24. அஞ்ஜனீனித்³தே³ஸவண்ணனா

182. வட்டா வா அட்ட²ஸோளஸம்ஸா வா மட்டா² அஞ்ஜனீ வட்டதீதி யோஜனா. அட்ட² ச ஸோளஸ ச அம்ஸா கோணா யஸ்ஸா ஸாதி விக்³க³ஹோ. ஸோளஸம்ஸபதே³ஸவிப⁴த்தாய அட்ட²ம்ஸாஸுதியா அட்ட²ம்ஸபதே³ஸவிப⁴த்தா சதுரம்ஸாபி ஸாமத்தி²யா க³ய்ஹதீதி ஞாதப்³ப³ம். ‘‘உஜுகமேவ பன சதுரம்ஸாவா’’தி ஹி அட்ட²கதா²யம் (பாரா. அட்ட². 1.85) வுத்தம். அஞ்ஜனீதி அஞ்ஜனனாளி. மூலே திஸ்ஸோபி லேகா² வட்டந்தீதி யோஜனா. மூலேதி பு³ந்தே³, ஹேட்ட²தோதி வுத்தம் ஹோதி. லேகா²தி வட்டலேகா². ப³ந்தி⁴தும் கீ³வாயம் ஏகா ஏவ லேகா² வட்டதீதி ஸம்ப³ந்தோ⁴. ப³ந்தி⁴துந்தி பிதா⁴னப³ந்த⁴னத்த²ம்.

183. யம் கிஞ்சி ரூபந்தி இத்தி²ரூபாதி³ யம் கிஞ்சி ரூபம். மாலாதி³கம்மந்தி மாலாகம்மம் லதாகம்மம். அட்³ட⁴சந்தா³தீ³தி ஏத்த² ஆதி³-ஸத்³தே³ன அக்³கி⁴யாதி³கம் க³ஹிதம். ஏத்தா²தி அஞ்ஜனியம்.

184. த²விகாதி அஞ்ஜனித²விகா. ஸிபாடீதி கு²ரஸிபாடிகா. ஸலாகாபி அசித்தகா லப்³பா⁴தி ஸம்ப³ந்தோ⁴. ஸலாகாதி அஞ்ஜனிஸலாகா. நத்தி² சித்தமேதிஸ்ஸாதி அசித்தகா. தாதி³ஸம் பன லபி⁴த்வா உபாஹனாயோ விய நாஸேத்வா பரிபு⁴ஞ்ஜிதப்³ப³ம்.

185. அட்டி²-ஸத்³தே³ன மனுஸ்ஸட்டி²ம் ட²பேத்வா யம் கிஞ்சி அட்டி² க³ஹிதம்.

186. தூ⁴மனேத்தாதி தூ⁴மனாளிகா, நிஸ்ஸ ஆ-காராதே³ஸவஸேன வுத்தம். ஸத்த²கத³ண்டா³னீதி ஸத்த²த³ண்டா³. நத்து²ம் தே³ந்தி ஏதாயாதி நத்து²தா³னா. அனியமேன ஹி நதா³தி³தோ வா ஈ. தேஹி ஸங்க²னாபி⁴ஆதீ³ஹி நிப்³ப³த்தா தம்மயா.

அஞ்ஜனீனித்³தே³ஸவண்ணனா நிட்டி²தா.