25. அகப்பியஸயனனித்³தே³ஸவண்ணனா

187-9. அகப்பியானி ஸயனானீதி உச்சாஸயனமஹாஸயனானி. பதா⁴னவஸேன பன ‘‘ஸயனானீ’’தி வுத்தம், பீடா²த³யோபி ஏத்தே²வ ஸங்க³ய்ஹந்தி அஞ்ஜனீ-ஸத்³தே³ன அவஸேஸானி விய. ஆஸந்தி³ ச…பே… உப⁴தோரத்தூபதா⁴னகஞ்சேதி ஏதானி அகப்பியானீதி ஸம்ப³ந்தோ⁴. தத்த² ஆஸந்தீ³தி ஸுக³தங்கு³லேன அதிரேகட்ட²ங்கு³லபாத³கானி மஞ்சபீடா²னி. தத்த² பீட²ம் நாம மஞ்சோ விய நாதிதீ³க⁴ம் வுச்சதி. திவித⁴ம் தூலமேதிஸ்ஸா அத்தீ²தி தூலீ, பகதிதூலிகா. ‘‘பல்லங்கோதி பாதே³ஸு வாளரூபானி ட²பேத்வா கதோ’’தி ட²பனஸ்ஸ அட்ட²கதா²யம் (மஹாவ. அட்ட². 254) வுத்தத்தா ட²பனஞ்ச யதா²கத²ஞ்சி ஹோதி, யுத்தி ச ஹோதீதி, ‘‘தத்தே²வ ஸீஹரூபாதி³ம் த³ஸ்ஸேத்வா கதோ பன வட்டதீதி வத³ந்தீ’’தி யம் டீகாயம் வுத்தம், தம் ‘‘கிமிதி ஏவம் வத³ந்தீ’’தி வத்வா படிக்கி²பிதப்³ப³ம். ‘‘அகப்பியரூபகதோ அகப்பியமஞ்சோ பல்லங்கோ நாமா’’தி ஹி ஸாரஸமாஸேபி. ஆஸந்தீ³ பல்லங்கோ உச்சாஸயனம், ஸேஸா மஹாஸயனம். படிகா உண்ணாமயோ ஸேதத்த²ரணோ. கோ³னோ சதுரங்கு³லாதி⁴கலோமோ மஹாகோஜவோ. சித்தகம் வானவிசித்ரோ உண்ணாமயத்த²ரணோ. உண்ணா ஏளகலோமம். படலிகா க⁴னபுப்பி²கா. விகதீதி ஸீஹப்³யக்³கா⁴தி³ரூபவிசித்தோ. உத்³த³லோமீதி ஏகதோ உக்³க³தலோமோ. ஏகந்தலோமிகாதி உப⁴தோ உக்³க³தலோமோ.

குத்தம் ஸோளஸன்னம் நாடகித்தீ²னம் ட²த்வா நச்சனயோக்³கோ³. கோஸேய்யம் ரதனபரிஸிப்³பி³தம் கோஸேய்யஸுத்தமயம் பச்சத்த²ரணம், கட்டிஸ்ஸம் ரதனபரிஸிப்³பி³தம் கோஸேய்யகட்டிஸ்ஸமயம். ஹத்தி²னோ ச அஸ்ஸா ச ரதா² சாதி ஸேனங்கா³னம் ப³ஹுத்தே ஸமாஹாரத்³வந்தோ³, ஹத்தி²அஸ்ஸரதே² தேஸம் பிட்டீ²ஸு அத்த²ராதி தப்புரிஸோ. அஜினப்பவேணீதி அஜினானம் அஜினமிக³சம்மானம் மஞ்சப்பமாணேன து³பட்டதிபட்டானி கத்வா ஸிப்³பி³தா பவேணீ. கத³லிமிகா³னம் இத³ம் கத³லிமிக³ம், கிம் தம்? சம்மம், பவரோ ச ஸோ பச்சத்த²ரோ சாதி பவரபச்சத்த²ரோ, ஸோ ச தம் ஸேதவத்த²ஸ்ஸ உபரி அத்த²தஞ்ச, கத³லிமிக³ஞ்ச தம் பவரபச்சத்த²ரஞ்சாதி ஸமாஸோ, பவரபச்சத்த²ரணஸங்கா²தம் ஸேதவத்த²ஸ்ஸ உபரி பத்த²ரிதம் கத³லிமிக³ப்பவரபச்சத்த²ரணந்தி அத்தோ². தம் கிர ஏவம் கரோந்தி. டீகாயம் பன யதா²வுத்தத்³வயேன அத்த²தம் அஞ்ஞமேவ கிஞ்சி வுத்தம், தம் ந யுத்தம் ‘‘அஜினப்பவேணீ தா⁴ரேதப்³பா³’’திஆதி³னா (மஹாவ. 254) விஸும் அத்த²ரணானமேவ வுத்தத்தா. தேஸு ஹி வுத்தேஸு தத³த்த²தம் வுத்தமேவ ஸியா, ததா² ச வுத்தம் ஹேட்டா² விஸும் படிகாதி³கந்தி.

