியம் வா அந்தமஸோ மாதுகண்ணபிளந்த⁴னதாலபண்ணம்பி. ப⁴ண்டா³கா³ரிகஸீஸேனாதி ஸீஸங்க³மிவ பதா⁴னம் யம் கிஞ்சி ‘‘ஸீஸ’’ந்தி இத⁴ உபசாரவஸேன வுச்சதி, ததா² ப⁴ண்டா³கா³ரிகஸத்³தோ³பி பா⁴வப்பதா⁴னோ, ப⁴ண்டா³கா³ரிகோ ப⁴ண்டா³கா³ரிகத்தம் ஸீஸம் பதா⁴னந்தி விஸேஸனபரபதே³ கம்மதா⁴ரயோ, தேன, ப⁴ண்டா³கா³ரிகத்தஸ்ஸ பதா⁴னகரணேனாதி அத்தோ².

291-2. அவஸ்ஸம் படிஸாமியந்தி அவஸ்ஸம் ஸங்கோ³பேதப்³ப³ம். வுத்தேபீதி மாதாபிதூஹி வுத்தேபி.

293-4. வட்³ட⁴கிஆத³யோ வா ராஜவல்லபா⁴ வா ‘‘ஸகம் பரிக்கா²ரம் வா ஸயனப⁴ண்ட³ம் வா படிஸாமேத்வா தே³ஹீ’’தி யதி³ வத³ந்தி, ச²ந்த³தோபி ப⁴யாபி ந கரேய்யாதி யோஜனா. பரிக்கா²ரந்தி வாஸிப²ரஸுஆதி³உபகரணப⁴ண்ட³ம். ச²ந்த³தோபி ப⁴யாபீதி வட்³ட⁴கிஆதீ³ஸு ச²ந்தே³ன, ராஜவல்லபே⁴ஸு ப⁴யேன.

295-6. படிஸாமிதும் வட்டதீதி யோஜேதப்³ப³ம். ஸங்கந்தீதி யாதி³ஸே பதே³ஸே ‘‘பி⁴க்கூ²ஹி வா ஸாமணேரேஹி வா க³ஹிதம் ப⁴விஸ்ஸதீ’’தி ஸங்கம் உப்பாதே³ந்தி, தாதி³ஸே விஹாராவஸத²ஸ்ஸந்தோதி யோஜனீயம். விஹாராவஸத²ஸ்ஸாதி விஹாரஸ்ஸ ச ஆவஸத²ஸ்ஸ ச. ரதனந்தி த³ஸவித⁴ம் ரதனம். ரத்னஸம்மதந்தி வத்தா²தி³கம். நிக்கி²பேய்யாதி ஸாமிகே தி³ட்டே² நியமேத்வா தா³தும் ‘‘ஏத்தகா கஹாபணா’’திஆதி³னானுரூபேன மத்திகலஞ்ச²னாதி³னிமித்தேன வா ஸஞ்ஞாணம் கத்வா நிக்கி²பேய்ய. க³ஹேத்வானாதி தாதி³ஸே அஸதி அத்தனாவ க³ஹேத்வா. தாதி³ஸேதி ரதனே வா ரதனஸம்மதே வா ஸதி. ஸாமிகானாக³மம் ஞத்வாதி யதி³ அத்தனி ஆஸங்கந்தி, மக்³கா³ ஓக்கம்ம நிஸீதி³ய பச்சா² ஸாமிகானம் அனாக³மனம் விஞ்ஞாய. பதிரூபந்தி ரதனஸம்மதே பம்ஸுகூலக்³க³ஹணம் ரதனே நிருஸ்ஸுக்கக³மனந்தி ஏவரூபம் பி⁴க்கூ²னம் அனுரூபந்தி.

உக்³க³ஹனித்³தே³ஸவண்ணனா நிட்டி²தா.