ஸலோஹிதவிதானந்தி ஏதம் ‘‘உப⁴தோரத்தூபதா⁴னக’’ந்திமஸ்ஸ விஸேஸனம். லோஹிதவிதானேன ஸஹ வத்தமானந்தி ஸமாஸோ. ஸேதவிதானம்பி ஹேட்டா² அகப்பியபச்சத்த²ரணே ஸதி ந வட்டதி. ரத்தம் உபதா⁴னம் ஸீஸூபதா⁴னம் பாதூ³பதா⁴னஞ்ச ரத்தூபதா⁴னகம், உப⁴தோ மஞ்சஸ்ஸ ஸீஸபாத³னிக்கே²பனட்டா²னே ரத்தூபதா⁴னகந்தி அலோபஸமாஸோ. யம் பன ஏகமேவ உபதா⁴னம் உப⁴யபஸ்ஸேஸு ரத்தாதி³வண்ணம் விசித்ரம், தம் பமாணயுத்தமேவ வட்டதி. தத்ரித³ம் பமாணம் – வித்தா²ரதோ தீஸு கண்ணேஸு த்³வின்னம் கண்ணானம் அந்தரம் வித³த்தி²சதுரங்கு³லம், மஜ்ஜே² முட்டி²ரதனம், தீ³க⁴தோ பன தி³யட்³ட⁴ரதனம் வா த்³விரதனம் வா. பரிபு⁴ஞ்ஜதோதி இமினா கரோந்தஸ்ஸ காராபேந்தஸ்ஸ கத்த²சி சே²த³னகம் பாசித்தியந்தி தீ³பேதி.

190. த⁴ம்மாஸனே ச ப⁴த்தக்³கே³ ச க⁴ரே சாபி ஆஸந்தா³தி³த்தயா ஸேஸே கி³ஹிஸந்தகே கி³ஹிவிகடே ஸதி நிஸீதி³தும் லப்³ப⁴தீதி அஜ்ஜா²ஹாரோ பத³ஸம்ப³ந்தோ⁴ வேதி³தப்³போ³. கி³ஹிஸந்தகேதி இமினா ஸங்கி⁴கம்பி உபலக்கே²தி. ‘‘அனுஜானாமி, பி⁴க்க²வே, ட²பேத்வா தீணி ஆஸந்தி³ம் பல்லங்கம் தூலிகம் கி³ஹிவிகட’’ந்தி (சூளவ. 314) ஸாமஞ்ஞேன வுத்தம். ஸாமஞ்ஞஜோதனாய பன விஸேஸேபி அவட்டா²னதோ ஆஸந்தா³தி³த்தயாதி ஏத்த² த⁴ம்மாஸனே ஆஸந்தா³தி³த்தயா ஸேஸேதி யோஜேத்வா அத்தோ² க³ஹேதப்³போ³. அட்ட²கதா²யஞ்ஹி ‘‘ஆஸந்தீ³ பல்லங்கோ கோ³னகோ’’திஆதி³பாளிக்கமே ஆஸந்தா³தி³த்³வயமாதி³தோ ஹித்வா ‘‘கோ³னகாதீ³னி ஸங்கி⁴கவிஹாரே வா புக்³க³லிகவிஹாரே வா மஞ்சபீட²கேஸு அத்த²ரித்வா பரிபு⁴ஞ்ஜிதும் ந வட்டந்தி, த⁴ம்மாஸனே பன கி³ஹிவிகடனீஹாரேன லப்³ப⁴ந்தி, தத்ராபி நிபஜ்ஜிதும் ந வட்டதீ’’தி (சூளவ. அட்ட². 320) வுத்தம். ப⁴த்தக்³க³ம் நாம விஹாரே தா³னட்டா²னம். த⁴ம்மாஸனம் பன யத்த² கத்த²சி. க⁴ரேதி அந்தரக⁴ரே. நிஸீதி³தும் லப்³ப⁴தேதி இமினா நிபஜ்ஜிதும் ந வட்டதீதி தீ³பேதி. ஸம்கி²பனம் அந்தோகரணம் ஸங்கே²போ, பூ⁴மத்த²ரணே ஸங்கே²போ அஸ்ஸ ஸயனஸ்ஸாதி ஸமாஸோ. தஸ்மிம் பூ⁴மத்த²ரணே அந்தோகரணபூ⁴மத்த²ரதோ பூ⁴மத்த²ரணமேவாதி த³ட்ட²ப்³ப³ம். ஸயிதுஞ்சாதி அத்தனோ கப்பியபச்சத்த²ரணம் அத்த²ரித்வா ஸயிதுஞ்ச நிஸீதி³துஞ்ச. ‘‘பரிப⁴ண்ட³கதம் பூ⁴மிம் வா பூ⁴மத்த²ரணஸேனாஸனம் வா ஸங்கி⁴கமஞ்சபீட²ம் வா அத்தனோ ஸந்தகேன பச்சத்த²ரணேன பச்சத்த²ரித்வாவ நிபஜ்ஜிதப்³ப³’’ந்தி ஹி அட்ட²கதா²யம் (சூளவ. அட்ட². 324) வுத்தம். இத³ஞ்ச ஆஸந்தா³தீ³னம்பி அஞ்ஞத²த்தகரணே பரிபோ⁴கே³ லக்க²ணவசனம். வுத்தஞ்ஹி ப⁴க³வதா ‘‘அனுஜானாமி பி⁴க்க²வே, ஆஸந்தி³யா பாதே³ சி²ந்தி³த்வா பரிபு⁴ஞ்ஜிதும், பல்லங்கஸ்ஸ வாளே பி⁴ந்தி³த்வா பரிபு⁴ஞ்ஜிதும், தூலிகம் விஜடேத்வா பி³ப்³போ³ஹனம் காதும், அவஸேஸம் பூ⁴மத்த²ரணம் காது’’ந்தி (சூளவ. 320).

191. சதுரம்ஸபீடா² ச…பே… பஞ்சங்கா³ ச உச்சபாத³கா கப்பந்தீதி அத்த²தோ வசனம் விபல்லாஸேத்வா ஸம்ப³ந்தி⁴தப்³ப³ம், ‘‘கப்பியா’’தி இமினா வா ஸம்ப³ந்தோ⁴ வேதி³தப்³போ³. தத்த² சத்தாரோ அம்ஸா கோணா யேஸம், தே ச தே பீடா² சாதி ஸமாஸோ. திண்ணம் அபஸ்ஸயானம், சதுன்னஞ்ச பாதா³னம் வஸேன ஸத்த அங்கா³னி யேஸந்தி ஸமாஸோ. ஏகாபஸ்ஸயஸ்ஸ வஸேன பஞ்சங்கா³. சதுரம்ஸபீடா²னம் விஸும் கப்பியபா⁴வஸ்ஸ வுத்தத்தா ஸத்தங்கா³த³யோ பன தீ³கா⁴தி விஞ்ஞாயந்தி. பாளியம் ப⁴த்தக்³க³ஸ்ஸ ஏகயோக³னித்³தி³ட்ட²த்தா ஏகயோக³னித்³தி³ட்டா²னம் ஸஹ வா பவத்தி, ஸஹ வா நிவத்தீதி க⁴ரேதி இமினா ப⁴த்தக்³க³ஸ்ஸபி க³ஹணம். ஏவ-ஸத்³தோ³ அட்டா²னப்பயுத்தோ, தஸ்மா தூலோனத்³தா⁴ மஞ்சபீடா² க⁴ரே வா ப⁴த்தக்³கே³ வா நிஸீதி³துமேவ கப்பந்தீதி ஸம்ப³ந்தோ⁴. தத்ராயம் பாளி ‘‘தேன கோ² பன ஸமயேன மனுஸ்ஸா ப⁴த்தக்³கே³ அந்தரக⁴ரே தூலோனத்³த⁴ம் மஞ்சம்பி பீட²ம்பி பஞ்ஞபேந்தி. பி⁴க்கூ² குக்குச்சாயந்தா நாபி⁴னிஸீத³ந்தி. ப⁴க³வதோ ஏதமத்த²ம் ஆரோசேஸும். அனுஜானாமி, பி⁴க்க²வே, கி³ஹிவிகடம் அபி⁴னிஸீதி³தும், ந த்வேவ அபி⁴னிபஜ்ஜிது’’ந்தி (சூளவ. 314). தே பன கரோந்தஸ்ஸ வா காராபேந்தஸ்ஸ வா உத்³தா³லனகம் பாசித்தியம்.

192. ஸானுலோமானம் ச²ன்னம் சீவரானம் அஞ்ஞதரம் சீவரம் ச²வி ஏதாஸந்தி விக்³க³ஹோ. பஞ்ச பி⁴ஸீதி சோளாதி³தூலக³ணனாய பஞ்சகா வுத்தா. ஸப்³ப³த்தா²தி விஹாரமஞ்சபீடா²தீ³ஸு ஸப்³ப³த்த².

193. தூலத்தயந்தி ஸிம்ப³லிருக்கா²தீ³னம் கீ²ரவல்லிஆதீ³னம் ஏரகாதீ³னம் திணானம் தூலத்தயம். பி⁴ஸிக³ப்³போ⁴ சோளாதி³கோ பஞ்சவிதோ⁴ பி⁴ஸிக³ப்³போ⁴. மிக³பக்கி²னம் லோமானீதி ஏதம் ஸப்³ப³ந்தி ஸேஸோ. மிக³-ஸத்³தே³னேவ ஸப்³பே³பி ஸீஹாத³யோ சதுப்பதா³, பக்கி²-ஸத்³தே³ன ஸப்³பே³பி ஹம்ஸமோராத³யோ க³ஹிதா. நனு ச பி⁴ஸிக³ப்³ப⁴ஸத்³த³ந்தோக³தா⁴ய உண்ணாய மிக³பக்கி²லோமானம்பி க³ஹணஸப்³பா⁴வேபி தேஸம் விஸும் க³ஹணே ஸதி புனருத்திதோ³ஸோ ஆபஜ்ஜதீதி? நாபஜ்ஜதி மனுஸ்ஸலோமபரிச்சாக³விபா⁴வனப்பயோஜனஸப்³பா⁴வதோ. நனு ச ஏவம்பி தோ³ஸோயேவ, ‘‘மனுஸ்ஸலோமமுண்ணாய’’ந்திஆதி³னா பி⁴ஸிக³ப்³பா⁴னம் உபரி நீயமானத்தா க³ம்யதே பி³ப்³போ³ஹனேபி அயமேவ பி⁴ஸிக³ப்³போ⁴தி? ஸச்சம், ததா²பி ந தோ³ஸோ, க³ம்யமானத்த²ஸ்ஸ ஸத்³த³ஸ்ஸ பயோக³ம் பதி காமசாரோதி. மஸூரகே தூலவஜ்ஜா அனுஞ்ஞாதாதி விபரிணாமேத்வா ஸம்ப³ந்தி⁴தப்³ப³ம். மஸூரகம் நாம சம்மச²விகா பி⁴ஸீதி வத³ந்தி.

194. உண்ணாயம் மனுஸ்ஸலோமஞ்ச பண்ணே ஸுத்³த⁴ம் தமாலகஞ்ச புப்ப²ஞ்ச அப்படிவேக்கி²தம் ஆஸனஞ்சேவ ந லப்³ப⁴ந்தி ஸம்ப³ந்தோ⁴. மனுஸ்ஸலோமந்தி இமினா ந கேவலம் இத⁴ ஏளகலோமமேவ உண்ணா, அத² கோ² கப்பியாகப்பியமம்ஸஜாதீனம் பக்கி²சதுப்பதா³னம் லோமம்பீதி த³ஸ்ஸேதி. புப்ப²ந்தி பியங்கு³ப³குலபுப்பா²தி³. தமாலகஸத்³தே³னேவ உபசாரதோ பத்தம் க³ஹேத்வா ‘‘தமாலக’’ந்தி வுத்தம். அப்படிவேக்கி²தந்தி அனுபபரிக்கி²தம். கீதி³ஸம் பன படிவேக்கி²தப்³ப³ம், கீதி³ஸம் ந படிவேக்கி²தப்³ப³ந்தி? யம் வினிச்ச²யதோ விஞ்ஞாதம், தம் ந படிவேக்கி²தப்³ப³ம், இதரம் ஹத்தே²ன பராமஸந்தேன படிவேக்கி²தப்³ப³ம்.

அகப்பியஸயனனித்³தே³ஸவண்ணனா நிட்டி²தா.